1. Nikamihedho gani ninvaha arogora mmutugumanoni, vina angumanagana makattamiho gani? (Kang’ana foto ya kapa.)

NINOWAGALALA vaddiddi sabwa ya okana arogora enjene anlaba vina anzuzumela mabasa a mutugumano! Ninga motagiha, awene anokamihedha mabasa a mutugumano na mabasaya olaleya. Ena anokamihedha mabasa ovenyihedha Numba dha Omwene; awene anowazuzumela aroromeli akwawa. Enoziweya wi arogora aba anofwanyiwa dhorutxa. Akalawo ena anakaliha ababiwa a wuluvala, ena anovilela ofwara-fwariwa na amudhawa. Vina ena amambali ali aziye anlaba venjene wi asapele aniwa.

2. Ninfwanyelelani okosa guru ya wakamihedha arogora?

² Ekalele nni yofuneya iyo wakamihedhaga arogorihu? Sabwani a attu a mwilaboni kanaweddiha ayana na nriho ninafwanyelela. Elobo yina jiji, Bibilia ononikokomeza wila ninofwanyela wakamihedha. Motagiha, murumiwi Paulo wahakokomeza Akristu o Roma wila anfwanyeela omwakela Febe vina “mmukamyedhe dhetene dhinimujombela.” (Rom. 16:1, 2) Bali Mfarizi, Paulo wahikaana yeddelo ya waweddiha ayana s’enriho. Mbwenye valiye Mukristu, iyene wannimutagiha Yezu mwa waweddiha ayana na nriho vina ntanalo.—1 Kor. 11:1.

3. Yezu waweddiha dhavi ayana, vina iyene wawona dhavi abale akosa efunelo ya Babe?

³ Yezu wanaweeddiha ayana na nriho. (Jo. 4:27) Iyene kaweddiha ninga mwakosela asogorheli a marelijiau a Ayuda. mBibiliani kamuli mpaddi ononiha wi: “Yezu wannapwaza ayana.” Ottiya ejo, Yezu wananwediha na nriho nddimuwa ayana akosa efunelo ya Babe. Elagihaga wi iyene wawona ninga arogora vina walogile kuluwi na alobwana awoniye ninga anamudhi a mpaddi womuyani.—Mt. 12:50.

4. Txini dhinasekeserhihu mwari mwa nsunzo ntti?

 ⁴ Yezu wanakamihedha venjene ayana mpaddi womuyani. Iyene wannatamalela vina wannabarela. Ndoweni nisekeserhe mikalelo dhinawodhihu omutagiha Yezu mwa walagiha nriho arogora ehu.

5. Arogora ena anrutxeliwagani okola mumodhani na abali?

⁵ Iyo notene, abali na arogora, ninofwanyela okala mandano apama. Egali dhahene, masaka mena arogora anogumagana makattamiho okana mandano apama. Sabwaya? Kona elogile murogora onkuweliwa Jordan. * “Sabwa ya okala muziye, ddinovonaga se ttima mmulogoni vina ohikosa mpaddi wa mulogoya.” Pionera oniliwa Kristen omwalele elabo yina wila enjedhedhe mabasa aye a olaleya bela: “Weyo ogakala muswa mmulogoni oniviyona weka.” Abali ena anviyona dhaene. Muttu onkala na anamudhi ahili Anamoona a Yehova onodha orutxiwa okala wofiyedheya na amudhayeya, vina onowubuwela wi oli wolapelana na abali vina arogora a mmulogoni. Arogora anakoya oka amudhawa ali aredda anodha ofiyedhaga oviyona ninga ali oka. Annette ohiloga, “Miyo kaddawodha odhowa mmavegoni sabwani wamukoya mma wali miyo meka.”

6. Dhahene ninga munlogela Luka 10:38-42 Yezu omukamihedhile dhavi Marta na Maria?

⁶ Yezu wankala vamodha na ayana anna nroromelo vina ali amarho aye. Katanalela mandano anniye na Marta vina Maria, enooneya ninga oweli aali aziye. (Kengesa Luka 10:38-42.) Mazu na merelo a Yezu anawoniha wi awene ba ttima. Maria wahittukuleleya ogilati vakuvi na Yezu ninga namafwara waye. * Vina Marta wasilidhiwe sabwa ya murogoriye Maria ohimukamihedha, koovile ologa na Yezu dhali mmirimani mwaye. Yezu wahiwodha wakamihedha otene mpaddi womuyani. Vina iyene wahooniha wi wannazuzumela ayana abale vamodha na murogoriwa Lázaro, mwa odhowa wawona mudhidhi mwina. (Jo. 12:1-3) Kinaganyedheya wi Lázaro valiye muredda, Maria vamodha na Marta anziwa wi agahikamihedhiwa na Yezu.—Jo. 11:3, 5.

7. Txini enfwanyelihu okosa wi nalibihena arogorihu?

⁷ Arogora ena anoziwa wi okala vamatugumanoni gari ya okola vamodha na aroromeli akwawa. Nona iyo ninfuna nipure gari eji wi namoyelege, nilogege na awene, vina nawonihege yawi ninowatanaala. Jordan, ologiwe omaromo wa nsunzo ntti, ohiloga: “Miyo ddinopangarhazeya venjene attu agatamalelaga dhowakula dhaga, agakosa masasanyedho a odhowa na miyo mmalaleyoni, obe agakosa merelo mena anoniha wi anoddizuzumela.” Iyo ninofwanyela wanonihedhamo arogora ehu wi ninowattittimiha. Kia ohiloga: “Miyo ddigajomba omatugumanoni, ddinoziwa wi ddinela olebeliwa muselu na abali wi aziwe akala ddamugumi. Eji enoddikosiha ozinddiyela wi abali vamodha na arogoraya anoddikwela.”

8. Txini enfwanyelihu okosa wila nimutagihe Yezu?

⁸ Dhahene ninga Yezu, iyo ninofwanyela otamela mudhidhi wa okala na arogorihu. Txino jofuneya wawobela vanihu wila nije elobo txilobo obe ngafuna nikose mavego. Nigakosa ejuwene ninela owodha ologana  makani olibihana. (Rom. 1:11, 12) Anddimuwa a mulogo anofwanyela ofwara mweddelo waana Yezu. Iyene wanziwa wi aziye anogumanana makattamiho, mbwenye ohinonihedhamo wi otela vina okana ayima kahiye niparha ninddana wagalala wa ebaribari. (Lk. 11:27, 28) Wagalala webaribari onda mwari mwa ozuzumela mabasa a Yehova.—Mt. 19:12.

9. Txini enfwanyela okosa anddimuwa a mmulogoni wila akamihedhe arogora?

⁹ Makamaka anddimuwa a mmulogoni anofuniwana waweddiha ayana ali Akristu ninga arogoriwa vina amayiwa omuyani. (1 Tim. 5:1, 2) Awene anowira pama otamela ologa na arogora aba matugumano ahinatti vina agamala. Kristen ohiloga: “Munddimuwa dhahi wa mmulogoni wahoona wi miyo kaddakana mudhidhi, nona ohitamela oziwa masasanyedho aga. Miyo txibarene ddinotamaalela vaddiddi malago aye.” Akala anddimuwa a mmulogoni anotamela mudhidhi wa ologaga na arogoriwa omuyani, awene anela ozinddiyela wi anotanaliwa. * Annette, ologiwe mundduni wahifiyedha wona yopurelamo ya ologaga na anddimuwa a mmulogoni. Iyene ohiloga: “Miyo ddahifiyedha waziwa awene pama vina awene ahifiyedha oddiziwa. Mudhidhi wafanyiwa miyo makattamiho, ddankaana ofuru wa wakumbirha nikamihedho.”

10. Txini enakosihe arogora ehu okala ohagalala?

¹⁰ Iyo notene, alobwana, ayana ninolibiheya vina ninohagalala nigaziwa wi attu akwihu anozinddiyela ewodhelo yehu vina anotamaalela mabasa ankosihu. Mbwenye akala ewodhelo yehu na mabasaya ankosihu kanttittimihiwa, ninokumuwa. Murogora dhahi onkuweliwa Abigail ohiloga wi onorumela wi wahikalawo mudhidhi wavoniye ninga muttu wopwaziwa; iyene ohifieyedha ologa: “Miyo ddavyona ninga mwana wahana muttu waweddana. Malabo mena yaddikalela ninga kaddoniwa.” Karoma wona ottiyana wa dhologa esi na dha murogora onkuweliwa Pam. Valiye muziye, wahilaba vyaka dhinjene ninga misiyónaria. Mmaleliye wahiyelela vatakulu wi akalihe amambali aye. Ddabuno iyene ona vyaka 70, mbwenye onolabavi ninga pionera. Pam ohiloga, “Enddikamihedhetxa venjene ja wawiwa abali alogaga mazu otamalelana guru dhinkosimi.”

11. Yezu wonihile dhavi wi wannattittimiha ayana amvelela mmabasani aye olaleya?

¹¹ Yezu Kristu wanttittimiha nikamihedho navahiwiye na ayana a murima abuwene “amusapela na dhawa.” (Lk. 8:1-3) Iyene kavahilevi gari eji, mbwenye wahavuhulela vina ebaribari ya mazu a Mulugu. Ninga motagiha, iyene wahawaddela wi onela okwa agamala ovenyihiwa mukwani. (Lk. 24:5-8) Iyene wahashagiha ayana aba wi musogorho agahigumanana dhorutxa, dhahene ninga mwaswagihiliye anamafwara aye. (Mk. 9:30-32; 10:32-34) Enotikiniha oziwa wi mudhidhi wattiddiwa Yezu wi apiwe, anamafwara aye ahittawa, mbwenye ahikalawo ayana alivi na iyene ofiyedha okwa waye vapingirhizini.—Mt. 26:56; Mk. 15:40, 41.

12. Yezu wattomeli mabasa gani ayana?

¹² Yezu ohattomela ayana mabasa a ttima vaddiddi. Ninga motagiha, ayana aweddeyana ahifiyedha okala anamoona oroma a ovenyihiwa mukwani wa Yezu. Iyene ohattomela mabasa ayana aba a odhowa wawaddela anamafwara aye wi ohivenyihiwa mukwani. (Mt. 28:5, 9, 10) Va Pentekoste wa 33  N.K., ayana aahittikitteliwa vina na muya wokoddela. Nona awene ahivahiwa vina ewodhelo ya ologa dhilogelo dhottiyana-ttiyana na gari ya olaleya “matikiniho a Mulugu.”—Mer. 1:14; 2:2-4, 11.

13. Txini dhinkosa ayana ali Akristu masaka abano, vina ninoonihe dhavi wi ninotamaalela guru dhinkosani?

¹³ Arogorihu anofwanyela otamaleliwa mwaha wa mabasa animukoselani Yehova. Awene anokosa mabasa aniwanana na omaga obe na ovenyihedha, okamihedha makuru a dhilogelo dhina vamodha na mabasa mena ankosa Betel dhottiyana-ttiyana. Awene anokamihedha mabasa ankoseliwa abale anfanyiwa vizini, mabasa otapulela, mabasa opionero na mabasaya omisiyónaria. Anodhowa osunza eskola ya apionero, ya Anamalaleya a Omwene, ya Gileade, dhahene ninga munkosela abali. Mwawenjedhedha, ateliwi anowakamihedha amamuniwa okosa mabasa a mmulogoni vina a munikuruni na Mulugu. Abali aba a ettomo kagawodhile wakwaniha mabasa awa a olaba ninga ‘mivaho dha alobwana’ kohikala awadhiwa anakamihedha. (Ef. 4:8) Onowodha wubuwela elobo-txilobo ya wakamihedhana arogora aba mwaha wa mabasa ankosani?

14. Ninga munlogela Masalmo 68:11, txini enkosa anddimuwa a mulogo a malago?

¹⁴ Anddimuwa a mulogo a malago, anononelamo wi arogora ali ninga “nikuru ninddimuwa na anyakoddo” ankala omala na wale wi akose mabasa vina awene ahikana ewodhelo yinjene ya olaleya muttaka wapama. (Kengesa Masalmo 68:11.) Anddimuwa a mmulogoni anotamela opurelamo  eziwelo yawa. Abigail ologiwe omaromo, ohiloga wi iyene onolibiheya abali aganvuzaga wi txini enkosiye wila arome ologa makani mmabasani a olaleya. Ohenjedhedha vina: “Eji enoddikamihedha wona wi Yehova onoddivaha ettomo munikuruni mwaye”. Mwawenjedhedha anddimuwa a mmulogoni anoziwa wi arogora ororomeleya ahikana ewodhelo enddimuwa vaddiddi ya wakamihedha azombwe a ayana owanana dhorutxa dhawa. (Tito 2:3-5) Txibarene, arogora aba ehu, anofwanyela ottittimihiwa venjene!

15. Makattamiho gani anafwanya arogora abuwene anfunani okamihedhiwa?

¹⁵ Masaka mena, arogora anofunaga nikamihedho na muttu wi alogele agagumanana dhorutxa. (Iza. 1:17) Ninga motagiha, murogora omwaliwe obe oli mamukwela onodha ofuna nikamihedho na muttu wi akale namalogela waye omuttegoni, obe amukamihedhe mabasa-mabasavi agakosile mamune. Murogora wa mwanakalaba onodha ofuna nikamihedho wi muttu mwina amukamihedhe ologa na dotoro. Murogora wa pionera onkamihedha mabasa mena a omwene onodha ofuna nikamihedho na ologeliwa akala attu ena anomukona sabwa ya iyene ohilabetxa vaddiddi mabasa aye opionera dhahene ninga munkosela apionero ena. Txini yina enfwanyelihu wakamihedhana arogora? Ndoweni nitanaalele dila yanawili yotagiha ya Yezu.

16. Yezu ombareli dhavi Maria mowiwanana na mazu ali va Marko 14:3-9?

¹⁶ Yezu Kristu kattiya wi ayana ororomeleya apujiwe. Ninga motagiha, iyene wahimbarela Maria mudhidhi wamukona Marta. (Lk. 10:38-42) Vina wahimbarela Maria ddila yanawili, mudhidhi waloga attu eena wi dhikosileyi kadhikalile. (Kengesa Marko 14:3-9.) Yezu ohinonelamo yamuttukulele Maria omukuttulela makura; iyene ohiloga: “Eddireliye, japama-wene. . . . Muyana oddu ohira ewodhileye.” Iyene vina ohifiyedha ovuhulela wi “mwetemwene munalaleyiwe muthaka wapama” munela ologiwa dhiddirele muyana oddu. Nttittimiho nddimuwa vaddiddi ninvahile Yezu muyana oddule, mulogeliye wi mwetemwene munalaleyiwe muthaka wapama munela ologiwa dhirileye! Mazu aye ahimpangarhaza venjene Maria vowi ena ahimukona!

17. Kavaha yotagiha enoniha wi iyo kaninfwanyela waloga bure arogora.

¹⁷ Weyo onowabarelaga arogorihu egakala yofuneya? Ninga motagiha, katanalela yopadduwa eji. Anamalaleya anomoona murogora oteliwe na mulobwana ohili Munamoona wa Yehova, afiyaga omatugumanoni woyeluwene vina avenyagavo matugumanoya ahinatti ogoma. Anozinddiyela vina wi iyene kandetxana anaye omatugumanoni. Venevo oroma omuloga bure, obuwelaga wi iyene agahiloga na mamune wi amuttiye wattukulega ayima omatugumanoni. Omamalelo awene anozinddiyela wi murogoraya onokosa guru enwodhiye. Awene kanziwa dhotedhene dhinimpadduwela; vina anoziwa wi kahiye iyene ongana mweddelo wa vatakulu vaye. Kokala weyo ogakosile dhavi? Akala weyo onomusiba murogora na mazu awi onovilibihedha, bahi-to, kumulogele ekotti.

18. N’ekalelo gani yina enawodhihu wakamihedha arogorihu?

¹⁸ Nilagihege wi ninowakamihedha arogora ehu na mazu vina na merelo. (1 Jo. 3:18) Murogora dhahi onkuweliwa Annette, wamukweya maye wali muredda, ohiloga: “Amarho aga anda vatakulu wi anone, ena andana oja. Eji yanddittukulela wubuwela wi ddinokweliwa vina ddinokosa mpaddi wa mulogo.” Jordan wahakela nikamihedho vina. Mbali dhahi wahivilevela omukamihedha oziwa osasanya  mukukutta waye. Iyene ohiloga: “Japama oziwa wi abalaga vamodha na arogoraya anodditanala.”

19. Txini enfwanyela okosa anddimuwa a mmulogoni wila akamihedhe arogora?

¹⁹ Anddimuwa a mmulogoni anofwanyela otamela oziwa dhinajombela arogora. Awene anoziwa wi Yehova onfuna wi arogora eddihiwege pama. (Tia. 1:27) Awene anotagiha ofwewa murima wa Yezu mwa ohasegedhaga arogora na malamulo. (Mt. 15:22-28) Anddimuwa a mulogo anzuzumela wakamihedha arogora, anowakosiha arogoraya ottukuleleya wubuwela wi anotanaliwa. Nikuru natugumana Kia, abaliya muziwelani wi iyene onomwalela numba yina, awene ahilaganela omukamihedha. Kia ohiloga: “Eji ehivugula mazuzumo aga. Dhawira na dhologa dha anddimuwa a mmulogoni dhiddikamihedha oziwa wi abali a mmulogoni anoddittittimiha, vina ddinoziwa wi kaddili meka mmakattamihoni mwaga.”

20-21. Ninawodhe dhavi woniha wi ninowattittimiha arogora otene a mmulogoni mwehu?

²⁰ Masaka abano nigang’ana mmulogoni mwehu ninowona dhotagiha dhinjene dha ayana ali Akristu anlaba na guru, amfwanyela okamihedhiwa. Ninga musunzelihu na yotagiha ya Yezu, ninofwanyela oveda mudhidhi wa okala na awene vina nitamelaga waziwa mwawakwana-mwene. Iyo ninowatamaalela vaddiddi sabwa ya mabasa animukoselani Mulugu. Vina ninofwanyela wabarela egakala yofuneya.

²¹ Paulo alebaga mazu omariha a karta yalebeliye akadda Roma, iyene ohalogamo ayana atanu na anai. (Rom. 16:1, 3, 6, 12, 13, 15) Txibarene, ayana aba ahilibiheya vaddiddi mwiwelani dhologa dha Paulo. Nona, nekalelo yakakene iyo vina ninofwanyela wakamihedha arogora otene a mmulogoni mwehu. Nigakosa dhawene, ninolagiha wi ninowakwela awene ninga mpaddi wa anamudhi ehu.