1. Yesus něgausẹ̌ ěpạ měnanomạ kinạ gunang makoạ apa, kụ apa nikoạ i sire?

HAL᷊Ẹ̌ i Petrus, Andreas, Yakobus, dingangi Yohanes kai měnanomạ kinạ. Kěnang pẹ̌tiněna kerea pěndang i sire su tempong nakaringihẹ̌ undangan i Yesus ini: ”Bọete, tol᷊e si siạ. Iạ sarung měkoạ si kamene makoạ měnanomạ taumata.” * Apa nikoạ i sire? Alkitapẹ̌ naul᷊ị, ”I sire apidu něněntang somạ i sire kụ timol᷊e si sie.” (Mat. 4:18-22) Putusang ene nakawal᷊ui pěbawiahi sire sarang karěngụe. Sul᷊ungu měnomạ kinạ, i sire ’nakoạ měnanomạ taumata’. (Luk. 5:10) Orasẹ̌ ini, Yesus lai něgausẹ̌ taumata masanạ naung, apang makěndagẹ̌ su katěngadẹ̌, gunang měkoạ hal᷊ẹ̌ mẹ̌sul᷊ung. (Mat. 28:19, 20) Apa i kau seng něnarimạ undangan i Yesus gunang makoạ měnanomạ taumata?

2. Kawe nụe i kitẹ harusẹ̌ měkoạ putusang penting gunang makoạ měnanomạ taumata, kụ apa makatul᷊ung si kitẹ měkoạ putusang ene?

² Aramanung i kau seng něngěndung Alkitapẹ̌ kụ seng někoạ pẹ̌bawal᷊ui su pěbawiahu. Kụ orasẹ̌ ini, i kau harusẹ̌ měmutusẹ̌ gunang makoạ penyiar habarẹ̌ mapia. Mạeng i kau ragu měnarimạ undangan i Yesus, abe makadodọ naung. Aramanung i kau ragu ual᷊ingu i kau sadarẹ̌ ene kai putusang sěbạe penting. Memang, Alkitapẹ̌ naul᷊ị i Petrus dingangu manga hapịe ”apidu něněntang somạ i sire”. Katewe, i sire tawe nẹ̌sasahawụ někoạ putusang ene. I sire seng nakasingkạ soal i Yesus dingangu něnarimạ Yesus nakoạ Mesias, nal᷊iu wọu ěnungu wul᷊ang kal᷊imona. (Yoh. 1:35-42) Kerene lai, i kau aramanung seng něngěndung mal᷊awọ soal i Yehuwa dingangi Yesus, kụ mapulu turusẹ̌ měkoạ kemajuan rohani. Katewe, těntal᷊ang bědang tawe někoạ putusang gunang makoạ penyiar, i kau harusẹ̌ mẹ̌tiněna pakapia soal u  ene. Apa nakatul᷊ung si Petrus, si Andreas, dingangu su taumata wal᷊inẹ su tempong někoạ putusang?

3. Manga sipatẹ̌ apa makatul᷊ung si kau tadeạu makoạ muriti Kristus limembong mapaelẹ̌?

³ Su tempong něnomạ kinạ, manga muriti Yesus kangerẹ kai masěmangatẹ̌, piạ kasingkạ mal᷊awọ soal u hal᷊ẹ̌ i sire, bahani, dingangu piạ disiplin diri. Manga sipatẹ̌ ene lai tantu nakatul᷊ung si sire nakoạ měnanomạ taumata limembong mapaelẹ̌. Pěngangěndungang ini sarung mělahẹ kerea i kitẹ botonge piạ manga sipatẹ̌ ene tadeạu makoạ muriti Kristus limembong mapaelẹ̌.

4. Apa nakakoạ si Petrus mapulu makoạ měnanomạ kinạ?

⁴ Petrus něnomạ kinạ bal᷊inẹ kětạeng gunang měnukụ kebutuhan kěluargane. I sie puluang měnomạ kinạ. (Yoh. 21:3, 9-15) I sie lai něngěndung gunang puluang makoạ měnanomạ taumata. Kụ, ual᷊ingu tul᷊umang i Yehuwa, Petrus nakoạ sěbạe matahuěna někoạ hal᷊ẹ̌ ene.​—Kis. 2:14, 41.

5. Tumuhụ Lukas 5:8-11, kawe nụe i Petrus natakụ, kụ apa makatul᷊ung si kitẹ lumawang pěndang kerene?

⁵ I kitẹ měnginjilẹ̌ ual᷊ingu i kitẹ makěndagẹ̌ si Yehuwa. Ene alasang kahumotongange i kitẹ někoạ hal᷊ẹ̌ ene. Kakěndagẹ̌ si Yehuwa botonge makatul᷊ung si kitẹ tatapẹ̌ měnginjilẹ̌ maning i kitẹ nẹ̌pěndang tawe pande měkoạ hal᷊ẹ̌ ene. Su tempong Yesus němaringang si Petrus gunang makoạ měnanomạ taumata, i Yesus naul᷊ị si sie, ”Kuhạe matakụ.” (Basa Lukas 5:8-11.) Petrus tawe natakụ su tempong nẹ̌tiněna soal u apa sarung mariadi mạeng i sie makoạ muritẹ̌. Katewe, i sie naherang nakasilo kal᷊awọe kinạ nisomạ i sire. Petrus masingkạ ene kai mukjizat nikoạ i Yesus,  hakị u ene i sie nẹ̌pěndang tawe layak měhal᷊ẹ̌ sěngkasio dingangi Yesus. Kere i Petrus, i kau lai aramanung natakụ su tempong nẹ̌tiněna soal u haghing hal᷊ẹ̌ harusẹ̌ koatengu tadeạu makoạ muriti Kristus. Mạeng kerene, pakatoghasẹ̌ kakěndagu si Yehuwa, si Yesus, dingangu su sěndinganengu. Mạeng měkoạ ene, i kau sarung limembong masěmangatẹ̌ měnarimạ undangan i Yesus gunang makoạ měnanomạ taumata.​—Mat. 22:37, 39; Yoh. 14:15.

6. Apa lai alasang i kitẹ mapulu měnginjilẹ̌?

⁶ Pẹ̌tiněna alasang wal᷊inẹ i kitẹ mapulu měnginjilẹ̌. I kitẹ měnginjilẹ̌ ual᷊ingu mapulu tumuhụ parentang i Yesus ini: ”Dakọe kụ koạko taumata . . . mariadi muritẹ̌ku.” (Mat. 28:19, 20) I kitẹ lai mapulu měnginjilẹ̌ ual᷊ingu lawọ taumata ”sẹ̌sědạkeng dingangu niwala” kụ i sire mapulu měngěndung katěngadẹ̌ soal u Kararatuang. (Mat. 9:36) Bọu ene lai, Yehuwa mapulu kěbị taumata makaěbạ kasingkạ nihino soal u katěngadẹ̌ kụ ipakasal᷊amatẹ̌.​—1 Tim. 2:4.

7. Kerea Roma 10:13-15 něnode hal᷊ẹ̌ měnginjilẹ̌ kai penting?

⁷ Mạeng mẹ̌tiněna kerea hal᷊ẹ̌ měnginjilẹ̌ kẹ̌koateng i kitẹ botonge makasal᷊amatẹ̌ taumata wal᷊inẹ, i kitẹ sarung limembong mapulu měnginjilẹ̌. Bal᷊inẹ kere měnanomạ kinạ sarung mẹ̌bal᷊ụ arau kumaěng kinạ seng nisomạ i sire, i kitẹ ”měnomạ” taumata tadeạu makasal᷊amatẹ̌ pěbawiahi sire.​—Basa Roma 10:13-15; 1 Tim. 4:16.

8-9. Měnanomạ kinạ harusẹ̌ masingkạ soal u apa, kụ kawe nụe?

⁸ Su zaman i Yesus, měnanomạ harusẹ̌ masingkạ haghing kinạ botonge somạkenge. (Im. 11:9-12) I sie lai harusẹ̌ masingkạ su apa tampạ u kinạ. Kinạ biasane ene su tampạ kondisi akẹe nẹ̌tatahino dingangu piạ lawọ kaěng. Tempo gunang mědeạ kinạ ene lai penting. Soal u tempo kapaelange mědeạ kinạ, pěmanda sasimbahu sěngkatau saudara su sěmbaụ pulo su Pasifik, su tempong i sie němaringang sěngkatau utusan injil gunang mědeạ kinạ. Utusan injil ene nẹ̌bera su saudara ene, ”Iạ sarung makoạ sarang i kau pukul᷊ẹ̌ sio mal᷊ukadẹ̌.” Saudara ene simimbahẹ̌, ”I kau tawe nakaěna. I kitẹ mědeạ kinạ su tempo nẹ̌tatahino su kinạ, bal᷊inẹ nẹ̌tatahino si kitẹ.”

⁹ Kerene lai, měnanomạ taumata su abad humotong nědeạ taumata su tampạ i sire botonge pẹ̌sombangeng dingangu su tempo nẹ̌tatahino. Contone, manga muriti Yesus něnginjilẹ̌ su bait, su tampạ pěngangibadang, bọu wal᷊e sarang bal᷊e, dingangu su pasarẹ̌. (Kis. 5:42; 17:17; 18:4) I kitẹ lai harusẹ̌ masingkạ kebiasaan taumata su tampạ i kitẹ. I kitẹ harusẹ̌ mapulu měkoạ penyesuaian kụ měnginjilẹ̌ su tampạ lai tempo i kitẹ botonge mẹ̌sombang dingangu taumata.​—1 Kor. 9:19-23.

10. Manga alatẹ̌ apa seng nisadiangu organisasing Yehuwa gunang i kitẹ?

¹⁰ Měnanomạ kinạ harusẹ̌ piạ alatẹ̌ nẹ̌tatahino dingangu harusẹ̌ masingkạ kerea měpakẹ ene. Kerene lai, su tempong měnginjilẹ̌, i kitẹ harusẹ̌ měpakẹ alatẹ̌ nẹ̌tatahino. Kụ i kitẹ harusẹ̌ masingkạ cara měpakẹ manga alatẹ̌ ene. Yesus něgělị těgu su manga murite soal u kerea carane měnomạ taumata. I sie naul᷊ị apa harusẹ̌ bawaneng, su apa měnginjilẹ̌, kụ apa harusẹ̌ paul᷊ịkang. (Mat. 10:5-7; Luk. 10:1-11) Orasẹ̌ ini, organisasing Yehuwa seng něnadia Alat Bantu Pengajaran mapaelẹ̌. * Kụ, i kitẹ lai seng nitěntiro cara měpakẹ manga alatẹ̌ ene. Pelatihan ene nakatulung si kitẹ limembong percaya diri dingangu  matahuěna měkoạ hal᷊ẹ̌ měnginjilẹ̌.​—2 Tim. 2:15.

11. Kawe nụe měnanomạ taumata harusẹ̌ bahani?

¹¹ Měnanomạ kinạ harusẹ̌ bahani. Pẹ̌sěngsul᷊ẹ, situasi su laudẹ̌ měbẹ̌bal᷊ui. I sire masau měnomạ su tempong hěbi kụ laudẹ̌ sěngkělěndịu makoạ maihạ. Kerene lai, měnanomạ taumata harusẹ̌ mawahani. Su tempong i kitẹ měnětạ měnginjilẹ̌ kụ maul᷊ị i kitẹ kai Sahiding Yehuwa, kěluargang i kitẹ aramanung měndariha si kitẹ, hapị měheghesẹ̌ si kitẹ, kụ taumata madiri dumaringihẹ̌ habarẹ̌ lẹ̌habareng i kitẹ. Katewe ini tawe makahěkosẹ̌ si kitẹ. Yesus seng něgělị laingatẹ̌ i sie sarung měndolohẹ̌ manga murite gunang měnginjilẹ̌ su taumata apang měndariha si sire.​—Mat. 10:16.

12. Kere nilahẹ su Yosua 1:7-9, apa makatul᷊ung si kitẹ tadeạu mawahani?

¹² Kerea tadeạu i kau mawahani? Humotong, pangimangke Yesus turusẹ̌ měngẹ̌ngahạ hal᷊ẹ̌ ini bọu sorga. (Yoh. 16:33; Why. 14:14-16) Bọu ene lai, turusẹ̌e pangimang Yehuwa sarung měngurusẹ̌ si kau. (Mat. 6:32-34) Mạeng pangangimangu matoghasẹ̌, i kau sarung limembong mawahani. Petrus dingangu manga hapịe něnodẹ pangangimang sěbạe matoghasẹ̌ su tempong i sire něněntang hal᷊ẹ̌ i sire tadeạu botonge tumol᷊e si Yesus. Kerene lai, i kau seng něnodẹ pangangimang gěguwạ su tempong nẹ̌běke su hapị dingangu kěluarganu, i kau seng něnětạ něngěndung Alkitapẹ̌ dingangu Sahiding Yehuwa kụ seng diměnta su pěngangibadang i sire. I kau lai tantu seng někoạ  pẹ̌bawal᷊ui su kakanoạ dingangu pěbawiahu tadeạu botonge měbiahẹ̌ tuhụ atorang i Yehuwa. Ene lai něnodẹ i kau piạ pangangimang dingangu kawawahani. Su tempong i kau turusẹ̌ mẹ̌tawakal᷊i tadeạu mawahani, pangimangke ”Yehuwa Mawunu ene dingangu maning saranga i kau rumal᷊eng”.​—Basa Yosua 1:7-9.

13. Kerea mẹ̌doa dingangu mẹ̌tiněna makatul᷊ung si kitẹ tadeạu mawahani?

¹³ Apa lai botonge koatengu tadeạu mawahani? Pẹ̌doạe mẹ̌dorong kawawahani. (Kis. 4:29, 31) Yehuwa sarung sumimbahẹ̌ daroanu kụ i Sie tawe měněntang si kau. I Sie sarung turusẹ̌ mẹ̌tul᷊ung si kau. Bọu ene lai, i kau botonge mẹ̌tiněna kerea Yehuwa něnal᷊amatẹ̌ manga ělang’E su tempong tamai. Contone, kěnang pẹ̌tiněna kerea Yehuwa něngahạ manga ělang’E limiu Laudẹ̌ Mahamụ. (Kel. 14:13) Mạeng i Sie seng někoạ ene, i Sie lai tantu makatul᷊ung si kau tadeạu makoạ muriti Kristus. Bọu ene, pẹ̌tiněna lai kerea i Sie seng nẹ̌tul᷊ung si kau su tempong piạ masalah dingangu něgělị si kau katatoghasẹ̌ gunang měkoạ pẹ̌bawal᷊ui su pěbawiahu. I kau botonge piạ pangangimang kere sěngkatau pemazmur. I sie nẹ̌bera, ”Yehuwa ene su sěmběkaku; Iạ tawe matakụ. Apa wotonge koatengu taumata si siạ?”​—Mz. 118:6.

14. Apa wotonge kaěndungangu bọu pengalaman i Saudari Masae dingangi Saudari Tomoyo?

¹⁴ Cara wal᷊inẹ lai tadeạu mawahani ene kai měngěndung kerea Yehuwa seng nẹ̌tul᷊ung taumata meang nakoạ bahani. Pẹ̌tiněna pengalaman sěngkatau saudari arenge Masae. I sie meang kụ nẹ̌pěndang tawe makakoạ mẹ̌bisara su taumata wal᷊inẹ soal u pangangimange. Su pěndange, mẹ̌bisara su taumata tawe nikěnalẹ̌ ene mẹ̌sul᷊ungu maawị su darěndung sěbạe marangẹ, kụ i sie tawe makakoạ ene. Hakị u ene, i sie nẹ̌tawakal᷊i gunang měnoghasẹ̌ kakěndage su Mawu dingangu su taumata wal᷊inẹ. I sie lai nẹ̌tiněna kawe nụe sěbạe penting měnginjilẹ̌ orasẹ̌ ini, kụ i sie nẹ̌doa tadeạu limembong mapulu měnginjilẹ̌. I sie limawang pěndang matakụ kụ samurine i sie nakoạ perintis biasa. Yehuwa lai botonge mẹ̌tul᷊ung penyiar buhu tadeạu makoạ bahani. Pẹ̌tiněna pengalaman i Saudari Tomoyo. Su tempong i sie něnětạ něnginjilẹ̌ bọu wal᷊e sarang bal᷊e, su wal᷊e humotong, taghuangu wal᷊e sene nẹ̌taradạ, ”Iạ madiri mẹ̌bisara dingangu Sahiding Yehuwa!” kụ i sie němanting tukadẹ̌. I Tomoyo tawe natakụ, katewe i sie nẹ̌bera su ringange, ”I kau nakaringihẹ̌? Iạ bědang tawe nẹ̌bisara apa-apa, katewe i sie seng nakakiral᷊a iạ Sahiding Yehuwa. Iạ sěbạe mal᷊uasẹ̌!” Orasẹ̌ ini, i Tomoyo seng nakoạ perintis biasa.

15. Apa disiplin diri ene, kụ kawe nụe sipatẹ̌ ene penting gunang tau Kristen?

¹⁵ Měnanomạ makaěbạ lawọ kinạ mạeng i sie piạ disiplin diri. Disiplin diri ene mangal᷊ene ”kemampuan gunang měngahạ watangeng i kitẹ měkoạ apa harusẹ̌ koateng”. Contone, měnanomạ harusẹ̌ mẹ̌bangung mal᷊uka-l᷊ukadẹ̌, měnomạ, kụ turusẹ̌ měkoạ ene maning banua nẹ̌tahiti. I kitẹ lai harusẹ̌ piạ disiplin diri tadeạu botonge mẹ̌tatahang dingangu měkoạ pakasue hal᷊ẹ̌ i kitẹ.​—Mat. 10:22.

16. Kerea tadeạu i kitẹ piạ disiplin diri?

¹⁶ Disiplin diri ene bal᷊inẹbe sipati kitẹ dongkeng nalahirẹ̌. Biasane i kitẹ limembong puluang měkoạ barang gampang koateng. Katewe, piạ hal᷊ẹ̌ penting harusẹ̌ koateng i kitẹ, kụ ene tawe gampang. Hakị u ene, tadeạu piạ disiplin diri, i kitẹ harusẹ̌ mẹ̌kakědangu watangeng. I kitẹ harusẹ̌ melatih watangeng i kitẹ gunang měkoạ barang tawe gampang koateng. Tadeạu makakoạ ene, i kitẹ harusẹ̌ makitul᷊ung si  Yehuwa gunang měgělị rohkẹ̌’E masusi si kitẹ.​—Gal. 5:22, 23.

17. Kere nilahẹ su 1 Korintus 9:25-27, kerea rasul Paulus nělahẹ i sie harusẹ̌ mẹ̌tawakal᷊i tadeạu piạ disiplin diri?

¹⁷ Rasul Paulus piạ disiplin diri. Katewe i sie něngakui i sie harusẹ̌ ’měngoka’ wadange tadeạu měkoạ barang nihino. (Basa 1 Korintus 9:25-27.) I sie lai němahangsang taumata wal᷊inẹ tadeạu piạ disiplin diri kụ měkoạ kěbị haghi dingangu cara mapia lai naatorẹ̌. (1 Kor. 14:40) I kitẹ lai harusẹ̌ piạ disiplin diri gunang měndiagạ rutin rohani, kere marading měnginjilẹ̌ dingangu měněntiro habarẹ̌ mapia.​—Kis. 2:46.

18. Kerea tadeạu Yehuwa měmanda hal᷊ẹ̌ i kitẹ berhasil?

¹⁸ Měnanomạ botonge ikawera jago, mạeng i sie makasomạ lawọ kinạ. Katewe, hal᷊ẹ̌ měnginjilẹ̌ ene nẹ̌tatěntang. I kitẹ botonge ikawera mapaelẹ̌ měnginjilẹ̌ bal᷊inẹ ual᷊ingu i kitẹ seng nakatul᷊ung lawọ taumata gunang makoạ Sahiding Yehuwa. (Luk. 8:11-15) Su těngong Yehuwa i kitẹ berhasil, mạeng i kitẹ turusẹ̌ měhabarẹ̌ habarẹ̌ mapia dingangu měněntiro taumata wal᷊inẹ. Kawe nụe? Ual᷊ingu su tempong někoạ ene, i kitẹ seng timuhụ si Yehuwa dingangu su Ahus’E.​—Mrk. 13:10; Kis. 5:28, 29.

19-20. Kawe nụe i kitẹ harusẹ̌ měnginjilẹ̌ orasẹ̌ ini?

¹⁹ Su piram baụ negeri, taumata kětạeng botonge měnomạ su wul᷊ang tertentu. Hakị u ene, mạeng manga wul᷊ang kerene seng mal᷊ighạ mal᷊iu, měnanomạ su tampạ ene biasane mẹ̌tawakal᷊i měnomạ lawọ kinạ. I kitẹ měnanomạ taumata lai kerene. Pěngěngsuengu dunia ini seng marani! Tempo kate kadodọ gunang měhabarẹ̌ habarẹ̌ makasal᷊amatẹ̌ taumata. Abe pẹ̌děngụ arau měngampal᷊ẹ̌ tempo nẹ̌tatahino si kau gunang měkoạ hal᷊ẹ̌ penting ini.​—Pkh. 11:4.

²⁰ Pẹ̌tawakal᷊ịe měnoghasẹ̌ kapulunu gunang měnginjilẹ̌, pěngěndung pakal᷊awọ soal u Alkitapẹ̌, pakawahani, kụ pẹ̌tawakal᷊ịe piạ disiplin diri. Pěhal᷊ẹ̌e sěngkasio dingangu nal᷊iu wọu ual᷊u juta taumata apang němahiạ habarẹ̌ mapia su patikụ dunia, kụ i kau sarung makapěndang karal᷊uasẹ̌ bọu i Yehuwa. (Neh. 8:10) Pẹ̌tawakal᷊ịe gunang marading měnginjilẹ̌ su kěbị taumata sarang Yehuwa maul᷊ị hal᷊ẹ̌ ini seng nasueng koạe. Su pěngangěndungang tuhụe, i kitẹ sarung měngěndung tatělu cara tadeạu i kitẹ limembong mapulu měmahiạ habarẹ̌ mapia.