1. Ki bann ser i fer dan lorganizasyon e ki problenm serten i fer fas avek? (Vwar portre lo kouvertir.)

NOU vreman kontan pour annan bann ser ki pe travay dir dan kongregasyon! Par egzanp, zot partisipe dan renyon e dan predikasyon. Serten i ede pour fer mentenans kot Lasal Rwayonm e zot montre ki zot enterese avek bann frer ek ser. Byensir, zot fer fas avek problenm. Serten parmi zot pe pran swen avek zot paran aze. Lezot pe ganny problenm avek zot fanmir. I annan ki bann paran tousel, ki pe travay dir pour pran swen avek zot zanfan.

2. Akoz nou devret fer zefor pour ankouraz nou bann ser?

² Akoz nou devret ankouraz nou bann ser? Parski dan sa lemonn, souvandfwa bann madanm pa ganny sa respe ki zot merite. An plis, Labib i ankouraz nou pour siport zot. Par egzanp, zapot Pol ti demann kongregasyon Ronm pour byen resevwar Febe e pour “donn li nenport led ki i bezwen.” (Rom. 16:1, 2) Ler Pol ti en Farizyen, i ti form parti en group ki ti krwar ki bann madanm i enferyer e ki ti tret bann madanm dan sa fason. Me apre ki i ti vin en Kretyen, i ti swiv legzanp Zezi. Pol ti tret bann madanm avek respe ek labonte.​—1 Kor. 11:1.

3. Ki mannyer Zezi ti tret bann madanm e ki mannyer i ti vwar bann madanm ki ti fer lavolonte Bondye?

³ Zezi ti demontre respe anver tou madanm. (Zan 4:27) I pa ti vwar bann madanm parey bann sef larelizyon Zwif dan son letan. Anfet, en referans lo Labib i dir: “Zezi pa ti zanmen dir nanryen ki ti mank respe pour bann madanm.” Me Zezi ti annan plis respe pour bann madanm ki ti fer lavolonte son Papa. I ti apel bann madanm koumsa son bann ser e ler i ti koz lo bann ki ti form parti son fanmir spirityel,  i ti mansyonn plizyer madanm ansanm avek bann msye.​—Mat. 12:50.

4. Ki nou pou diskite dan sa lartik?

⁴ Zezi ti toultan pare pour ed son bann ser spirityel. I ti montre ki zot enportan pour li e i ti defann zot. Aprezan annou vwar ki mannyer nou kapab swiv legzanp Zezi e demontre konsiderasyon pour nou bann ser.

5. Akoz serten ser i kapab vwar li difisil pour annan bann bon zanmi?

⁵ Ki swa nou en frer oubyen ser, nou tou nou bezwen annan bann bon zanmi. Par kont, bann ser i kapab vwar li difisil pour fer sa. Akoz? Annou vwar sa ki serten nou bann ser i dir. En ser ki apel Jordan * i dir: “Mon en selibater e parfwa mon santi ki mon napa en plas dan kongregasyon e ki mon pa form parti kongregasyon.” En pionye ki apel Kristen e ki ti al reste en lot landrwa pour li kapab fer plis dan predikasyon, i dir: “Ler ou fek vin dan en nouvo kongregasyon, ou santi ou tousel.” Serten frer osi i kapab santi parey. En ser ki reste avek son fanmir ki pa Temwen Zeova, i kapab vwar li difisil pour santi li pros avek son fanmir e avek bann frer ek ser dan kongregasyon. Serten ser i kapab santi zot tousel akoz zot malad e zot pa kapab kit zot lakaz oubyen akoz zot bezwen pran swen avek en manm fanmir ki malad. En ser ki apel Annette i dir: “Mon pa ti kapab pas letan avek bann frer ek ser akoz mon ti pe pran swen avek mon manman.”

6. Dapre Lik 10:38-42, ki mannyer Zezi ti ed Mart ek Mari?

⁶ Zezi ti pas letan avek son bann ser spirityel e i ti vreman en bon zanmi pour zot. Par egzanp, i ti annan en bon lanmitye avek Mari ek Mart e i paret ki sa de ser ti selibater. (Lir Lik 10:38-42.) I kler ki Zezi ti fer zot santi zot alez par sa ki i ti dir e fer. Mari ti santi li konfortab pour asiz kot lipye Zezi parey en disip. * Mart ti ankoler akoz Mari pa ti pe ed li prepar manze, i ti santi li lib pour dir Zezi sa ki i ti panse. Sa zour, Zezi ti kapab ed tou le de madanm pour aprann en leson enportan. I ti osi montre ki i kontan zot e osi zot frer Lazar, par vizit zot dan bann lezot lokazyon. (Zan 12:1-3) Alor ler Lazar ti tonm malad, Mari ek Mart ti konnen ki zot ti kapab demann Zezi led.​—Zan 11:3, 5.

7. Ki en fason nou kapab ankouraz nou bann ser?

⁷ Pour serten ser, renyon i sa moman prensipal ki zot pas letan avek bann frer ek ser. Alor nou devret servi sa bann moman pour akeyir zot, koz avek zot e montre zot ki nou kontan zot. Jordan, ki’n ganny mansyonnen pli boner, i dir: “Ler lezot i remersye mwan pour mon komanter dan renyon, zot fer laranzman pour al predikasyon avek mwan oubyen zot montre ki zot kontan mwan, sa i ankouraz mwan en kantite.” Nou devret montre nou bann ser ki zot enportan pour nou. Kia i dir: “Si mon mank renyon, mon konnen ki mon bann frer ek ser pou kontakte mwan pour gete ki mannyer mon ete. Sa i montre mwan ki bann frer ek ser i kontan mwan.”

8. Dan ki lezot fason nou kapab swiv legzanp Zezi?

⁸ Parey Zezi, nou kapab fer zefor pour pas letan avek nou bann ser. Petet nou  kapab envit zot kot nou pour en repa oubyen pour detann. Ler nou fer sa, nou devret fer sir ki sa ki nou dir i ankourazan. (Rom. 1:11, 12) Bann ansyen i devret tret bann ser parey Zezi ti fer. Zezi ti konnen ki i ti pou difisil pour serten reste selibater. Me i ti montre ki i pa depan lo si en dimoun in marye oubyen annan zanfan pour li ere. (Lik 11:27, 28) O kontrer nou pou vreman ere si nou servis pour Zeova i sa keksoz pli enportan dan nou lavi.​—Mat. 19:12.

9. Ki bann ansyen i kapab fer pour ed bann ser?

⁹ Bann ansyen i sirtou bezwen tret bann ser Kretyen parey zot bann ser ek manman spirityel. (1 Tim. 5:1, 2) I ti pou byen si bann ansyen i servi sa letan avan oubyen apre renyon pour koz avek bann ser. Kristen i dir: “En ansyen ti remarke ki mon ti vreman bizi e i ti anvi konpran ki mannyer mon organiz mon letan. Mon ti vreman apresye ki i ti enterese avek mon byennet.” Ler bann ansyen i pran letan pour koz avek bann ser, zot montre ki zot enterese avek byennet sa bann ser. * Annette, ki’n ganny mansyonnen pli boner, i eksplike akoz i bon pour koz avek bann ansyen souvan. I dir: “Mon aprann konn zot pli byen e zot osi zot konn mwan pli  byen. Koumsa, ler mon pe fer fas avek problenm, i pli fasil pour demann zot led.”

10. Kwa ki kapab fer nou bann ser ere?

¹⁰ Ki swa nou en msye oubyen en madanm, nou tou nou kontan ler lezot i remark bann abilite ki nou annan e zot dir nou ki zot apresye travay ki nou fer. Par kont, si personn pa demontre lapresyasyon pour travay ki nou’n fer oubyen pour nou bann abilite, sa i kapab dekouraz nou. En pionye ki apel Abigail e ki selibater i dir ki parfwa i santi ki personn pa remark li. I dir: “Zot konn mwan zis konman ser entel oubyen fiy entel. Parfwa mon santi konmsi mon envizib.” Annou vwar leksperyans en ser ki apel Pam. Menm si i selibater, pour plizyer lannen i ti servi konman en misyonner. Pli tar, i ti retourn kot li pour pran swen avek son paran. Ozordi Pam i dan son 70 an e i ankor en pionye. I dir: “Sa ki’n ed mwan plis i ler lezot i apresye travay ki mon fer.”

11. Ki mannyer Zezi ti montre ki i apresye bann madanm ki ti siport li pandan son minister?

¹¹ Zezi ti apresye bann madanm ki ti “servi zot keksoz” materyel pour ed li. (Lik 8:1-3) I pa ti zis donn zot sa privilez me i ti montre zot bann laverite enportan konsernan lavolonte Bondye. Par egzanp, i ti dir zot ki i ti pou mor e ki i ti pou ganny resisite. (Lik 24:5-8) Zis parey i ti prepar son bann zapot pour fer fas avek bann difikilte ki zot ti pou rankontre, i ti osi prepar sa bann madanm. (Mark 9:30-32; 10:32-34) Menm si bann zapot ti sove ler Zezi ti ganny arete, serten sa bann madanm ki ti siport li pandan son minister, ti la avek li ler i ti pe mor lo poto.​—Mat. 26:56; Mark 15:40, 41.

12. Ki travay Zezi ti donn bann madanm?

¹² Zezi ti donn bann madanm en travay enportan. Par egzanp, serten madanm fidel ti bann premye pour vwar Zezi apre ki i ti’n resisite. I ti demann sa bann madanm pour dir bann zapot ki i’n resisite. (Mat. 28:5, 9, 10) Ler bann disip ti ganny lespri sen Lapannkot lannen 33, i kapab ki i ti annan bann madanm parmi. Si zot ti la, i kapab ki zot osi zot ti ganny sa abilite pour koz diferan langaz e zot ti kapab koz avek lezot konsernan “bann keksoz merveye ki Bondye in fer.”​—Akt 1:14; 2:2-4, 11.

13. Ki bann ser pe fer ozordi e ki mannyer nou kapab demontre lapresyasyon pour sa ki zot fer?

¹³ Nou bann ser i merit ganny felisite pour tou sa ki zot fer dan servis Zeova. Sa bann ser i partisip dan konstriksyon ek mentenans bann batiman, dan predikasyon avek bann group ki koz en lot langaz e zot travay dan Betel. Zot ede dan bann travay led sekour apre en dezas, zot ede tradwir bann piblikasyon e zot servi konman pionye ek misyonner. Parey bann frer, bann ser i asiste lekol pionye, Lekol pour bann predikater Rwayonm ek Lekol Gilead. An plis, bann madanm i ed zot msye pour ki zot msye i kapab desarz zot bann responsabilite dan kongregasyon e dan lorganizasyon. Sa bann frer i “bann zonm konman kado” e zot fer en kantite pour ed lezot. Par kont, si zot madanm pa ti ed zot, i ti pou pli difisil pour zot fer zot travay. (Efe. 4:8) Eski ou kapab mazin diferan fason pour ed nou bann ser dan sa ki zot fer?

14. Parey in ganny dir dan Psonm 68:11, ki en ansyen ki saz i fer?

¹⁴ En ansyen ki saz i konpran ki bann ser i “en gran larme” ki pare pour travay e ki souvandfwa zot anons byen sa bon  nouvel. (Lir Psonm 68:11, NWT) * Alor bann ansyen i esey rod fason pour aprann avek sa bann ser. Abigail, ki’n ganny mansyonnen pli boner, i dir ki i vreman apresye ler bann frer i demann li ki lapros ki i’n vwar i pli efikas pour konmans bann konversasyon avek bann dimoun dan teritwar. I dir: “Sa i ed mwan vwar ki mon annan en travay enportan dan lorganizasyon Zeova.” Osi, bann ansyen i rekonnet ki bann ser fidel ki pli aze i bann bon led pour bann ser ki pli zenn, letan zot pe pas dan difikilte. (Tit 2:3-5) Sirman, nou bann ser i merit nou lanmour ek lapresyasyon.

15. Kan ki bann ser i kapab bezwen led?

¹⁵ Parfwa, bann ser i kapab bezwen en dimoun pour koz pour zot ler zot dan en problenm. (Iza. 1:17, NWT) Par egzanp, en vev oubyen en ser ki’n divorse i kapab bezwen en dimoun pour koz pour li e ed li pour fer serten keksoz ki son msye ti abitye fer. En ser aze i kapab bezwen led pour koz avek dokter. Oubyen en ser pionye ki fer bann lezot travay dan lorganizasyon Zeova i kapab bezwen en dimoun pour defann li si lezot dimoun i kritik li akoz i pa pas bokou letan dan predikasyon parey lezot pionye. Ki lezot fason nou kapab ed nou bann ser? Ankor enn fwa, annou vwar legzanp Zezi.

16. Dapre Mark 14:3-9, ki mannyer Zezi ti defann Mari?

¹⁶ Zezi ti pare pour defann son bann ser spirityel ler lezot pa ti konpran zot. Par egzanp, ler Mart ti kritik Mari, Zezi ti defann li. (Lik 10:38-42) I ti osi defann Mari, ler lezot ti kritik Mari akoz zot ti krwar ki i’n fer en move desizyon. (Lir Mark 14:3-9.) Zezi ti konn lentansyon Mari e i ti felisit li par dir: “I’n fer en bon aksyon anver mwan. . . . I’n fer sa ki i kapab.” I ti osi dir ki sa ki Mari ti’n fer ti pou ganny rakonte “nenport kote dan lemonn kot sa bon nouvel i ganny anonse,” zis parey dan sa lartik. I enteresan ki ler Zezi ti pe felisit Mari pour son bon aksyon, i ti osi dir ki sa ki Mari ti’n fer ti pou ganny anonse ansanm avek sa bon nouvel ki ti pou ganny anonse partou lo later. Nou kapab asire ki sa ki Zezi ti dir ti rekonfort Mari!

17. Donn en legzanp lo kan ki nou kapab defann en ser.

¹⁷ Eski ou defann ou bann ser spirityel ler i neseser? Annou vwar en legzanp. Meton serten proklanmater i remarke ki en ser ki son msye pa Temwen Zeova i souvan ariv tar renyon e i ale zis konman renyon i fini. Zot osi remarke ki sa ser pa toultan anmenn son bann zanfan renyon. Alor, zot kritik li akoz zot krwar ki sa ser i devret met son lipye ater e dir son msye ki i devret les son bann zanfan vin renyon avek li. Par kont, zot pa realize ki sa ser pe fer sa ki i kapab. Sa ser pa kapab vreman kontrol son plan e pa li ki fer bann desizyon final konsernan son bann zanfan. Ki ou kapab fer si ou tann lezot pe kritik en ser dan sa fason? Si ou felisit sa ser pour tou sa travay ki i fer e ou dir avek lezot kwa ki i pe fer byen, ou kapab fer lezot aret kritik li.

18. Ki lezot fason nou kapab ed nou bann ser?

¹⁸ Nou kapab montre nou bann ser ki kantite ki nou kontan zot par ofer zot bann led pratik. (1 Zan 3:18) Annette, sa ser ki pe pran swen avek son manman ki malad, i dir: “Serten frer ek ser i vin kot mon lakour pour pran swen avek mon  manman pour en pe letan pour ki mon kapab fer en lot keksoz oubyen zot anmenn manze. Sa i fer mwan santi ki zot kontan mwan e ki mon form parti kongregasyon.” Jordan osi ti ganny led. En frer ti ed li aprann ki mannyer pour fer mentenans lo son loto. I dir: “Mon kontan pour konnen ki mon bann frer ek ser i kontan mwan e zot anvi ki mon an sekirite ler mon pe dray.”

19. Ki lezot fason bann ansyen i kapab ed bann ser?

¹⁹ Pareyman bann ansyen i osi esey pran swen avek bann ser. Zot konnen ki Zeova i anvi ki bann ser i ganny trete dan en bon fason. (Zak 1:27) Alor bann ansyen i swiv legzanp Zezi e zot rezonnab. Zot kapab fer sa ler zot demontre labonte e zot konpran bann ser olye fer bann lareg. (Mat. 15:22-28) Ler bann ansyen i fer zefor pour ed bann ser, zot fer sa bann ser santi ki Zeova ek son lorganizasyon i kontan zot. Ler sirveyan group predikasyon ki Kia ti ladan ti aprann ki Kia ti pe al reste en lot landrwa, deswit i ti fer laranzman pour ed li. Kia i dir: “Sa ti ed mwan pour pa tro enkyet. Vi ki bann ansyen ti ankouraz e donn mwan sa led ki mon bezwen, sa ti montre mwan ki mon ti annan en rol enportan dan kongregasyon e ki mon pa tousel ler mon fer fas avek bann sityasyon difisil.”

20-21. Ki mannyer nou montre ki nou kontan nou bann ser Kretyen?

²⁰ Ler nou get dan nou kongregasyon ozordi, nou vwar en kantite ser ki travay dir e ki merit ganny ankouraze. Parey nou’n vwar avek legzanp Zezi, nou kapab ed zot par pas letan avek zot e aprann konn zot. Nou kapab demontre nou lapresyasyon pour sa ki zot fer dan servis Bondye. Nou kapab defann zot kan i neseser.

²¹ A lafen sa let ki Pol ti ekri pour bann Romen, Pol ti mansyonn non nef madanm Kretyen. (Rom. 16:1, 3, 6, 12, 13, 15) San dout, sa bann madanm ti ganny ankouraze ler zot ti tande ki zapot Pol ti fer zot salanm e ki i ti felisit zot. Nou osi nou devret ankouraz nou bann ser dan nou kongregasyon. Ler nou fer sa, nou montre ki nou kontan zot e ki zot form parti nou fanmir spirityel.