1. ¿Bin albotik yuʼun Jesús te chantul jtsakchayetike sok bin la spasik?

TE JNOPOJELETIK Pedro, Andrés, Santiago sok Juan jaʼ yaʼtelik te stsakel chaye. Jich yuʼun yan-nax la yaʼiyik-a te kʼalal jich albotik yuʼun te Jesús: «Laʼ, tʼunawonic, ya caqʼuex ta jtsob-ants-winiquetic». * Pero ¿bin la spasik? Te Biblia ya yal te ora la yijkitayik jilel te stsakojibal schayik sok la stʼunik bael (Mat. 4:18-22). Kʼalal jich la spasik jelon te skuxlejalike, melel ma jaʼukix yaʼtelik te stsakel chaye, jaʼ yaʼtelik te ya yotses jnopojeletik (Luc. 5:10). Te Jesús jaʼnix jich ya yikʼotik ta spasel te aʼtelil-abi (Mat. 28:19, 20). ¿Ayatbalix ta spasel te bin la yal te Jesuse?

2. 1) Teme ya akʼan ya x-ochat ta publikador ¿bin yuʼun ya skʼan ya anop ta lek? 2) ¿Bin ya stijbat awoʼtan?

² Matoniwan jaluk te kajat ta snopel te Biblia sok anopojixniwan te ya akʼan ya x-ochat ta publikador. ¿Xchebetbal awoʼtan ta schʼuunel spasel te bin la yal te Jesuse? Teme jiche, mame xa amel awoʼtan. Jichniwan ya awaʼiy aba melel anaʼoj te kʼax mukʼ skʼoplal te bin ya akʼan ya apase. Te Pedro sok te sjoʼtak «ora la yihquitayic» te stsakojibal schayik. Pero te Pedro sok te Andrés  staojikix ta nopel-a te jich ya spasike, melel ayix tal wakeb u te la snaʼbeyik sba te Jesús sok schʼuunejikix-a te jaʼ te Mesiase (Juan 1:35-42). Jaʼnix jich te jaʼate ayniwanix cheʼoxeb u te ya anaʼbey sba te Jehová sok te Jesuse, sok ya akʼan ya xlokʼatix ta scholel skʼop Dios. Swenta jich ya apas, nail ya skʼan ya anop te bintik smakoj te aʼtelil-abi. ¿Bin koltayot te Pedro, te Andrés sok te yantikxan ta stael ta nopel?

3. ¿Bintik ya skoltayotik ta spasel te aʼtelile?

³ Te sbabial jnopojeletik yuʼun te Jesús la smulanik te yaʼtelik ta stsakel chay, la snaʼik spasel, maba xiwik sok la spasik tulan. Jaʼ koltayotik te kʼalal la scholik te skʼop Diose. Te artikulo ini ya skoltayotik yuʼun jichnix ya jpastik.

4. ¿Bin yuʼun aʼtej ta jtsakchay te Pedroe?

⁴ Te Pedro jaʼ jtsakchay-a, pero ma jaʼuknax yuʼun te ya smakʼlin te sfamiliae. Jich yilel te ya smulan te aʼtel-abi (Juan 21:3, 9-15). Ta patil bael jaʼnix jich la smulan yotsesel jnopojeletik sok akʼbot spʼijil yuʼun te Jehová swenta ya spas ta lek (Hech. 2:14, 41).

5. 1) Ta swenta te bin ya yal Lucas 5:8-11, ¿bin yaʼiyel la yaʼiy sba te Pedroe? 2) Teme jich ya awaʼiy aba bitʼil te Pedroe, ¿bin ya xjuʼ ya skoltayat?

⁵ Te bin ya stij koʼtantik ta scholel skʼop Dios, jaʼ te skʼuxul koʼtantik ta stojol te Jehová. Jaʼme ya skoltayotik yuʼun maba ya xiwotik ta scholel te skʼop Diose. Kʼalal te Jesús la yikʼ ta yotsesel jnopojeletik te Pedro, jich la yalbey: «Ma xiwat» (kʼopona Lucas 5:8-11). Ma jaʼuk la xiʼ te  ya x-och ta jnopojele, jich la yaʼiy te ma snujpʼuk te ya x-aʼtej sok te Jesuse, melel chajpnax la yil-a te kʼalal la stuuntes yuʼel te Jesús yuʼun ya stsakik bayal chayetik. ¿Jichbal ya awaʼiy te ma xjuʼ awuʼun te ya x-ochat ta jnopojel yuʼun Cristo? Teme jich ya awaʼiy abae, akʼbeya stsakxan yip te skʼuxul awoʼtan ta stojol te Jehová, te Jesús sok te apatxujk. Jaʼme ya stijbat awoʼtan yuʼun ya x-ochat ta publikador (Mat. 22:37, 39; Juan 14:15).

6. ¿Bintik ya stijbotik koʼtantik ta scholel skʼop Dios?

⁶ Yanxan bin ya stij koʼtantik ta scholel skʼop Dios, jaʼ te mantal te la yal te Jesuse: «Bahanic, otsesahic ta jnopojel spisil te nacionetic» (Mat. 28:19, 20). Te yanxan bin ya stij koʼtantike jaʼ te kʼalal ya kiltik te «ay swocolic soc ihquitaybilic» te ants winiketike, jaʼ yuʼun ya skʼan ya kakʼbeytik snop te Wentainel yuʼun te Diose (Mat. 9:36). Te Jehová ya skʼan te yakuk xnaʼbot sba sok te yakuk sta skolelik te ants winiketike (1 Tim. 2:4).

7. ¿Bin yuʼun mukʼ skʼoplal te ya jcholtik skʼop Dios jich bitʼil ya yal Romanos 10:13-15?

⁷ Yanxan te bin ya stijbat awoʼtan ta scholel te skʼop Diose, jaʼ te jich ya akoltay te ants winiketik yuʼun ya sta skolelik. Ma jichukotik bitʼil te jtsakchayetik te ya x-aʼtejik swenta ya schonik o ya sweʼik (kʼopona Romanos 10:13-15; 1 Tim. 4:16).

8, 9. ¿Bin snaʼojik te jtsakchayetik sok bin yuʼun?

⁸ Ta skʼajkʼalel te Jesús te israeletik snaʼojik bin chayetik ya skʼan ya stsakik (Lev. 11:9-12). Jaʼnix jich ya skʼan ya snaʼik te banti ya xjuʼ ya staike. Te chayetik ya stsob sbaik te banti lek ya yaʼiy sbaik sok te banti ya sta sweʼelike. Te jtsakchayetik jaʼnix jich ya skʼan ya snaʼik jayeb ora ya xjuʼ ya stsakik. Ta jun buelta jtul ermano te kuxinem ta isla del Pacífico la yikʼ ta tsak chay jtul misionero. Te misionero jich la yal: «Ya xbootik pajel ta las nuebe ta sab». Pero te ermano jich la sjakʼ: «Mame jichuk ta tsakel te chaye, ayme yorail ta tsakel».

⁹ Jaʼnix jich te jtsakchayetik ta sbabial siglo snaʼojik-a te jayeb ora sok te banti ya xjuʼ ya staik te chayetike. Te jnopojeletik yuʼun Jesús la scholik skʼop Dios ta templo, ta sinagogaetik, ta nanatik sok ta merkado (Hech. 5:42; 17:17; 18:4). Jaʼnixme jich ya skʼan ya jnaʼtik te bin kʼayemik ta spasel ta jujun kʼajkʼal te ants winiketik te banti ya jcholtik skʼop Diose. Yame skʼan ya jnaʼtik te jayeb ora sok te banti ya xjuʼ ya jtatik te ants winiketike (1 Cor. 9:19-23).

10. ¿Bin aʼtejibaletik yakʼojbotik te organisasion yuʼun te Jehová?

¹⁰ Te jtsakchayetik ya skʼan ya stuuntesik aʼtejibaletik ta stsakel te chaye sok ya skʼan ya snaʼik bitʼil ta tuuntesel. Jaʼnixme jich ya skʼan ya jpastik. Te Jesús la snojpteslan te jnopojeletik te bin-utʼil ya skʼan ya scholik te skʼop Diose. La yaltiklanbey te jnopojeletik te bin ya skʼan ya yichʼik bael, banti ya scholik skʼop Dios, sok te bin ya xkʼot yalike (Mat. 10:5-7; Luc. 10:1-11). Ta ora ini, te organisasion yuʼun Jehová yakʼojbotik te kit yuʼun enseñanza te yichʼoj aʼtejibaletik te bayal  ya xtuun kuʼuntik. * Te organisasion jaʼnix jich ya snojptesotik ta stuuntesel te aʼtejibaletik-abi yuʼun ya jnaʼtikxan ta lek scholel skʼop Dios (2 Tim. 2:15).

11. ¿Bin yuʼun ma skʼan ya xiwotik te kʼalal ya jcholtik te skʼop Diose?

¹¹ Te jtsakchaye ya skʼan te manchuk ya xiwe, melel kʼax mukʼ te mare, ay ya x-aʼtej ta ajkʼabal sok ya xjuʼ ya xjajch tulan yikʼal jaʼal tey-a. Jaʼnix jich te joʼotike ma skʼan ya xiwotik te kʼalal ya xkajotik ta scholel te skʼop Diose. Melel ya xjuʼ ya kichʼtik kontrainel yuʼun te jfamiliatik, labanel yuʼun te kamigotaktik sok ayniwan machʼatik ma smulanik te ya jcholbeytik yaʼiy te skʼop Diose. Pero ma yanuk ya kiltik-a, melel te Jesús la yal te ya stikun bael te jnopojeletik yuʼun ta stojol te chopol ants winiketik (Mat. 10:16).

12. Jich bitʼil ya yal Josué 1:7-9, ¿bin ya skoltayotik yuʼun maba ya xiwotik?

¹² ¿Bin ya skoltayat yuʼun maba ya xiwat ta scholel skʼop Dios? Naʼame te Jesús jaʼ yak ta yilel te aʼtel ini (Juan 16:33; Apoc. 14:14-16). Jaʼme ya skanantayat te Jehovae, akʼbeyaxan yip te schʼuunel awoʼtan ta stojole (Mat. 6:32-34). Maba ya  xiwat teme tulan te schʼuunel awoʼtane. Te Pedro sok te sjoʼtak tulan te schʼuunel yoʼtanike, melel la yijkitayik te yaʼtelik kʼalal la stʼunik te Jesuse. Jichnix la awakʼ ta ilel schʼuunel awoʼtan te kʼalal la awalbey te awamigotak sok te afamilia te kajat ta snopel te Biblia sok te kajat ta bael ta tsoblejetik. Jaʼnix jich ajeltayoj akuxlejal swenta ya achʼuunbey smantal te Jehová, jich la awakʼ ta ilel schʼuunel awoʼtan sok te ma xiwate. Teme ya apasxan tulane, jaʼme ya skoltayat te Jehová ta spisil te bin ya apas ta stojole (kopona Josué 1:7-9).

13. ¿Bin ya xjuʼ ya akʼanbey te Jehová sok bin ya xjuʼ ya anopilan?

¹³ Yanxan te bin ya skoltayat yuʼun maba ya xiwat, jaʼ te ya akʼanbey yip awoʼtan te Jehovae (Hech. 4:29, 31). Yame yakʼbat te bin ya akʼanbeye sok maʼyuk bin-ora ya yijkitayat. Nopilana bin-utʼil skoltayoj te j-abatetik yuʼun ta nameye soknix te bin-utʼil skoltayejat te kʼalal kʼax awokol sok yuʼun ya ajeltay te atalele. Teme la skoltay te israeletik te kʼalal kʼaxik ta mar Rojo, jaʼnix jich ya skoltayat yuʼun ya x-ochat ta jnopojel yuʼun Cristo (Éx. 14:13). Jichuk ya awaʼiy aba te bitʼil la yaʼiy sba te salmista te jich la yal: «Sjoquinejon te Jehová; ma xiwon. ¿Bin ya xhuʼ ya spasbon te winique?» (Sal. 118:6).

14. ¿Bin ya yakʼbat anop te bin kʼax ta stojol te Masae sok Tomoyo?

¹⁴ Te Jehová ay skoltayoj ermanoetik yuʼun ya xchʼay te xiwelike. Jun ejemplo jaʼ te ermana Masae. Bayal ya xkʼexaw ta scholel skʼop Dios ta komonsitil. Ma xjuʼ ya yaʼiy skʼoponel te machʼa ma snaʼbey sbae, jich kʼoem ya yaʼiy te yak ta moel ta toyol witse. Jaʼ yuʼun la stulantesxan te skʼuxul yoʼtan ta stojol te Jehová sok ta stojol te spatxujke. Jaʼnix jich la snopilan te ayotikix ta slajibal kʼajkʼal sok la skʼanbey te Jehová te yakuk smulanxan scholel te skʼop Diose. Jich juʼ yuʼun stsalel te xiwele sok och ta prekursora regular. Te Jehová jaʼnix jich ya skoltay te achʼ publikadoretik jich bitʼil ya yal ta Josué 1:7, 9. Kiltik te bin kʼax ta stojol te ermana Tomoyo. Te kʼalal lokʼ ta sbabial buelta ta scholel skʼop Diose, jich utot yuʼun jtul ants: «¡Ma jkʼan ya kil te testigoetik yuʼun Jehová!», tey-abi tulan la smak te spuertae. Te Tomoyo jich la yalbey te sjoy ta scholel skʼop Dios: «Mato ayuk bin kalojtik-a, pero snaʼojix-a te testigootike. ¡Kʼax lek ya kaʼiy jba!». Te Tomoyo jaʼix prekursora regular.

15. ¿Bin yuʼun mukʼ skʼoplal te ya jpastik tulane?

¹⁵ Te machʼa ya spas tulane maba ya skom sba ta pasel te yaʼtele. Te jtsakchaye ya skʼan ya spas tulan yuʼun ya xjajch ta sab, yuʼun ya stsʼakajtes te yaʼtel manchukme ma lek te tiempoe. Jaʼnix jich te j-abatotik yuʼun Dios ya skʼan ya jpastik tulan yuʼun ya jcholtik skʼop Dios jaʼto «cʼalal ta slajibal» (Mat. 10:22).

16. ¿Bin ya skoltayotik yuʼun ya jpastik tulan?

¹⁶ Te ants winikotik wokol ya kaʼiytik te ya jpastik tulane. Jaʼ ya jkʼantik te bin kʼun ta pasele. Teme ya jpastik tulane yame xjuʼ kuʼuntik spasel te bin wokol ya kaʼiytik. Teme jich ya kaʼiytik te ma xjuʼ  kuʼuntike, jaʼme ya skoltayotik te Jehová ta swenta te schʼul espiritue (Gál. 5:22, 23).

17. ¿Bin la yal te Pablo ta 1 Corintios 9:25-27?

¹⁷ Te jpuk-kʼop Pablo la spas te bin ay ta swenta spasele, ta 1 Corintios 9:25-27 la yal te ya smaj te sbakʼetal yuʼun ya spas te bin leke (kʼopona). La yalbey te jchʼuunjeletik te yakuk spasik tulan yuʼun «yichʼojuc scuentahil soc buen chahpambiluc» spisil te bin ya spasike (1 Cor. 14:40). Teme jich ya jpastik-euke, jaʼ ya skoltayotik ta spasel te aʼtelil ta stojol te Jehová jich bitʼil te ya jcholtik te skʼop Diose (Hech. 2:46).

18. ¿Bin ya skʼan ya jpastik yuʼun ya kakʼbeytik stseʼelil yoʼtan te Jehovae?

¹⁸ Te jtsakchaye jaʼ ya yil te jayeb ta kojt chay ya stsake. Yan te joʼotike ma jaʼuk ya kiltik te jaytul machʼatik ya jkoltaytik yuʼun ya x-ochik ta j-abat yuʼun Jehová (Luc. 8:11-15). Ya kakʼbeytik stseʼelil yoʼtan te Jehová teme maba ya kijkitaytik scholel skʼop Dios sok teme ya jnojptestik te yantike. Melel yakotik ta schʼuunbeyel smantal te Jehová soknix te sNichʼane (Mar. 13:10; Hech. 5:28, 29).

19, 20. ¿Bin yuʼun ya skʼan ya jcholtik skʼop Dios ta ora ini?

¹⁹ Ay lugaretik te ma xyakʼ jtsaktik chay ta sjunal jaʼbil. Jaʼ yuʼun te jtsakchayetik ya spasikxan tulan kʼalal ya yilik te nopol ya xlajix yorail te ya stsakik te chaye. Jich bitʼil te nopolix te slajibal kʼajkʼale, ya skʼan ya jcholtik skʼop Dios ta ora ini. Maʼyukix bayal kʼajkʼal yuʼun ya jkoltaytik te ants winiketike. Mame jaʼukto xa amaliy te kʼalal mero chapalatix ya awaʼiy aba yuʼun ya apas te aʼtelil te kʼax mukʼ skʼoplale (Ecl. 11:4).

²⁰ Mukʼubtesaxan te skʼuxul awoʼtan ta stojol te Jehová sok ta stojol te apatxujk, nopaxan te Biblia, mame xiwat sok pasa tulan. Jokina ta scholel skʼop Dios te ocho miyon ta jtul publikadoretik te ayik ta swolol Balumilal, jichme ya yakʼbat stseʼelil awoʼtan te Jehovae (Neh. 8:10). Chola te skʼop Dios jaʼto kʼalal ya yal te Jehová te ma xyichʼix pasele. Ta yan artikulo yame kiltik oxeb te bin ya skoltayotik yuʼun ma xkijkitaytik scholel te skʼop Diose.