1. Waut säd Jesus to vea Fescha, un waut deeden dee?

DE Jinja Petrus, Andreas, Jakobus un Johanes muaken äa Läwen met feschen. Secha wundaden dee sikj sea, aus Jesus to an säd: “Folcht mie no, un ekj woa Menschenfescha von junt moaken!” * Waut deeden dee dan? De Schreft sajcht: “See veleeten soofuaz äa Nat un jinjen met am met” (Mat. 4:18-22). Doaderch endad dee äa Läwen sikj gaunz. Nu wudden dee nich mea no Fesch sieekjen, oba no Menschen (Luk. 5:10). Vondoag dän Dach well Jesus, daut de opprechtje Menschen, waut de Woarheit leewen, bie dautselwje Woakj metmoaken sellen (Mat. 28:19-20). Best du aul een Menschenfescha?

2. Wuarom saul eena doa goot äwa nodenkjen, Vekjindja to woaren, un waut kaun eenem doabie halpen?

² Veleicht hast du aul een Stoot de Bibel studieet un denkjst nu doaräwa no, aus du west een Vekjindja woaren. Wan du die noch nich secha best, dan woa nich mootloos. Daut es nuscht waut butajeweeneljet, daut eena bie soone wichtje Entscheidunk een bät twiewelt. De Schreft sajcht, daut Petrus un siene Poatna “soofuaz äa Nat [veleeten]”. Oba Petrus un sien Brooda hauden doa aul verhäa äwa nojedocht. Dee kjanden Jesus aul lenja aus sas Moonat un wisten, daut hee de Messias wia (Joh. 1:35-42). Veleicht hast du uk aul väl äwa Jehova un Jesus jelieet un west em jeisteljen  wiedakomen. Oba ea du die eenich woascht een Vekjindja to woaren, wurscht du doa goot sellen äwa nodenkjen. Woo worden Petrus, Andreas un aundre sikj eenich, Menschenfescha to woaren?

3. Waut woat ons halpen, Menschenfescha to woaren?

³ Jesus siene Jinja wieren reed to schaufen, vestunden sikj met äare Oabeit, wieren äwanäment un strenjden sikj aun. Krakjt daut holp an uk, daut dee kunnen feine Menschenfescha woaren. En disen Artikjel woa wie seenen, woo wie dee nodoonen kjennen, daut wie uk fein prädjen un lieren kjennen.

4. Wuarom deed Petrus feschen?

⁴ Petrus deed feschen, daut siene Famielje to läwen haud. Oba daut feschen wia nich bloos siene Oabeit. Daut sitt soo, daut hee daut sea jleicht (Joh. 21:3, 9-14; 21:15, NW). Un aus hee dan een Menschenfescha wort, jleicht hee daut uk sea. Met Jehova siene Help deed hee eene sea feine Oabeit (Apj. 2:14, 41).

5. Fa waut haud Petrus no Lukas 5:8-11 no Angst, un waut kaun ons halpen onse Angst to äwakomen?

⁵ Wuarom doo wie prädjen? Ieeschtlich wäajen wie Jehova leewen. De Leew fa Jehova kaun ons bat doa brinjen, daut wie aundre von am vetalen, wan ons daut uk schwoa felt. Aus Jesus to Petrus säd, daut hee sull een Menschenfescha woaren, säd hee uk: “Fercht die nich!” (Läs Lukas 5:8-11.) Petrus haud nich Angst doafäa, Jesus notofoljen. Oba hee feeld sikj daut nich wieet, met Jesus tooptoschaufen, wiels hee jroz jeseenen haud, woo Jesus an derch een Wunda holp, väl Fesch to  kjrieen. Veleicht best du doaräwa beduat, aus du aules nokomen kaust, waut von Christus siene Nofolja velangt woat. Dan schauf doaropp, Jehova, Jesus un dienen Näakjsten noch dolla to leewen. Daut woat die halpen, dän Wensch to kjrieen, een Menschenfescha to woaren (Mat. 22:37, 39; Joh. 14:15).

6. Wuarom well wie noch prädjen?

⁶ Wuarom well wie noch prädjen? Wie wellen Jesus sien Jeboot nokomen. Hee säd: “Got . . . un moakt an to Lieelinja” (Mat. 28:19-20). Wie prädjen uk, wiels de Menschen “vejoacht un helploos” sent un onbedinjt de Woarheit von daut Kjennichrikj hieren motten (Mat. 9:36). Un Jehova well, daut aule Menschen de Woarheit kjanen lieren un jerat woaren (1. Tim. 2:4).

7. Woo wiest Reema 10:13-15 ons, daut daut prädjen needich es?

⁷ Wan wie doaraun denkjen, daut de Menschen derch daut Prädichtwoakj kjennen jerat woaren, dan woat ons daut noch dolla jankren, doa mettomoaken. Een Fescha sieekjt no Fesch, wäajen hee dee äten ooda vekjeepen well. Oba wie sieekjen no de Menschen, wäajen wie dee raden wellen (läs Reema 10:13-15; 1. Tim. 4:16).

8-9. Waut musten de Fescha weeten, un wuarom?

⁸ En Jesus siene Tiet musten de Fescha weeten, waut vonne Fesch de Israeliten äten kunnen (3. Mo. 11:9-12). Dee musten uk weeten, wua de Fesch sikj krakjt opphilden. Jeweenlich sent de Fesch opp soone Städen, wua dee daut Wota jleichen un wua dee jenuach to fräten finjen. Un kjemt daut uk doaropp aun, wanea eena feschen deit? Opp eene Insel em Pazifik wull een Missionoa mol met eenen Brooda metgonen feschen. De Missionoa säd to dän: “Dan see wie ons morjen Klock näajen ver Meddach.” De Brooda säd bloos: “Daut woat nich schaufen. Wie motten dan gonen, wan doa Fesch sent, un nich dan, wan ons daut paust.”

⁹ Krakjt soo deeden Jesus siene Jinja daut. Dee deeden dan prädjen, wan daut fa de Menschen paussent wia, un opp soone Städen, wua dee wieren. Doawäajen prädijden dee biejlikj em Tempel un en de Judenschoolen un von Hus to Hus un oppem Moakjtplauz (Apj. 5:42; 17:17; 18:4). Wie motten uk weeten, woo daut bie de Menschen es, waut wie prädjen wellen. Dan kjenn wie ons no dee rechten un opp soone Städen prädjen un to soone Tieden, wua daut woomäajlich fein paust (1. Kor. 9:19-23).

10. Waut haft Jehova siene Organisazion ons jejäft?

¹⁰ Eenen Fescha fält daut rajchte Jereetschoft un dee mott uk weeten, woo dee daut brucken saul. Fa ons Prädichtwoakj fält ons uk daut rajchte Jereetschoft un wie motten weeten, woo wie daut brucken sellen. Jesus muak siene Jinja daut dietlich, woo see de goode Norecht prädjen sullen. Hee säd an, wua see prädjen sullen, waut see sajen sullen un waut an doatoo fälen wudd (Mat. 10:5-7; Luk. 10:1-11). Vondoag dän Dach haft Jehova siene Organisazion ons sea feinet Jereetschoft fa dän Deenst jejäft. * Un dee lieren ons uk, woo daut to brucken jeit. Daut halpt ons, daut wie ons em Deenst nich soo jerettelt feelen un aundre fein lieren kjennen (2. Tim. 2:15).

11. Wuarom motten Menschenfescha äwanäment sennen?

¹¹ Fescha motten äwanäment sennen, wiels dee kjeenmol weeten, waut dee bie äare Oabeit beläwen woaren. Dee motten foaken de Nacht schaufen un doa kaun onverhofs een Storm oppkomen. Menschenfescha motten uk äwanäment sennen. Wan wie prädjen un aundre daut sajen, daut wie Jehova siene Zeijen sent, dan kjennen doa Trubbels oppkomen, waut biejlikj soo sent aus een Storm. Veleicht wellen de Menschen nich horchen ooda ons Frintschoft es jäajen ons ooda onse Frind spotten äwa ons. Oba daut wundat ons nich. Jesus säd je, daut siene Nofolja wudden Jäajenstaunt haben (Mat. 10:16).

12. Woo kaun eena no Josua 1:7-9 no äwanämenda woaren?

¹² Woo kaun eena lieren, äwanäment to woaren? Ieeschtlich mott eena sikj secha sennen, daut Jesus daut Prädichtwoakj vom Himmel aunleit (Joh. 16:33; Opb. 14:14-16). Dan mott eena lieren, opp Jehova sien Vespräakjen to vetruen, daut hee fa ons sorjen woat (Mat. 6:32-34). Je dolla wie opp Jehova vetruen, je äwanämenda woa wie. Petrus un siene Poatna hauden grooten Gloowen, aus see äare Oabeit aus Fescha tochleeten un Jesus nofoljden. Biejlikj soo hast du grooten Gloowen bewäsen, aus du diene Frind un  Frintschoft daut sätst, daut du met Jehova siene Zeijen de Bibel studieezhd un no dee äare Toopkomes wanken deetst. Un secha hast du die gaunz jeendat, om soo to läwen, aus Jehova daut fa rajcht talt. Doatoo must du äwanäment sennen un Gloowen haben. Waut woat Jehova doonen, wan du lieescht, noch äwanämenda to woaren? Hee vesprakjt: “Ekj, de HAR, dien Gott, bliew bie die, bie aules waut du doonen woascht” (läs Josua 1:7-9).

13. Woo kaun bäden un nodenkjen eenem halpen, äwanämenda to woaren?

¹³ Woo kaun eena noch äwanämenda woaren? Bäd Jehova om Moot, daut du kaust äwanäment sennen (Apj. 4:29, 31). Jehova woat diene Jebäda erhieren un die nich em Stäakj loten. Hee es emma reed, die to unjastetten. Du kaust uk doaräwa nodenkjen, woo Jehova en de Vegonenheit aundre jeholpen haft. Denkj uk doaräwa no, woo hee die jeholpen haft, Schwierichkjeiten to äwakomen un dien Läwen to endren. Secha kaun deejanja, waut sien Volkj derch daut Roode Mäa leid, die uk halpen, Christus notofoljen (2. Mo. 14:13). Du kaust krakjt soo opp Jehova vetruen aus de Psalmenschriewa, waut säd: “De HAR es met mie; ekj woa mie nich ferchten. Waut kjennen Menschen mie doonen?” (Psa. 118:6).

14. Waut kjenn wie doavon lieren, waut Masae un Tomoyo beläft haben?

¹⁴ Waut kjenn wie noch doonen, om äwanämenda to woaren? Wie kjennen seenen, woo Jehova soone, waut sea bleed wieren, jeholpen haft äwanäment to woaren. See wie mol, waut eene Sesta beläwd, waut Masae heet. See wia sea bleed un docht, daut see kjeenmol wudd prädjen kjennen. Wan see doa noch mau bloos aun docht, feeld see sikj aul soo, aus wan doa eene huage Waunt wia, wua see nienich wudd äwa kjennen. Doawäajen strenjd see sikj sea aun, mea Leew fa Gott un fa dän Näakjsten to kjrieen. See docht doaräwa no, woo dicht bie daut Enj aul wia, un fruach Jehova no Moot toom prädjen. See kunn äare Angst äwakomen un wort mau rajcht Pionia. Jehova kaun uk niee Vekjindja halpen, äwanäment to sennen. Soo wia daut bie eene Sesta, waut Tomoyo heet. Aus see toom ieeschte Mol von Hus to Hus prädijd, schrieech eene Fru bie daut ieeschte Hus: “Ekj well nuscht met Jehova siene Zeijen to doonen haben!” Un dan däwad see de Däa too. Tomoyo säd gaunz mootich to de Sesta, waut met ar toop wia: “Hast du daut jehieet? Ekj brukt nich mol waut sajen. See wist aul fuaz, daut ekj eent von Jehova siene Zeijen wia. Ekj sie soo schaftich!” Tomoyo es nu een Pionia.

15. En waut fa Stekjen mott wie soo sennen aus Fescha, un wuarom?

¹⁵ Goode Fescha strenjen sikj aun, aules to doonen, waut doa needich es. Dee motten biejlikj tiedich oppstonen, bie de Oabeit bliewen, bat et verecht es, un mau rajcht dan schaufen, wan doa schlajchtet Wada es. Wie motten ons uk aunstrenjen, daut wie uthoolen un daut Woakj volbrinjen, waut ons oppjejäft es (Mat. 10:22).

16. Waut kaun ons halpen, daut to doonen, waut ons schwoa felt?

¹⁶ Jeweenlich jeit ons daut nich scheen, ons auntostrenjen. Un doch mott wie ons eenjemol aunstrenjen, om daut to doonen, waut doa needich es. Doawäajen mott wie daut lieren, ons selfst to bemotten un ons to beharschen. Wie brucken Help, daut wie daut doonen kjennen,  waut ons schwoa felt. Un derch dän heiljen Jeist kjrie wie dise Help von Jehova (Gal. 5:22-23).

17. Waut must de Apostel Paulus no 1. Korinta 9:25-27 no doonen?

¹⁷ De Apostel Paulus deed sikj aunstrenjen. Un doch stunt hee daut too, daut hee sienen Kjarpa bedwinjen must, om daut rajchte to doonen (läs 1. Korinta 9:25-27). Hee rod aundre too, daut see sikj uk aunstrenjen sullen un daut see aules “schekjlich un ordentlich” doonen sullen (1. Kor. 14:40). Wie motten ons bemieejen, wieda Jehova to deenen. Un doa es je uk met en, daut wie pinkjlich prädjen un lieren (Apj. 2:46).

18. Wanea woat Jehova met ons tofräd sennen?

¹⁸ Doano woo väl Fesch een Fescha dän Dach jekjräajen haft, weet hee, woo goot daut wia. Bie daut Menschen feschen jeit daut oba nich doarom, woo väl Menschen wie halpen, en de Woarheit nentokomen (Luk. 8:11-15). Soo lang aus wie nich opphieren, de goode Norecht to prädjen un aundre to lieren, woat Jehova met ons tofräd sennen. Wuarom? Wiels wie daut doonen, waut hee un sien Sän haben wellen (Mar. 13:10; Apj. 5:28-29).

19-20. Wuarom sell wie ons besonda nu biem prädjen aunstrenjen?

¹⁹ En eenje Lenda kjennen dee bloos en jewesse Moonaten feschen. Doawäajen strenjen de Fescha sikj doa besonda aun, wan dee enwoaren, daut dise Tiet meist om es. Wie strenjen ons nu uk besonda aun biem prädjen, wiels wie weeten, daut daut Enj von dise Welt meist bat hia es. Doa blift nich mea väl Tiet, daut de Menschen kjennen jerat woaren! Doawäajen siem nich un lua nich doano, bat et fa die de paussende Tiet es, toom bie dit wichtje Woakj metmoaken (Liera 11:4).

²⁰ Schauf nu doaropp, daut du dän Wensch kjrichst to prädjen, un lia mea von de Schreft un lia äwanäment to sennen un strenj die aun. Wan du nu met äwa acht Millionen Menschenfescha toop de goode Norecht bekauntmoakst, dan woat Jehova die uk väl Freid jäwen (Neh. 8:10). Sie die eenich soo väl aus mäajlich to prädjen, bat dit Woakj derch es. En dän näakjsten Artikjel woa wie dreeatlei seenen, waut ons halpt, daut wie ons gaunz eenich sent, wieda de goode Norecht to prädjen.