1. Aha do naung diulahon akka donganta borua di organisasi, alai masalah aha do na diadopi nasida? (Ida gambar sampul.)

MASSAI las do rohatta ala godang do donganta borua na kerja keras di huria. Uppamana, ringgas do nasida di parpunguan dohot di ulaon marbarita. Dohot do nasida mangarawat Bale Harajaon, jala parduli do nasida tu akka dongan na asing. Alai adong do masalah na diadopi nasida. Adong do na mangurus natua-tuana. Adong do na mangadopi tentangan sian keluarga. Jala adong do na gabe orang tua tunggal, na ikkon kerja keras lao mangurus ianakkonna.

2. Boasa ikkon tadukung akka donganta borua?

² Boasa ikkon tadukung akka donganta borua? Ala di portibi on, godang do akka halak na so mangargai akka borua. Alai di Bibel dijujui do hita asa mangurupi akka borua. Misalna, dipaboa Apostel Paulus do tu huria Rom asa dijakkon nasida si Poibe jala ‘dilehon nasida akka na rikkot di ibana’. (Rom 16:1, 2) Najolo, sahalak Parise do si Paulus. Dang diargai halak Parise akka borua. Alai dung gabe halak Kristen, ditiru si Paulus do Jesus na mangargai akka borua.​—1 Kor. 11:1.

3. Songon dia do Jesus maradoppon akka borua, tarlumobi akka borua na mangulahon lomo ni roha ni Debata?

³ Dang diargai pamimpin agama Jahudi akka borua, alai molo Jesus diargai ibana do akka borua. (Joh. 4:27) Sada referensi ni Bibel mandok, “Dang hea didok Jesus manang aha pe na mambahen lea akka borua.” Massai arga do di Jesus akka borua na mangulahon lomo ni roha ni Amana. Dianggap do nasida songon ibotona jala bagian sian keluargana.​—Mat. 12:50.

4. Aha do na lao taulas di artikel on?

⁴ Sai rade do Jesus mangurupi akka borua na manomba  Debata. Diargai ibana do akka borua i, jala dibela ibana do nasida. Taulas ma songon dia hita boi maniru Jesus tikki maradoppon akka donganta borua.

5. Boasa maol dihilala akka donganta borua marsaor dohot akka dongan di huria?

⁵ Porlu do hita sude marsaor dohot akka dongan di huria. Alai sipata maol do i diulahon akka borua. Boasa? Parrohahon ma akka pengalaman on. Donganta borua na margoar si Jenni * mandok, “Ala so marhasohotan dope au, maol do huattusi aha tugashu di huria. Jala huhilala hira na so bagian ni huria do au.” Si Kristin, sahalak perintis na pinda tu luat na asing mandok, “Tikki pinda hamu tu sada huria na baru, olo do kesepian hamu.” Akka donganta bawa pe olo do ra makkilala sisongon i. Akka donganta na asing makkilala, maol do rap tinggal dohot keluarga na so Sitindangi. Ala dang boi jonok tu keluargana, jala maol do tong dihilala nasida jonok tu akka dongan di huria. Adong do akka donganta borua na merasa kesepian ala marsahit jala dang boi kaluar sian jabu, manang ala mangurus keluarga na marsahit. I do na dihilala donganta si Anita. Didok ibana, “Dang boi au jotjot marsaor dohot akka dongan di huria, ala ikkon mangurus omakku do au.”

6. Songon na disurat di Lukas 10:38-42, songon dia do Jesus mangurupi si Marta dohot si Maria?

⁶ Olo do Jesus mangalehon tikkina marsaor dohot akka borua na manomba Debata di tikki i. Jala boi do nasida marale-ale tu Jesus. Parrohahon ma parale-aleon ni Jesus tu si Maria dohot si Marta, dua borua na so marhasohotan dope. (Jaha Lukas 10:38-42.) Ala burju do Jesus, gabe las ma roha ni si Marta dohot si Maria jonok tu ibana. Las do roha ni si Maria hundul di labbung ni pat ni Jesus songon sahalak sisean. * Jala si Marta pe dang mabiar paboahon aha na adong di rohana tu Jesus tikki dang diurupi si Maria ibana. Diurupi Jesus do nasida mandapot parsiajaran na rikkot di tikki i. Jala parduli do Jesus tu nasida, jotjot do dijuppangi Jesus nasida dohot ibotona, si Lasarus. (Joh. 12:1-3) I do alana tikki marsahit si Lasarus, pos do roha ni si Maria dohot si Marta na boi do Jesus mangurupi nasida.​—Joh. 11:3, 5.

7. Songon dia do hita boi patoguhon akka donganta borua?

⁷ Di parpunguan ma kesempatan ni akka donganta borua marsaor dohot akka dongan. Jadi tajakkon ma nasida di parpunguan, makkata-hatai ma hita dohot nasida, jala tapatudu ma na parduli do hita tu nasida. Donganta si Jenni na dipaboa nakkin mandok, “Las hian do rohakku tikki adong na mamuji komentarhu di parpunguan, tikki adong na manogihon au marbarita, jala tikki dipatudu nasida na parduli nasida tu au.” Jadi ikkon tapatudu do tu akka donganta borua na parduli do hita tu nasida. Donganta si Kia mandok, “Tikki dang ro au marpungu, pittor dihubungi akka dongan do au. Gabe huboto ma parduli do nasida tu au.”

8. Songon dia do hita boi maniru Jesus?

⁸ Talehon ma tikkinta asa boi marsaor dohot akka donganta borua songon na diulahon Jesus. Boi do tatogihon nasida rap mangan manang rap rekreasi. Tikki  marsaor dohot nasida, tapastihon ma aha na tahatai boi patoguhon nasida. (Rom 1:11, 12) Ikkon ditiru akka sintua do cara marpikkir ni Jesus. Memang diboto Jesus godang do tantangan ni akka halak na so marhasohotan. Alai takkas do muse dipaboa ibana, dang ikkon marhasohotan manang marianakkon asa boi marlas ni roha. (Luk. 11:27, 28) Jadi, boi do tadapot silas ni roha na sasittongna molo toktong tasomba Jahowa jala i do na rumikkot di ngolutta.​—Mat. 19:12.

9. Songon dia do akka sintua boi mangurupi akka donganta borua?

⁹ Ikkon dibahen akka sintua do akka donganta borua songon iboto manang omak ni nasida sandiri. (1 Tim. 5:1, 2) Porlu do dilehon akka sintua tikkina lao makkata-hatai dohot akka donganta borua, andorang manang dukkon sae parpunguan. Si Kristin mandok, “Diparrohahon akka sintua songon na sibuk do au, jadi disukkun nasida ma songon dia jadwalhu. Mandok mauliate do au, ala diparrohahon nasida do au.” Molo jotjot akka sintua makkata-hatai dohot akka donganta borua, patuduhon na parduli do nasida tu akka donganta borua. * Dihilala donganta si Anita do labana molo jotjot makkata-hatai dohot akka sintua. Didok ibana, “Lam hutanda ma nasida. Nasida pe lam  ditanda ma au. Jadi tikki adong masalah, dang segan be au mangido pangurupion ni nasida.”

10. Aha do na boi mambahen akka donganta borua marlas ni roha?

¹⁰ Las do rohatta molo diargai halak aha na taulahon. Alai olo do metmet rohatta molo dang adong na mangargai aha naung taulahon. Olo do sasahalak makkilala hira na so dianggap ibana. I ma na dihilala donganta perintis na margoar si Abigail. Didok ibana, “Dang takkas diboto halak ise au. Holan iboto ni si anu do au ditanda manang boru ni si anu. Hira na so adong do na mamparrohahon au.” Parrohahon ma muse pengalaman ni donganta borua na so marhasohotan, na margoar si Pam. Nungnga martaon-taon ibana gabe misionaris. Alai ujungna, ikkon mulak do ibana mangurus natua-tuana. Saonari umurna nungnga 70an jala torus do ibana merintis. Si Pam mandok, “Sai dipatogu do rohakku, ala huboto diargai akka dongan do aha na huulahon.”

11. Songon dia do Jesus patuduhon na diargai ibana do akka borua na makkobasi ibana?

¹¹ Diargai Jesus do akka borua na ‘mamakke arta ni nasida lao makkobasi Jesus’. (Luk. 8:1-3) Diloas do nasida makkobasi ibana. Alai dang holan i, dipaboa Jesus do tu nasida hasittongan taringot lomo ni roha ni Debata. Misalna, dipaboa Jesus do tu nasida lao mate nama ibana jala dipahehe muse. (Luk. 24:5-8) Dang holan siseanna na diparade Jesus mangadopi aha na lao masa, alai dohot do tong akka borua on. (Mrk. 9:30-32; 10:32-34) Lari do akka siseanna tikki ditakkup Jesus. Alai toktong do akka borua i mandongani Jesus sahat tu na lao mate Jesus di tiang.​—Mat. 26:56; Mrk. 15:40, 41.

12. Tugas aha do na dilehon Jesus tu akka borua?

¹² Dilehon Jesus do tugas na massai rikkot tu akka borua. Misalna, akka borua do na parjolo sahali mamboto molo Jesus nungnga dipahehe. Dipangido Jesus do asa dipaboa nasida tu akka apostel naung hehe ibana. (Mat. 28:5, 9, 10) Tikki Pentakosta taon 33 M, dohot do ra akka borua manjalo tondi parbadia songon sisean na asing. Gabe boi ma nasida makkatai di bahasa na asing, jala paboahon “taringot tu ulaon ni Debata na balga” tu akka halak.​—Ul. 1:14; 2:2-4, 11.

13. Aha do na diulahon akka donganta borua saonari, jala songon dia do hita mangargai nasida?

¹³ Tapuji do akka donganta borua di sude naung diulahon nasida tu Jahowa. Dohot do nasida mambangun jala mangarawat bangunan ni organisasi, mangurupi kelompok bahasa asing, jala gabe relawan di fasilitas Betel. Adong do muse na dohot mangurupi na hona bencana, menerjemahon publikasi, gabe perintis, manang gabe misionaris. Songon akka donganta bawa, boi do tong akka donganta borua dohot tu sikkola perintis, Singkola tu Parbarita Harajaon, dohot Singkola Gilead. Diurupi akka istri do tong suami ni nasida asa boi mangulahon tanggung jawab di huria dohot di organisasi. ‘Silehon-lehon’ do akka sintua on di huria jala godang do na diulahon nasida. Alai dang boi diulahon nasida i molo dang didukung istrina. (Eps. 4:8) Boi do didukung hamu akka donganta borua on?

14. Songon na didok di Psalmen 68:12, aha do na diulahon akka sintua na marbisuk?

¹⁴ Diboto sintua na marbisuk do, “torop situtu” do akka borua na malo marbarita na uli jala na rade mangurupi ulaon Harajaon. (Jaha Psalmen 68:12.) Jadi boi do akka sintua marsiajar sian  pengalaman ni nasida. Songon si Abigail na dipaboa nakkin, las do rohana tikki disukkun akka sintua cara ni ibana mamukka pakkataion tikki marbarita. Didok ibana, “Gabe pos ma rohakku dilehon Jahowa do tugas na rikkot tu au di organisasi on.” Diboto akka sintua do, donganta borua na matua pe boi do mangurupi donganta borua na poso tikki mangadopi masalah. (Tit. 2:3-5) Takkas ma, ikkon tahaholongi jala taargai do donganta borua!

15. Tikki sadihari do porlu taurupi akka donganta borua?

¹⁵ Tikki mangadopi situasi na maol, porlu do adong na mangurupi jala mambela akka donganta borua. (Jes. 1:17) Misalna, porlu do ra taurupi donganta borua na mabalu manang naung marsirang mangurus akka ulaon na biasana diulahon suamina. Porlu do ra tadongani sahalak donganta borua na matua tikki makkatai tu dokter. Porlu do ra tabela akka donganta borua molo adong na mangkritik nasida. Misalna, adong na mangkritik donganta borua perintis na mangurupi ulaon teokratis, ala dang jotjot ibana marbarita songon perintis na asing. Di situasi sisongon i, porlu do tabela donganta perintis i. Songon dia do muse boi taurupi akka donganta borua? Tatiru ma aha na diulahon Jesus.

16. Songon na dipaboa di Markus 14:3-9, songon dia do Jesus mambela si Maria?

¹⁶ Dibela Jesus do akka borua na setia molo adong na mangkritik nasida. Misalna, dibela Jesus do si Maria tikki dikritik si Marta. (Luk. 10:38-42) Jala tikki dikritik halak si Maria ala mangusehon miak na massai arga tu ulu ni Jesus, pittor dibela Jesus do ibana. (Jaha Markus 14:3-9.) Diattusi Jesus do boasa diulahon si Maria i. I do alana dipuji Jesus do si Maria. Didok ibana, “Ulaon na denggan do na binahenna i tu ahu. . . . Dibahen ibana do nasa na tarbahenna.” Gariada, disurirangkon Jesus do “manang didia pe barita na uli dibaritahon di liat portibi on”, botoon ni akka halak do haburjuon na binahen ni si Maria, songon na taulas saonari di artikel on. Tottu las do roha ni si Maria mambege i. Nang pe dikritik halak ibana dipapos Jesus do rohana, haburjuon na binahenna i gabe bagian sian barita na uli.

17. Paboa ma sada contoh sadihari do porlu tabela donganta borua.

¹⁷ Olo do hamu mambela akka donganta borua? Misalna, adong ma sahalak donganta borua na suamina dang Sitindangi. Jotjot do ibana tarlambat ro tu parpunguan jala pittor mulak dukkon sae parpunguan. Jarang do diboan ibana gellengna tu parpunguan. Diparrohahon akka dongan di huria nga sering ibana songon i, jadi dikritik nasida do ibana. Hape sasittongna, nga berupaya donganta borua i. Dang ibana na mangatur ulaonna sandiri, jala dang ibana na mambahen keputusan taringot tu gellengna. Jadi aha ma na boi diulahon hamu? Tapuji ma ibana jala tapaboa ma tu akka dongan, nungnga kerja keras donganta i saleleng on. Molo taulahon i, boi do gabe dang dikritik akka dongan be ibana.

18. Aha do na boi taulahon lao mangurupi akka donganta borua?

¹⁸ Tapatudu do na parduli hita tu akka donganta borua, molo rade hita mangurupi nasida, jala tarida do i sian pambahenatta. (1 Joh. 3:18) Si Anita na mangurus omakna na marsahit mandok, “Jotjot do akka dongan ro tu jabu manggattihon au satokkin mangurus omakku, asa boi hukarejohon ulaon na asing. Manang  diboan nasida do sipanganon tu hami. Gabe pos ma rohakku dihaholongi akka dongan do au.” Songon i do tong pakkilalaan ni si Jenni. Dipaboa sahalak donganta do tu ibana cara mangarawat mobilna. Didok ibana, “Las do rohakku ala parduli akka dongan tu au. Dipastihon nasida do asa sai aman au tikki mamboan mobil.”

19. Songon dia do muse akka sintua boi mangurupi akka donganta borua?

¹⁹ Sai diparrohahon akka sintua do aha na porlu di akka donganta borua. Ala diboto nasida diparrohahon Jahowa do songon dia caratta maradoppon akka donganta borua. (Jak. 1:27) Songon Jesus, ikkon masuk akkal do akka sintua. Ikkon diattusi nasida do situasina. Unang ma dibahen nasida aturan na kaku. (Mat. 15:22-28) Molo rade akka sintua mangurupi, gabe dihilala akka donganta borua ma na holong do roha ni Jahowa dohot organisasina tu nasida. Tikki diboto pengawas kelompok ni si Kia naeng pinda jabu nama ibana, pittor diurupi do ibana. Didok si Kia, “Gabe dang pola godang be na hupikkiri tikki na pinda i au. Ala dipatogu jala diurupi akka sintua au, huboto ma mararga do au di huria. Jala tikki adong situasi na maol, dang dipasombu nasida sahalakku mangadopi i.”

20-21. Songon dia do caratta patuduhon na taargai do sude akka donganta borua?

²⁰ Godang do akka donganta borua na kerja keras di huria. Jadi porlu do nasida taurupi. Songon naung taparsiajari sian Jesus, talehon ma tikkinta makkata-hatai dohot nasida. Jala marsitutu ma hita mananda nasida. Tapatudu ma na taargai do aha naung diulahon nasida tu Jahowa. Jala tikki adong situasi na maol tabela ma nasida.

²¹ Adong do sia halak borua Kristen na dipaboa si Paulus di ujung ni suratna tu halak Rom. (Rom 16:1, 3, 6, 12, 13, 15) Tikki dibege nasida salam dohot pujian ni si Paulus, dipatogu do roha ni nasida. Hita pe ikkon sai tadukung do sude akka donganta borua di huria. Molo taulahon i, tapatudu do na tahaholongi do nasida songon keluargatta sandiri.