1. Paquemodo ta suporta el maga hermana na organizacion, pero cosa maga dificultad sila ta enfrenta? (Mira con el letrato na cover.)

BIEN alegre kita cay manada kita maga hermana quien activo na congregacion. Por ejemplo, ta participa sila na miting y na ministerio. El otro ta ayuda mentena con el Kingdom Hall y ta dale mira personal interes na maga hermano y hermana. Siempre, ta experiencia sila maga dificultad. El cuanto ta cuida con el diila maga mayores que de edad ya. El otro ta experiencia oposicion na diila maga familia. Mientras el otro que nuay marido, ta trabaja enbuenamente para dale el necesidad del diila maga anak.

2. Porque kita debe hace esfuerzo para dale suporta con el diaton maga hermana?

² Porque kita debe suporta con el diaton maga hermana? Cay el mundo gendeh ta dale con el maga mujer el respeto que conviene para kanila. Mas pa, el Biblia ta anima kanaton que dale kanila suporta. Por ejemplo, si apostol Pablo ya habla con el congregacion na Roma que ricibi con alegria con Febe y “ayuda con ele na disuyo maga necesidad.” (Roma 16:1, 2) Cuando Fariseo pa si Pablo, parte del diila cultura que hace bajo con el maga mujer. Pero ahora ciendo un Cristiano ya le, ya imita le con Jesus y ya trata enbuenamente y con dignidad con el maga mujer.​—1 Cor. 11:1.

3. Paquemodo ya trata si Jesus con el maga mujer y cosa el de suyu mirada con el maga mujer quien ya hace con el voluntad del de suyu Tata?

³ Si Jesus ya trata con dignidad con el todo mujer. (Juan 4:27) Nuay le mira con el maga mujer igual si paquemodo ya mira kanila el maga Judio religioso lider del de suyu tiempo. Gane, el un referencia acerca na Biblia ya habla: “Nuay cosa ya habla si Jesus que ta hace de menos con el maga mujer.” Especial con Jesus el maga mujer quien ya hace con el voluntad del de suyu Tata. Ya llama le kanila como de suyu maga hermana y ya  menciona kanila junto con el maga hombre con quien le ta mira como parte del de suyu espiritual familia.​—Mat. 12:50.

4. Cosa kita discuti na este articulo?

⁴ Pirmi preparao si Jesus que ayuda con el de suyu maga hermana na espiritual. Ya aprecia y ya defende le kanila. Discuti kita si paquemodo kita puede imita con Jesus y dale mira consideracion con el diaton maga hermana.

5. Porque posible el cuanto maga hermana tan dificil tiene buen asosacion?

⁵ Todo kita necesita buen asosacion. Pero tiene vez, el maga hermana posible tan dificil tiene maga amigo y amiga. Porque? Nota si cosa ya habla el cuanto kanila. El un hermana que si Jordan * ya habla, “Cay single yo, ta sinti yo que nuay yo papel na congregacion, que dol gendeh yo parte de este.” Si Kristen, un pioneer quien ya cambia na otro lugar para hace mas na ministerio ya habla, “Si nuevo tu na congregacion, posible tu sinti que solo lang tu.” Posible tambien sinti ansina el otro maga hermano. El un persona que donde el familia gendeh Testigo de Jehova, posible sinti que separtao le na de suyu mismo familia y maskin na de suyu espiritual familia. El cuanto maga hermana posible triste cay enfermo sila y gendeh puede sale na casa o por causa cay sila el quien ta cuida con el diila familia que enfermo. Si Annette ya habla, “Gendeh yo ta puede anda si ta invita conmigo el maga hermano y hermana cay iyo el quien ta cuida con el de mio nana.”

6. Paquemodo ya ayuda si Jesus con Marta y Maria como cosa ta habla na Lucas 10:38-42?

⁶ Si Jesus ya dale tiempo para man junto con el de suyu maga hermana na espiritual y un buen amigo le kanila. Considera con el de suyu buen amistad con Maria y Marta que maga single. (Le con el Lucas 10:38-42.) Por causa na de suyu palabra y accion, comfortable lang sila con Jesus. Por ejemplo, nuay tiene miedo si Maria que sinta cerca na de suyu pies como un dicipulo. * Y cuando rabiao si Marta cay nuay con ele ayuda si Maria, nuay le man alang-alang habla con Jesus si cosa le ta pensa. Na ese ocasion, ya enseña si Jesus maga importante leccion con este dos mujer. Y ya dale le mira el de suyu amor na este maga mujer y con el diila hermano si Lazaro cuando ya visita le kanila na otro pa maga ocasion. (Juan 12:1-3) Poreso, gendeh maka-estraña que cuando ya enferma si Lazaro sabe si Maria y Marta que puede sila pidi ayuda con Jesus.​—Juan 11:3, 5.

7. Cosa el un manera que puede kita anima con el diaton maga hermana?

⁷ Para na cuanto maga hermana, el miting amo un grande oportunidad para man junto sila na diila maga hermano y hermana. Poreso, quierre kita usa con ese maga tiempo para man greet kanila, man cuento y dale mira el diaton personal interes kanila. Si Jordan que ya menciona enante ya habla, “Ta puede gayot anima conmigo si el otro ta puede nota con el de mio maga comento, man junto conmigo na ministerio o ta dale mira que interesao sila conmigo.” Debe kita dale mira con el diaton maga hermana que importante sila kanaton. “Si nuay yo puede atende miting,” ya habla si Kia, “Sabe yo que hay man text sila conmigo para chequia si OK lang yo. Ta manda este sinti conmigo que ta ama conmigo el maga hermano y hermana.”

8. Cosa pa el otro manera que puede kita imita con Jesus?

⁸ Igual con Jesus, puede kita dale tiempo  para man junto con el diaton maga hermana. Puede kita invita kanila come o man junto na recreacion. Si hace kita se, quierre kita asigura que ta puede anima el cosa kita ta habla. (Roma 1:11, 12) Importante que imita el maga anciano con el mirada de Jesus. Sabe le que ta experiencia maga dificultad el cuanto maga single, pero ya hace le claro que el alegria del un persona gendeh ta depende si casao le o tiene le anak. (Luc. 11:27, 28) Sino, queda le deverasan alegre si hace le una con el servicio con Jehova.​—Mat. 19:12.

9. Cosa puede hace el maga anciano para ayuda con el maga hermana?

⁹ El maga anciano necesita trata con el maga hermana na congregacion como diila maga hermana y nana na espiritual. (1 Tim. 5:1, 2) Importante que dale tiempo el maga anciano que man cuento kanila antes o despues del miting. “Ya puede nota el un anciano que bien busy yo y quierre le entende si cosa el de mio situacion,” ya habla si Kristen que ya menciona enante. “Ya aprecia gayot yo con el de suyu sinceridad.” Si el maga anciano regular ta dale tiempo para man cuento con el maga hermana, ta dale sila mira que interesao sila kanila. * Si Annette que ya menciona enante, ya habla si cosa el un beneficio si regular tan cuento na  maga anciano. Ele ya habla: “Mas ya conoce yo kanila y ya conoce tambien sila conmigo. Y si tiene yo problema, mas facil para conmigo que pidi kanila ayuda.”

10. Cosa puede ayuda con el diaton maga hermana para queda alegre?

¹⁰ Hombre man o mujer, todo kita ta queda alegre si el otro ta puede nota con el diaton abilidad y ta habla kanaton que ta aprecia sila con el cosa kita ta hace. Pero, si dol nuay lang se con otro, tan luya kita. El un single pioneer que si Abigail ya habla: “Ta sinti yo que con el de mio hermano y de mio tata lang sila conoce. Tiene vez dol gendeh sila conmigo ta puede nota.” Pero, considera si cosa ya habla el un single hermana que si Pam. Ya sirvi le como un misionario por cuanto año. Na uliji, ya bira le kanila para cuida con el de suyu mayores. Ahora, mas de 70 año ya le y un pioneer siempre. Ya habla si Pam: “Ta puede gayot ayuda conmigo si ta habla el otro que ta aprecia sila conmigo.”

11. Na cosa manera ya dale mira si Jesus que ya aprecia le con el maga mujer quien ya suporta con ele na de suyu ministerio?

¹¹ Ya aprecia gayot si Jesus con el suporta que ya ricibi le estaba con el maga mujer quien ya ayuda con ele “por medio del diila maga bienes.” (Luc. 8:1-3) Nuay lang le dale kanila ese privilegio, sino ya enseña tambien le kanila maga importante verdad acerca na voluntad del Dios. Por ejemplo, ya habla le kanila que hay muri le y hay resucita. (Luc 24:5-8) Ya prepara le con este maga mujer na maga probanza que hay enfrenta sila igual na cosa le ya hace na maga apostoles. (Mar. 9:30-32; 10:32-34) Y maskin ya abandona el maga apostoles con Jesus cuando ya arresta con ele, el cuanto maga mujer nuay con ele deja cuando na estaca le.​—Mat. 26:56; Mar. 15:40, 41.

12. Cosa trabajo el ya deja si Jesus con el maga mujer?

¹² Ya dale importante trabajo si Jesus con el maga mujer. Por ejemplo, sila el una quien ya puede mira que ya resucita le. Ya pidi le con el maga mujer habla con el maga apostoles que ya resucita ya le. (Mat. 28:5, 9, 10) Y del Pentecostes 33 C.E., posible que presente el maga mujer cuando ya vacia con el sagrao espiritu. Si ansina, este maga hermana ya tiene tambien el abilidad para converza na otro maga lengguaje y habla con otro acerca na “maga cosa-cosa que ya hace el Dios.”​—Act. 1:14; 2:2-4, 11.

13. Cosa ta hace el maga hermana ahora y paquemodo kita puede dale mira que ta aprecia kita con el cosa sila ta hace?

¹³ Conviene lang ricibi comendacion el diaton maga hermana na todo cosa sila ta hace na servicio con Jehova. Ta construi sila y ta mentena maga building, ta suporta maga foreign-language group y tan volunteer na maga facilidad del Bethel. Ta ayuda sila na disaster relief work, na translation del diaton maga publicacion y ta sirvi como pioneer y misionario. Igual na maga hermano, el maga hermana ta atende na pioneer school, na School for Kingdom Evangelizers y na Gilead School. Mas pa, el maga mujer ta ayuda con el diila marido para puede sila cumpli con el diila responsibilidad na congregacion y na organizacion. Este maga hermano amo “maga regalo con el maga gente,” pero man dificil sila hace con el diila responsibilidad si gendeh kanila suporta el mujer. (Ef. 4:8) Tiene ba tu cosa puede hace para suporta con este maga hermana na diila trabajo?

14. Por causa na cosa ta habla na Salmo 68:11, cosa ta hace el maga anciano?

¹⁴ Sabe el maga sabio anciano que igual como “un grande grupo de soldao” el maga hermana que maga buen trabajador y bien efectivo na  predicacion del buen noticia. (Le con el Salmo 68:11.) Poreso, ta busca manera el maga anciano para beneficia na diila experiencia. Si Abigail que ya menciona enante, ya habla que ta puede anima con ele si ta pregunta el maga hermano si cosa le ya puede mira que efectivo para puede principia man cuento na maga gente na teritorio. Ya habla tambien le, “Ya puede se comigo ayuda para mira que si Jehova ya dale conmigo un importante papel na de suyu organizacion.” Mas pa, sabe el maga anciano que el maga fiel y mature hermana bien efectivo si ta dale ayuda con el maga mas joven hermana quien ta enfrenta maga dificultad. (Tito 2:3-5) Claro gayot que conviene kita aprecia con el diaton maga hermana!

15. Cosa el maga situacion que el maga hermana posible necesita que tiene quien man cuento para kanila?

¹⁵ Tiene vez, posible que necesita el maga hermana que tiene quien man cuento para kanila si ta enfrenta sila maga dificultad. (Isa. 1:17) Por ejemplo, el un viuda o un divurciao hermana posible necesita que tiene quien defende con ele o ayuda con ele hace con el cuanto trabajo que ta hace el de suyu marido de antes. El un de edad hermana posible necesita ayuda para converza con el maga doctor. O el un pioneer hermana quien tan voluntario na otro teocratico proyecto, posible necesita que tiene quien defende con ele si ta cuestiona el otro si porque gendeh le pirmi ta participa na ministerio igual na otro maga pioneer. Paquemodo kita ayuda con este maga hermana? Considera kita con el ejemplo de Jesus.

16. Paquemodo ya defende si Jesus con Maria, como cosa ta habla na Marcos 14:3-9?

¹⁶ Si Jesus preparao defende con el de suyu maga hermana na espiritual si ta juzga kanila. Por ejemplo, ya defende le con Maria cuando ya rabia con ele si Marta. (Luc. 10:38-42) Y ya defende le otravez con Maria cuando ya regaña con ele el otro, cay para kanila, gendeh bueno el cosa le ya hace. (Le con el Marcos 14:3-9.) Sabe si Jesus con el motivo de Maria y ya dale con ele comendacion. Ele ya habla: “Ya hace le conmigo un buen obra. . . . Ya hace le como cosa le debe hace.” Ya predicta pa gane le que hay cunta con el cosa ya hace si Maria “maskin donde ay anuncia el Buen Noticia.” Y gane, amo se el cosa ta hace el diaton articulo ahora. Ya habla si Jesus que hay predica con el buen noticia maskin donde cuando ya dale le comendacion con el cosa ya hace si Maria. Asigurao que ya puede gayot quel anima con Maria despues con ele juzga el otro.

17. Dale un ejemplo si cuando tu puede defende con el un hermana.

¹⁷ Ta defende ba tu con el diaton maga hermana? Por ejemplo, considera con este situacion. El cuanto maga publisher ya mira que el un hermana, que el marido gendeh Witness, pirmi atrasao ta llega na miting y ta sale dayun despues del programa. Ya observa sila que ralo lang le ta lleva con el de suyu maga anak. Poreso, ya cuestiona sila con ele si porque gendeh le ta hace esfuerzo para permiti con ele el de suyu gendeh Witness marido que lleva le con el maga bata na miting. Pero el deverasan, ta hace el hermana el todo cosa le puede hace. Por causa na cuanto razon, gendeh le ta puede sigui si cosa el na de suyu schedule. Y el de suyu marido siempre el quien ta decidi si acerca na diila maga anak. Cosa tu puede hace? Si dale tu comendacion con el hermana y menciona con otro el cuanto cosas que ta hace le, posible, gendeh mas cuestiona con ele el otro.

18. Cosa pa el otro manera que puede kita ayuda con el diaton maga hermana?

¹⁸ Puede kita dale mira con el diaton maga hermana que ta ama kita kanila si dale kita  practical ayuda. (1 Juan 3:18) Si Annette, quien ta cuida con el de suyu nana que enfermo, ya habla: “El cuanto del de mio maga amigo y amiga ta anda para releva conmigo o ta lleva sila comida. Por causa con ese, ta sinti yo que ta ama sila conmigo y parte yo del congregacion.” Ya ricibi tambien ayuda si Jordan. Ya ayuda con ele el un hermano si paquemodo mentena con el de suyu coche. Ele ya habla: “Alegre yo sabe que el de mio maga hermano y hermana quierre que protegido yo.”

19. Paquemodo pa el maga anciano puede ayuda con el maga hermana?

¹⁹ El maga anciano ta mira tambien el bien del maga hermana. Sabe sila que importante con Jehova si paquemodo ta trata con el maga hermana. (Sant. 1:27) Poreso, ta imita sila con el pagka-rasonable de Jesus y gendeh sila ta hace maga ley na maga tiempo que mas justo que dale mira consideracion. (Mat. 15:22-28) Si ta hace esfuerzo el maga anciano para ayuda, ta manda este sinti con el maga hermana que tiene kanila quien ta ama. Cuando ya puede sabe el group overseer de Kia que cambia le casa, ya hace dayun le manera para tiene quien ayuda con ele. “Ya menora gayot quel con el de mio stress,” ya habla si Kia. “Por medio na diila maga palabra y practical ayuda, el maga anciano ya manda sinti conmigo que importante yo na congregacion y que gendeh yo solo maskin tiene yo problema.”

20-21. Cosa kita hace para dale mira que precioso kanaton el todo diaton maga hermana?

²⁰ Na maga congregacion ahora, manada kita puede mira maga hermana quien conviene ricibi con el diaton suporta. Como cosa kita ya puede aprende na ejemplo de Jesus, puede kita ayuda con el maga hermana si dale kita tiempo man junto kanila y conoce kanila. Puede kita dale mira diaton apresacion na cosa sila ta hace na servicio con Dios. Y si necesita, puede kita defende kanila.

²¹ Na fin del carta de apostol Pablo para na maga de Roma, especifico le ya menciona con el nueve hermana. (Roma 16:1, 3, 6, 12, 13, 15) Asigurao que ya puede gayot anima con el maga hermana cuando ya oi sila con el de suyu greeting y comendacion. Debe tambien kita suporta con el todo hermana na diaton congregacion. Si hace kita se, ta dale kita mira que precioso sila como parte del diaton espiritual familia.