1. Kuchi mandumbu jetu a mapwo akukwasa ululikiso wa Yehova, nawa kapinda muka anji akupalika? (Tala chizulie ha chifukilo)

TWAKUWAHILILA chinji ha kupwa ni mandumbu a mapwo waze akukalakala chinji mu chikungulwila! Chakutalilaho, ayo kakuhana makumbululo ha kukunguluka ni kwambujola sango lipema. Amwe kakukwasa ku mulimo wa kululieka Zuwo lia Wanangana nawa kakulihulumba hali mandumbu jo. Chipwe chocho, no kakupalika mu kapinda munji. Akwo kakufunga yisemi waze hapwa tushinakaji. Eka kakwahungumiona kuli asoko jo. Akwo nawa kakusa tachi hanga alele ana jo ukawo mumu kali twamishi.

2. Mumu liaka twatamba kukolweza mandumbu jetu a mapwo?

² Mumu liaka twatamba kukolweza mandumbu jetu a mapwo? Mumu kanji-kanji akwa-hashi keshi kuvumbika mapwo ngwe chize atela. Chikwo nawa, Mbimbiliya yakutukolweza hanga tukwase mandumbu jetu a mapwo. Chakutalilaho, postolo Paulu kakolwezele chikungulwila cha mu Roma hanga atambwise Febe ni kumukwasa “ni chuma cheswacho mafupa.” (Roma 16:1, 2) Muze te kanda achipwa mukwa-Kristu, Paulu neye kota te kakulelesa mapwo ngwe chize apwile ni kulinga A-Fariseu akwo. Alioze muze apwile mukwa-Kristu, yaputuka kwimbulula Yesu ha kuzanga mapwo ni kwalemesa.—1 Kori. 11:1.

3. Kuchi Yesu te akumona mapwo, chipi-chipi waze apwile ni kulinga upale wa Zambi?

³ Yesu kapwile ni kuvumbika mapwo eswe. (Yoa. 4:27) Iye te keshi kumona mapwo ngwe chize mangana ja yingeleja ya A-Yunda apwile ni kwamona. Umwe mukanda unambe ngwo: “Yesu kakambile kama chimwe chuma chize chasolwele ngwo kahona mapwo vumbi.” Yesu kapwile ni kulihulumba hali mapwo, chipi-chipi waze apwile ni kulinga upale wa Tato. Iye kapwile ni kwamona ngwe mandumbu jenyi, ngwe chize te akumona malunga waze apwile chihanda cha usoko wenyi wa ku ufulielo.—Mateu 12:50.

4. Yika mutulilongesa ha mutwe uno?

 ⁴ Yesu kapwile ni kulihana hanga akwase mapwo waze te akuwayila Zambi. Iye kapwile ni kupalikisa no mashimbu, kwalemesa ni kwakalila. Ha mutwe uno, mutulilongesaho chize mutuhasa kwimbulula Yesu ha kulemesa ni kuvumbika mandumbu jetu a mapwo.

5. Mumu liaka chakupwa chikalu kuli mandumbu amwe a mapwo kupwa hakachi ka mandumbu jo?

⁵ Tulieswe, mapwo ni malunga twakufupiwa kupwa hakachi ka mandumbu jetu. Alioze, kuli mandumbu amwe a mapwo chino hi chashi ko. Mumu liaka? Tutalenu yize amwe a kuli ayo ambile. Umwe ndumbu wa pwo avuluka ngwo Jordan * yamba ngwenyi: “Amu nguli twamishi, nakumona ngwe mu chikungulwila kumushi yize munguhasa kulinga, kashika nakulimona ngwe hi nguli chihanda ko cha chikungulwila.” Kristen, umwe pionelu unakalukila kuze kunafupiwa chinji ukwaso yamba ngwenyi: “Mutu ni uli mwaha mu chimwe chikungulwila, muhasa kulivwa ukawe.” Mandumbu amwe a malunga no che akulivwa. Mutu yoze watwama mu usoko muze muli amwe hi Yela ja Yehova ko, mahasa kulivwa ukawenyi, aku nawa malivwa ngwe mandumbu mu chikungulwila keshi kumupala. Mandumbu a mapwo waze keshi kukatuka ku zuwo mumu lia umwe musongo hanji waze akufunga atu jacho, mahasa kulivwa ukawo. Annette yamba ngwenyi: “Chakupwa chikalu kupwa hamwe ni mandumbu, mumu yami mwe nakukwasa mama.”

6. Kulita ni Luka 10:38-42, yika mutuhasa kulilongesa ha chize Yesu akwashile Marta ni Maria?

⁶ Yesu kapwile ni kupalikisa mashimbu ni mandumbu jenyi a mapwo a ku ufulielo, chikwo nawa kapwile sepa lio mupema. Achinyonga ha usepa uze apwile nawo ni Marta ni Maria, mapwo wano kota kapwile twamishi. (Tanga Luka 10:38-42.) Yesu kapwile ni kwecha hanga ayo alivwe kanawa, kupalikila mu maliji ni mu yitanga yenyi. Maria kakavwile sonyi ja kutwama ku molo ja Yesu ngwe chize kambaji umwe apwile ni kulinga. * Muze Marta te anateleka kulia chakuhona ukwaso wa Maria, iye yevwa uli. Chipwe chocho, kakevwile sonyi hanji woma wa kulweza Yesu chize te anevu. Ha tangwa liacho, Yesu yaalongesa limwe longeso lilemu. Chino kuchakapwile chisuho chitangu chize Yesu ayile ni kwameneka. Iye te kakwameneka ha yisuho yinji ni kusolola ngwo, kakuzanga chinji Marta, Maria ni ndumbwo Lazaru. (Yoa. 12:1-3) Kashika muze Lazaru ayijile chinji, Marta ni Maria kanyingikine ngwo mahasa kwita ukwaso wa Yesu.—Yoa. 11:3, 5.

7. Kuchi mutuhasa kukolweza mandumbu jetu a mapwo?

⁷ Kuli mandumbu amwe a mapwo, kukunguluka che wika chakwaha uhashi wa kupwa hamwe ni mandumbu jo. Kashika twatamba kuzachisa mashimbu jacho hanga twatambwise ni zango, kuhanjika no ni kwasolwela ngwo twakulihulumba chinji hali ayo. Jordan yoze twatongola yamba ngwenyi: “Nakulivwa kanawa muze akwetu akunguchichimieka ha makumbululo jami, muze akungusanyika twambujole chimuwika ni muze akusolola ngwo kakulihulumba hali yami.” Mandumbu jetu a mapwo katamba kumona ngwo ayo kali alemu kuli yetu. Kia yamba ngwenyi: “Nyi chayile ku kukunguluka, ngunanyingika ngwami mandumbu mangusonekena ni kunguhula nyi nguli kanawa. Chino chakungwaha shindakenyo ngwami, mandumbu kakulihulumba hali yami.”

8. Majila akwo aka waze mutuhasa kwimbulwilamo Yesu?

⁸ Mutuhasa kusa mashimbu hanga tushikame ni mandumbu jetu a mapwo ngwe chize  Yesu alingile. Mutuhasa kwasanyika ku zuwo lietu hanga tulie no hamuwika. Ha mashimbu jacho, twatamba kuhanjika yuma ya utakamiso. (Roma 1:11, 12) Nyi uli mukulwana wa mu chikungulwila, watamba kwiwuluka chilweza cha Yesu. Iye kanyingikine ngwenyi, kuli amwe hi chashi ko kununga twamishi, yasolola nawa zwalala ngwenyi, uwahililo wamwenemwene kuwatalile ha kumbata hanji kuya ulo ni kupwa ni ana. (Luka 11:27, 28) Alioze wakwiza ha kusa upale wa Yehova kulutwe lia yuma yeswe.—Mateu 19:12.

9. Yika makulwana a mu chikungulwila mahasa kulinga hanga akwase mandumbu a mapwo?

⁹ Makulwana a mu chikungulwila katamba kumona mapwo mu chikungulwila ngwo kali mandumbu jo a ku ufulielo ni anaye. (1 Timo. 5:1, 2) Muchipema chinji nyi ayo mahanjika ni mandumbu a mapwo ha kuputuka hanji kusongo lia kukunguluka. Kristen yamba ngwenyi: “Umwe mukulwana wa mu chikungulwila yamona ngwenyi chishi kupwa ni mashimbu, chocho yanguhula yize nakulinga hita tangwa. Nevwile kuwaha chinji ha kumona kulihulumba chenyi hali yami.” Muze makulwana a mu chikungulwila akusa mashimbu hanga ahanjike ni mandumbu jo a mapwo, ayo kakusolola ngwo kakulihulumba hali ayo. * Annette yoze twatongola,  kanasolola mumu liaka chili chilemu kuhanjika ni makulwana a mu chikungulwila mashimbu eswe. Yamba ngwenyi: “Chino chakungukwasa kunyingika kanawa makulwana a mu chikungulwila, no chakwakwasa kungunyingika kanawa. Kashika, muze nakupalika mu kapinda, chakupwa chashi kwita ukwaso wo.”

10. Yika muyihasa kukwasa mandumbu a mapwo kulivwa kanawa?

¹⁰ Yetweswe, mapwo ni malunga, twakulivwa kanawa muze akwetu akumona utotombo wetu ni kulemesa yize twakulinga. Alioze nyi keshi kutuchichimieka ha yize twakulinga, mutuhasa kuhonga. Abigail, umwe twamishi pionelu yamba ngwenyi: “Ha mashimbu amwe nakulivwa ngwe niumwe keshi kungupala, mandumbu kanangunyingika wika ngwo ndumbu nganji hanji ngwo mwana wa kamba nganji. Hamwe nakulivwa ngwe chatwamineko.” Haliapwila tutalenu maliji a ndumbu Pam. Muze apwile twamishi, iye kakalakalile ngwe mishionaliu ha miaka yinji. Kulutwe yecha mulimo wacho hanga afunge yisemi jenyi. Musono kali ni miaka 70 nawa kanakalakala ngwe pionelu. Pam yamba ngwenyi: “Chuma chakungukwasa chili kunyingika ngwo, akwetu kakulemesa yize nakulinga.”

11. Kuchi Yesu asolwele ngwo, te kakulemesa mapwo waze apwile ni kumukaula mu mulimo wenyi wa kwambujola?

¹¹ Yesu kapwile ni kulemesa mapwo ashishika waze apwile ni kumukwasa ni “yikumba yo.” (Luka 8:1-3) Yesu kakechele wika hanga mapwo jacho amukwase, alioze kapwile ni kwalongesa umwenemwene hakutwala kuli Zambi. Chakutalilaho, iye kaalwezele ngwenyi te mafwa mba kulutwe mamuhindwisa. (Luka 24:5-8) Ngwe chize alingile kuli apostolo jenyi, Yesu kakolwezele mapwo waze apwile ni kumukaula hakutwala ku kapinda yoze ayo te mapalika. (Marku 9:30-32; 10:32-34) Twiwulukenu ngwetu muze Yesu amukwachile, tumbaji twenyi kachinyine. Alioze muze te anafu ha mutondo wa lamba, amwe a kuli mapwo waze te akumukwasa kapwile hamwe nenyi.—Mateu 26:56; Marku 15:40, 41.

12. Mulimo uka Yesu ahanyine kuli mapwo?

¹² Yesu kahanyine kuli mapwo mulimo ulemu chinji. Chakutalilaho, muze amuhindwishile mapwo e aliangile kumumona. Iye yaaha chiteli cha kuya ni kwambulwila apostolo jenyi ngwo kamuhindwisa. (Mateu 28:5, 9, 10) Chikwo nawa, muze amwangine spiritu yisandu ha Pentekoste 33 M.J., kota hapwile mapwo. Nyi chamwenemwene chino chalingiwile, mapwo jacho kota no kapwile ni uhashi wa kuhanjika mu malimi eka ni eka, ni kuhanjika ni akwo hakutwala ku “yilinga yinene ya Zambi.”—Yili. 1:14; 2:2-4, 11.

13. Yuma yika mandumbu jetu a mapwo akulinga musono, nawa kuchi mutuhasa kusolola ngwo twakulemesa yize ayo akulinga?

¹³ Twatamba kuchichimieka mandumbu jetu a mapwo ha yuma yeswe yize akulinga mu mulimo wa Yehova. Milimo yacho muyihasa kupwa kululieka Mazuwo a Wanangana, kukwasa yizavu ya limi lia yilambala ni kukalakala ku Mbetele. Ayo kakulihana mu mulimo wa kukwasa kuze kwalingiwa luyinda, kulumbununa mikanda, kukalakala ngwe mapionelu ni mishionaliu. Chizechene ngwe mandumbu a malunga, mandumbu a mapwo no kakuya ku Shikola ya Pionelu, Shikola ya Akwa-Kwambujola Wanangana ni ku Shikola ya Ngiliate. Waze ali ku malo kakukwasa malunga jo kufunga kanawa yiteli yize akwete mu chikungulwila ni mu ululikiso wa Yehova. Mandumbu wano kakuhasa kupwa “yawana kuli atu” mumu lia ukwaso wa mapwo jo. (Efwe. 4:8) Shina hiwanyonga majila waze mukolwezelamo mandumbu wano a mapwo ha yuma yeswe yize akulinga?

14. Kulita ni Samu 68:11, yika akulinga makulwana a mu chikungulwila waze akwete mana?

¹⁴ Mandumbu a mapwo kali “chihuji chinene” cha atu waze akukilikita chinji. Kanji-kanji ayo kakwambujola chinji sango lipema. (Tanga Samu 68:11.) Makulwana a mu  chikungulwila waze akwete mana, kakumona tachi ja mandumbu jacho ni kufupa kulilongesa ha yilweza yo. Abigail yoze twatongola, kakuwana utakamiso muze mandumbu akumuhula hakutwala ku yize yakumukwasa mba aputuke lusango mu munda. Iye yamba ngwenyi: “Chino chakungukwasa kumona ngwami, kumana mu ululikiso wa Yehova muli mulimo uze munguhasa kulinga.” Chikwo nawa, makulwana a mu chikungulwila kananyingika ngwo, mandumbu a mapwo ashishika waze hakola, kakukwasa mandumbu a mapwo waze achili akweze muze anapalika mu kapinda. (Titu 2:3-5) Kwamba pundu, mandumbu jetu a mapwo katela zango ni usakwililo wetu!

15. Ha mashimbu aka mandumbu jetu a mapwo akufupiwa kwakalila?

¹⁵ Ha mashimbu amwe mandumbu a mapwo kakupalika mu yimwe yipikalo yize akufupiwa yoze maakalila. (Iza. 1:17) Chakutalilaho, ndumbu wa pwo yoze tuliwa hanji yoze hanalilakula ni mukwo-lunga, mahasa kufupa yoze mamukalila ha ulite uze ali nawo hanji kumukwasa ha yimwe yize mukwo-lunga apwile ni kulinga. Muchihasa kupwa ngwe umwe ndumbu wa pwo kashinakaji kanafupiwa ukwaso wa kuhanjika ni ndotolo. Hanji umwe ndumbu wa pwo pionelu yoze wakulinga yimwe milimo mu ululikiso, mahasa kufupiwa yoze mamukalila muze mandumbu akwo mamwamba ngwo keshi kwambujola chinji ngwe chize akulinga mapionelu-ni-akwo. Yika nawa twatamba kulinga hanga tukwase mandumbu jetu a mapwo? Tutalenu nawa chilweza cha Yesu.

16. Kulita ni Marku 14:3-9, kuchi Yesu anakakalila Maria?

¹⁶ Yesu te keshi kulaluka ha kukalila mandumbu jenyi a mapwo muze te akufupiwa ukwaso. Chakutalilaho, iye kanakakalila Maria muze Marta anakamwamba ngwo keshi kumukwasa. (Luka 10:38-42) Yesu kanakakalila nawa Maria muze atu amwambile ngwo, kakwata chiyulo chipi. (Tanga Marku 14:3-9.) Yesu kanyingikine yize yapwile mu mbunge ya Maria, hachino yamuchichimieka, hakwamba ngwenyi: Kalinga “chitanga chipema hali yami. . . . Halinga ni kuhasa chenyi.” Iye yaprofeteza nawa ngwenyi: “Kweswako makambujola sango lino lipema hashi heswe, chino yono pwo halinga kumakachifumanyisa nawa hanga akamwiwuluke.” Yino ye mutwe wa kaposhi yono unambe. Tuli ni shindakenyo ngwetu, maliji a Yesu kakolwezele chinji Maria muze te anamwambila yuma yipi. Chuma chipema ha lusango yono chili chize Yesu azachishile yize Maria alingile hanga asolole ngwo, sango lipema te muliheta hashi heswe.

17. Hana chilweza cha chize muhasa kukalila umwe ndumbu wa pwo.

¹⁷ Shina wakukalila mandumbu a mapwo muze ayo akufupa ukwaso? Chakutalilaho, tunyongenu ngwe mu chikungulwila chenu muli umwe ndumbu wa pwo yoze mukwo-lunga hi chela cha Yehova ko. Mandumbu amwe mu chikungulwila mamona ngwo, ndumbu wacho kakuheta kasula ha kukunguluka alioze mutangu kutuhuka. Chikwo nawa, iye keshi kwiza ni ana jenyi ku kukunguluka. Hachino, ayo maputuka kumuyenga ni kwamba ngwo: ‘Iye katamba kushinjila mukwo-lunga hanga amutayize apwe ni kwiza ni ana ku kukunguluka.’ Alioze, o kanyingikine ngwo ndumbu yono kanase tachi hanga alinge yize mahasa. Ku zuwo, iye keshi ni ulite wa kulinga yuma yeswe ukawenyi. Hi iye wika ko watamba kukwata chiyulo hali ana. Yika mulinga hanga ukalile ndumbu wacho? Muchichimieke ha tachi jize akusa nawa hanjika ni atu akwo hakutwala ku yuma yipema yize akulinga. Nyi wachilinga, muchihasa kuhwisa yuma yipi yize atu akwo akuhanjika hali ndumbu wacho.

18. Majila akwo aka waze mutuhasa kukwashilamo mandumbu jetu a mapwo?

¹⁸ Mutuhasa kusolola zango lietu ha kukwasa mandumbu a mapwo ha yize anafupiwa. (1 Yoa. 3:18) Ndumbu Annette, yoze wapwile ni kufunga naye wayiza, yamba ngwenyi: “Mandumbu  kapwile ni kwiza ku zuwo hanga afunge mama shimbu ami ngunalinga yuma yikwo. Yami namwene ngwami kakunguzanga, nawa ngwami nguli chihanda cha chikungulwila.” Jordan neye katambwile ukwaso. Umwe ndumbu yamukwasa ha chiza atamba kululieka mashinyi jenyi. Yamba ngwenyi: “Chili chipema kunyingika ngwami, mandumbu jami kakulihulumba ha mwono wami.”

19. Majila akwo aka waze makulwana mahasa kukwashilamo mandumbu a mapwo?

¹⁹ Chikwo nawa, makulwana a mu chikungulwila katamba kukwasa mandumbu a mapwo ha yize anafupiwa. Ayo kananyingika ngwo, Yehova kanazange hanga afunge kanawa mandumbu a mapwo. (Tia. 1:27) Makulwana a mu chikungulwila katamba kupwa yimbovu ngwe Yesu; ayo katambile kusa shimbi homa haze hanatela kwashiwisa yuma. (Mateu 15:22-28) Nyi makulwana a mu chikungulwila makwasa mandumbu a mapwo, ayo mamona ngwo Yehova ni ululikiso wenyi kakulihulumba hali ayo. Kia yoze twatongola, kafupiwile kwalukila ku zuwo lieka. Muze mukulwana wa mu chizavu anyingikine chikuma chacho, kawashi-washi yamukwasa. Kia yamba ngwenyi: “Chino changukwashile kuhwima mbunge. Maliji a utakamiso ni ukwaso wa makulwana a mu chikungulwila yangukwashile kumona ngwo, nguli chihanda cha chikungulwila. Ngunanyingika ngwami chipwe ngwe mungupalika mu kapinda, nihindu kuchishi ukawami.”

20-21. Kuchi mutuhasa kusolola ngwetu twakulemesa mandumbu a mapwo mu chikungulwila chetu?

²⁰ Mu yikungulwila yeswe munazale too ni mandumbu a mapwo ashishika waze atela ukwaso wetu. Ngwe chize twalilongesa ha chilweza cha Yesu, twatamba kwakwasa ha kupalikisa no mashimbu ni kwanyingika kanawa. Chikwo nawa, twatamba kusolola ngwetu, twakulemesa yuma yeswe yize ayo akulinga mu mulimo wa Zambi. Kusulaho, twatamba kwakalila muze mafupiwa ukwaso.

²¹ Ku songo lia mukanda wenyi kuli A-Roma, Paulu yatongola mapwo livwa ha majina. (Roma 16:1, 3, 6, 12, 13, 15) Kwamba umwenemwene, mandumbu wano a mapwo kawanyine utakamiso muze atambwile moyo ni uchichimieko wa Paulu ha mukanda uze anakaatumina. Kwasa mandumbu a mapwo mu chikungulwila chenu ngwe chize Paulu alingile. Nyi wachilinga, musolola ngwo ayo kali chihanda cha usoko wetu wa ku ufulielo!