1. San a wantu sani di den sisa e du aini a kemeente? Sowtu tesi e miti son wan fu den? (Luku a fowtow a fesise fu A Wakititolen.)

WI E piisii anga den somen sisa fu u di e wooko taanga aini a kemeente. Den e gi piki a den komakandaa, den e holi lezing, den e yeepi seeka a komakandaa peesi, den e peleiki fayafaya, den e holibaka gi den baala anga sisa fu den. Ma den sisa ya abi booko-ede tu. Son wan fu den sisa ya mu solugu den mma efuso den dda di kon gaandi. Taawan a den famii e suku fu tapu den fu dini Yehofa. Son sisa a den wawan mu wooko taanga fu solugu den pikin fu den.

2. Saide u mu e libi bun anga den sisa fu u?

² Saide u mu holibaka gi den sisa fu u? A goontapu ya nai libi bun anga umansama, sama nai lesipeki den. Neen meke Beibel taki u mu holibaka gi den. Apostel Pawlesi be taigi a kemeente a Rome taki den be mu ‘bali wadaa gi Feibe. Den be mu gi en ala san a be abi fanowdu tu’ (Rom. 16:1, 2). Pawlesi a be wan Faliseiman fosi a be toon wan Kelesten. U sabi taki den man ya á be e lesipeki umansama. Toku di Pawlesi toon wan Kelesten, a be e si umansama enke fa Yesesi e si den. A be e lesipeki den, a be e libi bun anga den tu.​—1 Kor. 11:1.

3. Fa Yesesi be e libi anga umansama? Fa a be e si den uman di be e dini Gadu?

³ Yesesi be e lesipeki ala umansama (Yoh. 4:27). A á be e si den enke fa den Dyu keliki fesiman be e si den. Wan buku di e taki fu den sani di sikiifi aini Beibel taki: ‘Noiti Yesesi taki wan sani fu soso umansama.’ Yesesi be e lesipeki den umansama di be e dini Yehofa. A be e si den enke en sisa. Te Yesesi be e kai den sama di a be lobi enke en  famii fu di den be e dini Yehofa, a be e kai umansama nen tu.​—Mat. 12:50.

4. San wi o luku aini a artikel ya?

⁴ Ala yuu Yesesi be de kabakaba fu yeepi den uman di be e dini Gadu. A be e soi den taki den pelensipali gi en, a be e opo taki gi den tu. Meke u luku fa u sa waka a Yesesi baka.

5. Saide a sa taanga gi son sisa fu abi bun mati?

⁵ Ala sama abi bun mati fanowdu, ma son leisi ai taanga gi den sisa fu u fu de makandaa anga sama di e gi den taanga-sikin. Saide? Wan sisa den e kai Jordan * taki: ‘Fu di mi á toow meke son yuu mi e fii enke mi nai fiti aini a kemeente.’ Krista, wan pionili sisa di foloisi go a wan peesi pe moo peleikiman de fanowdu taki: ‘Te i foloisi go a wan taa kemeente, biginbigin yu e fii enke a yu wawan de.’ Kande son baala e fii so tu. Efu den sama aini yu osu nai dini Yehofa, kande ai taanga gi u fu fusutan useefi son leisi. A sani ya sa meke i fii enke a yu wawan de. Son sisa e fii enke a den wawan de fu di den abi wan siki di e meke den á poi komoto a osu, efuso fu di den mu solugu wan famii di siki. Wan sisa den e kai Annette taki: ‘Te baala anga sisa be kai mi fu go a peesi anga den, mi á be e poi go bika a mi be mu luku mi mma.’

6. Enke fa Lukasi 10:38-42 e soi, da fa Yesesi yeepi Maata anga Maliya?

⁶ Yesesi be lobi de makandaa anga den umansama di be toon en bakaman. En anga den a be mati. Tu fu den uman ya, a be Maliya anga en sisa Maata. A gei enke den tu uman ya á be toow. (Leisi Lukasi 10:38-42.) Yesesi be e libi switi anga den neen meke den be e si Yesesi enke den mati. Wan leisi di Yesesi be kon a den osu, Maliya á be feele fu go sidon neen futu se fu aliki san a be wani leli den. * Maata seefi á be feele fu akisi Yesesi fu a meke Maliya go yeepi en wooko. A dei de Yesesi yeepi den tu uman ya fu fusutan san a den moo pelensipali sani. Yesesi be soi taki a lobi den uman ya, anga den baala Lasalesi, bika a be lobi go luku den (Yoh. 12:1-3). Neen meke a nai foondoo u taki Maliya anga Maata sende kai Yesesi di Lasalesi be siki.​—Yoh. 11:3, 5.

7. Fa u sa gi den sisa taanga-sikin?

⁷ Somen fu den sisa fu u, a den komakandaa namo den e miti taa baala anga sisa. Neen meke te u si den a komakandaa u mu bali wadaa gi den, u mu taki anga den, u mu soi den taki wi e booko wi ede anga den. Jordan taki: ‘Ai bigi gi mi te ye, te taawan e taigi mi taki den be lobi wan piki di mi gi na a komakandaa, te den e meke mofu fu wooko anga mi aini a peleikiwooko, efuso te den e du taa sani di e soi taki den e booko den ede anga mi.’ U mu e soi den sisa fu u taki u lobi den. Kia taki: ‘Efu mi á go a komakandaa wan dei, mi sabi taki baala anga sisa o telefon mi akisi fa ai go anga mi. A sani ya e soi mi taki den baala anga sisa e booko den ede anga mi.’

8. Fa u sa waka a Yesesi baka?

⁸ Leti enke Yesesi, u sa suku fasi fu de makandaa anga den sisa fu u. Kande u sa kai den fu kon nyan wan sani a wi osu efuso fu go koi a wan peesi. Te u kai den  kon a wi osu, den toli di wi o gi mu e gi taawan taanga-sikin (Rom. 1:11, 12). Owluman mu meke moiti fu denki enke Yesesi. Yesesi be sabi taki te wan sama á toow, son leisi ai fii booko-saka. Ma a be soi den bakaman fi en kiin tu taki a ná te wan sama toow, efuso te a meke pikin, da a o de koloku tuutuu (Luk. 11:27, 28). A sani di o meke wan sama de koloku tuutuu, a te ai dini Yehofa anga en hii ati.​—Mat. 19:12.

9. Fa owluman sa yeepi den sisa aini a kemeente?

⁹ Owluman mu e si den umansama di de aini a kemeente enke den sisa anga den mma (1 Tim. 5:1, 2). Owluman mu e meke moiti fu taki anga den sisa ya fosi a komakandaa bigin, efuso baka a komakandaa. Krista taki: ‘Wan owluman be si taki na ala yuu mi de a lon tapu, neen meke a akisi mi san mi e du ala dei. Mi be e si taki a be e booko en ede anga mi.’ Te owluman e meke ten fu taki anga den Kelesten sisa fu den, den e soi taki den e booko den ede anga den. * Annette taki: ‘Te i gwenti taki anga den owluman, yu e sabi den moo bun. Denseefi e kon sabi i moo bun tu. A sani ya e meke a moo makiliki gi mi fu taki anga den te mi abi polobelema.’

10. San o yeepi den sisa fu u fu du den wooko anga piisii?

¹⁰ Ala wi e fii bun te taawan e si a wooko di wi e du, wi e fii bun tu te den e gafa u. Ma te nawan sama e poti pakisei na a moiti di wi e meke, a sani ya sa meke u fii booko-saka. Wan pionili sisa den e kai Abigail, di á toow taki: ‘Sama nai poti pakisei a mi. Den sabi namo taki mi na a pikin fu sowan sama, efuso a sisa fu sowan sama.’ Pam, a wan taa pionili sisa di á toow. Di a be moo yonkuu a be e du a zendelingwooko. Ma bakaten a be abi fu daai go a osu baka fu solugu en dda anga en mma. Nownow a sisa ya pasa 70 yali, ai pionili ete, noiti a toow tu. A taki: ‘A sani di yeepi mi fu go doo, a te taawan be e gafa mi fu den sani di mi be e du.’

11. Fa Yesesi soi taki den uman di be toon en bakaman be pelensipali gi en?

¹¹ A be e bigi gi Yesesi taki den uman di be teke a tuu biibi be e holibaka gi en anga ‘san den be abi’ (Luk. 8:1-3). Boiti taki a be gi den a okasi fu holibaka gi en, a be e leli den uman ya pelensipali sani fu Gadu tu. A be taigi den taki a be o dede, da Gadu be o weki en baka (Luk. 24:5-8). Leti enke fa Yesesi be taigi den apostel fi en sowtu tesi be o miti den, a so a be taigi den uman ya tu taki sani be o miti den fu di den be toon en bakaman (Malik. 9:30-32; 10:32-34). Di den be kisi Yesesi, ala den apostel fi en lon gwe fika en, ma wantu fu den uman di be e waka neen baka be de anga en di den be sipikii en a wan ponsu.​—Mat. 26:56; Malik. 15:40, 41.

12. Sowtu gaandi Yesesi be gi umansama?

¹² Yesesi be e gi umansama pelensipali wooko fu du. Den fosi sama di be si Yesesi di a weki baka, a be umansama. A den uman ya a be sende fu go taigi den apostel fi en taki a be weki baka (Mat. 28:5, 9, 10). Na a Pinksterfesa fu a yali 33 di Yesesi be gi den bakaman fi en a santa yeye, a gei enke umansama be de aini tu. Efu a so, da den sisa ya seefi be fende a gaandi fu peleiki aini omen tongo fu taigi sama ‘den gaan sani di Gadu du’.​—Toli 1:14; 2:2-4, 11.

13. Sowtu wooko den Kelesten sisa e du? Fa u sa soi taki a wooko di den sisa ya e du e bigi gi u?

¹³ A fiti fu u gafa den sisa fu u di e wooko taanga gi Yehofa. Son wan e du bow-wooko efuso yeepi seeka komakandaa peesi. Taawan e yeepi aini kemeente pe sama e taki wan taa tongo. Taawan e yeepi a Betel. Den sisa fu wi e yeepi tu te wan ogii pasa a wan peesi. Den e yeepi poti buku anga taa sani aini taa tongo. Den e du a pioniliwooko efuso a zendelingwooko. Leti enke den baala, a so sisa e go na a pionili sikoo, a Sikoo gi Kownukondee Peleikiman anga a Gileyad sikoo. Boiti dati, den sisa e yeepi den man fu den anga den faantiwowtu di den abi aini a olikanisâsi anga a kemeente. Den baala ya e wooko taanga fu yeepi taawan. Efu den uman á be e holibaka gi den, a wooko be o moo taanga gi den (Efe. 4:8). I si enke wan fasi de fa i sa holibaka gi den sisa ya anga a taanga wooko di den e du?

14. Te i luku san sikiifi a Psalm 68:11, da san owluman mu du?

¹⁴ Owluman mu holi a pakisei taki a wan ‘gaan kulu’ sisa de aini a olikanisâsi di e paati a bun nyunsu. Den sisa ya de kabakaba fu peleiki ala yuu, den sabi peleiki bun tu. (Leisi Psalm 68:11.) A omen sani owluman e leli fu den sisa  ya. Abigail taki ai bigi gi en te den baala e akisi en san na a moo bun fasi fu taki anga den sama na a pisi pe den e peleiki. A taki: ‘A sani ya e soi mi taki Yehofa abi wooko gi mi fu du aini a olikanisâsi fi en.’ Owluman e fusutan tu taki sisa di abi ondoofeni sa yeepi den moo yonkuu sisa te den abi booko-ede (Tit. 2:3-5). U mu teke en fu bigi taki wi abi den sisa ya aini a kemeente.

15. On ten u sa yeepi den sisa fu u?

¹⁵ Son yuu den sisa fu wi e abi wan sama fanowdu fu holibaka gi den, efuso fu yeepi den anga son sani (Yes. 1:17). Son leisi wan sisa di man dede efuso wan sisa di booko-toow abi wan sama fanowdu fu taki gi en, efuso fu yeepi en anga son wooko. Kande wan gaandi sisa abi wan sama fanowdu fu e tyai en go a dataa. Kande wan pionili sisa e du taa wooko gi a olikanisâsi. A sisa ya abi sama fanowdu fu taki gi en te taawan e kuutu en taki a nai de aini a peleikiwooko ala yuu enke den taa pionili. Sowtu taa fasi u sa yeepi den sisa fu u? Meke u luku wantu taa fasi fa Yesesi be e holibaka gi umansama.

16. Enke fa Malikisi 14:3-9 e soi, da fa Yesesi holibaka Maliya?

¹⁶ Yesesi á be e daaidaai fu opo taki gi den sisa fi en te sama be e kuutu den sosokaali. Wan leisi Yesesi be yeepi Maliya di Maata be kuutu en sosokaali (Luk. 10:38-42). Wan taa leisi a be opo taki gi Maliya baka di sama be taki ogii fi en fu di a be du wan bun gi Yesesi. (Leisi Malikisi 14:3-9.) Yesesi be sabi saide Maliya be du a sani ya, neen meke a gafa en. A taki: ‘A wan gaan bun a du mi. A san a poi a du gi mi ya.’ A taki sama be o taki fu a sani di Maliya du ‘na ala se fu goontapu pe sama be o peleiki a bun nyunsu’. A fu a sani di a uman ya du wi e taki aini a artikel ya. A moin fu si fa Yesesi gafa a uman ya fu a bun di a be du gi en. Den sani di Yesesi taki be musu meke Maliya fii bun baka di sama kuutu en sosokaali.

17. Gi wan toli di e soi on ten u mu opo taki gi wan sisa.

¹⁷ Yu e opo taki gi den sisa aini a kemeente te a de fanowdu? Meke u taki wan sisa de aini a kemeente di man a ná wan Kotoigi. Kande a sisa ya e doo lati a den komakandaa. Kande baka komakandaa ai gwe gawgaw tu. Kande a ná ala yuu ai tyai den pikin fi en. Kande son sama aini a kemeente e kuutu a sisa ya. Den sama ya e feegete taki a san a sisa ya poi ai du. Na a man na a ede fu a osufamii, neen e taki tu pe den pikin sa go anga pe den á mu go. San i mu du efi i yee wan sama e kuutu a sisa ya? I sa gafa a sisa fu a moiti di ai meke. I sa taigi taawan fu den bun sani di a sisa ya e du tu. A so yu o yeepi den fu si sani taa fasi.

18. Sowtu taa fasi u sa yeepi den sisa?

¹⁸ Wi e soi taki u lobi den sisa fu u te wi e yeepi den anga den sani di den abi fanowdu (1 Yoh. 3:18). Annette di e solugu en mma di siki taki: ‘Son leisi baala anga sisa be e kon luku mi mma gi mi, da a so mi be sa komoto a osu fu go du taa sani. Son leisi a nyanyan den be e tyai kon gi mi. A sani ya e meke mi e fii bun. Ai soi taki mi a wan pisi fu a olikanisâsi tu.’ Baala anga sisa be e yeepi Jordan tu. Wan baala be soi en fa enseefi be sa e seeka son sani na a wagi fi en. A sisa ya taki: ‘Den baala anga sisa e booko den ede anga mi. A sani ya e meke mi fii bun.’

19. Fa owluman sa yeepi den sisa aini a kemeente?

 ¹⁹ Owluman e meke moiti fu yeepi den sisa anga san den abi fanowdu. Den sabi taki Yehofa wani sama libi bun anga den sisa ya (Yak. 1:27). Neen meke owluman e meke moiti fu waka a Yesesi baka. Den nai meke weiti gi sama, ma den e puubei fu fusutan saide sama e du son sani, a so den e sabi fa den mu yeepi den (Mat. 15:22-28). Te owluman e du san den poi fu yeepi den sisa, da a sani ya e meke den fii taki Yehofa e booko en ede anga den. Di a fesiman fu a peleikiwooko kulu fu Kia yee taki a o foloisi go a wan taa osu, a seeka sani fu yeepi a sisa ya. Kia taki: ‘Ná pikin bigi a sani ya be bigi gi mi. A fasi fa den owluman be e taki anga mi, anga a fasi fa den yeepi mi soi mi kiin taki mi pelensipali aini a kemeente. A soi mi tu taki te mi de a nowtu a ná mi wawan de.’

20-21. Fa u sa soi taki u lobi den Kelesten sisa fu u?

²⁰ A omen sisa de aini den kemeente a hii goontapu. Den e wooko taanga. U mu holibaka gi ala den sisa ya. Enke fa u si aini a artikel ya, da leti enke Yesesi u mu e meke ten fu de makandaa anga den fu kon sabi den moo bun. U mu e soi den taki wi e teke den sani di den e du aini a olikanisâsi fu bigi. U mu e opo taki gi den tu te sama e kuutu den sosokaali.

²¹ Na a kaba pisi fu a biifi di Pawlesi be sikiifi gi den Kelesten fu Rome, a kai neigin Kelesten sisa a den nen (Rom. 16:1, 3, 6, 12, 13, 15). Den uman ya be musu fende taanga-sikin di Pawlesi sende odi gi den, anga di a gafa den. Useefi mu e holibaka gi den sisa aini a kemeente. A so wi e soi taki den pelensipali gi u. Wi e soi tu taki wi e si den enke u famii.