1. Ano an imbitasyon ni Jesus ha upat nga parapangisda, ngan ano an ira ginbuhat?

PAGPANGISDA an pakabuhi han mga disipulo nga hira Pedro, Andres, Santiago, ngan Juan. Imadyina la an ira kahipausa han nabatian nira an imbitasyon ni Jesus: “Sunod kamo ha akon, ngan hihimoon ko kamo nga mga parapangisda hin mga tawo.” * Ano an ira ginbuhat? An Biblia nasiring: “Ginbayaan dayon nira an ira mga pukot ngan sinunod ha iya.” (Mat. 4:18-22) Ito nga desisyon nakagbag-o han ira kinabuhi. Imbes nga mandakop hin literal nga isda, “mangingisda [hira] hin buhi nga mga tawo.” (Luc. 5:10) Yana, ito liwat an imbitasyon ni Jesus ha sinsero nga mga tawo nga nahigugma ha kamatuoran. (Mat. 28:19, 20) Ginkarawat mo ba an iya imbitasyon nga magin parapangisda hin mga tawo?

2. Kay ano nga kinahanglan naton seryosohon an desisyon nga magin parapangisda hin mga tawo, ngan ano an mabulig ha aton basi makahimo hito nga desisyon?

² Bangin maiha-iha ka na nga nag-aaram han Biblia ngan naghimo na hin mga pagbag-o ha imo kinabuhi. Yana, kinahanglan mo magdesisyon kon karuyag mo magin magwarali han maopay nga sumat. Kon nag-aalang ka ha pagkarawat han imbitasyon ni Jesus, ayaw panluya. An imo pag-alang posible nga nagpapasabot nga maaram ka nga seryoso gud ito nga desisyon. Oo, an Biblia nasiring nga ginbayaan “dayon” ni Pedro ngan han iya kasangkayan an ira mga pukot. Pero diri dinali-dali ito nga desisyon ni Pedro ngan han iya bugto. Sobra unom ka bulan na tikang han nahibaroan nira nga hi Jesus an Mesias ngan ginkarawat nira ito. (Juan 1:35-42) Sugad man, bangin damu na an imo nahibaroan parte kan Jehova ngan kan Jesus, ngan karuyag mo nga padayon  nga mag-uswag ha espirituwal. Pero, antes ka magdesisyon nga magin magwarali, kinahanglan hunahunaon mo ito hin maopay. Ano an nakabulig kanda Pedro, Andres, ngan ha iba pa basi makahimo hito nga desisyon?

3. Ano nga mga kalidad an magpapakusog han imo hingyap nga karawaton an imbitasyon ni Jesus?

³ An siyahan nga mga disipulo ni Jesus may hingyap ha pagsangyaw, may kahibaro, kaisog, ngan disiplina ha kalugaringon. Ini nga mga kalidad sigurado nga nakabulig ha ira nga magin epektibo nga parapangisda hin mga tawo. Hihisgotan hini nga artikulo kon paonan-o ka magkakaada hito nga mga kalidad basi magin epektibo ka nga disipulo han Kristo.

4. Ano an nagpagios kan Pedro nga magin parapangisda?

⁴ Nangingisda hi Pedro basi masuportaran an iya pamilya, pero diri la ito basta trabaho para ha iya. Baga hin hinigugma ni Pedro an pagpangisda. (Juan 21:3, 9-15) Ginhigugma liwat niya an pagin parapangisda hin mga tawo. Ngan ha bulig ni Jehova, nagin maopay gud hi Pedro hito nga buruhaton.​—Buh. 2:14, 41.

5. Sumala ha Lucas 5:8-11, kay ano nga nahadlok hi Pedro, ngan ano an makakabulig ha aton nga malamposan an sugad nga pag-abat?

⁵ Nagsasangyaw kita kay hinigugma naton hi Jehova; ini an nangunguna nga rason nga ginbubuhat naton ito. An aton gugma kan Jehova makakabulig ha aton nga malamposan an pag-abat hin pagin diri kwalipikado. Han gin-imbitar ni Jesus hi Pedro nga magin parapangisda hin mga tawo, nagsiring hiya ha iya: “Ayaw na kahadlok.” (Basaha an Lucas 5:8-11.) Diri nahahadlok hi Pedro ha mahimo mahitabo kon magin disipulo hiya. Lugod, nahipapausa hiya ha kadamu han isda nga ira nadakop tungod han bulig ni Jesus. Maaram hiya nga naghimo hin milagro hi Jesus, ngan inaabat  niya nga diri hiya kwalipikado nga magbuhat kaupod niya. Sugad man, bangin mabaraka ka mahitungod ha tanan nga kinahanglan mo buhaton basi magin disipulo han Kristo. Kon ito an imo inaabat, parig-ona an imo gugma kan Jehova, kan Jesus, ngan ha imo igkasi-tawo, ngan mapapagios ka nga karawaton an imbitasyon ni Jesus nga magin parapangisda hin mga tawo.​—Mat. 22:37, 39; Juan 14:15.

6. Ano pa an nagpapagios ha aton nga magsangyaw?

⁶ Tagda an iba pa nga rason kon kay ano nga napapagios kita nga magsangyaw. Karuyag naton sundon an sugo ni Jesus: “Lakat ngan panhimo kamo hin mga disipulo.” (Mat. 28:19, 20) Nagsasangyaw liwat kita kay an mga tawo “ginpanitan . . . ngan ginpabay-an” ngan kinahanglan gud nira mahibaro han kamatuoran parte han Ginhadian. (Mat. 9:36) Karuyag ni Jehova nga an tanan nga klase hin tawo magkaada husto nga kahibaro han kamatuoran ngan matalwas.​—1 Tim. 2:4.

7. Paonan-o iginpapakita han Roma 10:13-15 nga importante an pagsangyaw nga buruhaton?

⁷ Kon ginhuhunahuna naton nga an aton pagsangyaw nga buruhaton makakatalwas ha mga tawo, mapapagios kita nga magsangyaw. Iginbabaligya o ginkakaon han usa nga parapangisda an mga isda nga iya nadadakop. Pero kita, “nagdadakop” hin mga tawo, karuyag sidngon, nanhihimo hin mga disipulo basi matalwas an ira kinabuhi.​—Basaha an Roma 10:13-15; 1 Tim. 4:16.

8-9. Ano an kinahanglan mahibaroan han usa nga parapangisda, ngan kay ano?

⁸ Ha panahon ni Jesus, kinahanglan maaram an usa nga Israelita nga parapangisda kon ano nga klase hin isda an puydi niya dakpon. (Lev. 11:9-12) Kinahanglan maaram liwat hiya kon diin an may mga isda. An mga isda kasagaran nga aadto ha dapit diin karuyag nira an tubig ngan damu an pagkaon. Importante ba kon ano nga oras mangingisda? May kalabotan ha pinakamaopay nga panahon ha pagpangisda, tagda an siring han Saksi nga naukoy ha usa nga isla han Pasipiko han gin-agda niya an usa nga misyonero nga mangisda. An misyonero nagsiring, “Pagkita na la kita buwas nga aga, alas noybe.” An bugto binaton, “Diri. Makadto kita ha angayan nga oras ha pagpangisda, diri ha oras nga kombinyente ha aton.”

⁹ An mga parapangisda hin mga tawo ha siyahan nga siglo napakadto liwat ha mga lugar diin aadto an mga tawo ngan ha panahon nga posible aadto hira. Pananglitan, an mga sumurunod ni Jesus nagsangyaw ha templo, ha mga sinagoga, ha mga balay, ngan ha merkado. (Buh. 5:42; 17:17; 18:4) Kita liwat, kinahanglan magin pamilyar ha rutina han mga tawo ha aton teritoryo. Kinahanglan magin mapauyon-uyon kita basi makagsangyaw ha mga lugar ngan ha panahon diin posible aadto an mga tawo.​—1 Cor. 9:19-23.

10. Ano nga garamiton an igintatagana ha aton han organisasyon ni Jehova?

¹⁰ Kinahanglan han parapangisda an angayan nga garamiton, ngan importante nga maaram hiya ha paggamit hito. Kita liwat, kinahanglan magkaada angayan nga garamiton ha aton buruhaton. Ngan kinahanglan maaram kita kon paonan-o ito gagamiton. Naghatag hi Jesus hin klaro nga instruksyon ha iya mga disipulo kon paonan-o mangingisda hin tawo. Ginsumatan niya hira kon ano an dadad-on, diin magsasangyaw, ngan kon ano an isisiring. (Mat. 10:5-7; Luc. 10:1-11) Yana, an organisasyon ni Jehova nagtatagana hin Toolbox ha Pagpanutdo nga nagsusulod hin garamiton nga epektibo gud. * Ngan gintututdoan kita kon paonan-o naton ito gagamiton. Tungod hito nga pagtutdo, nagkakaada  kita kompyansa ngan abilidad basi magin epektibo ha aton buruhaton.​—2 Tim. 2:15.

11. Kay ano nga kinahanglan magin maisugon an mga parapangisda hin mga tawo?

¹¹ An mga parapangisda kinahanglan magin maisugon. Usahay nakakaeksperyensya hira hin paburobag-o nga klima ha dagat. Kasagaran nga nagtatrabaho hira ha gab-i ngan ha kadagatan diin danay tigda nga naabot an bagyo. An mga parapangisda hin mga tawo kinahanglan magkaada liwat kaisog. Kon nagtitikang kita pagsangyaw ngan nagpapakilala sugad nga mga Saksi ni Jehova, bangin umatubang kita hin sugad “bagyo” nga pagkontra han aton kapamilya, pagtamay han aton mga kakilala, ngan an iba nga tawo bangin diri kumarawat han aton mensahe. Pero diri kita hini nahipapausa. Nagsiring hi Jesus nga susugoon niya an iya mga sumurunod nga magsangyaw ha mga tawo nga makontra ha ira.​—Mat. 10:16.

12. Uyon ha Josue 1:7-9, ano an makakabulig ha aton nga magkaada kaisog?

¹² Paonan-o ka magigin maisugon? Una, magin kombinsido nga padayon nga gin-gigiyahan ni Jesus tikang ha langit ini nga buruhaton. (Juan 16:33; Pah. 14:14-16) Sunod, parig-ona an imo pagtoo ha saad ni Jehova nga aatamanon ka. (Mat. 6:32-34) Kon mas marig-on an imo pagtoo, mas magigin maisugon ka. Nagpakita hin daku nga pagtoo hi Pedro ngan an iya mga kaupod han ginbayaan nira an ira pakabuhi basi sumunod kan Jesus. Sugad man, nagpakita ka hin daku nga pagtoo han ginsumatan mo an imo kasangkayan ngan mga kapamilya nga  nag-aaram ka han Biblia ha mga Saksi ni Jehova ngan naatender ha ira mga katirok! Waray ruhaduha nga naghimo ka hin dagku nga pagbag-o ha imo panggawi ngan estilo ha pagkinabuhi basi masunod an matadong nga mga suruklan ni Jehova. Nagkinahanglan liwat ito hin pagtoo ngan kaisog. Samtang nangangalimbasog ka nga magkaada kaisog, makakasarig ka nga “hi Jehova nga imo Dios kaupod mo diin ka man kumadto.”​—Basaha an Josue 1:7-9.

13. Paonan-o an pagpamalandong ngan pag-ampo makakabulig ha imo nga magin maisugon?

¹³ Ano pa an makakabulig ha imo nga magin maisugon? Pag-ampo para hin kaisog. (Buh. 4:29, 31) Babatunon ni Jehova an imo mga pag-ampo ngan diri ka gud niya babayaan. Pirme ka niya susuportaran. Mahimo mo liwat pamalandungon kon paonan-o gintalwas ni Jehova an iba hadto. Hunahunaa liwat kon paonan-o ka niya ginbuligan ha imo mga problema ngan kon paonan-o ka niya gintagan hin kusog basi makahimo hin mga pagbag-o. An Dios nga naggiya ha iya katawohan ha pagtabok ha Dagat nga Pula makakabulig gud ha imo nga magin disipulo han Kristo. (Ex. 14:13) Mahimo ka magkaada pagtoo kan Jehova pariho han kanan salmista nga nagsiring: “Hi Jehova dapig ha akon; diri ako mahahadlok. Ano an mahihimo ha akon han tawo?”​—Sal. 118:6.

14. Ano an imo nahibaroan ha eksperyensya nira Masae ngan Tomoyo?

¹⁴ Usa pa nga paagi basi magin maisugon amo an paghibaro kon paonan-o ginbuligan ni Jehova nga magin maisugon an mga tawo nga awdanon. Tagda an sister nga hi Masae. Awdanon hiya ngan inabat niya nga diri gud niya kaya magsangyaw. Para ha iya, an pakiistorya ha diri niya kakilala baga hin hitaas nga pader nga diri niya kaya sak-on. Salit nangalimbasog gud hiya nga pahilarumon an iya gugma ha Dios ngan ha iya igkasi-tawo. Ginpamalandong niya an pagkaapurado han aton panahon yana ngan nag-ampo nga buligan hiya nga mapakusog an iya hingyap nga magsangyaw. Nalamposan niya an iya kahadlok ngan nagregular payunir pa ngani. Mabubuligan liwat ni Jehova an bag-o nga mga magwarali nga “magin maisugon.” Tagda an sister nga hi Tomoyo. Han nagtikang hiya pagsangyaw ha balay-balay, gin-guliatan hiya han una nga tagbalay nga ira ginbisita: “Diri ko karuyag makiistorya ha mga Saksi ni Jehova!” ngan makusog nga iginsara an purtahan. Waray mahadlok hi Tomoyo, lugod nagsiring hiya ha iya partner: “Nabatian mo adto? Waray pa ako ginyakan, pero nakilala niya ako nga Saksi ni Jehova. Nalilipay gud ako!” Yana, regular payunir na hi Tomoyo.

15. Ano an disiplina ha kalugaringon, ngan kay ano nga importante ito para ha mga Kristiano?

¹⁵ An maopay nga parapangisda may disiplina ha kalugaringon. An disiplina ha kalugaringon iginhuhulagway sugad nga “abilidad nga mapagios an imo kalugaringon nga himoon an mga butang nga angay buhaton.” Kinahanglan disiplinahon han mga parapangisda an ira kalugaringon basi makamata hin temprano, padayon nga magtrabaho tubtob mahuman, ngan bisan kon maraot an panahon. Kinahanglan liwat naton an disiplina ha kalugaringon kon karuyag naton makapadayon ngan matapos an aton buruhaton.​—Mat. 10:22.

16. Paonan-o kita magkakaada disiplina ha kalugaringon?

¹⁶ Diri naton napapanunod an disiplina ha kalugaringon. Ha kabaliktaran, may tendensya kita nga buhaton an mga butang nga masayon la himoon. Kinahanglan an pagpugong ha kalugaringon basi magkaada disiplina ha kalugaringon. Salit kinahanglan naton hin bulig basi matutdoan an aton kalugaringon nga buhaton an mga butang nga bangin makuri para ha aton.  Iginhahatag ni Jehova ito nga bulig pinaagi han iya baraan nga espiritu.​—Gal. 5:22, 23.

17. Sumala ha 1 Corinto 9:25-27, ano an kinahanglan buhaton ni apostol Pablo basi magkaada disiplina ha kalugaringon?

¹⁷ May disiplina ha kalugaringon hi apostol Pablo. Pero gin-amin niya nga kinahanglan niya ‘kastiguhon’ an iya lawas basi mabuhat an tama. (Basaha an 1 Corinto 9:25-27.) Gin-aghat niya an iba nga disiplinahon an ira kalugaringon ngan buhaton an tanan nga butang “hin desente ngan uyon ha kahikayan.” (1 Cor. 14:40) Kinahanglan magkaada kita disiplina ha kalugaringon basi matipigan an maopay nga rutina ha espirituwal nga nag-uupod hin regular nga pakigbahin ha simboliko nga pagpangisda.​—Buh. 2:46.

18. Ano an kinahanglan naton buhaton basi hunahunaon ni Jehova nga malampuson kita ha aton buruhaton?

¹⁸ Ginsusukol han usa nga parapangisda an iya kalamposan pinaagi ha kadamu han iya nadakop. Pero an aton kalamposan, diri naton ginsusukol pinaagi ha kadamu han tawo nga aton nabubuligan nga makasulod ha organisasyon han Dios. (Luc. 8:11-15) Kon padayon kita nga magsasangyaw ngan magtututdo ha iba, para kan Jehova malampuson kita ha aton buruhaton. Kay ano? Kay ginhihimo naton an iginpapabuhat ha aton ni Jehova ngan han iya Anak.​—Mar. 13:10; Buh. 5:28, 29.

19-20. Ano an aton importante gud nga rason nga magsangyaw yana?

¹⁹ Ha iba nga nasud, may mga bulan la nga puydi mangisda. Hito nga mga nasud, bangin abaton han usa nga parapangisda nga kinahanglan gud niya maniguro samtang nagtitikahirani an kataposan han panahon han pagpangisda. Sugad nga parapangisda hin mga tawo, may dugang kita nga rason nga magsangyaw yana: Madagmit nga nagtitikahirani an kataposan hini nga sistema! Halipot na gud la nga panahon an nabibilin basi makigbahin hinin nagtatalwas-kinabuhi nga buruhaton. Ayaw paglangan o ayaw hunahunaa nga kinahanglan mo hulaton an perpekto nga mga kahimtang antes ka makigbahin hinin importante nga buruhaton.​—Ecles. 11:4.

²⁰ Gios na yana basi mapakusog an imo hingyap nga magsangyaw, mapahilarom an imo kahibaro ha Biblia, ngan magkaada kaisog ngan disiplina ha kalugaringon. Upod ha sobra walo ka milyon nga parapangisda hin mga tawo, ngan aabaton mo an kalipay nga iginhahatag ni Jehova. (Neh. 8:10) Magin determinado nga bug-os nga makigbahin hini nga buruhaton ngan magpadayon tubtob nga sumiring hi Jehova nga tapos na ito. Hihisgotan ha sunod nga artikulo an tulo nga paagi basi magin mas determinado kita nga magpadayon ha pagsangyaw han Ginhadian sugad nga parapangisda hin mga tawo.