1. Bhoinno songottnnek koso tenko ditat, punn zaitea bhoinnank koslea oddchonneancho fuddo korcho poddtta? (Masikachem fuddlem chitr polloiat.)

SOBHENT koxtti vavr korpi zaitim bhav-bhoinnam asat mhunn ami khuxal. Udharonnak, tim mittingent ani sevent bhag ghetat. Thoddim, Raj-ghor samballpachea kamant bhag ghetat ani bhav-bhoinnanchi kallji ghetat. Punn tankam oddchonneancho pasun fuddo korcho poddtta. Thoddeank aplea zantteam avoi-bapaichi kallji gheunchi poddtta. Herank aplea famili koddlean virodh soscho poddtta ani thoddeank ghov na dekhun aplea bhurgeank posunk khub vavurchem poddtta.

2. Ami amchea bhoinnank urba diunk kiteak proitn korunk zai?

² Ami amchea bhoinnank kiteak urba diunk zai? Karonn chodd korun sonvsarant bailank favo to man mellona. Tea bhair, tankam urba diunk Bible amkam sangta. Udharonnak, apostl Paulun Romant aslolea sobhentlea bhav-bhoinnank, Febe nanvachea bhoinnik ieukar diat ani “tika kosli-i goroz poddot zalear, tika adar diat” mhunn sanglem. (Rom. 16:1, 2) Paulu ek Farizev aslo ani Farizev lok bailancho valor korinasle ani tanchea sangata bore toren vago nasle. Tori astana to Kristanv zalea uprant, tannem Jezuchi dekh gheun bailank man dilo ani tanchea sangata doiallaien vaglo.—1 Kor. 11:1.

3. Jezu bailam sangata koso vaglo ani Devachi khuxi kortoleam bailank tannim koxim lekhlim?

³ Jezun soglea bailank man dilo. (Juanv 4:27) Tachea tempa voilea, Judev dhormik fuddaream bhaxen tannem bailank lekhunk na. Bible-a vixim mahiti diupi ek pustok mhunntta, “Bailank opman kortat toslim utram Jezun kednanch mhunnonk nant.” Khorem mhunnttlear, aplea Bapachi khuxi kortolea bailank Jezu chodd resped ditalo. Mhotvachem mhunnttlear, tannem bailank apleo bhoinno mhunn lekhleo ani dadleank aplea familicho bhag mhunn lekhtalo toxench tannem tankam-i lekhleo.—Mt. 12:50.

4. Hea lekhant ami kitem bhasabhas kortolim?

⁴ Devachi seva kortolea bailank modot korunk Jezu sodanch  toiar aslo. Tim mhotvachim asat mhunn tannem dakhoun dilem ani tanchea pasot uloilo. Hea toren ami Jezuchi dekh koxi gheunk zata tem bhasabhas korum-ia.

5. Thoddea bhoinnank, bhav-bhoinnam sangata vell sarunk kiteak kotthin zata?

⁵ Ami sogleamnim amchea bhav-bhoinnam sangata vell sarchi goroz asa. Punn thoddea bhoinnank hem korunk kotthin zaunk puro. Kiteak? Thoddeo bhoinno kitem mhunnttat tem polloum-ia. Jordan * nanvachi ek bhoinn oxem mhunntta, “Hanv ankvar aslolean sobhent mhaka umki ek zobabdari asa mhunn mhaka disona, ani hanv sobhechem bhag nhoi oxem mhaka dista.” Apli porgottnni vaddounk dusrea eka zagear gel’li ek pioneer bhoinn Kristen mhunntta, “Tumi eka sobhent novim astat tednam tumkam eksurponn bhogonk xokta.” Thoddea bhavank pasun toxem disonk puro. Zanchea familiche sodoxio Jehovache Sakxi nant tim aplea famili thaun ani toxench sobhentlea bhav-bhoinnam thaun pois asat oxem tankam disonk puro. Thoddeo bhoinno duent asat vo tankam duent aslolea familintlea sodoxiancho samball korcho poddtta. Oslea bhoinnank ghoddie ghora thaun bhair soronk mellona dekhun tankam eksurponn bhogonk puro. Annette mhunntta, “Mhojea maicho samball korchi mukhel zobabdari mhojer asli dekhun mhaka bhav-bhoinnam sangata vell sarunk mellonaslo.”

6. Jezun Marta ani Mariek koxi modot keli tea vixim Lukas 10:38-42-a thaun ami kitem xiktat?

⁶ Jehovacho mog kortolea bhoinnam sangata Jezu vell sartalo ani to tancho khoro ixtt zaun aslo. Marta ani Mari chodd korun ankvar aslim. Tanchea sangata taka aslole ixttagoti vixim polloiat. (Lukas 10:38-42 vachat.) Jezu tanchea lagim bore toren uloitalo ani vagtalo dekhun tim tachea sangata astana bhienaslim vo lojenaslim. Udharonnak, tachea eka xisa sarkem Jezuchea paim-a koddem bosonk Mari lozonk na. * Ani jevonn randunk Mari apnnak modot korina mhunn Martak dislem tednam, aplea monant asa tem Jezuk sangonk tem fatti soronk na. Tea vellar jevnnak ail’lo tednam, Jezun hea bailank moladik lisanv xikoilem. Tanchi ani tancho bhav Lazarachi apleak kallji asa mhunn tannem tankam her vellar vell diun pasun dakhoilem. (Juanv 12:1-3) Taka lagon, Lazar khub duent zalo tednam Jezu tankam modot kortolo mhunn Marta ani Mariek khobor asli.—Juanv 11:3, 5.

7. Amchea bhoinnank urba diunk ek vatt khoinchi?

⁷ Chodd korun mittingek ieta tednanch thoddea bhoinnank, bhav-bhoinnam sangata mellonk sondhi melltta. Tor oslea vellar tankam ieukar diat. Tanchea lagim uloiat ani amkam tanchi kitli kallji asa tem dakhoiat. Jordan zachea vixim ami poilim uloil’lim, tem mhunntta, “Hanvem mittingent zobab dile mhunn dusrim mhaka xabaski ditat tednam, tanchea sangata porgottnnent ieunk tim mhaka apoitat tednam vo her vattamnim tim mhoji kallji kortat mhunn dakhoitat tednam mhaka khub urba melltta.” Amcheo bhoinno amkam moladik mhunn ami tankam dakhounk zai. Kia, mhunntta, “Hanv eka mittingek pavona zalear, hanv borem asa kai na tem zannam zaunk thoddea bhav-bhoinnam thaun message ietolich mhunn hanv zannam. Hantuntlean tankam mhoji kallji asa mhunn mhaka kolltta.”

8. Jezuchi dekh gheunk amkam anik khoincheo vatto asat?

⁸ Jezu bhaxen bhoinnam sangata vell sarunk ami proitn korunk zai. Ami ghoddie tankam amchea ghorak jevnnak vo monoronjonak apounk zata. Ami oxem kortat tednam ami tankam urba haddttat toslim utram ulounk zai mhunn visronk zaina. (Rom. 1:11, 12) Jezuk aslo  tosloch sobhav vhoddilankui asonk zai. Ankvar ravop thoddeank kotthin zaunk xokta mhunn Jezuk khobor asli. Punn eka munxak khuxal ravonk zai zalear tannem kazar zaunkuch zai vo taka bhurgim asonkuch zai mhunn tannem sangonk na. (Lukas 11:27, 28) Tachea bodlek, eklo aplea jivitant Jehovachea sevent poilo zago dita zalear to sodanch khuxal asonk xokta mhunn tannem sanglem.—Mt. 19:12.

9. Bhoinnank modot korunk vhoddilamnim kitem korunk zata?

⁹ Khas korun, vhoddilamnim Kristi bailam sangata vagtana tim apleo bhoinno ani avoi-o koxeo tanchea sangata vagonk zai. (1 Tim. 5:1, 2) Vhoddilamnim mittinge poilim ani uprant, bhoinnam lagim ulounk vell kaddunk zai. Kristen mhunntta, “Hanv sodam chodd bizi astam mhunn eka vhoddilan polloilem. Tor hanv soglem koxem manddavoll korta tea vixim to zannam zaunk sodhtalo. Tannem hea toren mhaka kallji dakhoili mhunn hanv tache khub upkari.” Vhoddil Devacho mog kortolea bhoinnam sangata chukonastana ulounk vell kaddttat tednam tanchi kallji asa mhunn te dakhoitat. * Vhoddilam lagim chukonastana uloilolean ek faido kitem tea vixim Annette, zachea vixim ami poilim uloil’lim tem mhunntta: “Hanv tankam bore toren vollkhonk pavta ani te-ui mhaka bore toren vollkhonk pavtat.  Tor kednam-i mhaka eke oddchonnecho fuddo korcho poddtta tednam tanche lagim modot magonk mhaka sompem zata.”

10. Amchea bhoinnank khuxal ravonk kitem modot korunk xokta?

¹⁰ Ami soglim, zaum dadle vo bailo, amchem kam polloun vo amchi kola ami koxi uzar kortat tem polloun dusrim upkariponn dakhoitat tednam ami khuxal zatat. Punn tim upkariponn dakhoinant tednam ami nirax zatat. Dusrim apleak bore toren vollkhonant mhunn Abigail nanvachi ek pioneer bhoinn sangta. Ti mhunntta: “Dusrim hanv umkeachem choddum vo umkeachi bhoinn mhunn mhaka vollkhotat. Tor tankam mhoji vollokh na oxem mhaka thodde pavtti dista.” Punn Pam nanvachi ek bhoinn kitem mhunntta tem polloiat. Tinnem zaitim vorsam ek mixinori zaun seva keli. Uprant ti aplea avoi-bapaichi kallji gheunk ghora porot aili. Atam tika sot’tora poros chodd vorsam zaleant. Tori astana, tinnem pioneering korop soddun diunk na. Ti mhunntta: “Hanv korta tea kamacho dusrim valor kortat. Hem mhojea khuxalkaiechem mukhel karonn zaun asa.”

11. Aplea sevent apleak tenko dilolea visvaxi bailancho Jezun valor kelo mhunn tannem koxem dakhoilem?

¹¹ Devacho mog kortaleo teo bailo aplo ‘duddu moddun’ Jezuchi seva kortaleo. Ani tannim kelolea hea modoticho Jezun valor kelo. (Lukas 8:1-3) Tannem tankam fokot apleachi seva korcho sueog diunk na punn Devachea kuxie vixim mhotvachim sotam xikoilim. Udharonnak, apunn mortolo ani apunn punorjivont zatolo mhunn tannem tankam sanglem. (Lukas 24:5-8) Tannem aplea xisank fuddarak ieunchea transancho fuddo korunk toiar kele toxe, tea bailankui toiar keleo. (Marku 9:30-32; 10:32-34) Ugddas dovrat, Jezuk dhorun vhelo tednam tache zaite apostl pollun gele. Punn to khambear jiv soddttalo tednam taka tenko ditaleo tantuntleo thoddeo bailo tachea boglek asleo.—Mt. 26:56; Marku 15:40, 41.

12. Jezun bailank koslem kam dilem?

¹² Jezun bailank mhotvachem kam dilem. Udharonnak, aplea punorjivontponna uprant taka poilim pollounchi sondhi bailank mell’lli. Apunn punorjivont zala mhunn aplea apostlank sangonk tannem tea bailank uzar keleo. (Mt. 28:5, 9, 10) 33 K.X.-achea Pon’nasavea disa povitr xokti votoili tednam xisam modem thoddeo bailo pasun asleo. Toxem zalear, obhixikt zalolea hea bhoinnank veg-veglleo bhaso ulounchea tanke udexim “Devachim xrextt kortutvam” porgott korcho sueog mell’llo astolo.—Itihas 1:14; 2:2-4, 11.

13. Kristi bailo aiz kitem kortat, ani tim kortat tea kamancho ami valor kortat mhunn ami koxim dakhounk xoktat?

¹³ Jehovachea sevent amcheo bhoinno kortat tea soglea vavrak lagon tankam xabaski favo. Tim veg-veglle toren Jehovachi seva kortat zait, zoxem bandkamachem kam korun, building-am samballpachem kam korun, veglli bhas uloitat toslea eka zomeak tenko diun ani Bethel-ant seva korun. Tim odruxttak sampoddloleank modot korchea kamant ani prokaxonam bhaxantor korchea kamant bhag ghetat. Thoddim pioneer ani mixinori mhunn seva kortat. Tim bhavam bhaxen pioneer Korsak, Raj-porgottnnaranchea Korsak ani Gilead Korsak pasun hajir zatat. Tea bhair thoddeo bailo aplea ghovank sobhecheo ani songottnnecheo zobabdareo samballunk modot kortat. “Dadleanchea rupant dennim” koxe aslole he bhav dusreank modot korunk zaitem kortat. Punn tankam aplea bailancho tenko naslo zalear hem korunk tankam khub kotthin zata aslem. (Ef. 4:8, NW) Toslea bhoinnank tumi koso tenko diunk xoktat tea vixim tumchean chintunk zata.

14. Stotr 68:11-ant sanglolea pormonnem, vhoddilamnim kitem korunk zai?

¹⁴ Bhoinno ap-khuxen vavurpi ek ‘vhodd soin’ mhunn vhoddil zannant. Toxench bhoinno chodd korun porgottnnechem kam khub bore bhaxen kortat hem-ui te zannant. (Stotr 68:11, NW vachat.) Tor tanchea onnbhovantlean xikonk vhoddil proitn kortat. Abigail zachea vixim ami  poilim uloilolim ti mhunntta ki vattarant bore bhaxen lokam lagim koxem ulovop suru korunk zata hea vixim bhav vichartat tednam apleak urba melltta. Ti sangta, “Hea toren Jehovachea songottnnent mhaka pasun ek mhotvachem kam asa mhunn mhaka disonk lagta.” Tea bhair tornnatteam bhoinnank oddchonneancho fuddo korcho poddtta tednam tankam modot korunk visvaxi zanttea bhoinnanchi modot khub faideak poddtta mhunn vhoddil zannant. (Titak 2:3-5) Khorench, ami amchea bhoinnank mog dakhounk zai ani tancho valor korunk zai.

15. Bhoinnak kednam modotichi goroz poddonk xokta?

¹⁵ Apunn fuddo korta tea eka oddchonnea vixim aplea pasot ulounk thodde pavtti bhoinnank konnachi tori goroz poddtta. (Iz. 1:17) Udharonnak, eke bhoinnicho ghov bhair poddla zalear vo tannem tika divors dila zalear aplea pasot ulounk ani aplo ghov kortalo tim kamam korunk tika konnachi tori modot zai poddot. Eke zantte bhoinnik aplea dotora lagim ulounk modot zai astoli. Vo ek pioneer bhoinn songottnnek sombondit asloleo her zobabdareo samballtta dekhun dusrim pioneer kortat titlem korunk pavona mhunn thoddim tichi khodd kaddunk puro. Oslea vellar tichea pasot ulounk tea bhoinnik konnachi tori goroz poddot. Ami amchea bhoinnank anik khoinchea toren modot korunk xoktat? Portun ami Jezuchea udharonnacher dhean dium-ia.

16. Marku 14:3-9-ant dakhoilolea pormonnem, Jezu Marie vatten koso uloilo?

¹⁶ Devacho mog kortolea bhoinnim vixim lokank chukichem chintop aslem tednam Jezu rokddoch tanchea pasot uloilo. (Lukas 10:38-42) Udharonnak, Martan Mariechi khodd kaddli tednam Jezu Mariechea vatten uloilo. Teach toren, dusre eke pavtti Marien kelolem tem chukichem mhunn dusreank dislem. Tea vellar tannim tichi khodd kaddli. Punn Jezu tichea vatten uloilo. (Marku 14:3-9 vachat.) Jezu Mariecho hetu somzolo ani tika xabaski diun tannem mhollem: “Tinnem Mhoje sorim ek bori kornni keli . . . Tiche kodde ghoddtalem tem tinnem kelem.” Tichi hi bori kornni ‘Xubhvortoman porgott zait titleam-i svater’ ugddas dovortolim mhunn Jezun bhakit kelolem, zoxem ami tichea vixim hea lekhant ugddas kortat. Dhean diat, Marien kelolea hea svarth naslolea kama vixim sangtana Jezun bori khobor ‘ak’khea sonvsarak porgott zatoli’ mhunn sanglem. Hem kitlem mhotvachem! Marie vixim dusreamnim chukichem chintlem. Punn Jezun sanglolim him utram aikon tika kitli ghottai mell’lli astoli tem chintat!

17. Eke bhoinni pasot amkam kednam ulounchi goroz poddot tachem ek udharonn diat.

¹⁷ Goroz poddtta tednam Devacho mog kortolea tumchea bhoinnam pasot tumi uloitat kai? Udharonnak, hea eka poristhiti vixim chintat. Eke bhoinnicho ghov sotant na. Ti choddxi mitting suru zalea uprant pavta ani mitting somplea uprant rokddich ghora voita. Hem porgottnnaram polloitat. Ti aplea bhurgeank choddxea pavtti mittingent gheun iena mhunn pasun tim polloitat. Tor hea karonnak lagon, tinnem aplea ghova lagim uloun aplea bhurgeank mittingek gheun ieunk zai mhunn chintun tim tichi khodd kaddttat. Punn ti bhoinn apleachean zata tem soglem korta tea vixim tim chintinant. Khorem mhunnttlear, tinnem khoinchea vellar kitem korunk zai tea vixim vo aplea bhurgeam vixim nirnnoi gheuncho purnn odhikar tika na. Eke bhoinni vixim konn eklo khodd kaddtta zalear tumchean kitem korunk zata? Ti bhoinn korta tea borea kamak lagon tika tumi xabaski ditat zalear ani tichea borea kamam vixim dusreank sangtat zalear, tumi osleanchem ulovop bond korunk xoktat.

18. Amchea bhoinnank ami anik khoinchea toren modot korunk xoktat?

¹⁸ Ami amchea bhoinnank goroz tednam modot diun amkam tanchi kallji asa mhunn dakhoitat. (1 Juanv 3:18) Aplea duent avoichi  kallji ghetoli bhoinn Annette mhunntta: “Mhaka dusrim kamam korunk poddttalim tednam bhav-bhoinnam mhojea ghora ieun mhojea avoicho samball kortalim, vo tim jevonn gheun ietalim. Hea udexim tim mhozo mog kortat ani hanv sobhechem bhag zaun asa mhunn mhaka disonk laglem.” Bhoinn Jordan-ak pasun modot mell’lli. Tichi gaddi koxi samballchi tea vixim eka bhavan tika xikoilem. Ti mhunntta: “Bhav-bhoinnank hanv gaddi choloitana surokxit aslolem zai. Tim hea toren kallji dakhoitat tem polloun mhaka borem dista.”

19. Anik khoinchea toren vhoddil bhoinnank modot korunk xoktat?

¹⁹ Vhoddil pasun bhoinnanchea gorzancher dhean ditat. Tannim tanchea sangata bore toren vaglolem Jehovak zai mhunn te ugddas dovortat. (Jak. 1:27) Tor te Jezuchi dekh gheun somjikai dakhoitat. Kaide korchea bodlek te doia dakhoun tankam somzon ghetat. (Mt. 15:22-28) Vhoddil modot korunk proitn kortat tednam, Jehovachem songotton aplo mog korta ani kallji gheta mhunn bhoinnank distolem. Kia-chea grupachea dekhrekh korpeak ti ghor bodolta mhunn koll’llem tednam tannem tika rokddich modot korunk manddavoll keli. Kia mhunntta, “Vhoddilamnim mhaka urba dili ani goroz ti modot dili mhunn mhozo bhar unno zalo ani sobhek hanv moladik asa mhunn mhaka koll’llem. Toxench kotthin poristhiticho fuddo korunk poddtta tednam hanv ekttem na mhunn mhaka dison ailem.”

20-21. Amchea soglea Kristi bhoinnancho ami mog kortat mhunn koxem dakhounk zata?

²⁰ Amchea sobhamnim amkam zaiteo koxtti vavr korpi bhoinno dixtti poddttat zankam amchea modotichi goroz asa. Jezuchea udharonnantlean ami xikleant tea pormonnem, oslea bhoinnank vell diun ani tanchi bore toren vollokh korun ami tankam modot korunk xoktat. Devachea sevent tim jem kitem kortat tem valorachem mhunn tankam dakhounk zata ani goroz poddtta tednam tanchea pasot ami ulounk zata.

²¹ Romkarank boroilolea aplea chittint xevottak, apostl Paulun nnov Kristi bailanchi nanvam gheun tancho ugddas kelo. (Rom. 16:1, 3, 6, 12, 13, 15) Tannem aplea vixim boroilolim utram ani xabaske vixim aikolem tednam tea bailank urba mell’lli astoli mhunn kainch dubhav na. Teach bhaxen, ami-i amchea sobhent aslolea soglea bhoinnank modot korum-ia. Ami oxem kortat tednam tim pasun amchea familicho bhag zaun asat ani ami tancho mog kortat mhunn dakhounk pavtolim.