1. Yini Jesu layisho kubadwebi labane, futsi benta njani?

BOPHETRO, Andreya, Jakobe naJohane bebanelibhizinisi lekudweba. Kungenteka bamangala kakhulu nabeva Jesu atsi: “Ngilandzeleni, ngitawunenta badwebi bebantfu.” * Benta njani? LiBhayibheli litsi: “Ngekushesha bashiya emanethi abo bamlandzela.” (Mat. 4:18-22) Leso sincumo sakushintja kuphila kwabo. Kunekutsi badwebe tinhlanti, ‘besebatawudweba bantfu.’ (Luk. 5:10) Nalamuhla, Jesu ucela bantfu labacotfo nalabatsandza liciniso kutsi bente lokufanako. (Mat. 28:19, 20) Sewusemukele yini sicelo saJesu sekudweba bantfu?

2. Kungani kufanele sisitsatse njengalesibalulekile sincumo sekudweba bantfu, futsi yini letasisita kuze sente leso sincumo?

² Mhlawumbe sewunesikhatsi ufundzelwa liBhayibheli futsi wenta lushintjo ekuphileni kwakho. Nyalo sewufuna kwenta sincumo sekutsi ungaba yini ngummemeteli wetindzaba letimnandzi. Nangabe ungaciniseki kutsi usemukele yini lesicelo saJesu, ungapheli emandla. Kungaciniseki kwakho kungenteka kusho kutsi uyati kutsi sibaluleke kanganani lesincumo. Kuliciniso kutsi liBhayibheli litsi Phetro nebangani bakhe bavele bashiya emanethi abo “ngekushesha.” Nobe kunjalo, loko akusho kutsi Phetro nabomnakabo benta lesincumo bangakacabangisisi ngaso. Besekuphele tinyanga letisitfupha bamati Jesu futsi baciniseka kutsi unguMesiya. (Joh. 1:35-42) Kungenteka kutsi nawe sewufundze lokunyenti  ngaJehova nangaJesu, futsi ufuna kuchubeka usondzelana naJehova. Kodvwa kufanele ucabangisise ngaphambi kwekutsi ube ngummemeteli. Yini leyasita Phetro, Andreya kanye nalabanye kutsi bente sincumo?

3. Ngubuphi buntfu lobutakusita ukhulise sifiso sakho sekufuna kwemukela sicelo saJesu?

³ Bafundzi baJesu bebanesifiso, lwati, sibindzi futsi bebenta tintfo lebebakutfola kulukhuni kutenta. Lobuntfu basita labafundzi kutsi bawente kahle umsebenti wekushumayela tindzaba letimnandzi. Kulesihloko, sitawucoca ngekutsi singabutfutfukisa njani lobuntfu kuze sikhone kuba bafundzisi labaphumelelako.

4. Yini leyakhutsata Phetro kutsi abe ngumdwebi?

⁴ Phetro bekadweba kuze ondle umndeni wakhe, kodvwa akusiko loko kuphela lobekumenta kutsi abe ngumdwebi. Kungenteka kutsi Phetro bekakutsandza kudweba. (Joh. 21:3, 9-15) Wabese sewuyakutsandza nekuba ngumdwebi webantfu. Ngesizatfu sekutsi bekasitwa nguJehova, Phetro wakhona kuwenta kahle umsebenti wakhe wekudweba bantfu.—Imis. 2:14, 41.

5. Ngekusho kwaLukha 5:8-11, kungani Phetro bekesaba, futsi loko kungasisita njani nangabe sitiva ngendlela lefanako?

⁵ Siyashumayela ngesizatfu sekutsi sitsandza Jehova futsi leso sizatfu lesibalulekile lesisikhutsata kutsi sente lomsebenti. Kutsandza Jehova kusenta sitjele labanye ngaYe ngisho nobe ngaletinye tikhatsi siva ngatsi akusifaneli kwenta lomsebenti. Ngesikhatsi Jesu atjela Phetro kutsi abe ngumdwebi webantfu, watsi: “Ungesabi.” (Fundza Lukha 5:8-11.) Phetro akazange esabe kutsi kutawentekani nakangaba ngumfundzi. Kunaloko, watfuswa simangaliso Jesu lebekasentile sekutsi babambe  tinhlanti letinyenti futsi Phetro wativa angakufanele kubitwa nguJesu kutsi asebente naye. Ngendlela lefanako, kungenteka nawe ukhatsateke nawucabanga ngaloko lokufanele ukwente kuze ube ngumfundzi waKhristu. Nangabe kunjalo, cinisa lutsandvo lonalo ngaJehova, ngaJesu nangabomakhelwane futsi loko kutakukhutsata kutsi wemukele sicelo saJesu sekuba ngumdwebi webantfu.—Mat. 22:37, 39; Joh. 14:15.

6. Ngutiphi letinye tizatfu letisenta sifune kushumayela?

⁶ Cabanga ngaletinye tizatfu letisikhutsata kutsi sishumayele. Sifuna kulalela umyalo waJesu lotsi: “Hambani nente bantfu . . . babe bafundzi.” (Mat. 28:19, 20) Lokunye lokusenta sishumayele bantfu kutsi ‘baphetfwe kabi, bahlakatekile’ futsi bakudzinga mbamba kufundza liciniso ngeMbuso. (Mat. 9:36) Jehova ufuna kutsi tonkhe tinhlobo tebantfu titfole lwati lolungulonalona lweliciniso futsi tisindziswe.—1 Thim. 2:4.

7. UmBhalo waRoma 10:13-15, ukhombisa njani kutsi umsebenti wekushumayela ubalulekile?

⁷ Kucabanga ngekutsi umsebenti wekushumayela ungasindzisa kuphila kwebantfu kutasisita sifune kushumayela. Ngalokwehlukile kumuntfu lodwebela kutsengisa nobe kudla, tsine ‘sidweba’ bantfu kuze sisindzise kuphila kwabo.—Fundza Roma 10:13-15; 1 Thim. 4:16.

8-9. Yini lokufanele yatiwe ngumdwebi futsi kungani?

⁸ Ngesikhatsi saJesu, umdwebi bekufanele ati kutsi luhlobo luni lwenhlanti langalubamba. (Lev. 11:9-12) Bekufanele ati nekutsi leyonhlanti angayitfolaphi. Tinhlanti tivame kuhlala emantini letiwatsandzako nalapho kugcwele khona kudla. Kunendzaba yini kutsi umdwebi uye kuyodweba ngasiphi sikhatsi? Lesinye sitfunywa selivangeli lesihlala esihlengeni sasePacific, safundza kutsi kunesikhatsi lesikahle sekubamba tinhlanti. Fakazi wendzawo wasimema kutsi baye kuyodweba. Lesitfunywa selivangeli satsi: “Sitawuhlangana ekuseni nga-9.” Lomzalwane watsi: “Akwentiwa kanjalo. Siya ngesikhatsi lesikahle lesingabamba ngaso tinhlanti, hhayi ngesikhatsi lesilungela tsine.”

⁹ Ngendlela lefanako, bafundzi baJesu lebebabadwebi bebantfu, bebaya lapho kutfolakala khona bantfu nangesikhatsi labatfolakala ngaso. Nasi sibonelo, balandzeli baJesu bebashumayela emasinagogeni, emtini ngemuti kanye nasetimakethe. (Imis. 5:42; 17:17; 18:4) Natsi kufanele sati kutsi singabatfola nini bantfu emakhaya. Kufanele sikulungele kuya etindzaweni labatfolakala kuto nangesikhatsi labatfolakala ngaso.—1 Khor. 9:19-23.

10. Ngumaphi emathulusi lesiwanikwa yinhlangano yaJehova?

¹⁰ Umdwebi kufanele abe nemathulusi lakahle futsi kufanele ati kutsi asetjentiswa njani. Natsi kufanele sibe nemathulusi lakahle ekushumayela futsi kufanele sati kutsi asetjentiswa njani. Jesu wanika bafundzi bakhe ticondziso tekutsi bangabadweba njani bantfu. Wabatjela kutsi baphatse ini, bashumayele kuphi nekutsi bashumayele kanjani. (Mat. 10:5-7; Luk. 10:1-11) Lamuhla, inhlangano yaJehova isinike Emathulusi Ekufundzisa lasebenta kahle kakhulu. * Siyafundziswa nekutsi singawasebentisa njani. Lokuceceshwa kusisita kutsi sibe nesibindzi futsi sibe nemakhono lesiwadzingako kuze siphumelele nasenta lomsebenti.—2 Thim. 2:15.

11. Kungani badwebi bebantfu kufanele babe nesibindzi?

¹¹ Bantfu labadwebela ibhizinisi kufanele babe nesibindzi. Ngaletinye tikhatsi, behlelwa timo labangakatilindzeli elwandle. Bavame kusebenta ebusuku futsi ngaletinye tikhatsi kuba netivunguvungu labangakatilindzeli. Nebadwebi bebantfu bayasidzinga sibindzi. Nasicala kushumayela futsi sitjela labanye kutsi siBoFakazi BaJehova, umndeni wetfu ungase usiphikise, bangani betfu bangase basihleke futsi labanye bangase bangawulaleli umlayeto wetfu. Loko akusimangalisi. Jesu watjela bafundzi bakhe kutsi bebatawushumayela bantfu lebebatawubaphikisa.—Mat. 10:16.

12. Ngekusho kwaJoshuwa 1:7-9, yini lengasisita kutsi sibe nesibindzi?

¹² Yini longayenta kuze ube nesibindzi? Kwekucala, kufanele uciniseke kutsi lomsebenti ucondziswa nguJesu asezulwini. (Joh. 16:33; Semb. 14:14-16) Kwesibili, cinisa kukholwa lonako esetsembisweni saJehova sekutsi utakunakekela. (Mat. 6:32-34) Njengobe kukholwa kwakho kutawube kucina, nesibindzi sakho sitawukhula. Phetro nebangani bakhe bakhombisa kutsi bebanekukholwa lokucinile ngesikhatsi bashiya ibhizinisi yabo yekudweba futsi balandzela Jesu. Ngendlela lefanako, wakhombisa kukholwa lokucinile ngesikhatsi utjela bangani bakho nemalunga emndeni wakho kutsi sewucale kufundza liBhayibheli  naBoFakazi BaJehova nekutsi sewucale kuya emihlanganweni! Kungenteka kutsi sewente lushintjo lolukhulu endleleni lowenta ngayo tintfo nalophila ngayo kuze kuvumelane netimiso taJehova letilungile. Kwenta loko bekudzinga kukholwa nesibindzi. Njengobe uchubeka unesibindzi, siyaciniseka kutsi “[Jehova] Nkulunkulu wakho uyakuba nawe nome ngukuphi lapho uya khona.”—Fundza Joshuwa 1:7-9.

13. Kuzindla nekuthantaza kungakusita njani kutsi ube nesibindzi?

¹³ Yini lenye lengakusita kutsi ube nesibindzi? Sithantazele. (Imis. 4:29, 31) Jehova utayiphendvula imithantazo yakho futsi ngeke aze akushiye. Uhlale alungele kusisita. Ungaphindze uzindle ngendlela Jehova labasita ngayo labanye esikhatsini lesendlulile. Ungazindla nangendlela lakusite ngayo kutsi ubhekane netinkinga kanye nendlela lakunikete ngayo emandla kuze wente lushintjo ekuphileni kwakho. Siyaciniseka kutsi Loyo lowahola bantfu bakhe eLwandle Lolubovu, angakusita nawe kutsi ube ngumfundzi waKhristu. (Eks. 14:13) Metsembe Jehova, njengemhlabeleli lowatsi: “[Jehova] ungakimi angesabi lutfo. Umuntfu angangentani nje?”—Hla. 118:6.

14. Yini loyifundzako kulokwenteka kuMasae naTomoyo?

¹⁴ Lenye indlela lengakusita kutsi ube nesibindzi, kufundza indlela Jehova labasite ngayo bantfu labanemahloni ngekwemvelo kodvwa nyalo lesebanesibindzi. Cabanga ngaloko lokwenteka kuMasae. Bekanemahloni futsi bekacabanga kutsi akayuze akhone kushumayela. Bekeva shengatsi kulukhuni kukhuluma nebantfu langabati, kunjengekucanca ludvonga loludze, bekacabanga kutsi akuyuze akukhone. Wenta imetamo kuze akhulise lutsandvo lwakhe ngaJehova nangabomakhelwane bakhe. Wacabangisisa ngekuphutfuma kwemsebenti wekushumayela futsi wacela Jehova kutsi amsite acinise sifiso sakhe sekufuna kushumayela. Wakuncoba lokwesaba futsi waba lihlahlandlela lelivamile. Jehova angasita bamemeteli labasha kutsi babe ‘nesibindzi.’ Cabanga ngalokwenteka kuTomoyo. Ngesikhatsi acala kushumayela emtini ngemuti, wakhandza lomunye make lowamtsetsisa watsi: “Angifuni nje kukhuluma naBoFakazi BaJehova!” ngemuva kwaloko waganhlanta sivalo. Tomoyo bekangesabi futsi wabuta lona lebekahamba naye watsi: “Umvile kutsi utsiteni? Akukadzingeki nekutsi ngivule umlomo wami, uvele watibonela kutsi nginguFakazi waJehova. Ngijabula kakhulu!” Nyalo Tomoyo ulihlahlandlela lelivamile.

15. Kuyini kutilawula, futsi kubaluleke ngani kumaKhristu?

¹⁵ Badwebi labaphumelelako bayakhona kutilawula. Kutilawula kuchazwa ngekutsi “likhono umuntfu lanalo lekwenta tintfo lokufanele tentiwe.” Badwebi labaphumelelako kufanele bente imetamo kuze bakhone kwenta loko lokufanele kwentiwe. Sibonelo saloko kutsi kufanele bavuke ekuseni basebente baze bawucedze umsebenti wabo, futsi bachubeka badweba ngisho nobe simo selitulu sisibi. Natsi kufanele sitilawule nangabe sifuna kubeketela futsi siwucedze umsebenti wetfu.—Mat. 10:22.

16. Yini lengasisita kutsi sikhone kutilawula?

¹⁶ Asitalwa sinelikhono lekutilawula. Ngalokuvamile, siyatsandza kujubela nasenta tintfo. Kodvwa ngaletinye tikhatsi letinye tintfo letibalulekile tidzinga kutsi singatidoji, ngako kudzingeka sifundze kutibamba. Sidzinga lusito kuze siticeceshe kutsi sente tintfo lokungaba matima kutenta. Jehova uyasisita asebentisa umoya wakhe longcwele.—Gal. 5:22, 23.

17. Ngekusho kwa-1 Khorinte 9:25-27, yini umphostoli Pawula latsi bekufanele ayente kuze afundze kutilawula?

 ¹⁷ Umphostoli Pawula bekakhona kutilawula. Kodvwa watsi kufanele ‘awucindzetele’ umtimba wakhe kuze ente lokulungile. (Fundza 1 Khorinte 9:25-27.) Wakhutsata labanye kutsi batilawule futsi bente tonkhe tintfo “ngendlela lefanele nangekuhleleka.” (1 Khor. 14:40) Kufanele sisebente kamatima kuze sichubeke sikhonta Jehova, futsi loko kufaka ekhatsi kushumayela njalo nekufundzisa ngetindzaba letimnandzi.—Imis. 2:46.

18. Yini lokufanele siyente kuze Jehova asitsatse njengebashumayeli labaphumelelako?

¹⁸ Umuntfu lodwebela ibhizinisi ubona ngelinani letinhlanti latibambako kutsi uyaphumelela yini. Kodvwa umsebenti wekushumayela wehlukile. Kuphumelela kwetfu akuyi ngelinani lebantfu lesibasita kutsi babe BoFakazi BaJehova. (Luk. 8:11-15) Kodvwa nasichubeka sishumayela tindzaba letimnandzi futsi sifundzisa labanye, Jehova utasitsatsa njengebantfu labaphumelelako. Leni? Ngobe sichubeka senta loko Jehova neNdvodzana yakhe labafuna sikwente.—Mak. 13:10; Imis. 5:28, 29.

19-20. Ngusiphi sizatfu lesibalulekile lesinaso sekushumayela?

¹⁹ Kulamanye emave, badwebi bavumeleke kutsi badwebe ngetinyanga letitsite. Kulawo mave, umdwebi ukutfola kuphutfuma kutsi abambe tinhlanti letinyenti tisengakapheli letinyanga. Njengobe sibadwebi bebantfu, nasi sizatfu lesinaso sekushumayela: Kutsi kuphela kwalelive kusondzela ngekushesha! Sesincane sikhatsi lesisele sekushumayela tindzaba letimnandzi letisindzisa kuphila kwebantfu. Ungameli kutsi tintfo tikuhambele kahle ekuphileni kwakho kungukhani ucala kwenta lomsebenti wekushumayela.—Shu. 11:4.

²⁰ Cala nyalo kukhulisa sifiso sakho sekufuna kushumayela, kukhulisa lwati ngeliBhayibheli, kuba nesibindzi nekufundza kutilawula. Sebenta kanye nebadwebi bebantfu labangetulu kwetigidzi letingu-8, futsi utawutfola injabulo levela kuJehova. (Neh. 8:10) Timisele kuwenta ngalokugcwele lomsebenti futsi uwente kuze kube sekugcineni. Sihloko lesilandzelako sitawukhuluma ngetindlela letintsatfu lesingacinisa ngato kutimisela kwetfu ekwenteni umsebenti wekushumayela ngeMbuso.