1. Mbi Yesu kakamba minlobi minna baba mu ndeku ḿbu? Ayi mbi bawu bavanga?

MIMVUALA mi Yesu, Petelo, Andele, Yakobi ayi Yoane, baba minlobi mi zifu. Yindul’abu buidi bawu babela mu thangu Yesu kaba kamba: ‘Ndandakananu, ayi minu yinkuiza mu kitula minlobi mi batu.’ * Mbi bawu bavanga? Kibibila kintuba ti: ‘Muna thangu beni, bawu babika makondi mawu ayi banlandakana.’ (Matai 4:18-22) Makani amomo babaka mabalula luzingu luawu loso. Kibila tona mu kilumbu beni, bawu babika kuba minlobi mi zifu vayi bayiza ba ‘Minlobi mi batu.’ (Luka 5:10, tala nota.) Bubu, Yesu mvandi widi mu kutumisa batu boso banzolanga kiedika muingi baba minlobi mi batu. (Matai 28:19, 20) Ngie, makikinina lutumu alolo?

2. Kibila mbi fueti yindudila buboti makani ma kuba nlandikini wu Yesu? Ayi mbi biala kusadisa kubaka makani beni?

² Ḿba vama vioka mua thangu, tona ngie wutona kulonguka Kibibila. Ayi ḿba widi makani ma kuba nsamuni wu zitsangu zimboti. Vayi boti ngie boma wummona kuvitika lutumu lu Yesu lu kuba nlobi wu batu, buna bika kuba kiunda. Kibila mawu mammonisa ti ngie zebi nkinza wu makani tidi kubaka. Kheti Kibibila kintuba ti Petelo ayi baboso baba salanga yandi babika ‘makondi mawu muna thangu ,’ vayi mawu masinsundula ko ti bawu basa fiongunina ko makani mawu buboti. Kibila vavioka zingonda zisambanu tona bawu bazaba Yesu ayi bakikinina ti nandi Mesiya. (Yoane 1:35-42) Bobuawu mvandi, ḿba ngie malonguka mawombo, matedi Yave ayi Yesu. Ayi tidi kutatamana kukonzuka mu kiphevi. Vayi ngie wulendi fika  baka ko makani amomo mu khambu theti fiongunina mawu buboti. Vayi mbi bisadisa Petelo, Andele ayi bankaka kubaka makani amomo?

3. Zikhadulu mbi ziala kusadisa kukikinina lutumu lu Yesu?

³ Minlandikini mitheti mi Yesu, bazaba nkinza kisalu baba tumisina. Diawu batomba kuzaba kiawu buboti, bakuna kibakala ayi kukiyala muingi babika kuvuvuka. Bukiedika, zikhadulu aziozio zi basadisa kuba minlobi mimboti mi batu. Diawu mu dilongi adidi, tuemmona buidi wulenda kunina zikhadulu aziozio, muingi kuba nsamuni wumboti wu Klisto.

4. Mbi bisadisa mvuala Petelo kupisuka mu kisalu ki kulonga bankaka?

⁴ Mvuala Petelo kabasa vanganga ko to kisalu ki kuloba muingi kuzingisila dikanda diandi. Vayi nandi waba zolanga kuvanga kiawu. (Yoane 21:3, 9-15) Mvandi wulonguka kuzola kisalu ki kusadisa bankaka baba minlonguki mi Yesu. Ayi mu lusalusu lu Yave, mvuala Petelo wuyiza pisuka mu kisalu beni.—Mavanga 2:14, 41.

5. Dedi bummonisina Luka 5:8-11, kibila mbi mvuala Petelo kabela boma ayi mbi bilenda tusadisa mvitu kununga mabanza amomo?

⁵ Luzolo tuidi mu Yave, kiawu kibila kilutidi nkinza tunsamuninanga. Ayi luawu lu tuvanganga tununga kulonga bankaka matedi nandi, kheti tukimona ti tuisi ko bafuana muingi kuvanga kisalu beni. Bo Yesu katumisa mvuala Petelo muingi kaba nlobi wu batu, nandi wunkamba: “Bika kumona boma.” (Tanga Luka 5:8-11.) Mvuala Petelo kasa tatamana ko kuyindula mambu maphasi malenda kummonikina na kuba nlandikini wu Yesu. Nandi wuyituka beni mu mangitukulu kamona Yesu kuvanga, mu kuba sadisa  kubaka zifu ziwombo. Mawu mavanga Petelo kuyindula ti kasa ba ko wufuana muingi kuba nlandikini wu Yesu. Dedi Petelo, ḿba ngie wulenda mona boma voti dibamu mu kuyindula mambu moso wunkuiza viokila mu kuba nlandikini wu Yesu. Boti mawu mayindu widi, buna tomba kukindisa luzolo widi mu Yave, mu Yesu ayi mu batu boso. Ngie kuvanga mawu, wala ba phuila yi kuvitika kuba nlandikini wu Yesu.—Matai 22:37, 39; Yoane 14:15.

6. Bibila mbi bitatu, bi tuvanganga kusamuna?

⁶ Tala bibila binkaka bi tuvanganga kusamuna. (1)-Tutidi kutumukina lutumu lu Yesu lu ‘kuvanga minlonguki.’ (Matai 28:19, 20) Kibila (2)-kiadi tummona batu badi mu nza, kibila badi ‘kiunda ayi bavonga’ ayi batidi beni kulonguka kiedika kitedi Kintinu ki Nzambi. (Matai 9:36) Kibila (3)-Yave wuntomba batu boso bavuka ayi babaka nzayilu yi kiedika.—1 Timoteo 2:4.

7. Buidi Loma 10:13-15, yimmonisina nkinza kisalu kitu ki kusamuna kidi?

⁷ Befu kuyindula ndandu batu bambankanga mu kisalu kitu tumvanganga, tunkuiza luta ba phuila yi kusamuna. Kisalu kitu ki kusamuna disuasana kidi na minlobi. Befu tunsamuninanga muingi “kuvukisa batu”. Vayi minlobi mi zifu banlobalanga, muingi babaka bi kudia voti bi kusumbisa.—Tanga Loma 10:13-15; 1 Timoteo 4:16.

8-9. Mbi nlobi kafueti vanga ayi kibila mbi?

⁸ Mu bilumbu bi Yesu, vaba tombuluanga nlobi musi Isaeli kuzaba ntindu mbi zifu nandi katidi kuloba. (Levitiku 11:9-12) Amomo mammonisa ti nlobi waba solanga kibuangu kafueti lobila muingi kafika baka ntindu zifu kantomba. Kibila zifu mvawu bansolanga kibuangu kidi kifuana mu bawu ayi balenda fika bakila bidia. Bukiedika ti thangu nlobi kansola muingi kukuenda kue lobila, nkinza yidi? Mu matedi kiuvu akiokio, tala mambu khomb’itu mueka wunkalanga ku kiseki ki Pacífico katuba bo katumisa minsioni wunsadilanga kuna muingi benda beloba. Khomba widi mu kisalu ki minsioni wunkamba: “Kimba yono tuala dengana va meni mu kilokolo ki 9h00.” Vayi khomba beni wunkamba: “Ḿba ngie wusa visa ko. Tufueti kuenda mu thangu yidi yifuana muingi kuloba, kubika kuandi mu thangu yidi yifuana kuidi befu.”

⁹ Bobuawu mvandi, minlonguki mi Yesu mu sekulu yitheti, baba landakananga kifuani ki minlobi mu kukuenda mu bibuangu balenda fika muena batu muingi kuba longa. Dedi, bawu baba kuendanga kuelongila ku tempelo, mu zinzo zi lukutukunu, mu nzo ka nzo ayi mu mazandu. (Mavanga 5:42; 17:17; 18:4) Befu mvitu, buboti beni kutomba kuzaba thangu mbi batu va kizunga kitu bambelanga mu zinzo. Ayi kudedikisa thangu’itu muingi tubaka luaku lu kuba longila.—1 Kolinto 9:19-23.

10. Mbi kimvuka ki Yave kidi mu kuvanga bubu, muingi ku tusadisa mu kisalu ki kusamuna?

¹⁰ Dedi bo nlobi kantombilanga kuzaba buboti bisadulu ayi kusadila biawu mu phila yimboti muingi kabaka zifu, mvitu tufueti zaba buboti bilongulu bitu, muingi tubaka bu kuvangila buboti kisalu kitu. Yesu bo kafila minlandikini miandi mu kisalu ki kusamuna, nandi wuba vana zithuadusulu zisulama mu phila bafueti vangila kiawu. Wuba kamba mbi bafueti nata, kuidi bafueti kue samunina ayi mambu mbi bafueti tuba. (Matai 10:5-7; Luka 10:1-11) Bubu, kimvuka ki Yave kinkubikanga bilongulu biwombo muingi kulongila batu mu kisalu ki kusamuna. * Ayi befu tumbakanga  beni ndandu mu kusadila bilongulu beni kibila ba tukubikanga mu phila tufueti sadila biawu. Khubumunu ayoyi ba tuvananga, yi tusadisanga kuluta ba lufiatu mu thangu tunsamuna ayi kubuela pisuka mu kisalu beni.—2 Timoteo 2:15.

11. Kibila mbi minlobi mi batu voti minsamuni bafueti monisina kibakala?

¹¹ Minlobi mi zifu mintombuluanga beni kibakala. Kibila mbi? Kibila khumbu ziwombo bawu bansalanga va builu ayi bandengananga bivuka binneni ku khati ḿbu. Minlobi mi batu voti minsamuni, mvawu mintombuluanga kuba kibakala. Kibila mu thangu bantona kusamuna voti bankuiza zabakananga Zimbangi zi Yave, mvawu bandengananga zithotolo ziwombo bamfuanikisa buka bivuka. Dedi, kuvuezu va dikanda, kuidi bakundi ayi bankaka bammanganga kukuwa zitsangu bansamuna. Befu tuyitukanga ko bo mambu amomo mammonika, kibila Yesu wulubula ti minlandikini miandi bala viokila mu zithotolo.—Matai 10:16.

12. Dedi bummonisina Yosua 1:7-9, mbi bilenda ku tusadisa kukuna kibakala?

¹² Buidi wulenda kunina khadulu yi kibakala? Ditheti, mu kuba lufiatu ti Yesu, tona ku diyilu nandi widi mu kutuadisa kisalu ki kusamuna. (Yoane 16:33; Nzaikusu 14:14-16) Dimuadi, Yave wukanikisa ku kukieba, diawu kindisa lufiatu luaku mu mambu amomo Yave ka kukanikisa. (Matai 6:32-34) Bo kiminu kiaku kinluta ba kikinda, buawu mvandi wunluta bela kibakala. Petelo ayi batu baba  salanga yandi, bamonisa kiminu kingolo mu thangu babika kisalu kiaba kuba zingisanga muingi kulandakana Yesu. Bobuawu mvandi, ngie wumonisa kiminu kingolo mu thangu wuzabikisa kuidi basi dikanda, ti ngie matona kulonguka Kibibila ayi kulandakana zikhutukunu na Zimbangi zi Yave! Mvandi ḿba ngie wubika mambu mawombo muingi wubaka bu kuzingila mu zithumu zisonga zi Yave. Bo wuntatamana kukuna kiminu, ngie wulenda ba lufiatu ti ‘Yave Nzambi’aku, wela ba yaku voso kua wunkuenda.’—Tanga Yosua 1:7-9.

13. Buidi nsambu ayi kuyindulanga mu mambu Yave kama kuvangila malenda kusadisila kuba kibakala?

¹³ Phila mbi yinkaka ngie wulenda kunina kibakala? Dinda mu nsambu kuidi Yave, muingi ka kuvana kibakala. (Mavanga 4:29, 31) Yave wala tambudila minsambu miaku ayi kalasa ku kuekula ko. Nandi wala tatamana ku kuvana lusalusu. Mvandi, wulenda botula thangu muingi kuyindula mu phila Yave kasadisila bisadi biandi mu thangu yikhulu. Voti kuyindula phila ka kusadisila kununga zithotolo ayi kubalula nzingulu’aku. Bukiedika Yave wunkuiza kusadisa kuba nlandikini wu Klisto, dedi bo kasadisila dikabu diandi kuvioka mu ḿbu wubenga. (Esodu 14:13) Ba lufiatu nsoniki wu Minkunga kaba bo katuba: ‘Yave widi va khonzu’ami, yilendi mona ko boma. Buna mbi mutu kalenda kuphanga?’—Minkunga 118:6.

14. Mbi ngie belonguka mu kifuani ki Masae ayi Tomoyo?

¹⁴ Phila yinkaka tulenda kunina kibakala, yidi mu kuyindulanga buidi Yave kasadisila batu baba boma voti zitsoni kukuna khadulu beni. Tala kifuani ki khomb’itu mueka bantedilanga Masae. Nandi wuba beni zitsoni ayi waba yindulanga ti kalendi nunga ko kutedimina kimbangi kiminu kiandi va ntuala batu bankaka. Nandi waba banga beni boma mu thangu kaba yindulanga ti kafueti longa zitsangu zimboti kuidi batu kakhambu zaba. Vayi nandi wuvanga mangolo muingi kukindisa luzolo luandi mu Yave ayi kuidi batu baba kalanga yandi va nsengi. Nandi wuzaba ti tuidi mu kuzingila mu bilumbu bitsuka ayi kusamuna zitsangu zi Kintinu, didi diambu di nkinza. Diawu kasambidila kuidi Yave muingi kansadisa kubuela phuila yi kusamuna. Nandi wununga boma voti zitsoni kaba ayi bubu nandi widi ntuami ntuala. Yave mvandi kalenda sadisa minsamuni mimona kuba “kibakala.” Tala kifuani ki khomb’itu mueka bantedilanga Tomoyo. Mu kilumbu kitheti kabasika mu kisalu ki kusamuna, nandi wukokuta muela nzo yimueka. Ayi mfumu yi dikanda wubasika ayi wuntendukila: “Yisintomba ko kukoluka na Zimbangi zi Yave!” ayi wuzibika muelu. Tomoyo wukamba khomba wubasika yandi: “Yidi beni mayangi, kibila befu tusa tuba ko ni diambu vayi kheti bobo, nandi be zaba ti tuidi Zimbangi zi Yave!” Bubu, Tomoyo widi ntuami tuala.

15. Mbi binsundula kukiyala ayi kibila mbi khadulu ayoyi yididi nkinza kuidi baklisto?

¹⁵ Minlobi mikiedika mi zifu bazebi kukiyala. Kukiyala, kunsundula ‘kuzaba mambu malutidi nkinza ayi kuvanga mawu.’ Muingi babaka ndandu, diawu minlobi bankotukilanga meni meni. Ayi bantatamananga kuvanga kisalu beni kheti kilumbu kisi ko kimboti voti basimbaka ko zifu. Bobuawu mvandi, muingi tununga kuvanga kisalu ki kusamuna, vantombuluanga befu mvitu kukiyala.—Matai 10:22.

16. Buidi tulenda nungina kukuna khadulu yi kukiyala?

¹⁶ Befu tubutukanga ko na khadulu yi kukiyala. Diawu tummuenanga phasi khumbu zinkaka kutumamana zithumu. Vayi muingi  tununga kuvanga mawu, vantombuluanga kukuna khadulu ayoyi yi kukiyala. Ayi mu lusalusu lu phevi yinlongo yi Yave, befu tulenda nunga kukuna khadulu ayoyi.—Ngalatia 5:22, 23.

17. Buidi 1 Kolinto 9:25-27, yimmonisina ti mvuala Polo wuvanga mangolo muingi kukiyala?

¹⁷ Mvuala Polo waba zabanga kukiyala. Vayi nandi wutuba ti khumbu zinkaka, nandi waba nuananga nzingu muingi kuvanga mambu masulama. (Tanga 1 Kolinto 9:25-27.) Ayi nandi mvandi wukindisa bankaka bakuna khadulu beni, muingi mambu moso “mavangimina mu lukinzu ayi mukhambu divunza.” (1 Kolinto 14:40) Tufueti kuna khadulu yi kukiyala muingi kutatamana kusadila Yave ayi kutatamana kusamuna ayi kulonga zitsangu zimboti zi Kintinu.—Mavanga 2:46.

18. Mbi bimvanganga Yave ka tutadila minsamuni mimboti?

¹⁸ Nlobi wumboti bakunzabilanga mu thalu yi zifu kambaka. Vayi kisalu kitu ki kusamuna disuasana kidi, kibila ba kizongilanga ko mu thalu yi batu tunsadisa kuba Zimbangi zi Yave. (Luka 8:11-15) Befu tunzabikininanga ti tuidi minsamuni mimboti va meso ma Yave, bo tuntatamana kulonga ayi kusamuna zitsangu zimboti. Kibila mbi tuntubila abobo? Kibila kuvanga mawu, phila yi kutumukina Yave ayi Muan’andi Yesu.—Malako 13:10; Mavanga 5:28, 29.

19-20. Kibila mbi tufueti luta kukivanina mu kisalu ki kusamuna bubu?

¹⁹ Mu zitsi zinkaka, vadi zingonda ntinu katsikika minlobi bafueti vangila kisalu kiawu. Ayi boti zingonda beni ziambelama kumana, minlobi banluta kukivananga mu kisalu kiawu. Befu mvitu bo tuidi minlobi mi batu, tufueti luta kukivana mu kisalu ki kusamuna, kibila tsukulu yi nza ayiyi yima fikama. Ayi miela miwombo mi batu midi va kingela mifueti vuka. Diawu bika vingila theti mambu moso ma luzingu luaku maba mamboti bosi, wutona kuvanga kisalu ki kusamuna.—Mpovi 11:4.

²⁰ Diawu kindisa kiminu kiaku mu kubuela luzabu luaku mu mambu Kibibila kinlonga, mu kukuna khadulu yi kibakala ayi kukiyala. Mu nza yimvimba muidi kuvioka 8 di bivevi na bivevi di minsamuni. Tukudinda muingi mvaku wuba mu khati dingumba adiodio di minsamuni, muingi wumona mayangi madi mu kusadila Yave. (Nehemia 8:10) Diawu baka makani ma kutatamana kuvanga kisalu ki kusamuna nate naveka Yave kala tuba tubika kubue vanga kiawu. Mu dilongi dinkuiza, tuala tubila ziphila zitatu tulenda buedila phuil’itu yi kusamuna zitsangu zi Kintinu.