1. ¿Toni kinyoleuak Jesús maj kichiuanij naui takamej akin kitemouayaj pescados, uan toni kichiujkej?

PEDRO, Andrés, Santiago uan Juan, akin katkaj itatojtokakauan Jesús, kintemouayaj pescados, uan xa semi kimoujkakakkej keman Jesús kinyoleuak: “Xinechtoktilikan. Uan ijkon keme nantakitskiani ika pescados, no ijkon Nejuatsin namechchiuas ke nankintemoske tagayot para ma nechtoktilikan”. ¿Toni kichiujkej? Biblia kijtoua: “Nimantsin in Simón uan in Andrés kikauke ninmatau uan kitoktilijke” (Mat. 4:18-22). Tein kichiujkej senkis kipataskia ininnemilis, porin amo kintemoskiajok pescados, ta kintemoskiaj taltikpakneminij uan kinpaleuiskiaj maj mochiuanij itatojtokakauan Jesús (Luc. 5:10). Axkan, Jesús no kinyoleua akin kipatiuitaj tein melauak maj kichiuakan nejon (Mat. 28:19, 20). ¿Tikonseliani itayoleualis Jesús uan tikonpaleuia oksekin maj mochiuakan itatojtokakauan?

2. ¿Keyej moneki kuali tiknemiliskej ox timochiuaskej tanojnotsanij, uan toni techpaleuis maj tikixtalikan nejon?

² Tejuatsin xa uejkaujya tionmomachtijtok Biblia uan axkan moneki tikonixejekos ox tikonneki tikonteixmatiltis iTajtol Dios. ¿Tionmotajtania ox uelis tikonselis itayoleualis Jesús? Komo ijkon, amo xionmotekipacho. Xa tionmotajtania nejon porin tikonmati ke se taman tein semi moneki. Melauj ke Biblia kijtoua ke Pedro uan akin iniuan tekitia “nimantsin [...] kikauke ninmatau”. Sayoj ke Pedro uan iikniuj, Andrés, kuali kinemilijkej toni kichiuaskiaj. Chikuasen metsti achtoya kiixmatkaj Jesús uan kineltokayaj ke yejua katka Mesías (Juan 1:35-42). No ijkon, tejuatsin xa tionmomachtiani akoni Jiova uan Jesús uan tikonmatikya miak taman, uan tikonneki okachi  kuali tionmouikas iuan Jiova. Sayoj ke achto ke tikonixtalis tionmochiuas tanojnotskej moneki kuali tikonnemilis. ¿Toni kinpaleuij Pedro, Andrés uan oksekin maj kiixtalianij mochiuaskej itatojtokakauan Jesús?

3. ¿Toni naui taman techpaleuis maj tikselikan itayoleualis Jesús?

³ Yekinika itatojtokakauan Jesús kinekiaj kichiuaskej tekit tein kipiayaj, kimatiaj keniuj kichiuaskej, katkaj yolchikaujkej uan mochikauayaj kichiuaskej. Nochi nejin kinpaleuij maj kuali kiteixmatiltianij iTajtol Dios. Nejin tamachtilis techpaleuis maj tikitakan keniuj uelis tikchiuaskej kemej yejuan.

4. ¿Keyej Pedro kintemouaya pescados?

⁴ Pedro kintemouaya pescados porin ijkon kinixpanoltiaya ichankauan. Maski ijkon, amo kiitaya sayoj kemej se tekit, ta semi kiuelitaya kichiuas (Juan 21:3, 9-15). Keman mochiuak itatojtokakauj Jesús, no semi kiuelitak kinpaleuis oksekin maj mochiuanij itatojtokakauan. Ika inepaleuil Jiova, semi kuali kichiuak nejon tekit (Hech. 2:14, 41).

5. 1) Kemej kijtoua Lucas 5:8-11, ¿keyej mouia Pedro? 2) Komo se akin momachtijtok Biblia momachilia kemej Pedro, ¿toni uelis kipaleuis?

⁵ Tein okachi techolinia maj titanojnotsakan yejua netasojtalis tein tikpialiaj Jiova. Komo tiknemiliaj ke amo uelis titanojnotsaskej, nejon netasojtalis uelis techpaleuis maj amo ijkon titanemilikan. Keman Jesús kiyoleuak Pedro maj mochiua itatojtokakauj, kiluij: “Amo ximoyolmoutij” (xikonixtajtolti Lucas 5:8-11). Nejin amo kijtosneki ke Pedro mouia mochiuas itatojtokakauj Jesús, sayoj ke kemej semi kimoujkaitak keman Jesús kichiuak maj kisentilianij miakej  pescados, kimachiliaya ke amo kinamikia tekitis iuan. ¿No tionmomachilia kemej Pedro uan tionmotekipachoua keman tikonnemilia nochi tein moneki tikonchiuas uan ijkon uelis tionyeski itatojtokakauj Cristo? Komo ijkon tionmomachilia, xikonchikaua netasojtalis tein tikonpialia Jiova, Jesús uan oksekin, uan nejon kichiuas xikonneki tikonselis itayoleualis Jesús uan tionmochiuas itatojtokakauj (Mat. 22:37, 39; Juan 14:15).

6. ¿Toni okseki taman techolinia maj titanojnotsakan?

⁶ Maj tikitakan okseki taman tein techolinia maj titanojnotsakan. Se yejua ke tiknekij tiktakamatiskej tein tanauatij Jesús: “Xiyakan [...] uan xikinnextilikan nochi in taltikpakuani ma yejuan no ma mochiuakan nomomachtijkauan” (Mat. 28:19, 20). Okse yejua ke taltikpakneminij ‘tajyouiaj uan tayokoyaj’, uan yejua ika moneki kimatiskej tein kichiuas iTekiuajyo Dios (Mat. 9:36). Jiova kineki maj nochin kiixmatikan tein melauak uan maj makisakan (1 Tim. 2:4).

7. ¿Keniuj kinextia 1 Timoteo 2:3, 4 ke semi moneki titanojnotsaskej?

⁷ Komo tikonnemilia keniuj tanojnotsalis uelis kinpaleuis taltikpakneminij, tikonnekis tiontanojnotsas. Akin kintemoua pescados kinnamaka oso kinkua, sayoj ke tejuan tikintemouaj taltikpakneminij porin tiknekij tikinpaleuiskej maj makisakan (xikonixtajtolti 1 Timoteo 2:3, 4; 1 Tim. 4:16).

8, 9. ¿Toni moneki kimatis akin kintemoua pescados, uan keyej?

⁸ Itech itonaluan Jesús, akin kintemouayaj pescados monekia kimatiskej toni taman pescados ueliskia kinkixtiskej (Lev. 11:9-12). No monekia kimatiskej kani kinajsiskej. Miakpa, pescados yetokej kampa onkak tein kikuaskej uan kampa at moajsi kemej kiuelitaj. Akin kintemouaj pescados no moneki kimatiskej toni hora okachi uelis kinajsiskej. Maj tikitakan tein monojnotskej se tokniuj takat akin nemi itech se tal tein moajsi tatajko ueyiat ompa Pacífico uan se misionero. Tokniuj takat kiyoleuak maj kintemotij pescados uan misionero kiluij: “Timoitaj mosta chiknaui hora kualkan”. Sayoj ke tokniuj takat kinankilij: “Amo ijkon se kichiua nejin tekit. Moneki tiaskej itech hora keman uelis tikinajsiskej pescados, amo keman tejuan tiueliskej”.

⁹ No ijkon, itatojtokakauan Cristo itech yekinika siglo tanojnotsayaj kampa okachi ueliskiaj kinajsiskej taltikpakneminij uan itech horas keman taltikpakneminij okachi ueliskiaj. Kemej neskayot, tanojnotsayaj itech templo, itech sinagogas, kajkalpan uan kampa tanamakayaj (Hech. 5:42; 17:17; 18:4). Tejuan no moneki tikmatiskej toni hora uan kani okachi uelis tikinajsiskej taltikpakneminij, uan tikixtaliskej ijkuak titanojnotsaskej (1 Cor. 9:19-23).

10. ¿Toni nepaleuilmej techmaka inechikol Jiova?

¹⁰ Akin kintemouaj pescados moneki kipiaskej tein ika kintemoskej uan kimatiskej keniuj kikuiskej. Itech tanojnotsalis no ijkon panoua. Jesús kiniluij imomachtijkauan keniuj monekia kintemoskej taltikpakneminij. Kiniluij toni monekia kiuikaskej, kani tanojnotsaskej uan toni kijtoskej (Mat. 10:5-7; Luc. 10:1-11). Axkan, inechikol Jiova techmaka nepaleuilmej tein ika titamachtiaj, tein kipia amaixmej uan videos tein semi tapaleuiaj. Uan no techmachtiaj keniuj tikuiskej. * Nejon tamachtilis techpaleuia maj amo timouikan titanojnotsaskej uan maj tikmatikan keniuj tikchiuaskej (2 Tim. 2:15).

11. ¿Keyej moneki tiyeskij tiyolchikaujkej akin tikteixmatiltiaj iTajtol Dios?

¹¹ Akin kintemouaj pescados moneki yeskij yolchikaujkej, porin itech ueyiat uelis panos miak taman. Miakpa moneki tekitiskej youak uan kemansa peua kioui chikauak. Akin tikteixmatiltiaj iTajtol Dios no moneki tiyeskij tiyolchikaujkej. Keman peua titanojnotsaj uan timoteixmatiltiaj kemej itaixpantijkauan Jiova, uelis tikpiaskej ouijkayomej: tochankauan xa techixnamikiskej, akin iniuan timouikayaj xa techpijpinaujtiskej uan taltikpakneminij xa amo kinekiskej techkakiskej. Sayoj ke tikmattokejya ke panos nejon, porin Jesús kinnejmachtij itatojtokakauan ke taltikpakneminij kinixnamikiskiaj (Mat. 10:16).

12. Kemej kijtoua Josué 1:7-9, ¿toni techpaleuis maj tiyolchikaujkej?

¹² ¿Toni mitsonpaleuis xikonpia yolchikaualis? Yekinika, xikonneltoka ke Jesús kisentoka kiixyekana tanojnotsalis (Juan 16:33; Apoc. 14:14-16). Ompa, xiontakuaujtamati ke Jiova mitsonyekpias ijkon kemej yejuatsin kijtoua (Mat. 6:32-34). Komo okachi tiontakuaujtamati, okachi tikonpias yolchikaualis. Pedro uan akin iniuan tekitia kinextijkej ke semi takuaujtamatiaj keman kikaujkej tekit tein kipiayaj uan kitojtokakej Jesús. Tejuatsin no tikonnextij ke tiontakuaujtamati keman tikoniluij akin iniuan tionmouika uan mochankauan ke tionmomachtijtok Biblia iniuan itaixpantijkauan Jiova uan tionyajtok ininnechikoluan. Uan xa amo tikonchiuaok miak  taman tein achto tikonchiuaya porin tikonneki tikontakamatis itanauatiluan Jiova. Ijkon no tikonnextij ke tiontakuaujtamati uan ke tionyolchikauak. Komo tikonsentoka tikontemoua tikonpias yolchikaualis, uelis tiontakuaujtamatis ke Jiova nochipa mitsonpaleuis (xikonixtajtolti Josué 1:7-9).

13. ¿Keniuj komo tikontataujtia Jiova uan tiontanemilia itech seki taman mitsonpaleuis xikonpia yolchikaualis?

¹³ ¿Toni no mitsonpaleuis xikonpia yolchikaualis? Xikontajtani Jiova maj mitsonpaleui xionyolchikauak (Hech. 4:29, 31). Yejuatsin mitsonnankilis uan amo keman mitsonkauas. Nochipa mitsonpaleuis. Uan no xikonnemili keniuj Jiova kinmakixtij itekitikauan ne uejkauj. No xikonnemili keniuj mitsonpaleuiani keman tikonpiani ouijkayomej uan keniuj mitsonpaleuij xikonkaua seki taman tein achto tikonchiuaya. Komo kinpaleuij israelitas maj kipanauianij ueyiat Chichiltik, no uelis mitsonpaleuis xionmochiua itatojtokakauj Cristo (Éx. 14:13). No xiontakuaujtamati iuan Jiova kemej salmista akin kijtoj: “Jiova nouan yetok, amo nimouis. ¿Toni uelis nechchiuilis taltikpaknenkej?” (Sal. 118:6).

14. ¿Toni mitsonmachtia tein kinpanok Masae uan Tomoyo?

¹⁴ No mitsonpaleuis xikonpia yolchikaualis komo tikonnemilia keniuj Jiova kinpaleuiani maj yolchikaujkej tokniuan akin pinauaj tajtoskej. Maj tikitakan tein kipanok se tokniuj siuat akin monotsa Masae. Kinemiliaya ke amo keman ueliskia tanojnotsas porin semi pinauaya. Kiitaya ke semi ouij katka kinnojnotsas akin amo kinixmatia, kemej yeskia se ueyi tepet kampa amo ueliskia tejkos. Yejua ika mochikauak okachi kitasojtas Dios uan oksekin. Kinemilij keyej semi moneki se tanojnotsas axkan, uan kitataujtij Dios maj kipaleuiani maj kinekini okachi tanojnotsas. Nejon kipaleuij maj amo mouiok uan hasta mochiuak precursora regular. Jiova no uelis kinpaleuis maj yolchikaujkej akin yankuixtok mochiujkej tanojnotsanij, kemej kijtoua Josué 1:7, 9. Maj tikitakan tein kipanok se tokniuj siuat akin monotsa Tomoyo. Keman yekinika tanojnotsato kajkalpan, siuat akin kisak itech yekinika kali kitsajtsilij: “¡Amo nikneki nikinkakis itaixpantijkauan Jiova!”, uan kitatsakuilij. Tomoyo amo mouik, ta kiluij tokniuj siuat akin iuan yaya: “¿Tikitak tein panok? Ayamo teyi nikijtouaya, uan siuat kimatiaya ke niitaixpantijkauj Jiova. ¡Semi niyolpaki!”. Axkan Tomoyo precursora regular.

15. Ijkon kemej akin kintemouaj pescados, ¿keyej tiitatojtokakauan Cristo no moneki timochikauaskej?

¹⁵ Akin kintemouaj pescados moneki mochikauaskej kichiuaskej tekit tein kipiaj. Kemej neskayot, moneki meuaskej kualkan, mokauaskej hasta matamiskej uan kisentokaskej kintemoskej pescados maski kioujtos. Tiitatojtokakauan Cristo no moneki timochikauaskej komo tiknekij titaxikoskej hasta timatamiskej tekit tein tikpiaj (Mat. 10:22).

16. ¿Toni uelis techpaleuis maj tikchiuakan tein tikitaj ke ouij?

¹⁶ Miakpa, tikuelitaj tikchiuaskej tein amo ouij. Sayoj ke, tein okachi moneki se kichiuas kemansa ouij, yejua ika moneki timochikaujtiaskej tikchiuaskej, uan Jiova techpaleuia ika iyektikatsin espíritu. Ika inepaleuil uelis tikchiuaskej tein tikitaj ke ouij (Gál. 5:22, 23).

17. ¿Toni kijtoj Pablo itech 1 Corintios 9:25-27 ke monekia kichiuas?

¹⁷ Tatitanil Pablo mochikauaya kichiuas tein monekia, sayoj ke kijtoj ke monekia ‘kitajyouiltis itakayoʼ uan ijkon ueliskia kichiuas tein kuali (xikonixtajtolti 1 Corintios 9:25-27). Kinnauatij tokniuan maj mochikauanij kichiuaskej  tein monekia uan kiniluij: “Nochi xikchiuakan ika nejmach uan ka kuali” (1 Cor. 14:40). Tejuan no moneki timochikauaskej uan ijkon uelis tiksentokaskej tikchiuaskej tein ika tikueyichiuaj Jiova, kemej tikteixmatiltiskej iTajtol uan titamachtiskej (Hech. 2:46).

18. ¿Toni moneki tikchiuaskej komo tiknekij maj Jiova kiita ke kuali tikchiuaj tekit tein tikpiaj?

¹⁸ Akin kintemouaj pescados kijtouaj ke kuali kichiuaj inintekiuj keman kinajsij miakej. Sayoj ke itech tanojnotsalis amo ijkon panoua. Jiova amo kiita ke kuali tikchiuaj nejon tekit komo ueli tikinpaleuiaj miakej maj mochiuakan itatojtokakauan Cristo (Luc. 8:11-15). Kiita ke kuali tikchiuaj komo tiksentokaj titanojnotsaj uan tikinmachtiaj oksekin. ¿Keyej? Porin tikchiujtokej tein Jiova uan iKonetsin technauatiaj (Mar. 13:10; Hech. 5:28, 29).

19, 20. ¿Toni okse taman kichiua maj titanojnotsakan?

¹⁹ Itech seki altepemej, akin kintemouaj pescados sayoj kinkauaj maj kintemokan itech seki metsti. Yejuan kimatij ke keman tamitia nejon tonalmej, moneki okachi mochikauaskej kintemoskej. Moajsi okse taman tein kichiua maj tiitatojtokakauan Cristo timochikauakan titanojnotsaskej: ke amo uejkaua Jiova kiixpolosya tein amo kuali. Amo tikpiajok miak tonalmej, yejua ika moneki titanojnotsaskej uan tikinpaleuiskej oksekin maj makisakan. Amo xikonnemili ke moneki tionmochias hasta maj nochi kuali yeto itech monemilis uan ijkon uelis tikonchiuas nejin tekit tein semi moneki (Ecl. 11:4).

²⁰ Axkan moneki tikonchiuas tein mitsonpaleuis xikonneki tiontanojnotsas, no moneki tikonixmatis tein tamachtia Biblia, tikonpias yolchikaualis uan tionmochikauas tikonchiuas tein moneki. Xiontekiti iniuan panoua ocho millones itatojtokakauan Cristo akin moajsij itech nochi taltikpak, uan tikonmachilis “yolpakilis tein Jiova kitemaka” (Neh. 8:10). Xikonixtali tiontanojnotsas hasta keman Jiova kijtos ke amo motanojnotsasok. Itech okse tamachtilis, tikitaskej eyi taman tein techpaleuis maj tiknekikan tiksentokaskej tikteixmatiltiskej iTekiuajyo Dios.