1. Jesu wakabatamba kuti bachiteenzi bazubi babaswi bali 4 alubo bakachitaanzi?

PETRO, Andreya, Jakkobo aJohane bakali kuchita bbizinesi lyakuzuba baswi. Yeeyela kuti bakagamba biyeni chiindi Jesu naakabatamba kati: “Amunditobele, eelyo ndilamupa kuba bazubi babantu.” * Bakachitaanzi? Bbayibbele lyaamba kuti: “Mpoonya aawo bakasiya nsabwe zyabo akumutobela.” (Mt. 4:18-22) Nzibakasala zyakapa kuti buumi bwabo buchinche. Bakasiya kuzuba baswi akutalika ‘kuzuba bantu baumi.’ (Lk. 5:10) Nikuba mazubaano Jesu ulikutamba bantu balibombya, bayanda kasimpe kuti babe bazubi babantu. (Mt. 28:19, 20) Wakazumina na kutamba kwaJesu kwiinda mukuba sikuzuba bantu?

2. Nkamboonzi nweelede kuyeeyesesya kutanasala kuba sikupupulula alubo niinzi chitakugwasye kuti uchite oobo?

² Amwi waba chiindi kuli kwiiya Bbayibbele akubelesya nzulikwiiya zyakuti wabuyeeya kuti utalike kukambawuka makani mabotu. Kuti kuulikuyoowa kuba sikupupulula, utamani manguzu pe. Kuyoowa kwako kutondeezya kuti ulizi kuti kusala ooku kuyandikana loko. Twabona kuti Bbayibbele lyaamba kuti Petro abeenzinyina bakasiya maneti aabo ‘mpawo-mpawo.’ Pesi eezi tazyaambi kuti Petro amwanikaakwe Andreya bakasala oobo kabatayeeyede. Kwakali kwayinda myeezi iili  6 kabali baziba Jesu akuti nguMesiya. (Joh. 1:35-42) Amwi anduwe wakayiya zyiingi atala aJehova aJesu alubo uyanda kuzumanana kuswena aafwiifwi aLeza. Pesi kutanaba sikupupulula, weelede kuyeeyesesya atala ankani eeyi. Niinzi chakagwasya Petro, Andreya abamwi kuti basale kuba basikwiiya baJesu?

3. Mbuntuunzi buyoomugwasya kuti mube achiyandisyo chakuba basikwiiya baKristu?

³ Basikwiiya baJesu bakali achiyandisyo chakuchita mulimu wabo, bakali aluzibo, bakali achibindi alubo bakali kulinyona. Buntu oobu mbubo bwakapa kuti bazwidilile mumulimu wabo wakuzuba bantu. Muchiiyo eechi tulalanga-langa kuti nga mulachita biyeni kuti mube abuntu oobo kuchitila kuti mube basikwiiya baKristu bazwidilila.

4. Nkamboonzi Petro naakasala kuba muzubi wabaswi?

⁴ Petro wakali kuzuba baswi kuchitila kuti asanine mpuli yakwe. Nikuba boobo, wakali kuuyandisya mulimu ooyu. (Joh. 21:3, 9-15) Naakaba sikwiiya, wakawuyanda mulimu wakukambawuka. Alubo Jehova wakamugwasya kuti azwidilile mumulimu ooyu.​—Mil. 2:14, 41.

5. Kweendelana alugwalo lwa Luka 5:8-11, Petro wakali kuyoowaanzi alubo niinzi chinga chilatugwasya kuti tulizunde penzi eeli?

⁵ Kaambo kapati kapa kuti tukambawukile bantu nkakuti, tulamuyanda Jehova. Kuyanda Jehova kupa kuti tuzunde kuyoowa kuti tatweeleli pe kukambawuka. Chiindi Jesu naakatamba Petro kuti abe sikuzuba bantu wakamubuzya kuti: “Utayoowi.” (Bala Luka 5:8-11.) Petro taakali kuyoowa kuti niinzi ziyoochitika kuti waba sikwiiya waJesu. Pesi wakali kuyoowa kuti teeleli pe kuba sikwiiya waJesu nkaambo Jesu wakachita chigambyo chakupa kuti bajate baswi biingi. Anduwe ulakonzya kuyoowa kuti uyookonzya na kuchita  zintu zyoonse ziyandikana kuti ube sikwiiya waKristu. Kuti kuyoowa, belekela kuti uyande Jehova, Jesu abasimayakilane amoyo woonse, eezi ziyoopa kuti uzumine kuba muzubi wabantu.​—Mt. 22:37, 39; Joh. 14:15.

6. Niinzi zimwi zipa kuti tukambawuke?

⁶ Atubone tumwi twaambo tupa kuti tube achiyandisyo chakukambawuka. Tuyanda kuswiilila mulawu waJesu wakuti: “Kamuya mukayiisye bantu . . . kuti babe basikwiiya.” (Mt. 28:19, 20) Alubo tulakambawuka akaambo kakuti bantu ‘balikupenzegwa alimwi balimwayikide mbuli mbelele zitakwe mweembezi’ alubo beelede kwiiya kasimpe kali atala aBwaami. (Mt. 9:36) Jehova uyanda kuti bantu bamisyobo yoonse babe aluzibo lwakasimpe akuti bakafutuke.​—1 Tim. 2:4.

7. Lugwalo lwa Baroma 10:13-15 lutondeezya biyeni kuti mulimu wakukambawuka ulayandikana?

⁷ Kuziba kuti mulimu wakukambawuka ufutula bantu kulakonzya kupa kuti tuyande kukambawuka. Basikuteya baswi balakonzya kuuzya baswi mbibajata naakuti kulya pesi iswe “tuzuba” bantu kuchitila kuti bakafutuke.​—Bala Baroma 10:13-15; 1 Tim. 4:16.

8-9. Niinzi nchayelede kuziba muntu uuteya baswi alubo nkamboonzi?

⁸ Muchiindi chaJesu, maIsrayeli bakeelede kuziba misyobo yabaswi mbibakeelede kujata. (Lev. 11:9-12) Alubo bakeelede kuziba kuti baswi aabo bajanika kuli. Baswi bayandisya kukkala mundawu ilaamaanzi ngibayanda achakulya chiingi. Basikuteya baswi beelede kuteya kufumbwa chiindi na naakuti beelede kusala? Umwi mumishinali wakazibona kuti kuli chiindi basikuteya baswi nibeelede kuteya naakatambwa awumwi mukwesu uukkala kukasuwa kakuPacific kuti bakateye. Mumishinali wakati: “Tulaswaanana juunza kuma9 kuseeni.” Mukwesu wakasandula kati: “Tuzi pe we. Tuteya baswi chiindi nibajanika kutali kufumbwa chiindi nituyanda.”

⁹ Munzila iifanana, basikwiiya baJesu bakusaanguna bakali kukambawukila bantu kumasena nkubakali kujanika amuchiindi nibali kujanika. Muchikozyano, bakali kukambawuka mutempele amumasinagogu, kung’anda ang’anda amumisika. (Mil. 5:42; 17:17; 18:4) Andiswe tweelede kuziba bantu mbitukambawukila. Alubo tweelede kuchincha-chincha zyiimo zyesu kuchitila kuti tukonzye kukambawukila bantu kumasena nkubajanika achiindi nibajanika.​—1 Kor. 9:19-23.

10. Nzibelesyoonzi nzitupedwe ambunga yaJehova?

¹⁰ Sikuteya baswi weelede kuba azibelesyo zilikabotu akuziba mbuzibeleka. Andiswe tweelede kuba azibelesyo zilikabotu mumulimu wesu. Alubo tweelede kuziba mbuzibeleka. Jesu wakapa basikwiiya bakwe malayilile aakuti bakeelede kukambawuka biyeni. Wakababuzya nzibakeelede kubweza, nkubakeelede kukambawukila anzibakeelede kwaamba. (Mt. 10:5-7; Lk. 10:1-11) Mazubaano mbunga yaJehova yakatupa Zibelesyo Nzitubelesya Kuyiisya Bantu zipa kuti tuzwidilile mumulimu wesu. * Alubo tulayiisigwa mbutukonzya kuzibelesya. Lwiiyo ndutupegwa lutugwasya kuti tube achibindi akuyiisya munzila iilikabotu.​—2 Tim. 2:15.

11. Nkamboonzi bazubi babantu nibeelede kuba achibindi?

¹¹ Bantu bachita mulimu wakuteya baswi beelede kuba achibindi nkaambo chimwi chiindi nga baswaanana azyiimo nzibatali kuyeeyela pe mumaanzi. Chiindi chiingi bateya mansiku kakuli mudima alubo kulakonzya kuba  guwo. Basikuzuba bantu ambabo beelede kuba achibindi. Kuti twatalika kukambawuka akubuzya bamwi kuti tuli Bakamboni baJehova, bamumpuli balakonzya kutukazya, bamwi balakonzya kutuseka akukaka mulumbe wesu. Eezi tazitugambyi pe nkaambo Jesu wakaamba kuti batobeli bakwe bakali kuyookazigwa.​—Mt. 10:16.

12. Kweendelana alugwalo lwa Joshua 1:7-9, niinzi nchitweelede kuchita kuti tube achibindi?

¹² Niinzi nchweelede kuchita kuti ube achibindi? Chakusaanguna weelede kusyoma amoyo woonse kuti Jesu nguwe uuzulwida mulimu wakukambawuka kali kujulu. (Joh. 16:33; Ciy. 14:14-16) Ba achoonzyo chakuti Jehova uyookupa ziyandikana mubuumi. (Mt. 6:32-34) Kuti waba alusyomo lusimide, uyooba achibindi. Petro abeenzinyina bakatondeezya chibindi chiindi nibakasiya bbizinesi lyabo lyakuteya baswi akusala kutobela Jesu. Anduwe wakatondeezya chibindi chiindi nwaakabuzya beenzinyokwe abamumpuli yako kuti watalika kwiiya Bbayibbele aBakamboni akuti wabunjila miswaangano ambabo. Amwi wakachincha maponeno aako kuchitila kuti upone kweendelana amilawu yaJehova iiluleme. Kuti kakuli boobo, wakatondeezya lusyomo achibindi. Kuti wayinkilila kunembo kulikutondeezya chibindi, uyooba achoonzyo chakuti “Jehova Leza wako unooli anduwe kufwumbwa nkounka.”​—Bala Joshua 1:7-9.

13. Kuyeeyesesya akukomba nga kulakugwasya biyeni kuti ube achibindi?

¹³ Niinzi chimwi chikonzya kukugwasya kuti ube achibindi? Komba kuli Leza kuti akupe  chibindi. (Mil. 4:29, 31) Jehova uyoozisandula nkombyo zyako alubo takakulekelezyi pe. Ulilibambilide kukugwasya chiindi choonse. Alubo ulakonzya kuyeeyesesya atala azikozyano zyabamwi bantu bachiindi bakagwasigwa aJehova. Alubo yeeya kuti Jehova wakakugwasya biyeni kuti uzunde buyumu-yumu akuti uchinche buumi bwako. Ubonaanga Ooyo wakagwasya maIsrayeli kuti bazubuke Lwizi Lusalala uyookachilwa na kukugwasya kuti ube sikwiiya waKristu? (Kul. 14:13) Ba achibindi mbuli sintembawuzyo wakati: “Jehova uli kulubazu lwangu; tandikooyoowa pe. Ino muntu inga wandityani.”​—Int. 118:6.

14. Wayiyaanzi kuzwa kuchikozyano chaMasae achaTomoyo?

¹⁴ Imwi nzila mbukonzya kuba achibindi nkubona kuti Jehova wakabagwasya biyeni bamwi bantu bakali abweeme kuti babe achibindi. Atubone chikozyano chamuchizi uutegwa Masae. Wakali abweeme zyakuti wakali kuyeeya kuti takookonzya pe kukambawuka. Wakali kubona kwaambuula amuntu ngwatazi kakuli kuyumu mbuli kutanta muduli mulamfu loko alubo wakali kubonaanga tazoofwi wakonzya pe. Muchizi ooyu wakabeleka changuzu kuti ayungizye kuyanda Leza abamwi. Wakayeeyesesya atala akuti chiindi chacheya mpawo wakakumbila Jehova kuti amugwasye kuti abe achiyandisyo chakukambawuka. Wakalizunda penzi eeli alubo wakazooba payona wachiindi choonse. Jehova ulakonzya kugwasya basikupupulula bapya kuti ‘babe achibindi.’ Atubone chikozyano chawumwi muchizi uutegwa Tomoyo. Chiindi naakali kukambawuka aang’anda ang’anda mwanakazi ngwakasaanguna kubona wakati: “Muzwe aawa, tandibayandi pe Bakamboni!” mpawo wakajala mulyango. Tomoyo wakabuzya ngwaakalaawe kuti: “Wamumvwa na nzyaawamba? Takwe nzindaamba pe pesi wandiziba kuti ndili Kamboni waJehova. Ndabotelwa!” Lino Tomoyo ngupayona wachiindi choonse.

15. Kulinyona chaambaanzi alubo nkamboonzi nikuyandikana?

¹⁵ Bazubi banswi beelede kulinyona kuti bazwidilile. Kulinyona “nkukonzya kuchita zintu kweendelana ambuzyeelede kuchitwa.” Muntu uuchita bbizinesi yakuzuba baswi ulalipeda kubuka kuseeni-seeni akubeleka kusikila wamaninsya nikuba kuti chimwi chiindi bwiime bwakunze nga tabuli kabotu. Andiswe tweelede kulinyona kuchitila kuti tulisimye akuchita mulimu wesu kusikila kumamanino.​—Mt. 10:22.

16. Niinzi chinga chilatugwasya kuti tukonzye kulinyona?

¹⁶ Tatuzyalwi katuli bantu balinyona pe. Chiindi chiingi tuyanda kuchita zintu zyuuba kutali ziyumu. Pesi zintu ziyandikana nzitweelede kuchita mubuumi nziyumu nkinkaako tweelede kulinyona. Alubo tuyanda kugwasigwa kuti tukonzye kuchita zintu nzitubonaanga nziyumu. Jehova ulatugwasya kabelesya muuya wakwe uusalala.​—Gal. 5:22, 23.

17. Kweendelana alugwalo lwa 1 Bakorinto 9:25-27, niinzi nchaakali kuchita Pawulu kuti akonzye kulinyona?

¹⁷ Mwaapostolo Pawulu wakali kulinyona. Pesi wakazumina kuti wakeelede ‘kudinkawula’ mubili wakwe kuti akonzye kuchita zintu zilikabotu. (Bala 1 Bakorinto 9:25-27.) Wakasungwaazya bamwi kuti ambabo balinyone ‘akuchita zintu kabotu-kabotu alimwi kweelana abubambe.’ (1 Kor. 14:40) Tweelede kulinyona kuti tuzumanane kuchita milimu yabukombi iiswaanizya kukambawuka chiindi choonse.​—Mil. 2:46.

18. Niinzi nzitweelede kuchita kuti Jehova atubone katuli bantu bazwidilila?

¹⁸ Muntu uuzuba baswi ubona kuti wazwidilila  kwiinda mukulanga kuvula kwabaswi mbaajata. Pesi iswe tatulangi kuti tuli kuzwidilila biyeni kwiinda mukulanga namba yabantu mbitwakagwasya kuti babe Bakamboni. (Lk. 8:11-15) Jehova utubona katuli kuzwidilila kuti twazumanana kukambawuka makani mabotu akuyiisya bamwi. Nkamboonzi? Nkaambo nga tulikutondeezya kuti tulamuswiilila Leza aMwanaakwe.​—Mk. 13:10; Mil. 5:28, 29.

19-20. Nkamboonzi kamwi kayandikana katusungwaazya kuti tukambawuke?

¹⁹ Kuli zimwi nyika, kuli imwi myeezi njibatazumizyi pe kuteya baswi. Munyika eezyo, kuti myeezi eeyo yaba aafwiifwi sikuzuba baswi nga wachita mulimu wakwe kayeeya kuti chiindi chasyaala chacheya. Mbutuli bazubi babantu, kamwi kaambo kapa kuti tubeleke changuzu mumulimu wakukambawuka nkakuti mamanino aba aafwiifwi loko. Kwasyaala chiindi chifwiifwi kuti mulimu ooyu uufutula buumi bwabantu umane. Utanonoki pe alubo utayeeyi kuti uzoochita mulimu ooyu uuyandikana kuti zyiimo zyako zyaba kabotu.​—Muk. 11:4.

²⁰ Beleka changuzu kuti ube achiyandisyo chakuchita mulimu wakukambawuka, uyungizye luzibo lwaBbayibbele, ube achibindi akuti ube muntu ulinyona. Ba umwi wabazubi babantu bayinda ku8 miliyoni. Kuti wachita oobo, Jehova uyoopa kuti ubotelwe. (Neh. 8:10) Ba amakanze aakuti uzumanane kukambawuka kusikila Jehova akaambe kuti kwakkwana. Muchiiyo chitobela tuyoolanga-langa zintu zitatu zikonzya kutugwasya kuti tuzumanane kukambawuka makani mabotu aaBwaami mbuli bazubi babantu.