1. Nlattulo xeeni Yesu aavanhe awe alipa-oototha ihopa axexe ni yaakhunle sai?

AWIIXUTTI Pedru, Andreya, Yakobo ni Yohani yaari alipa-oototha ihopa. Vano nkahaya muupuwele moota yoonenle aya okathi Yesu aalattunle awe oriki: “Mukitthareke: kinimokhalihani atothi àtthu”. * Nto etthu xeeni yaapanke aya? Biibiliya onihimya wira: “Awo yahihiya nananoru matthavi aya, khumuttharaka Yesu”. (Math. 4:18-22) Yoothanla ele, yaahituruka okumi wa alipa-oototha ihopa ale. Okhuma nihiku nne awo khiyaarowa ovaraka ihopa, masi yaarowa okhala ‘atothi àtthu’. (Luka 5:10) Olelo-va, Yesu onnaalattula atthu ale aniphavela ekeekhai ni murima aya wotheene. (Math. 28:19, 20) Niireke nyuwo muheemererya nlattulo na Yesu na okhala mutothi aatthu?

2. Xeeni vari aya vooloka wuupuwela saana yoothanla ya okhala atothi aatthu, ni exeeni enrowa onikhaliherya opaka yoothanla eyo?

² Woonasa wene, nyuwo munnimusoma Biibiliya ni moopaka marukunuxo mookumini mwanyu. Nto munnuupuwela okhala namalaleerya. Niireke munnoovelela weemererya nlattulo na Yesu? Akhala wira ti siiso, muhikhulumuwe. Maana eyo enooniherya wira munnisuwela wira yoothanla eyo ti yuulupale. Ekeekhai wira Biibiliya onihimya wira Pedru ni apatthani awe yaahihiya matthavi aya “nananoru” wira amutthareke Yesu. Masi khiyaapanke yoothanla eyo ahuupuwenle oratteene. Saahivira myeeri 6 Pedru ni axinnawe asuwenle ene wira Yesu aari Mesiya. (Yoh. 1:35-42) Mwa enamuna emosaru, pooti wira itthu munisuwela anyu voohimya sa Yehova ni Yesu Kristu sinniwiirihani okela vahoolo momunepani wira mukhale namalaleerya. Masi muhinatthi okhala namalaleerya muhaana wuupuwela saana itthu sotheene sinihela muhina  okhala namalaleerya. Exeeni yaamukhalihenrye Pedru, Andreya ni atthu akina okhala anamalaleerya?

3. Mikhalelo xeeni sinrowa wookhaliheryani weemererya nlattulo na Yesu?

³ Atthareli oopacerya a Yesu yaaniphavela ovara muteko, yaanisuwela oratteene muteko aya, yaari oolipa murima ni yaaniihiiha. Tthiri, mikhalelo iyo sahaakhaliherya osuwela waatotha atthu. Nave mikhalelo iyo pooti wookhaliheryani okhala mutthareli ooloka a Kristu. Nto mwaha ola, onrowa wookhaliheryani moota wookhalana mikhalelo iyo.

4. Exeeni yaamwiiriha Pedru ototha ihopa?

⁴ Pedru aahaana ototha ihopa wira olyihe emusi awe, masi khuupuwela wira waari muteko awe paahi. Maana, vanikhala ntoko wira aanisiveliwa vanceene ototha ihopa. (Yoh. 21:3, 9-15) Nave Pedru aanisiveliwa vanceene waatotha atthu. Okhaliheriwaka ni Yehova, Pedru aanisuwela ovara oratteene muteko owo.—Mit. 2:14, 41.

5. Moovarihana ni Luka 5:8-11, exeeni yaamwiiriha Pedru woova? Exeeni enrowa onikhaliherya oxintta mixankiho sahu ntoko sa Pedru?

⁵ Hiyo ninnilaleerya mwaha woowi ninnimphenta Yehova, eyo ti etthu yuulupale enniiriha ovara muteko owo. Omphenta wahu Yehova onoonikhaliherya hata nuupuwelaka wira khaninwerya olaleerya. Okathi aamulattunle awe Pedru wira okhale mutothi aatthu, Yesu aahimuleela Pedru wira: “Muhòvé!” (Mmusome Luka 5:8-11.) Etthu yaamwiiriha Pedru woova, khahiyo saari itthu saarowa okhumelela nuumala okhala mutthareli a Yesu. Masi owo uupuwela wira khaaphwanela okhala mutthareli a Yesu. Maana aahimoona Yesu opakaka mwiiriirya wa ototha ihopa, nto oona wira khaaphwanelela ovara vamosa ni Yesu. Ntoko Pedru, woonasa wene  nyuwo munnoova mwaha woowi munuupuwela itthu sotheene sinihela muhina okhala mutthareli a Yesu. Akhala wira ti siiso, mulipihe omphenta wanyu Yehova, Yesu ni atthu akina. Opaka eyo enimookhaliheryani weemererya nlattulo na Yesu na okhala mutothi aatthu.—Math. 22:37, 39; Yoh. 14:15.

6. Itthu xeeni sikina sinniiriha olaleerya?

⁶ Sookhala itthu sikina sinniiriha olaleerya. Emosa ya itthu iyo, okhala wira nimphavela wiiwelela yooruma ya Yesu eni: “Murowé, mwawixuttiheke atthu”. (Math. 28:19, 20) Etthu ekina enniiriha olaleerya, okhala wira ninniwoonela othunku atthu ‘athwelenle ni anyanyaliwe’, yaawo aniphavela wiixutta ekeekhai ya Omwene. (Math. 9:36) Nave Yehova oniphavela wira atthu otheene asuwele ekeekhai ni yoopowe.—1 Tim. 2:4.

7. ARoma 10:13-15, onooniherya sai wira muteko ahu woolaleerya wookhalana efaita yinceene?

⁷ Okathi ninsuwela ahu moota muteko ahu woolaleerya onoopola aya ikumi sa atthu, eyo enoonikhaliherya weemererya nlattulo na Yesu. Ale anitotha ihopa wira amweetteke nakoso, yoolakela aya otumiha wala okhuura ihopa anivara aya. Yoolakela ahu okathi nnaatotha ahu atthu ori woopola ikumi saya.—Mmusome aRoma 10:13-15; 1 Tim. 4:16.

8-9. Etthu xeeni mulipa-oototha ihopa onireerela awe osuwela ni nthowa xeeni?

⁸ Mahiku a Yesu, mulipa-oototha ihopa a wIsarayeli aahaana osuwela enamuna ya ehopa aaphavela awe ovara. (Onam. 11:9-12) Nave aahaana osuwela opuro aakhanle awe oophwanya ehopa. Okhala wene, ihopa sinnisiveliwa okhala mapuro maasi ari aya ooreera ni ekhanle aya yoolya. Niireke wookhala okathi wooreerela orowa ototha ihopa? Nwehe ele yiiraneyale Ilha do Pacífico. Munna mmosa aahimulattula misionaario orowa omiserya. Misionaario ole aahimmye so: “Vaareera, kinimoophwanyani meelo 9 oora”. Munna ole aahimwaakhula wira: “Kinoona wira khamunisuwela. Khahiyo hiyo ninhimya okathi wooreerela ototha, masi ihopa ti sinhimya”.

⁹ Eyo ti etthu yaapaka aya ale yaatotha aatthu eseekulu yoopacerya. Awo yaanirowa mapuro ni okathi yaakhanle aya oophwanya “ihopa”. Mwa ntakiheryo, atthareli a Yesu yaanilaleerya musinagoga, empa ni empa ni mapuro yakhala aya atthu anceene. (Mit. 5:42; 17:17; 18:4) Naatakihaka anamalaleerya a eseekulu yoopacerya, hiyo nave nihaana osuwela soolema sa atthu anikhala muttetthe ninlaleerya ahu. Nto nihaana waaturuka apalano ahu wira nrowe nalaleerye opuro ni okathi nikhanle ahu oowaaphwanya atthu.—1 aKor. 9:19-23.

10. Ikaruma xeeni mutthenkeso wa Yehova onivanhe awe?

¹⁰ Mulipa onitotha ihopa ohaana okhalana ni osuwela orumeela oratteene ikaruma sawe. Hiyo nave, nihaana okhalana ikaruma sooloka wira nilaleeryeke. Nave nihaana osuwela orumeela saana khula ekaruma. Yesu aahaavaha atthareli awe malakiheryo a moota oowaatotha atthu. Nave aahihimya etthu yookuxa, mapuro oolaleerya ni etthu yoohimya. (Math. 10:5-7; Luka 10:1-11) Olelo-va, mutthenkeso wa Yehova woonivaha Ekaaxa ya Ikaruma Sinnikhaliherya Wiixuttiha, yeeyo erina ikaruma sinnikhaliherya okhumela saana naalaleeryaka. * Nave ninniixuttihiwa moota woorumeela khula ekaruma. Eyo enninikhaliherya wiilipiha naalaleeryaka ni okhala awiixuttihi ooloka.—2 Tim. 2:15.

11. Xeeni ale anitotha ihopa anireerela aya olipa murima?

¹¹ Atthu ale muteko aya ori ototha ihopa paahi,  ahaana olipa murima. Maana okathi mukina mphareya sinnikhumelela itthu yahaalipelela aya. Ikwaha sinceene awo anitotha ihopa ohiyu, nto mootutuxerya pooti waakhumelela munamukhaya. Nave ale anaatotha atthu ahaana olipa murima. Okathi nimpacerya ahu olaleerya ni wooniherya wira na Anamoona a Yehova, pooti onikhumelela “munamukhaya” ntoko olupatthiwa ni amusi ahu, onyoholiwa ni apatthani ni atthu akina oheemererya muhupi ahu. Okathi eyo enikhumelela aya, hiyo khanintikinihiwa. Maana Yesu aahihimya vahinatthi wira atthareli awe yaarowa olupatthiwaka.—Math. 10:16.

12. Moovarihana ni Yoxuwa 1:7-9, exeeni enrowa onikhaliherya olipiha olipa wahu murima?

¹² Itthu xeeni munireerela anyu opaka wira mulipihe olipa wanyu murima? Yoopacerya, mukupaliki ni murima wotheene wira ori ene wiirimu, Yesu onnihoolela muteko woolaleerya. (Yoh. 16:33; Wis. 14:14-16) Nuumala-vo, mulipihe waamini wanyu yooleiherya ya Yehova enihimya wira onimookhapelelani. (Math. 6:32-34) Vaavo munrowa anyu olipihaka waamini wanyu, munrowa otepaka olipa murima. Pedru ni apatthani awe yaahooniherya wira yaahikhalana waamini woolipa vaavo yaahiyale aya matthavi aya, yaawo yaakhaliherya ophwanya yoolya wira amutthareke Yesu. Nave nyuwo muhooniherya wira mookhalana waamini woolipa vaavo mwaalenle anyu anamuyari anyu ni apatthani anyu wira moopacerya omusoma Biibiliya ni Anamoona a Yehova ni orowela mithukumano saya! Moohaanyiherya, moopaka marukunuxo manceene mookumini mwanyu wira mukhaleke moovarihana ni  malamulo a xariya a Yehova. Tthiri wira mpake eyo, mwaahaana olipa murima. Nto muhihiye olipiha olipa wanyu murima mukupaliki wira “Apwiya Muluku anyu anokhala ni nyuwo mapuro othene anrowanyu okhalaka”.—Mmusome Yoxuwa 1:7-9.

13. Ovekela ni wuupuwelela onrowa wookhaliheryani sai olipiha olipa wanyu murima?

¹³ Etthu xeeni ekina munreerela anyu opaka wira mulipihe olipa wanyu murima? Muhaana onvekela Yehova wira ookhaliheryeni olipa murima. (Mit. 4:29, 31) Yehova onimwaakhula mavekelo anyu ni khonikhala-khala oonyanyalakani. Okathi wotheene owo onimookhaliheryani. Nave muhaana wuupuwelela moota Yehova aawooponle awe atthu akina khalai. Ohiya-vo, muhaana wuupuwela moota Yehova ookhalihenryaweni oxintta mixankiho ni woovahani ikuru wira mpake marukunuxo mookumini mwanyu. Moohaanyiherya, Ole aahunle Ephareya Yooxeerya wira atthu awe avire onimookhaliheryani okhala mutthareli a Kristu. (Okhum. 14:13) Muhaana okhalana waamini ntoko wa nasaalimo, yoowo aahimmye so: “Apwiya ankhala ni miyo: tivó vahinòvaka etthu. Atthu anwerya okìriha exeni?”—Esal. 118:6.

14. Yowiiraneya ya Masae ni Tomoyo, ewiixuttinheni exeeni?

¹⁴ Enamuna ekina enrowa onikhaliherya olipiha olipa wahu murima ori wiixutta moota Yehova aakhalihenrye awe atthu oowuuliwa muru olaleerya moolipa murima. Nwehe yowiiraneya ya murokora oniihaniwa Masae. Owo aari oowuuliwa muru vanceene ni uupuwela wira khaakhala-khala oweryaka olaleerya. Uupuwela wira olavula ni atthu otepexa wene ale ohinaasuwela awe waari woovila ntoko muuru woorekama ahaawerya awe otupha ni khaarowa owerya opaka eyo. Nto murokora ole aahiimananiha vanceene wira incererye omphenta wawe Muluku ni atthu akina. Masae aahuupuwela moota ori aya wootthuneya olaleerya mahiku ala ookiserya ni aahinvekela Yehova wira omukhaliherye otepa osiveliwa olaleerya. Owo oowerya oxintta wuuliwa muru ni aahirumeela ntoko pioneera ookilaatheya. Nave Yehova onimwaakhaliherya anamalaleerya a niinaano ‘olipiha’ murima. Vano nkahaya nwehe yowiiraneya ya murokora oniihaniwa Tomoyo. Nihiku noopacerya aaronwe awe olaleerya, mwaneene etthoko aahikhuwela oriki: “Nkinaaphavela Anamoona a Yehova!” ni aahiwala mukhora mowaakuveya. Ohiya woova, Tomoyo aahimuleela murokora aarina awe wira: “Muhiiwa etthu ohimmye awe muthiyana ole? Kihilavunle etthu, ohoona wira miyo ka Namoona a Yehova. Nkireere ohakalala omwiiwa ohimyaka ele”. Olelo-va, Tomoyo onirumeela ntoko pioneera ookilaatheya.

15. Wiimananiha onitaphulela exeeni ni xeeni vanireerela aya maKristau wiimananiha?

¹⁵ Alipa oototha ihopa anikhumela saana ahaana wiimananiha. Onihimmwa wira wiimananiha onitaphulela “wiikhanyereriha opaka etthu enireerela opakiwa”. Ale antotha ihopa wira atumiheke ahaana wiimananiha vanceene wira avare muteko aya. Mwa ntakiheryo, awo ahaana ovinya oxaka ni ovara muteko aya hata okathi ohikhanle saana. Hiyo nave nihaana wiimananiha wira nivilele ni omaleliha muteko ahu.—Math. 10:22.

16. Ninrowa owerya sai okhala atthu oowiimananiha?

¹⁶ Khuuvo mutthu oniyariwa iimananihaka. Ohiya-vo, otheene ahu ninniwanana yoophavela ya ohiimananiha. Nto wira nikhale atthu oowiimananiha, nihaana wiihiiha. Tthiri akhala wira nimphavela wiixutta opaka itthu nnoona ahu ovila, ninnivekela nikhaliheryo. Nto Yehova onninikhaliherya orumeelaka munepa awe wootteela.—aGal. 5:22, 23.

17. 1 aKorinto 9:25-27, onooniherya sai wira Paulo aari mutthu oowiimananiha?

 ¹⁷ Murummwa Paulo aari mutthu oowiimananiha. Hata vari siiso, owo aahimmye wira aahaana ‘ohaxa erutthu awe’ wira opakeke itthu sooloka. (Mmusome 1 aKorinto 9:25-27.) Nave aahaatumererya maKristau makina wira yaahaana wiimananiha wira apakeke itthu sotheene ni “nttittimiho ni wiwanana”. (1 aKor. 14:40) Nihaana wiimananiha wira nihihiye omukokhorela Yehova, weiwo onihela muhina okhaliherya vanceene muteko wowaatotha atthu.—Mit. 2:46.

18. Exeeni enrowa omwiiriha Yehova onithokorerya okhala atthu anikhumela saana?

¹⁸ Akhala wira mulipa-oototha ihopa onnivara ihopa sinceene, onnihimmwa wira onnikhumela saana. Masi etthu enooniherya wira hiyo ninnikhumela saana khahiyo nummuru na atthu naakhalihenrye ahu okela mmutthenkesoni mwa Yehova. (Luka 8:11-15) Akhala wira nnoovikaniha ovilela nivaraka muteko wowaapaka awiixutti, Yehova onoonithokorerya okhala atthu anikhumela saana. Mwaha wa xeeni? Mwaha woowi ninnimwiiwelela Yena ni Mwanawe.—Mar. 13:10; Mit. 5:28, 29.

19-20. Etthu xeeni enniiriha wiirela mpantta muteko woolaleerya?

¹⁹ Ilapo sikina sookhala myeeri mutthu oneemereriwa awe ototha ihopa. Nto ilapo iyo, alipa-oototha ihopa anniimananiha vaavo anoona aya wira muteko owo woototha ihopa ohanle omala. Hiyo nri atothi aatthu, ninnitumereriwa wiimananiha olaleerya vanceene mahiku ala. Mwaha wa xeeni? Mwaha woowi omala wa olumwenku onnitepa waattamela! Nto ohanle okathi vakhaani wira noopole ikumi sa atthu. Nto muhipise ni muhilipeleleke ophiya okathi wooreerela wala wooloka wira mpacerye wiirela mpantta muteko ola wootepa otthuneya onivariwa olelo-va.—Mus. 11:4.

²⁰ Muhaana ottottela mureerelo okathi ola wira mulipihe yoolakela anyu ya olaleerya, wiixutta itthu sinceene sa mBiibiliyani ni wiimananiha. Mukhale vamosa ni atthu anivikana imilyau 8, yaawo ari atothi aatthu, mwiira siiso munoophwanya ohakalala onrwa wa Yehova. (Neh. 8:10) Mpakeke itthu sotheene muniwerya anyu wira mwiirele mpantta muteko woolaleerya mpakha wanikisa. Masi, ankhi ale ari atothi aatthu? Exeeni enrowa waakhaliherya ohihiya olaleya ihapari sooreera? Mwaha onittharelana, ninrowa othokorerya inamuna tthaaru sinrowa waakhaliherya.