1. Isua’n sangha mantu palite chu eng ti tûrin nge a sâwm a, engtin nge an chhân lêt?

ZIRTIR Petera te, Andria te, Jakoba te, leh Johana te chu sangha mana ei zawng an ni a. Isua’n: “Mi zui rawh u; tichuan, mihring mantuah * ka siam ang che u,” tia a sâwm laia mak an tih dân tûr chu han mitthla teh. Engtin nge an chhân lêt? Bible chuan: “Lênte chu kalsanin an zui ta nghâl a,” tiin a sawi. (Mt. 4:18-22) An thu tlûkna siam chuan kumkhuain an nun a thlâk danglam ngei ang. Sangha tak tak man tawh lovin, “mihring” an man tawh zâwk dâwn a ni. (Lk. 5:10) Tûn laiah pawh, Isua chuan thutak ngainatu mi rilru ṭhate chu chutiang chuan a la sâwm reng a ni. (Mt. 28:19, 20) Mihring mantu ni tûra Isua sâwmna chu i pawm tawh em?

2. Engvângin nge mihring mantu ni tûra thu tlûkna siam chu kan ngaih pawimawh ang a, chutianga thu tlûkna siam tûrin engin nge min ṭanpui ang?

² Bible i zirnaah hma i sâwnin, chanchin ṭha hrila thuchhuahtu ni tûra thu tlûkna siam chu i duh mai thei. Isua sâwmna i pawm hreh deuh a nih pawhin lunghnual suh. Thu tlûkna pawimawh tak a ni tih i hriat avânga hreh pawh i ni mai thei a. Bible chuan Petera leh a ṭhiante’n sangha manna lên chu an kalsan “nghâl” tih a sawi a. Mahse, ngaihtuah hmasa lova chutianga thu tlûkna siam mai an ni lo. Anni chuan a hma thlaruk aia tamah khân Isua chu Messia a ni tih hriain, an pawm tawh a ni. (Joh. 1:35-42) Chutiang bawkin, Pathian Jehova leh Isua chungchâng tam tak i zir tawhin, thlarau lama  hmasâwn zawm zêl i duh pawh a ni thei. Mahse, thuchhuahtu ni tûra thu tlûkna i siam hmain ngun takin i ngaihtuah tûr a ni. A nih leh, Petera te, Andria te, leh mi dangte chu chutianga thu tlûkna siam tûrin engin nge ṭanpui?

3. Eng miziate’n nge Isua sâwmna i pawm duhna tizual ang?

³ Isua zirtîr hmasate chu ṭhahnemngai tak, hriatna ngah tak, huaisen tak, leh mahni inthunun thei takte an ni a. Chûng miziate chuan mihring mantu ṭha tak ni tûrin a ṭanpui ngei ang. He thuziakah hian Krista zirtîr ṭha tak i nih theih nâna chûng miziate i neih theih dân chu sawiho a ni ang.

4. Engvângin nge Petera chuan sangha a man?

⁴ Petera chuan a chhûngkaw châwm nân sangha a man ṭhîn a; mahse, chu chu a tân hna satliah mai a ni lo. Sangha man chu nuam a ti hle niin a lang. (Joh. 21:3, 9-15) Mihring mantu nih pawh nuam a ti hle bawk. Jehova ṭanpuinain, chu hna chu ṭha takin a thawk thei a ni.—Tirh. 2:14, 41.

5. Luka 5:8-11-na ṭanchhanin, engvângin nge Petera chu a hlauh va, chutiang hlauhna chu hneh thei tûrin engin nge min ṭanpui thei?

⁵ Mite hnêna thu hril tûra min chêttîrtu ber chu Jehova kan hmangaihna hi a ni a. Chu chuan tling tâwk lo nia kan inhriatna pawh hneh tûrin min ṭanpui thei a ni. Isua’n mihring mantu ni tûra Petera a sâwm khân: “Hlau suh,” tia a hrilh avângin hlauhna engemaw chen a nei a ni ngei ang. (Luka 5:8-11 chhiar rawh.) Petera hlauh chu Isua zirtîr a nih avânga a chunga thilthleng mai theite a ni lo. Chu aiin, Isua’n thil mak tia sangha tam tak a mantîr chu mak a tih êm avângin, amah nêna thawk dûn tûr chuan tling lo a inti zâwk  a ni. Petera angin, nang pawhin Krista zirtîr nihnain a ken telte i hriat hunah i huphurh mai thei. Chutiang a nih chuan, Jehova, Isua, leh i vêngte i hmangaihna chu tinghet lehzual rawh, chu chuan mihring mantu ni tûra Isua sâwmna pawm tûrin a chettîr ang che.—Mt. 22:37, 39; Joh. 14:15.

6. Thu hril tûra min chêttîrtu dang lehte chu eng nge ni?

⁶ Thu hril tûra chêttîra kan awm chhan dang lehte chu han ngaihtuah teh. Isua thupêk: “Kal ula . . . zirtîrahte siam ula,” tih hi zawm kan duh vâng a ni a. (Mt. 28:19, 20) Mite chu “hrehawm leh darha an awm” vâng leh Lalram chungchâng thutak zirtîr an ngaih tak zet vâng a ni bawk. (Mt. 9:36) Jehova chuan mi zawng zawng chu thutak hriatna dik nei tûr leh chhandama awm tûrin a duh a ni.—1 Tim. 2:4.

7. Rom 10:13-15-na chuan thu hrilh rawngbâwl pawimawhna chu engtin nge a târ lan?

⁷ Kan thu hrilh rawngbâwlnain mite chunga nghawng a neih theih dân kan ngaihtuah chuan, he nun chhanhimna hnaa tel tûra chêttîrin kan awm ang. Zawrh tûr leh ei tûr atâna sangha man ṭhîntu ang lo takin, keini chuan mite chu an nun chhanhim tûr zâwkin kan “man” a ni.—Rom 10:13-15 chhiar rawh; 1 Tim. 4:16.

8-9. Mihring mantu chuan eng nge a hriat ngai a, engvângin nge?

⁸ Isua hun laia Israel sangha mantu chuan a sangha man duh chu a hriat a ngai a. (Lev. 11:9-12) Sangha awmna tûr hmun pawh a hriat a ngai bawk. Sanghate chu an duh zâwng tui awmnaah leh an chaw tamna hmunah an awm tlângpui a ni. A nih leh, sangha mantu tân a man hun chu a pawimawh em? Sangha man hun ṭha ber chungchângah, Pacific thliarkâra chêng tualchhûnga Thuhretu pakhatin sangha man tûra missionary unaupa a sâwm ṭuma a sawi hi lo chhinchhiah ang che. Missionary unaupa chuan, “Naktûk zîng dâr kuaah kan inhmu dâwn nia,” tiin unaupa chu a hrilh a. Unaupa chuan, “Ni lo ve. Keimahni hman hun ni lovin, sangha man hun dik takah kan kal ang,” tiin a chhâng a ni.

⁹ Chutiang bawkin, kum zabi khatnaa mihring mantute pawh an mi man tûrte awmna hmun tûr leh an awm hun tûr âwmah an kal ṭhîn a. Entîr nân, Isua hnungzuitute chuan biak inah te, inkhâwmna inah te, in tinah te, leh dâwr hmunahte thu an hril a. (Tirh. 5:42; 17:17; 18:4) Keini pawhin, kan thu hrilhna bial chhûnga mite thiltih ṭhinte chu kan hriat chian a ngai a. Mi a tam thei ang ber kan hmuh theihna hmun leh huna thu hril thei tûrin kan insiamrem a ngai bawk.—1 Kor. 9:19-23.

10. Jehova inawpna pâwlin eng hmanruate nge min pêk?

¹⁰ Sangha mantu tân hmanraw dik tak neih leh a hman dân hriat a ngai a. Kan tân pawh, kan thu hrilh rawngbâwlnaah hmanraw dik tak kan neih a ngai a. Chûng hmanruate hman dân kan hriat a ngai bawk. Isua chuan a zirtîrte chu mihring man dân chungchângah kaihhruaina chiang tak a pe a. An thil ken tûr te, thu an hrilhna hmun tûr te, leh an thusawi tûrte thlengin a hrilh a ni. (Mt. 10:5-7; Lk. 10:1-11) Tûn laiah, Jehova inawpna pâwl chuan hmanraw ṭangkai tak tak awmna Zirtîrna Hmanraw Bâwm chu min pe a. * Chu bâkah, chûng hmanruate hman dân tûr chungchângah zirtîrna kan dawng bawk. Chûng zirtîrnate chuan thu hrilh rawngbâwlnaa hlawhtling tûra kan mamawh thiamna leh inrintâwkna nei tûrin min ṭanpui a ni.—2 Tim. 2:15.

11. Engvângin nge mihring mantute chuan huaisenna an neih a ngaih?

¹¹ Sangha mana ei zawngte chuan huaisenna an neih a ngai a. A châng chuan, tuipuiah hriat lâwk loh dinhmunte an hmachhawn a. Thlipui tleh thut thei dinhmun hnuaiah zân thim tak kârahte hna an thawk ṭhîn. Chutiang bawkin, mihring mantute pawhin huaisenna an neih a ngai a. Thu hrilhnaa kan tel ṭan a, Jehova Thuhretute kan ni tih kan lantîr hian, chhûngte dodâlna te, ṭhiante deusawhna te, leh kan thuchah hnâwlna ang chi “thlipui” chu kan hmachhawn mai thei a ni. Mahse, chu chu mak kan ti lo. Isua’n a hnungzuite chu hmêlmate zînga tirh an nih tûr thu a hrilh a ni.—Mt. 10:16.

12. Josua 1:7-9-na nêna inmilin, huaisenna nei tûrin engin nge min ṭanpui thei?

¹² Engtin nge huaisenna i neih theih? A hmasain, he thu hrilh rawngbâwlna hi Isua’n vân aṭangin a kaihruai zawm zêl tih ring tlat la. (Joh. 16:33; Thup. 14:14-16) A dawtah, nangmah ngaihsak tûra Jehova thutiam chu ring nghet tlat ang che. (Mt. 6:32-34) I rinna a ngheh poh leh huaisenna i nei lehzual ang. Petera leh a ṭhiante’n Isua zui tûra an eizawnna an kalsan khân, rinna nasa tak an lantîr a. Chutiang bawkin, Jehova Thuhretute nêna Bible in zir tih leh an inkhâwmnaahte i tel ṭan tih i ṭhiante leh i chhûngte i hrilh hian rinna nasa tak i lantîr a ni. Jehova tehna felte mila nung tûrin i nungchang leh i nun dân chu nasa takin i thlâk danglam tawh ngei ang.  Chutianga ti tûr pawhin rinna leh huaisenna neih a ngai a. Huaisenna i neih chhoh zêl rualin, “LALPA i Pathian chu i kalna apiangan i hnênah a awm zêl dâwn,” tih hi i ring tlat thei a ni.—Josua 1:7-9 chhiar rawh.

13. Engtin nge chhût ngunna leh ṭawngṭaina chuan huaisenna nei tûra a ṭanpui theih che?

¹³ Eng kawng dangtein nge huaisenna i neih theih? Huaisenna dîla ṭawngṭaina hmangin i nei thei a ni. (Tirh. 4:29, 31) Jehova chuan i ṭawngṭainate a chhâng ang a; chu bâkah, a thlahthlam ngai lo vang che. Ani chu ṭanpui che a inpeih reng a ni. Tûn hmaa mi dangte a chhan chhuah dânte i chhût ngun thei bawk. Pathianin harsatnate hmachhawn thei tûra a ṭanpui dân che leh i nun dân thlâk danglam tûra a ṭanpui dân che pawh ngaihtuah bawk ang che. Tuipui Sena a mite hruaitu chuan Krista zirtîr ni tûrin a ṭanpui thei che tih a chiang a ni. (Ex. 14:13) Fakna hla phuahtuin: “LALPA chu ka lama ṭang a ni; ka hlau lo vang. Mihringin eng nge mi tih theih ang?” tia a sawi angin Jehova chungah rinna i nghat ve thei a ni.—Sâm 118:6.

14. Unaunu Masae-i leh Tomoyo-i thiltawn aṭangin eng nge kan zir?

¹⁴ Huaisenna neih theih dân kawng dang leh chu Jehova’n huaisenna nei tûra mi zakzum takte a ṭanpui dân zirna hmangin a ni. Unaunu Masae-i thiltawn hi han ngaihtuah teh. Mi zakzum tak niin, thu hrilh rawngbâwlnaa a tel theih a inring ngai lo va. Hmêl hriat lohte be tûr anga a inngaihtuah chhin ringawt pawh hian, chu chu a lâwn kai theih ngai loh tûr bang sâng tak ang a ni. Chuvângin, Pathian leh a ṭhenawmte a hmangaihna chu tinghet lehzual tûrin hma a la a. Hun hmâwr tawh takah kan chêng tawh tih ngun taka a ngaihtuah bâkah, thu hrilh châkna nasa tak nei thei tûrin a ṭawngtai a ni. Tichuan, hlauhna a nei tawh lo va, regular pioneer niin rawng a bâwl tawh a ni. Jehova chuan thuchhuahtu tharte chu “huaisenna nei” tûrin a ṭanpui thei bawk. Unaunu Tomoyo-i thiltawn hi lo chhinchiah ang che. In tina thu hrilhnaa a chhuah vawi khatnaah, a tawn hmasak ber in neitu chuan: “Jehova Thuhretute nên engmah sawi dun ka duh lo!” tia lo vîn hrepin, kawngkâ a khâr ta sawk mai a. Tomoyo-i chuan a kawppui hnênah chuan dam takin: “Kha i lo hria em? Engmah ka sawi pawh ngai lovin, Jehova Thuhretu kan ni tih a hriat mai kha. Ka va lâwm tak êm!” tiin a sawi a. Tûnah chuan Tomoyo-i chu regular pioneer niin rawng a bâwl a ni.

15. Mahni inthununna chu eng nge ni a, engvângin nge chu chu Kristiante tân thil pawimawh tak a nih?

¹⁵ Sangha mantu hlawhtling tak chuan mahni inthununna a nei a. Mahni inthununna chu “thiltih ngaite tithei tûra mahni insiamrem theihna” tia hrilhfiah a ni ṭhîn. Sangha mana ei zawngte chu zîng hma taka tho tûrin an inthunun a ngai a, ni khua a ṭhat loh hunah pawh hna an zawh hma chu an thawh ṭâng ṭâng a ngai ṭhîn a ni. Chutiang bawkin, chhel taka kan rawngbâwlna hlen tûr chuan mahni inthununna kan neih a ngai a ni.—Mt. 10:22.

16. Engtin nge mahni inthununna kan neih theih?

¹⁶ Mahni inthununna chu kan pianpui lo va. Chutih a hnêkin, kawng awlsam ber zui duhna kan nei fo zâwk a ni. Mahni inthunun thei tûr chuan insûmtheihna kan neih a ngai a. Chuvângin, kan tâna tih harsa mai thei thilte ti thei tûrin ṭanpuina kan mamawh a. Jehova’n kan mamawh ṭanpuina chu a thlarau thianghlim hmangin min pe a ni.—Gal. 5:22, 23.

17. Korinth thawn khat 9:25-27-a chhinchhiah angin, tirhkoh Paula’n mahni inthununna nei tûra ṭan a lâk dân chu engtin nge a sawi?

 ¹⁷ Tirhkoh Paula chu mahni inthunun thei tak a ni a. Mahse, thil dik ti tûrin a taksa a ‘tihchhel’ a ngai tih a pawm a ni. (1 Korinth 9:25-27 chhiar rawh.) Ani chuan mi dangte chu mahni inthunun tûr leh thil zawng zawng “mawi tak leh fel taka” ti tûrin a fuih a. (1 Kor. 14:40) Keini pawh, thlarau lam hun duan ṭha tak nei tûrin mahni kan inthunun tûr a ni a, chutah chuan entîr nei mihring mannaa tel ziahna pawh a tel a ni.—Tirh. 2:46.

18. Engin nge Jehova mithmuha hlawhtling tak min nihtîr ang?

¹⁸ Sangha mana ei zawngtu chuan a hlawhtlinna chu a man tam dân azirin a teh a. Chumi nêna inkalh takin, keini chuan kan hlawhtlinna chu Pathian inawpna pâwla mi kan hruai luh tam dân aṭangin kan teh lo. (Lk. 8:11-15) Chanchin ṭha hrilhnaah leh mi dangte zirtîrnaah theih tâwp chhuaha kan tel chhûng chuan Jehova’n hlawhtling tak angin min thlîr ang. Engvângin nge? Amah leh a Fapa thu kan âwih avângin.—Mk. 13:10; Tirh. 5:28, 29.

19-20. Tûnah, thu hrilh chhan tûr ṭha tak eng nge kan neih?

¹⁹ Ram ṭhenkhatah chuan, thla engemawti chhûng chauh sangha man phal a ni ṭhîn a. Chutiang ramah chuan, sangha mantuin a man theih hun a zawh dâwn hnaih chuan sangha man chu a hmanhmawhthlâk lehzual niin a ngai ngei ang. Mihring mantute kan nih angin, tûna phûr taka thu hrilhnaa tel chhan tûr kan nei a ni: He khawvêl tâwpna hi a hnai tawh hle si a! He nun chhanhimna hna thawh hun hi a tlêm tawh hle a ni. Chuvângin, he hna pawimawh tak thawhnaa tel tûrin hun ṭha nghâkin, vuaicha suh.—Thur. 11:4.

²⁰ Tûnah hian i ṭhahnemngaihna te, Bible hriatna te, huaisenna te, leh mahni inthunun theihnate tipung tûrin hma la rawh. Mihring mantu mi maktaduai riat aia tamte zînga i tel ve chuan, Jehova chungah lâwmna i nei ang. (Neh. 8:10) He thu hrilh rawngbâwlna hi tihtâwp a nih hma chu theih tâwp chhuaha thawh tum tlat ang che. A dawta thuziakah chuan mihring mantu kan nih anga Lalram thu hrilh rawngbâwlnaa tel zawm zêl kan tumna kan tihngheh lehzual theih dân kawng thum sawiho a ni ang.