1. Che convite Gesù el ga fato a quatro pescadori, e cossa che lori i ga fato?

I DISSÌPOLI Piero, Andrè, Tiago e Gioani i laorea come pescadori. Imagina come che lori i se ga sentio quando i ze stati convidadi par Gesù: “Sìpie me seghidori e valtri saré pescadori de òmini.” * Cossa che lori i ga fato? La Bìblia la dise che lori i ga assà tuto indrio e i lo ga seghio. (Mat. 4:18-22) Quel che lori i ga dessidio, ga cambià par sempre la so vita. Lori no i ndaria pi pescar pessi, ma i ndaria “pescar òmini”. (Luc. 5:10, nota) E ancoi, Gesù ancora el fà el medèsimo convite ale persone che le ga el cuor sinsiero e le ama la verità. (Mat. 28:19, 20) Ti te ghè belche acetà el convite de Gesù par esser un pescador de òmini?

2. (a) Parché che fursi ghemo paura de esser pescadori de òmini? (b) Cossa che ndarà giutarte a far questa dessision?

² Fursi te sì un studiante dela Bìblia e te ghè belche fato tanti cambiamenti nela vita par contentar a Geovà. Adesso, te ghè de dessider se te vol scominsiar a predicar. Gheto paura de acetar questo convite de Gesù? Se te ghè paura, no stà restar desanimà parché questo el mostra che te sè che la ze una dessision tanto importante. La Bìblia la dise che Piero e i so amighi i ga ‘suito’ assà tuto indrio par seghir a Gesù. Ma l’era de pi de sei mesi che Piero e el so fradel, Andrè, i savea che Gesù l’era el Messia. Alora, questo el mostra che lori i ga pensà tanto vanti de far questa dessision. (Gioani 1:35-42) Pol esser che  te gàpia la voia de far de pi par Geovà par causa de quel che te ghè imparà sora Lu e sora Gesù. Ma no te pol far questa dessision sensa vanti pensarghe ben. Cossa che ga giutà Piero, Andrè e i altri a far questa dessision?

3. Che robe le ndarà giutarte a acetar el convite de Gesù?

³ I primi dissìpoli de Gesù i gavea tanta voia de far el so laoro, i savea farlo tanto ben, i era coraiosi e i lo fea ancora che no fusse fàcile. Par quela, lori i ze stati boni pescadori de òmini. E se te fè queste robe, anca ti te sarè un bon dissìpolo de Cristo. Questo stùdio el ndarà giutarte a far come lori.

4. Parché che Piero l’era un pescador?

⁴ Piero el laorea come pescador par dar ala so fameia quel che la gavea de bisogno. Ma lu anca l’era un pescador parché el amea far questo. (Gioani 21:3, 9-15) Piero el ga anca imparà a amar el laoro de pescar òmini e Geovà lo ga giutà a far tanto ben questo laoro. — Ati 2:14, 41.

5. (a) De acordo con Luca 5:8-11, parché che Piero el gavea paura? (b) Cossa che podemo far se se sentimo come Piero?

⁵ Quando Gesù el ga convidà Piero par esser el so dissìpolo, lu el ghe ga dito: “Férmate de gaver paura.” (Ledi Luca 5:8-11. *) Piero no’l gavea paura par causa de quel che podaria suceder con lu se el fusse un  dissìpolo de Cristo. Piero el gavea paura parché el pensea che no’l meritea far quel laoro. Lu el gavea pena visto un miràcolo de Gesù, e Piero el pensea che no’l gavea le qualità che le era de bisogno par laorar con lu. Se te te senti come Piero, cossa che te pol far? Fà pi forte el to amor par Geovà, parché questo amor el ndarà darte la forsa par voler predicar. Anca fà pi forte el to amor par Gesù e par le persone. Cossita, te gavarè tanta voia de acetar el convite de Gesù par esser un pescador de òmini. — Mat. 22:37, 39; Gioani 14:15.

6. Par causa de che altre robe noantri predichemo?

⁶ Noantri predichemo parché amemo a Geovà, ma anca par causa de altre robe. Una de queste robe la ze parché volemo obedir al comandamento de Gesù de ‘insegnar le persone a esser so dissìpoli’. (Mat. 28:19, 20) Noantri anca predichemo parché ghemo compassion dele persone che le ze ‘maltratade e butade de una banda al’altra’ e che le ga bisogno de cognosser la verità sora el Regno. (Mat. 9:36) Ancora de pi, Geovà el vol che persone de tuti i tipi le sìpia salve e le gàpia la cognossensa giusta dela verità. — 1 Tim. 2:4.

7. De acordo con Romani 10:13-15, parché che el laoro de predicassion l’è importante?

⁷ Noantri volemo acetar el convite de Gesù parché la predicassion la pol salvar la vita dele persone. Un pescador el vol magnar o vender i pessi. Ma, come pescadori de òmini, noantri volemo salvar la vita dele persone. — Ledi Romani 10:13-15; * 1 Tim. 4:16.

8-9. Cossa che un pescador el ga de saver, e parché?

⁸ Nei giorni de Gesù, un pescador el gavea de saver che tipi de pessi el podea pescar. (Lev. 11:9-12) Lu el gavea de saver ndove che el podea catarli. I pessi i va ndove la àqua la ze bona par lori e in posti che ghen’è tanto de magnar. Ma sarà che un pescador el sarà bon de ciapar pessi in qualche ora? Varda quel che ga sucedesto nte una ìsola del Passìfico. Un fradel el ga convidà un missionàrio par ndar pescar. El missionàrio el ghe ga dito: “Giusto! Se catemo ale 9 dela matina.” Ma el fradel el ga dito: “Penso che no te ghè capio. I ze i pessi che i desside la meio ora par pescar e nò noantri.”

⁹ I pescadori de òmini del primo sècolo anca i fea cossita. Lori i ndea in serca dele persone nei posti che lore le era e nela ora giusta. Par esémpio, i seghidori de Gesù i ndea predicar nel témpio, nele sinagoghe, nele case e nele piasse. (Ati 5:42; 17:17; 18:4) Come i seghidori de Gesù, anca noantri ghemo de cognosser le persone che ndaremo predicar. Alora, ghemo de cambiar la nostra programassion par catar le persone nei posti e nela ora che sarà pi fàcile de predicar par lore. — 1 Cor. 9:19-23.

10. Cossa che la organisassion de Geovà la ne dà par giutarne a predicar?

¹⁰ Un pescador el ga bisogno de arquante robe par pescar e el ga de saver doperarle ben. Anca noantri ghemo bisogno de arquante robe par predicar, ma anca ghemo de saver doperarle ben. Gesù el ga insegnà i so dissìpoli a predicar le bone notìssie. Lu el ghe ga insegnà cossa che lori i gavaria de portar insieme, ndove i ndaria predicar e quel che i ndaria parlar. (Mat. 10:5-7; Luc. 10:1-11) Ancoi, la organisassion de Geovà la ne dà le Prinsipai publicassion e vìdei par insegnar che i ze tanto  boni par predicar. * Ela anca la ne insegna a come doperar cada publicassion e cada vìdeo. Cossita, ghemo de pi confiansa e de pi abilità par ndar predicar. — 2 Tim. 2:15.

11. Parché che i pescadori de òmini i ga bisogno de coraio?

¹¹ Pescadori i ga de esser coraiosi. Pol esser che lori i infronte brute situassion nel mar. Tante volte i ga de pescar de note e de colpo pol suceder una tempesta. Anca i pescadori de òmini i ga bisogno de coraio. Par esémpio, quando noantri parlemo che semo Testimònie de Geovà, fursi la nostra fameia la ndarà restar contra noantri, i nostri amighi i ndarà riderne drio e arquante persone no volerà scoltarne. Ma noantri belche savéino che questo el ndaria suceder. Gesù el gavea parlà ai so seghidori che lori i ndaria predicar a persone che no le volaria scoltar. — Mat. 10:16.

12. De acordo con Giosuè 1:7-9, cossa che te pol far par gaver ancora de pi coraio?

¹² Cossa che te pol far par gaver ancora de pi coraio? Prima, sìpia sicuro che Gesù l’è drio tender del laoro de predicassion. (Gioani 16:33; Apo. 14:14-16) Secondo, fà pi forte la to confiansa che Geovà el ndarà tender de ti. (Mat. 6:32-34) Piero e i so amighi i ga mostrà tanta fede e coraio quando i ga assà indrio el so laoro par seghir a Gesù. Se ti te ghè una forte fede e tanta confiansa in Geovà, te gavarè  anca tanto coraio. Par esémpio, ti te ghè mostrà tanta fede quando te ghè dito ala to fameia e ai to amighi che ti te eri drio studiar la Bìblia cole Testimònie de Geovà e a ndar ale riunion. E te ghè anca mostrà coraio quando te ghè fato cambiamenti nela to vita par far la volontà de Geovà. Alora, seita sforsarte par gaver ancora de pi coraio. Cossita, te gavarè de pi confiansa che “Geovà, el to Dio, el sarà con ti in tute le robe che te ndarè far”. — Ledi Giosuè 1:7-9. *

13. Cossa che ancora te pol far par gaver de pi coraio, e parché?

¹³ Cossa che ancora te pol far? Prega a Geovà e ghe domanda coraio. (Ati 4:29, 31) Lu el ndarà risponder ale to orassion e el ndarà esser sempre con ti par giutarte. Pensa anca nela forsa che Geovà el te ga dato par infrontar le dificoltà e par far i cambiamenti nela vita. Te pol anca pensarghe sora come che Geovà el ga giutà altre persone nel passà. L’è sicuro che quel che el ga verto el Mar Rosso el va giutarte a esser un dissìpolo de Cristo. (Éso. 14:13) Ricòrdate sempre de quel che el salmista el ga dito: “Geovà l’è dela me banda, mi no gavarò paura. Cossa che el omo el pol farme?” — Sal. 118:6.

14. Cossa che te ghè imparà con Masae e Tomoyo?

¹⁴ Geovà el ga belche giutà tante persone a predicar con coraio. Alora, el pol darte coraio anca a ti. Varda el esémpio de una sorela che la se ciama Masae. Ela la gavea tanta vergogna e la pensea che no la saria mai bona de predicar ai altri. Ela la ga dito che, parlar cole persone che no la cognossea l’era come se la fusse drio ndar su nte un monte che no la saria mai bona de rivar là su. Alora, Masae la ga fato tanto sforso par far pi grando el so amor par Geovà e par le persone. Ela ga capio che l’era tanto importante predicar in questi ùltimi giorni, alora la ga pregà a Geovà par domandarghe pi voia de predicar. Masae la ze stata bona de gaver de pi coraio par predicar e la ga servio come pioniera regolar. Varda anca el esémpio dela sorela Tomoyo. Quando ela la ga scominsià a predicar, la prima persona che la ga catà la ga osà: “Mi no vui scoltar gnente dele Testimònie de Geovà!” e la ga sarà la porta. Tomoyo no la ga bio paura par causa de quel che gavea sucedesto, invesse la ga dito ala sorela che la era insieme: “Gheto visto? No me ga tocà dirghe gnente, suito la ga visto che mi son una Testimònia de Geovà. Mi son tanto contenta!” Adesso, Tomoyo la serve come pioniera regolar.

15. (a) Cossa che i boni pescadori i fà? (b) Parché che noantri ghemo bisogno de far compagno?

¹⁵ Boni pescadori i fà el so laoro ancora che no’l sìpia fàcile. Questo vol dir far sforso de far el laoro anca quando l’è fadiga de farlo. Boni pescadori i ga de levar su bonora, restar lì fin finir el laoro e seitar a farlo ancora che el tempo el sìpia bruto. Anca noantri ghemo bisogno de far sforso par perseverar e finir el nostro laoro. — Mat. 10:22.

16. Come che podemo gaver la capacità de seitar a far un laoro che no sìpia fàcile de farlo?

¹⁶ L’è pi fàcile far quel che no ghe vol tanto sforso, parché no semo nassesti cola capacità de seitar a far un laoro che no volemo o che no sìpia fàcile de farlo. Noantri ghemo de imparar a gaver autocontrolo par esser boni de  far quel che no l’è fàcile, ma sol saremo boni de far questo col aiuto del spìrito santo de Geovà. — Gàl. 5:22, 23.

17. De acordo con 1 Corinti 9:25-27, che sforso Paolo el fea?

¹⁷ El apòstolo Paolo l’è stà bon de seitar a far quel che el gavea de far anca quando no l’era fàcile. Ma lu el ga dito che lu el gavea de ‘darghe bote’ nel so corpo par far quel che l’è giusto. (Ledi 1 Corinti 9:25-27. *) Lu el ga dito ai cristiani che lori i gavea de far compagno e “far tute le robe con dignità e òrdine”. (1 Cor. 14:40) Se noantri seitemo a far sforso, noantri saremo boni de far tuto quel che ghemo de far par Geovà, come esser pescadori de òmini. — Ati 2:46.

18. Come che podemo esser boni pescadori de òmini?

¹⁸ Un bon pescador el ga de ciapar tanti pessi. Ma nela predicassion, noantri no saremo boni pescadori de òmini sol se giutemo tante persone a batersarse. (Luc. 8:11-15) Parché? Parché saremo boni pescadori se obedimo a Geovà e a Gesù e seitemo a predicar e a insegnar ale persone. — Mar. 13:10; Ati 5:28, 29.

19-20. Parché che volemo far tuto quel che podemo nela predicassion?

¹⁹ In arquanti paesi, i pescadori no i pol mia pescar in tuti i mesi. Cossita, quando el tempo che i pol pescar l’è drio finirse, i fà tanto sforso par pescar tuto quel che i ze boni. E noantri che semo pescadori de òmini savemo che semo drio viver nei ùltimi giorni e ghemo poco tempo par salvar la vita dele persone. Alora, no stà spetar che tuto el sìpia come che te vol par scominsiar a predicar. — Ecl. 11:4.

²⁰ Sfòrsate par far pi forte la to voia de predicar, impara de pi dela Bìblia e sìpia bon de far una roba anca quando no la ze fàcile. Gàpia la alegria che la vien de Geovà insieme con de pi de 8 milioni de pescadori de òmini. (Nee. 8:10) Fà el to meio nela predicassion e predica fin ala fin. Ma e quei che i ze belche drio far questo laoro? Cossa che pol giutarli a seitar a farlo? El pròssimo stùdio el ndarà risponder.