1. Ebɛnadze na hɛn nkyerɛbaa no yɛ dze boa ahyehyɛdze no, naaso ebɛn nsɛndzendzen na wohyia? (Hwɛ mfonyin a ɔwɔ Ɔweɔn-Aban yi enyim no.)

ƆYƐ hɛn enyigye papaapa dɛ yɛwɔ nkyerɛbaa pii a wɔyɛ edwumadzen wɔ asafo no mu! Dɛ nhwɛdo no, dza ɔkɔ do wɔ asafo nhyiamu ase no, wɔdze hɔnho hyɛ mu, na wonya asɛnka edwuma no mu kyɛfa. Binom so boa ma wosiesie Ahendzi Asa do, na wɔyɛ ndzɛmba ahorow boa hɔn mfɛfo asomfo. Naaso, wohyia nsɛndzendzen ahorow. Binom wɔ hɔ a, wɔhwɛ hɔn awofo a hɔn mfe akɔ enyim. Binom so hyia ɔsoɛrtsia wɔ hɔn ebusua mu. Binom so wɔ hɔ a, wɔyɛ ɔwofo baako a wɔyɛ edwumadzen dze hwɛ hɔn mba.

2. Ebɛnadze ntsi na ɔwɔ dɛ yɛboa hɛn nkyerɛbaa no?

² Ebɛnadze ntsi na ɔwɔ dɛ yɛboa hɛn nkyerɛbaa no? Osiandɛ mpɛn pii no, wiadze no mmfa obu a ɔfata mma mbaa. Iyi da nkyɛn a, Bible no hyɛ hɛn nkuran dɛ yɛmboa hɔn. Dɛ nhwɛdo no, ɔsomafo Paul kãa kyerɛɛ asafo a ɔwɔ Rome no dɛ wɔngye Phoebe fɛw do na ‘wɔmboa no wɔ biribiara a obehia’ mu. (Rom. 16:1, 2) Aber a nna Paul yɛ Phariseenyi no, obotum aba dɛ nna ɔka hɔn a wobu mbaa dɛ wɔnnsɛ hwee no ho. Naaso, ber a ɔbɛyɛɛ Christiannyi no, osũasuaa Jesus na ɔnye mbaa dzii no wɔ enyidzi nye ayamuyie mu.​—1 Cor. 11:1.

3. Ebɛn kwan do na Jesus nye mbaa dzii? Mbaa a wɔyɛɛ Nyankopɔn n’apɛdze no, obuu hɔn dɛn?

³ Jesus nye mbaa nyina dzii no wɔ enyidzi mu. (John 4:27) Nna Jewfo nyamesom mpanyimfo a wɔwɔ Jesus n’aber do no mmbu mbaa. Naaso, Jesus annyɛ n’adze tse dɛ hɔn. Nokwasɛm nye dɛ, Bible ho nhwehwɛmu nwoma bi kã dɛ: “Asɛm biara nnyi hɔ a Jesus kãe a ɔkyerɛ dɛ nna ommbu mbaa.” Nna Jesus wɔ obu soronko ma mbaa a wɔyɛ n’Egya n’apɛdze no. Jesus frɛɛ hɔn dɛ ne nkyerɛbaa, na hɔn a ɔkãa dɛ nyimpa a wɔyɛ n’ebusuafo no, mbaa yi so ka ho.​—Matt. 12:50.

4. Ebɛnadze na yebosusu ho wɔ adzesua yi mu?

⁴ Nna Jesus ayɛ krado aber nyina dɛ ɔbɔboa mbaa a wɔsom Nyankopɔn no. Ɔkyerɛɛ dza wɔyɛe no ho enyisɔ na odzii hɔn asɛm  maa hɔn. Hom mma yɛnhwɛ mbrɛ yebesi esũasua Jesus na yaakyerɛ dɛ yɛdwen hɛn nkyerɛbaa no ho.

5. Ebɛnadze ntsi na obotum ayɛ dzen ama hɛn nkyerɛbaa binom dɛ wobenya fɛkuwbɔ a ɔhyɛ dzen?

⁵ Hɛn nyina, dɛ yɛyɛ enuanom mbarimba anaadɛ mbaa no, no ho hia dɛ yenya fɛkuwbɔ a ɔhyɛ dzen. Naaso ɔtɔ da a, otum yɛ dzen ma hɛn nkyerɛbaa no dɛ wobenya fɛkuw a ɔtse dɛm. Ebɛnadze ntsi a? Hom mma yensusu nsɛm a hɛn nkyerɛbaa no bi akã no ho nhwɛ. Akyerɛbaa bi a wɔfrɛ no Jordan * kãa dɛ, “Osiandɛ meyɛ sigyanyi ntsi, ɔtaa yɛ dzen ma me dɛ mubohu dwuma a midzi wɔ asafo no mu. Ɔyɛ a metse nka dɛ moho nnhia wɔ asafo no mu.” Kristen so yɛ ɔkwampaaefo a otui kɔr beebi dɛ ɔrekɛtserɛw no som edwuma mu. Ɔkãa dɛ, “Sɛ ekɔ asafo fofor bi mu a, bi a ebɛtse nka dɛ ayɛ ankonam.” Bi a dɛmara na enuanom mbarimba binom so tse nka. Fie a onua bi tse mu no, sɛ ɔsor ɔsom a ebusua no munyi biara wɔ mu a, bi a obotum ayɛ dzen ama no dɛ ɔbɛbɛn n’ebusuafo no. Dɛmara so na bi a obotum atse nka dɛ ɔmmbɛn enuanom mbarimba na mbaa a wɔwɔ asafo no mu no. Hɛn nkyerɛbaa a yarba ntsi wɔaka dan mu no, bi a wobotum atse nka dɛ wɔayɛ ankonam. Dɛmara so na bi a hɛn nkyerɛbaa a wɔhwɛ hɔn ebusuafo a wɔyar no botum atse nka. Annette kãa dɛ, “Nna munntum nnye enuanom mmpue nnkɔ beebiara, osiandɛ nna emi na morohwɛ me maame.”

6. Dɛ mbrɛ asɛm a ɔwɔ Luke 10:38-42 kyerɛ no, ebɛnadze na Jesus yɛe dze boaa Martha na Mary?

⁶ Jesus gyee ber nye no sunsum afamu nkyerɛbaa no bɔe. Nna ɔyɛ hɔn nyɛnko berɛbo. Ma yɛnhwɛ anyɛnkofa a nna ɔda Jesus na Mary nye Martha hɔn ntamu no. Ɔbɛyɛ dɛ nna mbaa beenu yi yɛ esigyafo. (Kenkan Luke 10:38-42.) Ɔda edzi dɛ Jesus nam nsɛm a ɔkãe nye kwan a ɔfaa do nye hɔn dzii no do maa hɔn akoma tɔɔ hɔn yamu. Dɛ nhwɛdo no, nna ɔnnyɛ dzen mma Mary dɛ ɔbɔkɔ akɛtsena Jesus n’anan ho dɛ osuanyi * na oeetsie no. Martha so, aber a nna Mary egya no nko ma ɔreyɛ edziban no, wɔannyɛ dzen amma no dɛ ɔbɛkã dza ɔhaw no no ho asɛm akyerɛ Jesus. Hɔ kakra no ara no, Jesus boaa mbaa beenu no ma wonyaa esuadze bi a no ho hia. Wɔannso hɔ ara, nna ɔyɛ a Jesus kɛsera Mary na Martha nye hɔn nuabanyin Lazarus. Ɔyɛɛ dɛm dze kyerɛɛ dɛ nna ɔdwen hɔnho papaapa. (John 12:1-3) Ɔnnyɛ nwanwa dɛ ber a Lazarus yaar dzendzenndzen no, Mary na Martha tumii too Jesus nkra dɛ ɔmbra mbɔboa hɔn.​—John 11:3, 5.

7. Ebɛn kwan kor na yebotum afa do ahyɛ hɛn nkyerɛbaa no nkuran?

⁷ Hɛn nkyerɛbaa no bi wɔ hɔ a, ber tsitsir a wonya nye hɔn mfɛfo asomfo bɔ fɛkuw nye ber a yehyia wɔ asafo nhyiamu ase. Ntsi, sɛ odu mber a ɔtse dɛm a, ɔsɛ dɛ yɛdze enyigye ma hɔn akɔaba, yɛnye hɔn bɔ nkɔmbɔ na yɛma wohu dɛ yɛdwen hɔnho papaapa. Jordan a yeedzi kan akã noho asɛm no kãa dɛ: “Sɛ mema mbuae wɔ asafo nhyiamu ase na enuanom kamfo me, wɔnye me yɛ nhyehyɛɛ kɔ asɛnka, anaadɛ wɔboa me wɔ akwan afofor bi do a, ɔhyɛ me nkuran papaapa.” Ɔsɛ dɛ yɛma hɛn nkyerɛbaa no hu dɛ hɔnho hia hɛn. Kia kãa dɛ, “Sɛ mannkɔ asafo nhyiamu a, minyim dɛ enuanom mbarimba na mbaa binom bɛkyerɛw me tɛst mɛsegye ahwɛ dɛ moho ye a. Iyi ma muhu dɛ dɛm enuanom yi dɔ me papaapa.”

8. Ebɛn akwan afofor do na yebotum esũasua Jesus?

⁸ Dɛ mbrɛ Jesus yɛe no, hɛn so yebotum agye mber na yɛnye hɛn nkyerɛbaa no abɔ. Yebotum ato nsa afrɛ hɔn aba hɛn fie na yɛnye hɔn ato nsa  edzidzi anaadɛ yɛnye hɔn abɔ mu agye hɛn enyi. Sɛ yɛto nsa frɛ hɔn ba fie a, ɔsɛ dɛ yɛhwɛ hu dɛ yɛbɔbɔ nkɔmbɔ a ɔhyɛ nkuran. (Rom. 1:11, 12) Ɔsɛ dɛ asafo mu mpanyimfo nya adwen a nna Jesus wɔ no bi. Nna onyim dɛ sigyadzi botum ayɛ dzen ama binom, naaso ɔmaa no mu daa hɔ kofee dɛ nnyɛ awar anaa abawoo nye adze tsitsir a ɔbɛma obi enya enyigye afebɔɔ. (Luke 11:27, 28) Mbom, sɛ obi dze Jehovah no som dzi kan wɔ n’asetsena mu a, ɔno na ɔbɛma oenya enyigye a ɔtsena hɔ daa.​—Matt. 19:12.

9. Ebɛnadze na asafo mu mpanyimfo botum ayɛ dze aboa hɛn nkyerɛbaa no?

⁹ Asafo mu mpanyimfo tsitsir na ɔsɛ dɛ wɔfa Christianfo mbaa dɛ hɔn nkyerɛbaa nye hɔn nanom. (1 Tim. 5:1, 2) Ɔsɛ dɛ asafo mu mpanyimfo gye ber nye nkyerɛbaa no bɔ nkɔmbɔ ansaana asafo nhyiamu ahyɛ ase anaa ber a wɔapon no. Kristen kãa dɛ, “Asafo mu panyin kor hun dɛ minnyi adagyer koraa, ntsi nna ɔpɛ dɛ ohu ndzɛmba ahorow a meyɛ. Metsee nka dɛ ɔdwen moho na iyi maa m’enyi gyee.” Sɛ asafo mu mpanyimfo taa gye ber na wɔnye hɔn nkyerɛbaa no bɔ nkɔmbɔ a, wɔda no edzi dɛ wɔdwen hɔnho papaapa. * Annette a yeedzi kan akã noho asɛm no kãa siantsir a mfaso wɔ do dɛ yɛnye asafo mu mpanyimfo bɛtaa abɔ nkɔmbɔ. Ɔkãa dɛ: “Sɛ menye  hɔn bɔ nkɔmbɔ a, ɔma muhu hɔn yie na hɔn so wohu me yie. Ntsi sɛ mirihyia ɔhaw bi a, mutum fi me pɛ mu kɔ hɔn nkyɛn kɔhwehwɛ mboa.”

10. Ebɛnadze na ɔbɛma hɛn nkyerɛbaa no enyi agye?

¹⁰ Hɛn nyinara, dɛ yɛyɛ mbarimba anaa mbaa no, sɛ afofor hu mbɔdzen a yɛbɔ na wɔkamfo dwuma a yedzi a, ɔma hɛn enyi gye. Naaso sɛ afofor nnhu mbɔdzen a yɛbɔ nye dwuma a yedzi a, ɔma hɛn abaw mu bu. Ɔkwampaaefo bi a ɔnnwaree a wɔfrɛ no Abigail hun dɛ ɔtɔ mber bi a afofor bu hɔn enyi gu no do. Ɔkãa dɛ: “Nkorɔfo nnyim me yie, wohu me dɛ osimesi ne babaa anaadɛ osimesi no nua. Ɔtɔfabi a, metse nka dɛ obiara nnhu me koraa.” Naaso, hom mma yensusu asɛm a hɛn akyerɛbaa bi a wɔfrɛ no Pam kãe no ho. Dɛ obi a ɔnnwaree no, ɔdze mfe pii soom dɛ asɛmpatserɛwfo. Ekyir yi, ɔbaa fie bɔhwɛɛ n’awofo. Seseiara ɔwɔ ne mfe 70 mu, na ɔda ho ara rosom dɛ ɔkwampaaefo. Pam kãa dɛ: “Sɛ afofor kã dɛ hɔn enyi sɔ edwuma a mereyɛ no a, m’enyi gye, na iyi aboa me papaapa.”

11. Mbaa no a wɔboaa Jesus wɔ no som edwuma mu no, ebɛnadze na ɔyɛe dze kyerɛɛ dɛ nna n’enyi sɔ hɔn?

¹¹ Mbaa anokwafo dze “hɔn ahodze bi soom” Jesus, na n’enyi sɔɔ mboa a ɔtse dɛm a wɔdze maa no no. (Luke 8:1-3) Dɛm mbaa anokwafo yi nyaa ho kwan soom Jesus. Naaso nnyɛ dɛm ho kwan no nko na wonyae, ɔsaan so kyerɛkyerɛɛ hɔn Nyankopɔn ho nokwasɛm a no mu dɔ. Dɛ nhwɛdo no, Jesus kãa no wu nye no wusoɛr ho asɛm kyerɛɛ hɔn. (Luke 24:5-8) Osiesiee dɛm mbaa yi hɔn adwen maa nsɔhwɛ a nna wobehyia no, dɛ mbrɛ nna oesiesie asomafo no hɔn adwen no. (Mark 9:30-32; 10:32-34) Ɔwɔ mu dɛ aber a wɔkyeer Jesus no asomafo no guanee dze, naaso mbaa no a wɔboaa no no, nna hɔn mu binom wɔ ne nkyɛn ber a nna oruwu wɔ asɛndua no do no.​—Matt. 26:56; Mark 15:40, 41.

12. Ebɛn edwuma na Jesus dze hyɛɛ mbaa bi nsa?

¹² Jesus dze edwuma a no ho hia hyɛɛ mbaa nsa. Dɛ nhwɛdo no, ber a Jesus soɛree fii owu mu no, mbaa nyamesurofo na wodzii kan dzii ho dase. Ɔkãa kyerɛɛ mbaa no dɛ wɔnkɛkã nkyerɛ asomafo no dɛ ɔasoɛr efi owu mu. (Matt. 28:5, 9, 10) Aber a wohuee sunsum krɔnkrɔn guu esuafo no do wɔ Pentecost afe 33 H.B. no, obotum aba dɛ nna mbaa wɔ hɔ bi. Sɛ dɛm a, nna ɔno bɛkyerɛ dɛ mbaa a wɔasera hɔn yi nyaa tum a ɔmaa wotumii kãa kasa fofor na wɔkãa “Nyankopɔn n’etumdze” ho asɛm kyerɛɛ afofor.​—Andw. 1:14; 2:2-4, 11.

13. Ndɛ, ebɛn ndwuma na Christianfo mbaa yɛ, na dza wɔyɛ no, yebesi dɛn akyerɛ ho enyisɔ?

¹³ Mbɔdzen a hɛn nkyerɛbaa no robɔ wɔ Jehovah no som mu no, ɔsɛ dɛ yɛkamfo hɔn wɔ ho. Ndwuma a nkyerɛbaa no yɛ no, bi nye yi: Wosisi asafo adan na wosiesie bi so, wɔkɔboa kuw a wɔkã kasa fofor, wotu hɔnho ma kɛyɛ edwuma wɔ Bethel. Wɔboa ber a wɔdze atoyerɛnkyɛm ber mu mboa rema afofor, wɔkyerɛ hɛn nwoma ahorow ase kɔ kasa fofor mu, na wɔsom dɛ akwampaaefo nye asɛmpatserɛwfo. Skuul ahorow tse dɛ, akwampaaefo skuul, Ahendzi Asɛmpakafo Skuul, nye Gilead Skuul a enuanom mbarimba kɔ no, hɛn nkyerɛbaa no so tum kɔ bi. Iyi da nkyɛn a, yernom boa hɔn kunnom mbrɛ ɔbɛyɛ a asodzi a no mu yɛ dur a ɔhyehyɛ hɔn nsa wɔ asafo no nye ahyehyɛdze no mu no, wobotum edzi ho dwuma yie. Dɛm mbarimba yi yɛ ‘nyimpa mu akyɛdze’ na wɔyɛ ndzɛmba pii dze boa enuanom. Naaso sɛ hɔn yernom ammboa hɔn a, nkyɛ ɔbɛyɛ dzen dɛ wobotum ayɛ dɛm edwuma yi. (Eph. 4:8) Dza ibotum ayɛ dze aboa hɛn nkyerɛbaa yi wɔ edwuma a wɔyɛ no mu no, ana esusu ho?

14. Osian asɛm a wɔakã wɔ Ndwom 68:11 no ntsi, ebɛnadze na asafo mu mpanyimfo a hɔn adwen mu da hɔ no yɛ?

¹⁴ Asafo mu mpanyimfo a hɔn adwen mu da hɔ no, wonyim dɛ hɛn nkyerɛbaa no “wɔyɛ asafo  dɔm kɛse” a woetu hɔnho ama reyɛ edwuma. Na wɔbɔ hɔnho mbɔdzen papaapa wɔ asɛmpaka edwuma no mu. (Kenkan Ndwom 68:11.) Dɛm ntsi asafo mu mpanyimfo bɔ mbɔdzen dɛ wobosũasua hɛn nkyerɛbaa yi. Abigail a yeedzi kan akã noho asɛm no kãa dɛ, sɛ enuanom bisa no kwan a otu mpon a ɔfa do kã asɛm no wɔ n’asaasesin mu ho asɛm a, ɔhyɛ no nkuran papaapa. Ɔkãa dɛ, “Ɔno boa me ma muhu dɛ Jehovah hia me wɔ n’ahyehyɛdze no mu.” Iyi da nkyɛn a, asafo mu mpanyimfo gye to mu dɛ, nkyerɛbaa a wodzi nokwar na hɔnho akokwaa no botum aboa nkataasia no ber a worihyia nsɛndzendzen. (Titus 2:3-5) Nokwasɛm nye dɛ, ɔsɛ dɛ yɛkyerɛ hɛn nkyerɛbaa yi ho enyisɔ!

15. Ebɛn aber na bi a no ho behia dɛ obi kasa ma hɛn nkyerɛbaa no?

¹⁵ Ɔtɔfabi a, hɛn nkyerɛbaa no behia obi a obedzi hɔn asɛm ama hɔn ber a worihyia tsebea pɔtsee bi no. (Isa. 1:17) Dɛ nhwɛdo no, akyerɛbaa a no kun egyaa no awar anaa ɔyɛ kunafo no, obehia obi a ɔbɛkã n’asɛm ama no na ɔaaboa no ma ɔaayɛ ndwuma ahorow a nkyɛ no kun na ɔyɛ no. Bi a akyerɛbaa a ne mfe akɔ enyim no behia mboa ana oeetum nye adatserfo akasa. Anaadɛ, osian edwuma a akyerɛbaa kwampaaefo bi yɛ boa Jehovah n’ahyehyɛdze no ntsi, orunntum nnya ber pii nnyɛ asɛnka edwuma no dɛ mbrɛ akwampaaefo afofor yɛ no. Dɛm ntsi, sɛ afofor kasa tsia no wɔ iyi ho a, bi a obehia obi a ɔbɛkasa ama no. Ebɛnadze bio na yebotum ayɛ dze aboa hɛn nkyerɛbaa no? Hom mma yɛnsan nsusu nhwɛdo a Jesus yɛe no ho.

16. Dɛ mbrɛ kyerɛwtohɔ a ɔwɔ Mark 14:3-9 kyerɛ no, ebɛn kwan do na Jesus twitwae gyee Mary?

¹⁶ Sɛ nna obi kasa tsia Jesus no sunsum afamu nkyerɛbaa no a, hɔ no ara nna Jesus akã bi ama hɔn. Dɛ nhwɛdo no, ber a Martha bɔɔ Mary sombo no, Jesus kãa bi maa Mary. (Luke 10:38-42) Ber a nkorɔfo kasae tsiaa Mary wɔ gyinae bi a nna wosusu a dɛ ɔnnyɛ papa a osii ho no, Jesus sanee twitwae gyee no. (Kenkan Mark 14:3-9.) Jesus tsee siantsir a Mary yɛɛ dɛm no ase, na ɔkamfoo no, na ɔkãa dɛ: “Ɔayɛ edwuma pa wɔ mo ho. . . . Ɔayɛ dza obotum.” Ɔhyɛɛ nkɔm mpo dɛ, “beebiara a wɔbɛkã asɛmpa yi wɔ wiadze nyina mu no,” wɔbɛkã ayamuyie a Mary daa no edzi no ho asɛm. Dɛm pɛpɛɛpɛr na adzesua asɛm yi so reyɛ. Ber a Jesus rekamfo Mary wɔ dza ofii n’akoma mu yɛe ho no, ɔkãa dɛ wɔbɛkã asɛmpa no wɔ wiadze nyinara. Iyi yɛ enyigyesɛm papaapa! Hwɛ mbrɛ asɛm a Jesus kãe no besi ahyɛ Mary a nna nkorɔfo ebu no fɔ no nkuran afa!

17. Ebɛn aber na bi a no ho behia dɛ yɛkasa ma hɛn akyerɛbaa bi? Ma ho nhwɛdo.

¹⁷ Wo nkyerɛbaa a enye hɔn som no, ana ekã hɔn asɛm ma hɔn ber a no ho aba hia no? Dɛ nhwɛdo no, hom mma yensusu dɛm tsebea yi ho nhwɛ. Adawurbɔfo binom ehu dɛ akyerɛbaa bi a no kun nnyɛ Dasefo taa ka ekyir wɔ asafo nhyiamu ase. Afei so, ber a wɔapon asafo nhyiamu no ɔnnkyɛr wɔ hɔ koraa na ɔkɔ fie. Adawurbɔfo no ahyɛ no nsew dɛ ɔnntaa mmfa ne mba no mmba asafo nhyiamu. Dɛm ntsi adawurbɔfo no kasa tsia no, na wɔkã dɛ ɔnye no kun nkasa ama oeetum nye ne mba no aba asafo nhyiamu. Naaso wonnyim dɛ hɛn akyerɛbaa no robɔ mbɔdzen dɛ ɔbɛyɛ dza obotum biara wɔ tsebea no ho. Dza ɔwɔ mu nye dɛ, osiandɛ hɛn akyerɛbaa no yɛ ɔwarfo ntsi ɔnnyɛ ber nyina na obotum akyerɛ mbrɛ obesi dze ne ber ayɛ edwuma, na dɛmara so na onnyi tum wɔ mbofra no do. Nkorɔfo rekasa tsia akyerɛbaa no a, ebɛnadze na ibotum ayɛ? Sɛ ekamfo akyerɛbaa no na ekã mbɔdzen a ɔrobɔ no ho asɛm kyerɛ afofor a, ɔno remma afofor nnkasa nntsia no.

18. Ebɛn ndzɛmba na yebotum ayɛ aboa hɛn nkyerɛbaa no?

¹⁸ Yebotum ayɛ ndzɛmba ama hɛn nkyerɛbaa no dze akyerɛ dɛ yɛdwen hɔnho papaapa. (1 John 3:18) Annette a ɔrohwɛ ne maame a ɔyar no kãa dɛ: “Enuanom mbarimba na mbaa  binom ba me fie bɔboa me ma mohwɛ me maame mbrɛ ɔbɛyɛ a mubotum ayɛ biribi fofor. Wɔdze edziban brɛ hɛn wɔ fie. Iyi ma muhu dɛ enuanom no dɔ me na metse nka dɛ meka asafo no ho.” Jordan so, enuanom yɛɛ no mboa. Onua kor kyerɛɛ no mbrɛ wosi siesie kaar. Hɛn akyerɛbaa no kãa dɛ: “Enuanom mbarimba na mbaa no dwen moho na wɔmmpɛ dɛ esian biara to me ber a mereka kaar. Iyi ma m’enyi gye papaapa.”

19. Ebɛnadze fofor na asafo mu mpanyimfo botum ayɛ aboa nkyerɛbaa no?

¹⁹ Asafo mu mpanyimfo so bɔ mbɔdzen dɛ wɔdze nkyerɛbaa no hɔn ehiadze bɛma hɔn. Wonyim dɛ, nkyerɛbaa no a wɔbɔhwɛ hɔn yie no ho asɛm hia Jehovah papaapa. (Jas. 1:27) Dɛm ntsi, asafo mu mpanyimfo da ntseasee edzi dze sũasua Jesus. Wosũasua Jesus na wokwetsir dɛ wɔbɛhyehyɛ mbra, nkanka ber a no ho ebehia dɛ wɔda ayamuyie nye ntseasee edzi no. (Matt. 15:22-28) Sɛ asafo mu mpanyimfo yɛ ndzɛmba ahorow bi dze boa hɔn nkyerɛbaa no a, ɔma wɔtse nka dɛ Jehovah nye n’ahyehyɛdze no dwen hɔnho. Ber a Kia no kuw do hwɛfo tsee dɛ Kia rutu akɔ fie fofor mu no, amonmu hɔ ara na ɔyɛɛ nhyehyɛɛ dɛ ɔbɔboa. Kia kãa dɛ: “Mboa a minyae no maa me berɛ do tseew koraa. Nkuranhyɛ na mboa a minyae fii asafo mu mpanyimfo hɔ no maa metsee nka dɛ moho hia wɔ asafo no mu. Na muhun dɛ, sɛ mihyia tsebea a no mu yɛ dzen a enuanom no ka moho.”

20-21. Yebesi dɛn akyerɛ dɛ Christianfo mbaa no nyinara som bo ma hɛn?

²⁰ Sɛ yɛhwɛ asafo no mu a, yehu Christianfo mbaa pii a wɔbɔ hɔnho mbɔdzen yɛ edwumadzen. Dɛm mbaa yi hia hɛn mboa. Dɛ mbrɛ Jesus no nhwɛdo no ma yehu no, yebotum agye ber nye hɔn abɔ na yeehu hɔn yie. Yebotum ayɛ dɛm dze aboa hɔn. Yebotum akyerɛ mbɔdzen a wɔbɔ wɔ Nyankopɔn no som mu no ho enyisɔ. Sɛ no ho ba hia a, yebotum akã hɔn asɛm ama hɔn.

²¹ Ber a ɔsomafo Paul dze ne krataa a ɔkyerɛwee kɛmaa Romefo no reba ewiei no, ɔhyɛɛ da ara bɔɔ Christianfo mbaa baakron hɔn edzin. (Rom. 16:1, 3, 6, 12, 13, 15) Ekyingye biara nnyi ho dɛ, ber a dɛm mbaa no tsee nkyia nye nkamfo a Paul dze maa hɔn no, ɔhyɛɛ hɔn nkuran. Hɛn so, ɔsɛ dɛ yɛboa nkyerɛbaa a wɔwɔ hɛn asafo no mu nyinara. Sɛ yɛyɛ dɛm a, yɛda no edzi dɛ wɔsom bo ma hɛn na yɛgye to mu dɛ wɔka hɛn ebusua no ho.