1. How wi sistaz sopoat di aaganaizayshan, ahn weh chalenjiz som a dehn fays? (Koment pahn di picha pahn di kova.)

WI SOH hapi fi ga wahn lata haad-werkin sistaz eena di kangrigayshan! Dehn tek paat eena di meetin dehn, ahn dehn preech ahn teech di gud nyooz. Som help eena di mantaynans a di Kingdom Haal, ahn dehn shoa dat dehn kay bowt dehn bradaz ahn sistaz. Bot dis noh meen dat dehn noh ga no chalenjiz. Som a wi sistaz di tek kayr a dehn payrents weh op eena ayj. Adaz di stay faytful eevn doa famili membaz deh gens dehn. An adaz da singl payrents, hoo di werk haad fi provaid fi dehn chiljren.

2. Wai wi shuda chrai wi bes fi sopoat wi sistaz?

² Wai wi shuda sopoat wi sistaz? Bikaaz moas a di taim di werl noh chreet uman wid di rispek weh dehn dizerv. Pahn tap a dat, di Baibl inkorij wi fi sopoat wi sistaz. Fi egzampl, di apasl Paal mi aks di kangrigayshan da Roam fi welkom Feebi ahn “help ahn wid eniting weh ih wuda need.” (Roam. 16:1, 2) Memba dat Paal da-mi wahn Farisee, ahn soh hihn mi yoostu bilangz tu wahn groop weh mi bileev dat wahn uman mi loawa dan wahn man. Memba dat di Farisee dehn neva yoostu chreet uman wid rispek. Bot now, hihn da-mi wahn Kristyan, an ih mi-di fala Jeezas egzampl ahn chreet uman wid rispek ahn kainis.—1 Kor. 11:1.

3. How Jeezas mi chreet uman, ahn how hihn mi feel bowt di wan dehn hoo mi-di du di wil a Gaad?

³ Jeezas mi chreet aal uman wid rispek. (Jan 4:27) Hihn neva chreet dehn laik di Jooish rilijos leedaz bak den. In fak, wahn buk bowt Baibl hischri seh: “Jeezas neva seh eniting weh wuda disrispek uman.” Hihn mi ga lata rispek fi eni uman weh du di wil a fi hihn Faada. Hihn mi aalso kaal dehn fi hihn sista dehn, an ih mi menshan dehn lang wid di man dehn hoo hihn mi vyoo az ih famili.—Mach. 12:50.

4. Weh wi wahn diskos eena dis aatikl?

 ⁴ Jeezas mi aalwayz redi fi help ih spirichwal sistaz. Hihn mi apreeshiayt dehn ahn taak op fi dehn. Mek wi diskos how wi ku shoa kansidarayshan fi fi wee sistaz.

5. Wai da wahn chalenj fi mek som sistaz fain gud frenz?

⁵ Aala wi need gud frenz. Bot sohntaim, dis da wahn chalenj fi sohn sistaz. Wai? Noatis weh som sistaz seh. Wahn sista weh naym Jordan * seh: “Bikaaz Ai noh marid, moas a di taim Ah noh noa how fi help di kangrigayshan. Ah feel laik Ah noh fit een.” Wahn painyaa sista weh naym Kristen weh mi moov soh dat shee ku du moa eena di preechin werk seh: “Wen yu jos moov tu wahn kangrigayshan, yu mait feel loanli.” Som bradaz mait feel di saym way tu. Enibadi weh liv wid dehn famili hoo da noh Jehoava Witnisiz mait fain it haad fi bee kloas tu dehn. An dehn mait aalso fain it haad fi eevn geh kloas tu di bradaz ahn sistaz eena di kangrigayshan. Sohn sistaz feel loanli bikaaz dehn sik ahn kyaahn lef dehn hows, an adaz mait feel loanli bikaaz dehn haftu tek kayr a dehn famili membaz weh sik. Annette seh: “Ah kudn goh spen taim da eni get-tugeda wid di bradaz ahn sistaz bikaaz Ai da-mi di onli wan weh mi-di tek kayr a mi ma.”

6. How Jeezas mi help Marta ahn Mayri da Look 10:38-42?

⁶ Jeezas mi spen taim wid ih spirichwal sistaz, ahn hihn mi chreet dehn laik chroo chroo fren. Hihn da-mi kloas fren wid Marta ahn Mayri, too sista weh mi singl. (Reed Look 10:38-42.) Dehn mi feel komfatabl rong Jeezas kaaz a di way how hihn taak tu dehn ahn di way how hihn chreet dehn. Mayri da-mi wan a Jeezas disaipl ahn shee mi feel komfatabl fi sidong bai fi hihn fut. * Now, wen Marta si dat, shee geh beks bikaaz Mayri neva mi-di help ahn geh di food redi. Wel, Marta mi feel komfatabl tu, ahn shee tel Jeezas weh mi deh pahn fi shee main. Eevn doa dehn mi deh da wahn gyadarin, Jeezas mi help dehndeh too uman fi laan wahn impoatant lesn. An hihn mi shoa dat ih kay bowt dehn, kaaz ih yoostu aalwayz goh vizit di too a dehn ahn fi dehn breda, Lazaros. (Jan 12:1-3) Soh wen Lazaros mi geh sik bad, Marta ahn Mayri mi noa dat dehn kuda mi aks Jeezas fi help.—Jan 11:3, 5.

7. Wat da wan way how wi ku inkorij wi sistaz?

⁷ Fi som a wi sistaz, di meetin dehn mait bee di onli chaans weh dehn get fi deh wid di kangrigayshan. Soh wen dehn kohn da di meetin, wi need fi mek shoar dat wi welkom dehn, taak tu dehn, ahn shoa dehn humoch wi kay bowt dehn. Sista Jordan, weh wi mi menshan erliya, seh: “Ih reeli inkorij mi wen adaz komen mi fi di koments weh Ah giv da di meetin dehn, wen dehn mek planz fi goh owt pahn servis wid mi, er wen dehn shoa mi dat dehn kay bowt mi.” Wi haftu mek wi sistaz noa dat dehn impoatant tu wee. Wahn sista weh naym Kia seh: “If Ah mis wahn meetin, Ah noa dat Ah wahn geh wahn teks fi si if Ah aarait. Dat shoa mi dat mi bradaz ahn sistaz kay bowt mi.”

8. Wat da sohn ada wayz wi ku kapi Jeezas egzampl?

⁸ Jos laik Jeezas, wi ku chrai spen moa taim wid wi sista dehn. Maybi wi ku invait dehn oava fi shayr wahn meel er fi play sohn gaym. Ahn wen dehn kom oava, wi waahn mek shoar dat weh wi seh wahn  inkorij dehn. (Roam. 1:11, 12) Eldaz need fi ga di saym atichood laik weh Jeezas mi gat. Jeezas mi noa dat ih wuda bee wahn chalenj fi mek som peepl stay singl. Bot ih mi seh playn ahn schrayt dat chroo hapinis noh ga notn fi du wid weda er nat wahn persn marid er ga chiljren. (Look 11:27, 28) Insted, chroo hapinis pen pahn weda er nat Jehoava servis da di moas impoatant ting eena wi laif.—Mach. 19:12.

9. Weh eldaz ku du fi help sistaz eena di kangrigayshan?

⁹ Eldaz need fi set di egzampl ahn chreet Kristyan sistaz laik dehn spirichwal sista er spirichwal ma. (1 Tim. 5:1, 2) Wen eldaz mek taim fi taak tu sistaz bifoa er afta di meetin dehn, ih mek it eeziya fi mek dehn ku help sistaz wen dehn di goh chroo haad taimz. Kristen seh: “Wahn elda mi noatis dat Ah mi reeli bizi, soh ih aks mi wat da mi skejul fi chrai si how ih kuda mi help mi. Ah mi reeli apreeshiayt dat ih shoa dat ih kay bowt mi.” Wen eldaz mek di taim fi taak wid dehn spirichwal sistaz, dehn shoa dat dehn kay bowt dehn. * Annette, weh wi mi menshan erliya, eksplayn wan reezn wai ih gud fi taak tu di eldaz. Shee seh: “Ah get fi noa dehn beta, ahn dehn get fi noa mee tu. Den, wen Ai di goh chroo wahn prablem, ih eeziya fi mek Ah aks dehn fi help.”

10. Weh ku help wi sistaz eena di kangrigayshan fi bee hapi?

¹⁰ Noh mata if wi da man er uman, aala wi feel gud wen peepl tel wi dat dehn apreeshiayt wi werk ahn dat dehn noatis di tingz weh wi gud pan. Bot if nobadi shoa apreeshiayshan fi how wi yooz wi skilz er fi di werk weh wi du, wi ku geh diskorij. Wahn singl painyaa sista weh naym Abigail seh dat sohntaim shee feel dat sohn peepl ignoar ahn, an laik if dehn noh noa shee persnali. Shee seh: “Ai feel laik Ai da jos sista soh-ahn-soh er soh-ahn-soh daata. Sohntaim Ah feel laik nobadi noatis mi.” Wahn sista weh naym Pam mi serv az wahn mishineri fi yaaz wen ih mi singl. Afta dat, ih gaahn bak hoam fi tek kayr a ih payrents. Now Pam deh eena ih 70ʼs an ih stil di painyaa. Shee seh: “Wen peepl tel mi dat dehn apreeshiayt weh Ah du, ih mek Ah feel gud ahn dat help mi wahn lat.”

11. How Jeezas mi shoa dat hihn apreeshiayt di werk weh sohn faytful uman mi du?

¹¹ Sohn faytful uman yoostu “tek moni fahn owta dehn oan pakit fi tek kayr a Jeezas,” ahn hihn mi apreeshiayt dat. (Look 8:1-3) Da mi wahn privilij fi serv Jeezas eena da way, ahn hihn mi alow dehndeh uman fi ga da privilij. Hihn mi aalso teech dehn sohn impoatant chroot bowt di wil a Gaad. Fi egzampl, ih mi tel dehn dat ih wahn ded ahn kohn bak tu laif. (Look 24:5-8) Jos laik how hihn mi tel ih apasl dehn weh mi wahn hapm tu dehn, saym way, ih mi aalso tel dehnya uman weh mi wahn hapm tu dehn. (Maak 9:30-32; 10:32-34) Ahn tink bowt dis tu: Wen dehn mi ares Jeezas, ih apasl dehn ron weh ahn lef ahn bai ihself. Bot wen ih mi-di ded pahn di taacha stayk, da hoo mi deh rait saida ahn? Da mi som a di faytful uman dehn hoo mi sopoat ahn eena ih minischri.—Mach. 26:56; Maak 15:40, 41.

12. Weh kaina werk Jeezas mi chros sohn faytful uman wid?

¹² Jeezas mi gi di uman dehn weh mi fala hihn werk fi mek dehn du, an ih mi chros dat dehn wahn du it tu. Fi egzampl, som a dehnya uman da-mi di fers fi si ahn afta Gaad rezorek ahn. Hihn mi aks dehn fi goh gi di apasl dehn dis nyooz. (Mach. 28:5, 9, 10) Ahn wen Gaad mi poar owt ih hoali spirit pahn di disaipl dehn pahn di day a Pentikaas eena di yaa 33 C.E., ih pasabl dat dehnya saym uman mi deh rait deh tu, soh dehn wuda mi geh di hoali spirit tu. Dis wuda meen den dat dehndeh uman mi get anointid ahn geh di gif fi taak eena difrent langwij ahn tel adaz bowt “di grayt ting dehn weh Gaad du.”—Aks 1:14; 2:2-4, 11.

13. Weh wi Kristyan sistaz di du tudeh, ahn how wi ku shoa apreeshiayshan fi weh dehn di du?

¹³ Wi sistaz dizerv komendayshan fi aal weh dehn di du eena servis tu Jehoava. Dehn werk pahn di difrent kanschrokshan sait dehn ahn mantayn wi Kingdom Haal dehn an ada bildinz. Dehn preech lang wid di difrent groop dehn weh preech eena difrent langwij, ahn dehn valantyaa da Betel. Dehn help owt wen wahn nachral dizaasta hapm, dehn help fi chranslayt wi poblikayshan dehn, ahn dehn serv az painyaa ahn mishineri. Ahn jos laik bradaz, sistaz geh fi goh da painyaa skool, di Skool fi Kingdom Ivanjelaizaz, ahn Gilyad Skool. Pahn tap a dat, sistaz weh marid help dehn hozban soh dat dehn ku du dehn werk eena di kangrigayshan an eena di aaganaizayshan. Dehnya bradaz da laik gif tu di kangrigayshan ahn dehn du wahn lata tingz fi help adaz. Bot, ih wuda bee haada fi mek dehn du dis if dehn waif neva sopoat dehn. (Ifee. 4:8) Yoo ku tink bowt difrent wayz how yoo ku sopoat wi sistaz eena di werk weh dehn di du?

14. Weh waiz eldaz du bikaaz a weh Psalms 68:11 seh?

 ¹⁴ Waiz eldaz noa dat sistaz da wahn “big aami” weh wilin fi werk, ahn moas a di taim, di sistaz ga gud skilz wen ih kohn tu di preechin werk. (Reed Psalm 68:11.) * Soh, eldaz luk fi wayz fi benifit fahn di ekspeeryens weh di sistaz gat. Abigail, weh wi mi menshan erliya, seh dat shee apreeshiayt it wen bradaz aks ahn bowt di difrent wayz shee staat kanvasayshanz eena di teritori. Shee seh: “Dis help mi fi si dat Jehoava ga wahn impoatant werk fi mek Ai du eena fi hihn aaganaizayshan.” Aalso, eldaz noa dat faytful, machoar sistaz andastan how fi taak tu yonga sistaz ahn help dehn fi deel wid dehn chalenjiz beta. (Taitos 2:3-5) Wi sistaz dizerv wi lov an apreeshiayshan fi chroo!

15. Wen wuda bee wahn taim wen wi sistaz need sombadi fi taak op fi dehn?

¹⁵ Sohntaim, wi sistaz mait need sombadi fi taak op fi dehn wen dehn di fays wahn spesifik chalenj. (Isa. 1:17) Fi egzampl, wahn wido er wahn sista hoo divoas mait need sombadi fi taak op fi shee ahn help ahn du som a di werk weh ih hozban yoostu du. Wahn oalda sista mait need help fi taak tu wahn dakta. Er wahn painyaa sista weh werk pahn difrent proajeks fi di aaganaizayshan mait need sombadi fi taak op far ahn if adaz kritisaiz ahn bikaaz shee noh di preech az moch az ada painyaaz. Wat els wi ku du fi help wi sistaz? Wel, mek wi luk pahn Jeezas egzampl agen.

16. How Jeezas mi taak op fi Mayri da Maak 14:3-9?

¹⁶ Jeezas mi aalwayz redi fi taak op fi ih spirichwal sistaz wen adaz mi joj dehn eena wahn rang way. Fi egzampl, hihn mi difen Mayri wen Marta mi kritisaiz ahn. (Look 10:38-42) Ih mi difen Mayri agen wen shee mi poar di ekspensiv perfyoom ail pan fi hihn hed, kaaz adaz mi-di tink dat shee di mek wahn bad disizhan ahn dehn mi-di kritisaiz ahn far it. (Reed Maak 14:3-9.) Jeezas mi andastan wai Mayri mi du weh shee mi du, an ih prayz ahn far it. Hihn seh: “Shee du wahn nais ting fi mi. . . . Dis laydi du weh shee kuda mi du.” Ih mi eevn seh dat peepl wahn stil di taak bowt di kainis weh shee mi shoa ahn op tu tudeh day. Ih mi seh: “Eniway eena di hoal werl weh dehn preech di Gud Nyooz, dehn wahn memba shee ahn taak bowt weh shee mi du,” jos laik weh wi di du rait now eena dis aatikl. Dehndeh werdz mosi mi reeli komfert Mayri, kaaz ada peepl mi joj ahn rang!

17. Yooz di egzampl eena di paragraaf fi shoa wen wi mait need fi taak op fi wahn sista.

¹⁷ Yoo taak op fi yu spirichwal sistaz wen dehn need it? Az wahn egzampl, imajin dis sichuwayshan: Sohn poblishaz noatis dat wahn sista, hoofa hozban da noh wahn Witnis, yoozhwali reech layt da meetin ahn lef az soon az meetin don. Dehn aalso noatis dat shee bayli bring ih chiljren dehn da di meetin. Di poblishaz kritisaiz ahn bikaaz dehn tink dat shee shuda insis dat ih hozban alow ahn fi bring ih chiljren tu di meetin dehn. Bot, dehn noh riyalaiz dat shee di du di bes ih kud. Shee noh ga kompleet kanchroal oava fi shee skejul, ahn da noh shee mek di fainal disizhan bowt di chiljren. Weh yoo ku du if yu hyaa adaz di kritisaiz wahn sista hoo deh eena dis sichuwayshan? If yu komen di sista fi aala ih haad werk ahn tel adaz bowt di gud tingz weh shee di du, yu ku stap dehn fahn kritisaiz ahn.

18. Wat da sohn ada wayz wi ku help wi sistaz?

¹⁸ Wi ku shoa wi sistaz humoch wi kay bowt dehn wen wi du helpful tingz fi dehn.  (1 Jan 3:18) Annette, di saym sista hoo tek kayr a ih ma weh sik, seh: “Som a di bradaz ahn sistaz wuda bring food fi wi, er dehn aafa fi tek kayr a mi ma wail Ai goh du sohnting els. Dis mek Ah feel laik dehn lov mi ahn dat Ai da stil paat a di kangrigayshan.” Memba Jordan? Shee mi geh help tu. Wahn brada mi teech ahn how fi du mantaynans pan ih kaar. Shee seh: “Ah feel soh hapi, kaaz Ah noa dat mi bradaz ahn sistaz kay bowt mi ahn dehn waahn Ah bee sayf wen Ah jraiv mi kaar.”

19. Wat da wahn nada way how eldaz ku help sistaz?

¹⁹ Eldaz aalso chrai fi tek kayr a wi sistaz. Dehn noa dat Jehoava waahn dehn chreet di sistaz gud. (Jay. 1:27) Jeezas mi aalwayz yooz gud jojment an ih mi fyaa. Soh, eldaz chrai fi fala fi hihn egzampl ahn bee di saym way. Dehn noh mek roolz, insted dehn chrai bee kain ahn shoa andastandin. (Mach. 15:22-28) Wen eldaz werk haad fi help, dehn di mek di sistaz feel dat Jehoava an ih aaganaizayshan lov dehn. Memba Kia? Wen fi shee groop oavaseeya mi fain owt dat shee di moov tu wahn nada hows, hihn mi fain sohn bradaz fi help owt rait away. Shee seh: “Afta dat, Ah neva feel soh schres owt. Ah mi feel dat Ai da wahn impoatant paat a di kangrigayshan ahn dat Ah noh deh bai miself wen Ah di goh chroo wahn tof sichuwayshan. Dehn mi reeli inkorij mi ahn gi mi di help weh Ah mi need.”

20-21. How wi ku shoa dat wi lov aala wi Kristyan sistaz?

²⁰ Wen wi luk rong wi kangrigayshan tudeh, wi si wahn lata haad-werkin sistaz weh dizerv wi sopoat. Laik weh wi laan fahn Jeezas egzampl, wi ku help wi sistaz wen wi spen taim wid dehn ahn geh fi noa dehn. Wi ku shoa dehn dat wi apreeshiayt weh dehn du fi Jehoava. Ahn wen dehn need wi fi taak op fi dehn, wi ku du dat tu.

²¹ Eena di en a di leta weh di apasl Paal mi rait tu di kangrigayshan da Roam, ih mi menshan nain Kristyan uman bai naym. (Roam. 16:1, 3, 6, 12, 13, 15) Imajin how dehndeh sistaz mosi mi feel wen dehn hyaa dat Paal mi sen greetinz fi dehn ahn prayz dehn! Dat mosi mi inkorij dehn, noh chroo? Mek wi du di saym az Paal ahn sopoat aala wi sistaz eena wi kangrigayshan. If wi du dis, wi di shoa dat wi lov dehn ahn dat dehn da paat a wi spirichwal famili.