1. Ana Yesu jwasalile chichi achalume mcheche ŵakuwulaga somba? Ana jemanjaji ŵajanjile kuti wuli?

PETULO, Andileya, Yakobo soni ŵane ŵakamulaga masengo gakuwulaga somba. Agambe ganisya mwaŵapikanile jemanjaji paŵampikene Yesu ali mkwasalila kuti, “Myiche, munguye une nipo tinamjiganye kuŵa ŵakwajigalila ŵandu kwa une.” * Ana jemanjaji ŵajanjile kuti wuli? Baibulo jikusasala kuti, “Papopo jemanjaji ŵalesile liboti lyawo ni ŵamkuyisye Yesu.” (Mat. 4:18-22) Yaŵasagwile kutendayi yakwayiye umi wawo wosope. Yaliji myoyo ligongo lyakuti mmalo mwakusosasosa somba, jemanjaji ŵatandite kusosasosa ŵandu ni ‘kwajigalilaga’ kwa Yesu. (Luk. 5:10) Masiku aganosoni Yesu akwaŵilanga ŵandu ŵakwete mitima jambone soni ŵakusanonyela usyesyene kuti akamule nawo masengoga. (Mat. 28:19, 20) Ana wawojo atandite kamula nawo masengoga?

2. Ligongo chichi tukusosekwa kuganisya kaje chenene mkanitutande kukamula nawo masengo gakulalichila? Ana chichi champaka chitukamuchisye kutenda yeleyi?

² Komboleka kuti alijiganyisye Baibulo kwa ndaŵi jelewu mwamti apano ayikene pakuti asagule kuŵa jwakulalichila ngani syambone. Nambo naga nganaŵe kutanda kamula nawo masengoga akawujila munyuma. Komboleka kuti akukayichila kamula masengoga ligongo akumanyilila kuti jili ngani jekulungwa. Yili yisyene kuti Baibulo jikusasala kuti Yesu paŵamŵilasile Petulo pampepe ni achimjakwe, jemanjajo ŵalesile makoka gawo ndaŵi jijojo. Nambope nganasagula kutenda yeleyi mwakupupuluma. Tukuŵecheta yeleyi ligongo lyakuti paliji pali pamasile miyesi 6 jemanjaji ali mkummanyilila Yesu soni ali ajitichisye kuti jwalakwe ali Mesiya. (Yoh. 1:35-42) Komboleka kuti wawojo alijiganyisye kala yejinji yakwamba Yehofa soni Yesu mwamti ali ŵakusachilila kupitilisyape kulimbisya unasi wawo ni Yehofa. Nambope akusosekwa kujiganichisya  chenene nganiji mkanaŵe kutanda kukamula nawo masengoga. Ana chichi chachamkamuchisye Petulo, Andileya soni ŵane kuti atande kukamula nawo masengo gakulalichila?

3. Ana ni ndamo syapi syampaka syakamuchisye kutanda kamula nawo masengo gakulalichila?

³ Ŵakulijiganya ŵandanda ŵa Yesu ŵaliji ŵakusachilila kukamula masengo. Jemanjaji ŵagamanyililaga chenene masengo gawo, ŵaliji ŵakulimba mtima soni ŵakulipeleka. Mwangakayichila, ndamo syelesi syakamuchisye kuti akamuleje chenene masengo gawo gakusosasosa ŵandu. Nganiji chijitukamuchisye kulola yampaka tutende kuti tukole ndamo syelesi. Yeleyi mpaka yitukamuchisyesoni kuŵa ŵakulijiganya ŵambone ŵa Klistu.

4. Ligongo chichi Petulo jwakamulaga masengo gakuwulaga somba?

⁴ Petulo jwakamulaga masengo gakuwulaga somba kuti alikamuchisyeje liŵasa lyakwe. Nambope jwalakwe jwakamulaga masengoga mnopemnope ligongo lyakuti ŵaganonyelaga. (Yoh. 21:3, 9-15) Jwalakwe ŵalijiganyisyesoni kuganonyela masengo gakulalichila. Yehofa ŵamkamuchisye Petulo mwamti ŵatandite kugakamula masengoga chenene.—Mase. 2:14, 41.

5. Mwakamulana ni Luka 5:8-11, ligongo chichi Petulo jwaliwonaga kuti ngakuŵajilwa kamula nawo masengo gakulalichila? Ana mpaka tumalane chamtuli ni nganisyo mpela syelesi?

⁵ Chakulinga chekulungwa chatukusakamulila masengo gakulalichila chili chakuti tukusamnonyela Yehofa. Kumnonyela Yehofaku kukusatukamuchisya kuti tukalikayichilaga. Yesu paŵamŵilasile Petulo kuti atande kukamula masengo gakusosasosa ŵandu, ŵamsalile kuti, “Mkajogopa.” (Aŵalanje Luka 5:8-11.) Petulo nganatendaga woga ni yindu yakasimene nayo ligongo lyakuŵa jwakulijiganya jwa Yesu. Mmalo mwakwe jwalakwe jwasimonjile mnope  ni yaŵatesile Yesu pakwakamuchisya kuti awulaje somba syejinji. Soni yeleyi yamtendekasisye kuliwona kuti ngakuŵajilwa kukamula masengo yimpepe ni Yesu. Kombolekasoni kuti wawojo akusalikayichila pakuganichisya yakusasosekwa mundu kutenda kuti aŵe jwakulijiganya jwa Klistu. Naga yili myoyo, tukwaŵenda kuti amnonyele mnope Yehofa, Yesu soni ŵandu ŵane. Yeleyi yichakamuchisya kuti atande kukamula nawo masengo gakusosasosa ŵanduga.—Mat. 22:37, 39; Yoh. 14:15.

6. Ana ni magongo gane gapi gagakusatutendekasya kuti tulalichileje?

⁶ Panasoni magongo gane gagakusatutendekasya kuti tulalichileje. Tukusalalichila pakusaka kupikanila lilamusi lya Yesu lyakuti, “Mjawule . . . mkajiganye ŵandu.” (Mat. 28:19, 20) Tukusalalichilasoni ligongo lyakuti ŵandu kuchilamboku ali ŵagwaguchegwaguche soni “ŵakusoŵa chikamuchisyo” mwamti ŵane mwa jemanjaji ali ŵakusachilila kulijiganya yakwamba Uchimwene. (Mat. 9:36) Yehofa akusasaka kuti ŵandu wosope awumanye chenene usyesyene ni kulupuka.—1 Tim. 2:4.

7. Ana lilemba lya Aloma 10:13-15 likusalosya chamtuli kuti masengo gakulalichila gali gakusosekwa mnope?

⁷ Masengo gakulalichila gali gakulupusya umi. Patukuganichisya yeleyi, mpaka tuŵe ŵakusachilila kugakamula mwakulimbichila. Mwakulekangana ni ŵandu ŵakusasosasosa somba ni chakulinga chakuti akasumisye kapena kulya, m’weji tukusasosasosa ŵandu pakusaka kuti tukulupusye umi wawo.—Aŵalanje Aloma 10:13-15; 1 Tim. 4:16.

8-9. Ana ŵakuwulaga somba akusosekwa kumanyilila chichi? Ligongo chichi akusosekwa kumanyilila yeleyi?

⁸ Mundaŵi ja Yesu, ŵakuwulaga somba ŵa Chiyisalaeli ŵasosekwaga kumanyilila mtundu wa somba syakusaka kuwulaga. (Lef. 11:9-12) Jemanjaji ŵasosekwagasoni kumanyilila kwampaka akasipate sombasi. Somba sikusanonyela kutama kumalo kwagali mesi gakuŵajilana ni sombasyo soni kumalo kwakuli yakulya yejinji. Ŵakuwulaga somba akusaganichisyagasoni ya ndaŵi jakwawula kukuwulaga somba. Pakwamba ya ndaŵi jakuwulajila somba, apikane yaŵaŵechete m’bale jwine jwa ku chilumba cha Pacific. M’baleju ŵamŵilasile m’mishonale jwine kuti ajawule yimpepe kukuwulaga somba. M’mishonalejo paŵaŵechete kuti chachimsimana m’balejo 9 koloko jakundaŵi, m’baleju jwatite, “Iyayi, ngatukusajawula ndaŵi jelejo. Tukusajawula pandaŵi jasikusasimanikwa somba, ngaŵaga pandaŵi jatukusaka m’wejo.”

⁹ Nombenawo ŵakulijiganya ŵa Yesu ŵa m’yaka 100 yandanda ŵajawulaga kukusosasosa ŵandu kumalo soni pandaŵi jaŵamanyililaga kuti chakasimane ŵanduwo. Jemanjaji ŵalalichilaga m’masunagogi, m’nyumba syakupopelela soni m’misika. (Mase. 5:42; 17:17; 18:4) M’wejisoni tukusosekwa kumanyilila ndaŵi soni malo gakusasimanikwa ŵandu ŵa mudela jetu. Patumanyilile yeleyi, tuŵeje ŵakoseka kuchenga kuti tukombole kwalalichila jemanjaji.—1 Akoli. 9:19-23.

10. Ana gulu ja Yehofa jitupele yida yapi?

¹⁰ Jwakuwulaga somba akusasosekwa kola yida yakuŵajilwa soni kumanyilila kakamulichisye masengo ka yidayo. M’wejisoni tukusosekwa kola yida yakwanila soni kumanyilila kakamulichisye masengo kakwe. Yesu jwasalile ŵakulijiganya ŵakwe mwampaka akamulile masengo gakulalichila. Jwasalile ŵakulijiganyawo yindu yakusosekwa kujigala, kwampaka akalalichile soni yampaka akaŵechete. (Mat. 10:5-7; Luk. 10:1-11) Masiku aganosoni gulu ja Yehofa jitupele yida yakamulichisya masengo pakwiganya, yayili yakamuchisya mnope. * Guluji jikusatujiganyasoni mwampaka tukamulichisye masengo yidayi. Majiganyoga gakusatukamuchisya kuti tukalikayichilaga soni kuti tukomboleje kwiganya chenene.—2 Tim. 2:15.

11. Ligongo chichi ŵakulijiganya ŵa Yesu akusosekwa kuŵa ŵakulimba mtima?

¹¹ Ŵandu ŵakuwulaga somba akusasosekwa kuŵa ŵakulimba mtima. Ndaŵi sine panyasa pakusatendekwa yindu yele jemanjaji nganayijembecheyaga. Pane jemanjaji akusakamula masengo gawo chilo soni ndaŵi sine akusasimana ni chimbungo chamachili. Nombenawo ŵandu ŵakusakamula masengo gakusosasosa ŵandu akusasosekwa kuŵa ŵakulimba mtima. Patutandite kamula masengo gakulalichila soni kulimanyikasya kuti tuli ŵa Mboni sya Yehofa, ŵandu ŵane mpaka atande kutusisya. Ŵanduŵa mpaka aŵe ŵamwiŵasa mwetu, achimjetu kapena ŵandu ŵakusakana utenga wetu. Yeleyitu mpaka yiŵe mpela chimbungo chamachili, nambo ngatukusosekwa kusimonga. Paja Yesu ŵasasile kuti ŵakulijiganya ŵakwe chachisimana ni ŵandu ŵakusisya.—Mat. 10:16.

12. Ana lilemba lya Yoswa 1:7-9, mpaka litukamuchisye chamtuli kuŵa ŵakulimba mtima?

¹² Ana mpaka atende chichi kuti aŵe ŵakulimba mtima? Chandanda akusosekwa kumanyilila kuti Yesu ni jwakulongolela masengo gakulalichilaga. (Yoh. 16:33; Chiw. 14:14-16) Chaŵili, akusosekwa kulupilila yaŵasasile Yehofa kuti chachasamalila wawojo. (Mat. 6:32-34) Mundu pakumkulupilila mnope Yehofa, ni pakusaŵasoni jwakulimba mtima. Petulo ni achimjakwe ŵalosisye kuti akwete chikulupi chamachili paŵalesile bisinesi jawo ni kutanda kumkuya Yesu. Wawojosoni ŵalosisye kuti akwete chikulupi chamachili paŵasalile achimjawo nambosoni ŵamwiŵasa mwawo kuti atandite kulijiganya Baibulo ni ŵa Mboni sya Yehofa soni kuti akusajawula  kumisongano jawo. Mwangakayichila ŵalesile kutenda yindu yine yaŵayinonyelaga mnope pakusaka kuti atende yindu mwakamulana ni malamusi ga Yehofa. Yosopeyi yakomboleche ligongo lya kumkulupilila Yehofa soni ligongo lya kulimba mtima kwawo. Yehofa ‘chachiŵa ni wawojo kulikose kwakwawula’ naga akupitilisyape kutenda yindu mwakulimba mtima.—Aŵalanje Yoswa 1:7-9.

13. Ana kupopela soni kuganichisya yaŵatesile Yehofa mpaka yakamuchisye wuli wawojo kuŵa ŵakulimba mtima?

¹³ Panasoni yindu yine yampaka yitukamuchisye kuti tuŵe ŵakulimba mtima. Amŵendeje Yehofa kuti ŵakamuchisye kuŵa ŵakulimba mtima. (Mase. 4:29, 31) Mwangakayichila Yehofa chachijanga mapopelo gawo soni ngasiŵaleka ata panandi. Jwalakwe akusaŵa jwakoseka kwakamuchisya ŵakutumichila ŵakwe. Aganichisyejesoni yaŵatesile Yehofa pakwakulupusya ŵakutumichila ŵakwe ŵakala. Akumbuchileje kuti Yehofa ŵakamuchisye ŵakutumichila ŵakala kumalana ni yakusawusya yawo. Aganichisyesoni yatite Yehofa pakwakamuchisya wawojo kumalana ni yakusawusya yawo soni kwapa machili kuti akombole kuchenga yindu yine paumi wawo. Yehofa jwele ŵakulupwisye ŵandu panyasa jechejewu chachakamuchisyasoni wawojo kuti aŵe jwakulijiganya jwa Klistu. (Eks. 14:13) Myoyo akusosekwa kupitilisyape kola chikulupi mpela chaŵakwete jwamasalimo juŵatite, “Ambuje pakutama kumbali jangu ngangusajogopa, ana mundu mpaka andende chichi?”—Sal. 118:6.

14. Ana tukulijiganya chichi pa chisyasyo cha Mlongo Masae soni Tomoyo?

¹⁴ Chindu chine champaka chitukamuchisye kuŵa ŵakulimba mtima chili kulola yatite Yehofa pakwakamuchisya ŵandu ŵele mwachipagwa ŵaliji ŵasooni, nambo kaneko ŵalijiganyisye kuŵa ŵakulimba mtima. Aganichisye ya Mlongo Masae. Jwalakwe jwaliji jwasooni soni ŵayiwonaga kuti nganaŵa akombwele kulalichila. Kuŵechetana ni ŵandu ŵangakwamanyilila ŵakuwonaga kuŵa kwakusawusya mpela kwela litumbi lyelewu. Nambo kaneko jwatandite kumnonyela mnope Mlungu soni ŵandu. Jwalakwe ŵakuweni kusosekwa kwakamula masengoga mwachitema. Pambesi pakwe mlongoju ŵakombwele kumalana ni sooni sila, mwamti ŵatandite upayiniya wakutamilichika. Yehofa mpaka ŵakamuchisyesoni ŵakulalichila ŵasambano kuti “aŵe ŵakulimba mtima.” Aganichisyesoni yaŵasimene nayo mlongo Tomoyo. Paŵatandite kulalichila, panyumba jandanda ŵasimene ni mundu jwaukali mnope juŵaŵechete kuti, “Ngangusaka kum’wona jwa Mboni sya Yehofa pamlango pano!” Kaneko mundujo jwajinjile mnyumba ni kuwugala litanga mwawukali mnope. Mwakulimba mtima Tomoyo ŵamsalile mjakwe juŵaliji najojo kuti, “Ana mumpikene mundu jula? Une ngusimonga kuti pangali chatuŵechete, nambo ayichile kutumanyilila kuti tuli ŵa Mboni? Yeleyi yisangalesye!” Patukuŵecheta pano Tomoyo ali mpayiniya jwakutamilichika.

15. Ligongo chichi Aklistu akusosekwa kuŵa ŵakulipeleka?

¹⁵ Ŵandu ŵakusakamula masengo gakuwulaga somba akusatenda yiliyose yampaka akombole kuti akamule masengo basi. Jemanjaji akusajimuka kumasikusiku, akusatanda masengo gawo mpaka kugamalisya soni ndaŵi sine akusasosekwa kupilila nyengo syakusawusya. M’wejisoni tukusosekwa kuŵa ŵakulipeleka kuti tukombole kukamula masengo gakulalichila.—Mat. 10:22.

16. Ana chichi champaka chitukamuchisye kuti tuŵe ŵakulipeleka patukukamula masengo?

¹⁶ Ŵanduwe ngatukusapagwa tuli tukwete mtima wakusachilila kukamula masengo mwakulimbichila. Yili myoyo, ligongo tukusanonyela kukamula masengo gagali gangasawusya. Nambope ndaŵi syejinji masengo gagali gakusosekwa mnope gakusaŵaga gakusawusya. Myoyo tukusosekwa kuŵa ŵakulipeleka. Nambotu  tukusasosechela chikamuchisyo kuti tukombole kutenda yeleyi. Yehofa akusatupa chikamuchisyochi kupitila mwamsimu wakwe weswela.—Aga. 5:22, 23.

17. Ana lilemba lya 1 Akolinto 9:25-27, likusasala kuti Paulo jwatesile chichi kuti aŵe jwakulipeleka?

¹⁷ Ndumetume Paulo jwaliji jwakulipeleka mnope pa masengo gakwe. Nambope jwalakwe jwasasile kuti jwasosekwaga “kuchilamulila” chilu chakwe kuti akomboleje kutenda yayili yambone. (Aŵalanje 1 Akolinto 9:25-27.) Jwalakwe jwalimbikasisye ŵane kuti aŵeje ŵakulipeleka soni kuti atendeje yindu “mwakulongosoka.” (1 Akoli. 14:40) M’wejisoni tukusosekwa kuŵa ŵakulipeleka kuti tuŵe paunasi wambone ni Yehofa soni kuti tukombole kukamula nawo masengo gakulalichila ngani syambone.—Mase. 2:46.

18. Ana Yehofa akusayiwona kuti yindu yikutujendela naga tukutenda chichi?

¹⁸ Ŵandu ŵakusawulaga somba akusayiwona kuti yikwajendela naga akuwulaga somba syejinji. Mwakulekangana ni jemanjaji, m’weji ngatukusayiwona kuti yikutujendela pakujigalila winji wa ŵandu ŵatwakamuchisye kuti ajinjile m’gulu ja Yehofa. (Luk. 8:11-15) Yehofa akusayiwona kuti yindu yikutujendela chenene naga tukupilila patukukamula masengo gakulalichila soni kwajiganya ŵandu. Patukupilila yikusalosya kuti tuli ŵakulupichika kwa Yehofajo soni mwanache jwakwe.—Maliko 13:10; Mase. 5:28, 29.

19-20. Ana ligongo chichi tukusosekwa kulimbichila kukamula masengo gakulalichila mnopemnope apano?

¹⁹ Mu yilambo yine boma jikusakunda kuti ŵandu awulajeje somba pa miyesi jakuŵalanjikape. M’yilambo mpela yeleyi, ŵakuwulaga somba akusakamula masengo gawo mwakulimbichila pakuyiwona kuti ndaŵi jakuwulajila somba jikwawula kumbesi. M’wejisoni tukusosekwa kukamula masengo gakulalichilaga mwachitema, soni tukaliŵalila kuti mbesi ja chilambochi jisigele panandi. Ndaŵi jakuti tukamule masengo gakulupusya umiga, jinandipe. Atande kukamula nawo masengoga apano mmalo mwakwembecheya kuti yindu yiŵe chenene paumi wawo.—Jwak. 11:4.

²⁰ Tukwaŵenda kuti atande apanopano kuŵa ŵakusachilila kukamula masengo gakulalichila. Alijiganyejesoni Baibulo kuti ajimanyilile chenene. Tukwaŵendasoni kuti aŵe ŵakulimba mtima soni ŵakulipeleka pamasengo. Mpaka aŵe ŵakusangalala mnope naga akukamula nawo masengo gakulalichilaga, gagakukamulidwa ni ŵandu ŵakupunda 8 miliyoni. (Neh. 8:10) Aŵe ŵakusachilila kukamula nawo masengoga mpaka kumbesi. Mungani jakuyichisya tuchikambilana yindu yitatu yampaka yitukamuchisye kuti tupitilisyepe kukamula masengo gakulalichila.