1. Сави покана денѓа о Исус е штаре рибаренге, хем со керѓе ола?

О УЧЕНИКИЈА о Петар, Андреј, Јаков хем Јован керена сине бути сар рибарија. Замислин туке кобор сине изненадиме кеда о Исус вакерѓа ленге: „Авен пали манде, хем ме ка керав тумен рибарија со астарена манушен“. * Со керѓе акала мануша? И Библија вакерела: „Одма мукхле о мреже хем геле пали лесте“ (Мат. 4:18-22). Адаја одлука менинѓа ленгоро живото засекогаш. Наместо те астарен дословна мачхен, ола акана ваљани сине „те астарен“ манушен (Лука 5:10). Авдиве, о Исус канинела са е искрена манушен кола со мангена о чачипе те керен о исто (Мат. 28:19, 20). Дали прифатинѓан е Исусескири покана ту да те ове „рибари со астарела манушен“?

2. Соске ваљани сериозно те размислина англедер те ана одлука те ова „рибарија со астарена манушен“, хем со ка поможинел аменге те ана адаја одлука?

² Шај више несаво време проучинеа и Библија хем керѓан промене ко тло живото. Акана ваљани те одлучине дали мангеа те ове објавители те проповедине о шукар хабери. Ако сиан ко дуј гоѓа дали те прифатине е Исусескири покана, ма обесхрабрин тут. Шај мислинеа аѓаар соске џанеа кај акаја тани бут важно одлука. Точно, и Библија вакерела кај о Петар хем лескере амала „одма“ мукхле пумаре мреже. Сепак, ола на анѓе асавки одлука бизо англедер те размислинен. Ола пенџарѓе хем прифатинѓе  е Исусе сар Месија повише таро шов масек англедер (Јован 1:35-42). Слично аѓаар, ту да шај сиклиљан бут буќа башо Јехова хем башо Исус хем мангеа понадари да духовно те напредујне. Ама англедер те ане одлука те ове објавители, мора шукар те размислине башо адава. Со поможинѓа е Петареске, е Андрееске хем е јаверенге те анен асавки одлука?

3. Со ка поможинел туке те прифатине е Исусескири покана?

³ О прва ученикија е Исусескере мангена сине те астарен мачхен, џанена сине сар шукар те керен акаја бути, сине храбра хем сине лен самодисциплина. Акала особине исто аѓаар поможинѓе ленге те овен шукар проповедникија. Ки акаја статија ка керел пе лафи башо адава сар шај те развина акала особине те шај шукар те проповедина хем те сикава е јаверен.

4. Соске о Петар сине рибари?

⁴ О Петар сине рибари хем аѓаар грижинела пе сине пле фамилијаке. Ама акаја на сине леске само јекх обично бути, ов бут мангела сине те астарел мачхен (Јован 21:3, 9-15). Ов исто аѓаар замангља о проповедибе. Адалеа со поможинѓа леске о Јехова, о Петар уло бут шукар проповеднико (Дела 2:14, 41).

5. Спрема Лука 5:8-11, соске о Петар дарандило, хем со ка поможинел аменге да те на дара?

⁵ И најважно причина соске проповединаја тани адалеске со мангаја е Јехова. Амаро мангипе спрема о Јехова ка поможинел аменге те вакера е јаверенге баши лесте иако мислинаја кај на сием доволно способна те кера адава. Кеда о Исус викинѓа е Петаре те овел рибари со астарела манушен, ов вакерѓа леске: „Ма дара!“ (Читин Лука 5:8-11.) О Петар на дарандило таро адава со би шај сине те  овел ако уло лескоро ученико. Наместо адава, ов сине воодушевимо кеда дикхља сар о Исус поможинѓа ленге те астарен буте мачхен. Ов џанља кај о Исус керѓа јекх чудо хем адалеске ов на осетинѓа пе способно те соработинел леа. Исто сар о Петар, шај ту да дараја. Шај секиринеа тут кеда размислинеа башо са адава со ваљани те кере те шај те ове е Исусескоро ученико. Ако тано аѓаар, бајрар тло мангипе спрема о Јехова, о Исус хем тле пашутне, хем аѓаар ка ове мотивиримо те прифатине е Исусескири покана те астаре манушен (Мат. 22:37, 39; Јован 14:15).

6. Кола тане јавера причине соске проповединаја?

⁶ Те дикха јавера да причине соске сием мотивириме те проповедина. Амен мангаја те шуна е Исусескири заповед: „Џан хем керен ученикија“ (Мат. 28:19, 20). Исто аѓаар, проповединаја соске о мануша тане „мучиме хем отфрлиме“ хем иси лен бари потреба те џанен о чачипе башо Царство (Мат. 9:36). О Јехова мангела различна мануша шукар те џанен о чачипе хем те овен спасиме (1. Тим. 2:4).

7. Сар о Римјаните 10:13-15 сикавела кај о проповедибе тано важно?

⁷ Кеда размислинаја сар адава со проповединаја шај те поможинел е манушенге те спасинен пе, ка ова поттикниме те проповедина. Јекх рибари бикинела или хала е мачхен со астарела лен. Спротивно таро адава, амен „астараја“ е манушен, или јавере лафенцар кераја ученикија, те шај те спасина ленгоро живото. (Читин Римјаните 10:13-15; 1. Тим. 4:16.)

8-9. Со ваљани те џанел јекх рибари, хем соске?

⁸ Ко е Исусескоро време, јекх израелско рибари ваљани сине те џанел саве мачхен те астарел (3. Мој. 11:9-12). Исто аѓаар ваљани сине те џанел коте шај те астарел лен. О мачхе обично аракхљона ко тхана коте со о пани одговоринела ленге хем коте со иси бут хајбаске. Дали тано важно ко кова време јекх рибари ка џал те астарел мачхен? Јекх мисионери кова со живинела ко јекх остров ко Тихи Океан дознајнѓа кај иси одредимо време кеда најшукар тано те астарен пе мачхе. Јекх пхрал таро адава остров викинѓа ле те џал леа те астарен мачхе. О мисионери вакерѓа: „Ка аракха амен ко ења о саати сабајле“. А о пхрал одговоринѓа леске: „На халиљан ман шукар. Амен ка џа кеда тано о најшукар време те астарен пе мачхе, а на ко време кеда аменге одговоринела“.

⁹ Слично сар о рибарија, е Исусескере ученикија таро прво веко џана сине ко тхана коте со сине мануша, хем адава ко време кеда шај сине те аракхен лен адатхе. На пример, е Исусескере следбеникија проповединена сине ко храми хем ко синагоге, таро кхер ко кхер хем ко плоштадија (Дела 5:42; 17:17; 18:4). Амен да ваљани те џана кеда хем коте шај те аракха е манушен таро амаро подрачје. Адалеске ваљани те ова прилагодлива (1. Кор. 9:19-23).

10. Сар опреминѓа амен е Јеховаскири организација?

¹⁰ Јекхе рибареске потребно тани исправно опрема хем мора те џанел сар те користинел ла. Аменге да ваљани и исправно опрема те шај те проповедина, хем те џана сар исправно те користина ла. О Исус вакерѓа пле учениконге сар те проповединен о шукар хабери. Ов вакерѓа ленге со ваљани те лен пеа, коте те проповединен хем со те вакерен (Мат. 10:5-7; Лука 10:1-11). Авдиве те шај те ова успешна ко проповедибе, е Јеховаскири организација денѓа амен главна публикацие службаке. * Исто аѓаар, амен сием обучиме сар те користина акала публикацие. Акаја  обука поможинела аменге те осетина амен посигурна хем пошукар те сикава е манушен (2. Тим. 2:15).

11. Соске мора те ова храбра?

¹¹ О рибарија ваљани те овен храбра. Ола шај понекогаш те аракхљовен ко непредвидена условија ко море. Ола ваљани те овен храбра соске нашти секогаш те џанен сар ка овел о време хем неочекувано шај те авел бура. Освен адава, ола бут пути мора раќате те астарен мачхе. Амен да ваљани те ова храбра. Кеда почминаја те проповедина хем те вакера кај сием е Јеховаскере сведокија, шај амари фамилија ка противинел пе аменге, амаре најпаше ка асан аменге хем о мануша нане те манген те шунен адава со проповединаја. Ама акава на изненадинела амен. О Исус предупрединѓа пле следбеникон кај ка бичхалел лен те проповединен е манушенге со ка противинен пе ленге (Мат. 10:16).

12. Ко склад е лафенцар таро Исус Навин 1:7-9, со ка поможинел аменге те ова храбра?

¹² Сар шај те ове похрабро? Прво, мора те уверине тут кај о Исус таро небо водинела о проповедибе (Јован 16:33; Отк. 14:14-16). Јавер бути, бајрар тли вера ко е Јеховаскоро ветување кај ка грижинел пе туке (Мат. 6:32-34). Кобор позорали кереа тли вера, добором похрабро овеа. О Петар хем лескере амала сикавѓе бари вера кеда мукхле пумари бути сар рибарија те шај те џан пало Исус.  Слично аѓаар, ту да сикавѓан бари вера кеда вакерѓан тле најпашенге хем тле фамилијаке кај почминѓан те проучине и Библија е Јеховаскере сведоконцар хем те џа ко ленгере состанокија! Сигурно керѓан баре промене ко тло начин сар понашинеа тут хем сар живинеа те шај те икере е Јеховаскере праведна мерилија. Адалеске ваљанѓа туке вера хем храброст. Џикоте понадари да овеа храбро, ту шај те ове сигурно кај „туја тано о Јехова, тло Девел, било коте те џа“. (Читин Исус Навин 1:7-9.)

13. Сар и молитва хем о размислибе башо Јехова ка поможинел туке те ове храбро?

¹³ Со јавер шај те поможинел туке те ове храбро? Молин тут баши храброст (Дела 4:29, 31). О Јехова ка одговоринел ко тле молитве хем никогаш нане те мукхел тут. Ов секогаш ка поддржинел тут. Исто аѓаар, шај те размислине башо адава сар о Јехова ко пурано време спасинѓа е јаверен. Освен адава, размислин сар о Јехова поможинѓа туке кеда сине тут проблемија хем денѓа тут сила те кере промене ко тло живото. Сигурно, о Девел кова со водинѓа пле народо преку о Црвено Море шај те поможинел туке да те ове е Христосескоро ученико (2. Мој. 14:13). Туте да шај те овел тут исто вера сар о псалмисти кова со вакерѓа: „О Јехова тано ки мли страна; нане те дарав. Со шај те керел манге мануш?“ (Пс. 118:6).

14. Со сиклиљан таро искуство е дује пхењенгоро?

¹⁴ Јавер начин сар те ова храбра тано адалеа со ка дознајна сар о Јехова поможинела е манушенге кола сој тане лаџутне, ама сиклиле те овен храбра. Те дикха о пример е пхењакоро со викинела пе Масае. Ој сине лаџутни хем мислинѓа кај никогаш ка нашти те проповединел. Лаке сине пхаро те керел лафи непозната манушенцар, адава изглединѓа лаке сар јекх бари пречка со нашти сине те накхавел ла. Адалеске ој посебно трудинѓа пе те бајрарел пло мангипе спрема о Јехова хем спрема пле пашутне. Ој шукар размислинѓа башо адава кобор тано итно акана те проповединел пе хем молинѓа пе баши сила. Ој накхавѓа и дар хем чак служинѓа сар општо пионери. О Јехова исто аѓаар шај те поможинел е неве објавителенге те овен храбра. Размислин башо искуство е пхењакоро Томојо. Кеда почминѓа те проповединел таро кхер ко кхер, и прво станарка со аракхља ла викинѓа лаке: „На мангава ништо те овел ман е Јеховаскере сведоконцар!“ хем пханља лаке о удар. И Томојо храбро вакерѓа е пхењаке со сине лаја ки служба: „Шунѓан ли? На ваљанѓум те вакерав нијекх лафи, ама и манушни пенџарѓа ман кај сиум е Јеховаскоро сведоко. Бут сиум бахтали!“ И Томојо акана служинела сар општо пионери.

15. Сој тани и самодисциплина, хем соске тани важно е христијаненге?

¹⁵ Е успешна рибарен иси лен самодисциплина. И самодисциплина тани опишими сар „способност те терине тут те кере о буќа со ваљани те овен завршиме“. О рибарија мора те теринен пе те уштен рано, те ачхон џикоте на завршинена и бути хем понадари да те астарен мачхен иако о време тано лошно. Аменге да ваљани самодисциплина ако мангаја те издржина хем те завршина и задача со иси амен (Мат. 10:22).

16. Со ка поможинел аменге те овел амен самодисциплина?

¹⁶ Амен на наслединаја и самодисциплина. Сар мануша обично мангаја те кера о буќа ко полокхо начин. Те шај те овел амен самодисциплина, прво мора те овел амен самоконтрола. Адалеске ваљани аменге помош те сикљова те кера о буќа со шај нане аменге локхе.  О Јехова дела амен адаја помош преку пло свети дух (Гал. 5:22, 23).

17. Спрема 1. Коринќаните 9:25-27, со керѓа о Павле те шај те овел ле самодисциплина?

¹⁷ Е апостол Павле сине ле самодисциплина. Ама, ов признајнѓа кај ваљани сине „те марел“ пло тело те шај те керел адава сој исправно. (Читин 1. Коринќаните 9:25-27.) Ов поттикнинѓа е јаверен те овен самодисциплинирана хем те керен са о буќа „пристојно хем сар сој о редо“ (1. Кор. 14:40). Мора бут те трудина амен те шај понадари да те служина е Јеховаске, а ко адава тано вклучимо редовно те проповедина хем те сикава е јаверен о шукар хабери (Дела 2:46).

18. Со мора те кера ако мангаја о Јехова те дикхел амен сар успешна ко проповедибе?

¹⁸ Јекх рибари тано успешно ако астарела бут мачхе. Ама, е проповедибаја тано јавер чхане. Амаро успех на зависинела таро адава кобор манушенге ка поможина те овен е Јеховаскере сведокија (Лука 8:11-15). Ако понадари да проповединаја о шукар хабери хем сикаваја е јаверен, о Јехова дикхела амен сар успешна ко адава. Соске? Адалеске со понадари да кераја адава со мангела о Јехова хем лескоро Чхаво (Мар. 13:10; Дела 5:28, 29).

19-20. Тари која бут важно причина ваљани те проповедина акана?

¹⁹ Ко несаве пхувја, е рибаренге тано дозволимо те астарен мачхе само ко одредена масекија. Ко асавке пхувја, о рибарија џанена кај итно тано те астарен пе мачхе англедер те завршинел и сезона. Адалеске со о крајо е светоскоро тано паше, амен да авдиве — сар “рибарија со астарена манушен“ — иси амен панда јекх причина те проповедина. Ачхило бут хари време те проповединел пе о шукар хабери со ка спасинел животија. Ма аџикер хем ма мислин кај ваљани те овен тут совршена околностија те шај ту да те учествујне ки акаја бут важно бути (Проп. 11:4).

²⁰ Панда акана бајрар тли желба те проповедине, сикљов повише баши Библија, ов храбро хем нека овел тут самодисциплина. Проповедин ту да о шукар хабери заедно е манушенцар сој тане повише таро офто милиоња ко цело свето хем ту да ка добине бахталипе таро Јехова (Неем. 8:10). Ов одлучно те проповедине кобор со шај повише хем те истрајне џикоте о Девел на вакерела кај о проповедибе тано завршимо. Ки следно статија ка дикха трин начинија сар шај те ова поодлучна понадари да те проповедина о шукар хабери башо Царство.