1. Әйса төрт белиқчини немә қилишқа тәклип қилған вә улар қандақ инкас қайтурған?

 ӘЙСАНИҢ бәзи шагиртлири, шу җүмлидин Петрус, Әндәр, Яқуп вә Йоһан белиқчилар еди. Шуңа, улар Әйсаниң: «Мениң кәйнимдин меңиңлар һәм мән силәрни адәм тутқучилар b қилимән»,— дегән тәкливини аңлиғанда, қанчилик һәйран болғанлиғини тәсәввур қилип көрүң. Улар қандақ инкас қайтурған? Муқәддәс китапта мундақ йезилған: «Улар шу заман торлирини ташлап, униң кәйнидин әгәшти» (Мәт. 4:18—22). Уларниң бу қарари һаятини түп йилтизидин өзгәрткән. Әнди улар белиқниң орниға, «тирик адәмләрни тутуши» керәк еди (Луқа 5:10). Бүгүнки күндиму Әйса һәқиқәтни яхши көридиған сәмимий инсанларни адәм тутушқа тәклип қиливатиду (Мәт. 28:19, 20). Сиз Әйсаниң бу тәкливини қобул қилдиңизму?

2. Немә үчүн адәм тутқучи болуш қарарини бәк муһим дәп қаришимиз керәк вә бу қарарни чиқиришимизға немә ярдәм берәләйду?

² Бәлким, сизниң Муқәддәс китапни үгиниватқиниңизға хелә вақит болди, шуниңдин бери һаятиңизда нурғун өзгиришләрни қилғансиз. Һазир болса, сиз вәз ейтқучи болуш-болмаслиқни қарар қилишиңиз керәк. Әйсаниң тәкливини қобул қилиш һәққидә иккилинип қалсиңиз, үмүтсизләнмәң. Иккилинип туруп қалғиниңизниң өзи, бу қарарниң интайин муһим екәнлигини чүшинидиғанлиғиңизни билдүрүши мүмкин. Раст, Муқәддәс китапта Петрус вә униң достлири торлирини дәрһал ташлап маңди дәп йезилған. Лекин Петрус вә униң қериндиши бу қарарни ойланмастин қобул қилмиған. Улар буниңдин алтә ай бурун Әйсаниң Мәсиһ екәнлигини чүшинип, буни етирап қилған (Йоһ. 1:35—42). Шуниңға охшаш, бәлким сизму Йәһва Худа вә Әйса Мәсиһ тоғрилиқ аллиқачан  билим елип, Йәһваға давамлиқ йеқинлишишни халайдиғансиз. Лекин вәз ейтқучи болушни қарар қилиштин авал сиз бу тоғрилиқ чоңқур ойлинишиңиз керәк. Петрус, Әндәр вә башқиларниң бу қарарни чиқиришиға немә ярдәм бәргән?

3. Әйсаниң тәкливини қобул қилиш арзуйиңизни қайси пәзиләтләр күчәйтиду?

³ Әйсаниң дәсләпки шагиртлири вәз қилишни халиған, өз ишида маһир, җүръәтлик болған вә өзини тәртиплик тутқан. Бу пәзиләтләр уларниң маһир адәм тутқучи, йәни хуш хәвәрни җакалиғучи болушиға ярдәм бәргән. Бу мақалидә биз вәз ейтиш вә шагиртларни тәйярлаш ишида утуққа еришиш үчүн бу пәзиләтләрни қандақ йетилдүрәләйдиғанлиғимизни көрүп чиқимиз.

4. Петрус немә үчүн яхши белиқчи болған?

⁴ Петрус өйидикилирини беқиш үчүн белиқ тутқан. Амма бу униң үчүн пәқәтла бир хизмәт әмәс, әң амрақ иш болған еди (Йоһ. 21:3, 9—15). Петрус йәнә адәмләргә хуш хәвәрни йәткүзүшни яхши көридиған адәм тутқучи болушни үгәнгән. Йәһва Худаниң ярдими билән Петрус бу хизмәттә наһайити уста болуп чиққан (Әлч. 2:14, 41).

5. Луқа 5:8—11 айәтләргә асасән, Петрус немә сәвәптин қорққан вә бизгә қорқунучни йеңишимизгә немә ярдәм берәләйду?

⁵ Биз Йәһва Худани яхши көргәчкә вәз қилимиз. Униңға болған меһир-муһәббәт — вәз қилишимизниң асасий сәвәви. Биз «вәз қилиш қолумдин кәлмәйду» дәп ойлисақму, бу меһир-муһәббәт башқиларға Йәһва тоғрилиқ ейтип беришимизгә ярдәм бериду. Әйса Петрусни адәм тутқучи болушқа тәклип қилғанда, униңға: «Қорқма»,— дәп ейтқан (Луқа 5:8—11ни оқуң). Петрус «Әйсаниң шагирти болсам, немә болиду» дәп әнсиримигән. Бәлки у Әйсаниң қилған мөҗүзисини, йәни уларға шунчә көп белиқ тутушқа ярдәм бәргәнлигини көргәндә, бәкму һәйран қалған  еди. Петрус өзини Әйса билән һәмкарлишишқа налайиқ дәп һесаплиған. Петрусқа охшаш, сизму қорқушиңиз мүмкин. Бәлким, сиз Мәсиһниң шагирти болуш үчүн қилиш зөрүр болған ишлар һәққидә ойлап, әнсирәйдиғансиз. Шундақ болса, Яратқучи Йәһваға, Мәсиһ Әйсаға вә башқиларға болған меһир-муһәббитиңизни күчәйтиң вә шу чағда Әйсаниң тәкливини қобул қилиш хаһишиңиз күчийиду (Мәт. 22:37, 39; Йоһ. 14:15).

6. Бизни йәнә қандақ сәвәпләр вәз қилишқа үндәйду?

⁶ Һазир вәз ейтишқа үндәйдиған башқа сәвәпләрни көрүп чиқайли. Биз Әйсаниң: «Берип,... шагиртларни тәйярлаңлар»,— дегән буйруғини орунлашни халаймиз (Мәт. 28:19, 20). Шуниңдәк, йәнә биз адәмләр «падичисиз қалған қойлардәк қийнилип һәм тарилип кәткәчкә» вә Падишалиқ һәққидики хуш хәвәрни аңлашқа муһтаҗ болғачқа, вәз қилимиз (Мәт. 9:36). Йәһва Худа «һәрқандақ адәмләрниң қутқузулушини вә һәқиқәтниң тоғра билимигә келишини халайду» (Тим. 1-х. 2:4).

7. Римлиқларға 10:13—15 айәтләргә асасән, вәз қилиш иши немә үчүн муһим?

⁷ Вәз қилиш иши адәмләрниң аман қелишиға ярдәм беридиғанлиғи тоғрилиқ ойлиғанда, вәз қилиш истигимиз күчийиду. Адәттә белиқчилар тутқан белиғини йәйду яки сетиветиду. Биз болсақ, адәмләрниң һаятини қутқузуш үчүн уларни «тутимиз» (Римлиқларға 10:13—15ни оқуң; Тим. 1-х. 4:16).

8, 9. Белиқчи немини билиши керәк вә немә үчүн?

⁸ Әйсаниң заманида белиқчи қайси хил деңиз җанлиқлирини туталайдиғанлиғини билиши керәк еди (Ләв. 11:9—12). Йәнә у белиқни қәйәрдин тапалайдиғанлиғини билиши лазим еди. Адәттә белиқлар су шараити уларға мас келидиған вә йемәклик көп болидиған җайларда яшайду. Белиқчиниң қайси вақитта белиқ тутушиму муһим еди. Тинч океандики бир аралда яшайдиған қериндишимиз миссионер болуп хизмәт қилишқа кәлгән қериндашни белиқ тутушқа тәклип қилғанда, униңға белиқ тутушниң әң яхши вақти тоғрилиқ немә дегәнлигигә диққәт қилиң. Миссионер униңға: «Әтә әтигәндә саат тоққузда көрүшимиз»,— дегәндә, йәрлик қериндаш униңға: «Яқ, сиз чүшәнмидиңиз, биз өзүмизгә қолайлиқ әмәс, белиқ тутуш үчүн тоғра келидиған вақитта беришимиз керәк»,— дегән еди.

⁹ Шуниңға охшаш, Әйсаниң биринчи әсирдики шагиртлириму адәмләр көп җайларда вә адәмләр шу йәрләрдә болған вақитларда вәз қилған болуши мүмкин. Мәсилән, улар мәркизий ибадәтханида, синагогиларда, базарларда вә өйму өй хуш хәвәрни җакалиған (Әлч. 5:42; 17:17; 18:4). Бизму районимиздики адәмләрниң адәтлирини яхши билишимиз керәк. Шуңа, биз планлиримизни өзгәртишкә тәйяр болуп, адәмләрни тапалайдиған җайда вә вақитта вәз қилишимиз керәк (Кор. 1-х. 9:19—23).

10. Йәһва Худаниң тәшкилати бизни қандақ қураллар билән тәминләйду?

¹⁰ Белиқчи мувапиқ қурал-сайманларға муһтаҗ вә уларни қандақ ишлитишни билиши керәк. Бизму вәз қилиш үчүн мувапиқ қуралларға муһтаҗ һәм уларни қандақ ишлитишни билишимиз лазим. Әйса шагиртлириға кишиләрни қандақ «тутуш» тоғрилиқ ениқ көрсәтмиләрни бәргән. У уларға өзи билән немиләрни елишни, қәйәрдә вәз қилишни вә немә ейтишни дәп бәргән (Мәт. 10:5—7; Луқа 10:1—11). Бүгүнки күндә, Йәһва Худа Өз тәшкилати арқилиқ Тәлим бериш қураллириға киргән үнүмлүк қураллар билән тәминләйду вә уларни қандақ ишлитиш керәклигини үгитиду c. Бу бизниң вәз хизмитидә  үнүмлүк болуш үчүн керәклик ишәнч вә маһарәткә егә болушимизға ярдәм бериду (Тим. 2-х. 2:15).

11. Белиқчилар немә үчүн җүръәтлик болуши керәк?

¹¹ Белиқчилар җүръәтлик болуши керәк. Бәзидә улар деңизда алдин-ала мөлчәрлигили болмайдиған шараитларға дуч келиду. Улар пат-пат кечидә ишләйду вә суларда туюқсиз боран-чапқун пәйда болуп қелиши мүмкин болған суларда ишләйду. Адәм тутқучиларму җасарәткә муһтаҗ. Бизму боран-чапқунға охшаш қийинчилиқларға дуч келишимиз мүмкин. Мәсилән, вәз қилишни вә башқиларға өзүмизниң Йәһва гувачилири екәнлигимизни ейтишни башлиғанда, аилимиз бизгә қарши чиқиши, достлиримиз бизни заңлиқ қилиши вә учратқан бәзи адәмләр хуш хәвәрни рәт қилиши мүмкин. Биз буниңға һәйран қалмаймиз, чүнки Әйса әгәшкүчилирини хуш хәвәргә қарши чиқидиған адәмләрниң арисиға әвәткән (Мәт. 10:16).

12. Йәшуа 1:7—9 айәтләргә асасән җасарәтлик болушимизға немә ярдәм берәләйду?

¹² Қандақ қилип җүръәтлик болалайсиз? Биринчидин, вәз ишини Әйсаниң давамлиқ асмандин йетәкләйдиғанлиғиға ишиниң (Йоһ. 16:33; Вәһ. 14:14—16). Андин кейин Йәһва Худаниң сизгә ғәмхорлуқ қилиш вәдисини орунлайдиғанлиғиға ишәнчиңизни күчәйтиң (Мәт. 6:32—34). Етиқадиңиз қанчилик күчлүк болса, шунчилик җасарәтлик болисиз. Петрус вә униң шериклири Әйсаға әгишиш үчүн белиқчилиқтин ваз кәчкәндә, күчлүк ишәнчни көрсәткән. Шуниңға охшаш, сизму Йәһва гувачилири билән Муқәддәс китапни үгиниватқанлиғиңизни вә учришишларға  қатнишидиғанлиғиңизни уруқ-туққанлириңизға вә холум-хошнилириңизға ейтқанда, күчлүк етиқадиңизни көрситисиз. Шәк-шүбһисизки, Йәһваниң һәққаний өлчәмлири бойичә яшаш үчүн сиз һаятиңизда өзгиришләрни қилдиңиз. Шундақ өзгиришләрни қилиш үчүн сизгә ишәнч вә җасарәт керәк болған. Сиз давамлиқ җасарәтни йетилдүрсиңиз, Худайимиз Йәһва чоқум сизниң йениңизда болидиғанлиғиға ишинәләйсиз (Йәшуа 1:7—9ни оқуң).

13. Дуа вә чоңқур ойлиниш җасарәтлик болушимизға қандақ ярдәм берәләйду?

¹³ Йәнә қандақ қилип җасарәткә егә болалайсиз? Йәһваға дуа қилип җасарәт билән батурлуқни сораң (Әлч. 4:29, 31). Йәһва Худа дуалириңизға җәзмән җавап бериду вә сизни һәргиз ташлимайду. У сизни һәрқачан қоллап қувәтләйду. Шуниң билән биргә, Йәһваниң өтмүштә башқиларни қандақ қоллап-қувәтлигәнлиги тоғрилиқ чоңқур ойлансиңиз болиду. Униң илгири сизниң қийинчилиқларни һәл қилишқа қандақ ярдәм бәргәнлиги вә һаят тәрзиңизни өзгәртишкә күч бәргәнлигини ойлаң. Өз хәлқини Қизил деңизда йетәкләп маңған Шәхс сизниң Әйса Мәсиһниң шагирти болушиңизға ярдәм берәләйдиғанлиғи шәк-шүбһисиздур (Чиқ. 14:13). «Йәһва мениң билән, қорқмаймән. Инсан маңа немә қилалисун?»— дәп ейтқан зәбур язғучисиға охшаш ишәнчкә егә болуң (Зәб. 118:6).

14. Масаи вә Тамойо қериндашлиримиздин қандақ савақ алдиңиз?

¹⁴ Җасарәтлик болушниң йәнә бир усули — тәбиити уялчақ, амма батур болушни үгинивалған кишиләргә Йәһваниң қандақ ярдәм бәргәнлиги тоғрилиқ билим елиш. Масаи исимлиқ бир аял қериндашниң мисалини көрәйли. У бәк уялчақ болған вә һечқачан вәз қилалмаймән, дәп ойлиған. Натонуш кишиләр билән сөзлишиш униң үчүн егиз бир тамға чиқиштәк қийин көрүнгән вә у буни қилиш қолумдин һечқачан кәлмәйду дәп ойлиған. Шуңа у Худаға вә башқиларға болған меһир-муһәббитини күчәйтиш үчүн бар күчи билән тиришқан. У бизниң қайси заманда яшаватқинимиз вә вәз қилишниң һазир қанчилик муһим екәнлиги тоғрилиқ ойлиған вә вәз қилиш истигини күчәйтиш үчүн дуада Йәһвадин ярдәм сориған. У қорқунучлирини йәңгән вә һәтта пионер болуп хизмәт қилған. Йәһва Худа йеңи вәз ейтқучиларғиму җүръәтлик болушқа ярдәм берәләйду. Тамойо исимлиқ аял қериндишимизниң мисалиға диққәт қилиң. У өйму-өй вәз қилишни башлиғанда, учратқан тунҗа өй егиси: «Мән Йәһва гувачилири билән сөзлишишни халимаймән»,— дәп ишикни даққидә йепивәткән еди. Тамойо қорқуп кәтмиди. Лекин шеригигә қарап мундақ деди: «Сиз буни аңлидиңизму? Мән бир еғиз сөз қилмисамму, у мениң Йәһва гувачилириниң бири екәнлигимни тонуди. Мән буниңға бәк хошал!» Һазир болса Тамойо пионер болуп хизмәт қилмақта.

15. Өзини тәртиплик тутуш дегән немә вә бу Худаниң хизмәтчилири үчүн немишкә муһим?

¹⁵ Утуққа яки яхши нәтиҗиләргә еришиш үчүн белиқчилар өзини тәртиплик тутуши керәк. Өзини тәртиплик тутуш дегинимиз — чоқум қилиш керәк болған ишларни қилишқа өзини мәҗбурлашни билдүриду. Белиқчилар өзлирини тәртиплик тутушқа мәҗбурлиши керәк. Мәсилән, улар әтигән туруши, ишини ахириғичә түгитиши вә мәйли һава-райи қандақ болмисун, белиқ тутуш үчүн күч чиқириши керәк. Бизму сәвир-тақәтлик болуп, ишимизни ахириғичә йәткүзүшимиз лазим (Мәт. 10:22).

16. Өзүмиз үчүн қийин болған ишларни қилишқа немә ярдәм бериши мүмкин?

¹⁶ Өзини тәртиплик тутуш ата-анидин балиға мирас қалмайду. Әксинчә, намукәммәл  болғачқа биз әң асан йолни таллашқа майил. Амма бәзидә муһим ишларни қилиш қийин болуши мүмкин. Шуңа, биз өзүмизни тәртиплик тутуш үчүн өз-өзүмизни тутувелишни үгинишимиз керәк. Шу сәвәптин, бизгә қийин болған ишларни қилишқа өзүмизни тәрбийиләш үчүн ярдәмгә муһтаҗ болумиз. Йәһва Худа бизгә муқәддәс роһи арқилиқ ярдәм бериду (Гал. 5:22, 23).

17. Коринтлиқларға 1-хәт 9:25—27 айәтләрдә йезилғандәк, әлчи Паул өзини тәртиплик тутуш үчүн немә қилиши керәк еди?

¹⁷ Әлчи Паул өзини тәртиплик тутқан. Бирақ өзи ейтқандәк тоғра ишни қилиш үчүн у өз тенини «қамчилиши» керәк еди (Коринтлиқларға 1-хәт 9:25—27ни оқуң). У башқиларниму өзлирини тәрбийиләп, һәммә ишларни «тәртиплик һәм тәшкиллик һалда» орунлашқа үндигән (Кор. 1-х. 14:40). Йәһва Худаға давамлиқ ибадәт қилиш үчүн, шу җүмлидин дайим вәз қилиш вә хуш хәвәр тоғрилиқ тәлим бериш үчүн, биз өз-өзүмизни тәрбийилишимиз яки өзүмизни тәртиплик тутушимиз керәк (Әлч. 2:46).

18. Йәһва Худа бизни утуқ қазанған дәп һесаплиши үчүн немә қилишимиз керәк?

¹⁸ Белиқчи көп белиқ тутса, уни утуқ қазанди дейишкә болиду. Амма бизниң утуқ қазинишимиз, қанчә адәмниң Йәһва гувачиси болушқа ярдәм бәргәнлигимиз билән мунасивәтлик әмәс (Луқа 8:11—15). Биз башқиларға вәз қилишни яки тәлим беришни давамлаштурсақ, Йәһва Худа бизни утуқ қазанған дәп һесаплайду. Немә үчүн? Чүнки биз Йәһваға вә Униң Оғлиға итаәтчан болғанлиғимизни көрситимиз (Марк 13:10; Әлч. 5:28, 29).

19, 20. Вәз қилиш үчүн қандақ муһим сәвәвимиз бар?

¹⁹ Бәзи дөләтләрдә белиқ тутуш пәқәт бәлгүлүк айларда рухсәт қилинған. Шундақ җайларда яшайдиған белиқчилар белиқ тутуш вақти ахирлишай дәп қалғанда, белиқ тутушқа техиму җиддий атлинип, көпирәк күч чиқиришқа башлайду. Адәм тутқучилар сүпитидә бизниң вәз қилиш үчүнму интайин муһим бир сәвәвимиз бар. Бу дунияниң ахири тез йеқинлашмақта! Адәмләрниң һаятини қутқузуп қалидиған хуш хәвәрни җакалаш үчүн вақит бәк аз қалди. Шуниң үчүн келиңлар, бүгүнки күндики бу җиддий ишни кәйнигә сүрмәй, йәни һаятиңиздики шараитларниң мукәммәл, һәммиси яхши болидиған вақитни күтмәй, бу муһим ишқа һазирниң өзидә атлинайли (Вәз 11:4).

²⁰ Вәз қилиш арзуйиңизни күчәйтиш, Муқәддәс китаптин техиму көп билим елиш, җасарәтлик болуш вә өзүңизни тәртиплик тутушқа һазирниң өзидә һәрикәт қилиң. Дунияниң җай-җайлиридики сәккиз миллион вәз ейтқучиларниң қатариға қошулуң, шу чағда Йәһва Худа беридиған хошаллиқтин һузурлинисиз (Нәһ. 8:10). Йәһва Худа болди дегичә, вәз ишиға қолуңиздин кәлгиничә қизғин қатнишиң. Кейинки мақалидә, биз Падишалиқ һәққидики хуш хәвәрни вәз қилишқа бәл бағлишимиз үчүн ярдәм беридиған үч нәрсини көрүп чиқимиз.