1. Киристе цуппар кӕсалгахӕссӕгемӕн ци загъта ӕма куд бакодтонцӕ?

ПЕТУР, Андрей, Иаков ӕма Иоанн кӕсалгахӕссуни куст кодтонцӕ. Расагъӕс кӕнӕ, куд бадес кодтонцӕ, Киристе син уотӕ ку загъта: «Рацотӕ мӕ фӕдбӕл, ӕма уӕ ӕз искӕндзӕн адӕнахӕсгутӕ» *. Еци дзурдтӕ ку фегъустонцӕ, уӕд куд бакодтонцӕ? Библий финст ӕй: «Етӕ уайтагъд сӕ хизтӕ ниууагътонцӕ ӕма ӕ фӕдбӕл рандӕ ’нцӕ» (Матф. 4:18–22). Еци унаффӕ син се ’гас цард дӕр раййивта. Кӕсалгӕ ахӕссуни бӕсти райдӕдтонцӕ «уодӕгас адӕймӕгти» ахӕссун (Лук. 5:10). Абони дӕр Киристе еци гъуддаги архайунмӕ хонуй, кӕдзосзӕрдӕ ӕма рӕстдзийнадӕ ка уарзуй, уӕхӕн адӕни (Матф. 28:19, 20). Ду ба еци гъуддаги архайун нӕма райдӕдтай?

2. Хуарз хабар игъосунгӕнӕг исуодзӕнӕ ӕви нӕ, уобӕл лӕмбунӕг расагъӕс кӕнун цӕмӕн гъӕуй, ӕма дин еци къахдзӕф искӕнунмӕ ци банхус кӕндзӕй?

² Ка ’й зонуй, цӕйбӕрцӕдӕр рӕстӕг Библи ахур кӕнис, удта дӕ царди дӕр цидӕртӕ раййивтай. Ӕма дӕ нур гъӕуй унаффӕ рахӕссун, хуарз хабар игъосунгӕнӕг исуодзӕнӕ ӕви нӕ, уой фӕдбӕл. Кӕд уомӕ дӕ нифс нӕма хӕссис, уӕддӕр дӕ къохтӕ ма уадзӕ. Е, ӕвӕдзи, уобӕл дзорӕг ӕй, ӕма ’й лӕдӕрис, цӕхуӕн ӕхсидзгӕ къахдзӕф ӕй, уой. Ӕной Петур, Андрей, Иаков ӕма Иоанни туххӕй Библий финст ӕй, зӕгъгӕ, «етӕ уайтагъд сӕ хизтӕ ниууагътонцӕ», фал е уобӕл дзорӕг нӕй, ӕма еци унаффӕ рахӕссуни размӕ сагъӕс дӕр нӕ ракодтонцӕ. Киристе Мессийӕ ке ӕй, уой ку балӕдӕрдтӕнцӕ, уӕдӕй сӕбӕл ӕхсӕз мӕйемӕй фулдӕр рацудӕй (Иоан. 1:35–42). Ду дӕр, ӕвӕдзи, Йеговӕ ӕма Йесой туххӕй берӕ  цидӕртӕ базудтай, ӕма дӕ фӕндуй идарддӕр дӕр Йеговӕмӕ хӕстӕг кӕнун. Фал цӕмӕй игъосунгӕнӕг исуай, уой туххӕй ба дӕ лӕмбунӕг расагъӕс кӕнун гъӕуй. Цума еци цуппар кӕсалгахӕссӕгемӕн ба уӕхӕн къахдзӕф искӕнунмӕ ци банхус кодта?

3. Хуарз игъосунгӕнӕг ӕма ахургӕнӕг исунмӕ дин ци банхус кӕндзӕй?

³ Йесой фиццаг ахуркӕнуйнӕгтӕ сӕ куст уарзтонцӕ ӕма имӕ хуарз арӕхстӕнцӕ, адтӕнцӕ нифсхаст ӕма зийнадӕ нӕ кодтонцӕ. Уой фӕрци хуарз хабар игъосун кӕнуни гъуддаги дӕр хъӕбӕр исдӕсни ’нцӕ. Аци статьяй базондзӕнӕ, хуарз игъосунгӕнӕг ӕма ахургӕнӕг исунмӕ дин ци банхус кӕндзӕй, уой?

4. Петур кӕсалгахӕссӕги куст цӕмӕн кодта?

⁴ Петур кӕсалгахӕссӕги куст, бийнонтӕ дарун ӕй ке гъудӕй, айдагъ уой туххӕй нӕ кодта. Еци куст ӕ зӕрдӕмӕ дӕр цудӕй (Иоан. 21:3, 9–15). Йесо ин ци куст баихӕс кодта, уомӕ дӕр уӕхӕн цӕстӕй кастӕй. Ӕма ин Йегови фӕрци еци гъуддаги берӕ бантӕстӕй (Гъуд. 2:14, 41).

5. Лукай 5:8–11 куд финст ӕй, уомӕ гӕсгӕ Петур цӕмӕй тарстӕй, ӕма дӕуӕн ци банхус кӕндзӕй?

⁵ Хуарз хабар игъосун кӕнунмӕ нӕ фиццагидӕр разӕнгард кӕнуй, Йегови ке уарзӕн, е. Еци уарзондзийнади фӕрци ӕнӕнифсхаст ка ӕй, е дӕр еци гъуддаги фӕннифсгундӕр уй. Йесо Петурӕн уотӕ ку загъта, «ахӕсдзӕнӕ уодӕгас адӕймӕгти», зӕгъгӕ, уӕд ма ин загъта: «Ма тӕрсӕ». (Бакӕсӕ Лукай 5:8–11.) Петур Киристей фӕдбӕл цӕугӕй ци зиндзийнӕдтӕ бавзурстайдӕ, уонӕй нӕ тарстӕй. Фал ӕй ку фӕууидта, Йесой фӕрци цӕйбӕрцӕ кӕсалгӕ ниййахӕстонцӕ, уӕд ӕй балӕдӕрдтӕй, е дессаги гъуддаг ке адтӕй, ӕма ӕхе уой аккагбӕл нӕ нимадта, цӕмӕй  уӕхӕн адӕймагӕн е ’мкосӕг иссайдӕ. Ду дӕр, ӕвӕдзи, рӕстдзийнади надбӕл дӕмӕ ци ӕнгъӕлмӕ кӕсуй, уобӕл сагъӕс кӕнгӕй естӕбӕлти фӕттухсис. Ӕма цӕмӕй дӕ нифс ма басӕтта, уой туххӕй архайӕ, цӕмӕй Йегови, Йесой ӕма адӕни хъӕбӕрдӕр уарзай. Уой фӕрци дӕ бон уодзӕй Йесо нин ци гъуддаг баихӕс кодта, уомӕ равналун (Матф. 22:37, 39; Иоан. 14:15).

6. Игъосун кӕнунмӕ ма нӕ ци разӕнгард кӕнуй?

⁶ Ӕркӕсӕн, игъосун кӕнунмӕ ма нӕ ци разӕнгард кӕнуй, уомӕ. Мах фӕндуй Йесой фӕдзӕхст ӕнхӕст кӕнун: «Цотӕ ӕма... цӕттӕ кӕнтӕ ахуркӕнуйнӕгтӕ» (Матф. 28:19, 20). Уомӕй уӕлдай ма, адӕн ӕнцӕ «ӕнӕфиййау фусти хузӕн, ӕфхуӕрд ӕма дзӕгъӕл», ӕма син уомӕ гӕсгӕ Паддзахади туххӕй хуарз хабар фегъосун кӕнун хъӕбӕр ӕхсидзгӕ ӕй (Матф. 9:36). Йегови фӕндуй, «цӕмӕй аллихузи адӕн, рӕстдзийнадӕ ци ӕй, уой базононцӕ ӕма фӕййервӕзонцӕ» (1 Тим. 2:4).

7. Ромӕгтӕмӕ 10:13–15 финст дзурдтӕй куд зиннуй, хуарз хабар игъосун кӕнун ӕхсидзгӕ ке ӕй?

⁷ Нӕ лӕггадӕ адӕни цард ке ервӕзун кӕнуй, уой ку лӕдӕрӕн, уӕд нӕ еци гъуддаги зингзӕрдӕй архайун фӕнддзӕй. Кӕсалгахӕссӕг ци ниййахӕссуй, уой кенӕ уӕйӕ ракӕнуй, кенӕ ба си хуӕруйнаг искӕнуй. Фал мах ба «адӕни ахӕссӕн», цӕмӕй сӕ фӕййервӕзун кӕнӕн. (Бакӕсӕ Ромӕгтӕмӕ 10:13–15; 1 Тим. 4:16.)

8, 9. Кӕсалгахӕссӕги ци зонун гъӕуй ӕма цӕмӕн?

⁸ Киристей рӕстӕгути ’й кӕсалгахӕссӕг гъӕуама зудтайдӕ, денгизи цӕхуӕн кӕсалгӕ ес ниййахӕссӕн, уой (Лев. 11:9–12). Удта ма гъӕуама зудтайдӕ, хизӕ багӕлдзун кӕми гъӕуй, уой дӕр. Фулдӕр кӕсалгӕ фӕууй, хуӕздӕр дон ӕма ин хуӕруйнаг кӕми фӕууй, уӕхӕн бунӕтти. Цума кӕсалгахӕссӕг ци афони рацӕудзӕй, уомӕй ба ести уӕлдай ес? Мадта. Еухатт Сабур океани сакъадӕхтӕй еуеми ка лӕггадӕ кодта, уӕхӕн миссионери бунӕттон ӕнсувӕр ӕ хӕццӕ кӕсалгӕ ахӕссунмӕ худта. Миссионер ин загъта, исон сӕумӕй фарастебӕл ӕмбӕлдзиан, зӕгъгӕ. Гъема ин ӕнсувӕр дӕр загъта: «Нӕ, уотӕ ба нӕ цӕуй. Кенӕ кӕсалгӕ ахӕссӕн, кенӕ ба фунӕй кӕнӕн».

⁹ Уотӕ фиццаг ӕноси Киристей фӕдбӕлдзӕугутӕ дӕр цудӕнцӕ, адӕн кӕми адтӕй, уордӕмӕ, ӕма уой туххӕй хуӕздӕр рӕстӕг равзариуонцӕ. Зӕгъӕн, игъосун кодтонцӕ хӕдзарӕй-хӕдзарӕмӕ, ӕмбурдгӕнӕнти, ковӕндони ӕма базарти (Гъуд. 5:42; 17:17; 18:4). Мах дӕр ӕй гъӕуама зонӕн, адӕн хӕдзари кенӕ ӕндӕр ескӕми кӕд фӕуунцӕ, уой. Кӕд нӕ фӕндуй, цӕмӕй Хуарз хабар фулдӕр адӕн фегъосонцӕ, уӕд гъӕуама игъосун кӕнунмӕ хуӕздӕр рӕстӕг ӕма бунат ӕвзарун зонӕн (1 Кор. 9:19–23).

10. Йегови организаци нин цӕхуӕн косӕндзаумӕуттӕ дӕттуй?

¹⁰ Кӕсалгахӕссӕгмӕ гъӕуама уа кӕсалгахӕссӕн дзаумӕуттӕ, ӕма си пайда кӕнун дӕр гъӕуама зона. Махӕн дӕр игъосун кӕнунмӕ ес косӕндзаумӕуттӕ, ӕма си мах дӕр гъӕуама пайда кӕнун зонӕн. Йесо ӕ ахуркӕнуйнӕгтӕн байамудта, «адӕни ахӕссун» сӕ бон куд ӕй, уой. Загъта син, сӕ хӕццӕ сӕ ци райсун гъӕуй, кӕми гъӕуама игъосун кӕнонцӕ ӕма ци гъӕуама дзоронцӕ, уой (Матф. 10:5–7; Лук. 10:1–11). Абони дӕр нин Йегови организаци игъосун кӕнунмӕ дӕттуй, берӕ нин ке фӕрци ӕнтӕсуй, уӕхӕн косӕндзаумӕуттӕ *. Удта ма нин амонуй, куд си пайда кӕнгӕ ’й, уой дӕр. Уой фӕрци игъосун кӕнгӕй нифсгундӕр фӕууӕн ӕма иннети ӕнтӕстгундӕрӕй ахур кӕнӕн (2 Тим. 2:15).

11. Йесой фӕдбӕлдзӕугути нифсхаст ун цӕмӕн гъӕуй?

¹¹ Кӕсалгахӕсгути гъудӕй нифсхастдзийнадӕ. Арӕх денгизи бонигъӕдӕ ӕвваст феййевидӕ ӕма тухдунгӕ исистидӕ. Хатгай ба сӕ ӕхсӕвигӕнтти косун дӕр багъӕуидӕ. Йесой фӕдбӕлдзӕугути дӕр гъӕуй нифсхаст ун, уомӕн ӕма мах дӕр хатгай «тухдунги» бахауӕн, игъосун кӕнун ку райдайӕн ӕма Йегови Ӕвдесӕнтӕ ке ан, уой ку фӕззӕгъӕн, уӕд. Зӕгъӕн, нӕ хеуӕнттӕ нӕ нихмӕ рацӕунцӕ, нӕ зонгитӕ нӕбӕл ходун райдайунцӕ кенӕ ба, ци хабар игъосун кӕнӕн, уомӕ неке фегъосуй. Фал нӕмӕ е дессаг нӕ кӕсуй, уомӕн ӕма ’й зонӕн, Йесой фӕдбӕлдзӕугутӕ ӕфхуӕрд ке ӕййафдзӕнцӕ (Матф. 10:16).

12. Йесо Навини 1:7–9 куд финст ӕй, уомӕ гӕсгӕ нӕ бон ци ӕй кӕнун, цӕмӕй нифсгундӕр уӕн?

¹² Нӕ бон ци ӕй кӕнун, цӕмӕй нифсгундӕр уӕн? Фиццаг: федарӕй ӕууӕндӕ, абони дӕр Йесо игъосун кӕнуни гъуддагӕн уӕлӕрвтӕй разамунд ке дӕттуй (Иоан. 16:33; Рарг. 14:14–16). Дуккаг: федарӕй ӕууӕндӕ, Йеговӕ дин ке ӕнхус кӕндзӕй, уобӕл (Матф. 6:32–34). Де ’ууӕндундзийнадӕ куд федардӕр уа, уотӕ нифсгундӕр уодзӕнӕ. Петур, Андрей, Иаков ӕма Иоанн сӕ кӕсалгахӕссуни куст ку ниууагътонцӕ ӕма Киристей фӕдбӕл ку рацудӕнцӕ, уӕд уомӕй бавдистонцӕ, куд хъӕбӕр ибӕл ӕууӕндунцӕ, уой. Ду дӕр устур ӕууӕндундзийнадӕ бавдистай, дӕ хеуӕнттӕн ӕма дӕ зонгитӕн ку радзурдтай, ӕмбурдтӕмӕ цӕун ӕма Йегови  Ӕвдесӕнти хӕццӕ Библи ахур кӕнун ке райдӕдтай, уой. Цӕмӕй дӕ бон иссайдӕ Йегови раст уагӕвӕрдтӕмӕ гӕсгӕ цӕрун, уой туххӕй дӕ царди берӕ цидӕртӕ раййивтай. Уоми дӕр дӕ федар ӕууӕндундзийнадӕ ӕма нифсхастдзийнадӕ куд нӕ гъудӕй. Идарддӕр дӕр нифсхаст ку уай, уӕд ӕй дӕхуӕдӕг балӕдӕрдзӕнӕ аци дзурдтӕ раст ке ’нцӕ: «Кумӕфӕнди ма рандӕ уай – дӕ Хуцау Йеговӕ уодзӕй дӕ хӕццӕ». (Бакӕсӕ Йесо Навин 1:7–9.)

13. Ковгӕ ку кӕнай ӕма сагъӕс ку кӕнай, уӕд дин е куд банхус кӕндзӕй, цӕмӕй никки нифсхастдӕр исуай?

¹³ Никкидӕр ма дӕ бон ци ӕй кӕнун, цӕмӕй нифсгун уай? Йеговӕмӕ ковӕ (Гъуд. 4:29, 31). Е дин дӕ кувд фегъосдзӕй ӕма дӕ нӕ ниууадздзӕй. Алкӕддӕр дӕ фарсмӕ уодзӕй ӕма дин ӕнхус кӕндзӕй. Уомӕй уӕлдай ма сагъӕс кӕнӕ, Йеговӕ рагидзаманти ӕ лӕггадгӕнгути куд ервӕзун кодта, уобӕл. Удта ма иронх кӕнӕ, дӕуӕн дӕр дӕ зиндзийнӕдти куд ӕнхус кодта ӕма дин дӕ цард раййевунмӕ хъауритӕ куд лӕвардта, уой. Ӕ адӕни Сурх денгизбӕл ка бацӕун кодта, еци Хуцау дӕуӕн ба нӕ банхус кӕндзӕй Киристей фӕдбӕлдзӕуӕг исунмӕ? (Рац. 14:13). Дӕу бон дӕр ӕй псаломзаргӕнӕги хузӕн зӕгъун: «Йеговӕ мӕ фарс ӕй, ӕма ӕз нецӕмӕй фӕттӕрсдзӕн. Ци мин бакӕндзӕй адӕймаг?» (Пс. 118:6).

14. Масае ӕма Томойой хабӕрттӕй цӕбӕл ахур кӕнис?

¹⁴ Нифс ма ни уадзунцӕ, Йеговӕ ӕфсӕрмигӕнагӕ хуӕртӕ ӕма ӕнсувӕртӕн куд банхус кодта, уӕхӕн хабӕрттӕ дӕр. Хуӕрӕ Масае хъӕбӕр ӕфсӕрмигӕнагӕ адтӕй. Уотӕ имӕ кастӕй, ӕма игъосун кӕнун ӕ бон некӕд исуодзӕй. Ӕнӕзонгӕ адӕни хӕццӕ дзорун ӕй ке гъӕудзӕй, уобӕл ку расагъӕс кӕнидӕ, уӕд ӕй нецибал фӕгъгъӕуидӕ. Фал Масае хъӕбӕр архайдта, цӕмӕй Хуцауи ӕма адӕни никки хъӕбӕрдӕр бауарзтайдӕ. Уомӕй уӕлдай ма сагъӕс кодта, аци дуйнейӕн куд минкъий рӕстӕг байзадӕй, уобӕл ӕма Йеговӕмӕ кувта, цӕмӕй ӕй хъӕбӕрдӕр фӕндадтайдӕ игъосун кӕнун. Уой фӕрци Масае тӕрсгӕ нӕбал кодта ӕма ма пионерӕй лӕггадӕ кӕнун дӕр райдӕдта. Мӕнӕ ма еу хабар дӕр. Хуӕрӕ Томойо игъосун кӕнунмӕ фиццаг хатт ку рацудӕй, уӕд фиццаг ци хӕдзарамӕ бахуаста, уордиги еу силгоймаг ракастӕй ӕма ’й гъӕри буни фӕккодта, мӕнӕн, дан, Йегови Ӕвдесӕнти хӕццӕ дзубандийагӕй неци ес. Уой фӕсте ба сӕбӕл дуар ниггупп кодта. Томойо нӕ фӕттарстӕй ӕма ке хӕццӕ адтӕй, еци хуӕрӕн загъта: «Фегъустай ӕй? Зӕгъгӕ дӕр ин неци ма кодтон, уотемӕй ӕй балӕдӕрдтӕй, Йегови Ӕвдесӕн ке дӕн. Мӕнӕ мин ци ’хцӕуӕн ӕй!» Томойо дӕр нур пионерӕй лӕггадӕ кӕнуй.

15. Ӕнӕзийнадӕ адӕймаг цӕхуӕн фӕууй ӕма киристонӕн дӕр е ӕхсидзгӕ цӕмӕн ӕй?

¹⁵ Кӕсалгахӕссӕг зийнадӕгӕнагӕ ку уа, уӕд неци ниййахӕсдзӕй. Зийнадӕ ка нӕ фӕккӕнуй, уой бон фӕууй ӕхе фӕгъгъӕдӕг кӕнун ӕма гъуддагмӕ февналун. Кӕсалгахӕсгутӕ сӕумӕ раги раистунцӕ ӕма бонигъӕдӕ кудфӕндий ма раййева, уӕддӕр сӕ куст нӕ ниууадзунцӕ, цалинмӕ ’й кӕронмӕ нӕ фӕуунцӕ, уӕдмӕ. Мах дӕр гъӕуама зийнадӕ ма кӕнӕн, цӕмӕй нӕ бон уа кӕронмӕ дӕр федарӕй фӕллӕуун ӕма нин Йесо ци гъуддаг баихӕс кодта, уой исӕнхӕст кӕнун (Матф. 10:22).

16. Ӕнӕзийнадӕ цӕй фӕрци исуодзиан?

¹⁶ Ӕнӕзийнадӕ адӕймаг уӕхӕнӕй нӕ райгуруй. Арӕхдӕр нӕ нӕ фӕффӕндуй нӕхецӕн зин кӕнун. Цӕмӕй ӕнӕзийнадӕ уӕн, уой туххӕй гъӕуама хебӕл хуӕцун зонӕн. Удта цӕмӕй нӕ бон уа, зин нӕмӕ ка кӕсуй, уӕхӕн кустмӕ равналун, уой туххӕй ба нӕ ӕнхус гъӕуй. Ӕма нин Йеговӕ ӕ сугъдӕг хъаури фӕрци еци ӕнхус дӕттуй (Гал. 5:22, 23).

17. 1 Коринфӕгтӕмӕ 9:25–27 куд финст ӕй, уомӕ гӕсгӕ Павел ӕнӕзийнадӕ цӕй фӕрци адтӕй?

 ¹⁷ Апостол Павел дӕр зийнадӕгӕнагӕ нӕ адтӕй. Фал ӕй уӕддӕр, ӕхуӕдӕг куд загъта, уомӕ гӕсгӕ гъудӕй ӕ «бауӕр гъезӕмарӕй марун», цӕмӕй раст ци ӕй, уой кодтайдӕ. (Бакӕсӕ 1 Коринфӕгтӕмӕ 9:25–27.) Удта киристӕнтти дӕр разӕнгард кодта, цӕмӕй зийнадӕгӕнагӕ ма адтайуонцӕ ӕма сӕмӕ алцидӕр адтайдӕ «уагӕ ӕма ӕгъдаумӕ гӕсгӕ» (1 Кор. 14:40). Мах дӕр гъӕуама ӕнӕзийнадӕ уӕн, цӕмӕй нӕ бон уа идарддӕр дӕр Йеговӕн лӕггадӕ кӕнун, хуарз хабар игъосун кӕнун ӕма адӕнӕн рӕстдзийнадӕ амонун (Гъуд. 2:46).

18. Цӕмӕй Йегови цӕсти ӕнтӕстгун уӕн, уой туххӕй нӕ ци кӕнун гъӕуй?

¹⁸ Кӕсалгахӕссӕгӕн ести бантӕстӕй ӕви нӕ, е бӕрӕг фӕууй, цӕйбӕрцӕ кӕсалгӕ ниййахӕста, уомӕй. Фал игъосун кӕнуни гъуддаги ӕнтӕстгун ан ӕви нӕ, е ба ӕмбурдмӕ цал адӕймаги ӕрбахудтан, уомӕй кӕнгӕ нӕй (Лук. 8:11–15). Цалинмӕ хуарз хабар игъосун кӕнӕн ӕма адӕни ахур кӕнӕн, уӕдмӕ Йегови цӕсти ӕнтӕстгун уодзиан. Цӕмӕн ес уотӕ зӕгъӕн? Уомӕн ӕма Йеговӕ ӕма Йесой дзурд ӕнхӕст кӕнӕн (Мар. 13:10; Гъуд. 5:28, 29).

19, 20. Игъосун кӕнун абони уӕлдай ӕхсидзгӕ цӕмӕн ӕй?

¹⁹ Еуӕй-еу бӕстити кӕсалгӕ ахӕссун фенгъезуй ӕрмӕстдӕр кӕцидӕр мӕйти. Ӕма еци куст ка кӕнуй, уонӕн салла-уалла кӕнӕн нӕййес, уӕлдайдӕр ба кӕсалгӕ ахӕссуни афонӕ фӕуунтӕбӕл ку фӕууй, уӕд. «Адӕнахӕсгути» дӕр гъӕуй ӕвӕстиатӕй архайун, уомӕн ӕма аци дуйней кӕрон хӕстӕгӕй-хӕстӕгдӕр кӕнуй. Адӕни цард ка ервӕзун кӕнуй еци куст кӕнунмӕ нин берӕ рӕстӕг нӕбал байзадӕй. Мадта хуарз хабар игъосун кӕнунмӕ хуӕздӕр рӕстӕгмӕ ма ӕнгъӕлмӕ кӕсӕ (Еккл. 11:4).

²⁰ Дӕ гъудий дарӕ, игъосун кӕнуни гъуддаг ӕхсидзгӕ цӕмӕн ӕй, уой, Библи арф ӕртасӕ, нифсхаст уо ӕма зийнадӕ ма кӕнӕ. Абони ӕгас дуйнебӕл хуарз хабар ка игъосун кӕнуй, етӕ ӕнцӕ аст милиуанемӕй фулдӕр. Ду дӕр еци гъуддаги архайун райдайӕ, ӕмӕ Йеговӕ ци цийнӕ дӕттуй, уой дӕхебӕл бавзардзӕнӕ (Неем. 8:10). Ӕма цалинмӕ Йеговӕ уотӕ нӕ загъта, фагӕ ’й, зӕгъгӕ, уӕдмӕти си зингзӕрдӕй архайӕ. Иннӕ статьяй ба радзубанди кӕндзиан, Паддзахади туххӕй хуарз хабар идарддӕр дӕр нифсгунӕй игъосун кӕнунмӕ нин ци банхус кӕндзӕй, уобӕл.