1. Xana Yesu a zrambe mune wa vaphasi va tinhlampfi akuva va yentxa yini, nakone vone va yangulise kuyini?

VADONDZRISIWA Petro, Andreya, Yakobe na Yohane a va tizra swanga vaphasi va tinhlampfi. Yanakanya hi ndlela leyi va nga ha vaka va hlamale ha yone loko Yesu a va zrambe a ku: ‘Ndzri landzrani: ndzri ta n’wi yentxa vaphasi va vhanu.’ * Xana va yangulise kuyini? Bibele dzri li: ‘Va hatla va tsrhika minkukutu va mu landzra.’ (Mt 4:18-22) Xiboho lexo xi txintxi hi ku helela wutomi bya vaphasi volavo. Vone a va nge he ti va vaphasi va tinhlampfi kambe a va ta va ‘vaphasi va vhanu’. (Lk 5:10) Namunhla wa siku, Yesu a yentxa xizrambu lexi fanaka ka lava hakunene va swi djulaka ni lava zrandzraka ntiyiso. (Mt 28:19, 20) Xana u xi yamukelile xizrambu xa Yesu xa kuva u va muphasi wa vhanu?

2. Ha yini hi fanela ku xi nyika lisima xiboho xa ku va vaphasi va vhanu, nakone i yini leswi taka hi pfuna ku teka xiboho lexo?

² Swi nga yentxeka u ni nkama wa kukazri na u dondzra Bibele nakone u yentxe ku txintxa kukulu a wuton’wini byaku, swoswi u djula ku teka xiboho xa ku va muzrezri. Xana wa txhavanyana ku yamukela xizrambu xa Yesu? Loko swi li tanu u nga godoli. Leswo swi kombisa leswaku wa swi tiva leswaku xiboho lexo i xa lisima swinene. I ntiyiso leswaku Bibele dzri li Petro ni vanghanu vakwe va ‘hatle’ va tsrhika minkukutu yavu va landzra Yesu. Kambe xiboho lexo a va xi tekanga hi magugu. A ku khalute ku tlula 6 wa tiwheti na Petro ni makwavu Andreya va pfumele Yesu swanga Mesiya. (Yh 1:35-42) Hi ndlela leyi fanaka, swi nga yentxeka hinkwaswu leswi u swi dondzriki mayelanu na Yehovha na Yesu swi ku susumetela akuva u ya u kula hi tlhelo dzra moya. Kambe a wu fanelanga ku teka xiboho xa ku va muzrezri na wu nga zranganga hi ku pimisa ha hombe. I yini leswi pfuniki  Petro, Andreya ni van’wana akuva va teka xiboho?

3. Hi wani matsrhamela lawa ma taka ku pfuna akuva u yamukela xizrambu xa Yesu?

³ Vadondzrisiwa va ku sungula va Yesu a va ni leswi a swi va susumetela ku yentxa ntizro lowo, a va wu tiva ha hombe ntizro wavu, a va ni xixixi nakone a va tidondzrisa. Handle ka ku ganaganeka, matsrhamela wolawo ma va pfune akuva va va vaphasi lavanene va vhanu. Nakone ma nga ku pfuna na wene akuva u va mudondzrisiwa lwenene wa Kriste. Nhloko-mhaka leyi yi ta ku komba leswi nga ku pfunaka ku txutxela matsrhamela wolawo.

4. I yini leswi swi susumeteliki Petro ku va muphasi?

⁴ Petro a a phasa tinhlampfi akuva a kota ku wundla ndangu wakwe. Kambe a a nga swi yentxi hi leswi a ku li ntizro ntsena. Swi tikomba na Petro a a swi zrandzra ku phasa tinhlampfi. (Yh 21:3, 9-15) Nakone yene a tlhele a dondzra ku zrandzra ntizro wa ku va muphasi wa vhanu. Hi ku pfuniwa hi Yehovha, Petro a kote ku yentxa ntizro wakwe ha hombe.​—Min 2:14, 41.

5. Hi ku ya hi Luka 5:8-11, ha yini Petro a a txhava, nakone i yini leswi nga hi pfunaka ku hlula ku txhava loku fanaka?

⁵ Lexi xi hi susumeteleka ngopfu ku yentxa ntizro wa ku zrezra hi leswi hi zrandzraka Yehovha. Lizrandzru dzrezru ha Yehovha dzri nga hi pfuna ku yentxa ntizro lowo nambi loko hi titwa na hi nga na wuswikoti bya ku zrezra. Loko a zrambe Petro akuva a va muphasi wa vhanu, Yesu a te: ‘U nga txhavi.’ (Dondzra Luka 5:8-11.) Leswi a swi yentxa Petro a txhava a ku nga li leswi a a ta txhuka a kumana na swone hi ku va mudondzrisiwa. Hi ntiyiso wa kone, yene a o titwa na a nga fanekeleki. Yene a a ha ku hlamalisiwa hi hlolana ledzri Yesu a dzri yentxiki nakone a a titwa na a nga fanekeleki ku tizra na yene. Ku fana na Petro, na wene u nga ha kazrateka loko u pimisa hi hinkwaswu leswi patsrekiki ka ku va mudondzrisiwa wa Kriste. Loko swi  li tanu, kulisa lizrandzru dzraku ha Yehovha, ha Yesu ni hi walekwenu, leswo swi ta ku nyika ku navela loku u ku vilelaka akuva u yamukela xizrambu xa Yesu xa kuva u va muphasi wa vhanu.​—Mt 22:37, 39; Yh 14:15.

6. Hi swini swivangelo swin’wana leswi hi susumetelaka ku zrezra?

⁶ Hi ni swivangelo swin’wana leswi hi susumetelaka ku zrezra. Xin’we xa swone hi leswaku hi djula ku yingiseta xileleto xa Yesu lexi liki: “Fambani mi ya yentxa vadondzrisiwa.” (Mt 28:19, 20, Tradução do Novo Mundo, TNM) Xivangelo xin’wana hi leswi hi twelaka wusiwana vhanu lava ‘xanisekaka, lava hangalakiki swanga hi tihamba leti ngeke na mubyisi’ ni lava swi vilelaka ngopfu ku dondzra ntiyiso mayelanu ni Mfumu wa Xikwembu Nkulukumba. (Mt 9:36) Handle ka leswo, Yehovha a djula leswaku vhanu hinkwavu va tiva ntiyiso va tlhela va huluxiwa.​—1Tm 2:4.

7. Xana a buku Ba-le-Roma 10:13-15 dzri swi kombisisa kuyini leswaku a ntizro wezru wa ku zrezra i wa lisima?

⁷ Loko hi pimisa hi ndlela leyi ntizro wa ku zrezra wu nga huluxaka wutomi bya vhanu ha yone, leswo swi hi susumetela ku yamukela xizrambu xa Yesu. Ku hambana ni muphasi wa tinhlampfi lweyi a phaselaka ku da kumbe ku xavisa, nkongometo wezru wa ku ‘phasa’ vhanu i wa ku huluxa wutomi byavu.​—Dondzra Ba-le-Roma 10:13-15; 1Tm 4:16.

8-9. I yini leswi muphasi a fanelaka ku swi tiva, nakone ha yini?

⁸ A masikwini ya Yesu, muphasi wa tinhlampfi wa mu-Israyele a a fanela ku tiva muxaka wa tinhlampfi leti a a ta ti phasa. (Lv 11:9-12) Nakone a a fanela ku tiva lomu a a ta ti kuma kone. Hi ntolovelo, a tinhlampfi ti zrandzra ku tsrhama lomu mati ma nga manene ni lomu ti nga kumaka swakuda swinyingi. Xana ku ni nkama lowu muphasi a fanelaka ku ya phasa ha wone? Vona leswi yentxekiki ka xihlale xa kukazri xa le Pacífico. Makwezru mun’we a zrambe muzrumiwa wa kukazri akuva va ya phasa tinhlampfi. Muzrumiwa lweyo a te: “Hi swone! Hi ta kumana mundzruku ni mixo hi ma 9 wora.” Makwezru lweyo a hlamule a ku: “Ni vona leswaku a wu si na swi twisisa. Hine hi famba hi nkama lowu tinhlampfi ti nga kone ku nga li hi nkama lowu hi wu djuluka.”

⁹ Hi ndlela leyi fanaka, vaphasi va vhanu va le dzaneni dzra ku sungula a va famba ka mimbangu leyi “tinhlampfi” a ti kumeka ka yone ni hi nkama lowu a ti ta kumeka ha wone. Hi xikombiso, valandzreli va Yesu a va zrezra a tempeleni, a masinagogeni, hi yindlu ni yindlu ni ka mimbangu ya ku xavisela ka yone. (Min 5:42; 17:17; 18:4) Ku fana na vone, hi fanela ku tiva leswi vhanu lava nga ka nsimu yezru va talisaka ku swi yentxa. Hi fanela ku titwananisa ni swiyimu hi tlhela hi zrezra ka mimbangu leyi hi nga va kumaka ka yone ni hi nkama lowu hi nga va kumaka ha wone.​—1Ko 9:19-23.

10. Hi swini switizro leswi nhlengeletanu ya Yehovha yi hi nyikaka swone?

¹⁰ Muphasi wa tinhlampfi a fanela ku va ni switizro leswinene a tlhela a tiva matizrisela ya swone. Na hine hi fanela ku va ni switizro leswi vilelekaka akuva hi yentxa ntizro wezru. Nakone hi fanela ku tiva matizrisela ya xitizro xin’wana ni xin’wana. Yesu a byeli vadondzrisiwa vakwe ndlela ya ku zrezra madzrungula lamanene. Yene a va byeli leswi va fanelaka ku swi teka, lomu va fanelaka ku zrezra kone ni leswi va fanelaka ku swi hlaya. (Mt 10:5-7; Lk 10:1-11) Namunhla wa siku a nhlengeletanu ya Yehovha yi hi nyika Switizro Swa Ku Dondzrisa ha swone, leswi hi pfunaka ngopfu a ntizrweni wa ku zrezra. * Yone yi tlhela yi hi dondzrisa matizrisela ya xitizro xin’wana ni xin’wana. Hi ndlela leyo,  hi kuma ku tiya ni wuswikoti lebyi vilelekaka akuva hi va vadondzrisi lavanene.​—2Tm 2:15.

11. Ha yini lava va nga vaphasi va vhanu va fanela ku va ni xixixi?

¹¹ Lava va nga vaphasi va tinhlampfi va fanela ku va ni xixixi. Minkama yin’wana, va kumana ni swiyimu leswi va nga swi yimelangakiki a lwandle. Hakanyingi va tizra ni wusiku nakone va nga ha kumana ni swidzedze leswi a va nga swi yimelanga. Vaphasi va vhanu na vone va fanela ku va ni xixixi. Loko hi sungula ku zrezra hi tlhela hi titivisa swanga Timboni ta Yehovha, hi nga ha kumana ni “swidzedze” swa kukazri, swa ku fana ni ku kanetiwa hi maxaka, ku hlekiwa hi vanghanu ni ku va vhanu va yala dzrungula dzrezru. Kambe leswo a swi hi hlamalisi. Yesu a tivise leswaku valandzreli vakwe a va ta zrezrela ni vhanu lava a va ta va kaneta.​—Mt 10:16.

12. Hi ku ya hi Yehošua 1:7-9, i yini leswi hi nga swi yentxaka akuva hi yengetela xixixi?

¹² I yini leswi u nga swi yentxaka akuva u kuma xixixi lexi yengetelekiki? Xa ku sungula, tiyiseka leswaku Yesu a kongomisa ntizro lowu na a li tilweni. (Yh 16:33; Mpf 14:14-16) Ntsrhaku ka leswo, tiyisa lipfumelo dzraku ka xidumbiso xa Yehovha xa kuva a ku pfuna. (Mt 6:32-34) Loko lipfumelo dzraku dzri ya dzri tiya, na xone xixixi xaku xi ta ya xi yengeteleka. Petro ni vatizri-kulobye va kombise lipfumelo ledzrikulu loko va siye ntizro wavu wa ku tihanyisa akuva va landzrela Yesu. Na wene u kombise lipfumelo ledzrikulu loko u byeli maxaka yaku ni vanghanu vaku leswaku u sungule ku dondzra Bibele ni Timboni ta Yehovha ni ku hlalela mintlhanganu ya wukriste. Nakone handle ka ku  ganaganeka, u yentxi ku txintxa a wuton’wini byaku akuva u hanya hi ku landzrelelana ni milawu ya ku lulama ya Yehovha. Leswo na swone swi vileli lipfumelo ni xixixi. Xileswo, yana mahlweni u tikazratela ku yengetela xixixi xaku. Leswo swi ta ku pfuna leswaku u va ni ku dumba ka leswaku ‘Yehovha, Xikwembu Nkulukumba waku, a na wene hinkwaku lomu u taka ya kone’.​—Dondzra Yehošua 1:7-9.

13. Xana a xikhongoto ni ku yanakanyisisa swi nga ku pfuna hi ndlela yini ku kuma xixixi lexi yengetelekiki?

¹³ I yini swin’wana leswi u nga swi yentxaka? Khongota ka Yehovha u kombela xixixi. (Min 4:29, 31) Yene a ta hlamula swikhongoto swaku nakone a nge ti ku tsrhika ni siku ni dzrin’we. Minkama hinkwayu a le kusuhi na wene akuva a ku pfuna. Handle ka leswo, yanakanyisisa hi ndlela leyi Yehovha a pfuniki ha yone vhanu van’wana a minkameni leyi khalutiki. Tlhela u pimisa hi ndlela leyi a ku pfuniki ha yone ku hlula mindzringo ni hi ntamu lowu a ku nyikiki wone akuva u yentxa ku txintxa a wuton’wini byaku. Tiyiseka leswaku lweyi a tsravukanisiki mati ya Lwandle dzra Libungu akuva a huluxa va-Israyele a nga ku pfuna akuva u va mudondzrisiwa wa Kriste. (Eks 14:13) Vana ni ku tiyiseka loku fanaka ni ka mupsalma lweyi a tiki: ‘Yehovha a yime na mine, ndzri nga txhave. A mhunu a nga ndzri yentxa yini xana?’​—Ps 118:6.

14. I yini leswi u swi dondzriki ka xikombiso xa makwezru Masae ni xa makwezru Tomoyo?

¹⁴ Ndlela yin’wana leyi u nga kumaka xixixi lexi yengetelekiki ha yone i ku dondzra hi leswi Yehovha a va pfunisiki xiswone vhanu lava nga ni tingana ku zrezra hi xixixi. Vona xikombiso xa makwezru wa xisati lweyi a vitaniwaka Masae. Yene a a ni tingana nakone a a pimisa leswaku a a nge ti gama hi ku swi kota ku yentxa ntizro wa ku zrezra. Yene a a titwa na swi mu kazratela ku khanela ni vhanu lava a kalaka a nga va tivi lakakuva a a swi vona na swi fana ni loko va mu kombela ku va a tsremakanya khumbi dzra ku leha ledzri a a nge na ku khaluta hi ka dzrone. Xileswo, Masae a yentxe minzamu yikulu ngopfu swinene akuva a kulisa lizrandzru dzrakwe ha Xikwembu Nkulukumba ni hi walekwavu. Yene a tlhele a yanakanyisisa hi ndlela leyi ntizro wa ku zrezra wu nga wa xihatla ha yone a masikwini lawa ya wugamu nakone a khongote ka Yehovha a kombela leswaku a mu nyika ku navela ka ku yentxa ntizro wa ku zrezra. Masae a kote ku hlula ku txhava kwakwe nakone a patsre ni ku tizra swanga phayona dzra nkama hinkwawu. Yehovha a nga tlhela a pfuna vazrezri lavampswha leswaku va va ni xixixi. Vona leswi yentxekeliki makwezru wa xisati lweyi a vitaniwaka Tomoyo. Loko a sungule ku huma nsimu, n’winyi wa muti wa ku sungula lweyi a mu kumiki a bandlukane a ku: “A ni djuli ku tiva ntxhumu hi Timboni ta Yehovha.” A gama a pfala xipfalu. A matsrhan’wini ya ku txhava, Tomoyo a byele lweyi a a li na yene nsin’wini a ku: “U swi vonile? A swi djulanga ni hlaya ntxhumu. Yene a tekeli ku swi vona leswaku ni Mboni ya Yehovha. Ni nyonxe ndjhani!” Swoswi Tomoyo a tizra swanga phayona dzra nkama hinkwawu.

15. I yini ku tidondzrisa, nakone ha yini ku li ka lisima ka vakriste?

¹⁵ Vaphasi va tinhlampfi lava humelelaka hi lava va tidondzrisaka. Ku hlayiwa leswaku ku tidondzrisa i “ku va ni wuswikoti bya ku tisindzrisa ku yentxa leswi fanelaka ku yentxiwa”. Lava va tizraka ka ku phasa tinhlampfi va tidondzrisa ku pfuka ni mixo swinene, ku tizra va za va ya heta ni ku tama va tizra nambi loko maxela ma nga li manene. Na hine hi fanela ku tidondzrisa akuva hi tama hi tiyisela ni ku hetisa ntizro wezru.​—Mt 10:22.

16. I yini leswi nga hi pfunaka ku va vhanu lava tidondzrisaka?

¹⁶ A hi pswaliwi na hi ni wuswikoti bya ku tidondzrisa.  A matsrhan’wini ya leswo, hi talela ka ku djula ku yentxa mintxhumu leyi vevukaka. Ku va lava tidondzrisaka swi vilela hi va ni ku tikhoma. Xileswo, hi vilela mpfunu akuva hi dondzrela ku yentxa mintxhumu leyi hi yi vonaka na yi kazrata. Yehovha a hi nyika mpfunu lowo hi ku tizrisa moya wa ku xwenga.​—Ga 5:22, 23.

17. Hi lani swi tsraliwiki ha kone ka 1 Ba-le-Korinte 9:25-27, i yini leswi Pawulo a hlayiki leswaku a a fanela ku swi yentxa akuva a kota ku tidondzrisa?

¹⁷ Mupostola Pawulo a a swi kota ku tidondzrisa. Kambe yene a pfumelile leswaku a swi vilela a “khata” mizri yakwe akuva a kota ku yentxa leswi swi nga swinene. (Dondzra 1 Ba-le-Korinte 9:25-27.) Yene a kutxe vakriste akuva va va lava tidondzrisaka ni kuva va yentxa mintxhumu hinkwayu hi ‘mfanelo ni hi nawu’. (1Ko 14:40) Hi fanela ku va lava tidondzrisaka akuva hi kota ku tama hi gandzrela Yehovha, leswi patsraka kuva minkama hinkwayu hi kumeka ka ntizro wa ku zrezra ni ku dondzrisa madzrungula lamanene.​—Min 2:46.

18. I yini leswi taka yentxa Yehovha a hi vona swanga lava humelelaka?

¹⁸ Lava tizraka ka ku phasa tinhlampfi va pima ku humelela kwavu hi ku ya hi nhlayu ya tinhlampfi leti va ti phasiki. Ku hambana na vone, ku humelela kwezru a ku yi hi nhlayu ya vhanu lava hi va pfuniki ku ta nhlengeletanwini ya Xikwembu Nkulukumba. (Lk 8:11-15) Loko hi tama hi tiyisela ka ntizro wa ku zrezra ni ku yentxa vadondzrisiwa, Yehovha a ta hi vona swanga lava humelelaka. Ha yini? Hikusa hi tava na hi yingiseta yene kun’we ni N’wanakwe.​—Mr 13:10; Min 5:28, 29.

19-20. Hi xini xivangelo xa ku hlawuleka lexi hi yentxaka hi hlengela ka ntizro wa ku zrezra swoswi?

¹⁹ A matikweni mambeni, ku ni tiwheti ta kukazri leti vhanu va pfumeleliwaka ku phasa tinhlampfi ha tone. A mimbangwini leyo, muphasi wa tinhlampfi a nga ha yengetela minzamu yakwe loko a vona leswaku a nguva ya ku phasa yi ya ku heleni. Hine, swanga vaphasi va vhanu, hi kutxiwa ku ya hi yengetela ntizro wezru wa ku zrezra swoswi, a wugamu bya xiyimu lexi xa mintxhumu byi yaka byi tsrhindzrekela hi ku kahlula. Ke sala nkama wutsrongo ngopfu swinene akuva hi huluxa wutomi bya vhanu. Xileswo, u nga hlweli nakone u nga yimeli swiyimu leswi hetisekiki akuva u sungula ku hlengela ka ntizro lowu wa lisima ngopfu swinene.​—Ekl 11:4.

²⁰ Swoswi londzrovota ku tiyisa ku tiyimisela kwaku, yengetela wutivi bya Bibele nakone vana lweyi a tidondzrisaka. Tipatsre ni vaphasi va vhanu lava tlulaka 8.000.000 u va u kuma mukhandlu wa ku kuma ku nyonxa loku taka hi ka Yehovha. (Neh 8:10) Tiyimiseli ku yentxa hinkwaswu leswi u nga swi kotaka a ntizrweni wa ku zrezra ni ku tama u wu yentxa ku kondzra ku tlhasa wugamu. Kambe swi li yini hi lava kutani va nga vaphasi va vhanu? I yini leswi nga va pfunaka ku tama va tiyisela ka ntizro lowo? Nhloko-mhaka leyi landzrelaka yi ta khanela hi mintxhumu yizrazru leyi nga va pfunaka.