1. მუ მოწვევა უკეთ იესოქ ოთხ მეჩხომეს დო მუნერ რეაქცია უღდეს თინეფს?

მოციქულეფ, პეტრე, ანდრია, იაკობ დო იოანეშ სამუშა ჩხომიშ ჭოფუა რდუ. წერმიდგინით, მუჭო გუკვირდუდეს თინეფს იესოშ მოწვევაშ მორჩქილაფა: „მოლმაჸუნით დო ადამიანეფიშ მებადურეფო გინგოშქვანთ“. * მუნერ რეაქცია უღდეს თინეფს? ბიბლიას ჭარჷ: „თინეფქ ხეთეშე ქიდიტუეს ბადეეფ დო ქეკაჸუნეს“ (მათ. 4:18—22). თე გადაწყვეტილება თინეფიშ ცხოვრებას სამუდამოთ დოთირანდჷ. ჩხომეფიშ მანგიორო თინეფ „ცოცხალ ადამიანეფს [ოჭოფუნდეს]“ (ლუკ. 5:10). ამდღა იესო იგივეს ურაგად ალალგურიშ ადამიანეფს, მიდგას უჸორა ჭეშმარიტება (მათ. 28:19, 20). მიღითო იესოშ მოწვევა, გინირთათ ადამიანეფიშ მებადურეფო?

2. მუშენ ოკო დეფიფქრათ სერიოზულო ადამიანეფიშ მებადურო გინორთაშენ დო მუ მიმეხვარებნა თე ნაბიჯიშ გინოდგუმას?

² შილებე მუსხირენ დროქ გემკორთჷ, მუთ ბიბლიას გურაფლენთ დო უკვე მუდგარენეფ დოთირეთ თქვან ცხოვრებას, მარა ასე გინაჭყვიდირალ გაფნა, ქუგოკონა დო ვარ გინირთათ სახიოლო ამბეშ მაქადაგებელო. იესოშ თე მოწვევაშ მეღება ქოიჭირან-და, გურქ ვა გოიტირხან. თენა შილებე ოძირანდას, ნამდა თქვა გარჩქილენა, მუნერ მნიშვნელოვან გადაწყვეტილება რე თენა. მართალ რე, ბიბლიას ჭარჷ, ნამდა პეტრექ დო თიშ მეგობრეფქ „ხეთეშე“ მიოტეს მუნეფიშ ბადეეფ, მარა პეტრეს დო მუშ ჯიმას თე გადაწყვეტილება უდუფიქრებუო ვემუღებნა. თინეფქ სოდგარენ ამშვ თუთაშე მეტ ხანიშ წოხლე გეჩინებაფეს იესო დო მიღეს თინა, მუჭოთ მესია (იოან. 1:35—42). შილებე თქვა ხოლო უკვე ბრელ მუდგარენ გიჩქნა იეჰოვა დო  იესოშ გურშენ დო გოკონა, სულიერო წიმი ულა გაგრძელათ. მარა თე გადაწყვეტილებაშ მეღებაშახ ჯგირო ოკო დეფიქრათ. მუქ მეხვარ პეტრეს, ანდრიას დო შხვეფს გადაწყვეტილებაშ მეღებას?

3. ნამ თვისებეფ გაიმანგარენა თიშ სურვილს, ნამდა მიღათ იესოშ მოწვევა?

³ იესოშ პირველ მოციქულეფს უღდეს საქმეშ კეთებაშ სურვილ, საჭირო რჩქინა, გაბედულება დო თვითდისციპლინა. თე თვისებეფქ მეხვარ თინეფს, გინირთესკო ადამიანეფიშ ჯგირ მებადურეფო. თე სტატიას გუვარჩიენთ, მუჭო შეილებნა თე თვისებეფიშ გავითარება, ნამდა ქრისტეშ ჯგირ მოწაფეთ გინირთათ.

4. მუქ აღძრჷ პეტრე, ჸოფედკო მეჩხომე?

⁴ პეტრე ჩხომიშ ჭოფუათ ოჯახის ეიჯუმუანდჷ, მარა თე საქმე თიშო ხვალე სამუშა ვარდჷ. მუჭოთ იძირენ, პეტრეს უჸორდჷ ჩხომიშ ჭოფუა (იოან. 21:3, 9—15). მარა თიქ ადამიანეფიშ მებადურობა ხოლო ქიჸოროფუ დო იეჰოვაშ მოხვარათ თე საქმეს დახელოვნებურო გინირთჷ (საქ. 2:14, 41).

5. მუჭოთ ლუკაშ 5:8—11-შე იძირე, მუს ფიქრენდჷ პეტრე დო მუ მიგეხვარებნა, გიორჯგინათ თეცალ გრძნობეფს?

⁵ ჩქინ ქადაგებაშ მთავარ მიზეზ თინა რე, ნამდა მიჸორა იეჰოვა. შილებე მიმორჩქუნა, ნამდა თე საქმე ჯგირო ვეშმასრულებენა, მარა იეჰოვაშ მიმართ ჸოროფა მიმეხვარებნა, გივორჯგინათ თეცალ დამოკიდებულებას. მუჟამსით იესო პეტრეს ადამიანეფიშ მებადურო გინორთაშ გურშენ ეჩიებუდ, თეცალ მუდგარენ უწუ: „ვა გაშქურნას“ (წეკითხით ლუკაშ 5:8—11). პეტრეს ვაშქურუდ თიშა, მუქ შილებედ მაჸუნკო იესოშ მოწაფეთ გინორთას. თეს გეძინელ, თინა მანგარ გაკვირვებულ რდუ თით, ნამდა იესოქ სასწაულებრივო ბრელ ჩხომ ოჭოფაფუ თინეფს. ათეშენ მუშ დუდ უღირსო მიორჩქუდ იესოწკუმა თანამშრომლობაშო.  პეტრეცალო, შილებე თქვა ხოლო ნერვიანენდათ, მუჟამსით თიშე ფიქრენთ, მუს ნიშნენს ქრისტეშ მოწაფეთ გინორთა. თაშ ქორენ-და, უმოსო ქიჸოროფეთ იეჰოვა, იესო დო მოყვას. თენა მიგეხვარებნა, მიღათ იესოშ მოწვევა დო გინირთათ ადამიანეფიშ მებადურო (მათ. 22:37, 39; იოან. 14:15).

6. ხოლო მუ მიზეზეფიშ გურშენ ფქადაგენთ?

⁶ გუვარჩუათ ხოლო მუსხირენ მიზეზ, მუდგაშეთ ფქადაგენთ. ჩქი მოკონა, დევემორჩილათ იესოშ მითითებას: „მეუთ დო მოწაფეეფო მამზადით ხალხ“ (მათ. 28:19, 20). თეს გეძინელ, თიშენ ფქადაგენთ, ნამდა ხალხ „უჭყიშო შხურცალო ძალა გიშალიებურ დო მიკოცუმილ“ რე დო თინეფს სამეფოშ გურშენ ჭეშმარიტებაშ გურაფა ოსაჭირნა (მათ. 9:36). იეჰოვას ოკო, ნამდა არძანერ ადამიანქ მიღას ჭეშმარიტებაშ ზუსტ რჩქინა დო გინასქიდას (1 ტიმ. 2:4).

7. მუჭო იძირე რომაელეფიშ 10:13—15-ის, ნამდა ქადაგებაშ საქმე მნიშვნელოვან რე?

⁷ მუჟამსით დეფიფქრებუთ, მუ შედეგიქ შილებე მაჸუნას ქადაგებას, სურვილ მაღვენუნა, შევასრულათ თე სიცოცხლეშ მარსხებელ საქმე. მეჩხომე გიმოჩანს ვარდა ოჭკუმალო გიმირინუანს მუშ ნაჭოფა ჩხომს. მარა ჩქი თიშენ „ბჭოფუნთ“ ადამიანეფს, ნამდა გინვოსქილიდუათ თინეფ (წეკითხით რომაელეფიშ 10:13—15; 1 ტიმ. 4:16).

8, 9. მუ ოკო უჩქუდას მეჩხომეს დო მუშენ?

⁸ იესოშ დროს, ისრაელ მეჩხომეს უჩქუდ, მუნერ ჩხომქ შილებედ შეხვადკო ზღვას (ლევ. 11:9—12). თის თინა ხოლო უჩქუდ სო იჸუაფუდ ჩხომ. მუჭოთ წესინ, ჩხომ თიცალ წყარს სქიდუ, სოდეთ დუდის ჯგირო გინაფლენს დო ოჭკუმალ ხოლო ბრელ რე. ქოუღუნო მნიშვნელობა, მუჟამ ურს მეჩხომე ჩხომიშ ოჭოფშა? ართშა წყნარ ოკეანეს მახორუ ჯიმაქ, ართ მისიონერ ჯიმა ქუდაპატიჟ ოჩხომშა. თე მისიონერქ უწუ: „ჭუმან ოჭმარეს, ჩხორო საათშო ქეშეფხვადათ“. ადგილობრივ ჯიმაქ უპასუხ: „მუჭო გიგოხე, თე საქმე ვა ნორჩქვე. ოჩხომშა ჩქი მოკონან თიმწკუმა ვარინ, ჩხომს ოკონ თიმწკუმა მევურთ“.

⁹ თეშნერო, პირველ საუკუნეს ადამიანეფიშ მებადურეფ თი ადგილშა მიშეს, სოდეთ „ჩხომ“ იჸუაფუდ დო თი დროს, მუჟამსით შეიალებედეს თიშ ძირაფა. მაგალთო, იესოშ მიმაჸუნალეფ ქადაგენდეს ტაძარს დო სინაგოგეფს, კარდოკარ დო მოედანს (საქ. 5:42; 17:17; 18:4). ჩქი ხოლო მოკონა, მიჩქუდან, მუჟამ რე ჩქინ ტერიტორიას მახორუ ხალხ ჸუდეს ვარდა თი ადგილეფს, სოდეთ თინეფიშ ძირაფა შილებე. ჩქი მზათ ოკო ვორდათ, დოფთირუათ გეგმეფ, ნამდა იფქადაგათ თი ადგილს, სოდეთ ხალხ იჸუაფ დო თი დროს, მუჟამსით შემალებენა თინეფიშ ძირაფა (1 კორ. 9:19—23).

10. მუ საშვალებეფს მარზენა იეჰოვა მუშ ორგანიზაციაშ საშვალებათ?

¹⁰ მეჩხომეს ოკო უღდას საჭირო მონწყილობა დო ჯგირო უჩქუდას თიშ გიმორნაფა. ჩქი ხოლო მოსაჭირნა ქადაგებაშო აუცილებერ საშვალებეფ. ხვალე თენა ვარინ, ოკო მიჩქუდან თინეფიშ გიმორნაფა. იესოქ მუშ მოწაფეეფს პირდაპირ მითითებეფ მეჩჷ, მუჭო იქადაგესკო სახიოლო ამბე. თიქ უწუ, მუ იღესკო, სო იქადაგესკო დო მუ თქვისკო (მათ. 10:5—7; ლუკ. 10:1—11). ამდღა იეჰოვაშ ორგანიზაცია მარზენა ეფექტურ ოგურაფალ საშვალებეფს. * თეს გეძინელ, მოგურუანა, მუჭო გიმიბრინუათ თე საშვალებეფ. თე ირფელ მოხვარნა, უმოს თამამას იფქადაგათ დო უმოს ეფექტურ მასწავლებერეფო გინიფრთათ (2 ტიმ. 2:15).

11. მუშენ ოსაჭირნა ადამიანეფიშ მებადურეფს გაბედულება?

¹¹ მეჩხომეეფს გაბედულება ოსაჭირნა, მუშენდა ხშირას თინეფ სერით, უკმელას მეულა ჩხომიშ ოჭოფშა. მინშა შილებე, ველნან თეშ ზღვას ამინდიქ დითირას დო უცფას  ძალიერ ქარბორიაქ გეშალას. თინეფცალო ადამიანეფიშ მებადურეფს ხოლო გაბედულება ოსაჭირნა. მუჟამსით ადამიანეფიშ მებადურეფო გინიფრთუთ, ქადაგებას იბჭყანთ დო შხვეფს იეჰოვაშ მოწმეეფო ვოჩინებაფუანთ დუდის, შილებე ოჯახშე წინააღმდეგობაქ ქუმაშუან, ნაჩინებუეფქ ქუგმაძიცუან დო ხალხიქ ხოლო ვემირჩქილუას ცნობა, ნამდგას ფქადაგენთ. თე ირფელ შილებე „ძალიერ ქარბორიას“ მოგენდას. მარა თენა ვამკვენა, მუშენდა იესოქ გუმაფრთხილეს, ნამდა მუშ მიმაჸუნალეფს უტენდჷ ხალხშა, მით ქეწინააღმდეგებუდ თინეფს (მათ. 10:16).

12. იესო ნავეშ ძეშ 1:7—9-ს გეფთვალისწინენთ-და, მუ მიმეხვარებნა გაბედულებაშ გავითარებას?

¹² მუჭო შეილებნა გაბედულებაშ გავითარება? პირველ, დერწმუნით, ნამდა იესო ზეცაშე ამდღა ხოლო ხემძღვანელენს ქადაგებაშ საქმეს (იოან. 16:33; გამოცხ. 14:14—16). მაჟია, გემანგარით იეჰოვაშ დაპირებაშ რწმენა, ნამდა იზრუნენს თქვანდე (მათ. 6:32—34). მუთ უმოს ძალიერ რწმენა გაღვენუნა, თით უმოს გაბედულეფ იჸით. პეტრექ დო თიშ მეგობრეფქ ძალიერ რწმენა გიმირჩქინეს, მუჟამსით ირფელ ქიდიტეს, ნამდა იესოს ქეკაჸუნესკო. თეშნერო, თქვა ხოლო დიდ რწმენა გიმირჩქინით, მუჟამსით თქვან ნაჩინებუეფს დო ოჯახიშ წევრეფს ქუწით, ნამდა იეჰოვაშ მოწმეეფწკუმა ბიბლიაშ გურაფა დო თინეფიშ შეხვალამეფშა დასწრება დიჭყით! ალბათ, ბრელ მუდგარენ დოთირეთ თქვან საქციელს დო ცხოვრებაშ წესის, მუშენდა იეჰოვაშ სამართლიან ნორმეფით იცხოვრითკო. თე ირფელშო რწმენაქ დო გაბედულებაქ დეგესაჭირეს. გაბედულებაშ გავითარებას გაგრძელენთ-და, შეილებნა რჯერდან თე დუნაპირებუშ: „სოდგა  ვედენ, ირდიხას სქანწკუმა იჸუაფ იეჰოვა, სქან ღორონთ“ (წეკითხით იესო ნავეს ძეშ 1:7—9).

13. მუჭო მიგეხვარებნა გაბედულებაშ გავითარებას ლოცვა დო ფიქრ?

¹³ ხოლო მუჭო შეილებნა გაბედულებაშ გავითარება? ლოცვას ქოთხით ღორონთის გაბედულება (საქ. 4:29, 31). იეჰოვა აუცილებერო უპასუხენს თქვან ლოცვას დო დღას ვემგოტენა! თინა ირიათო მზათ რე, ქელაიდირთან. თეს გეძინელ, შეილებნა დეფიქრათ, მუჭო დეცვჷ იეჰოვაქ შხვეფ ულირ დროს. თიშე ხოლო დეფიქრით, მუჭო მიგეხვარეს თიქ, გიორჯგინითკო სირთულეეფს დო მუჭო გუგამანგარეს, ნამდა დოთირეთკო ცხოვრებაშ წეს. დარწმუნებულ რდათ, ნამდა თის, მიდგაქ მუშ ხალხის ჭითა ზღვა გინაკვათაფუ, შეულებ თქვა ხოლო მიგეხვარან, იესოშ მოწაფეთ გინირთათ (გამ. 14:13). თიცალ რწმენა გიღდან, მუნერით ფსალმუნმაბირეს უღუდ, თიქ თქუ: „იეჰოვა ელამრე, ვა მაშქურნე. მუ აღოლე კოჩის ჩქიმდა?“ (ფსალმ. 118:6).

14. მუშ გურაფა შეილებნა მასაიშ დო ტომოიოშ შემთხვევეფშე?

¹⁴ გაბედულებაშ გავითარებაშ ხოლო ართ საშვალება თიშ გაგება რე, მუჭო მეხვარ იეჰოვაქ მორდებუან კათას, გინირთესკო გაბედულეფო. გუვარჩუათ ართ დაშ, მასაიშ შემთხვევა. თინა მორდებუან რდუ დო ფიქრენდჷ, ნამდა შხვეფწკუმა მუშ რწმენაშე ჩიება დღას ვეშიალებედ. თიშო უჩინებუეფწკუმა რაგად მაღალ კიდალაშ გინულაცალ რდუ დო მიორჩქუდ, ნამდა თენა დღას ვაკეთებედ. ათეშენ, თიქ განსაკუთრებულ მონდომა გიმირჩქინ, ნამდა უმოსო ქიჸოროფუკო იეჰოვა დო მოყვას. თე დაქ ყურადღება თიშა გეგნიღ, მუ მნიშვნელოვან დროს ფცხოვრენთ დო იეჰოვას ლოცვას ქოთხუ მოხვარა, ნამდა ქადაგებაშ სურვილ გუმანგარკო. შედეგო, გიორჯგინ შიშის დო ხვალე თენა ვარინ, სრულ დროთ პიონერო ხოლო მსახურენდჷ. იეჰოვას შეულებ, ახალ მაუწყებელეფს ხოლო მეხვარას გაბედულებაშ გიმორჩქინას. ქობძირათ ხოლო ართ დაშ, ტომოიოშ, შემთხვევა. მუჟამსით თიქ პირველო იდჷ კარდოკარ ოქადაგებშა, პირველ მობინადრექ გეუღვარუ: „მუთუნ საქმე ვა მიღჷ იეჰოვაშ მოწმეეფწკუმა!“ დო კარ ქიმურაგვინუ. ტომოიოქ გაბედულო უწუ მუშ პარტნიორს: „ქიგეგონიო მუ თქუნ? ხონარ ვეკომღალუნ თეშ ქიმეხვად, ნამდა იეჰოვაშ მოწმე ვორდჷ. თენა მანგარო მოხიოლ!“. ასე ტომოიო პიონერო მსახურენს.

15. მუ რე თვითდისციპლინა დო მუშენ რე თინა მნიშვნელოვან ქრისტიანეფშო?

¹⁵ ჯგირ მეჩხომეს თვითდისციპლინა უღჷ. თე სიტყვას თაშ ენწყუნა: „უნარ, სქან დუდის დანძალე თიშ კეთება, მუთ ოკეთებელ რე“. მეჩხომეს, ნამუთ ჩხომუათ ეიჯუმუანს დუდის, თვითდისციპლინა ოსაჭირ, ნამდა ოჭმარეს ადრე გედირთას დო გლახა ამინდ რდასინ ხოლო, გაგრძელას მუშობა. თეშნერო, ჩქი ხოლო მოსაჭირნა თვითდისციპლინა, ნამდა მიფთვინათ დო ბოლოშა ქიმიპჸუნათ ქადაგებაშ საქმე (მათ. 10:22).

16. მუჭო შემლებნა თვითდისციპლინაშ გავითარება?

¹⁶ თვითდისციპლინა დაბადებაშე ვა მიღნა დო ათეშენ, მიდრეკილეფ ვორეთ, ნამდა მარტივ შარა გიშებგორათ საქმეშ ოკეთებელო. თვითდისციპლინაშ გავითარებელო დუდშეკება რე საჭირო. ათეშენ, მოხვარა მოსაჭირნა, ნამდა ჩქინ დუდის თინა გუვოკეთებაფუათ, მუდგაშ კეთება შილებე მიჭირდან. თეშ კეთებას იეჰოვა მუშ წმინდა შურიშ საშვალებათ მოხვარნა (გალ. 5:22, 23).

17. მუჭოთ 1 კორინთელეფიშ 9:25—27-ის ჭარჷ, მუჭო ოცადუდ პავლე თვითდისციპლინაშ გავითარებას?

¹⁷ მოციქულ პავლეს თვითდისციპლინა უღუდ. მარა თიქ თქუ, ნამდა თიქ ოკო „დასაჯკო“ მუშ სხეულ, ნამდა სწორას ქიმიქცუკო (წეკითხით 1 კორინთელეფიშ 9:25—27). თინა ელუჩანდჷ შხვეფს, ნამდა თვითდისციპლინა ნოღვედესკო დო „ირფელ წესიერო  დო ორგანიზებულო“ გაკეთესკო (1 კორ. 14:40). ჩქი ხოლო მოსაჭირნა თვითდისციპლინა, ნამდა ვა ვოდინუათ ჯგირ სულიერ განრიგ, მუდგაშათ ქადაგება დო მოწაფეეფიშ მომზადებაშ საქმეს რეგულარულ მონაწილება ხოლო მიშურს (საქ. 2:46).

18. მუ შემთხვევას იპჸით იეჰოვაშ თოლს წარმატებულეფ?

¹⁸ მეჩხომეშ წარმატება თით იზიმუ, მუსხი ჩხომს ჭოფუნს. თეშ გინაწონს, ჩქინ წარმატება თიშა ვა რე დამოკიდებულ, მუსხი ადამიანს მიპჸუნანთ იეჰოვაშ ორგანიზაციაშა (ლუკ. 8:11—15). იეჰოვაშ თოლს წარმატებულეფ თიმწკუმა იპჸით, მუჟამსით ქადაგება დო გურაფაშ საქმეს მოთვინებათ გუვაგრძელენთ. მუშენ იფჩიებუთ თეს? მუშენდა თეშნერო ჩქი ვომორჩილუთ იეჰოვას დო იესოს (მარ. 13:10; საქ. 5:28, 29).

19, 20. მუ განსაკუთრებულ მიზეზ მიღნა, ნამდა ვეგნობდვათ ქადაგება?

¹⁹ ნამთინე ქიანას ჩხომუა კონკრეტულ თუთეფს რე დაშვებულ. მუთ უმოს ხოლოს რე სეზონიშ კილუა, მეჩხომეეფ თით უმოს მეტ მონდომათ ასრულენა თე საქმეს. ჩქი, ადამიანეფიშ მებადურეფს, განსაკუთრებულ მიზეზ მიღნა, ნამდა ვეგნობდვათ ქადაგება — თე ქვეყნიერებაშ მოსპუალაშახ აკაბცხა მეძჷ! ათეშენ ჭიჭე დროქ დუმოსქიდეს, ნამდა მონაწილება მიბღათ თე სიცოცხლეშ მარსხებელ საქმეს. თაშ ნამდა, ვეგნოდვათ ქადაგება დო ვა უჯინათ თი დროს, მუჟამსით თქვან ცხოვრებას ირფელ იდეალურო იჸუაფ (ეკლ. 11:4).

²⁰ ასეშე ქიდიჭყით მოქმედება, ნამდა გემანგარათ ქადაგებაშ სურვილ, მიღათ უმოს მეტ რჩქინა ბიბლიაშე, გევითარათ გაბედულება დო თვითდისციპლინა. ქაკათით ბრუო მილიონშე მეტ „ადამიანეფიშ მებადურს“ დო თქვა ხოლო ქიგინანთ ხიოლს, ნამდგას იეჰოვა მარზენა (ნეემ. 8:10). გინოჭყვიდილ გაფდან, სრულას მიღათ მონაწილება ქადაგებაშ საქმეს, ონდო იეჰოვა თქუანს, ნამდა საქმექ შისრულ. ანწიან სტატიას გუვარჩიენთ სუმ საშვალებას, ნამუთ მიმეხვარებნა, ხოლო უმოსო მაფდან გინოჭყვიდილ, გუვაგრძელათ ქადაგებაშ საქმეს მონაწილება.