1. ¿Imapaqmi Jesús invitaran challwa jap’iq tawa runakunata? ¿Imatan ruwaranku?

JESUSTA qatikuq Pedro, Andrés, Santiago, Juanpas challwa jap’iqmi karanku. Manachá piensarankupaschu Jesús paykunata qatikuqninkuna kanankupaq invitanantaqa. Jesusmi paykunata niran: “Qhepayta jamuychis, noqan runakuna challwayta yachachisaykichis”, nispa. * ¿Imatan ruwaranku? ‘Kaq ratopachan llikankuta saqerparispa qatikuranku’ (Mat. 4:18-22). Chay invitacionta chaskisqankumantapachan paykunaqa runakunata challwananku karan (Luc. 5:10). Kay tiempopipas Jesusqa invitashallanmi sumaq sonqoyoq runakunata qatikuqninkuna kanankupaq (Mat. 28:19, 20). ¿Chaskikurankiñachu Jesuspa invitacionninta runakuna challwaq kanaykipaq?

2. ¿Imatan ruwanayki Jesuspa invitacionninta chaskinaykipaq?

² Yaqapaschá unayña Bibliamanta yachaspa tapukushanki: “¿Listoñachu kashani Diosmanta allin willakuykunata willanaypaq?”, nispa. Iskayashanki Jesuspa invitacionninta chaskikunaykipaq chayqa ama llakikuychu, llapanchispas allintan piensaykunanchis chay invitacionta chaskinanchispaqqa. Bibliaq nisqan jina Pedropas wakin Jesuspa qatikuqninkunapas ‘kaq raton’ llikankuta saqespa Jesusta qatikuranku. Ichaqa Pedropas wayqen Andrespas, allintan piensaranku Jesusta qatikunankupaqqa. Paykunaqa soqta  killa masñan yacharanku Jesusqa Diospa ajllasqa wawan kasqanta (Juan 1:35-42). Chhaynallataqchá qanpas Jehová Diosmanta Jesusmantapas allintaña yachashanki, astawanraqchá ñaupariytapas munashanki. Ichaqa allintaraqmi chaypaqqa piensarinayki. ¿Iman Pedrota, Andresta, jujkunatapas yanaparan?

3. ¿Imakunan yanapawasunchis Jesusta qatikunanchispaq?

³ Jesuspa qatikuqninkunaqa yacharankun imaraykuchus Jesusta qatikunanku karan chayta, chaymantapas paykunaqa allintan yacharanku challwakuna jap’iyta, mana manchakuqmi karanku, kallpachakurankutaqmi allinta imatapas ruwanankupaq. Chaykunan paykunataqa yanaparan allin runa challwaq kanankupaq. Kay yachachikuymi yanapawasun paykuna jina kananchispaq.

4. ¿Imaraykun Pedro challwa jap’iypi llank’aran?

⁴ Pedroqa familianta mantenenanpaqmi challwakuna jap’iypi llank’aran, gustarantaqmi challwakuna jap’iyqa (Juan 21:3, 9-15). Chaymantapas paymanqa runakuna challwaymi gustallarantaq. Chaymi payqa Jehová Diospa yanapayninwan allinta runakunata challwaq (Hech. 2:14, 41).

5. a) Lucas 5:8-11 nisqan jina, ¿imatan Pedro manchakuran? b) Chayllaraq Diosmanta yachashaqkuna Pedro jina manchakuqtin, ¿iman yanapanman?

⁵ ¿Imaraykun Diosmanta willanchis? Jehová Diosta munakusqanchisraykun. Manchakusunmanña chaypas Jehová Diosta munakuymi yanapawasun paymanta willashanallanchispaq. Chaymi Jesusqa Pedrota jinan niwashanchis ‘Ama manchakuychu’, nispa (leey Lucas 5:8-11). ¿Imatan Pedro manchakuran? Manan Jesuspa qatikuqnin  kaytachu. Aswanpas payqa mancharisqan kasharan Jesús challwakuna jap’inanpaq milagro ruwasqanmanta, chaymi Pedroqa mana Jesusta qatikunanpaq jinachu qhawarikuran. Yaqapaschá qanpas mana Jesuspa qatikuqnin kanaykipaq jinachu qhawarikunki. Chhayna kaqtinqa Jehová Diosta, Jesusta, runamasiykitapas astawan munakunaykipaq kallpachakuy, chaymi yanapasunki Jesuspa invitacionninta chaskispa runakuna challwaq kanaykipaq (Mat. 22:37, 39; Juan 14:15).

6. ¿Imakunapiwanmi yanapawasun Diosmanta willananchispaq?

⁶ ¿Imakunapiwanmi yanapawasunman Diosmanta willananchispaq? Jujninmi kashan Jesuspa kamachikuynin kasukuy, paymi niran: “Riychis, jinaspa yachachimuychis discipuloykuna kanankupaq”, nispa (Mat. 28:19, 20). Chaymantapas runakunaqa ‘mana michiqniyoq khuyay k’irisqan’ tarikunku, chaymi Diospa gobiernonmanta yachayta necesitanku (Mat. 9:36). Jehová Diosqa munanmi llapa runakuna salvasqa kanankuta cheqaq kaqta yachanankutapas (1 Tim. 2:4).

7. Romanos 10:13-15 nisqan jina, ¿imaraykun Diosmanta willananchis?

⁷ Yuyarinanchismi Diosmanta willasqanchis askha runakunata yanapasqanpi. Challwaqqa mijunanpaqmi otaq vendenanpaqmi challwan, noqanchismi ichaqa challwashanchis runakuna salvakunankupaq (leey Romanos 10:13-15; 1 Tim. 4:16).

8, 9. ¿Imatan allinta yachananku challwaqkuna, imarayku?

⁸ Jesuspa tiempopi challwaqkunaqa yachanankun karan imayna clase challwakuna jap’iyta (Lev. 11:9-12). Yachanallankutaqmi karan maypi challwakuna kasqantapas. Challwakunaqa maypichus askha mijuy kashan chaypin tarikunku. ¿Ima horastapas rillankumanchu challwa jap’iqkuna? Manan, chaypaq yuyaykusun Pacífico islamanta iñiqmasi juj misionerowan rimasqanpi. Iñiqmasinchis challwaq rinankupaq niqtinmi misioneroqa nisqa: “Paqarin tutamanta las nueveta risunchis”, nispa. Iñiqmasinchismi ichaqa kutichisqa: “Challwakunaqa manan munasqanchis horastachu suyawasun”, nispa.

⁹ Chhaynallataqmi ñaupa tiempo cristianokunapas, runakunata challwanankupaqqa maypichus ima horastachus runakuna tarikuqku chaymanmi puriqku. Jesuspa qatikuqninkunaqa Diosmantan willaqku: templopi, sinagogakunapi, wasin-wasinta, mercado plazapi ima (Hech. 5:42; 17:17; 18:4). Noqanchispas allintan yachananchis ima horasta maypi runakuna tarikunku chayta, chayman jinataqmi Diosmanta willaq purinanchis (1 Cor. 9:19-23).

10. ¿Ima yanapaykunatan Diospa llaqtan qowanchis?

¹⁰ Challwa jap’iqkunaqa yachanankun imakuna necesitasqankuta imayna usaytapas. Jesusqa qatikuqninkunatan yachachiran runakunata allin challwaq kanankupaq. Willaranmi imakuna apanankuta, maypi willanankuta, ima rimanankutapas (Mat. 10:5-7; Luc. 10:1-11). Kunan tiempopas Jehová Diospa llaqtanmi qowanchis yachachinapaq ajllasqa qelqakunata, yachachiwanchistaqmi imayna usaytapas. * Chay yachachiwasqanchismi yanapawanchis allinta runakunaman  Diosmanta yachachinanchispaq (2 Tim. 2:15).

11. ¿Imaraykun mana manchakuq kananchis runakunata challwaqkuna?

¹¹ Challwaqkunaqa mana manchakuqmi kananku, lamar-qochapiqa qonqayllan wayra jatarimunman. Chaymantapas mayninpiqa tutan challwaqqa purinanku. Diosmanta willaq puriqtinchispas mana manchakuqmi kananchis, Jehová Diospa llaqtanwan kuska llank’aqtinchismi familianchiskuna jark’akuwasunman, amigonchiskunapas burlakuwasunman, willasqanchis runakunapas manan uyarikuyta munankumanchu. Chhaynaña kaqtinpas manan manchakunanchischu, Jesusqa willaranñan qatikuqninkuna sasachakuypi tarikunankuta (Mat. 10:16).

12. Josué 1:7-9 nisqan jina, ¿iman yanapawasunchis mana manchakuq kananchispaq?

¹² ¿Iman yanapasunkiman mana manchakuq kanaykipaq? Ñaupaqta, yuyarinaykin kay llank’aytaqa Señorninchis Jesucristo janaq pachamanta qhawarimushasqanta (Juan 16:33; Apo. 14:14-16). Chaymantapas confianaykin Jehová Dios cuidanasuykipi (Mat. 6:32-34). Allin iñiyniyoq kaspaqa, mana manchakuqmi kanki. Pedropas wakinkunapas allin iñiyniyoq kasqankuraykun llank’anankuta saqepuranku Jesusta qatikunankupaq. Qanpas rikuchirankiñan allin iñiyniyoq kasqaykita amigoykikunaman, familiaykikunamanpas Bibliata Jehová  Diospa testigonkunawan estudiasqaykita willaspa, juñunakuykunaman risqaykita willaspapas. Chaymantapas wakin costumbrekunatachá saqepunayki karan Diospa kamachikuyninman jina kausanaykipaq. Chaykunata ruwaspan mana manchakuq allin iñiyniyoq kasqaykita rikuchiranki. Sichus kallpachakushallanki mana manchakuq kanaykipaq chayqa Jehová Diosmi qanwan kashanqa maytaña riqtiykipas (leey Josué 1:7-9).

13. ¿Imaynatan yanapasunkiman Diosmanta mañakuy yuyaymanaypas mana manchakuq kanaykipaq?

¹³ ¿Iman yanapallasunkitaq mana manchakuq kanaykipaq? Jehová Diosmanta mañakuymi yanapasunki paymi kallpata qosunki (Hech. 4:29, 31). Payqa uyarisunkin mañakusqaykita manataqmi jayk’aqpas saqesunkichu. Chaymantapas yuyaymananay ñaupa tiempopi siervonkunata yanapasqanpi. Piensanallaykitaqmi imaynata Jehová Dios yanaparasunki kamachikuyninkunata junt’anaykipaq, sasachakuykunata atipanaykipaq chaypipas. Imaynan Jehová Dios yanaparan llaqtanta lamar-qocha chaupinta pasananpaq, chhaynallataqmi qantapas yanapasunki Jesuspa qatikuqnin kanaykipaq (Éx. 14:13). Salmista jinan qanpas niwaq: ‘Jehová Diosqa noqawanmi kashan, manan manchakunichu. ¿Imanawanmantaq runari?’, nispa (Sal. 118:6).

14. ¿Imatan yachanchis Masae, Tomoyo hermananchiskunamanta?

¹⁴ Yanapallasunkimantaqmi manchali runakunata Jehová Diospa yanapasqanpi piensay. Yachasun Masae sutiyoq hermanamanta. Payqa nishu manchalin karan chaymi manchakuq Diosmanta runakunawan rimayta, paypaqqa alto perqata wichapakuy jinan karan mana reqsisqa runakunawan rimayqa. Chaymi kallpachakuran astawan Jehová Diosta runakunatapas munakunanpaq. Yuyaymanarantaqmi tukukuy tiempokunapi kausashasqanchispi jinaspan Diosmanta mañakuran runakunaman Diosmanta willananpaq. Chhaynapin manchakuyninta atipaspa precursora regular kapuran. Josué 1:7, 9 nisqan jina, Jehová Diosqa yanapallantaqmi chayllaraq Diosmanta willaqkunatapas mana manchakuq kanankupaq. Yuyaykuy imachus pasaran Tomoyo sutiyoq hermanata chaypi. Juj p’unchay chayllaraq wasin-wasinta Diosmanta willaq lloqsiqtinmi, punkuta takaykushaqtin juj señora qapariykuran: “¡Manan testigokunamantaqa imatapas yachayta munanichu!”, nispa. Jinaspa punkuta wisq’arparimuran. Tomoyoqa mana pisikallpayaspan compañeranta niran: “¿Rikurankichu? Manaraq imatapas nishaqtiymi yachasqaña Jehová Diospa testigon kasqanchista. ¡Chayqa kusikunapaqmá!”, nispa. Tomoyoqa precursora regularmi kunanqa kashan.

15. ¿Imapaqmi kallpachakunanchis, imarayku?

¹⁵ Kallpachakunanchismi ruwananchiskunawan junt’ananchispaq. Allin challwaqqa kallpachakunanmi tutaraq jatarinanpaq, kallpachakunallantaqmi tukunankama llank’ananpaq mana allinña tiempo kaqtinpas. Cristianokunapas kallpachakunanchismi allinta imatapas ruwananchispaq, chhaynapin aguantasun llank’ananchista tukunanchiskama (Mat. 10:22).

16. ¿Iman yanapawasunman allinta imatapas ruwananchispaq?

¹⁶ Runakunapaqqa manan facilchu allin kaqta ruwayqa. Chaymi facil-lla ima ruwaypas  kananta munanchis. Allinta imatapas ruwananchispaqqa cuerponchistan kamachinanchis. Chaymantapas sasa ruwaykunata allinta ruwanapaqqa Jehová Diospa santo espirituntan mañakunanchis (Gál. 5:22, 23).

17. 1 Corintios 9:25-27 nisqan jina, ¿imatan apóstol Pablo ruwanan karan allin kaqta ruwananpaq?

¹⁷ Apóstol Pabloqa allintan imatapas ruwaran, ichaqa cuerpontan kamachinan karan allin kaqta ruwananpaq (leey 1 Corintios 9:25-27). Chaymi cristianokunatapas kamachiran cuerpo kamachiq kaspa ‘tukuy imapas imaynachus kananman jina ordenpi ruwanankupaq’ (1 Cor. 14:40). Chaytan noqanchispas necesitanchis Diospa kamachikuyninkunata junt’ananchispaq, allin runakuna challwaq kananchispaqpas (Hech. 2:46).

18. ¿Imatan ruwananchis Jehová Diosta kusichinanchispaq?

¹⁸ Challwaqqa askha challwata jap’isqanraykun allin qhawarisqa kanman. Noqanchismi ichaqa mana jayk’a runakunata yanapasqanchismantachu allin qhawarisqa kasunchis (Luc. 8:11-15). Sichus kallpachakusun allin willakuykunata willananchispaq, yachachinanchispaqpas chayqa Jehová Diosmi kusikunqa. ¿Imarayku? Payta wawantapas kasukusqanchisrayku (Mar. 13:10; Hech. 5:28, 29).

19, 20. ¿Imaraykun astawan kay tiempopi Diosmanta willananchis?

¹⁹ Wakin nacionkunapiqa manan watantinchu challwakun. Challwana tiempo tukukushaqtinmi challwaqkunaqa usqhaylla challwaq purinanku. Noqanchispas usqhayllan Diosmanta willananchis kashan, tukukuy p’unchaykunapi kausasqanchisrayku. Pisillañataqmi tiempoqa kashan runakunata yanapananchispaq. Chaymi mana suyakunanchischu imapas allin kanantaraq (Ecl. 11:4).

²⁰ Kunanmi tiempo kashan astawan Bibliamanta yachanaykipaq, mana manchakuq kanaykipaq, allin kaqta ruwanaykipaqpas. Kay tiempopiqa 8 millón masñan pachantinpi runa challwaqkunaqa kashan, paykunawan kuska llank’aspan kusikuyta tarinki (Neh. 8:10). Kallpachakuy kay llank’aypi yanapakunaykipaq Jehová Dios kaykamalla ninankama. Qatimuq yachachikuypin yachasunchis ima kinsa ruwaykunas yanapawasunman astawan Diospa gobiernonmanta willashanallanchispaq chayta.