1. Kova poziv o Isus uputinđa okolenđe kola astarđe maćhen hem sar on reagujinđe?

O UČENIKIJA, o Petar, o Andrija, o Jakov hem o Jovan hine ribarija. Zamislin kobor hine iznenadime ked šunđe e Isuseso poziv: „Aven mancar, hem ka ćerav tumen te oven ribarija ando manuša.“ * Sar on reagujinđe? I Biblija phenela: „On odmah aćhavđe o mreže hem đelje oleja“ (Mat. 4:18-22). Odija odluka menjinđa olengo životi zauvek. Ði akana astarđe maćhen, a kotar akana ka „astaren manušen“ (Luka 5:10). Avdije, o Isus hem ponodri vićini e iskreno manušen kola mangena o ćaćipe (Mat. 28:19, 20). Da li prihvatinđan e Isuseso poziv te ove ribari ando manuša?

2. Ko valjani ozbiljno te razmislini andi odluka te ovel ribari ando manuša hem so šaj te pomožini nekase ko odova?

² Možda već proučineja i Biblija hem već ćerđan disave promene ko to životi. Akana, valjani te odlučine da li ka ove objavitelj. Ako na hijan sigurno da li te prihvatine e Isuseso poziv ja na, ma obeshrabrin tut. Šaj na hijan sigurno sose đaneja so odija tani but važno odluka. Tačno tano so i Biblija phenela so o Petar hem olese amala „odmah“ aćhavđe pe mreže. Ama, o Petar hem oleso phral na anđe akija odluka prekali rat, sose on upoznajinđe e Isuse hem prihvatinđe le sar Mesija pobuter ando šov masek angleder (Jov. 1:35-42). Isto ađahar, tu verovatno već but sikljiljan ando Jehova hem ando Isus hem mangeja hem ponodri duhovno  te napredujine. Ama, angleder te ane i odluka da li ka ove objavitelj, mora te haljove so sa odova uključini. O Petar, o Andrija hem avera anđe odija odluka. Ama, so pomožinđa lenđe?

3. Kola osobine ka zorjaćeren ti želja te prihvatine e Isuseso poziv?

³ E Isusese prva učenikija hine len želja, đanđe šukar te ćeren pi buti, hine hrabra hem disciplinovana. Odola ista osobine pomožinđe lenđe te oven šukar propovednikija andi šukar vest. Ko akava članko, ka dikha sar tu šaj te razvijine odola osobine te bi oveja šukar propovedniko andi šukar vest hem te bi sikaveja averen.

4. Sose o Petar astarđa maćhen?

⁴ O Petar astarđa maćhen te bi parvari pe porodica, ama odova na hine jedino razlog sose ćerđa odija buti. Ov uživinđa ko odova (Jov. 21:3, 9-15). Isto ađahar, ov zamanglja hem te propovedini. Uzi e Jehovasi pomoć, but šukar ćerđa odija buti (Dela 2:14, 41).

5. Premalo Luka 5:8-11, sose o Petar mislinđa so nane dovoljno sposobno hem so šaj amenđe te pomožini ked osetinaja amen isto ađahar?

⁵ O najvažno razlog sose propovedinaja tano odolese so mangaja e Jehova. Amaro mangipe premalo Jehova šaj te pomožini amen te vaćera averenđe olestar, iako mislinaja so na hijam dovoljno sposobna te bi ćeraja odova. Ked vićinđa e Petare te ovel ribari ando manuša, o Isus phenđa lese: „Ma dara!“ (Čitin Luka 5:8-11.) O Petar na ukočinđa pe andi dar ked razmislinđa so ka desini pe ako bi ovela e Isuseso učeniko. Umesto odova, hine but iznenadimo ked dikhlja kobor maćhen astarđe, sebepi so o Isus pomožinđa lenđe. O Petar đanđa so o Isus ćerđa  čudo hem odolese mislinđa so nane dovoljno sposobno te sarađujini oleja. Ki aver strana, šaj hem tu osetineja tut isto adžahar ked razmislineja so sa odova uključini, te ove e Hristeso učeniko. Ako tano ađahar, zorjaćer to mangipe premalo Jehova, o Isus hem premalo manuša. Tegani, odola razlogija ka podstakninen tut te prihvatine e Isuseso poziv te ove ribari ando manuša (Mat. 22:37, 39; Jov. 14:15).

6. Kola tane pana disave razlogija sose propovedinaja?

⁶ Hajde te dikha pana nekobor razlogija sose propovedinaja. Mangaja te šuna e Isusesi zapovest: „Ðan hem ćeren učenikonen“ (Mat. 28:19, 20). Pana jekh razlog sose propovedinaja tano so o manuša tane „mučime hem našalde sar bakre bizo pastiri.“ Odolese, but valjani lenđe o ćaćipe ando e Devleso Kraljevstvo (Mat. 9:36). O Jehova mangela sa o manuša te penđaren o ćaćipe hem te spasinen pe (1. Tim. 2:4).

7. Sar o lafija ando Rimljanima 10:13-15, mothovena so o propovedanje tano važno?

⁷ Ked razmislinaja odolestar sar odova so propovedinaja šaj te pomožini averenđe, amen ka ova podstaknime te propovedina. O ribarija astarena maćhen te bi biknena len ja te bi parvarena pe porodica. Ki aver strana, amen „astaraja“ manušen, odnosno ćeraja učenikonen, te bi spasinaja olengo životi. (Čitin Rimljanima 10:13-15; 1. Tim. 4:16).

8-9. So jekh ribari valjani te đanel hem sose?

⁸ Ko e Isuseso vreme, jekh Izraelco kova hine ribari đanđa kola vrste ando maćhe šaj te astari ko more (Lev. 11:9-12). Isto ađahar, valjanđa te đanel kaj tane o mačhe. O maćhe tane obično ko pani kova olenđe odgovorini hem kuri isi len dovoljno habe. Da li tano važno ked o ribari đala te astari maćhen? Te šaj te haljova kobor tano važno ked astarena pe o maćhe, dikhen so phenđa jekh phral ando Pacifička ostrvija ked vićinđa jekhe misionare te đan zajedno te astaren maćhen. O misionari phenđa e phraljese: „Ka dikha amen koro tute tajsa sabalje, ko enja o sati.“ O phral phenđa: „Tu na haljoveja. Amen đaja ked isi šansa te astara maćhen, a na ked amenđe šaj odgovorini.“

⁹ Isto ađahar, e Isusese učenikija đelje te propovedinen uduri kaj hine o manuša hem ko vreme ked šajinđe te arakhen len. Na primer, on propovedinđe ko hram, ko sinagoge, kotar ćher ko ćher hem ko pazari (Dela 5:42; 17:17; 18:4). Hem amenđe valjani te oven penđarde o navike ando manuša ko amaro područje. Amen valjani te ova prilagodljiva hem te propovedina uduri kaj tane o manuša hem ko vreme kova olenđe odgovorini (1. Kor. 9:19-23).

10. Kola alatija dinđa amen e Jehovasi organizacija?

¹⁰ Jekh ribari valjani te ovel le odgovarajućo oprema hem te đanel sar te koristini la. Hem amen valjani te ovel amen odgovarajuća alatija asi amari buti hem valjani te đana te koristina len. O Isus dinđa jasna uputstvija pe učenikonenđe sar te „astaren manušen“, odnosno sar te propovedinen. Ov phenđa lenđe so te len peja, kuri te propovedinen hem so te vaćeren (Mat. 10:5-7; Luka 10:1-11). Avdije, e Jehovasi organizacija obezbedinđa glavna publikacije asi služba kola pomožinena amenđe te ova pošukar ki amari služba. * Hem oj sikavi amen sar te koristina odola publikacije. Sa odova pomožini amen te ova uverime đi propovedinaja  hem sikavi amen sar te ova šukar učiteljija (2. Tim. 2:15).

11. Sose o „ribarija ando manuša“ mora te oven hrabra?

¹¹ O ribarija mora te oven hrabra, sose on na đanena savo vreme ađićeri len hem sose podijekh puti o oluje šaj iznenada te aven. Isto ađahar, hem o „ribarija ando manuša“ mora te oven hrabra. Ked počminaja te propovedina hem ked phenaja so hijam e Jehovase svedokija, amen šaj te doživina „oluje.“ Na primer, šaj amari porodica protivini pe amenđe, amare amala marena amenđe muj, ja disave manuša na mangena te šunen amari poruka. Ama, na hijam iznenadime sebepi odova sose o Isus upozorinđa pe učenikonen so o manuša kase ka propovedinen ka protivinen pe olenđe (Mat. 10:16).

12. Premalo Isus Navin 1:7-9, so šaj te pomožini amen te ova hrabra?

¹² So šaj te ćere te bi oveja hrabro? Sar prvo, ov uverimo so o Isus ando nebo hem ponodri vodini o propovedibe (Jov. 16:33; Otkr. 14:14-16). Sar dujto, zorjaćer ti vera ko e Jehovaso obećanje so ka brinini pe tutar (Mat. 6:32-34). So pobari vera ka ovel tut, tu ka ove pohrabro. O Petar hem olese saradnikija mothovđe bari vera ked aćhavđe pi buti sar ribarija, te bi sledinena e Isuse. Isto ađahar, hem tu mothovđan bari vera ked phenđan te amalenđe hem te porodicaće so počminđan te proučine i Biblija e Jehovase svedokonencar hem so đaja ko olenge  sastankija. Sigurno but buća menjinđan ko to životi hem ko to ponašanje te bi živineja premalo e Jehovase pravedna merilija. Aso sa odova valjanđa tuće vera hem hrabrost. Dži deja sa tutar te ove hrabro, tu šaj te ove uverimo so „kuri god te đa tuvaja tano o Jehova, to Devel.“ (Čitin Isus Navin 1:7-9.)

13. Sar odova so hor ka razmisline hem ka moline tut ka pomožini tuće te ove hrabro?

¹³ So šaj pana te pomožini amen te ova hrabra? Molin tut asi hrabrost hem odvažnost (Dela 4:29, 31). O Jehova ka odgovorini ko te molitve hem niked na ka aćhavi tut. Ov uvek ka podržini tut. Isto ađahar, hor razmislin sar o Jehova spasinđa pe slugen ko purano vreme. Hem razmislin sar pomožinđa tuće ked hine tut dijekh problemi hem sar dinđa tuće snaga te ćere promene ko to životi. Ov uverimo so Okova kova vodinđa pe narodo prekalo Crveno more, šaj te pomožini hem tuće te ove e Hristeso učeniko (Izl. 14:13). Tu šaj te ovel tut isto pouzdanje sar o psalmista kova phenđa: „O Jehova tano ki mi strana, na ka darav. So šaj te ćerel maje o manuš?“ (Ps. 118:6).

14. So sikljiljan kotar o primer andi phen Masae hem i phen Tomojo?

¹⁴ Pana jekh način te ova hrabra tano te sikljova sar o Jehova pomožinđa okolenđe kola lađana te oven hrabra. Jekh olendar tani i phen Masae. Oj hine lađutni hem mislinđa so niked na ka uspini te vaćeri averencar andi pi vera. I pomisao te vaćeri nekasa kas na penđari, dićhilji laće sar jekh but baro zido prekalo kova mislinđa so niked na ka nakhel. Odolese, oj dinđa sa pestar pobuter te zamangel e Devle hem e manušen. Oj razmislinđa odolestar kobor tano o propovedibe hitno hem molinđa e Jehova te zorjaćeri olaki želja te propovedini. Oj pobedinđa pi dar hem čak služinđa sar stalno pioniri. Isto ađahar, o Jehova šaj te pomožini hem e neve objaviteljenđe „te oven hrabra.“ Odova dikhaja ko iskustvo andi phen Tomojo. Ked počminđa te propovedini kotar ćher ko ćher, i stanarka pištinđa upro late hem phenđa laće: „Na mangava te vaćerav e Jehovase svedokonecar!“ hem phanlja o udara. I phen Tomojo hrabro phenđa e phenjaće koja hine olaja ki služba: „Da li šunđan odova? Na phenđum nijekh lafi, a oj penđarđa so hijum e Jehovaso svedoko. But hijum bahtali sebepi odova!“ I phen Tomojo akana služini sar stalno pionir.

15. So značini te ove disciplinovano hem sose tani odija osobina važno aso sa o hrišćanija?

¹⁵ O uspešna ribarija tane disciplinovana. I disciplina opisujini pe sar „sposobnost te ćhive kokri tut te ćere o buća kola valjanena te ćeren pe.“ O ribarija mora te oven disciplinovana te bi uštena rano, te bi aćhona ki buti đi o krajo hem te bi ćerena buti čak hem ked tano nevreme. Hem amen valjani te ova disciplinovana te bi istrajinaja hem te bi ispuninaja amaro zadatko (Mat. 10:22).

16. So ka pomožini amen te ova disciplinovana?

¹⁶ Amen na bijandiljam sar disciplinovana manuša. Umesto odova, obično ćeraja odova soj tano amenđe polokho. Te bi ovaja disciplinovana, valjani amenđe samokontrola. Odolese, mora te sikljova te ćera o buća kola tane amenđe phare. Ama, na hijam kokri sose o Jehova ka pomožini amen prekalo po sveti duh (Gal. 5:22, 23).

17. Premali 1. Korinćanima 9:25-27, so o apostol Pavle valjanđa te ćerel te bi ovela disciplinovano?

¹⁷ O apostol Pavle hine disciplinovano. Ipak, ov priznajinđa so mora te „kontrolišini“ po telo te bi ćerela o buća kola tane ispravna. (Čitin 1. Korinćanima 9:25-27.) Ov  podstakninđa averen te oven disciplinovana hem sa o buća kola ćerena te oven „pristojna hem ađahar sar soj tano o redo“ (1. Kor. 14:40). Amen mora te ova disciplinovana te bi ovela amen šukar duhovna navike, a jekh olendar tani te đa te propovedina hem te sikava averen andi šukar vest (Dela 2:46).

18. Soj tano uspeh anglo e Jehovase jaćha?

¹⁸ Jekhe ribarese phenela pe soj tano uspešno ako astari bute maćhen. Ama ki aver strana, da li hijam uspešna ili na ki amari buti na zavisini odolestar kobor manušen anđam ko ćaćipe (Luka 8:11-15). Anglo e Jehovase jaćha ka ova uspešna sa đi istrajinaja ko propovedibe andi šukar vest hem ko odova te sikava averen. Sose? Odolese so odoleja mothovaja so hijam poslušna Olese hem olese Ćhavese (Mar. 13:10; Dela 5:28, 29).

19-20. Kova pana razlog isi amen te propovedina?

¹⁹ Ko disave phuvja, o ribarija šaj te astaren e maćhen samo ko određena masekija. Ko odola phuvja, o ribarija dikhena sa pobuter te astaren maćhen sose džanena so i sezona pana hari ka završini pe. Sar o ribarija ando manuša, hem amen isi amen pana jekh razlog sose valjani te propovedina akana: O kraj ando akava sveto tano sa popaše. O vreme kova aćhilo amenđe te propovedina te bi spasinena pe o manuša tano ograničimo. Odolese, ma odugovlačin hem ma ađićer te ovel tut savršena okolnostija te bi ćereja odija važno buti (Prop. 11:4).

²⁰ Akana tano vreme te zorjaćere ti želja, pana pošukar te penđare i Biblija, te ove hrabro hem te ove disciplinovano. Prekalo ofto milionija „ribarija ando manuša“ ađićerena tut te propovedine zajedno olencar i šukar vest hem ov uverimo so o Jehova ka del tut radost (Nem. 8:10). De sa tutar te propovedine kobor god šaj đi o Jehova na phenela soj tano kraj. Ko aver članko, ka dikha trin načinija kola ka pomožinen amen te zorjaćera amari odlučnost hem ponodri te ćera amari buti sar ribarija ando manuša.