1. Savi pokana dengja o Isus e štare ribarenge, hem so kergje ola?

O UČENIKIJA o Petar, Andrej, Jakov hem Jovan kerena sine buti sar ribarija. Zamislin tuke kobor sine iznenadime keda o Isus vakergja lenge: „Aven pali mande, hem me ka kerav tumen ribarija so astarena manušen“. * So kergje akala manuša? I Biblija vakerela: „Odma mukhle o mreže hem gele pali leste“ (Mat. 4:18-22). Adaja odluka meningja lengoro životo zasekogaš. Namesto te astaren doslovna mačhen, ola akana valjani sine „te astaren“ manušen (Luka 5:10). Avdive, o Isus kaninela sa e iskrena manušen kola so mangena o čačipe te keren o isto (Mat. 28:19, 20). Dali prifatingjan e Isuseskiri pokana tu da te ove „ribari so astarela manušen“?

2. Soske valjani seriozno te razmislina angleder te ana odluka te ova „ribarija so astarena manušen“, hem so ka pomožinel amenge te ana adaja odluka?

² Šaj više nesavo vreme proučinea i Biblija hem kergjan promene ko tlo životo. Akana valjani te odlučine dali mangea te ove objaviteli te propovedine o šukar haberi. Ako sian ko duj gogja dali te prifatine e Isuseskiri pokana, ma obeshrabrin tut. Šaj mislinea agjaar soske džanea kaj akaja tani but važno odluka. Točno, i Biblija vakerela kaj o Petar hem leskere amala „odma“ mukhle pumare mreže. Sepak, ola na angje asavki odluka bizo angleder te razmislinen. Ola pendžargje hem prifatingje  e Isuse sar Mesija poviše taro šov masek angleder (Jovan 1:35-42). Slično agjaar, tu da šaj sikliljan but bukja bašo Jehova hem bašo Isus hem mangea ponadari da duhovno te napredujne. Ama angleder te ane odluka te ove objaviteli, mora šukar te razmisline bašo adava. So pomožingja e Petareske, e Andreeske hem e javerenge te anen asavki odluka?

3. So ka pomožinel tuke te prifatine e Isuseskiri pokana?

³ O prva učenikija e Isuseskere mangena sine te astaren mačhen, džanena sine sar šukar te keren akaja buti, sine hrabra hem sine len samodisciplina. Akala osobine isto agjaar pomožingje lenge te oven šukar propovednikija. Ki akaja statija ka kerel pe lafi bašo adava sar šaj te razvina akala osobine te šaj šukar te propovedina hem te sikava e javeren.

4. Soske o Petar sine ribari?

⁴ O Petar sine ribari hem agjaar grižinela pe sine ple familijake. Ama akaja na sine leske samo jekh obično buti, ov but mangela sine te astarel mačhen (Jovan 21:3, 9-15). Ov isto agjaar zamanglja o propovedibe. Adalea so pomožingja leske o Jehova, o Petar ulo but šukar propovedniko (Dela 2:14, 41).

5. Sprema Luka 5:8-11, soske o Petar darandilo, hem so ka pomožinel amenge da te na dara?

⁵ I najvažno pričina soske propovedinaja tani adaleske so mangaja e Jehova. Amaro mangipe sprema o Jehova ka pomožinel amenge te vakera e javerenge baši leste iako mislinaja kaj na siem dovolno sposobna te kera adava. Keda o Isus vikingja e Petare te ovel ribari so astarela manušen, ov vakergja leske: „Ma dara!“ (Čitin Luka 5:8-11.) O Petar na darandilo taro adava so bi šaj sine te  ovel ako ulo leskoro učeniko. Namesto adava, ov sine vooduševimo keda dikhlja sar o Isus pomožingja lenge te astaren bute mačhen. Ov džanlja kaj o Isus kergja jekh čudo hem adaleske ov na osetingja pe sposobno te sorabotinel lea. Isto sar o Petar, šaj tu da daraja. Šaj sekirinea tut keda razmislinea bašo sa adava so valjani te kere te šaj te ove e Isuseskoro učeniko. Ako tano agjaar, bajrar tlo mangipe sprema o Jehova, o Isus hem tle pašutne, hem agjaar ka ove motivirimo te prifatine e Isuseskiri pokana te astare manušen (Mat. 22:37, 39; Jovan 14:15).

6. Kola tane javera pričine soske propovedinaja?

⁶ Te dikha javera da pričine soske siem motivirime te propovedina. Amen mangaja te šuna e Isuseskiri zapoved: „Džan hem keren učenikija“ (Mat. 28:19, 20). Isto agjaar, propovedinaja soske o manuša tane „mučime hem otfrlime“ hem isi len bari potreba te džanen o čačipe bašo Carstvo (Mat. 9:36). O Jehova mangela različna manuša šukar te džanen o čačipe hem te oven spasime (1. Tim. 2:4).

7. Sar o Rimjanite 10:13-15 sikavela kaj o propovedibe tano važno?

⁷ Keda razmislinaja sar adava so propovedinaja šaj te pomožinel e manušenge te spasinen pe, ka ova pottiknime te propovedina. Jekh ribari bikinela ili hala e mačhen so astarela len. Sprotivno taro adava, amen „astaraja“ e manušen, ili javere lafencar keraja učenikija, te šaj te spasina lengoro životo. (Čitin Rimjanite 10:13-15; 1. Tim. 4:16.)

8-9. So valjani te džanel jekh ribari, hem soske?

⁸ Ko e Isuseskoro vreme, jekh izraelsko ribari valjani sine te džanel save mačhen te astarel (3. Moj. 11:9-12). Isto agjaar valjani sine te džanel kote šaj te astarel len. O mačhe obično arakhljona ko thana kote so o pani odgovorinela lenge hem kote so isi but hajbaske. Dali tano važno ko kova vreme jekh ribari ka džal te astarel mačhen? Jekh misioneri kova so živinela ko jekh ostrov ko Tihi Okean doznajngja kaj isi odredimo vreme keda najšukar tano te astaren pe mačhe. Jekh phral taro adava ostrov vikingja le te džal lea te astaren mačhe. O misioneri vakergja: „Ka arakha amen ko enja o saati sabajle“. A o phral odgovoringja leske: „Na haliljan man šukar. Amen ka dža keda tano o najšukar vreme te astaren pe mačhe, a na ko vreme keda amenge odgovorinela“.

⁹ Slično sar o ribarija, e Isuseskere učenikija taro prvo veko džana sine ko thana kote so sine manuša, hem adava ko vreme keda šaj sine te arakhen len adathe. Na primer, e Isuseskere sledbenikija propovedinena sine ko hrami hem ko sinagoge, taro kher ko kher hem ko ploštadija (Dela 5:42; 17:17; 18:4). Amen da valjani te džana keda hem kote šaj te arakha e manušen taro amaro podračje. Adaleske valjani te ova prilagodliva (1. Kor. 9:19-23).

10. Sar opremingja amen e Jehovaskiri organizacija?

¹⁰ Jekhe ribareske potrebno tani ispravno oprema hem mora te džanel sar te koristinel la. Amenge da valjani i ispravno oprema te šaj te propovedina, hem te džana sar ispravno te koristina la. O Isus vakergja ple učenikonge sar te propovedinen o šukar haberi. Ov vakergja lenge so valjani te len pea, kote te propovedinen hem so te vakeren (Mat. 10:5-7; Luka 10:1-11). Avdive te šaj te ova uspešna ko propovedibe, e Jehovaskiri organizacija dengja amen glavna publikacie službake. * Isto agjaar, amen siem obučime sar te koristina akala publikacie. Akaja  obuka pomožinela amenge te osetina amen posigurna hem pošukar te sikava e manušen (2. Tim. 2:15).

11. Soske mora te ova hrabra?

¹¹ O ribarija valjani te oven hrabra. Ola šaj ponekogaš te arakhljoven ko nepredvidena uslovija ko more. Ola valjani te oven hrabra soske našti sekogaš te džanen sar ka ovel o vreme hem neočekuvano šaj te avel bura. Osven adava, ola but puti mora rakjate te astaren mačhe. Amen da valjani te ova hrabra. Keda počminaja te propovedina hem te vakera kaj siem e Jehovaskere svedokija, šaj amari familija ka protivinel pe amenge, amare najpaše ka asan amenge hem o manuša nane te mangen te šunen adava so propovedinaja. Ama akava na iznenadinela amen. O Isus predupredingja ple sledbenikon kaj ka bičhalel len te propovedinen e manušenge so ka protivinen pe lenge (Mat. 10:16).

12. Ko sklad e lafencar taro Isus Navin 1:7-9, so ka pomožinel amenge te ova hrabra?

¹² Sar šaj te ove pohrabro? Prvo, mora te uverine tut kaj o Isus taro nebo vodinela o propovedibe (Jovan 16:33; Otk. 14:14-16). Javer buti, bajrar tli vera ko e Jehovaskoro vetuvanje kaj ka grižinel pe tuke (Mat. 6:32-34). Kobor pozorali kerea tli vera, doborom pohrabro ovea. O Petar hem leskere amala sikavgje bari vera keda mukhle pumari buti sar ribarija te šaj te džan palo Isus.  Slično agjaar, tu da sikavgjan bari vera keda vakergjan tle najpašenge hem tle familijake kaj počmingjan te proučine i Biblija e Jehovaskere svedokoncar hem te dža ko lengere sostanokija! Sigurno kergjan bare promene ko tlo način sar ponašinea tut hem sar živinea te šaj te ikere e Jehovaskere pravedna merilija. Adaleske valjangja tuke vera hem hrabrost. Džikote ponadari da ovea hrabro, tu šaj te ove sigurno kaj „tuja tano o Jehova, tlo Devel, bilo kote te dža“. (Čitin Isus Navin 1:7-9.)

13. Sar i molitva hem o razmislibe bašo Jehova ka pomožinel tuke te ove hrabro?

¹³ So javer šaj te pomožinel tuke te ove hrabro? Molin tut baši hrabrost (Dela 4:29, 31). O Jehova ka odgovorinel ko tle molitve hem nikogaš nane te mukhel tut. Ov sekogaš ka poddržinel tut. Isto agjaar, šaj te razmisline bašo adava sar o Jehova ko purano vreme spasingja e javeren. Osven adava, razmislin sar o Jehova pomožingja tuke keda sine tut problemija hem dengja tut sila te kere promene ko tlo životo. Sigurno, o Devel kova so vodingja ple narodo preku o Crveno More šaj te pomožinel tuke da te ove e Hristoseskoro učeniko (2. Moj. 14:13). Tute da šaj te ovel tut isto vera sar o psalmisti kova so vakergja: „O Jehova tano ki mli strana; nane te darav. So šaj te kerel mange manuš?“ (Ps. 118:6).

14. So sikliljan taro iskustvo e duje phenjengoro?

¹⁴ Javer način sar te ova hrabra tano adalea so ka doznajna sar o Jehova pomožinela e manušenge kola soj tane ladžutne, ama siklile te oven hrabra. Te dikha o primer e phenjakoro so vikinela pe Masae. Oj sine ladžutni hem mislingja kaj nikogaš ka našti te propovedinel. Lake sine pharo te kerel lafi nepoznata manušencar, adava izgledingja lake sar jekh bari prečka so našti sine te nakhavel la. Adaleske oj posebno trudingja pe te bajrarel plo mangipe sprema o Jehova hem sprema ple pašutne. Oj šukar razmislingja bašo adava kobor tano itno akana te propovedinel pe hem molingja pe baši sila. Oj nakhavgja i dar hem čak služingja sar opšto pioneri. O Jehova isto agjaar šaj te pomožinel e neve objavitelenge te oven hrabra. Razmislin bašo iskustvo e phenjakoro Tomojo. Keda počmingja te propovedinel taro kher ko kher, i prvo stanarka so arakhlja la vikingja lake: „Na mangava ništo te ovel man e Jehovaskere svedokoncar!“ hem phanlja lake o udar. I Tomojo hrabro vakergja e phenjake so sine laja ki služba: „Šungjan li? Na valjangjum te vakerav nijekh lafi, ama i manušni pendžargja man kaj sium e Jehovaskoro svedoko. But sium bahtali!“ I Tomojo akana služinela sar opšto pioneri.

15. Soj tani i samodisciplina, hem soske tani važno e hristijanenge?

¹⁵ E uspešna ribaren isi len samodisciplina. I samodisciplina tani opišimi sar „sposobnost te terine tut te kere o bukja so valjani te oven završime“. O ribarija mora te terinen pe te ušten rano, te ačhon džikote na završinena i buti hem ponadari da te astaren mačhen iako o vreme tano lošno. Amenge da valjani samodisciplina ako mangaja te izdržina hem te završina i zadača so isi amen (Mat. 10:22).

16. So ka pomožinel amenge te ovel amen samodisciplina?

¹⁶ Amen na nasledinaja i samodisciplina. Sar manuša obično mangaja te kera o bukja ko polokho način. Te šaj te ovel amen samodisciplina, prvo mora te ovel amen samokontrola. Adaleske valjani amenge pomoš te sikljova te kera o bukja so šaj nane amenge lokhe.  O Jehova dela amen adaja pomoš preku plo sveti duh (Gal. 5:22, 23).

17. Sprema 1. Korinkjanite 9:25-27, so kergja o Pavle te šaj te ovel le samodisciplina?

¹⁷ E apostol Pavle sine le samodisciplina. Ama, ov priznajngja kaj valjani sine „te marel“ plo telo te šaj te kerel adava soj ispravno. (Čitin 1. Korinkjanite 9:25-27.) Ov pottikningja e javeren te oven samodisciplinirana hem te keren sa o bukja „pristojno hem sar soj o redo“ (1. Kor. 14:40). Mora but te trudina amen te šaj ponadari da te služina e Jehovaske, a ko adava tano vklučimo redovno te propovedina hem te sikava e javeren o šukar haberi (Dela 2:46).

18. So mora te kera ako mangaja o Jehova te dikhel amen sar uspešna ko propovedibe?

¹⁸ Jekh ribari tano uspešno ako astarela but mačhe. Ama, e propovedibaja tano javer čhane. Amaro uspeh na zavisinela taro adava kobor manušenge ka pomožina te oven e Jehovaskere svedokija (Luka 8:11-15). Ako ponadari da propovedinaja o šukar haberi hem sikavaja e javeren, o Jehova dikhela amen sar uspešna ko adava. Soske? Adaleske so ponadari da keraja adava so mangela o Jehova hem leskoro Čhavo (Mar. 13:10; Dela 5:28, 29).

19-20. Tari koja but važno pričina valjani te propovedina akana?

¹⁹ Ko nesave phuvja, e ribarenge tano dozvolimo te astaren mačhe samo ko odredena masekija. Ko asavke phuvja, o ribarija džanena kaj itno tano te astaren pe mačhe angleder te završinel i sezona. Adaleske so o krajo e svetoskoro tano paše, amen da avdive — sar “ribarija so astarena manušen“ — isi amen panda jekh pričina te propovedina. Ačhilo but hari vreme te propovedinel pe o šukar haberi so ka spasinel životija. Ma adžiker hem ma mislin kaj valjani te oven tut sovršena okolnostija te šaj tu da te učestvujne ki akaja but važno buti (Prop. 11:4).

²⁰ Panda akana bajrar tli želba te propovedine, sikljov poviše baši Biblija, ov hrabro hem neka ovel tut samodisciplina. Propovedin tu da o šukar haberi zaedno e manušencar soj tane poviše taro ofto milionja ko celo sveto hem tu da ka dobine bahtalipe taro Jehova (Neem. 8:10). Ov odlučno te propovedine kobor so šaj poviše hem te istrajne džikote o Devel na vakerela kaj o propovedibe tano završimo. Ki sledno statija ka dikha trin načinija sar šaj te ova poodlučna ponadari da te propovedina o šukar haberi bašo Carstvo.