1. a) Ki travay sé sè-la ka fè adan òwganizasyon a Jéova ? (gadé imaj-la ki anlè po a jounal-la). b) Ki difikilté onlo sè ka jwenn ?

NI ONLO sè ki ka travay rèd an lasanblé-la. É nou kontan-yo toubònman ! Yo ka fè bèl komantè, yo ka préché onlo é yo ka montré frè é sè a yo kè yo enmé-yo fò. Ni sa osi ki ka pran swen a Sal di Wayòm la. É poutan, yo ni pwoblèm a yo ! Ni sa ki ka pran swen a fanmi a yo ki ja ni on bèl laj. Ni dòt ki ka pran bon gaz pas ni moun an fanmi a yo ki vé anpéché-yo sèvi Jéova. É ni dòt ankò ki ka lévé timoun a yo tousèl é ki ka travay rèd pou ba-yo sa ki fo.

2. Poukwa fò-nou ankourajé sè an nou ?

² Poukwa sa enpòwtan kè nou ankourajé sè an nou ? Pas adan mond-lasa, moun pa’a gè ka rèspèkté madanm, alòskè yo mérité rèspé-lasa. É anplisdisa, sé sa Bondyé ka mandé. Pa ègzanp, lapòt Pòl mandé lasanblé a Wòm akéyi Fébé bra gran wouvè é ‘bay tousa i bizwen’ (Wom. 16:1, 2). É poutan, Pòl sé té on farizyen. É pou sé farizyen-la, on nonm té ni lontan plis valè ki on madanm. Men apré i vin krétyen, i mété-y ka imité Jézi, i té ka rèspèkté sé madanm-la onlo é i té janti èvè yo osi (1 Kor. 11:1).

3. Kijan Jézi té ka aji èvè sé madanm-la, é lèwvwè on madanm té ka fè volonté a Pap’a-y, kijan i té ka konsidéré-y ?

³ Jézi toujou té ka rèspèkté sé madanm-la (Jan 4:27). I pa té ka aji èvè yo kon sé chèf a rèlijyon juif la. Mi sa nou ka li adan on ansiklopédi ki ka palé dè Labib : « Jézi pa jen di sé madanm-la pon pawòl ki té’é pé fè-yo konprann kè yo pa vo ayen. » Men Jézi té ka rèspèkté madanm ki té ka fè volonté a Pap’a-y plis ankò. Pou-y, sé konsi sé té sè a-y. Dépi ou té ka fè volonté a Pap’a-y, ki ou té on misyé, ki ou té on madanm, ou té ka fè pawti a fanmi a-y (Mat. 12:50).

4. Ka nou ké vwè adan awtik-lasa ?

⁴ Lèwvwè on madanm té ka fè volonté a Bondyé, Jézi té toujou paré a édé-y. I té ka aprésyé moun-lasa é i té ka défann-li. An-nou vwè kijan nou pé imité-y.

5. Sé sè-la bizwen ni bon zanmi, men poukwa défwa, sa rèd pou yo dè touvé sé zanmi-lasa ?

⁵ Ki nou sé on frè, ki nou sé on sè, nou bizwen pasé tibwen tan èvè bon zig an nou. Men délè, sé sè-la ni dimal a touvé on bon zanmi. Men poukwa ? An-nou vwè sa déotwa sè ka di asi sa. Mi sa on sè non a-y sé Jordane * ka èspliké : « Byensouvan, an ni lenprésyon kè an pa’a fè pawti a lasanblé-la pas an sélibatè. An ni dimal a vwè ki wòl an ka jouwé. » Mi sa Kristen, on pyonyé ki déménajé pou ay préché plis ka di : « Lè ou k’ay adan on nouvo lasanblé, sa pé rivé kè ou santi-w tousèl. » Ni déotwa frè ki ka santi-yo menmjan-la. Lè yo ka viv èvè fanmi a yo é kè sé yo tousèl ki Témwen, délè, yo pa’a santi-yo soudé èvè fanmi a yo kon avan. É anmenmtan, yo pa’a santi-yo alèz èvè sé frè é sè a lasanblé-la nonplis. Ni sèwten sè ki pé ka santi-yo tousèl pas yo malad, é yo pé pa sòti akaz a yo. Ni dòt osi ki pé ka santi-yo tousèl pas yo oblijé okipé dè on fanmi a yo ki malad. Sé té ka a Annette. Mi sa i ka di : « Lè yo té ka envité-mwen, an té oblijé rèfizé pas, pi souvan ki rarman, sé mwen ki té ka okipé dè manman. »

6. Dapré sa ki maké an Lik 10:38-42, kijan Jézi édé Mawt é Mari ?

⁶ Jézi té enmé pasé on moman èvè madanm ki té ka fè volonté a Jéova, é sé té zanmi-frè a yo. Pa ègzanp, i té bon bon zanmi èvè Mawt é Mari, 2 sè ki ka sanm sa yo té sélibatè (li Lik 10:38-42). Lè ou ka gadé jan Jézi té ka palé ba yo é jan i té ka aji èvè yo, ou ka santi kè i té ka mèt-yo alèz a yo. Enkin gadé : Mari pa santi-y jenné pou i té vin sizé an pyé a Jézi, kon on disip té ni labitid fè èvè anségnan a-y *. É Mawt pa santi-y jenné nonplis pou i té di Jézi sa i té ka pansé pas Mari lésé tout travay-la asi kont a-y. Pannan ti moman-lasa, Jézi édé Mawt é Mari konprann onlo biten enpòwtan. É i montré-yo kè i té ka sousyé-y dè yo é dè frè a yo Laza, davwa i pasé vwè-yo a plizyè rèpriz (Jan 12:1-3). Kifè, lèwvwè Laza tonbé malad bon malad la menm, Mawt é Mari pa ézité mandé Jézi édé-yo (Jan 11:3, 5).

7. Ka nou pé fè pou ankourajé sè an nou ?

⁷ Ni dòt sè aprézan, sa difisil pou yo dè pasé on moman èvè frè é sè a yo. Sé près yenki an réinyon nou ka ni lokazyon vwè-yo. Sé pousa, lè yo vin lasal, fò-nou fè-yo santi kè nou kontan vwè-yo, kè nou kontan palé èvè yo é kè yo ni onlo valè pou nou. Jordane, on sè nou palé dè-y an paragraf 5 la, ka di-nou ka i ka rèsanti : « Lèwvwè yo félisité-mwen pou on komantè an fè, oben lèwvwè on moun pran randévou èvè mwen pou nou ay préché, a pa ti kontan an ka kontan ! Kanta lèwvwè on moun ka montré-mwen kè i ka sousyé-y dè mwen, pa menm palé ! » Fò-nou di sè an nou kè yo ni onlo valè pou nou. Mi sa Kia di : « Lèwvwè an pa vin réinyon, menmsi sé onsèl jou, an ja sav ni on moun ki ké voyé on ti mésaj ban mwen pou mandan’an nouvèl an mwen. Sa ka montré-mwen kè frè é sè an mwen ka enkyété-yo pou mwen. »

8. Kijan nou pé imité Jézi ?

⁸ Menmjan ki Jézi, nou pé fè on éfò pou  pasé on ti tan èvè sè an nou. Pa ègzanp, nou pé di-yo vin manjé èvè nou, menmsi a pa granzafè. Oben nou pé envité-yo pasé on ti moman èvè nou. Sèlman, lè nou ka fè sa, fò-nou fè atansyon pou pawòl an nou toujou pozitif (Wom. 1:11, 12). Fò sé ansyen-la vwè sitiyasyon a on sélibatè kon Jézi té ka vwè-y. Jézi té sav kè pou sèwten moun, sa té’é rèd dè rété sélibatè. Men i montré on mannyè ki klè, kè a pa paskè on moun mayé é kè i ni timoun kè i ké ni tchè-kontan tout vi a-y (Lik 11:27, 28). Sé yenki si nou ka mèt Jéova prèmyé douvan an vi an nou, kè nou ké ni tchè-kontan tout vi an nou (Mat. 19:12).

9. Ka sé ansyen-la pé fè pou édé sé sè-la ?

⁹ Fò-nou aji èvè sé sè-la kon nou ka fè èvè manman-nou oben sè an nou. É sé sé ansyen-la prèmyé ki dwètèt fè sa (1 Tim. 5:1, 2). Yo ké pran on tan pou palé èvè sé sè-la, avan é apré sé réinyon-la. Mi sa Kristen ka di : « On ansyen rèmawké kè an té plen biten a fè, é i chèché a vwè kijan an té òwganizé pwogram an mwen. Sa fan’an plézi toubònman ! » Lè sé ansyen-la ni labitid palé èvè sé sè-la, yo ka montré kè yo ka sousyé-yo dè yo *. Annette konstaté  kè lè i ka palé èvè sé ansyen-la, sa ka fè-y dibyen. Mi sa i di : « An ka aprann konnèt-yo, é yo ka aprann konnèt-mwen osi. Kifè, lèwvwè an ka jwenn on bout-rèd, an pa pè mandé-yo édé-mwen. »

10. Ka nou pé fè pou tchè a sé sè-la kontan ?

¹⁰ Ou ka kontan lè yo ka rèkonnèt valè a-w é kapasité a-w é lè yo ka di-w mèsi pou sa ou ka fè. Pawkont, si ponmoun pa’a di-w mèsi pou travay-la ou ka fè la, sa pé rivé a dékourajé-w. Abigail sé on pyonyé ki sélibatè, é délè, i ni lenprésyon kè lè i èvè sé frè é sè-la, yo ka fè konsi yo po’o jen vwè-y la. Mi sa i ka èspliké : « Dépawfwa, an ni lenprésyon kè ponmoun pa’a vwè-mwen. Pou yo, an sé sè a frè entèl oben fi a frè entèl, é sé tout. » Konnyéla, an-nou vwè sa ondòt sè sélibatè ka rèsanti. Non a-y sé Pam. I rété misyonè pannan plizyè lanné, é aprésa, i viré an péyi a-y pou i té pé sa okipé dè pap’a-y é manman-y. Jòdijou, i ni plis ki 70 an é i pyonyé toujou. Mi sa i ka di : « Lè yo ka di-mwen kè yo ka aprésyé travay-la an ka fè la, sa ka ban-mwen on bèl fòs menm ! »

11. Plizyè madanm té ka suiv Jézi pannan ministè a-y. Kijan i montré kè i té ka aprésyé-yo ?

¹¹ Ni dé madanm fidèl ki té ka sèvi èvè byen a yo pou soutyenn Jézi. É Jézi té ka aprésyé sa onlo (Lik 8:1-3). Jézi lésé sé madanm-lasa sèvi-y, é sé té on gran privilèj ! Men anplis, i aprann-yo onlo vérité enpòwtan anrapò èvè volonté a Bondyé. Pa ègzanp, i di-yo kè i té k’ay mò é kè i té’é résisité (Lik 24:5-8). É konm i té sav kè sé madanm-lasa té’é jwenn onlo éprèv, i préparé-yo pou yo té andiré, menmjan i fè èvè sé apòt-la (Mawk 9:30-32 ; 10:32-34). É rèmawké : sé apòt-la chapé kò a yo lè yo vin arété Jézi. Men pawkont, plizyè madanm ki té ka sèvi Jézi té owa a-y lè i té k’ay mò asi poto-la ! (Mat. 26:56 ; Mawk 15:40, 41).

12. A plizyè rèpriz, Jézi ba sèwten madanm on travay enpòwtan a fè. Bay déotwa ègzanp.

¹² Jézi ba sèwten madanm on travay enpòwtan a fè. Pa ègzanp, kimoun ki vwè Jézi an prèmyé apré i résisité ? A pa déotwa madanm alò ! É i voyé-yo di sé apòt-la kè i résisité (Mat. 28:5, 9, 10). An 33 a épòk an nou, jou a Lapannkòt, lèwvwè Bondyé vidé lèspri sen a-y asi sé disip-la, sèten té ni plizyè madanm pawmi sé moun-la ki té la la. Kifè, grasa lèspri sen, sé sè-lasa dwèt mèt-yo ka palé an diféran lang dè « biten èstraòwdinè kè Bondyé fè » (Akt 1:14 ; 2:2-4, 11).

13. Ka sè an nou ka fè pou sèvi Jéova, é kijan nou pé montré-yo kè nou ka aprésyé tousa yo ka fè ?

¹³ Sè an nou ka fè onlo biten ba Jéova, é yo mérité félisité pou sa. Pa ègzanp, yo ka konstwi batiman, yo ka pran swen a sé batiman-lasa, yo k’ay adan gwoup oben lasanblé ki ka palé dòt lang, yo bétélit oben yo ka travay pou Bétèl-la antankè volontè. Lè sé pou pòté sèkou, yo pa’a bat dèyè ! Yo ka tradui piblikasyon é ni sa ki pyonyé oben ki misyonè ! Kon sé frè-la, yo ka fè lékòl-la ki fèt pou sé pyonyé-la, lékòl pou évanjélizatè a Wayòm-la é lékòl a Galaad. Anplis, lè mari a yo ni onlo rèsponsabilité an lasanblé-la, oben adan òwganizasyon a Jéova, yo ka soutyenn-li. Si a pa té madanm a yo, sé frè-la pa té’é jen rivé fè sa yo ka fè la, é nou pa té’é jen pé di kè ‘sé nonm-lasa sé dé kado’ kè Bondyé fè-nou (Éféz. 4:8). Ès ou ja pozé-w kèsyon-lasa : « Ka an pé fè dè koté an mwen pou ankourajé sé sè-lasa é édé-yo ? »

14. Konm i sav sa ki maké an Sòm 68:11, ka on ansyen ki ni sajès ké fè ?

 ¹⁴ On ansyen ki ni sajès ka rann-li kont kè sé sè-la sé on « gran lawmé ». Yo fidèl, é byensouvan, yo sé dé zouti-filé an prédikasyon (li Sòm 68:11). Sé pousa, yo ka chèché on jan pou yo bénéfisyé dè èkspéryans a yo. Talè-la nou palé dè Abigail. I tèlman enmé lè sé frè-la ka mandé-y ki prézantasyon ki ka maché pibyen èvè sé moun a téritwa-la. Mi sa i ka di : « Sa ka édé-mwen konprann kè Jéova ban-mwen on bèl travay a fè adan òwganizasyon a-y. » Anplis, sé ansyen-la ka admèt kè lè on sè ni èkspéryans é kè i fidèl, i byen plasé pou édé on jenn sè ki ka jwenn difikilté. Kò a yo bon adan sa menm ! (Tit 2:3-5). É nou pé di kè sè an nou mérité kè nou di-yo kè nou enmé-yo é kè nou ka aprésyé-yo !

15. A ki moman sè an nou byen bizwen nou pran défans a yo ?

¹⁵ Délè, sè an nou ka touvé-yo adan sèwten sitiyasyon é yo té’é byen bizwen on moun pran défans a yo (Iz. 1:17). Pa ègzanp, on sè ki pèd mari a-y oben on sè ki divòsé pé bizwen on moun édé-y fè sèwten biten mari a-y té ka fè avan. On sè ki ja ni on laj pé bizwen on moun ay vwè on mèdsen èvè-y. On sè ki pyonyé pé ka travay pou lòwganizasyon é i pé pa préché kon avan. Akòz dè sa, yo pé ka kritiké-y, kifè, i pé byen bizwen on moun pran défans a-y. Ki dòt biten nou pé fè pou édé sè an nou ? Pou réponn, an-nou wouviré ègzaminé ègzanp-la Jézi lésé ban-nou la.

16. Mawk 14:3-9 ka montré kè Jézi pran défans a Mari. Kijan i fè sa ?

¹⁶ Lè yo té ka di bétiz asi madanm ki té ka adoré Bondyé kon-y menm, Jézi pa té ka bat dèyè pou i té pé sa défann-yo. Pa ègzanp, i pran défans a Mari lèwvwè Mawt kritiké-y (Lik 10:38-42). Ondòt lè ankò, yo woukritiké Mari pas yo té ka konpranndèdi kè i té pran on mové désizyon. Men la ankò, Jézi woupran défans a-y (li Mawk 14:3-9). Jézi té sav kè mari pa té ni pon mové lentansyon é i félisité-y pousa. Mi sa Jézi di : « I fè on bon biten pou mwen [...] i fè sa i té pé ». I jous di kè yo té’é rakonté sa madanm-la fè la « asi tout latè », ‘toupatou yo té’é préché bon nouvèl-la’. É jistèman, mi nou ka palé dè-y adan awtik-lasa ! Anplisdisa, on biten ki fò toubònman sé kè Jézi pwofité dè jès-la Mari fè la pou i té èspliké kè prédikasyon-la té’é fèt toupatou asi latè. É nou sèten kè sé pawòl-la Jézi di la dwèt fè Mari dibyen toubònman pas yo té sòti di bétiz asi-y alòskè i pa té mérité sa !

17. Adan ki sitiyasyon nou té’é pé défann on sè ?

¹⁷ Défwa, sè a lasanblé an nou byen bizwen on moun défann-yo. Ès ou ka édé-yo ? Imajiné kè on sè, mari a-y pa Témwen, toujou ka rivé anrèta réinyon é i ka pati tousuit apré. É byensouvan, i pa’a vin lasal èvè sé timoun-la. Ni sèwten pwoklamatè ki ka rèmawké sa é yo ka mandé-yo poukwa i pa pi karé èvè mari a-y é yo ka koumansé kritiké-y. Alòskè an réyalité, sè-la ka fè tousa i pé ! Malérèz-la pa’a pé rèspèkté pwogram a-y kon i té vlé é a pa-y tousèl ki ka désidé pou sé timoun-la. Alò, si ou ka tann moun ka kritiké ti sè-la, kijan ou ké réyaji ? Siwvwè ou ay félisité ti sè-la pou tousa i ka fè é kè ou èspliké sélézòt frè é sè a lasanblé-la kè i ka fè tousa i pé, pétèt kè moun ké arété malpalé-y.

18. Ki dòt biten nou pé fè pou édé sè an nou ?

¹⁸ Lè nou ka ba sè an nou on pal, nou ka montré-yo kè nou ka sousyé-nou dè yo (1 Jan 3:18). Pi ho, nou palé dè Annette.  Manman-y té malad é sé-y ki té ka okipé dè-y. Mi sa i ka di : « Ni sèwten frè é sè ki té ka okipé dè manman ban mwen é ni dòt aprézan ki té ka pòté manjé ban nou. An pé di-zòt kè an té ka santi kè frè é sè an mwen té enmé-mwen toubònman é kè an té ni plas an mwen an lasanblé-la ! » Talè-la nou palé dè Jordan. Ében li osi, frè é sè a lasanblé a-y édé-y. Pa ègzanp, on frè montré-y kijan pou i té fè antrètyen a vwati a-y é mi sa i ka di : « Frè é sè an mwen ka sousyé-yo dè sékirité an mwen é sa ka touché-mwen toubònman ! »

19. Ki dòt biten sé ansyen-la pé fè pou édé sé sè-la ?

¹⁹ Sé ansyen-la osi ka fè tousa yo pé pou édé sé sè-la. Yo sav kè Jéova vé kè yo pran swen a sé sè-la byen konm i fo. Sé pousa yo ka imité Jézi é yo ka montré-yo rézonab (Jak 1:27). Yo pa’a oblijé sé sè-la rèspèkté pon règ kè yomenm a yo fè, men okontrè, yo ka montré-yo janti é yo ka fè éfò pou montré sé sè-la kè yo ka konprann sitiyasyon a yo (Mat. 15:22-28). Lè sé ansyen-la ka fè tousa yo pé pou yo pé sa pran swen a sé sè-la, yo ka fè-yo santi kè Jéova enmé-yo é kè òwganizasyon a-y enmé-yo osi. Lèwvwè rèsponsab a gwoup a prédikasyon a Kia vin sav kè i té k’ay déménajé, i pòté mannèv pou yo té ba-y on pal adan sa. Mi sa Kia di : « An té istrésé bon istrésé la, men an santi-mwen léjè apré. Sé ansyen-la ban-mwen on bèl pal é sa yo di-mwen ankourajé-mwen. Yo montré-mwen on mannyè ki klè kè an ni onlo valè pou yo adan lasanblé-la é kè lè an ka pasé on bout-rèd, an pa tousèl. »

20-21. Ka nou pé fè pou montré sè an nou kè nou enmé-yo ?

²⁰ Adan lasanblé an nou, ni onlo sè ki ka travay rèd é yo mérité nou soutyenn-yo. Menmjan ki Jézi, fò-nou pran on ti tan pou palé èvè yo é pou aprann konnèt-yo. Fò-nou di-yo kè nou ka aprésyé tousa yo ka fè pou Jéova é lèwvwè sa nésésè, fò-nou pran défans a yo.

²¹ Lè Pòl té k’ay fin maké lèt-la i voyé la ba sé women-la, i palé dè 9 sè diféran (Wom. 16:1, 3, 6, 12, 13, 15). Adan lèt-lasa, i té ka voyé bonjou ba sé sè-la é i té ka félisité-yo. Nou ka tou konprann kè lè yo vin sav sa, sa dwèt ankourajé-yo toubònman ! Menmjan-la, an-nou soutyenn tout sè ki an lasanblé an nou ! Konsa, nou ké montré-yo kè nou enmé-yo é kè yo ka fè pawti a fanmi an nou.