1. Ino nshiinshi Yesu nshaakalwiita basankwa beshikucata nswi bone, alimwi ino bakacita buyani?

BASHIKWIIYA Pita, Andulu, Jemusi, alimwi a Joni bakalinga beshikucata nswi. Amuyeeyebo mbobakakankamana Yesu ndyaakabalwita ayi: “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.” * Ino bakacita buyani? Baibo ilaamba ayi: ‘Ndyaakamanabo kwaamba boobo, bakashiya toombe twabo akumukonkela.’ (Mate. 4:18-22) Kusala uku kwakaalula shiinji mubuumi bwabo. Bakacileka ncito yabo yakucata nswi, akutalika ncito ‘yakucata bantu.’ (Luka 5:10) Amunshiku shino, Yesu atokwiita bantu bacite myoyo yakusuna kwiiya cancine. (Mate. 28:19, 20) Sa amwebo mwakabusumina bwiite bwakwe Yesu bwakuba beshikucata bantu?

2. Ino nceebonshi tulyeelete kutaanguna kuyeeyawo cakubikila maano katutana kusalawo kuba shikushimikila, alimwi ino nciinshi ceenga catucafwa?

² Mpashi mwaya panembo abuumbi mukwiiya Baibo kwanu, aboobo mwashika paciindi cakusalaawo na mulisuni kuba shikushimikila makani abotu. Na mutoowayawaya kusumina bwiite bwakwe Yesu, mutalinyumfwi cibiibi. Mpashi mutoowayawaya ceebo cakwaamba ayi mulishi ayi uku nkusala kuyandika abuumbi. Nabi kwaamba ayi Baibo ilatulwiita ayi Pita abaabo mbaakalingaabo bakashiya toombe twabo ‘Yesu ndyaakamanabo’ kubeeta, Pita amukwabo tabakwe kucita boobo kwakubula kuyeeyawo. Bakasumina  bwiite ubu kapeendite kale myeenshi iindilila 6 kuswa ciindi ndyebakashiba akusumina Yesu mbuli Mesiya. (Joni 1:35-42) Mpashi amwebo mweeya kale shiinji pali Yehova alimwi a Yesu, alimwi mulisuni kutolelela kuya panembo lwakumushimu. Nacibi boobo, mulyeelete kutaanguna kuyeeyawo cakubikila maano kamutana kusalawo kuba shikushimikila. Ino nciinshi cakacafwa Pita, Andulu, alimwi abamwi kusalawo kuba bashikwiiya?

3. Ino njimibo nshi yeenga yamupa kusuna kuba shikwiiya wakwe Yesu?

³ Bashikwiiya bakwe Yesu bataanshi bakalinga kusunishishi ncito yabo yakucata nswi. Bakalinga kwiishi kabotu, tabakalinga kucite boowa, alimwi bakaliisha kabotu. Ncakutatoonsha kwaamba ayi mibo yeenka iyi yakabacafwa kusebensa kabotu ncito yakushimikila makani abotu. Mumutwi uyu tutokwiiya nsheenga mwaciita kwaamba ayi munooshimikila akwiisha kabotu makani abotu.

4. Ino nciinshi cakapa Pita kuba shikucata nswi?

⁴ Pita wakalinga kusebensa ncito yakucata nswi kwaamba ayi anoocafwa mukwashi wakwe, nacibi boobo, taakalinga kusebenselabo ceeco ceenka. Wakalinga kwiisuni abuumbi incito iyi. (Joni 21:3, 9-15) Ici cakamucafwa kusuna ncito yakushimikila makani abotu. Alimwi kwiinda mulucafwo lwakwe Yehova, Pita wakasebensa kabotu abuumbi muncito iyi.​—Milimo 2:14, 41.

5. Kweelana a Luka 5:8-11, ino Pita wakaloonda nshi, alimwi ino nciinshi ceenga catucafwa kutalinyumfwa boobo?

⁵ Tulashimikila mukwiinga tulisuni Yehova; ici ncecinene citupa kwaamba ayi tunoocita ncito iyi. Kusuna Yehova inga kwatucafwa kushimikila pali nguwe nabi katulinyumfwa ayi inga tatucikoonshi. Yesu ndyaakeeta Pita kwaamba ayi abe shikucata bantu, wakamulwiita ayi: “Utaloondi.” (Amubelenge Luka 5:8-11.) Pita taakalinga kuloonda sheenga shacitika na  waba shikwiiya. Sombi wakakankamana akufula kwa nswi Yesu nshaakabacafwa kucata kwiinda mucaankamiko, aboobo wakalinyumfwa kuteelela kusebensa pomwi a Yesu. Mpashi amwebo inga mwalinyumfwa anga tamutokweelela na mwayeeya shiyandika kwaamba ayi muntu abe shikwiiya wakwe Klistu. Na mbomulinyumfwa ubo, amuyumye lusuno lwanu pali Yehova, Yesu, alimwi abantu bamwi. Lyalo mulaakucikonsha kusumina bwiite bwakwe Yesu bwakuba shikucata bantu.​—Mate. 22:37, 39; Joni 14:15.

6. Ino nshiinshi shimwi shituyuminisha kwaabanamo lubasu mukushimikila?

⁶ Amuyeeye shimwi shituyuminisha kwaabanamo lubasu mukushimikila. Tulisuni kukonkela mulawo wakaamba Yesu ayi: “Kamuya . . . akwiisha bantu kuba bashikwiiya.” (Mate. 28:19, 20) Alimwi tulashimikila mukwiinga bantu ‘balipengete anga nimbelele shitacite mweembeshi,’ aboobo batoyandika kwiishikwa cancine ca Bwaami. (Mate. 9:36) Yehova alisuni kwaamba ayi bantu bamishobo yoonse bashibe cancine akupuluka.​—1 Timo. 2:4.

7. Ino Bene Loma 10:13-15 ilaamba nshi citondesha kushimikila mbokuyandika?

⁷ Kuyeeya makani abotu mbwacafwa bantu mbotushimikila kulaakutuyuminisha kwaabanamo lubasu muncito iyi yakupulusha bantu. Mubupusano amuntu ucata nswi sha kuulisha na shakulya, ‘tulacata’ bantu kwaamba ayi tupulushe buumi bwabo.​—Amubelenge Bene Loma 10:13-15; 1 Timo. 4:16.

8-9. Ino shikucata nswi alyeelete kushiba nshi, alimwi ino nceebonshi?

⁸ Muciindi cakwe Yesu, shikucata nswi mwine Isilaeli wakalinga kweelete kushiba mushobo wa nswi nsheenga wacata. (Lefi 11:9-12) Alimwi wakalinga kweelete kushiba nkweenga wacana nswi. Inswi liinji shilekala mumaanshi ngoshisuni alimwi muli shakulya shiinji. Shikucata nswi alyeelete kushiba aciindi ceelete nceenga waya kumulonga. Kwaamba pamakani aciindi cibotu kucata nswi, Kamboni umwi ukala pansumbu ya Pacific wakalwiita mukwesu umwi mishonali ayi bakaye mukucata nswi. Aboobo mukwesu mishonali wakaamba ayi, “Tulaakubonana ciilo macuunsa pa 9 koloko.” Lyalo mukwesu uyu umwi wakakumbula ayi, “Tamutoonyumfwisha. Tulaya kumulonga paciindi nceenga mwacikonsha kucata nswi, kuteshi paciindi cili coonsebo ncomusuni sobwe.”

⁹ Bweenka ubu mbocakalinga akubeshikucata bantu bamuciindi ca batumwi, bakalinga kuya kumisena kucanika bantu alimwi apaciindi nceenga babacana. Kucakubonenaako, bashikwiiya bakwe Yesu bakalinga kushimikila mu tempele alimwi amuma sunagogi, kuŋanda aŋanda alimwi amumisena yamakwebo. (Milimo 5:42; 17:17; 18:4) Aswebo tulyeelete kubashiba kabotu bantu bakumusena nkotushimikila. Tulyeelete kuba balibambite kwaalula bubaambo mbotwakabika kwaamba ayi tucikoonshe kushimikila nkweenga twacaana bantu alimwi apaciindi nceenga twabacana.​—1 Koli. 9:19-23.

10. Ino libunga lyakwe Yehova lyatubambila nshi?

¹⁰ Shikucata nswi alayandika shisebensesho sheelete alimwi alyeelete kushiba kabotu bwakushisebensesha. Aswebo tulayandika shisebensesho sheelete muncito yakushimikila. Alimwi tulyeelete kushiba bwakushisebensesha. Yesu wakalwiita bashikwiiya bakwe bwakushimikila. Wakabalwiita nshobakalinga kweelete kubwesa, musena kwa kushimikila, alimwi amakani akushimikila. (Mate. 10:5-7; Luka 10:1-11) Munshiku shino, libunga lyakwe Yehova lyakatubambila Shitabatisho Nshetusebensesha Ndyetutokwiisha shitucafwa abuumbi kwiisha kabotu. * Alimwi tulayiishikwa ambweenga twashisebensesha. Ici cilatucafwa kushimikila cakutaloonda akwiiya bwakwiisha kabotu.​—2 Timo. 2:15.

11. Ino nceebonshi beshikucata bantu tabeelete kuloonda?

¹¹ Beshikucata nswi tabeelete kuba aboowa. Cimwi ciindi balacana mapensho akuteengashila ndyebali palweenge. Liinji balasebensa mashiku alimwi pamaanshi mpeenga cipuupu catalika ciindi cili coonse. Beshikucata bantu abalo tabeelete kuba aboowa. Na twatalika kushimikila akushibikwa mbuli Bakamboni Bakwe Yehova, mapensho ali anga ‘ncipuupu’ inga atalika kwiinda mukupikishikwa kubeshikamukowa, kusekwa kubaabo batushi, alimwi bamwi kukaka kukutika makani ngotutooshimikila. Ano ici tacitukankamiki. Yesu wakacenjesha ayi alaakutuma bashikwiiya bakwe kuya mukushimikila kubantu beshi bakanoobapikisha.​—Mate. 10:16.

12. Kweelana a Joshuwa 1:7-9, ino nciinshi ceenga catucafwa kutaba aboowa?

¹² Ino inga mwacita buyani kwaamba ayi mutanooba aboowa? Citaanshi, amushome cakutatoonsha kwaamba ayi Yesu ngototanjilila ncito iyi kuswa kwiculu. (Joni 16:33; Ciyu. 14:14-16) Cabili, amuyumye lushomo lwanu mucishomesho cakwe Yehova cakwaamba ayi alaakumulama. (Mate. 6:32-34) Mulaakucikonsha kuba muntu utaloondi na kamucite lushomo luyumu. Pita ababye bakatondesha lushomo luyumu ndyebakashiya ncito yabo yakalinga kubacafwa mubuumi, akuba bashikwiiya bakwe Yesu. Amwebo mwakatondesha lushomo lunene ndyemwakalwiita baabo bamushi abeshikamukowa kwaamba ayi mwakatalika kwiiya Baibo a Bakamboni Bakwe Yehova akutalika kucanika kumabungano! Alimwi ncakutatoonsha kwaamba ayi mwaalula  shiinji mubuumi bwanu kwaamba ayi mutalike kukonkela njiisho shakwe Yehova shiluleme. Kucita boobo kulayandika lushomo akutaloonda. Ndyemutootolelela kuyumya kutaloonda kwanu, inga mwashoma kwaamba ayi “Yehova Lesa wanu ali andimwe kuli koonse nkweenga mwaya.”​—Amubelenge Joshuwa 1:7-9.

13. Ino kukutumana akuyeeya alimwi akupaila inga shamucafwa buyani kutaloonda?

¹³ Ino nshiinshi shimwi sheenga shatucafwa kutaloonda? Amupaile kwaamba ayi Lesa amucaafwe. (Milimo 4:29, 31) Yehova alaakukumbula mipailo yanu alimwi teshi akacileeke kumucafwa. Alaakunoomucafwa lyoonse. Alimwi kuyeeya Yehova mbwakapulushawo bamwi muciindi cakwisule inga kwamucafwa. Amuyeeye ambwakamucafwa kukoma mapensho akumupa nkusu shakucikonsha kwaalula buumi bwanu. Ncakutatoonsha kwaamba ayi Lesa uyo wakatanjilila bantu bakwe pa Lweenge Lusalala, inga wamucafwa kuba shikwiiya wakwe Klistu. (Kulo. 14:13) Amutolelele kuba bashinishite bweenka mbuli shikulumbaisha wakaamba ayi: “Yehova ali kulubasu lwangu; teshi nkaloondeewo. Ino muntu inga wancita nshi?”​—Kulu. 118:6.

14. Ino nshiinshi nshomweeya kuswa kushakacitikila nankashi Masae alimwi a Tomoyo?

¹⁴ Cimwi ceenga camucafwa kutaba aboowa nkwiiya Yehova mbwakacafwa bamwi bakalinga kucite nsoni kuba bantu bataloondi. Amuyeeye cakubonenaako cakwe nankashi waliina lya Masae. Wakalinga wa nsoni abuumbi cakwaamba ayi wakalinga kwaalilwa kushimikila. Wakalinga kubona anga kubandika abantu mbateshiiwo ncintu ciyumu abuumbi nceenga taacikoonshi. Aboobo wakatalika kusebensa cankusu kucita shintu sheenga shamucafwa kukomenya lusuno lwakwe pali Yehova alimwi abantu bamwi. Wakayeeya ncito yakushimikila mboitoyandika pacecino ciindi alimwi akupaila kwaamba ayi Lesa ayumye lusuno lwakwe lwakushimikila. Wakacileka kuloonda alimwi wakacikonsha akusebensa bupainiya bwaciindi coonse. Yehova inga wacafwa abeshikushimikila bapya kuba bantu ‘bataloondi.’ Amuyeeye shakacitikila nankashi waliina lya Tomoyo. Ndyaakatalika kwaabanamo lubasu muncito yakushimikila kuŋanda aŋanda, muntu wakutaanguna ngobakafwakashila wakabakalalila akwaamba ayi: “Nshisuniiwo kubandika a Bakamboni Bakwe Yehova!” lyalo akucala kumulyaango. Tomoyo cakutaloonda wakalwiita nankashi ngwaakalinga kusebensaakwe ayi: “Sa mwanyumfwa nshobaamba? Kaantana kwaambawo acili coonse, banshiba ayi ndi Kamboni Wakwe Yehova. Ndakondwa abuumbi!” Nankashi Tomoyo ngu painiya waciindi coonse pacecino ciindi.

15. Ino muntu wakaliisha kabotu ngumuntu ucita buyani, alimwi ino nceebonshi kuliisha kabotu kulayandika ku Beneklistu?

¹⁵ Beshikucata nswi basebensa kabotu mbalya bakaliisha kabotu. Muntu wakaliisha kabotu ngooyo ucikonsha kukumanisha sheesho nshacishi ayi nshaeelete kucita. Beshikucata nswi basebensa kabotu ncito yabo balacita shintu nshobeshi ayi nshobeelete kucita. Balabuka macuunsa cuunsa akutolelela kusebensa ncito yabo nabi ndyekutana kuca kabotu. Aswebo tulyeelete kuliisha kabotu kwaamba ayi tutolelele kuliyumya akukumanisha ncito yesu.​—Mate. 10:22.

16. Ino nshiinshi sheenga shatucafwa kucita shintu nshetubona ayi nshiyumu?

¹⁶ Taakuwo muntu wakashalwa amubo wakuliisha. Liinji tulisuni kucita shintu nshetutobona ayi nshuubu kucita. Nacibi boobo, cimwi ciindi teshi cuubu kucita shintu shiyandika nshotweelete kucita. Aboobo tulayandika lucafwo lweenga lwatucafwa kwiiya kucita shintu nshetubona ayi nshiyumu. Yehova alatupa lucafwo ulu kwiinda mumushimu usalashi.​—Gala. 5:22, 23.

17. Kweelana a 1 Bene Kolinto 9:25-27, ino Paulo wakaamba ayi wakalinga kucita nshi kwaamba ayi abe muntu wakaliisha kabotu?

¹⁷ Mutumwi Paulo wakalinga muntu wakaliisha kabotu. Sombi wakaamba ayi “ndashibisha mubili wangu akuukoma” kwaamba ayi ncite ciluleme.  (Amubelenge 1 Bene Kolinto 9:25-27.) Wakayuminisha bamwi ayi balyeelete kuliisha akucita shintu “kweelana abubaambo.” (1 Koli. 14:40) Tulyeelete kuliisha kabotu kwaamba ayi tucikoonshe kutolelela kuba amulongo wakucita shintu shakumushimu, isho shiilikaawo akwaabanamo lubasu lyoonse muncito yakushimikila akwiisha bantu kuba bashikwiiya.​—Milimo 2:46.

18. Ino nshiinshi nshotweelete kucita kwaamba ayi Yehova abone ayi tutoosebensa kabotu muncito yakushimikila?

¹⁸ Na shikucata nswi kaacata nswi shiinji ndyeenga waamba ayi atosebensa kabotu. Ano ncito yakushimikila teshi mboibete. Mukwiinga kuswitilila kwa ncito iyi takwiimfwi pakufula kwabantu mbweenga twacikonsha kuleta mulibunga lyakwe Lesa. (Luka 8:11-15) Yehova alabona ayi tutoosebensa kabotu ncito iyi na twatolelela kushimikila akwiisha. Ino nciinshi ncetwaambila boobo? Twaamba boobo mukwiinga kutolelela kucita ncito iyi kulatondesha ayi tutoonyumfwila Yehova alimwi a Mwanaakwe.​—Maako 13:10; Milimo 5:28, 29.

19-20. Ino nshiinshi shimwi sheenga shatupa kuba alusuno lwakwaabanamo lubasu muncito yakushimikila makani abotu?

¹⁹ Mushishi shimwi, beshikucata nswi balasuminishikwa kucita boobo mumyeenshi imwi. Mushishi isho, shikucata nswi alasebensa cankusu na wabona ayi kwacaalabo ciindi ciniini kwaamba ayi bacale milonga. Mbuli beshikucata bantu, kuli acimwi citupa kwaamba ayi tusunishishe kushimikila makani abotu: Mamanino abweende bwashintu ubu ali pafwiifwi abuumbi! Ciindi cacaalaako kwaamba ayi tusebense ncito iyi yeshi ikape kwaamba ayi bantu bapuluke caceya abuumbi. Aboobo mutawayiwayi na kulindila ayi kushikila shintu shikabe kabotu, lyalo ndyeshi mukatalike kwaabanamo lubasu muncito iyi iyandika abuumbi.​—Shiku. 11:4.

²⁰ Cino nceciindi cakucita shintu sheenga shatupa kuba alusuno lwakwaabanamo lubasu mukushimikila makani abotu, kwiisha Baibo, kuba bantu batacite boowa, alimwi akuliisha kabotu. Amusebensele pomwi abantu beendilila 8 miliyoni batokwaabanamo lubasu muncito yakushimikila makani abotu, lyalo mulaakusangalala muli Yehova. (Neye. 8:10) Amube bashinishite kwaabanamo lubasu muncito iyi kushikila ciindi Yehova ndyeshi akaambe ayi kwamana. Mumutwi utokonkelaawo tulaakwiiya shintu shotatwe sheenga shatucafwa kuba alusuno lwakwaabanamo lubasu muncito yakushimikila makani abotu a Bwaami.