1. Jesus fó konvite saida ba peskadór naʼin-haat? Sira halo saida?

APÓSTOLU PEDRO, André, Tiago no João halo serbisu nuʼudar peskadór. Karik sira hakfodak tebes bainhira Jesus konvida sira: “Mai tuir haʼu, no haʼu sei halo imi sai peskadór ba ema.” * Saida mak sira halo? Bíblia hatete: “Sira husik kedas sira-nia rede no laʼo tuir nia.” (Mt 4:18-22) Tanba desizaun neʼe, sira la sai tan peskadór atu kaer ikan maibé “kaer ema”. (Lc 5:10) Ohin loron, Jesus mós fó konvite neʼebé hanesan ba ema laran-loos sira neʼebé hadomi lia-loos. (Mt 28:19, 20) Ita simu ona Jesus nia konvite atu sai peskadór ba ema ka lae?

2. Tanbasá Ita presiza hanoin didiʼak kona-ba desizaun atu sai peskadór ba ema? Saida mak sei ajuda Ita atu halo desizaun neʼe?

² Karik Ita estuda ona Bíblia ba tempu balu no halo ona mudansa balu. Maibé agora Ita presiza halo desizaun atu sai haklaken-naʼin. Se Ita duvida kona-ba simu Jesus nia konvite, keta sai laran-kraik. Neʼe hatudu katak Ita rekoñese desizaun neʼe mak importante tebes. Maski Bíblia dehan katak Pedro no ninia maluk sira “husik kedas” sira-nia rede, maibé Pedro no ninia maluk sira la ansi atu halo desizaun. Sira hatene no simu ona Jesus nuʼudar Mesias fulan neen antes neʼe. (João 1:35-42) Karik Ita mós aprende ona buat barak kona-ba Jeová no Jesus, no Ita hakarak kontinua atu hakbesik liután ba Jeová. Maibé antes Ita deside atu sai haklaken-naʼin, Ita presiza hanoin didiʼak Ita-nia desizaun neʼe. Saida mak ajuda Pedro, André no ema seluk atu halo desizaun?

3. Hahalok saida deʼit mak sei ajuda ita atu simu Jesus nia konvite?

³ Jesus nia dixípulu sira iha tempu uluk laran-manas atu halo serbisu, hatene oinsá halo serbisu ho didiʼak no  kontrola an. Tan neʼe sira sai peskadór neʼebé susesu. Ita la duvida katak hahalok sira-neʼe mós ajuda sira atu hetan susesu nuʼudar peskadór ba ema. Iha lisaun neʼe, ita sei koʼalia kona-ba oinsá ita bele haburas hahalok sira-neʼe hodi ita mós bele hetan susesu.

4. Saida mak motiva Pedro atu sai peskadór ba ema?

⁴ Pedro kaer ikan atu bele sustenta ninia família, maibé nia haree ida-neʼe laʼós nuʼudar serbisu deʼit. Pedro gosta tebes ninia serbisu. (João 21:3, 9-15) Nia mós aprende oinsá atu gosta tebes ninia serbisu nuʼudar peskadór ba ema. Ho Jeová nia ajuda, Pedro sai matenek atu halaʼo serbisu neʼe.—Após 2:14, 41.

5. Tuir Lucas 5:8-11, tanbasá Pedro taʼuk? Saida mak bele ajuda ita atu la sente taʼuk?

⁵ Ita haklaken tanba ita hadomi Jeová, neʼe mak motiva ita atu halo serbisu neʼe. Ita-nia domin ba Jeová bele ajuda ita haklaken ba ema seluk maski ita sente katak ita la iha matenek. Bainhira Jesus konvida Pedro atu sai peskadór ba ema, Jesus hatete ba nia: “Keta taʼuk.” (Lee Lucas 5:8-11.) Pedro la taʼuk kona-ba buat neʼebé karik bele akontese ba nia se nia sai dixípulu. Maibé, Pedro hanoin barak tanba Jesus ajuda nia atu kaer ikan barak. Nia rekoñese katak Jesus halo ona milagre no nia sente katak nia la iha matenek atu serbisu hamutuk ho Jesus. Karik Ita mós sente taʼuk ka laran-taridu bainhira Ita aprende kona-ba buat hotu neʼebé Ita presiza halo nuʼudar Kristu nia dixípulu. Se nuneʼe, hodi  hametin Ita-nia domin ba Jeová, Jesus no ba ema seluk, neʼe bele motiva Ita atu simu Jesus nia konvite atu sai peskadór ba ema.—Mt 22:37, 39; João 14:15.

6. Saida tan mak motiva ita atu haklaken?

⁶ Hanoin toʼok razaun balu tanbasá ita hakarak atu haklaken. Ita hakarak atu halo tuir Jesus nia mandamentu: “Laʼo bá no hanorin ema . . . atu sai haʼu-nia dixípulu.” (Mt 28:19, 20) Ita mós hakarak haklaken tanba ita hanoin ema iha ita-nia haklaken-fatin. Sira presiza tebes atu aprende lia-loos kona-ba Maromak nia Ukun. (Mt 9:36) Jeová hakarak ema hotu atu hetan koñesimentu neʼebé loos kona-ba lia-loos no hetan salvasaun.—1 Tim 2:4.

7. Oinsá mak Roma 10:13-15 hatudu katak serbisu haklaken mak importante?

⁷ Bainhira ita hanoin kona-ba oinsá ita-nia serbisu haklaken bele ajuda atu salva ema, neʼe sei book ita atu haklaken. Peskadór kaer ikan atu faʼan ka han, maibé ita “kaer” ema atu bele salva sira.—Lee Roma 10:13-15; 1 Tim 4:16.

8-9. Peskadór presiza hatene saida no tanbasá?

⁸ Iha Jesus nia tempu, peskadór sira presiza hatene ikan hanesan saida mak sira hakarak atu kaer. (Lev 11:9-12) Peskadór mós tenke hatene fatin neʼebé nia bele kaer ikan neʼe. Baibain ikan sira gosta halibur iha bee ho kondisaun neʼebé diʼak no mós iha ai-han barak. Tempu neʼebé peskadór atu bá kaer ikan mós importante. Kona-ba neʼe, hanoin toʼok liafuan neʼebé Testemuña ida iha illa Pasífiku hatete ba misionáriu ida bainhira planu atu bá kaer ikan. Misionáriu neʼe dehan: “Haʼu sei hasoru ita iha tuku sia dadeer.” Irmaun neʼe dehan: “Ita la komprende. Ita sei bá bainhira tempu diʼak atu kaer ikan, laʼós tempu neʼebé diʼak ba ita.”

⁹ Peskadór ba ema iha apóstolu sira-nia tempu mós bá haklaken iha fatin no tempu neʼebé sira bele hasoru ema. Porezemplu, Jesus nia dixípulu sira haklaken iha templu, sinagoga, husi uma ba uma no iha merkadu. (Após 5:42; 17:17; 18:4) Ita mós presiza buka-hatene ema nia toman. Ita presiza prontu atu halo mudansa no haklaken iha fatin no tempu neʼebé ita bele hasoru ema.—1 Kor 9:19-23.

10. Jeová nia organizasaun fó saida mai ita?

¹⁰ Peskadór presiza ekipamentu neʼebé loos no hatene oinsá atu uza ekipamentu sira-neʼe. Ita mós presiza iha ekipamentu neʼebé loos atu haklaken. No ita presiza hatene oinsá uza buat sira-neʼe. Jesus fó matadalan neʼebé klaru ba ninia dixípulu sira kona-ba oinsá atu haklaken. Nia fó-hatene sira kona-ba saida mak sira presiza lori, haklaken iha neʼebé no atu koʼalia kona-ba saida. (Mt 10:5-7; Lc 10:1-11) Ohin loron, Jeová nia organizasaun fó Ekipamentu Hanorin nian ba ita atu ajuda ita halo serbisu ho didiʼak. * Ita mós simu treinu kona-ba oinsá atu uza ekipamentu sira-neʼe. Treinamentu neʼe ajuda ita atu sai fiar an no aumenta ita-nia matenek atu hanorin ema.—2 Tim 2:15.

11. Tanbasá peskadór ba ema presiza aten-brani?

¹¹ Peskadór sira presiza aten-brani. Dala ruma tasi nia laloran troka derrepente deʼit. Dala barak peskadór sira serbisu  durante kalan no dala ruma anin-fuik mosu derrepente. Peskadór ba ema mós presiza aten-brani. Bainhira ita komesa haklaken no fó sai katak ita mak Testemuña, dala ruma família kontra makaʼas ita, kolega sira goza ita no ema lakohi simu ita-nia mensajen. Maibé ita la hakfodak tanba Jesus fó avizu nanis katak nia haruka ninia dixípulu sira atu haklaken ba ema neʼebé sei kontra sira.—Mt 10:16.

12. Tuir Josué 1:7-9, saida deʼit mak bele ajuda ita atu sai aten-brani?

¹² Oinsá Ita bele sai aten-brani? Primeiru, fiar metin katak Jesus kontinua dirije serbisu haklaken husi lalehan. (João 16:33; Apok 14:14-16) Hametin Ita-nia fiar ba Jeová nia promesa katak nia sei tau matan ba Ita. (Mt 6:32-34) Bainhira Ita-nia fiar sai metin liután, Ita mós sei sai aten-brani liután. Pedro no ninia maluk sira hatudu fiar neʼebé boot bainhira sira husik hela sira-nia negósiu hodi laʼo tuir Jesus. Ita mós hatudu ona fiar neʼebé boot bainhira Ita fó-hatene Ita-nia belun no família katak Ita komesa estuda Bíblia ho Testemuña no mós tuir reuniaun sira. Ita hatudu ona fiar no aten-brani, tan neʼe Ita konsege halo mudansa boot ho Ita-nia hahalok atu bele tuir Jeová nia matadalan. Nuʼudar Ita kontinua haburas hahalok aten-brani, Ita bele fiar metin katak ‘Jeová hamutuk ho Ita iha fatin hotu neʼebé Ita sei bá’.—Lee Josué 1:7-9.

13. Oinsá mak medita no orasaun bele ajuda Ita sai aten-brani?

 ¹³ Saida tan mak bele ajuda Ita atu sai aten-brani? Halo orasaun atu husu aten-brani. (Após 4:29, 31) Jeová sei hatán ba Ita-nia orasaun no nia sei nunka husik Ita. Nia sempre prontu atu apoia Ita. Ita mós bele medita kona-ba oinsá Jeová salva ona ninia atan sira iha tempu uluk. Hanoin kona-ba oinsá nia ajuda ona Ita rasik atu tahan susar sira no fó Ita aten-brani atu halo mudansa iha Ita-nia moris. Klaru katak Maromak neʼebé lori ninia povu atu liu Tasi Mean bele ajuda Ita. (Éx 14:13) Hatudu fiar hanesan ema neʼebé hakerek Salmo ida neʼebé dehan: “Jeová iha haʼu-nia sorin; haʼu sei nunka taʼuk. Saida mak ema bele halo ba haʼu?”—Sal 118:6.

14. Ita aprende saida husi irmán Masae no irmán Tomoyo nia esperiénsia?

¹⁴ Dalan seluk atu sai aten-brani mak hodi aprende kona-ba oinsá Jeová ajuda ona ema sira neʼebé moedór hodi sai aten-brani. Irmán Masae mak moedór no sente katak nia sei nunka bele koʼalia ba ema seluk kona-ba ninia fiar. Nia sente katak koʼalia ho ema oin-foun mak susar tebes, no neʼe hanesan koko atu saʼe foho neʼebé aas. Entaun nia hakaʼas an makaʼas atu haburas liután domin ba Maromak no ba ema seluk. Nia medita kona-ba tempu urjente neʼebé ita hela bá no halo orasaun hodi husu ajuda atu hetan kbiit hodi hakarak atu haklaken. Nia manán ninia sentimentu taʼuk no mós serbí ona nuʼudar pioneiru regulár. Jeová mós bele ajuda haklaken-naʼin foun atu “sai aten-brani”. Bainhira irmán Tomoyo komesa haklaken husi uma ba uma, ema primeiru neʼebé nia hasoru hakilar dehan: “Haʼu lakohi koʼalia ho Testemuña ba Jeová”, no tuirmai taka odamatan makaʼas. Tomoyo hatete ba ema neʼebé haklaken ho nia: “Ó rona ida-neʼe ka? Haʼu la presiza koʼalia liafuan ida, nia rasik hatene katak haʼu mak Testemuña. Haʼu kontente tebes.” Agora Tomoyo serbí nuʼudar pioneiru regulár.

15. Kontrola an katak sá? Tanbasá neʼe importante ba ema Kristaun?

¹⁵ Peskadór neʼebé hetan susesu presiza kontrola an. Kontrola an signifika “kbiit atu obriga Ita-nia an atu halo buat neʼebé Ita presiza halo”. Peskadór sira presiza kontrola an atu halo buat neʼebé sira presiza halo. Porezemplu, sira tenke obriga an atu hadeer sedu, halo hotu sira-nia serbisu no kontinua serbisu maski tempu susar. Ita mós presiza kontrola an atu bele tahan hodi halo hotu ita-nia serbisu.—Mt 10:22.

16. Oinsá atu haburas hahalok kontrola an?

¹⁶ Ita la moris mai ho kbiit atu kontrola an. Tuir loloos, baibain ita hakarak halo deʼit buat neʼebé fasil. Maibé dala ruma buat neʼebé importante atu halo mak la fasil. Tan neʼe ita presiza treinu ita-nia an atu halo buat neʼebé importante maski la fasil. Jeová fó ninia espíritu santu atu ajuda ita.—Gal 5:22, 23.

17. Tuir 1 Korinto 9:25-27, Paulo presiza halo saida atu kontrola an?

¹⁷ Apóstolu Paulo hatudu hahalok kontrola an. Maibé nia mós rekoñese katak nia presiza ‘kastigu ninia isin’ atu bele halo buat neʼebé loos. (Lee 1 Korinto 9:25-27 no nota-rodapé.) Nia anima ema seluk atu kontrola an no “halo buat hotu  iha dalan neʼebé loos no tuir arranju.” (1 Kor 14:40) Ita presiza kontrola an atu bele iha toman espirituál neʼebé diʼak, neʼe inklui haklaken beibeik no hanorin ema sai dixípulu.—Após 2:46.

18. Ita presiza halo saida atu Jeová bele haree ita nuʼudar ema neʼebé hetan susesu?

¹⁸ Bainhira peskadór kaer ikan barak, ita bele dehan katak nia hetan susesu. Maibé, ita-nia susesu la depende ba ema naʼin-hira mak ita ajuda atu tama lia-loos. (Lc 8:11-15) Se ita kontinua haklaken no hanorin ema, Jeová sei haree ita nuʼudar ema neʼebé hetan susesu. Tanbasá? Tanba ita kontinua halo tuir nia no ninia Oan-Mane nia hakarak.—Mc 13:10; Após 5:28, 29.

19-20. Saida mak razaun espesiál atu haklaken?

¹⁹ Iha rai balu, ema bele kaer ikan durante fulan balu deʼit. Tan neʼe, peskadór sira sente katak urjente atu halo serbisu makaʼas liután bainhira tempu kaer ikan nian besik remata. Nuʼudar peskadór ba ema, ita mós iha razaun seluk atu haklaken agora: Sistema neʼe nia rohan besik loos ona! Tempu hela uitoan deʼit atu fahe mensajen neʼebé salva ema. Keta demora ka sente katak ita presiza hein toʼo tempu diʼak mak ita sei halo serbisu neʼe.—Ecle 11:4.

²⁰ Hakaʼas an atu gosta haklaken, aumenta koñesimentu kona-ba Bíblia, sai aten-brani no kontrola an. Hola parte hamutuk ho ema naʼin-millaun ualu liu neʼebé sai ona peskadór ba ema, no ita sei sente Jeová nia ksolok. (Neem 8:10) Hakaʼas an atu hola parte iha serbisu neʼe no kontinua halo ida-neʼe toʼo Jeová dehan para. Iha lisaun tuirmai, ita sei aprende dalan tolu oinsá ita bele hametin ita-nia hakarak atu kontinua haklaken nuʼudar peskadór ba ema.