1. ¿Alkye txokbʼil xi tqʼoʼn Jesús kyiʼj kyaje xjal e aqʼunan tuʼn kytzyet pescad ex tiʼ bʼant kyuʼn?

TEJ tok Pedro, Andrés, Santiago ex Juan te t-xnaqʼtzbʼen Jesús, in che aqʼunantoq tiʼj tzyul pescad. Jaku txi qqʼamaʼn qa e jaw labʼin tej t-xi tqʼoʼn Jesús txokbʼil lu kyiʼj: «Che lpetze wiʼje, ex che okel nqʼoʼne tzyul xjal ik tzaʼn in che tzyet kyiẍ». * Pero ¿tiʼ bʼant kyuʼn? In tzaj tqʼamaʼn Tyol Dios jlu: «Jurattzun naj kyaj kyqʼoʼn kyxuybʼ ex e ok lpeʼ tiʼj Jesús» (Mat. 4:18-22). Chʼexpaj kyanqʼibʼil tuʼn jlu, tuʼnju ya mlaytoq che aqʼunan tuʼn kytzyet pescad, sino tuʼn kyjyon kyiʼj xjal (Luc. 5:10). Ax txokbʼil in xi tqʼoʼn Jesús kyiʼj xjal jaʼlo, aqeju at jun tbʼanel kyanmi ex kʼujlaʼn axix tok kyuʼn (Mat. 28:19, 20). ¿Ope txi tkʼamoʼn teya txokbʼil o tzaj tqʼoʼn Jesús tiʼja tuʼn toka te tzyul xjal ik tzeʼn tuʼn kytzyet pescad?

2. Qa qaj tuʼn qok te pakbʼal, ¿tiquʼn bʼaʼn tuʼn tel qpaʼn ambʼil tuʼn qximen tiʼj ex tiʼ jaku tzʼonin qiʼj?

² Bʼalo ya ma tzikʼ ambʼil in xnaqʼtzana tiʼj Tyol Dios ex in kubʼ t-ximana tuʼn toka te pakbʼal. Pero qa in tzaj xobʼa tuʼn t-xi tkʼamoʼna txokbʼil in xi tqʼoʼn Jesús teya, miʼn tzaj bʼaj tkʼuʼja. Bʼalo in bʼaj jlu tiʼja tuʼnju in nel tnikʼa tiʼj qa nim toklen txokbʼil lu. Ax tok, in tzaj tqʼamaʼn Tyol Dios qa  jun rat kyaj ttzaqpiʼn Pedro ex qe tukʼil kyxyubʼ tej t-xi qʼoʼn txokbʼil kyiʼj. Pero ximen Pedro ex Andrés tiʼjju bʼant kyuʼn. Otoq tzikʼ mas te qaq xjaw toklen kyojtzqiʼn Jesús ex otoq tzʼel kynikʼ tiʼj qa a Jesús aju Mesías (Juan 1:35-42). Ax ikx teya, bʼalo ya at nim tojtzqibʼila tiʼj Jehová ex tiʼj Jesús, ex taja tuʼn tok laqʼeʼya mas ttxlaj Jehová. Noqtzun tuʼnj, naʼmxtoq toka te pakbʼal, nim toklen tuʼn tel tpaʼna ambʼil tuʼn t-ximana tiʼj tiʼ t-xilen. ¿Tiʼ onin tiʼj Pedro, Andrés ex kyiʼj junjuntl tuʼn tbʼant jlu kyuʼn?

3. ¿Alkyeqe tiʼchaq jaku che onin qiʼj tuʼn ttzaj qkʼamoʼn txokbʼil in tzaj tqʼoʼn Jesús?

³ Aqeju tnejel xjal e ok te t-xnaqʼtzbʼen Jesús, attoq kykʼujlabʼil tiʼj Jehová, ten kyojtzqibʼil tiʼj axix tok, mintiʼ e tzaj xobʼ ex bʼaj kyxnaqʼtzan kyibʼ. Tkyaqil jlu onin kyiʼj tuʼntzun kyok te tbʼanel pakbʼal. Kʼonil xnaqʼtzbʼil lu qiʼj tuʼn tel qkanoʼn tiʼj techel kyaj kyqʼoʼn.

4. ¿Tiquʼn aqʼunan Pedro tiʼjju tuʼn kytzyet pescad?

⁴ Aqʼunan Pedro tuʼn kytzyet pescad tuʼntzun kykʼaʼchit toj tja. Pero nya oʼkx aqʼunan, sino ok tkʼujlaʼn taqʼun (Juan 21:3, 9-15). Ax ikx, ok tkʼujlaʼn aqʼuntl tuʼn kytzyet xjal tuʼn ik tzeʼn tuʼn kytzyet pescad. Tuʼn tonbʼil Jehová, ok te jun tbʼanel pakbʼal (Hech. 2:14, 41).

5. a) Ik tzeʼn in tzaj tqʼamaʼn Lucas 5:8 a 11, ¿tiquʼn tzaj xobʼ Pedro? b) Qa in tzaj xobʼ jun xjal in xnaqʼtzan tiʼj Tyol Dios ik tzeʼn te Pedro, ¿tiʼ jaku tzʼonin tiʼj?

⁵ Qaj tuʼn qpakbʼan tuʼnju kʼujlaʼn Jehová quʼn. Jaku tzʼonin kʼujlabʼil lu qiʼj tuʼn qpakbʼan maske in qo tzaj xobʼ. Tej t-xi tqʼoʼn Jesús txokbʼil tiʼj Pedro tuʼn tok te pakbʼal, xi tqʼamaʼn jlu te: «Miʼn  xobʼa» (kjawil uʼjit Lucas 5:8-11). Pero mintiʼ tzaj xobʼ Pedro tuʼnju kʼokeltoq te t-xnaqʼtzbʼen Jesús. ¿Tiquʼn? Tuʼnju otoq tzʼajbʼen tipumal Jesús tuʼn kyjatz nim pescad tuʼn Pedro ex tuʼn jlu kubʼ t-ximen qa mintiʼtoq toklen tuʼn taqʼunan tukʼil Jesús. ¿Yajtzun teya? ¿In tzajpe bʼaj tkʼuʼja aj t-ximana tiʼj tkyaqilju kbʼantel tuʼna aj toka te t-xnaqʼtzbʼen Jesús? Qa ikju, chʼiysama tkʼujlabʼila tiʼj Jehová, tiʼj Jesús ex kyiʼj xjal tuʼntzun tonin tiʼja tuʼn t-xi tkʼamoʼna txokbʼil in tzaj tqʼoʼn Jesús tuʼn toka te t-xnaqʼtzbʼen (Mat. 22:37, 39; Juan 14:15).

6. ¿Alkye junjuntl tiʼ jaku tzʼonin tiʼja tuʼn tpakbʼana?

⁶ Qo xnaqʼtzan kyiʼj junjuntl tiʼ jaku che onin tiʼja tuʼn tpakbʼana. Jun kyxol qe jlu, at aju tuʼn t-xi tnimana qe tyol Jesús lu: «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene» (Mat. 28:19, 20). Juntl tiʼ jaku tzʼonin tiʼja, aju qa ma ximana tiʼj qa kyaj xjal onbʼil tuʼnju in «che sikt ex in che bʼisun» ex kyaj tuʼn tok kybʼiʼn tbʼanel tqanil tiʼj Tkawbʼil Dios (Mat. 9:36). Taj Jehová tuʼn tel kynikʼ kykyaqil xjal tiʼj axix tok ex tuʼn kyklet (1 Tim. 2:4).

7. ¿Alkye tten in tzaj tyekʼin Romanos 10:13 a 15 qa nim toklen tuʼn qpakbʼan?

⁷ Juntl tiʼ jaku tzʼonin tiʼja tuʼn tpakbʼana, aju qa ma ximana tiʼj tzeʼn in nonin pakbʼabʼil kyiʼj xjal. Aju xjal in tzyun kyiʼj pescad, in bʼant jlu tuʼn tuʼn t-xi tkʼayin moqa tuʼn t-xi tchyoʼn. Atzun qe, in qo pakbʼan tuʼn kyklet xjal (kjawil uʼjit Romanos 10:13-15; 1 Tim. 4:16).

8, 9. ¿Tiʼ il tiʼj tuʼn tok tojtzqiʼn jun xjal tzyul pescad ex tiquʼn?

⁸ Toj tqʼijlalil Jesús, iltoq tiʼj tuʼn tel kynikʼ aj Israel tiʼj alkyeqe pescad jakutoq che tzyet kyuʼn (Lev. 11:9-12). Ex iltoq tiʼj tuʼn tel kynikʼ tiʼj jatumel jaku che kanet kyuʼn. Atz in che kubʼ ten pescad toj jun lugar mas tbʼanel toj kywitz ex jatumel at nim kywa. ¿Nimpe toklen tuʼn kyximen aqʼunal tiʼj or tuʼn kyxiʼ jyol pescad? Qo ximen tiʼjju xi tqʼamaʼn jun ermano te isla del Pacífico te jun misionero. Xi tqʼoʼn erman txokbʼil tiʼj misionero tuʼn t-xiʼ tzyul pescad tukʼil ex tqʼama misionero jlu: «Qo yolin nchiʼj a las 9 te prim». Atzunte ermano xi ttzaqʼweʼn jlu te: «Mlay che kanet pescad quʼn toj or aju. Atz tok or kyiʼj pescad ex nya qiʼj».

⁹ Chʼixmi ax jlu bʼant kyuʼn pakbʼal toj tnejel syent abʼqʼi. In che extoq jyol qe xjal toj or ex kyoj lugar jatumel jakutoq che kanet kyuʼn. Jun techel, e pakbʼan t-xnaqʼtzbʼen Jesús toj tja Dios, kyoj ja te kʼulbʼil, kytziyele ja ex kyoj plas (Hech. 5:42; 17:17; 18:4). Ax ikx qe, nim toklen tuʼn tok qojtzqiʼn toj alkye or jaku che kanet xjal quʼn jatumel in qo pakbʼan. Tuʼntzunju bʼaʼn tuʼn qxiʼ jatumel ateʼ xjal ex toj jun or jatumel jaku che kanet quʼn (1 Cor. 9:19-23).

10. ¿Alkyeqe onbʼil in tzaj tqʼoʼn ttnam Jehová qe?

¹⁰ In che ajbʼen junjun tiʼchaq kyuʼn xjal tzyul pescad ex ojtzqiʼn kyuʼn tzeʼn tuʼn kyajbʼen. Ax jlu tuʼn tbʼant quʼn. Xi tqʼoʼn Jesús junjun tqanil kye t-xnaqʼtzbʼen tiʼ tuʼn tbʼant kyuʼn aj kyxiʼ pakbʼal. Xi tqʼamaʼn kye tiʼ tuʼn t-xi kyiʼn, jatumel tuʼn kypakbʼan ex tiʼ tuʼn t-xi kyqʼamaʼn (Mat. 10:5-7; Luc. 10:1-11). Toj ambʼil jaʼlo, in tzaj tqʼoʼn ttnam Jehová qe onbʼil tuʼn qqʼon xnaqʼtzbʼil ex o tzʼel nikʼbʼaj tiʼj qa nim kyajbʼen. * Ax ikx o tzaj t-xnaqʼtzaʼn  qe tzeʼn tuʼn kyajbʼen quʼn. In nonin jlu qiʼj tuʼn tbʼant-xix qpakbʼan ex tuʼn miʼn qtzaj xobʼ (2 Tim. 2:15).

11. ¿Tiquʼn mintiʼ tuʼn kytzaj xobʼ pakbʼal?

¹¹ Tuʼn tok jun xjal te tzyul pescad, nim toklen tuʼn miʼn ttzaj xobʼ tuʼnju at maj at nim ola toj mar. Nya oʼkxju, chʼixme tkyaqil maj in che aqʼunan te qonikʼen ex at maj in tzaj jun kyqʼiqʼ jbʼal. Ax ikx kye pakbʼal tiʼj Tyol Dios mintiʼ tuʼn kytzaj xobʼ. Aj t-xi tzyet tuʼn qpakbʼan ex aj t-xi qqʼamaʼn qa testigo de Jehová qoʼ, jakulo qo ok weʼ twitz jun «kyqʼiqʼ jbʼal», toj juntl yol, twitz ikʼbʼil kyuʼn toj qja, twitz ikʼbʼil toj pakbʼabʼil ex aj kyok ten qamiw xmayil qiʼj. Pero mintiʼ in qo jaw labʼin tiʼj jlu, tuʼnju tqʼama Jesús qa che pakbʼal t-xnaqʼtzbʼen kyxol xjal nya bʼaʼn (Mat. 10:16).

12. Ik tzeʼn in tzaj tyekʼin Josué 1:7 a 9, ¿tiʼ jaku tzʼonin qiʼj tuʼn miʼn qtzaj xobʼ?

¹² ¿Tiʼ jaku tzʼonin tiʼja tuʼn miʼn ttzaj xobʼa? Tnejel, bʼaʼn tuʼn tok qeʼ tkʼuʼja tiʼj qa a Jesús nejni twitz aqʼuntl lu tzmax toj kyaʼj (Juan 16:33; Apoc. 14:14-16). Yajxitl, qeʼk tkʼuʼja tiʼj qa kxqʼuqil Jehová tiʼja ik tzeʼn o tzaj ttziyen (Mat. 6:32-34). Qa ma chʼiy qʼuqbʼil tkʼuʼja, kʼonil tiʼja tuʼn miʼn ttzaj xobʼa. Kubʼ tyekʼin Pedro ex qe tukʼil qa ten nim qʼuqbʼil kykʼuʼj tej tkyaj kytzaqpiʼn kyaqʼun tuʼntzun kyok lepeʼ tiʼj Jesús. Ax ikx teya kubʼ tyekʼina qʼuqbʼil tkʼuʼja tej t-xi tqʼamaʼna kye  toj tjaya ex kye tamiwa qa in xnaqʼtzana tiʼj Tyol Dios kyukʼil testigos de Jehová ex qa in bʼeta kyoj chmabʼil. Ex olo che bʼant chʼixpubʼil tuʼna toj tanqʼibʼila tuʼntzun tanqʼina ik tzeʼn taj Jehová. Iktzun tten o kubʼ tyekʼina qa at qʼuqbʼil tkʼuʼja ex qa mintiʼ in tzaj xobʼa. Qa kukx ma tzʼok tilil tuʼna tuʼn miʼn ttzaj xobʼa, jaku tzʼok qeʼ tkʼuʼja tiʼj qa ktel Jehová tukʼila noq jaxku tumel ktela (kjawil uʼjit Josué 1:7-9).

13. Qa ma naʼna Dios ex qa ma ximana tiʼjju o bʼant tuʼn Jehová, ¿tzeʼn jaku tzʼonin jlu tiʼja tuʼn miʼn ttzaj xobʼa?

¹³ ¿Tiʼ mas jaku tzʼonin tiʼja tuʼn miʼn ttzaj xobʼa? Bʼaʼn tuʼn t-xi tqanina te Jehová tuʼn tonin tiʼja tuʼn miʼn ttzaj xobʼa (Hech. 4:29, 31). Ktzajel ttzaqʼweʼn tnaʼj Diosa ex mlayx kyaj kolina tuʼn. Kukx ktel ttxlaja tuʼntzun tonin tiʼja. Ax ikx, ximana tiʼj tiʼ bʼant tuʼn Jehová tuʼn tkolin kyiʼj tmajen toj ambʼil ojtxe. Ex ximana tiʼj tzeʼn o tzʼonin tiʼja tuʼn texa twitz nya bʼaʼn ex tuʼn tbʼant chʼixpubʼil tuʼna toj tanqʼibʼila. Qa onin Jehová kyiʼj tmajen tuʼn kyikʼx toj mar Rojo, qeʼk tkʼuʼja tiʼj qa kʼonil tiʼja tuʼn toka te t-xnaqʼtzbʼen Jesús (Éx. 14:13). Tenx qʼuqbʼil tkʼuʼja ik tzeʼn te salmista tej tqʼama jlu: «Ate Qman at wukʼile, mlay chin xobʼe. Mintiʼ jun mya bʼaʼn jaku kybʼincha xjal wiʼje» (Sal. 118:6).

14. ¿Tiʼ xnaqʼtzbʼil jaku tzʼel tiʼna tiʼjju bʼaj tiʼj Masae ex Tomoyo?

¹⁴ Ex qa ma ximana tiʼj tzeʼn o tzʼonin Jehová kyiʼj qe xjal nyaxix kygan tuʼn kyyolin, jaku tzʼonin jlu tiʼja. Qo yolin tiʼjju bʼaj tiʼj jun ermana Masae tbʼi. Attoq nim t-xobʼil ex kubʼ t-ximen qa mlayxtoq yolin tiʼjju nimen tuʼn kyukʼil xjal. Kwest ela toj twitz tuʼn tyolin kyukʼil xjal nya ojtzqiʼn qe tuʼn. Tuʼntzunju, ok tilil tuʼn tuʼn tchʼiy tkʼujlabʼil tiʼj Jehová ex kyiʼj xjal. Ximen tiʼj qa in qo anqʼin toj bʼajsbʼil tqʼijlalil ex xi tqanin te Dios tuʼn tonin tiʼj tuʼn tpakbʼan. Onin jlu tiʼj tuʼn ya miʼn ttzaj xobʼ, axpe ikx ok te precursora regular. Ax ikx jaku tzʼonin Jehová kyiʼj akʼaj pakbʼal tuʼn miʼn kytzaj xobʼ, ik tzeʼn in tzaj tqʼamaʼn Josué 1:7 ex 9. Ax ikx, ximana tiʼjju bʼaj tiʼj jun ermana Tomoyo tbʼi. Toj qʼij tej t-xi tzyet tuʼn tpakbʼan ttziyele ja, etz jun xuʼj ex tqʼama jlu tuʼn tkyaqil tqʼajqʼajel twiʼ: «¡Nya waje tuʼn tok nbʼiʼne jun tiʼ kyiʼj testigos de Jehová!», ex etz tlamoʼn ja twitz. Mintiʼ tzaj bʼaj tkʼuʼj Tomoyo ex xi tqʼamaʼn jlu te juntl ermana: «¿Mape tzʼok tkeʼyina? Mintiʼ ma txi nqʼamaʼne jun tiʼ te ex ya bʼiʼntoq tuʼn qa testigos de Jehová qoʼ. ¡Tbʼanelxix!». Jaʼlo o tzʼok Tomoyo te precursora regular.

15. ¿Tiʼ t-xilen aju tuʼn t-xi qxnaqʼtzan qibʼ ex tiquʼn nim toklen jlu kye tmajen Jehová?

¹⁵ Aju tuʼn t-xi qxnaqʼtzan qibʼ, atz in yolin jlu tiʼjju tuʼn tok qchqʼon qibʼ tuʼn tkubʼ qbʼinchaʼn aju in kubʼ qximen. Aju xjal in naqʼunan tuʼn kytzyet pescad, in xi t-xnaqʼtzan tibʼ tuʼn tjaw weʼ naj, tuʼn tkubʼaj taqʼun ex tuʼn kukx tjyon kyiʼj pescad maske at maj nya bʼaʼn taʼ ambʼil. Ax ikx qe, il tiʼj tuʼn t-xi qxnaqʼtzan qibʼ qa qaj tuʼn kukx tikʼx quʼn ajxi tkubʼaj qaqʼun (Mat. 10:22).

16. ¿Tiʼ jaku tzʼonin qiʼj tuʼn t-xi qxnaqʼtzan qibʼ?

¹⁶ Aj qul itzʼj nya xnaqʼtzaʼn maj qoʼ ex qgan tuʼn miʼn tok tilil quʼn tuʼn qaqʼunan. Tuʼntzunju, il tiʼj tuʼn qjakʼunte qib. Qa qaj tuʼn t-xi qbʼinchaʼn qe tiʼchaq kwest in che ela toj qwitz, il tiʼj tuʼn t-xi qqanin onbʼil. Ex in tzaj tqʼoʼn Jehová onbʼil lu tuʼn xewbʼaj xjan (Gál. 5:22, 23).

17. Ik tzeʼn in tzaj tqʼamaʼn 1 Corintios 9:25 a 27, ¿tiʼ bʼant tuʼn Pablo tuʼn tbʼaj t-xnaqʼtzan tibʼ?

 ¹⁷ Otoq bʼaj t-xnaqʼtzan tibʼ apóstol Pablo tuʼn tbʼant tjakʼunte tibʼ, pero tqʼama qa bʼaj tkʼixbʼisaʼn t-xmilal tuʼn tkubʼ tbʼinchaʼn aju bʼaʼn (kjawil uʼjit 1 Corintios 9:25-27). Xi tqʼamaʼn kye erman tuʼn tbʼaj kyxnaqʼtzan kyibʼ ex tuʼn t-xi kybʼinchaʼn tkyaqil «tuj tumel ex tuj ttxolil» (1 Cor. 14:40). Atzun jlu jaku tzʼonin qiʼj tuʼn tok tilil quʼn tuʼn qajbʼen te Jehová ik tzeʼn tuʼn qpakbʼan (Hech. 2:46).

18. ¿Tiʼ il tiʼj tuʼn tbʼant quʼn tuʼntzun ttzalaj Jehová tiʼj qaqʼun?

¹⁸ Jun xjal in naqʼunan tuʼn kytzyet pescad, in nel tnikʼ tiʼj qa tbʼanel taqʼun in bʼant qa otoq che tzyet nim pescad tuʼn. Atzun qe, mintiʼ in kubʼ qximen qa tbʼanel qaqʼun in bʼant noq tuʼnju in che oktz nim xjal quʼn toj ttnam Jehová (Luc. 8:11-15). Qa kukx in qo pakbʼan tiʼj tbʼanel tqanil ex in xi qqʼoʼn xnaqʼtzbʼil kye txqantl, ktzalajel Jehová tiʼj qaqʼun in bʼant. ¿Tiquʼn? Tuʼnju in qo nimen te ex te Tkʼwal (Mar. 13:10; Hech. 5:28, 29).

19, 20. ¿Alkye juntl tiquʼn nim toklen tuʼn qpakbʼan jaʼlo?

¹⁹ Toj junjun tnam, oʼkx kyoj junjun xjaw jaku che kanet pescad kyuʼn xjal. Ex aj tok kybʼiʼn qa chʼix tkubʼaj ambʼil tuʼn kykanet pescad, mas in nok tilil kyuʼn. Ax ikx qe, il tiʼj tuʼn tok tilil quʼn tuʼn qpakbʼan toj ambʼil jaʼlo tuʼnju mas nqayin taʼ ambʼil tuʼn tkubʼ xiten tkyaqilju nya bʼaʼn. Nya nim ambʼil atx tuʼn qpakbʼan kye xjal tuʼntzun kyklet. Miʼn kubʼ t-ximana tuʼn texa pakbʼal tzmaxi aj tul jun tbʼanel ambʼil toj tanqʼibʼila (Ecl. 11:4).

²⁰ Atzun ambʼil lu tuʼn tchʼiy tkʼujlabʼila tiʼj Jehová, tuʼn tel mas tnikʼa tiʼj Tyol, tuʼn miʼn ttzaj xobʼa ex tuʼn tbʼaj t-xnaqʼtzan tibʼa. Mojbʼank tibʼa kyukʼil qeju mas te 8 millón pakbʼal twitz tkyaqil Txʼotxʼ, ex kbʼel tnaʼna tzalajbʼil in tzaj tukʼil Jehová (Neh. 8:10). Bʼaʼn tuʼn tkubʼ t-ximana tuʼn tok tilil tuʼna tuʼn tpakbʼana tzmaxi aj ttzaj tqʼamaʼn Jehová qa ya mlay qo pakbʼan. Toj juntl xnaqʼtzbʼil, kʼelel qnikʼ tiʼj oxe tiʼ kʼonil qiʼj tuʼn kukx tok tilil quʼn tuʼn qpakbʼan tiʼj tbʼanel tqanil tiʼj Tkawbʼil Dios.