1. Andi Jesosi bi kai fö womi di bi ta kisi fisi u de go du, nöö andi dee womi dë bi du di Jesosi kai de?

PETUISI, Andiasi, Jakobosi ku Johanisi bi dë bakama u Jesosi, nöö de bi dë sëmbë di bi ta kisi fisi. Pakisei unfa a bi o bigi da de tjika di Jesosi bi piki de taa: „Un ko go ku mi e, be mi lei unu fa fuun kisi libisëmbë [tja ko da Gadu].” * Andi dee womi aki bi du? Di Bëibel ta piki u taa: „Fa a fan ku de dë, nöö hën wante de disa hii dee soni u de de bi ta höndi dë tuu, nöö hën de go ta waka a Masa Jesosi baka” (Mat. 4:18-22). Di soni dë bi o tooka hii de libi, nöö nöiti libi u de bi o ko dë kuma fosu möön. De an bi o ta kisi fisi möön, ma de bi o „ta kisi libisëmbë” tja ko a Gadu (Luk. 5:10). A di ten aki, Jesosi ta kai limbohati sëmbë u de ko dë bakama fëën tu, söseei u de ta peleiki di bunu buka (Mat. 28:19, 20). I piki di kai di Jesosi kai i ö?

2. Faandi mbei u musu pakisei bunu ufö u ko dë wan sëmbë di ta kisi libisëmbë tja ko a Gadu, nöö andi o heepi u fuu sa du di soni dë?

² Kandë i ta lei soni u Bëibel wan pisiten kaa, nöö kandë i tooka sömëni soni a i libi. Ma kandë i musu luku nöunöu ee i kë ko dë wan peleikima, di ta konda di bunu buka da sëmbë. Ee ja kaba dë seiki ee i musu piki di kai di Jesosi kai i fii ko dë wan bakama fëën, nöö na lasi hati. A kan taa ja piki taa i kë jeti, u di  i ta fusutan taa di soni dë na wan pëëpëë soni. A dë sö tuu taa di Bëibel ta piki u taa Petuisi ku dee mati fëën bi disa dee fisi nëti u de wantewante dë. Ma Petuisi ku hën baaa an bi du di soni dë söndö u de pakisei ën luku. De bi ko sabi Jesosi möön leki sikisi liba kaa, nöö de bi ko ta biibi tuutuu taa hën da di Mësiasi (Joh. 1:35-42). Wë kandë sö nöö iseei lei sömëni soni u Jehovah ku Jesosi tu, nöö kandë i kë go a fesi a di biibi. Ma ufö i buta taa joo ko dë wan peleikima, i musu pakisei ën bunu. Andi bi heepi Petuisi, Andiasi ku woto sëmbë jeti, u de du di soni dë?

3. Andi o heepi i fii sa kë ko dë wan bakama u Jesosi?

³ Dee fosu bakama u Jesosi bi dë kabakaba u du soni, de bi sabi unfa de bi musu du di wooko u de, de bi abi degihati, söseei de bi sa’ u duwengi deseei. Dee soni aki bi heepi de, u de bi ko sa’ u konda di bunu buka da sëmbë. Di woto aki o taki unfa iseei sa ko abi dee fasi dë tu, sö taa iseei sa ko dë wan bunu peleikima, di sa’ u lei sëmbë soni.

4. Faandi mbei Petuisi bi ta kisi fisi?

⁴ Petuisi bi ta kisi fisi faa bi sa ta sölugu dee sëmbë fëën. Ma na di soni dë nöö bi mbei a bi ta du di wooko dë. U sa taki taa a bi lobi di wooko dë gaanfa seei (Joh. 21:3, 9-15). A bi ko lobi di peleikiwooko tu. Nöö u di Jehovah bi dë ku ën, mbei a bi ko sa’ u du ën bunu seei.​—Tjab. 2:14, 41.

5. Andi Petuisi bi ta fëëë te u luku Lukasi 5:8-11, nöö andi sa heepi u ee useei ta fëëë tu?

⁵ U ta peleiki u di u lobi Jehovah. Di soni dë da di möön gaan soni di mbei u ta du di peleikiwooko. Di lobi di u lobi Jehovah sa heepi u fuu ta konda soni fëën da sëmbë, aluwasi u ta si kuma wa sa’ u du di wooko. Di Jesosi bi kai Petuisi faa ko dë wan sëmbë di ta kisi libisëmbë tja ko a Gadu, hën a bi piki ën taa: „Na  fëëë, womi.” (Lesi Lukasi 5:8-11.) Petuisi an bi taa fëëë dee soni dee bi o sa miti ën ee a bi ko dë wan bakama u Jesosi. Ma a bi bigi dëën di a si dee gaan hia fisi di Jesosi bi mbei hën ku dee mati fëën kisi. A bi sabi taa wan foombo soni Jesosi bi du dë. Fëën mbei a bi ta fii taa an bi bunu tjika faa wooko ku Jesosi. Wë sö nöö iseei sa ta fii taa ja bunu tjika, te i ko fusutan andi ku andi i musu du fii sa ko dë wan bakama u Keesitu. Ee sö a dë, nöö mbei möiti fii ko lobi Jehovah, ku Jesosi, ku woto sëmbë möön gaanfa. Di soni dë o da i taanga fii sa piki di kai di Jesosi kai i fii ko de wan sëmbë di ta kisi libisëmbë tja ko a Gadu.​—Mat. 22:37, 39; Joh. 14:15.

6. Andi da wantu woto soni di ta da u taanga fuu ta peleiki?

⁶ Boo taki u wantu woto soni jeti, di ta da u taanga fuu ta peleiki. U kë du di soni di Jesosi bi taki. A bi taki taa: „Un go a hii nasiön sëmbë, nöö un heepi de u de ko dë bakama u mi” (Mat. 28:19, 20, NW). U ta peleiki tu, u di sëmbë ta „dë fukafuka weiwei”. A dë fanöudu tuutuu u sëmbë ko sabi soni u di Könuköndë u Gadu (Mat. 9:36). Jehovah kë u hii pei sëmbë musu ko sabi di tuutuu lei finifini, sö taa de sa feni libi.​—1 Tim. 2:4.

7. Unfa Loomë 10:13-15 ta lei u taa di peleikiwooko dë wan fanöudu wooko?

⁷ Te u pakisei unfa di peleiki di u ta peleiki sa heepi sëmbë u de feni libi, nöö woo kë peleiki. Wan sëmbë di ta kisi fisi ta njan dee fisi dee a ta kisi nasö a ta sei de. Ma uu ta „kisi libisëmbë” tja ko a Gadu. Hën da u ta heepi de u de ko dë bakama u Keesitu, sö taa de sa feni libi.​—Lesi Loomë 10:13-15; 1 Tim. 4:16.

8-9. Andi wan sëmbë di ta kisi fisi musu sabi, nöö faandi mbei a musu sabi di soni dë?

⁸ A di ten u Jesosi, wan sëmbë di bi ta kisi fisi, bi musu sabi un pei fisi a bi kë kisi (Leif. 11:9-12). A bi musu sabi tu naasë dee fisi lo’ u dë. Dee fisi lo’ u dë a kamian ka di wata ta kai ku de, söseei ka de sa feni hia soni u njan. Ma di juu di di sëmbë o go kisi fisi dë fanöudu tu ö? Wë buta pakisei a di soni di wan baaa di ta libi a wan paati di dë a di së u Asia bi taki. Di baaa aki bi kai wan woto baaa di ta du di sëndëlengiwooko a di pisiwata ka a ta sai dë, u de go kisi fisi. Di baaa di ta du di sëndëlengiwooko bi piki di woto baaa taa: „Mi o ko miti i amanjan mamate a nëigi juu.” Hën di baaa piki ën taa: „Wë nönö. U musu go a wan juu di bunu fuu sa kisi fisi, na a di juu di bunu da u.”

⁹ Wë sö nöö dee bakama u Jesosi dee bi ko ta kisi libisëmbë tja ko a Gadu, bi nango a kamian ka dee sëmbë bi lo’ u dë, söseei a wan juu di de bi o sa sai dë. Dee bakama u Jesosi bi nango ta peleiki a di Wosu u Gadu, a dee keiki wosu u dee Dju, a sëmbë pisi, söseei a wojowojo (Tjab. 5:42; 17:17; 18:4). Useei musu ko sabi dee guwenti u dee sëmbë u di pisiwata ka u ta peleiki. U musu dë kabakaba u tooka di fasi fa u ta du soni, fuu sa go peleiki a kamian ka woo sa miti sëmbë, söseei a wan juu di woo sa miti de.​—1 Kol. 9:19-23.

10. Andi ku andi di ölganisaasi u Jehovah ta da u?

¹⁰ Wan sëmbë di ta kisi fisi musu abi dee soifi soni faa sa kisi fisi, söseei a musu sabi unfa a musu wooko ku de. Useei musu abi dee soifi soni tu fuu sa du di peleikiwooko. Boiti di dë, u musu sabi unfa u musu wooko ku de. Jesosi bi lei dee bakama fëën gbelingbelin unfa de bi musu kisi libisëmbë tja ko a Gadu. A bi piki de andi ku andi de bi musu tja, a bi piki de naasë de bi musu go peleiki, söseei a bi piki de andi de bi musu taki (Mat. 10:5-7; Luk. 10:1-11). A di ten aki, di ölganisaasi u Jehovah ta da u soni di ta heepi u fuu sa du di peleikiwooko  a wan bunu fasi. * Ma na di dë nöö, de ta lei u tu unfa u sa peleiki ku de. Di soni dë ta heepi u fu wa ta dë fëëëfëëë te u ta peleiki, söseei a ta heepi u fuu ko sa’ u peleiki a wan bunu fasi.​—2 Tim. 2:15.

11. Faandi mbei dee sëmbë dee ta kisi libisëmbë tja ko a Gadu musu abi degihati?

¹¹ Sëmbë di ta kisi fisi musu abi degihati. Te de dë a ze, nöö so juu soni ta miti de di de an bi mëni. Dee sëmbë aki lo’ u wooko a ndeti a wata liba, nöö gaan ventu sa ko a de wan pasi vou sö. Sëmbë di ta kisi libisëmbë tja ko a Gadu musu abi degihati tu. Te u bigi ta peleiki ta piki sëmbë taa u da Jehovah Kotoigi, nöö „gaan ventu” sa ko a u liba tu. Di ventu aki sa dë di du di dee famii fuu ta du ku u, di mbei di dee mati fuu ta mbei u fa, nasö di du di sëmbë ta du ku u, u di de an kë jei dee soni dee u ta taki. Ma di soni aki an ta bigi da u. Jesosi bi taki a fesi taa a bi o manda dee bakama fëën go peleiki da sëmbë di bi o du ku de.​—Mat. 10:16.

12. Andi sa heepi u fuu ko abi degihati, te u luku Josua 1:7-9?

¹² Andi i sa du fii ko abi degihati? Di fosu soni, hën da i musu biibi taa Jesosi dë a liba ala ta tii di peleikiwooko go dou (Joh. 16:33; Ako. 14:14-16). Di u tu soni, hën da i musu ko ta möön biibi taa Jehovah o ta sölugu i kumafa a paamusi i (Mat. 6:32-34). Möön di biibi fii o ta ko taanga, möön joo ko abi degihati.  Petuisi ku dee mati fëën bi lei taa de bi abi degihati tuutuu, u di de bi disa di fisi wooko u de, u de bi sa waka a Jesosi baka. Wë sö nöö iseei bi lei taa i abi degihati tuutuu, di i bi piki dee famii fii ku dee mati fii taa i bigi lei soni u Bëibel ku dee Jehovah Kotoigi, söseei taa i nango a dee komakandi u de! Wë a musu u dë taa i bi mbei taanga möiti fii tooka di fasi fa i bi ta tja iseei ku di fasi fa i bi ta libi, sö taa i bi sa ko ta libi kumafa Jehovah kë. I bi musu abi biibi ku degihati fii bi sa du dee soni dë tu. Te i ta mbei möiti go dou fii ko abi degihati, nöö i sa dë seiki taa ’Jehovah di Gadu fii dë ku i, aluwasi ka i nango’.​—Lesi Josua 1:7-9.

13. Unfa di pakisei di joo ta pakisei fundu, ku di begi di joo ta begi, sa heepi i fii ko abi degihati?

¹³ Andi i sa du jeti fii ko abi degihati? Begi Jehovah faa da i degihati (Tjab. 4:29, 31). Jehovah o piki dee begi fii, söseei an o disa i nöiti. Hii juu a o ta dë ku i, ta heepi i. Boiti di dë, i sa pakisei fundu u di fasi fa Jehovah bi heepi sëmbë a di ten di pasa. Pakisei tu fa a bi heepi i di soni bi ta taan ga da i a di ten di pasa. Söseei pakisei fa a bi heepi i fii bi sa bia libi. I sa dë seiki taa di Sëmbë di bi tja dee sëmbë fëën pasa di Bë Ze, sa heepi i fii sa dë wan bakama u Keesitu (Ëki. 14:13). Mbei möiti fii sa abi biibi a Jehovah go dou kuma di psalöm sikifima di bi taki taa: „Jehovah dë ku mi. Ma o fëëë. Andi seei libisëmbë sa du ku mi?”​—Ps. 118:6.

14. Andi i ta lei a di woto u Sisa Masae ku Sisa Tomoyo?

¹⁴ Wan woto fasi fa i sa ko abi degihati, hën da te i ta luku unfa Jehovah bi heepi sëmbë di bi ta sen, u de ko abi degihati. Buta pakisei a di woto u wan sisa de kai Masae. Di sisa aki bi ta sen, nöö a bi ta si kuma nöiti a bi o sa go a sëmbë go konda soni u di biibi fëën da de. A bi ta taanga dëën seei faa fan ku sëmbë di an sabi. Te a bi musu fan ku wan sëmbë di an sabi, nöö a bi ta dë dëën kuma a bi ta pooba u subi wan gaan hei kuun. A bi ta si kuma nöiti seei a bi o sa du di soni dë. A bi mbei wan gaan möiti faa ko möön lobi Gadu ku woto sëmbë tuu. A bi pakisei fundu u di fa a dë fanöudu tjika fuu ta peleiki a di ten aki. Söseei a bi begi Gadu faa heepi ën fa sa ko möön abi di fii u peleiki. Te u kaba fëën, an bi ko ta fëëë möön. Boiti di dë, a bi du di kowoonu pioniliwooko. Jehovah sa heepi dee njunjun peleikima u deseei ko „abi degihati” tu. Luku di woto u wan sisa de kai Tomoyo. Di fosu pasi di a go peleiki da sëmbë a de pisi, hën a miti wan mujëë. Hën di mujëë bai ën taa: „Ma kë jei na wan soni u dee Jehovah Kotoigi!” Hën a tapa di döö gbilam. Tomoyo an bi fëëë, ma a bi piki di sisa di hën ku ën bi ta peleiki taa: „I jei andi a taki ö? An bi dë u mi taki na wan soni seei, hën a si taa mi da wan Jehovah Kotoigi. Mi ta wai seei!” Nöunöu Sisa Tomoyo ta du di kowoonu pioniliwooko.

15. Andi duwengi iseei kë taki, nöö faandi mbei a dë fanöudu u Keesitu sëmbë musu ta duwengi deseei?

¹⁵ Te dee sëmbë dee ta kisi fisi sa’ u duwengi deseei, nöö soni ta waka bunu da de. Te de taki taa wan sëmbë sa’ u duwengi hënseei, hën da „a sa’ u buta hënseei faa du dee soni dee musu du”. Dee sëmbë dee ta kisi fisi ta sei, musu ta duwengi deseei u de ta hopo fuuku. Söseei de musu ta duwengi deseei u de wooko go dou, aluwasi di wei an dë sö bunu. Useei musu sa’ u duwengi useei tu ee u kë hoi dou, söseei ee u kë kaba di wooko fuu.​—Mat. 10:22.

16. Andi sa heepi u fuu ko sa’ u duwengi useei?

¹⁶ Te de pai u, nöö wa ta sa’ u duwengi useei wantewante dë. U ta kë du soni a di fasi di möön kösökösö da u. Ma so juu, dee möön fanöudu soni ta taanga u du. Fëën mbei u musu ko sa’ u duwengi useei. Jehovah ta da u di santa  jeje fëën u heepi u fuu ko sa’ u du di soni dë.​—Gal. 5:22, 23.

17. Unfa apösutu Paulosu bi taki taa a bi ta mbei möiti tjika faa bi sa duwengi hënseei, te u luku 1 Kolenti 9:25-27?

¹⁷ Apösutu Paulosu bi ta duwengi hënseei. Ma ku ën sö seei a bi taki taa a bi musu ta ’naki hënseei ku böö’, faa bi sa du soni kumafa a fiti. (Lesi 1 Kolenti 9:25-27, NW.) A bi da woto sëmbë taanga tu u de duwengi deseei, söseei u de du soni a wan „lesipeki fasi kumafa a fiti” (1 Kol. 14:40). U musu ta duwengi useei fuu sa ta du dee soni dee u musu ta du u di biibi fuu an ko suwaki, te kisi di peleiki di u musu ta peleiki, ta lei sëmbë soni u Bëibel.​—Tjab. 2:46.

18. Andi o mbei Jehovah si taa di wooko fuu ta waka bunu?

¹⁸ Te wan sëmbë di ta kisi fisi, kisi hia fisi, nëën ufö a ta tei taa di wooko fëën go bunu. Ma soni dë woto fasi ku di peleikiwooko. Na te u ta heepi hia sëmbë u de ko a di ölganisaasi u Jehovah ufö a ta dë taa di wooko fuu ta waka bunu (Luk. 8:11-15). Solanga u ta peleiki go dou, ta lei sëmbë soni u Bëibel, nöö Jehovah o si taa di wooko fuu ta waka bunu. Faandi mbei? Wë u di a di lö fasi dë, u ta lei taa u ta du di soni di hën ku di Womi Mii fëën manda u fuu du.​—Maik. 13:10; Tjab. 5:28, 29.

19-20. Andi da wan soni di musu möön da u taanga fuu du di peleikiwooko a di ten aki?

¹⁹ A so köndë, de ta da dee sëmbë dee ta kisi fisi pasi u de kisi fisi wantu liba nöö. A dee köndë dë, wan sëmbë di ta kisi fisi, sa fii taa a musu mbei möön möiti faa kisi fisi, te a si taa di daka di de buta dëën taa an musu kisi fisi möön ta dou. U di u ta kisi libisëmbë tja ko a Gadu, mbei di soni di woo taki aki musu da u taanga fuu peleiki nöunöu. Di soni di u kë taki, hën da di kaba u di goonliba aki ta ko seei zaa sö! Ten an fika hia möön fuu paaja di bunu buka da sëmbë, u de sa feni libi. Ja musu naanaa, söseei na si kuma i musu u wakiti u hii soni ko ta waka bunu a i libi, ufö i sa du di gaan fanöudu wooko aki.​—Peleik. 11:4.

²⁰ Mbei möiti nöunöu fii sa ko dë kabakaba u peleiki. Mbei möiti nöunöu fii ko abi degihati, fii ko sa’ u duwengi iseei, söseei fii ko sabi möön soni u Bëibel. Wooko makandi ku dee möön leki aiti milion sëmbë dee ta du di peleikiwooko a hii së u goonliba, nöö joo feni di piizii di Jehovah ta da sëmbë (Neh. 8:10). Mbei hii möiti fii sa du di wooko aki ka i sa du ën dou, söseei i musu ta du ën u te Jehovah taki taa di wooko kaba. A di woto di ta ko, woo taki u dii soni di u sa du, fuu sa ko möön dë kabakaba u paaja di bunu buka u di Könuköndë.