1. Yesuusi moliyaa oyqqiya oyddata ay shoobbidee, qassi eti waatidonaa?

ERISSIYO ASHKKARA gidida PHeexiroosi, Inddiraasi, Yaaqoobinne Yohaannisi moliyaa oyqqiyo oosuwaa oottoosona. Yesuusi eta, “Tana kaallite; taani inttena asa oiqqiyoogaa tamaarissana” * giidi shoobbido wode etawu aybi siyettidaakko qoppa. Eti waatidonaa? Geeshsha Maxaafay, “Sohuwaarakka bantta gitiyaa yeggi bayidi, Yesuusa kaallidosona” yaagees. (Maa. 4:18-22) Eti kuuyidobay eta deˈoy merinawu laamettanaadan oottiis. Eti moliyaa oyqqiyoogaappe ‘asa oyqqiyaageeta’ gididosona. (Luq. 5:10) Ha wodiyankka, tumaa wozanappe siiqiya asati hegaadan oottanaadan Yesuusi shoobbees. (Maa. 28:19, 20) Neeni moliyaa oyqqiyaagaa gidanaadan Yesuusi shoobbido shoobbiya ekkadii?

2. Moliyaa oyqqiyaagaa gidanawu loytti qoppana bessiyay oonee, qassi hegaadan kuuyanawu nuna aybi maaddanee?

² Amarida wodiyawu neeni Geeshsha Maxaafaa xannaˈaydda takkennan aggakka; qassi ne deˈuwan issi issiban laamettadasa. Haˈˈi neeni mishiraachchuwaa aassiyaagaa gidanawu koyiyaakkonne kuuyanawu koshshees. Neeni Yesuusa shoobbiya ekkanawu mammottikko, hidootaa qanxxoppa. Neeni mammottiyoy hegee kuuyiyo gitabaa gidiyoogaa neeni eriyo gishshawu gidana danddayees. Ee, PHeexiroosinne A laggeti “sohuwaarakka” bantta gitiyaa yeggi bayidoogaa Geeshsha Maxaafay yootees. SHin, PHeexiroosinne A ishay hegaappe kasetidi qoppennan kuuyibookkona. Eti usuppun aginaappe dariyaagaa kasetidi Yesuusi Masiyaa gidiyoogaa eridi ammanidosona. (Yoh. 1:35-42) Hegaadankka neeni Yihoowabaanne Yesuusabaa darobaa tamaarennan  aggakka; qassi aggennan ayyaanaaban diccanawu koyaasa. SHin, neeni aassiyaagaa gidanawu kuuyanaappe kase hegaabaa loyttada qoppana koshshees. PHeexiroosi, Inddiraasinne harati kuuyanaadan maaddiday aybee?

3. Neeni Yesuusa shoobiyaa ekkanawu loytta koyanaadan maaddiya eeshshati awugeetee?

³ Yesuusi erissiyo ashkkara gidida koyroogeeti koshshay, eratettaynne xalatettay deˈiyoogeeta, qassi banttana seeriyaageeta. He eeshshati eti mishiraachchuwaa loytti sabbakiyaageeta gidanaadan maaddidosona. Neeni mishiraachchuwaa loytti sabbakiyaagaanne harata tamaarissiyaagaa gidana mala ha eeshshata neeni waata bessana danddayiyaakko ha huuphe yohoy qonccissana.

4. PHeexiroosi moliyaa oyqqanawu koyidoy aybissee?

⁴ Moliyaa oyqqiyoogee PHeexiroosawu ooso gidiyo gishshawu xalla gidennan, he oosuwan I ba so asawu koshshiyaabaa kunttees. PHeexiroosi moliyaa oyqqiyoogaa dosiyaabaa milatees. (Yoh. 21:3, 9-15) I asaakka oyqqanawu dosees. Qassi Yihooway maaddin PHeexiroosi he oosuwaa loytti oottiyaagaa gidiis.—Oos. 2:14, 41.

5. Luqaasa 5:8-11 yootiyoogaadan, PHeexiroosi yayyidoy aybissee, qassi nuunikka yashshaa xoonanaadan aybi maaddana danddayii?

⁵ Nuuni Yihoowa siiqiyo gishshawu sabbakoos; he oosuwaa nuuni oottiyo waanna gaasoy hegaa. Nuuni Yihoowa siiqiyoogee nuuyyo danddayettennaba milatiya ay metuwaakka xoonanawu nuna maaddana danddayees. Yesuusi, PHeexiroosi asaa oyqqiyaagaa gidanaadan shoobbido wode, “Yayyoppa” yaagiis. (Luqaasa 5:8-11 nabbaba.) Yesuusi erissiyo ashkkara gidikko, aybi gakkanaakko giidi PHeexiroosi yayyibeenna. Eti keehi daro moliyaa oyqqanaadan Yesuusi maaddidoogan  I maalaalettiis. Yesuusi maalaaliyaabaa oottidoogaa erees; qassi Yesuusaara oottanawu danddayennabadan awu siyettibeenna. PHeexiroosaagaadan, neenikka yayyana danddayaasa. Kiristtoosi erissiyo ashkkara gidiyoogan neeni oottana koshshiyo ubbabaa xeelliyaagan keehi yayyennan aggakka. Yaatikko, Yihoowa, Yesuusanne ne shooruwaa loytta siiqa; hegee neeni asaa oyqqiyaagaa gidanaadan Yesuusi shoobbido shoobiyaa ekkanaadan nena denttettana.—Maa. 22:37, 39; Yoh. 14:15.

6. Nuuni sabbakiyo hara gaasoti aybee?

⁶ Nuuni sabbakanaadan denttettiya hara gaasota qoppa. Yesuusi “biidi . . . tana kaalliyaageeta oottite” giidi azazidoogaa azazettanawu koyoos. (Maa. 28:19, 20) Asay “heemmiya asi bainna dorssadan . . . hirggiyo gishshaunne asaa maaddiyaabi bainna gishshau,” qassi Kawotettaa tumabaa eti tamaaranawu keehi koyiyo gishshawu nuuni sabbakoos. (Maa. 9:36) Asay ubbay tumaa eranaadaaninne attanaadan Yihooway koyees.—1 Xim. 2:4.

7. Roome 10:13-15y yootiyoogaadan, sabbakiyo oosoy ay keena koshshiyaabee?

⁷ Asay attanaadan sabbakiyo oosoy maaddiyoogaa eriyoogee nuuni sabbakanawu koyanaadan oottana. Moliyaa oyqqiyaageeti hegaa bayzzanawu woy maanawu oyqqoosona; shin nuuni ‘asa oyqqiyoy’ eta shemppuwaa ashshanaassa.—Roome 10:13-15 nabbaba; 1 Xim. 4:16

8-9. Moliyaa oyqqiya uri ay erana koshshii, qassi aybissi?

⁸ Yesuusa wode, issi Israaˈeela asi ay mala moliyaa oyqqana koshshiyaakko erana bessees. (Wog. 11:9-12) I molee awu heeran beettiyaakkokka erana koshshees. Darotoo moleti deˈiyo heeray eti dosiyo haattaynne daro qumay beettiyo sohuwaana. Hegaa gishshawu, moliyaa oyqqanawu biya uri biyo wodiyaa eriyoogee keehi koshshiyaaba. Pasifikke haruuruwan deˈiya issi misoonaawee moliyaa oyqqanawu injjetiya saatee deˈiyoogaa akeekiis. He heeran deˈiya Yihoowa Markkay, moliyaa oyqqanawu banaara issippe baanaadan A shoobbiis. He misoonaawee, “Taani wontto maallado heezzu saatiyan nenaara gayttana” yaagiis. He ishay zaaridi, “Neeni erabeykka. Nuuni moliyaa oyqqanawu nuussi injjetiya saatiyan gidennan, molee beettiyo saatiyan oyqqanawu boos” yaagiis.

⁹ Hegaadankka asaa oyqqiya, Yesuusi erissiyo ashkkarati asay deˈiyo sohuwaanne eta demmana danddayiyo saatiyan boosona. Leemisuwawu, Yesuusa kaalliyaageeti beeta maqidasiyaaninne Ayhuda woosa keettan, sooppe soo, qassi giyan sabbakidosona. (Oos. 5:42; 17:17; 18:4) Nuunikka nu heeran deˈiya asaa meeziyaa erana koshshees. Nuuni darotoo asaa awan, qassi awude demmidi sabbakana danddayiyaakko eranawu, nu halchchuwaa laammanawu eeno gaana koshshees.—1 Qor. 9:19-23.

10. Yihoowa dirijjitee nuussi ay miishshata giigissidee?

¹⁰ Moliyaa oyqqiya urawu hegawu bessiya miishshati koshshoosona, qassi he miishshata I waati goˈettanaakko erana koshshees. Nuussikka sabbakanawu koshshiya miishshati deˈana bessees. Qassi he miishshata waati goˈettanaakko erana koshshees. Yesuusi ba erissiyo ashkkarati mishiraachchuwaa waati sabbakanaakko yootiis. Eti ay oyqqanaakko, awan sabbakanaakko, qassi woygidi haasayanaakko I etawu yootiis. (Maa. 10:5-7; Luq. 10:1-11) Ha wodiyan, nuuni loytti sabbakanaadan maaddiya miishshati deˈiyo, Tamaarissanawu Goˈettiyo Waanna Miishshata Yihoowa dirijjitee giigissees. * Qassi he miishshata waati goˈettanaakko Yihoowa dirijjitee nuna tamaarissees. He loohissoy nuuni xalatettan sabbakanaadaaninne  haggaazuwan qara gidanaadan maaddees.—2 Xim. 2:15.

11. Asaa oyqqiyaageeti xala gidana koshshiyoy aybissee?

¹¹ Moliyaa oyqqiyaageeti xala gidana koshshees. Abban issi issitoo qoppibeenna hanotay eta gakkees. Eti darotoo qamman oottoosona, qassi haattaa bollan qoppennan gotee denddana danddayees. Asaa oyqqiyaageetikka xala gidana koshshees. Nuuni sabbakiyoogaa doommiyoonne nu Yihoowa Markka gididoogaa erissiyo wode, “gotee” hegeekka, so asaappe yedetay, laggetuppe qilliicceenne nu yootiyoobaa siyanawu koyennaageeti eqettiyoogee nuna gakkana danddayees. SHin hegee nuna maalaalissenna. Yesuusi bana kaalliyaageeta sabbakanawu kiittiyo wode asay eta eqettanaagaa mintti yootiis.—Maa. 10:16.

12. Yaasa 1:7-9y yootiyoogaadan, xalatettaa minttanawu nuna aybi maaddana danddayii?

¹² Ne xalatettaa waata minttana danddayay? Koyruwan, sabbakiyo oosuwaa Yesuusi saluwaappe kaalettiiddi deˈiyoogaa neeni ammanana bessees. (Yoh. 16:33; Ajj. 14:14-16) Naaˈˈanttuwan, Yihooway nena maaddanawu gelido qaalan mintta ammana. (Maa. 6:32-34) Ne ammanoy minni minni biyo wode kaseegaappe aaruwan neeni xala gidana. PHeexiroosinne A laggeti Yesuusa kaallanawu moliyaa oyqqiyo oosuwaa aggido wode, gita ammanuwaa bessidosona. Hegaadankka, Yihoowa Markkatuura Geeshsha Maxaafaa xannaˈiyoogaanne etaara  shiiqota shiiqiyoogaa doommidoogaa ne laggetussinne ne so asaassi yootido wode gita ammanuwaa bessadasa! Yihooway kessido xillotettaa maaraadan deˈanawu ne eeshshaaninne ne deˈuwan daroban laamettidoogee qoncce. Hegawukka ammanoynne xalatettay koshshees. Neeni ubbatoo xalatettaa minttiyo wode, “Ne biyo soho ubban taani GODAI ne Xoossai nenaara [de7iyoogaa]” ammanettana danddayaasa.—Yaasa 1:7-9 nabbaba.

13. Wotti dentti qoppiyoogeenne woosay xalatettaa minttanawu nena waati maaddii?

¹³ Ne xalatettaa minttanawu maaddiya harabay aybee? Xalatettaa demmanawu woossa. (Oos. 4:29, 31) Yihooway ne woosaa zaarana; qassi nena maaddiyoogaa mule aggenna. I nena maaddanawu ubbatoo giigi uttiis. Qassi, Yihooway harata kase waati ashshidaakko wotta dentta qoppana danddayaasa. Nena gakkida metuwaa xoonanaadan, qassi ne deˈuwan laamettanaadan neessi wolqqaa immiyoogan I nena waati maaddidaakkokka qoppa. Zoˈo Abban ba asaa kaalettidi pinttidaagee neeni Kiristtoosi erissiyo ashkkara gidanaadan maaddana danddayiyoogee qoncce. (Kes. 14:13) “GODAI tanaara de7iyo gishshau, taani yayyikke. Asi tana ai oottii?” giida mazamuraawiyaagaadan, neeni Yihoowan ammanettana danddayaasa.—Maz. 118:6.

14. Massaayinne Tomoyi hanotaappe neeni ay tamaaradii?

¹⁴ Xalatettaa minttanawu maaddiya hara ogee, dungguuxa gididaageeti xala gidanaadan Yihooway maaddidoogeetubaa tamaariyoogaana. Massaayi giyo michchee hanotaa beˈa. A kase dungguuxa, qassi asaa sinttan ba ammanuwaabaa haasayanawu mule danddayennabadan iyyo siyettees. Erenna asaara haasayiyoogee O keehi metees; hegee iyyo keehi adussa gimbbiyaa shibbanawu baaxetiyoogaa mala; qassi A mule hegaa oottana danddayennabadan qoppaasu. Yaatiyo gishshawu, A Xoossaanne ba shoorota kaseegaappe aaruwan siiqanawu minttada baaxetaasu. Sabbakiyo oosoy keehi eesoyiyaaba gidiyoogaa A loytta qoppaasu; qassi sabbakanawu keehi koyanaadan maaddana mala woossaasu. A yashshaa xoonada haˈˈi ubba wode aqinye gidaasu. Mati aassiyaageeta gididaageeta “xala” gidanaadankka Yihooway maaddana danddayees. Tomoyo giyo michchee hanotaa akeeka. A sooppe soo sabbakiyoogaa doommido wode, koyro haasayissido keettaayiyaa, “Taani Yihoowa Markkatuura haasayanawu koyikke!” gaada I bolli waassaasu; yaatada kariyaa gordda aggaasu. Tomoya yayyabeykku; A banaara haggaaziya laggeessi hagaadan gaasu: “Siyadii? Taani issibaakka qaatabeykke, qassi ta Yihoowa Markka gidiyoogaa A eraasu. Taani keehi ufayttaas!” Tomoya haˈˈi ubba wode aqinye gidada haggaazawusu.

15. Sabbakiyo oosoy nuussi deexxikko, moliyaa oyqqiya ura mala waani gidana danddayiyoo, qassi hegee Kiristtaanetussi keehi koshshiyoy aybissee?

¹⁵ Moliyaa oyqqiya gooba uri I oottana bessiyaabaa oottanawu minnidi baaxetees. Leemisuwawu, guuridi denddanawu, oosoy polettanaashin oottanawunne metiya caarkkuwaa hanotaa genccanawu bana seerana bessees. Nuunikka genccanawunne nu oosuwaa polanawu nuna seerana koshshees.—Maa. 10:22.

16. Oottanawu nuna metana danddayiyaabaa oottanawu nuna aybi maaddana danddayii?

¹⁶ Nuuni nuna seeriyaageeta gididi yelettibookko. Nuuni darotoo issibaa metenna ogiyan oottanawu koyoos. Gidikkonne, oottana bessiya oosoti issi issitoo oottanawu deexxiyaageeta. Hegaa gishshawu, nuuni nuna seerana koshshees. Qassi, oottanawu nuna metana danddayiyaabaa oottanawu nuna loohissanawu maadoy koshshees. Yihooway he maaduwaa ba geeshshaa ayyaanaa  baggaara nuussi immees.—Gal. 5:22, 23.

17. Koyro Qoronttoosa 9:25-27y yootiyoogaadan, kiitettida PHawuloosi bana seeranawu baaxetiyoogaa woygi yootidee?

¹⁷ Kiitettida PHawuloosi bana seeriya asa. SHin likke gididaabaa oottanawu I ba bolla ‘yimppana’ koshshiyoogaa akeekiis. (1 Qoronttoosa 9:25-27 nabbaba.) I harati banttana seeranaadaaninne oottiyo ubbabaa “wogaaninne maaran” oottanaadan zoriis. (1 Qor. 14:40) Yihoowawu aggennan goynnanawu minnidi oottana koshshees; hegee mishiraachchuwaa ubbatoo sabbakiyoogaanne tamaarissiyoogaa gujjees.—Oos. 2:46.

18. Sabbakiyoogan Yihooway nuna gooba oosanchchadan xeellanaadan ay oottana koshshii?

¹⁸ Moliyaa oyqqiya uri daro moliyaa oyqqikko, I gooba. SHin sabbakiyo oosoy hegaappe dummatees. Nuna gooba woy laafa giissiyay daro asay Yihoowa Markka gidanaadan maaddiyoogaa gidenna. (Luq. 8:11-15) Mishiraachchuwaa sabbakiyoogaanne harata tamaarissiyoogaa aggennan nuuni oottikko, Yihooway nuna gooba oosanchchadan xeellees. Aybissi? Yihoowaynne A naˈay oottanaadan koyiyoobaa aggennan nuuni oottiyo gishshataassa.—Mar. 13:10; Oos. 5:28, 29.

19-20. Ha wodiyan nuuni sabbakanaadan denttettiya hara gaasoy aybee?

¹⁹ Issi issi biittatun, amarida aginatu xallan moliyaa oyqqanaadan paqqadettiis. Hegaa mala biittatun, moliyaa oyqqiyaagee he wodee wuranaappe kase moliyaa oyqqanawu kaseegaappe aaruwan eesotanawu qoppana danddayees. Nuuni asaa oyqqiyaageeta gidiyoogaadan, ha alamiyaa wurssettay keehi matidoogaa eriyoogee ha wodiyan sabbakanaadan denttettiya hara gaaso! Asaa ashshiyaa mishiraachchuwaa sabbakiyo oosoy guutta wodiyaappe simmin attana. Ha keehi koshshiya oosuwaa oottanaappe kase ne deˈuwan ubbabay injjetana gakkanaashin naagoppa.—Era. 11:4.

²⁰ Ha wodiyan, sabbakanawu mintta koya, Geeshsha Maxaafay yootiyoobaa loytta tamaara, xalatettaa mintta qassi nena seera. Kumetta alamiyan mishiraachchuwaa sabbakiya hosppun miilooniyaappe dariya asaara hashetada ootta; yaatikko Yihooway immiyo ufayssaa demmana. (Nah. 8:10) Sabbakanawu neessi danddayettida ubbabaa oottanawunne Yihooway he oosoy wuriis gaana gakkanaashin aggennan oottanawu murtta. Kawotettaa mishiraachchuwaa aggennan sabbakiyoogaa nuuni yaa murttanaadan maaddiya heezzu ogeta kaalliya huuphe yohoy qonccissana.