1. Mupiko upi wakaizwa ndi Djesu ku aedzi arongomuna, uye awona akadaira kudini?

AFUNDI Pedru, Andree, Tiyago, uye Juau basa rawo rainga rekuedza. Rangarirai mazwire aakaita paakapikwa ndi Djesu: “Wiyai munditeere, uye ndicamuitai aedzi e anhu.” * Awona akadaira kudini? Bhaibheri rinoti: “Akasiya ngo kukasika mambure awo omuteera.” (Mt. 4:18-22) Zvaakasanangura izvi zvakacinja upenyu we anhu aya dakara nokusikaperi. Awona ainga asikazombobatizve howe dzekurya kamare, asi awona “aizogara abati e anhu.” (Ru. 5:10, masoko e pasi) Dakara na nyamasi uno, Djesu urikupika anhu aya anoda cokwadi no mwoyo wese. (Mt. 28:19, 20) Imwimwi makatendera mupiko wa Djesu kuti mugare muedzi we anhu here?

2. Ngei tecidikana kukoshesa basa rekuita aedzi e anhu, uye cinyi cicatibatsira kuti titore danho iri?

² Pamweni muri mufundi we Bhaibheri uri kuenderera mberi uye munodikana kusanangura kuti mugare muparidzi. Muri kuzwa kutya kuti mutendere mupiko wa Djesu here? Kana mecizwa kudaro, musaore mwoyo. Nge kuti ici cipangidzo cekuti cisananguro ici cinokosha maningi. Zvirokwazvo, Bhaibheri rinoti, Pedru no shamwari dzake akasiya mambure awo ekuedza howe “nokukasika” kuti ateere Djesu. Asi aazi kuita izvi pano na apo. Pedru no hama yake Andree, ainga atenda Djesu hinga Mesiya ke mwedzi mitanhatu yadarika. (Ju. 1:35-42) Ngo mushobo umwewo, zvingaita kuti zvese zvamafunda nge zva Djehovha na Djesu zviri kumuita kuti muhambire mberi pakunamata. Asi amudikani kuita cisananguro ce kugara muparidzi musati  mazvigarira pasi. Cinyi cakabatsira Pedru, Andree no amweni kuti aite cisananguro?

3. Unhu upi ungamubatsira kuti mutende mupiko wa Djesu?

³ Afundi a Djesu ainga ano cinangwa, ainyasa kuziya basa rawo, ainga akashinga uye aikwanisa kudzibata. Zviripamhene kuti, no unhu uu, awona akakwaniriswa kugara anhu anokwanisa kuedza anhu. Fundo ino icapangidza mishobo yatingazviita nawo.

4. Cinyi caiita kuti Pedru agare muedzi?

⁴ Basa ra Pedru raimubetsa kuriritira mhuri yake, asi wainga asikarioni hinga basa kamare. Zvirikupangidza hingana kuti Pedru waida maningi kuedza. (Ju. 21:3, 9-15) Pedru wakafundirawo kuda basa rekuedza anhu. Ecibetswa ndi Djehovha, iyena wakabudirira pa basa iri.—Zvi. 2:14, 41.

5. Maererano na Ruka 5:8-11, ngei Pedru waitya, uye zvinyi zvingatibatsira kuti tisatyewo?

⁵ Tinoparidza nge kuti tinoda Djehovha. Ici ndico cinotiita kuti tiite basa iri. Rudo redu kuna Djehovha rinotibatsira kunyazi tecitya kuparidzira. Paakapika Pedru kuti agare muedzi we anhu, Djesu wakati: “Usatye.” (Erengai Ruka 5:8-11.) Zviro zvaiita kuti Pedru atye, zvainga zvisiripi zvaizoitika kana akagara mufundi. Zvezvirokwazvo, iyena waidziona hingana asikazi kusisira. Iyena wainga apedza kuona cishamiso ce howe uye waizviona hingana asikazi kusisira kuseenza na Djesu. Hingana Pedru, pamweni munganetseka nge kurangarira zvese zvinodikanwa kuti munhu agare mufundi wa Kristu. Ngekudaro, bambisai  rudo renyu kuna Djehovha na Djesu kutobatanidzawo adoni enyu. Izvi zvicaita kuti mutendere mupiko wa Djesu wekugara muedzi we anhu.—Mt. 22:37, 39; Ju. 14:15.

6. Cinyizve tinotiita kuti tiparidzire?

⁶ Tinozvikonzero zvimweni zvinoita kuti tiparidzire. Cimweni cakona ngecekuti tinoda kupurutana mutemo wa Djesu wekuti: “Endai . . . mooita afundi.” (Mt. 28:19, 20) Cimwenizve nge ce kuti, tinosiririswa nge anhu “asikabatywi zvakanaka uye akabararika ku mbuto dzese” uye anoda no mwoyo wese kufunda cokwadi ce Umambo. (Mt. 9:36) Kusiya izvi, Djehovha unoda kuti anhu ese agare no ruziyo re cokwadi uye kuti aponeswe.—1Ti. 2:4.

7. Aroma 10:13-15 inopangidza kudini kuti basa redu rekuparidza rinokosha?

⁷ Kana tikazia kuti kuparidza kunoponesa upenyu, zvinotita kuti titendere mupiko wa Djesu. Nge dii rimweni, cinangwa ce muedzi we howe nge ce kutengesa kana kurhya, asi cinangwa cedu “patinoedza” anhu nge ce kuponesa upenyu yawo.—Erengai Aroma 10:13-15; 1Ti. 4:16.

8-9. Muedzi unodikana kuziyei, uye ngei?

⁸ Mu nguwa ya Djesu, muedzi we ci Israeri waidikana kuziya mushobo we howe yaaidikana kuedza. (Re. 11:9-12) Iyena waidikana kuziyawo kaaidikana kudzibatira. Kajinji howe dzinoda kugara mu mbuto ino mvura yakacena uye pano zvekurhya zvakawanda. Pano nguwa yakatemwa yekuti muedzi unodikana kuti aende kooedza howe here? Onai zvakaitika ku ci tsuwa ce ku Pacifico. Hama yedu imweni yakapika mu missionario umweni kuti aende kooedza. Mu missionario wakati: “Zvinoita! Toonana mangwana ce macibesi.” Hama ii yakadaira kuti: “Ndirikuona kuti auzi kunyasa kuzwisisa. Atisupi tinotema nguwa, asi howe ndidzona dzinotema nguwa yakhona.”

⁹ Izvi ndizvona zvaizwa no aedzi e anhu e mu nguwa dze kare. Awona aienda mu mbuto no mu mguwa dzaibatika “howe”. Nge muezaniso, ateeri a Djesu aiparidzira mu tempro, mu masinagogi, pa nyumba no nyumba uye mu mbuto dzaiwanda anhu. (Zvi. 5:42; 17:17; 18:4) Kuita hingana awona, isusu tinodikanawo kuziya migariro ye anhu ari mu ndima ye ungano yedu. Tinodikana kukasika kuparidzira mu nguwa no mu mbuto yatinogumira anhu.—1Ako. 9:19-23.

10. Ma faramenta api atinopaswa nge sangano ra Djehovha?

¹⁰ Muedzi unodikana kugara no maferamenta akakodzera uye kuziya maseenzerhwo azvo. Uye tinodikana kuziya maseenzerhwo e cimwe na cimwe. Djesu wakapasa mirairidzo yakadjeka kune afundi we kuti angaedza kudini anhu. Iyena wakareketa catinodikana kutora, mbuto yekuparidzira, zvekureketa. (Mt. 10:5-7; Ru. 10:1-11) Nyamasi, sangano ra Djehovha rinotipasa Mafaramenta e Kufundisa, anotibatsira maningi pa basa rekuparidzira. * Tinofundiswawo mishobo yatingaseenzesa feramenta rimwe na rimwe. Nge zviro izvi, atityi, uye tinogara ne uzii wekuseenzesa mafaramenta aya uye tinobudirira mu basa redu.—2Ti. 2:15.

11. Ngei aedzi e anhu ecidikana kugara no ushingi?

¹¹ Aedzi agara ne basa anodikana kushinga. Nguwa dzimweni aona anosongana ne migariro isikakarirhwi mu bahari. Kajinji aona anoseenza co usiku, uye anokwanisa kubatywa nge madutu e mu bahari. Aedzi e anhu anodikanawo kugara no ushingi. Patinotanga kuparidza uye tecidzipangidza se Apupuri a Djehovha, tinokwanisa kusongana no “madutu”, akaita hingana kuzondwa mu mhuri, kusekwa nge madzishamwari uye kusongana no anhu asikadi kuzwa soko ratinoparidza. Asi zviro izvi azvitishamisi. Djesu wainga akatozvireketa ku afundi ake kuti aizoparidzira anhu asikadi kuzwa.—Mt. 10:16.

12. Maererano na Djoshuwa 1:7-9, tinodikana kuitei kuti tigare no ushingi?

¹² Tingawaka kudini ushingi? Cekutanga, garai no rugondo rekuti Djesu uri kutungamirira basa iri rekuparidzira ari kudenga. (Ju. 16:33; Zva. 14:14-16) Uyezve bambisai kutenda kenyu mu zvipikirhwa zva Djehovha zve kuti iyena ucamuriritira. (Mt. 6:32-34) Kana kutenda kenyu kukanyasa kubamba, ushingi wenyu ucabambawo. Pedru no shamwari dzake akapangidza kutenda kakura paakasiya basa raiyariritira kuti ateere Djesu. Imwimwiwo makapangidza kutenda kakakura pe makabvunza abereki no shamwari dzenyu kuti mainga matanga kufunda Bhaibheri uye kuti apinde misangano no Apupuri a Djehovha! Zviri pamhene  kuti makaita cinjo dzakawanda mu upenyu wenyu kuti murarame ne mitemo ya Djehovha. Kuti muite izvi zvakada kutenda no ushungi. Ngo kudaro rumbwai mecipeta masimba kuti mugare no ushingi. Izvi zvicaita kuti muthembe kuti “Djehovha Mwari wenyu ucagara nemwi kwese kamunonga muri.”—Erengai Djoshuwa 1:7-9.

13. Minamato uye kurangarira kunga mubatsira kudini kuti mugare no ushingi?

¹³ Munodikana kuiteizve? Namatai kuna Djehovha mecikumbira ushingi. (Zvi. 4:29, 31) Iyena ucadaira minamato yenyu, uye aazombomusii mwega. Nguwa dzese uri pa dhuze penyu kuti amubatsire. Kunyazi zvakadaro, rangarirai maponesero akaita Djehovha anhu e kare. Rangariraiwo mabatsire aakamuita kuti mudarike zvinetso uye simba raakamupasa kuti muite cinjo dzakawanda mu upenyu. Gondai Uya wakaponesa aIsraeri pa Bahari re Kutswuka kuti unokwanisa kumubetsera kuti mugare mufundi wa Kristu. (Eki. 14:13) Garai no rugondo rimwero hingana re we Mapisarema wakati: “Djehovha uri kudii rangu; andizotyi. Munhu ungandiitei?”—Pis. 118:6.

14. Mafundi pa miezaniso ya Masae na Tomoyo?

¹⁴ Ciro cimweni cinotiita kuti tigare no ushingi nge ce kufunda mabatsire akaita Djehovha anhu aipsveruka kuti aparidzire no ushingi. Onai zvakaitika no hanzvadzi inozwi Masae. Iyena waipsveruka uye waidziona hingana kuti wainga asikazombokwanisi kuita basa rekuparidza. Kana akazwa soko rekuti kuparidza waiona hingana zvisikakwanisiki. Hino Masae wakapeta masimba kuti ade Djehovha uye mudoni wake no mwoyo wese. Iyena pakaona kuti basa re kuparidza raidikana kuizwa no kukasika mu mazuwa ano ekupedzisira wakanamata ecikumbira Djehovha kuti amupase cido ce kuparidza. Masae wakanyisa kutya kake uye urikuseenza hingana mu pionera we nguwa dzese. Djehovha unobetsawo aparidzi apsva kuti “agare no ushingi.” Onai zvakaitika no hanzvadzi imweni inozwi Tomoyo. Paakatanga kuenda mu basa rekuparidza, pa nyuba yekutanga wakakhuwirhwa kuti: “Andidi kuzwa nge zve Apupuri a Djehovha!” Uye wakafunga musuwo wake ne simba rese. Pane kuti atye, Tomoyo wakati kuna mudoni wake: “Waona? Andizi kutomboreketa ciro iyena wazviona kuti ndiri Mupupuri wa Djehovha. Ndiri kupfara maningi.” Zvino Tomoyo uri kuseenza hingana pioneira we nguwa dzese.

15. Cinyi cinozwi kudzibata, uye ngei zvecidikanwa ku muKristu?

¹⁵ Aedzi anobudirira anodzibata. Kudzibata kunoreya “kudzibambidzira kuita zviro zvinodikanwa kuitywa.” Aedzi agara no basa anodikana kudzidjaisa kuti akasike kumuka, kurumbwa ari pa basa rawo uye kushingirira kunyazi mugarire we kunze wakashata. Isusu tinodikanawo kudzibata kuti tishingirire uye tipedzese basa redu.—Mt. 10:22.

16. Cinyi cingatibatsira kuti tidziroedze?

¹⁶ Isusu atizi kubarhwa tecikwanisa kudziroedza. Kusiyana na izvi, tese tinoda zviro zvatisikazi kubudira ziya. Kudziroedza kunoda kuti tikwanise kudzibata. Ndiyo ndaa, kana tecida kudziroedza kuti tiite zviro zvatinoona hingana zvinoshupa, tinoda rubetso. Djehovha unotipasa rubetso iri eciseenzesa  mwiya mucena wake.—Aga. 5:22, 23.

17. Maererano no 1 Akorinti 9:25-27 mu apostori Pauro wakapanganidza kudini kupeta masimba kake kuti adziroedze?

¹⁷ Mu apostori Pauro waikwanisa kudzibata. Asi iyena wakati waidikana “kudzishupha” muiri wake kuti akwanise kuita zviro zvakanaka. (Erengai 1 Akorinti 9:25-27.) Iyena wakakohomedzesa afundi kuti akwanise kudziroedzaa uye aite zviro zvese “zviri pakati no pakati uye zvakarongeka.” (1Ako. 14:40) Isusu tinodikanawo kudzirowedza kuti tigare no urongwa we kunamata wakanaka, izvi zvinobatanidza kubuda nguwa dzese mu basa re kuedza anhu.—Zvi. 2:46.

18. Cinyi cicaitisa kuti Djehovha aite kuti tigare anhu anobudirira?

¹⁸ Kubudirira ke muedzi wagara ne basa zvinotsamira pakuti wabatahowe ngani. Nge dii rimweni, cinopima kubudirira kedu aanhupi atinounzisa mu sangano ra Mwari. (Ru. 8:11-15) Kana tikarumbwa tecipeta masimba pa basa re kuparidza uye kuita afundi, Djehovha ucationa hingana tinobudirira. Ngei? Ngekuti tiri kuzwira Djehovha no Mwana wake.—Mk. 13:10; Zvi. 5:28, 29.

19-20. I kohomedzeso ipizve inoita kui tiite basa re kuparidza zvinoku?

¹⁹ Mu nyika dzimweni, basa rekuedza rino nguwa yerakatermerhwa zvingaita pa mwedzi kana gore. Mu mbuto dzakai mubati we howe uno nyasa kupeta masimba kana akatanga kuona kuti nguwa yekufunga basa rekuedza yaakuguma. Isusu, abati e anhu, tinogohomedzeso guru rekuti tinyanye kuparidza zvinounoku. Mugumo we tsika ino uri kuguma nokukasika! Apacina nguwa yekuponesa upenyu ye anhu. Ndiyo ndaa, musanonoke uye musaimire migariro yakakwana kuti mutangise basa iri rinokosha.—Mup. 11:4.

²⁰ Khorovherai zvinoku kuti mubambise kushinga kenyu, muone uzii wakawanda we Bhaibheri uye kudziroedza. Batanai pamwepo no aedzi e anhu anokwana mamirionji 8 uye kuzwa mupfaro wa Djehovha. (Ne. 8:10) Itai zvese zvamunokwanisa pakuita basa iri re kuparidza uye kurumbwa meciriita dakara ku mugumo. Asi zvakadini kune aya aakuedza anhu? Cinyi cingaabatsira kuti arumbwe eciita basa iri? Fundo inoteera icapasa mazano matatu.