1. Yesu o ramba vharei vha khovhe vhaṋa uri vha ite mini nahone vhenevho vharei vho ita mini?

PETRO, Andrea, Yakobo na Yohane vho vha vhe na bindu ḽa u rengisa khovhe. Edzani u humbula uri vho ḓipfa hani musi Yesu a tshi vha ramba a ri: “Ntevheleni, ndi ḓo ni ita vharei vha vhathu.” * Vhenevho vhanna vho ita mini? Bivhili i ri: “Vha sia mambule avho vha mu tevhela.” (Mat. 4:18-22) Yeneyo phetho yo shandula vhutshilo havho. Nṱhani ha u rea khovhe, vho vha vha tshi ḓo vha ‘vharei vha vhathu.’ (Luka 5:10) Ṋamusi, Yesu u ramba vhathu vhane vha funa ngoho uri vha vhe vharei vha vhathu. (Mat. 28:19, 20) Yesu o ni ramba uri ni vhe murei wa vhathu, naa no no tenda?

2. Ndi vhonnyi vhane vha tea u ita phetho ya u vha vharei vha vhathu nahone vha nga thuswa nga mini u ita yeneyo phetho?

² Khamusi ndi kale ni tshi khou guda Bivhili nahone no no ita tshanduko vhutshiloni haṋu. Zwa zwino ni khou ṱoḓa u ita phetho ya uri ni vhe muhuweleli wa mafhungo maḓifha. Arali ni tshi khou timatima u ita yeneyo phetho, ni songo kulea nungo. U timatima haṋu zwi sumbedza uri ni a zwi ḓivha uri yeneyo phetho ndi ya ndeme vhukuma. Ngoho ndi uri Bivhili i amba uri Petro na khonani dzawe vho sia mambule avho vha tevhela Yesu. Naho zwo ralo, Petro na Andrea vho thoma vha humbula nga hazwo musi vha sa athu u ita yeneyo phetho. Ho vha ho no fhela  miṅwedzi i fhiraho rathi vho guda nga ha Yesu na u tenda uri ndi Messia. (Yoh. 1:35-42) Na inwi ni nga vha no no guda zwinzhi nga ha Yehova na Yesu nahone ni ṱoḓa u bvela phanḓa ni tshi vha na vhushaka ha tsini na Yehova. Fhedzi musi ni sa athu u ita phetho ya u vha muhuweleli, ni tea u humbulisisa nga hazwo. Ndi mini tshe tsha thusa Petro, Andrea na vhaṅwe u ita phetho ya u vha vharei vha vhathu?

3. Ndi mini zwine zwa nga ni thusa u vha murei wa vhathu?

³ Vhafunziwa vha Yesu vha u thoma vho vha vha tshi funa mushumo wavho wa u rea khovhe, vha tshi kona u u ita zwavhuḓi, vhe na tshivhindi nahone vho ḓiimisela. Zwenezwi zwithu zwo vha thusa uri vha kone u vha vharei vha vhathu. Ino thero i ḓo amba nga ha zwine ra zwi guda kha vhafunziwa vha Yesu vha u thoma na uri zwi nga ri thusa hani kha u huwelela mafhungo maḓifha na u gudisa vhaṅwe.

4. Ndi mini zwe zwa vha zwi tshi ṱuṱuwedza Petro u vha murei wa khovhe?

⁴ Petro o vha a tshi rea khovhe u itela u ṱhogomela muṱa wawe, fhedzi zwo vha zwi sa sokou vha mushumo khae. O vha a tshi funa u rea khovhe. (Yoh. 21:3, 9-15) O guda na u funa u vha murei wa vhathu. Nahone Petro o vha a tshi tou vha makone kha wonoyu mushumo ngauri Yehova o vha a tshi khou mu tikedza.​—Mish. 2:14, 41.

5. U ya nga Luka 5:8-11, ndi ngani Petro o vha a tshi khou ofha nahone riṋe ri nga thuswa nga mini arali ri tshi khou ḓipfa nga yeneyo nḓila?

⁵ Tshithu tshihulwane tshine tsha ri ṱuṱuwedza u huwelela ndi uri ri funa Yehova. U funa Yehova zwi nga ri thusa u huwelela naho ri tshi pfa ri sa fanelei. Musi Yesu a tshi vhidza Petro uri a vhe murei wa vhathu, o mu vhudza uri: “U songo ofha.” (Vhalani Luka 5:8-11.) Petro o  vha a sa khou ofha zwe zwa vha zwi tshi nga itea arali a vha mufunziwa. Nṱhani hazwo, o vha o mangadzwa nga khovhe dze Yesu a vha thusa u dzi fasha. O zwi ḓivha uri Yesu o vha thusa nga lwa vhuṱolo, zwa ita uri a ḓipfe a sa fanelei u shuma nae. Na inwi ni nga ofha u fana na Petro. Khamusi ni nga vhilaela nga ha zwine na tea u zwi ita musi ni tshi vha mufunziwa wa Kristo. Arali ni tshi ḓipfa nga yeneyo nḓila, u funa Yehova, Yesu na vhahura zwi nga ni ṱuṱuwedza u ṱoḓa u vha murei wa vhathu.​—Mat. 22:37, 39; Yoh. 14:15.

6. Ndi zwifhio zwiṅwe zwine zwa ri ṱuṱuwedza u huwelela?

⁶ Kha ri ambe nga ha zwiṅwe zwiitisi zwa uri ndi ngani ri tshi tea u huwelela. Tshiṅwe tshazwo ndi uri Yesu o ri laya a ri: “Iyani ni ite . . . vhafunziwa.” (Mat. 28:19, 20) Ri dovha ra huwelela ngauri vhathu vho “vhaisala na u kulea nungo” nahone vha khou tea u guda nga ha Muvhuso wa Mudzimu. (Mat. 9:36) Tshiṅwe tshiitisi ndi uri Yehova u ṱoḓa vhathu vhoṱhe vha tshi tshidzwa na u vha na nḓivho yo teaho ya ngoho.​—1 Tim. 2:4.

7. Vharoma 10:13-15 i sumbedza hani uri u huwelela ndi zwa ndeme?

⁷ Ri ḓo ṱuṱuwedzea u huwelela musi ri tshi humbula uri zwi ḓo tshidza vhathu. Musi murei wa khovhe a tshi fasha khovhe u vha a tshi khou itela u rengisa kana u ḽa, fhedzi sa vharei vha vhathu, riṋe ri rea vhathu u itela u vha tshidza.​—Vhalani Vharoma 10:13-15; 1 Tim. 4:16.

8-9. Murei wa khovhe u tea u ḓivha mini nahone ndi ngani?

⁸ Tshifhingani tsha Yesu, vharei vha khovhe vha Vhaisiraele vho vha vha tshi tea u ḓivha uri vha khou ṱoḓa u fasha khovhe dza mufuda ḓe. (Lev. 11:9-12) Vho vha vha tshi tea u ḓivha na uri dzi wanala lurumbu lufhio. Kanzhi khovhe dzi wanala fhethu hune dzone dziṋe dza hu takalela na hune ha vha na zwiḽiwa zwinzhi. Naa murei wa khovhe a nga sokou tou ya u rea khovhe nga tshifhinga tshiṅwe na tshiṅwe? Muṅwe murumiwa ane a dzula tshiṱangadzimeni tsha Pacific o ṱuwa na muṅwe muhuweleli wa henefho u rea khovhe nahone a guda uri hu na tshifhinga tsho teaho tsha u rea khovhe. Musi vha sa athu u ya, onoyo murumiwa o ri: “Ri ḓo ṱangana matshelo nga 9 nga matsheloni.” Muhuweleli a fhindula a ri: “Ri nga si kone u ya nga hetsho tshifhinga. A zwi yi ngauri riṋe ri ṱoḓa u ṱuwa nga tshifhinga-ḓe, fhedzi ri tea u ya nga tshifhinga tshine khovhe dza wanala ngatsho.”

⁹ Nga hu fanaho, vhafunziwa vha Yesu vhe vha vha vharei vha vhathu vho vha vha tshi ya u huwelela nga tshifhinga na fhethu he vha vha vha tshi ḓo wana hone vhathu. Sa tsumbo, vho huwelela thembeleni, sinagogoni, nnḓu nga nnḓu na makete. (Mish. 5:42; 17:17; 18:4) Na riṋe ri tea u ḓivha uri vhathu vha tsimuni yashu vha wanala ngafhi. Ri tea u tendelana na zwiimo, ri huwelele nga tshifhinga na fhethu hune ra nga wana hone vhathu.​—1 Vhakor. 9:19-23.

10. Ndangulo ya Yehova i ri ṋea zwishumiswa zwifhio?

¹⁰ Murei wa khovhe u tea u vha na zwishumiswa zwo teaho zwa u rea khovhe nahone u tea u kona u zwi shumisa. Na riṋe ri tea u vha na zwishumiswa zwine ra zwi shumisa musi ri tshi khou huwelela. Nahone ri tea u kona u zwi shumisa. Yesu o gudisa vhafunziwa vhawe nḓila ya u huwelela. O vha vhudza zwine vha tea u ṱuwa nazwo, hune vha tea u huwelela hone na zwine vha tea u zwi amba. (Mat. 10:5-7; Luka 10:1-11) Ndangulo ya Yehova ṋamusi yo ri ṋea Bogisi Ḽa Zwishumiswa Zwa U Funza zwine zwa ri thusa vhukuma musi ri tshi huwelela. * Ri dovha ra gudiswa uri ri tea u shumisa hani zwenezwo zwishumiswa. Zwenezwo zwoṱhe zwi ri thusa uri ri  ḓifhulufhele na uri ri kone u ita mushumo wa u huwelela zwavhuḓi.​—2 Tim. 2:15.

11. Ndi ngani vharei vha vhathu vha tshi tea u vha na tshivhindi?

¹¹ Vharei vha khovhe vha tea u vha na tshivhindi ngauri a vha na vhungoho ha uri mutsho u ḓo vha hani. Hu nga kha ḓi sokou ḓa ḓumbu vha songo ḽi lavhelela nahone nga tshiṅwe tshifhinga vha nga tea u shuma ḽo kovhela hu na swiswi. Na vharei vha vhathu vha tea u vha na tshivhindi. Musi ri tshi thoma u huwelela na u vhudza vhaṅwe uri ri Ṱhanzi dza Yehova, muṱa washu u nga ri pikisa, khonani dzashu dza ri goḓa nahone vhaṅwe vha nga hana u thetshelesa mulaedza washu. Zwenezwi zwithu a zwi ri mangadzi. Yesu o amba uri o vha a tshi ḓo ruma vhatevheli vhawe uri vha huwelele kha vhathu vhane vha sa ḓo vha thetshelesa.​—Mat. 10:16.

12. U ya nga Yoshua 1:7-9, ri nga thuswa nga mini u vha na tshivhindi?

¹² Ni nga vha hani na tshivhindi? Tsha u thoma, ni tea u tenda uri Yesu ndi ene ane a khou livhisa mushumo wa u huwelela e ṱaḓulu. (Yoh. 16:33; Nzumb. 14:14-16) Tsha vhuvhili, ni tea u vha na lutendo lwo khwaṱhaho lwa uri Yehova u ḓo ni ṱhogomela sa zwe a fhulufhedzisa. (Mat. 6:32-34) Musi ni tshi vha na lutendo lwo khwaṱhaho, ni ḓo vha na tshivhindi. Petro na khonani dzawe vho sumbedza uri vha na lutendo lwo khwaṱhaho musi vha tshi ṱutshela bindu ḽavho ḽa u rea khovhe vha tevhela Yesu. Na inwi no sumbedza u vha na lutendo  lwo khwaṱhaho musi ni tshi vhudza muṱa waṋu na khonani dzaṋu uri ni khou guda Bivhili na Ṱhanzi dza Yehova na uri ni khou ya miṱanganoni yavho. Zwi tou pfala uri no shandula nḓila ine na tshila ngayo u itela u tshila u tendelana na milayo ya Yehova. Zwenezwo zwo vha zwi tshi ṱoḓa uri ni vhe na lutendo na tshivhindi. Musi ni tshi vha na tshivhindi nga ho engedzeaho, ni nga vha na vhungoho ha uri ‘Yehova Mudzimu waṋu u na inwi huṅwe na huṅwe hune na ya.’​—Vhalani Yoshua 1:7-9.

13. U elekanya na u rabela zwi nga ni thusa hani uri ni vhe na tshivhindi?

¹³ Ndi zwifhio zwiṅwe zwine zwa nga ni thusa u vha na tshivhindi? Ndi u rabela uri Yehova a ni fhe tshivhindi. (Mish. 4:29, 31) Yehova u ḓo fhindula thabelo dzaṋu nahone ha nga vhuyi a ni laṱa. U ḓo dzula a tshi ni tikedza. Ni nga dovha na elekanya nga nḓila ye Yehova a tshidza ngayo vhaṅwe tshifhingani tsho fhiraho. Dovhani ni humbule nga ha nḓila ye a ni thusa ngayo musi ni na thaidzo, na nḓila ye a ṋea ngayo nungo dza u ita tshanduko vhutshiloni haṋu. Zwi tou pfala uri Yehova a nga ni thusa uri ni vhe mufunziwa wa Kristo, samusi a songo balelwa u thusa vhathu vhawe uri vha pfuke lwanzheni lutswuku. (Ek. 14:13) Ni nga vha na lutendo lu fanaho na lwa Muphisalema we a ri: “Yehova u na nṋe; a thi nga ofhi. Muthu a nga nnyita mini?”​—Ps. 118:6.

14. Ni guda mini kha zwe zwa itea kha Masae na Tomoyo?

¹⁴ Iṅwe nḓila ya u vha na tshivhindi ndi nga u guda nga ha vhathu vhane vha shona vhe Yehova a vha thusa u vha na tshivhindi. Kha ri ambe nga ha zwe zwa itea kha Masae. O vha a tshi shona nahone a tshi vhona u nga a nga si kone u huwelela. O vha a tshi pfa u nga u amba na vhathu vhane a si vha ḓivhe zwi a konḓa vhukuma, u fana na u gonya luvhondo lulapfu. O ita vhuḓidini uri a fune Mudzimu na vhahura vhawe nga ho engedzeaho. O zwi vhona uri ndi zwa ndeme uri a ye u huwelela ngauri ho sala tshifhinga tshiṱuku nahone a rabela uri Yehova a mu fhe lutamo lwa u huwelela. Zwino ha tsha ofha nahone o vhuya a ita na u dzhia vhuvulanḓila ha tshifhinga tshoṱhe. Yehova a nga thusa na vhane vha kha ḓi tou bva u vha vhahuweleli uri vha “vhe na tshivhindi.” Kha ri ambe nga ha zwe zwa itea kha Tomoyo. Musi a tshi thoma u huwelela nnḓu nga nnḓu, muthu wa u thoma we a amba nae o mu halifhela a ri: “Vhoinwi Ṱhanzi dza Yehova a thi ni ṱoḓi fhano!” a mbo ḓi hanzhamedza vothi. Zwenezwo a zwo ngo tshuwisa Tomoyo, fhedzi o vhudza we a vha a tshi khou tshimbila nae a ri: “No zwi pfa? O zwi vhona uri ndi Ṱhanzi ya Yehova ndi sa athu u vhuya nda bula na ipfi. Ngoho ndo takala wee!” Zwino Tomoyo o no vha muvulanḓila wa tshifhinga tshoṱhe.

15. Zwi amba mini u ḓiimisela nahone ndi ngani Vhakriste vha tshi tea u ḓiimisela?

¹⁵ Vharei vha khovhe vhane vha kona u ita mushumo wavho zwavhuḓi vha a ḓiimisela. Muthu o ḓiimiselaho u a ḓikombetshedza u ita mushumo une wa tea u itiwa. Sa tsumbo, murei wa khovhe o ḓiimiselaho u tea u ya u shuma hu tshee nga matsheloni-tsheloni, u tea u ita mushumo u swika u tshi fhela nahone u tea u shuma naho mutsho u si wavhuḓi. Na riṋe ri tea u ḓiimisela uri ri kone u konḓelela na u fhedza mushumo we ra ṋewa wone.​—Mat. 10:22.

16. Ri nga vha hani vhathu vhane vha ḓiimisela?

¹⁶ A ri bebwi ri vhathu vhane vha ḓiimisela. Kanzhi ri ṱoḓa nḓila yo leluwaho ya u ita zwithu. Fhedzi nga zwiṅwe zwifhinga, zwithu zwine ra tea u zwi ita zwi vha zwi songo leluwa. Nga zwenezwo, ndi zwa ndeme uri ri ḓiimisele. Ri nga si kone u ḓigudisa nga riṋe vhaṋe u ita zwithu zwine zwa ri konḓela. Ri nga zwi kona fhedzi ri tshi thuswa nga muya mukhethwa une Yehova a ri ṋea wone.​—Vhagal. 5:22, 23.

17. Kha 1 Vhakorinta 9:25-27, Paulo o amba uri u tea u ita mini uri a ḓifare?

 ¹⁷ Muapostola Paulo o vha a tshi ḓifara. Naho zwo ralo, o amba uri o vha a tshi tea u “langa” muvhili wawe u itela uri a ite zwo lugaho. (Vhalani 1 Vhakorinta 9:25-27.) O vhudza vhaṅwe uri vha ḓifare nahone vha ite zwoṱhe nga “nḓila yavhuḓi na yo dzudzanyeaho.” (1 Vhakor. 14:40) Ri tea u ḓiimisela uri ri si tendele tshithu na tshithihi tshi tshi thithisa vhushaka hashu na Yehova na u thithisa mushumo wa u huwelela.​—Mish. 2:46.

18. Ri tea u ita mini uri Yehova a ri dzhie ri vha bvelelaho kha mushumo wa u huwelela?

¹⁸ Murei wa khovhe o bvelelaho ndi ane a fasha khovhe nnzhi. Fhedzi mushumo wa u huwelela wo fhambana na wa u rea khovhe. U bvelela hashu a zwi ḓitiki ngauri ro no ḓisa vhathu vhangana ngohoni. (Luka 8:11-15) Yehova u ḓo ri dzhia ri vhathu vho bvelelaho arali ra bvela phanḓa ri tshi khou huwelela na u gudisa vhaṅwe vhathu mafhungo maḓifha. Ndi ngani? Ndi ngauri musi ri tshi huwelela, ri vha ri tshi khou ita zwe Yehova na Murwa wawe vha ri ri zwi ite.​—Marko 13:10; Mish. 5:28, 29.

19-20. Ndi tshifhio tshiitisi tsho khetheaho tshine ra vha natsho tsha u huwelela zwino?

¹⁹ Kha maṅwe mashango, hu tou vha na zwifhinga zwine vhathu vha tendelwa ngazwo u rea khovhe. Musi tshenetsho tshifhinga tshi tsini na u fhela, murei wa khovhe u a zwi ḓivha uri u tea u tou shuma vhukuma kha u rea khovhe. Samusi ri vharei vha vhathu, ri tea u shuma vhukuma kha u huwelela ngauri vhufhelo vhu tsini. Ho sala tshifhinga tshiṱuku-ṱuku tsha u huwelela mafhungo maḓifha. Ni songo ri ni khou lindela zwiimo zwaṋu zwi tshi vha khwiṋe uri ni ite wonoyu mushumo, u iteni zwino.​—Muh. 11:4.

²⁰ Dzhiani vhukando zwino ha u vha na zwiṱuṱuwedzi zwavhuḓi, ha u guda zwo engedzeaho Bivhilini, ha u vha na tshivhindi na u vha muthu o ḓiimiselaho. Shumani na vhahashu vha fhiraho 8 miḽioni vhane vha vha vharei vha vhathu, ndi hone ni tshi ḓo wana dakalo ḽine Yehova a ri ṋea ḽone. (Neh. 8:10) Ḓiimiseleni u shela mulenzhe nga vhuḓalo kha wonoyu mushumo u swikela Yehova a tshi ri wo fhela. Thero i tevhelaho i ḓo amba nga ha nḓila tharu dzine dza nga ri thusa u dzula ri tshi huwelela mafhungo maḓifha a Muvhuso.