1. Mókà nvèè bá ní e gbò vígà pábia ólò nvèè nè bõ̀ònatõ̀ò ẽ, sõò mókà gbò nu ànà-ànà ní e gã́bug ọ̀và ólò kpee sĩ́ ló é? (Ẹ̀b fùtó ea di boo koo kpáí.)

NYÍÉI palàge ẹẹ gè ié gã́bug gbò vígà pábia e bà gé tú agẹ bá siimá tom mm̀ bõ̀ònatõ̀ò! Dì belí nu dòòmà bá, bà ólò dõ̀ònà tõ̀ò ló nònù, vaá sí ól tóm kọ̀ kpẹ̀a. Sìgà ọ̀và ólò nvèè bá gè õ̀ònà ló Kíndòm Họ́ọ̀l, vaá zogè kọọ̀ bà bulàẹ̀ nú ea kil ló dõòna kà pá vígà págbálà nè pábia. Kọ̀láá bé ea dì naa, bà ólò kpee nagé sĩ́ ló gã́bug nu ànà-ànà. Sìgà ọ̀và gé ẹb nú ea kil ló ba tẹ̀ nè ba kà e ba ni dú kànen mm̀ dee. Sìgà ọ̀và gé téní bà nàà uú boo ea aa bá pá tọ. Boo tṍó ea ié sìgà nen e áá ẹ̀ẹ̀ gé piigà búmá gbò pá nvín.

2. Éé ní ea náa vaá èé pììgà ge nvèè bá nè gbò vígà pábia ẹ́?

² Éé ní ea naa vaá èé nveè bá nè gbò vígà pábia ẹ́? Boo béè kọ pá nakà bàlà booí náa ólò tú ka ea bọ́va ló nè va. Gbá ló vó, Kpá Káí síèi kpóó ló kọ é nvèè bá nè va. Dì belí nu dòòmà bá, neǹ tóm Pọ́ọ̀l beè kọ́ nè bõ̀ònatõ̀ò ea di Róm̀ kọ bàá tú lé bá tuumá Fíbì vaá bà née “kọ̀láá íb nvèè bá e a bĩ́íná” lọ̀l vá bá. (Róm̀ 16:1, 2) Dì belí neǹ Fárèsíì, àé láá dú gè kọọ̀ Pọ́ọ̀l beè tú lóó nvee mm̀ nàànù kunukẽ̀ e bà ólò ẹ̀b gbò bia tẹlẹ kẽ. Sõò, kátogóí ea ni dú nen Kráìstí, a nó Jíízọ̀s vaá tú kà lé bá sẹ̀ẹ̀mà gbò bia vaá nvèè va ka ló.—1 Kọ́r. 11:1.

3. Mó bá ní e Jíízọ̀s beè faamá gbò bia ẹ́, vaá a beè ẹ̀b gbò bia e bà náa bùlà Bàrì naa vàẹ?

³ Jíízọ̀s beè nvèè ka ló gbò bia. (Jọ́ọ̀n 4:27) Náa beè ẹ̀b gbò bia belí bé e gbò tùle fã̀ pá Júù e ba beè di mm̀ a deeá géè ẹ̀b va naa. Kàsĩ́, ene kà kpá ea baatẽ́ Kpá Káí kọ́ọ̀: “Tọ́ọ̀ kà bel e Jíízọ̀s beè lò náa zógè kọ a beè ẹ̀b gbò bia tẹlẹ kẽ.” Tãa vó, Jíízọ̀s beè palàge nvèè ka ló gbò bia e bà náa bùlà a Tẹ̀. À palàge dọa bàlà kẽ kọọ̀ a beè kolí vá pá a vígà pábia vaá kolíva bée gbá ló gbò gbálà e ẹlẹ beè tú naamá pá ńlẹ́ẹ̀ tọ e bà gé gbá fã̀ Bàrì—Máát. 12:50.

4. Éé ní eé ló sọ́l boó mm̀ nakà kpò nònùí ẽ́?

 ⁴ Jíízọ̀s beè di kpènà ló kọ̀láá tṍó ge nvèè bá nè gbò bia e bà gé fã Bàrì. A beè náa kọ bàá nyimá kọ bà dièe bíi ló vaá ló va bel boo. Naanii mè é ló sọ́l boo bé e beele é láá nó Jíízọ̀s mm̀ ge bùlà nú ea kil ló bẹẹ gbò vígà pábia naa.

5. Éé ní ea é láá naa kọ á tàvala ló sìgà vígà pábia gè bã̀àà lé kóò e?

⁵ Dénè bẹ̀ì e dúù pá vígà ié bíi ló gè bã̀àà lé kóò. Gã́bug tṍó, àé láá tàvala ló gbò vígà pábia ge mòn íb kóò e bà gé gbĩ́. Ló éé? Nvèè kpíí ló na gbò belí. Ene kà vígà pábia ea kọlà Jordan * kọ́ọ̀: “Boo béè kọọ̀ m̀ gáà ia dóm, à ólò tõo ḿ ló kọ ním íè tọ́ọ̀ kà dọ̀ tóm gè sí mm̀ bõ̀ònatõ̀ò, vaá à ólò belí kọ ním bọ́ọ̀ lọ́.” Kristen, ea dú ene neǹ gyà deè sĩ́ tóm ea beè nyaaná tõ̀ò kil kiẽ́e ea é láá bọ̀ọ̀vẹ̀ gbàà a sìtóm kọ̀ kpẹ̀a kọ́ọ̀: “Tṍó eo ã́àa iná ene kà bõ̀ònatõ̀ò, lóó ni é láá biigá.” Sìgà pá vígà é láá ié nágé tẽ̀ènè íb tọa lóá. Àé láá tàvala ló gbò e pá ba tọ náa ólò sí nònù gè gbaá ló pá ba tọ vaá naa kọ á belí kọ bà diè kpã́á aalìè ló pá vígà mm̀ bõ̀ònatõ̀ò. Sìgà gbò vígà pábia é láá kpòòlà lóó sẹlẹ́ kele boo béè kọ bà di kè bá zọ̀ kpá ló àbèè ge kọọ̀ bà gé ẹb nú ea kil ló nen ea dṹùnà ba tọ e kpá lóe gé zọ. Annette kọ́ọ̀: “Ním ólò láá tú gã́bug tṍó tõ̀òma ló pá vígà pábia nè págbálà boo béè kọọ̀ áá nda ní em ólò ẹb nú ea kil ló ńdáà kà ẹ.”

6. Dẹ̀ẹ̀a boo nú ea di mm̀ kpá Lúùk 10:38-42, mósĩ́ deè ní e Jíízọ̀s beè nvèè bá nè Mátà nè Mérì e?

⁶ Jíízọ̀s beè ié tṍó nè gbò vígà pábia e bà géè fã̀ Bàrì, vaá a beè dú ba lé kóò. A beè bã̀àà kóò Mérì nè Mátà, e pálàa ọ̀và gáà beè ia dóm. (Bugi Lúùk 10:38-42.) Jíízọ̀s beè naa kọọ̀ lóó va á dĩ̀ìnà tení dú lo gbò a bel nè a láb. Dì belí nu dòòmà bá, lóó Mérì beè dĩ̀ìnà tṍó ea ĩ́ìtẽ́ ló Jíízọ̀s dì belí a neǹ nyòòne nvée. * Vaá tṍó e nyíè Mátà biilà boo béè kọọ̀ Mérì náa nveenìè bá neèe, a beè taaá ló kọ́ gbò nú ea tãagẽ́e nè Jíízọ̀s. Gbẹá kĩé, Jíízọ̀s beè nvèè bá nè pálàa kà pábiaí kọ bàá mòn bélè ea di ló gè fã̀ Bàrì. Vaá a beè palàge ẹ̀b nú ea kil ló gbò biaí nè ba vígà págbálà, ea kọlà Lázarọ̀s, tení dú ló gè olòó bìlà kyẽè sívá ló. (Jọ́ọ̀n 12:1-3) Vó ní ea beè naa vaá tṍó e kpá ló Lázarọ̀s palàge zọ̀, Mérì nè Mátà beè nyimá kọ bàé láá banìè nvèè bá lọl bá Jíízọ̀s e.—Jọ́ọ̀n 11:3, 5.

7. Mósĩ́ deè ní eé láá zogè kọ è síè kpóó ló gbò vígà pábia ẹ́?

⁷ Kilma ló sìgà vígà pábia, nònù dú kà pọ̀b kà nèà deè e bà íe gè dììma ló gbò e bà gé gbá fã̀ Bàrì. Vóà naa, tṍó e ínà nònù, èé mon kọ è palàge zààvà va ló, zọ̀ va loá bel, vaá náa kọ bàá nyimá kọ è bùlà nú ea kil va ló. Jordan, e beè zẹ́ẹ́ kolí béeá kọ́ọ̀: “À ólò sièm kpóó ló tṍó e pá vígà leelàm ló bíb em áàlà gbẹá nònù, tṍó e pá vígà noo gè zọ̀m sí ól tóm kọ̀ kpẹ̀a, àbèè ge zogè kọ bà bulàẹ̀ nú ea kilím ló.” Èé íè ge náa kọ gbò vígà pábia á nyimá kọ è nveenìè va ka ló. Enè nen ea bée kọlà Kia kọ́ọ̀: “Be enè deè nònù lọ́m, m̀ ólò nyimá kọ bàé lẹẹlà tóm tenmá boo fóòn mám ge gbĩ́ gè nyimá be lóóm dì gé lé. Níá ólò náa kọ ḿ nyimá kọọ̀ pá vígà págbálà nè pábia gé bulà nú ea kilím ló.”

8. Mókà dõòna kà gbò sĩ́deè ní eé láá nó Jíízọ̀s e?

⁸ Dì belí Jíízọ̀s, èé láá pììgà ge zọ̀ gbò vígà pábia naaá nu. Be à sẹlẹ èé láá kolí va ló gyã́á àbèè kè sìgà gbò ea é síè va koóó ló ge fã̀ Bàrì. Tṍó e náà vó, èé mon kọọ̀ gbò  bel e lóò á dú ní ea é síè va kpóó ló. (Róm̀ 1:11, 12) Gbò kànen á pììga boo gè ié tẽ̀ènè íb nyíe e Kráìst beè ié. Ẹlẹ beè nyimá kọọ̀ àé láá dú nu ànà-ànà nèà gbò e bà gáà ili àbèè ge iá, sõò a beè palàge baatẽ́ kọọ̀ níì tṍó e nen ílí àbèè ge iá vaá ié gbò pá nvín ní ea é náa kọ á ié kà kà ẹ́ẹ́-ẹẹ̀ nyíe ẽ́ nì. (Lúùk 11:27, 28) Tãa vó, kà kà ẹ́ẹ́-ẹẹ̀ nyíe dẹẹ̀a boo gè tú tóm Jìhóvà naamá túá kà nú mm̀ dùm.—Máát. 19:12.

9. Éé ní e gbò kànen é láá naa gè nvèèmà bá nè gbò vígà pábia ẹ́?

⁹ À dú bíi kọ gbò kànen á sẹlẹ gbò vígà pábia e bà gé fã Bàrì belí ba gbò vígà pábia nè ba gbò kà. (1 Tím. 5:1, 2) Àé dú lé beè gbò kànen noo tṍó ge zọ̀ gbò vígà pábia loá bel besĩ́ bà kálá dààmà togó nònù àbèè tṍó e bà ni zaalà. Kristen kọ́ọ̀: “Enè neǹ kànen beè nyimá kọọ̀ m̀ palàge di mm̀ kíìli-kíìli vaá gbóó gbĩ́ gè dã́ ból ló bé e nà nòònù dì naa. Nyíém beè palàge ẹẹ kọ à bulà nú ea kilím ló.” Tṍó e gbò kànen ólòó noo tṍó vaá zọ̀ gbò vígà pábia e bà gé fã Bàrì loá bel, bà zógè kọ bà gé bulà nú ea kil vá ló. * Annette, e beè zẹ́ẹ́ kolí béeá, baatẽ́ ene kà nú ea náa vaá à ólò dú lé gè olòó zọ̀ gbò kànen loá bel. À kọ́ọ̀: “À náa kọ é kpáá palàge nyimá  ló ene. Níí náa kọọ̀ tṍó em kpéè sĩ́ ló tã̀àgã̀, á valí ḿ ló gè bĩiná nvèè bá lọ̀l vá bá.”

10. Éé ní ea é láá naa kọọ̀ nyíè gbò vígà pábia á ẹẹ ẹ́?

¹⁰ À ólò siè kpóó ló dénè bẹ̀ì, e dúù gbò gbálà nè gbò bia, tṍó e dõòna gbò zaàva ló tóm e síì vaá lèèlài. Boo dõòna bá, be à gá náa bà ẹ̀b tóm e síì tẹlẹ kẽ, à ólò ọọvẹ́i ló. Abigail ea dú nen gyà deè sĩ́ tóm ea gáà iá dóm, ea tõó ẽ́ ló kọ bà ólò ẹbvìèe tẹlẹ kẽ kọ́ọ̀: “Gbò nen náa nyímám bée, áá gbò e bà dṹùnàm ní e bà ólò dòòmàm bá ẹ́. Sìgà tṍó à ólò tõó ḿ ló belí kọọ̀ tọ́ọ̀ nen náa nyímám ló.” Sõò, nvèè kpíí ló bel e ene kà vígà pábia ea kọlà Pam beè kọ̀. A beè tú gã́bug gbáá siimá tóm aa dó dọ dó tṍó ea gáà beè iá dóm. Tṍó e tṍó téní, a beè òòà kil be gé ẹ̀b nú ea kil ló a tẹ̀ nè a kà e ba ni dú kànen mm̀ dee. Kátogóí e ẹlẹ di mm̀ a 70 gbáá, vaá à dì ea gé si sí tóm gyà deè sĩ́ tóm. Pam kọ́ọ̀: “Nú ea beè palàge nvèè bá nèm dú tṍó e dõòna gbò kọ́ọ̀, nyíé va ẹ́ẹ̀lìè ló nà tóm.”

11. Mósĩ́ deè ní e Jíízọ̀s beè zogè kọọ̀ à nveenìè ka ló gbò bia e bà géè gbá siá tómá ẽ́?

¹¹ Jíízọ̀s beè zààva ló nvèè bá ea aa bá gbò bia e bà géè tú “ba gyọ́” nvèèmà bá nèe. (Lúùk 8:1-3) Níì áá gè kọọ̀ a beè sọ̀va bá kọ bàá siè tóm neè ẹlẹ nì, sõò a beè kọ nágé kà kà bel ea kil ló bùlà Bàrì nè va. Dì belí nu dòòmà bá, a beè kọ́ nè va kọọ̀ àé úè vaá kẽeàè aalìè kemà ú. (Lúùk 24:5-8) A beè kpoogè dee ló gbò biaí dì belí bé ea beè náa gbò tómá, boo béè gbò tã̀àgã̀ e bàé beè láá kpee sĩ́ ló. (Máàk 9:30-32; 10:32-34) Náa kal ló béè kọọ̀ gbò tómá beè teelá tṍó e bà síi Jíízọ̀s, gbò bia e bà géè nvèè bá nèeá beè dìé kpàn tṍó e bà fẹ́ẹ.—Máát. 26:56; Máàk 15:40, 41.

12. Mókà tóm ní e Jíízọ̀s beè nè gbò bia ẹ́?

¹² Jíízọ̀s beè tú tóm ea palàge dì bíi nè gbò pábia. Dì belí nu dòòmà bá, gbò bia e bà géè fã̀ Bàrì ní ea beè dú túá gbò e bà mon Jíízọ̀s tṍó ea kẽeà aa kemà ú é. A beè kọ́ nè gbò biaá kọ bàá àà gé kọ́ nè gbò tómá kọ a kẽeàè aalìè kemà ú. (Máát. 28:5, 9, 10) Vaá kà lèlà deè Péntikọst 33 C.E., gbò bia beè láá di gbàà gbò e ba beè tú nyómá káí tõomá va nóo bólá. Beè vó, àé láá dú kọọ̀ gbò biaí beè lo nágé dõòna kà dém bel vaá kọ́ nè dõòna gbò nú ea kil ló “gbele gbele tóm dũ̀ùnè e Bàrì ni sí!”—Tóm 1:14; 2:2-4, 11.

13. Éé ní e gbó vígà pábia gé náa deè nieí é, vaá mósĩ́ deè ní eé láá zogè kọ è nveè ka ló tóm e bà gé sí é?

¹³ À bọ́ló gè lèèlà gbò bia boo béè tóm e bà gé sí nè Jìhóvà. Ba tóm bãàa mm̀ ge tìb nè ge õ̀ònà ló gbò tọ gè tọọ̀ m fã̀ Bàrì, ge zọ̀ gbò e bà ólò ló dõòna kà dém bel kọ́ kpẹ̀a, nè ge tú lóó nè ge sí tóm Bẹ́tẹẹ̀l. Bà ólò nvèè bá nè gbò e bù ló kyọ̀à sĩ́ dọ́ vá boo, ge tàb bẹẹ gbò kpá, ge sí tóm gyà deè sĩ́ tóm nè ge kọ́ kpẹ̀a aa dó dọ dó. Dì belí gbò vígà págbálà, gbò vígà pábia ólò sí tọọ̀ kpá ea dì nè gbò gyà deè sĩ́ tóm, Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné, nè Tọọ̀ Kpá Gílẹẹ̀d. Gbá ló vó, gbò va ólò nvèè bá nè ba dóm kọ bàá láá sí agẹ tóm ea dì vá bá mm̀ bõ̀ònatõ̀ò. Gbò vígà págbálàí dú “dõ̀ò nu e a nè gbò nen” vaá bà ólò naa gã́bug nu mm̀ ge nvèè bá nè dõòna gbò. Sõò àé palàge tàvàlà vá ló gè láá naa gbò nuí é beè ba va náa nveè bá nè va. (Ẹ́fẹ. 4:8) É kọọ̀ òó láá bugi togó boo gbò sĩ́deè eo é láá nvèèmà bá nè gbò vígà pábiaí nyòòmà íb tóm e bà gé sí?

14. Dẹ̀ẹ̀a boo nú ea di mm̀ kpá Psalm 68:11, éé ní e gbò kànen e bà nyímá nu ólò naa ẽ́?

¹⁴ Gbò kànen e bà nyímá nú ólò dã́tẽ́ ló kọọ̀ gbò vígà pábia “bọọ́ gã́bug,” bà di kpènà ló gè sí tóm vaá bà ólò láá palàge kọ́ kpẹ̀a. (Bugi Psalm 68:11.) Vóà naa,  gbò kànen ólò gbĩ́ gbò sĩ́deè e bàé láá noomá nu lọl bá gbò vígà pábiaí. A beè siè kpóó ló Abigail e beè zẹ́ẹ́ kolí béeá tṍó e gbò vígà págbálà bĩ́ínáe sĩ́deè e ẹlẹ mon kọ à palàge dú lé gè láá dààmà togó loa sọ́l gbẹá ól tóm kọ̀ kpẹ̀a. Vígà pábiaí kọ́ọ̀: “Níá beè nvèè bá nèm kọ ḿ mòn kọọ̀ Jìhóvà ném agẹ bá tóm ge sí mm̀ a bõ̀ònatõ̀ò.” Gbá ló vó, gbò kànen ólò nyimá kọọ̀ gbò vígà pábia e bà bọ́ló dẹ̀lẹ̀ nyíé boo ólò láá palàge nvèè bá nè gbò nvín ãa pábia tṍó e bà kpee sĩ́ ló tã̀àgã̀. (Táítọ̀s 2:3-5) Mm̀ kà kà, à bọ́ló kọ é vùlè vaá zààva ló gbò vígà pábiaí!

15. Mó tṍó ní e gbò vígà pábia é láá ié bíi ló nen ea é ló va bel boo é?

¹⁵ Sìgà tṍó, gbò vígà pábia ólò ié bíi ló gbò e bàé ló va bel boo tṍó e bà kpee sĩ́ ló dìtõ̀ò ànà-ànà. (Àìz. 1:17) Dì belí nu dòòmà bá, vaà tãa àbèè pábia e dóm beè kpó lọa ló é láá ié bíi ló nen ea é lóe bel boo vaá nvèè bá naa sìgà tóm ea dóm beè olòó naa nèe. Vígà pábia ea ni dú kànen mm̀ dee é láá ié bíi ló nen ea é nveè bá lóe bel boo nè neǹ dóm biè. Àbèè kọọ̀ vígà pábia ea di boo tóm gyà deè sĩ́ tóm ea gé sí dõòna kà gbò tóm mm̀ bõ̀ònatõ̀ò é láá ié bíi ló nen ea é lóe bel boo, be à gá náa bà ló bel uué boo kọ náa ólò bọọ̀gẹ̀ sí ól tóm kọ̀ kpẹ̀a belí na gbò gyà deè sĩ́ tómá. Mókà dõòna kà sĩ́deè ní eé láá nvèèmà bá nè gbò vígà pábia ẹ́? Naanii mè é zẹ́ẹ́ kpáá bugi togó boo nu dòòmà bá Jíízọ̀s.

16. Dẹ̀ẹ̀a boo nú ea di mm̀ kpá Máàk 14:3-9, mósĩ́ deè ní e Jíízọ̀s beè ló bel boo Mérì e?

¹⁶ Jíízọ̀s náa beè pee tṍó ló gè nvèè bá nè gbò pábia e bà géè nyoonée nvée tṍó e bà íe èègà mòn. Dì belí nu dòòmà bá, a beè ló bel tenmá boo Mérì tṍó e Mátà kolvàẹ́ ló. (Lúùk 10:38-42) Vaá a beè kpáá ló bel tenmá boo Mérì ní ea égè bàà tóm tṍó e gbò nen ẹbvíe tẹlẹ kẽ boo béè kọọ̀ bà ẹb kọọ̀ à nè pọ́lọ́ béèlàfùl. (Bugi Máàk 14:3-9.) Jíízọ̀s beè dã́ ból ló bùlà e Mérì beè ié vaá gbóó kọ́ nèe kọọ̀: “À náa gbele lé nu nè nda. . . . Pá biaí a náa nu e a kpóó sim tùlà.” Jíízọ̀s beè kọọ̀ bàé ólòó kọ́ nú ea náaá mm̀ ge kẽea boo a lé lábvá “kọ̀láá kĩ e bà vee Lé Kpẹaí inmá e a di bàlà booí,” dì belí bé e kpáí gé náa naa kátogóá. À dú lé gè nyimá kọọ̀ Jíízọ̀s beè kọọ̀ lé kpẹ̀a Boǹ Ménéá é íná kọ̀láá ketõ̀ò ea di bàlà booí tṍó ea géè lèèlà Mérì ló a dùm ge nè nu taalẹ bá! Gbò moǹ belí beè náa kọ Mérì á àgala boo kọọ̀ gbò nen náa beè dãàe ból ló!

17. Nè nu dòòmá bá ea kil ló tṍó eé láá ló bel tenmá boo vígà pábia.

¹⁷ É kọọ̀ ò ólò ló bel tenmá boo gbò vígà pábia e bà gé fã̀ Bàrì tṍó e bà íe bíi ló? Dì belí nu dòòmà bá, bugi togó boo nakà nuí. Sìgà gbò kọ̀ kpẹ̀a mon kọọ̀ ene kà vígà pábia ea aa tọ ea dóm náa ólò sí nònù ólò bọọ̀gẹ̀ dú kpẹ̀ nvée ló nònù, vaá gbẹá boo àà tṍó e bà ni zaalà nònù. Bà nveè kpíí ló kọọ̀ náa ólò bọọ̀gẹ̀ faalá pá a nvín domá nònù. Bà gbóó ló bel uué boo kọọ̀ éé ní ea náa vaá náa tú bá kpóó tuumá gbò pá nvín lọl bá a dóm vaá faalá va domá nònù ẽ. Sõò, nú e bà náa nyímá dú gè kọọ̀ vígà pábiaí gé piigà bé ea kpóó sim tùlà naa. Vígà pábiaí náa ié gbõ̀òme lẹ̀ẹ̀là bel boo a nòònù; vaá níì ẹlẹ ní ea é ne dee deè nvéè béèlàfùl boo ba gbò nvín ẽ́ nì. Éé ní e olo é láá naa be ò dã́ tṍó e bà gé ló íb gbò belí é? Be ò leelà vígà pábiaí ló gbò a agẹ tóm vaá kọ́ nè dõòna gbò bé ea gé piigà naa, àé láá naa kọọ̀ gbò nen á gá ló ná íb gbò belá nèe.

18. Mókà dõòna kà gbò sĩ́deè ní eé láá nvèèmà bá nè gbò vígà pábia ẹ́?

¹⁸ Èé zogè gbò vígà pábiaí kọ è gé bulà nú ea kil vá ló tení dú ló gè naa nú ea dú va bíi ló. (1 Jọ́ọ̀n 3:18) Annette, ea géè ẹ̀b nú ea  kil ló a kà ea di kè bá zọ̀ ló kọ́ọ̀: “Sìgà tṍó pá vígà ólò dù gé nvèè bá ẹ̀b nú ea kil ló ńdáà kà kọbé m̀ láá naa dõòna kà nu, àbèè ge kọ bà fáálá gyã́á domá. Níí ólò naa kọ ḿ nyimá kọọ̀ pá bẹẹ bõ̀ònatõ̀ò vulèm.” Jordan beè ié nágé nvèè bá. Ene kà vígà págbálà beè noomàe bé ea é láá ẹ̀b nú ea kil ló a faà naa. Vígà pábiaí kọ́ọ̀: “À dú lé gè nyimá kọọ̀ pá vígà gé nvèè bá kpènàm.”

19. Mókà dõòna kà gbò sĩ́deè ní e gbò kànen é láá nvèè bá nè gbò vígà pábia ẹ́?

¹⁹ Gbò kànen ólò pììga boo ge nvèè nàgé bá nè gbò vígà pábia. Bà nyímà kọọ̀ à léémá Jìhóvà kọ bàá palàge ẹbvìè nú ea kil ló gbò vígà pábia. (Jém̀z 1:27) Vóà naa, gbò kànen ólò nó Jíízọ̀s vaá labví láb e nyìmànù di m. Bàé láá naa níí tení dú ló gè kọọ̀ bà náa gé ne log tṍó ea bĩ́íná gè kọ bàá nvèè bá vaá dã́ ból ló dìtõ̀ò. (Máát. 15:22-28) Tṍó e gbò kànen piigà vaá nvèè bá, à náa kọọ̀ gbò vígà pábiaí á nyimá kọọ̀ Jìhóvà nè a bõ̀ònatõ̀ò vulèè va, vaá ẹ̀b nú ea kilìè vá ló. Tṍó e nen ea ólò ẹ̀b nú ea kil ló gbò e Kia ólò zọ̀ kọ́ kpẹ̀a nyímá kọọ̀ àé gé nyaaná tõ̀ò kil dõòna kà be, a beè vàlẹ̀ bá noo gè nvèè bá nèe. Kia kọ́ọ̀: “A beè náa gbò nú ea gáẹ̀ beè nvèèm tã̀àgã̀ ló. Gbò kànen beè zogè kọọ̀ m̀ palàge dì va bíi ló mm̀ bõ̀ònatõ̀ò nè ge naa kọ ḿ nyimá kọ bà diè ḿ ló tṍó e dìtõ̀ò tavàlà ḿ ló, tení dú ló ba gbò bel sìà kpóó ló nè ba nvèè bá.”

20-21. Mósĩ́ deè ní eé láá zogè kọ è vulè gbò vígà pábia e bà gé fã Bàrì e?

²⁰ Tṍó e ẹbvì mm̀ bẹẹ bõ̀ònatõ̀ò deè nieí, è íè gã́bug gbò vígà pábia e bà íe bíi ló bẹẹ nvèè bá, e bà gé tú agẹ bá siimá tóm. Dì belí bé e nu dòòmà bá Jíízọ̀s nóòmài naaá, beele é láá ié tṍó nè va, vaá gbĩ́ gè nyimá va ló leevè. Èé láá zogè kọ è zaavàẹ̀ ló tóm e bà gé sì nè Bàrì. Vaá èé láá ló va bel boo tṍó ea dú bíi.

²¹ Dee deè nvéè kpá e neǹ tóm Pọ́ọ̀l beè emí má pá Róm̀ kol béè sĩ́ìna òb kà pábia e bà géè nyoone nvéè Kráìst. (Róm̀ 16:1, 3, 6, 12, 13, 15) Tọ́ọ̀ kà bàà-bàà bùlà á gé ló kọọ̀ níí beè siè kpóó ló gbò vígà pabiaí tṍó e bà dã́ kànà mòn kól nè ṍà zaá ea aa bá Pọ́ọ̀l. Naanii mè beele é nveè nàgé bá nè gbò vígà pábia e bà di mm̀ bõ̀ònatõ̀ò. Tṍó e náà vó, è zógè kọ è nveè va ka ló belí gbò e gé gbá fã̀ Bàrì.