1. Nwopelo taani Yesu aavanheiye alipa oototha ihopa axexe, nave awo yaakhulenle hai?

MURUMMWA Pedro, Antreya, Yakopo ni Yohani yaari alipa a nakoso oototha ihopa. Mwaanyiherye mukhalelo yaaryaaya ootuthuwa vaavaa yiiwalaaya nwopelo wa Yesu wa wi: “Mukichare, kiweereeni alipa awaatotha achu.” * Awo yaakhulenle hai? Piipiliya oni: “Mwamvayi yaahiya vaavale milapa saya, emuchara.” (Mat. 4:18-22) Yoolakelela yeela, yaahitoroka okumi aya okhala wookhala. Ohiya okhala alipa oototha ihopa, awo yaahaala okhala alipa “awaatotha achu.” (Luka 5:10) Olelo, Yesu onnatitelela ovaha nwopelo yoola wa achu oororomeleya yaawo anasivela eparipari. (Mat. 28:19, 20) Apwanne moheemererya nwopelo wa Yesu wi mukhale mulipa awaatotha achu?

2. Ntakhara heeni ninnaphwanela wuupuwela mwawiiseela nihaakumve olakelela okhala mulaleeryi, nave tiheeni enahaala onikhaviherya weerano yeela?

² Akhweya moohuserya ichu sincipale mu yoohuserya anyu ya Piipiliya nave munnachuna opaka yoolakelela wi mukhale mulaleeryi a michaka yaphaama. Waakhanle wi munnoovelela nwopelo wa Yesu, muhiceecheye. Woovelela wanyu enataphulela wi moosuwela ochuneya wa yoolakelela anyu. Nyenya Piipiliya onaloca wi Petru ni asinthamwene awe yaahiya milapa saya “mwamvayi.” Mwawiihiiha, Petru ni asinna awe hiyaalekenle opaka yoolakelela yeela. Awo yaamusuwela ni omweemererya Yesu ntoko Mesiya mu miyeeri mithanu nammoha muculi. (Yoh. 1:35-42) Moolikana, akhweya moohuserya sincipale vooloca sa Yehova ni Yesu, nave munnachuna otitelela wunnuwa omunepani. Nyenya muhaakumve olakelela okhala mulaleeryi  munaphwanela wuupuwela sa yeela mwawiiseela. Tiheeni yaamukhavihenrye Petru, Antreya, ni akina opaka yoolakelela aya?

3. Makhalelo taani anahaala olipiha nchuno nanyu na weemererya nwopelo wa Yesu?

³ Oohuserya oopacerya a Yesu, yaaceenyeryiwa ni osuwela waya ophara muteko, olipa waya murima, ni mavyakelo. Moohikhwa minikwa, makhalelo yaala yaahaakhaviherya okhumelela phaama mmuteko woolaleerya. Mwaha ola, onahaala othokororya ti mwawiihai muneeraanyu munnuwihe makhalelo yaala wi mukhumelele phaama mmuteko woolaleerya ni waapaka oohuserya.

4. Tiheeni yaamuceenyenrye Petru okhala mulipa awaatotha achu?

⁴ Petru aanatotha ihopa wi avakulele emusi awe, nyenya tahi wi waarimoona okhala muteko awe. Owo aanasiveliwa ni muteko wa ototha ihopa. (Yoh. 21:3, 9-15) Owo tho aahuserya osiveliwa ni muteko wa waatotha achu. Nnikhaviheryo na Yehova, Petru aahikhumelela phaama mmuteko woolaleerya.—Saw. 2:14, 41.

5. Mwawiiwanana ni Luka 5:8-11, ntakhara heeni Petru aahoova, nave tiheeni yaamukhavihenrye ovootha woova wawe?

⁵ Ninnalaleerya nthowa na omusivela Yehova; nave nlo nthowa noochuneya nnaneeriha opaka muteko yoola. Omusivela wahu Yehova onamunikhaviherya ovootha woova. Vaava Yesu aawompeiye Petru wi akhale mulipa awaatotha achu, owo aahimuleela ariki: “Ohoove.” (Mwaalakhanye Luka 5:8-11.) Tahi wi Petru oova yeeyo yaahala weereya amanle okhala oohuserya, ohiya yeeyo Petru onve nthowa na yootikhiniha ya ophara ihopa yeeyo Yesu aapakeiye wa alopwana  ale. Petru aahiisoona okhala oohiphwanelela vaavaa Yesu aavenkeiye wi elapeke vamoha. Mmukhalelo woolikana, nyuwo munamukhala a woova vaava munasuwelaanyu echu enavolowela okhala oohuserya Akristu. Waakhanle wi tihiiha, mulipihe onthamwene anyu ni Yehova, Yesu, vamoha ni amwaacamani anyu, nave munahaala oceenyeryeya weemererya nwopelo wa Yesu wa okhala mulipa awaatotha achu.—Mat. 22:37, 39; Yoh. 14:15.

6. Mathowa taani makina ananceenyerya olaleerya?

⁶ Muthokororye mathowa makina ananceenyerya olaleerya. Nthowa nimoha ti nawi nnachuna wiiwelela nlamulo na Yesu nawi: “Haweni . . . mwaapakeke oohuserya aka.” (Mat. 28:19, 20) Ninnalaleerya tho nthowa nawi achu “aahaaleela ni ohipwachiwa” nave annachuna ohuserya eparipari vooloca sa Omwene wa Muluku. (Mat. 9:36) Yehova onachuna wi achu oothene esuwele eparipari wi evuluxiwe.—1 Tim. 2:4.

7. Aroma 10:13-15 onooniherya hai wi muteko ahu woolaleerya ti woochuneya?

⁷ Ninnaceenyeryeya olaleerya vaavaa nnuupuwelaahu ti mwawiihai muteko ahu onaakhaviheryaaya achu wi evuluwe. Moohiyana ni mulipa oototha yoowo onakhuura ni okuliha ihopa onatotheiye, hiyo ‘ninnaatotha’ achu wi nivuluxe okumi aya.—Mwaalakhanye Aroma 10:13-15; 1 Tim. 4:16.

8-9. Tiheeni alipa oototha ihopa anasuwelaaya, nave ntakhara heeni?

⁸ Mmahiku a Yesu, Muisarayeli yoowo aari mulipa oototha, aanasuwela ehopa taani aayeiye ototha. (Onam. 11:9-12) Owo tho anasuwela ti woowi ihopa saaphwanyeyaayawo. Ihopa saakhala weiwo waariwo maahi mancipale nave waariwo soolya. Apwanne elukuluku mulipa oototha aalakeleleiye yaari yoochuneya? Misiyonaariyo onakhala o evilivili yo Pacific aahisuwela wi yookhalavo elukuluku yoophwanelela ya ototha. Munna mmoha aahinwopa wi yatothe. Misiyonaariyo, “amuleela wi kinamoophwanyaani omeelo wooxixelo elukuluku ya 9.” Munna owo aahimwaakhula ariki, “hiwiiwexenxe phaama. Nnahaala oyawo elukuluku yoophwanelela ototha, ohiya elukuluku yoophwanelela wa hiyaano.”

⁹ Moolikana ni alipa oototha a nsana noopacerya, awo yaaya mmapuroni mummo yaahaalaaya waaphwanyamo “achu” nave mu elukuluku yoophwanelela wa yaawo. Ntoko yootakiherya, oomuchara Akristu yaanalaleerya mu empa ya Muluku, musinakooka, empa ni empa, ni omusika. (Saw. 5:42; 17:17; 18:4) Hiyaano tho nnaphwanela waasuwela phaama achu yaawo anakhala mu ekulucu ahu. Nnaphwanela okhala ooreheryeya otoroka mpuro ni elukuluku wi niwerye waaphwanya achu.—1 Kor. 9:19-23.

10. Ikaruma taani marehereryo a Yehova ananivahereryaaya?

¹⁰ Mulipa oototha ihopa onaphwanela okhalano ikaruma soophwanelela nave asuwele mukhalelo wa opharihela. Hiyaano tho nnaphwanela okhalano ikaruma soophwanelela mmuteko ahu woolaleerya. Navetho nnaphwanela osuwela mukhalelo wa opharihela. Yesu aahaaleela mookwakwaleya oohuserya awe mukhalelo wa olaleerya michaka saphaama. Owo aahaaleela echu yaaphwanelaaya okusa, weiwo yaayaaya olaleeryawo, ni echu yaayaaya oloca. (Mat. 10:5-7; Luka 10:1-11) Olelo marehereryo a Yehova annavahererya ikaruma sa ohusihano seiho ineeriha wi muteko woolaleerya okhumelele phaama. * Nave ninnahusihiwa mukhalelo wa opharihela iho. Ovyakiha wu onnanikhaviherya okhalano nroromelo ni mavyakelo yaawo nnachunaahu wi  nikhumelele phaama mmuteko woolaleerya.—2 Tim. 2:15.

11. Ntakhara heeni alipa awaatotha achu anaphwanelaaya okhala oolipa murima?

¹¹ Alipa a nakoso oototha ihopa anaphwanela okhala oolipa murima. Ilukuluku ikina awo annahoolela mikhalelo sawoopiha mphareya. Wiili-wiili awo analapa ohiyu nave tho mmaahini mummo onakhumelelamo echeku mootutuxa. Alipa a waatotha achu anaphwanela tho okhala oolipa murima. Vaavaa nnapaceryaahu olaleerya ni wiisuwanyeiha ntoko Anamoona a Yehova, nnanwerya okumanano “echeku” ya waakaahiwa veemusini, onyemuliwa ni asinthamwene, ni waakaahiwa wa michaka sahu. Nyenya ela henantikhiniha. Yesu aahilopola wi aahaala waarumiha oomuchara awe veeri va achu awaakaaha.—Mat. 10:16.

12. Mwawiiwanana ni Yosuwa 1:7-9, tiheeni enahaala onikhaviherya okhala oolipa murima?

¹² Muni nwerye hai okhala oolipa murima? Yoopacerya, mukhale oolekecheya wi Yesu onnatitelela ohoolela muteko yoola ari wirimu. (Yoh. 16:33; Wup. 14:14-16) Voocharela, muroromele yoolaiherya ya Yehova yawi onahaala wookhapelelaani. (Mat. 6:32-34) Vaavaa nroromelo nanyu nnakhalaaya noolipa, munahaala winnuwiha olipa wanyu murima. Petru ni asinthamwene awe yaahooniherya nroromelo noolipa vaavaa yaamuhin’yaaya nakoso aya a ototha ihopa emuchara Yesu. Mmukhalelo woolikana, nyuwaano mwaahooniherya  nroromelo noolipa vaavaa mwaalenlaanyu amusi anyu ni asinthamwene wi mwaapacerya omuhuserya Piipiliya ni Anamoona a Yehova ni othukumana ni yaawo! Moohikhwa minikwa, nyuwaano moopaka matorokelo mancipale mu okumi anyu wi mukhaleke mwawiiwanana ni malamulo awookololowa a Yehova. Mu weerano hiiha mohooniherya nroromelo ni olipa murima. Vaavaa munatitelelaanyu okhala oolipa murima, munarwa muroromela wi “Apwiya Muluku enarwa ekhala ni nyuwaano moothemwene muneeraanyu mweecekemo.”—Mwaalakhanye Yosuwa 1:7-9.

13. Wuupuwelela ni ovekela oni wookhaviheryeeni hai okhala oolipa murima?

¹³ Echu taani ekina enahaala wookhaviheryaani okhala oolipa murima? Muvekele wi mukhale oolipa murima. (Saw. 4:29, 31) Yehova onahaala waakhula mavekelo anyu nave harwa oohiyaani. Ilukuluku soothene owo ori ooreheryeya wi ookhaviheryeeni. Nave tho munaphwanela wuupuwelela mukhalelo Yehova aavulunxeiye akina mu elukuluku yakhalai. Muupuwelele mukhalelo ookhavihenryeiyeeni wi nwerye ovootha makacamiho, ni woovahaani ikuru wi mpake matorokelo muukumini mwanyu. Muroromele wi yoowo aahoolenle achu olapuwa mu Eniya Yoosheerya onanwerya wookhaviheryaani tho nyuwaano okhala oohuserya Akristu. (Muk. 14:13) Munanwerya okhalano nroromelo mwa Yehova hiiha ntoko mulipa a masalumu yoowo aalonce wi “Aphiya ari ni miyo, nkinoovaru echu. Muchu anii akeereleni?”—Sal. 118:6.

14. Tiheeni muhusenryaanyu ni yaweereya ya Masae ni Tomoyo?

¹⁴ Mukhalelo mmoha onahaala onikhaviherya okhala oolipa murima, ori moorweela wa ohuserya mukhalelo Yehova aakhavihenryeiye achu yaawo yaari awuuliwa muru, nyenya yaahusenrye okhala oolipa murima. Muthokororye yaweereya ya murokora onichaniwa Masae. Owo aari awuuliwa muru nave uupuwela wi hi awerye oloca vanlakani sa nroromelo nawe. Owo uupuwela wi oloca ni anamarwa waari woovila ntoko weererya owelela exiri yoorekama nave uupuwela tho wi haahaala owerya. Nave owo aahilipiserya vancipale winnuwiha osivela wawe ntakhara Muluku vamoha ni amwaacamani awe. Masae aahuupuwela mwawiiseela waakuveya wa elukuluku nnakhalaahumo nave aahimveka Yehova wi amukhaviherye winnuwiha nchuno nawe na olaleerya. Owo aahivootha woova wawe nave aahipacerya olaleerya ntoko piyoneera ookilaatheya. Yehova onanwerya waakhaviherya alaleeryi avyaani “okhala oolipa murima.” Moone yaweereya emoha ya murokora oniichaniwa Tomoyo. Vaavaa owo aapacenryeiye olaleerya empa ni empa, mu empa yoopacerya mwaneene a vaate aakhuwenle ariki: “Nkinachuna oloca ni Anamoona a Yehova!” Nave aahiwala mukhora awe. Tomoyo moolipa murima aahiloca ni nthamwene awe ariki: “Wohoona? Kihilonceru masu, owo oosuwela wi ka mmoha a Anamoona a Yehova. Kootepa ohakalala!” Vano Tomoyo onarumeela ntoko piyoneera ookilaatheya.

15. Mavyakelo tiheeni, nave ntakhara heeni aryaaya oochuneyaxa wa Akristu?

¹⁵ Alipa oototha ihopa wi ekhumelele phaama yaaphwanela winnuwiha mavyakelo aya. “Mavyakelo annamweeriha muchu opaka muteko mmukhalelo woophwanelela.” Alipa oototha ihopa wi ekhumelele phaama anaphwanela wiilipiserya wi ephare muteko aya, awo annatitelela olapa naamwi ehoolelaka echeku yawuupa mphareya. Oothene ahu nnaphwanela winnuwiha mavyakelo ni ovilela wi naakhwaniherye muteko ahu.—Mat. 10:22.

16. Nni ninnuwihe hai mavyakelo ahu?

 ¹⁶ Mavyakelo tahi wi nnamuyariwano. Wiili-wiili, nookhovelela opaka ichu mmukhalelo wookhweya. Mwawiihiiha, ilukuluku ikina ichu nnapakaahu tahi sookhweya. Mwa yeeyo, nnaphwanela ohuserya okhala achu awiihiiha. Yehova onnanivaha nikhaviheryo orweela wa munepa waweela.—Gal. 5:22, 23.

17. Hiiha ntoko elociwaaya mu 1 Korinto 9:25-27, Paulo otharihe hai olapa wawe mwakuru?

¹⁷ Murummwa Paulo aari a mavyakelo. Nyenya owo onneemererya wi ‘aanawithiraniha’ mwiili awe wi apake echu yawookololowa. (Mwaalakhanye 1 Korinto 9:25-27.) Owo aahaalopola akina wi yiilakeke mukhataaya ni weeraka ichu “moophwanelela ni mwa weereranyeya.” (1 Kor. 14:40) Nnaphwanela olapa moowetha wi nimulapele Yehova nave eyo enaphitaanyerya olaleerya ni waahusiha achu michaka saphaama.—Saw. 2:46.

18. Tiheeni enahaala omweeriha Yehova onoonaka ntoko achu anakhumelela phaama?

¹⁸ Alipa anakoso oototha ihopa, yoona wi aakhumelela phaama wakhala wi aaphara ihopa sincipale. Ohiyana yeeyo, okhumelela wahu phaama honarweela mu waaca wa achu yaawo naakhavihenryaahu okhala Anamoona a Yehova. (Luka 8:11-15) Vaavaa nnatitelelaahu olaleerya michaka saphaama ni waahusiha akina, Yehova onahaala onoona wi ninnakhumelela phaama. Ntakhara heeni? Nthowa nawi ninnatitelela omwiiwelela yene vamoha ni Mwanawe.—Mar. 13:10; Saw. 5:28, 29.

19-20. Mathowa taani avameekhaaya ananeeriha olaleerya hiihaano?

¹⁹ Mu ilapo ikina, alipa oototha aneemereryiwa ototha pahiru ivinrevo miyeeri sammoori. Mu ilapo seiya, alipa oototha ihopa annasuwela wi anaphwanela ototha mwawaakuveya elukuluku aya ehaakumve omala. Ntoko alipa a waatotha achu, ninnaceenyeryiwa moopwaha olaleerya hiihaano, vaavaa makuchuwelo a elapo ela anaacamelaaya! Elukuluku ehanle, yootepa okhuveya wi nilaleerye michaka seiyo inavulusa ikumi sa achu. Muhilekele naari owehererya wi ichu soothene ikhale phaama muukumini mwanyu wi mpake muteko yoola woochuneyaxa.—Ekle. 11:4.

²⁰ Mweerevo echu hiihaano wi mulipihe nchuno nanyu, munnuwihe masuwelelo anyu a Piipiliya, olipa murima ni mavyakelo anyu. Mukhale vamoha ni alipa a waatotha achu, a waakhwana 8 milyawu nave mulawihe ohakalala onarwa wa Yehova. (Neh. 8:10) Mukhale oolakelela olaleerya ophiyerya munaweryelaanyuvo nave mutitelele ophara muteko yoola ophiyerya elukuluku Yehova aneereiye aloce wi muteko woomala. Mwaha onacharela onahaala othokororya meerelo mararu yaawo anahaala olipiha yoolakelela ahu ya otitelela olaleerya michaka sa Omwene ntoko alipa a waatotha achu.