1. Hadia wogaoni nibeʼe Yesu khö zi daöfa zi fagai iʼa, ba hewisa wanemaʼöra fogaoni andrö?

SI FAGAI iʼa halöwö ndra nifahaʼö Yesu sotöi Fetero, Andrea, Yakobo, hegöi Yohane. Tola manö tokea ira me iwaʼö khöra Yesu, ”Aine, miʼoʼö ndraʼo. Ubaliʼö ami samaʼuʼu niha.” * Hadia nifaluara? Imane Sura Niʼamoniʼö, ”Iʼanemaiʼö laröi halöwöra ba laʼoʼö ia.” (Mat. 4:18-22) Angetulara andrö zombulöʼö faʼaurira. Iʼotarai daʼö, lö saʼae tobali ira si fagai iʼa hizaʼi tobali ”samaʼuʼu niha”. (Luk. 5:10) Ba götöda iadaʼa, ibeʼe göi wogaoni simane daʼö Yesu ba niha soʼameʼegö tödö sindruhu. (Mat. 28:19, 20) Hadia no ötemaʼö wogaoni moroi khö Yesu enaʼö tobali samaʼuʼu niha?

2. Fatua lö tahalö gangetula tobali samaʼuʼu niha, hadia manö zinangea tafalua, ba hadia mbörö?

² Te no ara öfahaʼö ndraʼugö ba Zura Niʼamoniʼö, ba oya zi no aboto ba dödöu sanandrösa khö Yehowa hegöi Yesu. Oya wombulöʼö si no öfalua, ba omasi ndraʼugö enaʼö itugu tedou ba wamati. Iadaʼa, moguna öhalö gangetula hadia omasiʼö tobali sanuriaigö turia somuso dödö mazui löʼö. Na so nasa khöu waʼaombö dödö ba wanemaʼö fogaoni moroi khö Yesu, böi ide-ide dödömö. Faʼaombö dödömö andrö zi tobali tandra wa aboto sibai ba dödömö wa tenga si famai-mai gangetula andrö. Fatua lö öhalö gangetula tobali sanuriaigö, moguna sibai öhaogö öʼangeragö daʼö. Iwaʼö Sura Niʼamoniʼö wa iʼanemaiʼö laröi halöwöra ira Fetero hegöi ira awönia. Hizaʼi, hadia daʼö zangoromaʼö wa mangaösö-ngaösö sibai Wetero hegöi ira awönia ba wangai angetula? Löʼö. Önö waŵa ba zilalö, no laʼila ba faduhu dödöra wa Yesu andrö Mesia. (Yoh.  1:35-42) Hadia mbua-bua niʼokhögö Wetero hegöi ira awönia, si möi fanolora ba wanemaʼö fogaoni moroi khö Yesu?

3. Hadia manö mbua-bua sinangea öʼokhögö enaʼö terou dödöu ba wanemaʼö fogaoni moroi khö Yesu?

³ Me tobali si fagai iʼa ndra nifahaʼö Yesu, owölö-ölö ira, onekhe, barani, ba laʼameʼegö tödö sibai halöwöra. Tola manö mbua-bua andre zanolo yaʼira ba wamalua halöwöra tobali samaʼuʼu niha. Ba artikel andre, tatutunö hadia manö lala sinangea tafalua ba wondrouʼö mbua-bua si sökhi andrö. Na tafalua daʼö, tola itugu onekhe ita manuriaigö hegöi ba wamahaʼö.

4. Hana wa terou dödö Wetero tobali si fagai iʼa?

⁴ Tobali si fagai iʼa Wetero enaʼö tola ibönökhi zoguna ba nösi nomonia. Hizaʼi, töra moroi ba halöwö ba wamaiginia daʼö. Na tafaigi, omasi sibai ia fagai. (Yoh. 21:3, 9-15) Ba gafuriata, omasi göi ia ba wamalua halöwönia tobali samaʼuʼu niha. Börö wanolo moroi khö Yehowa, itugu tedou waʼonekhe Wetero ba wamalua halöwö andrö.​—Hal. 2:14, 41.

5. Moloʼö Luka 5:8-11, hadia mbörö wa ataʼu Wetero, ba hadia zanolo yaʼita na tarasoi zimane daʼö?

⁵ Terou dödöda ba wamalua halöwö fanuriaigö börö me taʼomasiʼö Yehowa. Hewaʼae na itaria tarasoi wa ambö onekhe ita ba wamalua yaʼia, lö tobali daha-tahada daʼö börö me taʼomasiʼö ia. Me ikaoni Wetero Yesu enaʼö tobali ia samaʼuʼu niha, imane khönia, ”Böi ataʼufi.” (Baso Luka 5:8-11.) So waʼataʼu khö Wetero, tenga börö me ikhalaigö hadia zalua khönia na no tobali ia soloʼö Yesu. Hizaʼi, me iʼila dandra sahöli-höli dödö nifalua Yesu irege tola lasöndra giʼa soya sibai, ibörögö so khönia waʼaombö dödö hadia sinangea falulu  fohalöwö ia khö Yesu. Simane Fetero, te örasoi göi waʼataʼu. Te so khöu waʼaombö dödö me ökhalaigö hadia manö zinangea öfalua enaʼö tola tobali ndraʼugö nifahaʼö Keriso. Na daʼö nirasoimö, aroʼö waʼomasimö khö Yehowa, Yesu, hegöi niha böʼö. Na öfalua daʼö, tola terou dödömö ba wanemaʼö fogaoni nibeʼe Yesu enaʼö tola tobali ndraʼugö samaʼuʼu niha.​—Mat. 22:37, 39; Yoh. 14:15.

6. Hadia dane-dane tanö böʼö wa manuriaigö ita?

⁶ Tafalua göi halöwö fanuriaigö börö me taʼoʼö goroisa Yesu me iwaʼö, ”Miʼae mibaliʼö nifahaʼögu fefu niha.” (Mat. 28:19, 20) Manuriaigö göi ita börö me omasi ita tatolo niha ’nifakao ba nitiboʼö’ enaʼö aboto ba dödöra zindruhu sanandrösa ba Wamatörö Lowalangi. (Mat. 9:36) Omasi Yehowa na fefu niha laʼokhögö waʼaboto ba dödö si tefaudu sanandrösa ba zindruhu ba tola teʼorifi ira.​—1 Tim. 2:4.

7. Moloʼö Roma 10:13-15, hana wa moguna sibai halöwö fanuriaigö?

⁷ Na taʼangeragö wa tola möi fangorifi niha halöwö nifaluada, tola terou dödöda ba wanuriaigö. Si toʼölönia, na so giʼa sahulu ndra si fagai iʼa, laʼa daʼö mazui lafamawa. Hizaʼi, faʼauri nisöndra niha ”sahulu” ita.​—Baso Roma 10:13-15; 1 Tim. 4:16.

8-9. Hadia manö zinangea aboto ba dödö niha si fagai iʼa, ba hadia mbörö?

⁸ Ba götö Yesu, moguna aboto ba dödö ndraono Gizaraʼeli si fagai iʼa hadia manö giʼa si so ba nahia si möi ira fagai. (3 Moz. 11:9-12) Moguna göi laʼila hezo manö nahia soya iʼa. Si toʼölönia, tesöndra giʼa soya ba nahia soya ö hegöi ba nidanö si tefaudu. Moguna göi aboto ba dödöra hezo ginötö si tefaudu weʼamöi fagai. So samösa Zamaduhuʼö Yehowa ba Kepulauan Pasifik si no irai mangumaʼö khö zi samösa dalifusöda utusan injil enaʼö fao ira weʼamöi fagai. Imane khönia utusan injil andrö, ”Falukha ita mahemolu bözi siwa sihulö wongi.” Imane khönia talifusöda andrö, ”Tebai brur. Moguna fagai ita ba ginötö si tefaudu ba giʼa ba wodou gai, tenga ba ginötö si tefaudu khöda.”

⁹ Simanö göi, möi ndra samaʼuʼu niha me götö föna ba nahia sato niha. Laʼalui göi ginötö si tefaudu ba wamalukhaisi yaʼira. Duma-dumania, manuriaigö ndra nifahaʼö Yesu ba gosali, ba nahia waʼowulo, ba fasa, hegöi ba nomo-omo. (Hal. 5:42; 17:17; 18:4) Simane yaʼira, moguna göi aboto ba dödöda hewisa lala waʼauri niha si so ba nahia wanuriaigöda. Enaʼö abölö oya niha nifalukhaisida, moguna tafaudugö ginötö hegöi nahiada wanuriaigö.​—1 Kor. 9:19-23.

10. Hadia manö fakake niʼasogö organisasi Yehowa si tola manolo yaʼita?

¹⁰ Moguna iʼokhögö gama-gama si tefaudu niha si fagai iʼa, ba aboto ba dödönia hewisa wangogunaʼö daʼö. Simanö göi, moguna taʼokhögö gama-gama si tefaudu ba wamalua fanuriaigö, ba aboto ba dödöda hewisa wangogunaʼö yaʼia. No ifatunö khö ndra nifahaʼönia Yesu hewisa lala wanuriaigö turia somuso dödö. Ifatunö khöra hadia zi tebai laʼohe, hezo nahia sinangea möi ira, ba hadia zinangea lawaʼö. (Mat. 10:5-7; Luk. 10:1-11) Ba götöda andre, oya Fakake Niʼogunaʼöda ba Wamahaʼö si no iʼasogö organisasi Yehowa. No tehenaigö khöda ngawalö video hegöi publikasi si tefaudu ba wamalua fanuriaigö hegöi famahaʼö. * Baero daʼö, no göi mufahaʼö ita ba wangogunaʼö yaʼia. Buania, itugu barani ba onekhe ita ba wamalua fanuriaigö hegöi ba wamahaʼö niha böʼö.​—2 Tim. 2:15.

11. Hana wa moguna barani zamaʼuʼu niha?

¹¹ Asese möi fagai iʼa niha ba zi bongi. Baero daʼö, lö iʼila itahö hadia sökhi dania mbanua ba nasi mazui löʼö. Tola manö izumaigö tohare mbade ba ginötö ilau fagai. Andrö, moguna barani zi fagai iʼa. Börö me samaʼuʼu niha ita, moguna göi taʼokhögö waʼabarani. Na no tabörögö weʼamöi manuriaigö ba tafatunö ba niha wa Samaduhuʼö Yehowa ita, tola manö tataögö ngawalö ”mbade”. Duma-dumania, tola manö lasaisi ita ira ösi nomoda, laʼoʼaya ita ira awöda, ba lö latemaʼö ita na möi manuriaigö. Hizaʼi, tenga sahöli dödöda daʼö. No ifangelama ndra nifahaʼönia Yesu wa hasambalö göna ira folohi na möi ira manuriaigö.​—Mat. 10:16.

12. Simane nitutunö ba Yosua 1:7-9, hadia zi tola manolo yaʼita enaʼö itugu barani?

¹² Hadia zinangea öfalua enaʼö itugu barani ndraʼugö? Si oföna, moguna faduhu dödöu wa lö aetu ibeʼe wanuturu lala Yesu moroi ba zorugo ba wamalua halöwö fanuriaigö andre. (Yoh. 16:33; Fam. 14:14-16) Baero daʼö, moguna öʼaroʼö wamatiu ba mbuʼusa li Yehowa wa hasambalö ibönökhi fefu zoguna khöu. (Mat. 6:32-34) Na itugu aro wamatimö, itugu barani göi ndraʼugö. Me laröi halöwöra ira Fetero börö me omasi ira laʼoʼö Yesu, no laforomaʼö wa laʼokhögö wamati saro. Tola göi öforomaʼö wamati simane daʼö. Duma-dumania, lö khöu faʼataʼu ba wamatunö khö ndra awöu hegöi ösi nomou wa no öfahaʼö ndraʼugö khö ndra Samaduhuʼö Yehowa ba fao göi ndraʼugö  ba gangowuloa nifaluara. Öbulöʼö göi gamuatamö hegöi lala waʼaurimö enaʼö tola öʼomusoiʼö dödö Yehowa. Tatu moguna wamati hegöi faʼabarani ba wamalua daʼö. Iadaʼa, lö aetu göi öforege enaʼö itugu barani ndraʼugö. Yafaduhu dödöu wa ”fao-fao khöu Yehowa, Lowalangiu, gofu heza ösawa”.​—Baso Yosua 1:7-9.

13. Na öfalua woʼangerönusi hegöi fangandrö, hewisa wa tola möi fanolomö daʼö enaʼö itugu barani?

¹³ Hadia nasa zinangea öfalua ba wondrouʼö faʼabarani? Andrö wanolo moroi khö Yehowa ba wangandrö enaʼö ibeʼe khöu waʼabarani tobali nifahaʼö Keriso. (Hal. 4:29, 31) Hasambalö ifondrondrongo wangandröu Yehowa. No ihenaigö ginötönia ba wanolo yaʼugö ba lö irai iröi ndraʼugö. Tola göi öʼangerönusi hewisa lala Yehowa ba wangorifi iraono mbanuania ba götö föna. Duma-dumania, no irai ifabali Nasi Soyo ba wangefaʼö iraono Gizaraʼeli. (2 Moz. 14:13) Na omasi ifalua daʼö Yehowa ba ndraono mbanuania ba götö föna, tatu omasi göi itolo ndraʼugö iadaʼa. Baero daʼö, angeragö hewisa lalania ba wanolo yaʼugö ba wanaögö abula dödö hegöi ba wameʼe khöu faʼabölö ba wombulöʼö faʼauriu. Moguna mamati ndraʼugö khö Yehowa, simane sanura zinunö sangumaʼö, ”Awögu Yehowa, ba lö ataʼu ndraʼo. Hadia nilau niha khögu enaʼö?”​—Zin. 118:6.

14. Hadia wamahaʼö si tola öhalö moroi ba duma-duma salua khö Masae hegöi Tomoyo?

¹⁴ Ato niha saila-aila nitolo Yehowa enaʼö barani. Na taʼangeragö waö-waö waʼaurira, tola göi itugu barani ita. Nehegö duma-duma dalifusöda ira alawe sotöi Masae. Ba wamobörö, lö khönia faʼabarani ba wamalua fanuriaigö ba niha sawena iʼila börö me niha saila-aila ia. Irasoi wa abua sibai ba wamalua daʼö, hulö zoʼanöisi dowa salawa sibai, ba faduhu dödönia wa tebai ifalua daʼö. Börö daʼö, iforege ba wangaʼaroʼö faʼomasinia khö Lowalangi hegöi ba niha böʼö. Iʼangerönusi göi hewisa waʼamangaösö wamalua halöwö fanuriaigö ba ngaluo safuria andre. Baero daʼö, ilau mangandrö khö Yehowa enaʼö itugu omasi ia manuriaigö. Ba gafuriata, mofozu ia ba wolawa faʼataʼunia irege tola tobali ia perintis biasa. Baero daʼö, ibeʼe göi wanolo Yehowa khö ndra sanuriaigö si bohou enaʼö barani ira manuriaigö. Daʼö nirasoi dalifusöda ira alawe sotöi Tomoyo. Me awena sibai möi ia manuriaigö, fakara khönia niha si oföna sibai ifalukhaisi, imane, ”Samaduhuʼö Yehowa ami lö? Lö omasido fahuhuo khömi.” Aefa daʼö, iʼolobigö mbawandruhö nomonia. Hizaʼi, lö möi faʼataʼu Tomoyo daʼö. Imane khö nawönia wanuriaigö, ”Iʼanemaiʼö iʼila wa Samaduhuʼö Yehowa ndraʼodo hewaʼae na lö nifatunögu khönia. Omuso sibai dödögu!” Iadaʼa, no tobali perintis biasa Tomoyo.

15. Simane niha si fagai, hadia zinangea tafalua na abua khöda wamalua fanuriaigö, ba hana wa moguna sibai daʼö ba niha Keriso?

¹⁵ Enaʼö tola mofozu niha si fagai, moguna iforege ba wamalua zi no itatugöi. Moguna ifaso enaʼö maoso ia sihulö wongi, ifalua halöwönia irege awai, ba lö iböhöli wangalui iʼa hewaʼae na lö baga mbanua. Niha samorege ba wamalua zi no itatugöi, tola ifaso waʼaurinia samösa ba wamalua ngawalö zinangea mufalua. Moguna göi taforege ba wamalua zi no tatatugöi, enaʼö tola anau gölöda ba wangasiwai halöwöda.​—Mat. 10:22.

16. Hewisa lala enaʼö tola taforege ba wamalua zi no tatatugöi?

¹⁶ Sindruhu sa, abua sibai ba niha ba wamalua zi no latatugöi. Abölö omasi ita ba wamalua halöwö saoha. Börö daʼö, enaʼö tola taforege ba wamalua zi no tatatugöi,  moguna taʼokhögö wanaha tödö. Tobali, enaʼö tola tafomaha ita ba wamalua halöwö sabua, moguna khöda wanolo. Hasambalö iʼogunaʼö gehehania niʼamoniʼö Yehowa ba wanolo yaʼita.​—Gal. 5:22, 23.

17. Simane nisura ba 1 Korindro 9:25-27, hadia nifalua Waulo enaʼö tola iforege ba wamalua zi no itatugöi?

¹⁷ Mofozu sibai zinenge sotöi Faulo ba wamalua zi no itatugöi. Hizaʼi, ifaduhuʼö wa moguna ’ifakao’ mbotonia enaʼö tola ifalua zatulö. (Baso 1 Korindro 9:25-27.) Iʼamenesi göi niha böʼö enaʼö laforege ba wamalua zi no latatugöi, ba enaʼö ”sökhi ba toföfö” wamaluara fefu hadia ia. (1 Kor. 14:40) Börö me niha Keriso ita, moguna taforege ba wamalua zi no tatatugöi enaʼö lö mamalö tafalua halöwö ba wamati, tefarahu ba daʼö wamalua fanuriaigö hegöi famahaʼö.​—Hal. 2:46.

18. Hadia zuʼa-suʼa waʼamofozuda ba wamaigi Yehowa?

¹⁸ Tola musuʼa waʼamofozu zi samösa niha si fagai ba waʼoya giʼa si no igaini. Hizaʼi, tenga ba waʼoya niha si no tatolo tobali samosumange Yehowa musuʼa waʼamofozuda. (Luk. 8:11-15) Ba wamaigi Yehowa, no mofozu ita ba wamalua halöwöda na anau gölöda ba wanuriaigö turia somuso dödö hegöi ba wamahaʼö niha böʼö. Hadia mbörö? Börö me no taʼoʼö niwaʼö Yehowa hegöi Ononia.​—Mrk. 13:10; Hal. 5:28, 29.

19-20. Hana wa moguna sibai tafalua halöwö fanuriaigö iadaʼa?

¹⁹ Ba zi hauga soi, ha ba mbaŵa si no mutatugöi latehegö khö ndra si fagai iʼa ba weʼamöi fagai. Börö daʼö, ba gangohorita mbaŵa andrö, tola manö so ba dödö ndra si fagai wa moguna lagaini giʼa sabölö oya. Simane daʼö göi nifaluada, yaʼita samaʼuʼu niha. Lö ara tö gamozua götö danö andre. Hatö maʼifu tö ginötö si toröi ba wanuriaigö turia somuso dödö si tola mangorifi niha. Andrö, börö me mangaösö sibai halöwö andre, böi taradö-radö wamalua yaʼia mazui tabalo-baloi ginötö sabölö tefaudu.​—Zango. 11:4.

²⁰ Iʼotarai iadaʼa, aroʼö waʼomasiu ba wamalua fanuriaigö, douʼö waʼaboto ba dödöu ba Zura Niʼamoniʼö, forege enaʼö itugu barani ndraʼugö, ba falua zi no ötatugöi. Lau falulu fohalöwö ba niha böʼö si no tobali samaʼuʼu niha, si töra walu zuta faʼato. Na öfalua daʼö, tola örasoi waʼomuso dödö moroi khö Yehowa. (Neh. 8:10) Halö gangetula enaʼö manuriaigö ndraʼugö ba niha sabölö ato fatua lö ibatogö halöwö andre Yehowa. Ba artikel aefa daʼa, tatutunö tölu lala si tola mangaʼaroʼö angetulada enaʼö anau gölöda ba wanuriaigö turia somuso dödö sanandrösa ba Wamatörö Lowalangi.