1. Wetin Jesus tell four fishermen make they come do, and wetin they do?

JESUS get four disciples wey their work na to catch fish and sell. Their name na Peter, Andrew, James, and John. They go don really surprise as Jesus tell them say: “Make wuna follow me, and I go make wuna fishers of men.” * So wetin this men do? Bible tell us say: “At once they abandon their nets and follow Jesus.” (Matt. 4:18-22) This their decision change their life forever. Instead of them to catch fish, “na people [they] go de catch alive.” (Luke 5:10, ftn.) Today, Jesus still de tell people wey get good heart and love the truth make they do the same thing. (Matt. 28:19, 20) You don be fisher of men as Jesus talk?

2. Why we no suppose to play with the decision to begin preach, and wetin go help us to make that decision?

² E fit be say you don de study Bible for some time and you don change the way you de live your life. But now, you need to decide whether you want start to preach the good news. If you never dey sure whether you go fit de preach as Jesus talk say make you do, make you no allow that one tire you. E fit be say you never want do-am because you know say this kind decision na really important one. Na true say, Bible tell us say Peter and e friends leave their net “at once.” But Peter and e brother no make that decision when they never think about-am. More than six months before this time, they don know Jesus and they don accept Jesus as the Messiah. (John 1:35-42) For the same way, you fit don already learn plenty things about Jehovah and Jesus, and you want continue  to near Jehovah. But before you start to preach, make you sofri think about-am. Wetin help Peter, Andrew, and other people to make their decision?

3. Which fine-fine character go really help you do the preaching work wey Jesus talk make you do?

³ The first disciples wey Jesus get know why them de do fishing business, they learn the work well, they get strong heart, and they sabi control theirself. Na the same character help them to do the preaching work well. This article go talk about how you fit get this fine-fine character, so that you go fit de preach and teach other people well.

4. Wetin make Peter be fisherman?

⁴ Na fish Peter de catch to care for e family. But Peter no just de do this work, e love the work. (John 21:3, 9-15) Peter still learn how to love the preaching work. And Jehovah help Peter make e really sabi do the work well.​—Acts 2:14, 41.

5. As e dey for Luke 5:8-11, why Peter be de fear, and wetin fit help us stop to feel like that?

⁵ We de preach because we love Jehovah, and na this one be the number one reason why we de do this work. The love wey we get for Jehovah fit help us preach the good news, even if we feel say we no go fit do-am. When Jesus tell Peter make e come do the preaching work, e tell Peter say: “No de fear again.” (Read Luke 5:8-11.) No be say Peter de fear because of wetin fit happen if e become disciple. Instead, Peter surprise for the miracle wey Jesus do wey make them fit catch plenty fish. And so, e feel say e no qualify to work with Jesus. Like Peter, you fit de fear too. You fit de worry about everything wey you suppose do to be disciple of Jesus. If na  so, then make you make your love for Jehovah, for Jesus, and your neighbor, dey strong. And this one go help you start to do the preaching work wey Jesus say make you do.​—Matt. 22:37, 39; John 14:15.

6. Which other reasons de make us preach?

⁶ Make we talk about other reasons why we suppose to preach. We want obey wetin Jesus command say: “Make wuna go make disciples.” (Matt. 28:19, 20) We still de preach because them de teach people lie-lie, and people really need to know the truth about the Kingdom. (Matt. 9:36) Jehovah want make different kind of people learn the truth for Bible and make they get life.​—1 Tim. 2:4.

7. How Romans 10:13-15 show say the preaching work dey important?

⁷ When we de remember say our preaching work fit save people, we go want de preach. When fisherman catch fish, if e no sell-am e go chop-am. But no be so our own be. We de “catch” people, or de make disciples, to save their life.​—Read Romans 10:13-15; 1 Tim. 4:16.

8-9. Wetin fisherman must know, and why?

⁸ For time of Jesus, when fisherman for Israel want catch fish, e need to know the kind fish wey e want catch. (Lev. 11:9-12) E still need to know the place wey e go fit see fish catch. Fish de normally stay for area wey the condition of the water dey good for them, and wey plenty food dey. The time wey fisherman go go catch fish still dey important. One missionary learn say no be everytime person fit see fish catch for water. This missionary de live for waterside. One day, one brother for the area tell the missionary say make they go catch fish. Then the missionary talk say, “I go come around nine o’clock tomorrow morning.” But the brother talk say, “You no understand. We de go river for time wey dey okay to see fish catch, no be time wey dey okay for us.”

⁹ For the same way, disciples of Jesus wey become fishers of men, go place wey people dey, and they go for time wey they go fit see people for the place. For example, disciples of Jesus preach for temple and for synagogue, from house to house and for market. (Acts 5:42; 17:17; 18:4) For the same way, make we learn more about the people for our territory. We go dey ready to change the way we don arrange our preaching. This one go help us know when to see people for our territory, and the place wey we go see them.​—1 Cor. 9:19-23.

10. Which tools Jehovah’s organization don give us?

¹⁰ Fisherman need to use the correct tools and e must know how to use them. For the same way, e good make we know the correct tools wey we need for our preaching work. And we go know how to use them too. Jesus tell e disciples how they go preach the good news. E tell them the things wey they no go carry, the place wey they go preach, and the things wey they go talk. (Matt. 10:5-7; Luke 10:1-11) Today, Jehovah’s organization don give us wetin we de call Teaching Toolbox, and the tools for inside the box de work well. * And the organization de teach us how to use this tools. The training wey we de receive de help us learn how to teach well, and help us make we no fear as we de preach.​—2 Tim. 2:15.

11. Why preachers of the good news need to get strong heart?

¹¹ Fishermen de get strong heart. Sometimes for sea, weather fit just change. Many times, them de work for night, and strong breeze with heavy rain fit just start. For the same way, preachers of the good news need to get strong heart. When we start to preach and tell people say we be Jehovah Witness, our family members fit begin give us trouble, our friends fit start to laugh us, and some people fit no want listen to us. All this problem just be like heavy rain with strong breeze. But this one no de surprise us. Jesus warn e disciples say, e go send them go preach to people wey go give them trouble.​—Matt. 10:16.

12. As e dey for Joshua 1:7-9, wetin fit help us learn how to get strong heart?

¹² So, how you fit make your heart strong? E good make you first believe say Jesus never stop to direct the preaching work from heaven. (John 16:33; Rev. 14:14-16) Another thing na say, do wetin go make you get more faith for the promise wey Jehovah make, say e go care for you. (Matt. 6:32-34) The more your faith de strong, the more your heart go de strong. Peter and e friends show say they get strong faith when they leave their fishing business to follow Jesus. For the same way, you don show say you get strong faith! You  tell your friends and family members say you don start to study Bible with Jehovah Witness people and de go their meeting. You go don change your character and plenty things for your life, so that you go fit do the things wey Jehovah talk. This thing wey you do still show say you get faith and strong heart. As you de make your heart strong, you fit dey sure say “Jehovah your God dey with you any place wey you go.”​—Read Joshua 1:7-9.

13. If you de think deep and de pray, how this one go help you get strong heart?

¹³ Which other thing you fit do to make your heart strong? Beg Jehovah make e give you strong heart. (Acts 4:29, 31) Jehovah go answer your prayer and e no go ever stop to support you. E go always help you. You fit still think about how Jehovah don help people for Bible time. Still think about how God don help you when you get problems, and how e don give you the power to change some things for your life. True-true, the God wey help e people pass the Red Sea fit still help you become disciple of Jesus. (Ex. 14:13) Continue to get faith for Jehovah like the person wey talk for book of Psalms say: “Jehovah dey for my side; I no go fear. Wetin person fit do to me?”​—Ps. 118:6.

14. Wetin you learn from the example of Masae and Tomoyo?

¹⁴ E good make we learn about how Jehovah don help people wey de shame. This one na another way to help us get strong heart. Make we talk about the example of one sister wey e name na Masae. The sister de shame and e feel say e no go ever fit do the preaching work. E feel say to talk to strangers no dey easy at all. The situation just be like when person de try to climb wall wey really high. And so the sister think say e no go fit ever preach to people. So e do everything wey e fit do so that e love for God and e neighbor go strong more-more. The sister still sofri think about why e dey important to preach now and pray for the power to preach. The sister stop to fear and e don even serve as regular pioneer. Jehovah fit still help new publishers make their “heart really strong.” Make we talk about the example of one sister wey e name na Tomoyo. When e start to preach from house to house, the first person wey e meet shout say: “I no want talk to Jehovah Witness people!” Then the person close the door with force. But Tomoyo no fear, e just tell e partner say: “You hear wetin the woman talk? I no talk anything, e just know say I be Jehovah Witness. I really happy!” Now, Tomoyo de serve as regular pioneer.

15. Wetin person wey sabi control e self de fit do, and why this one dey important for Christians?

¹⁵ Fishermen de succeed for their work when they sabi control theirself and de work hard. Person wey sabi control e self go fit make e self do things wey e suppose do. Fishermen de try their best to wake up early, they no go go house until they finish their work, and they no de tire even with bad weather. For the same way, if we want continue for the preaching work and finish-am, we need to try our best to do the things wey we suppose do.​—Matt. 10:22.

16. How we fit learn to control ourself?

¹⁶ Person no de sabi control e self from belle. Normally, if we say make we follow our body, na so-so easy life we go de find. But, we need to control ourself to do the things wey we suppose do. So we need help, so that we go fit train ourself to do  the things wey fit hard for us to do. Jehovah de use e holy spirit give us the help wey we need.​—Gal. 5:22, 23.

17. As e dey for 1 Corinthians 9:25-27, wetin apostle Paul talk say help-am to do wetin dey right?

¹⁷ Apostle Paul na person wey sabi control e self. But e talk say, e “train” e body so that e go fit do wetin dey right. (Read 1 Corinthians 9:25-27.) E encourage other people to control theirself and do everything for the “right way” and make the things “arrange well.” (1 Cor. 14:40) We must work hard to continue to worship Jehovah. And part of the things wey we de do to worship Jehovah na to always preach and teach people the good news.​—Acts 2:46.

18. Wetin go make Jehovah see us as people wey de do well?

¹⁸ When fisherman de catch plenty fish, e go know say e business de move. But our preaching work no be like that. No be by how many people we help to become Jehovah Witness de show say we de do well. (Luke 8:11-15) If we continue to preach and teach people the good news, Jehovah go see us as people wey de do well. Why we talk so? Na because we de obey Jehovah and Jesus Christ.​—Mark 13:10; Acts 5:28, 29.

19-20. Which special reason we get to preach now?

¹⁹ For some country, no be everytime them de allow fishermen to catch fish for water, na only for some months. So for that kind place, fisherman fit see-am say e need to do more, especially as the fishing season don de end. Na so e still be for preachers of the good news. We get more reason to preach now, as the end of this wicked world don near! The time wey remain to preach this good news wey de save life, really dey small. Make you no waste time or think say you need to wait for the best time to join do this work.​—Eccl. 11:4.

²⁰ Na now you need to know why you suppose preach more, try to study Bible more, learn to get strong heart, and de control yourself. Join more than eight million brothers and sisters wey de preach the good news, and enjoy better-better blessing from Jehovah. (Neh. 8:10) Make-up your mind say you go do your best for the preaching and teaching work, and continue for the work until the work finish. The next article go talk about three things wey fit help us continue to preach.