XTUUTYUM ARTIKEL 39
Tuu ti xwestere in tayn kemaynt xtitse
“Ti fraae woo ti kuute oter preetiche sin een kroos militeer.” (SALMO 68:11)
LIIT 137 Mulheres fiéis
WAS TUUN MER SIIN? *
Unser flaysiche xwestere, woo imer fiil se tuun hon, tuun in te fersamlunge antworte, in te preetich xafe, te Raych Saal in ortnung lose, un tuun sich mit sayn priiter un xwestere khimere. (Kuk ti apsetse 1)
1. Wii tuun ti xwestere ti orkanisatsyoon helfe, awer was fer kefoere fiile fon tëne mit mache? (Kuk tas pilt am aanfang fom piichelche.)
WII PETANKLICH sin mer tas mer hon soo fiile xwestere woo sayn pestes in te kemaynt mache! Tsum payxpiil, tii tuun komentaare in te fersamlunge kepe un in te preetich aarwayt xafe. Welche fon tëne helfe fer tas Raych Saal uf phase un tsayche tas se sich mit te priiter un te xwestere khimere. Awer sicher, tii tuun kefoere mit mache. Welche prayche sayn alter eltere uf phase. Anere hon parente woo sich keeche tëne xtele. Un noch anere sin leetiche muter woo xtram xafe fer sayn khiner soriche.
2. Warom sole mer ti xwestere xtitse?
2 Warom sole mer ti xwestere xtitse? Wayl ti welt tuut net imer ti fraae pehantele mit tëm respëkt woo se fertiine. Un aach, ti Piipel tuut uns uf muute tëne xtitse. Tsum payxpiil, te aphostel Phaul hot fer ti kemaynt in Roma ferlangt tas tii solte Fëpi hërtslich wilkhome un ‘tëne ti kans hilef woo se praucht, kepe’. (Rom. 16:1, 2) Wii Phaul een fariseer waar, woerxaynlich hot eyer ketenkt tas ti fraae weenicher waare un hot tëne niter kextelt. Awer, noo eyer een krist kep is, hot eyer aan kefang Yeesus noo mache un ti fraae pehantele mit respëkt un kuutheet. (1 Cor. 11:1)
3. Wii hot Yeesus ti fraae pehantelt? Un wii hot eyer, ti fraae woo Kot sayn wile kemacht hon, aan kesiin?
3 Yeesus hot al ti fraae mit respëkt pehantelt. (João 4:27) Tee hot net tëne aan kesiin wii ti yiitexe relichyeese fiirer fon sayn tsayt. Een piiplix ensiklopëtya saat: “Yeesus hot nii etwas kesaat woo ti fraae niter xtele khent.” Xtats tas, Yeesus hot ekstra respëkt ketsaycht tsu ti fraae woo te wile fon sayn Fater kemacht hon. Tee hot tëne wii xwestere aan kesiin, un wën eyer hot iwer tëne kexprooch, hot se tepay ketseelt mit te mëner woo eyer wii mitkliiter fon sayn kaystliche familye aan kesiin hot. (Mat. 12:50)
4. Was tuun mer in tiise artikel siin?
4 Yeesus waar imer fërtich fer se helfe ti fraae woo Kot ketiint hon. Tee hot tëne ketsaycht tas se wichtich foer tëm waare, un tee hot aach tëne kexitst. Wole mer siin wii khene mer Yeesus noo mache un respëkt tsu unsere xwestere tsayche.
KHIMER TICH MIT UNSERE XWESTERE — WOO SOO FIIL WEYERT HON
5. Warom khan es xweyer sin fer etliche xwestere tsayt mit sayn froynte fon te kemaynt fertraype?
5 Meyer al, priiter un xwestere, prayche tsayt mit unser froynte fon te kemaynt fertraype. Awer, als mool, khan es xweyer sin fer etliche xwestere tiise neetichkheet fersoriche. Warom? Kuk was etliche fon tëne kesaat hon. Een xwester, woo Joana * heest, saat: “Wayl ich leetich sin, tuun ich ofts xpiire tas ich khan net mayn plats in te kemaynt fine, tas ich sin net wërklich een teel fon te kemaynt.” Kristen, een pyoneerin woo sich kewanert hot fer mee in te preetich aarwayt mache, saat: “Wëns tuu tich fer een nay kemaynt wanerst, khanst tuu tich aleen fine.” Tii woo mit parente woone woo net Yeehoowa sayn Tsayer sin, khene es xweyer fine ticht fon te parente sin un, in te selwich tsayt, khene se sich wayt fon te priiter xpiire. Etliche xwestere khene sich aach aleen fine wayl se krank sin un khene net fon sayn haus aus keen orer wayl tii mise parente woo krank sin uf phase. Annette saat: “Ich khont net inlaatunge fon te priiter aan nëme fer tsayt mit tëne fertraype, wayl ich praucht mayn mama uf phase.”
Soo wii Yeesus, meyer khene tsayche tas meyer uns liiplich khimere mit unsere troye xwestere (Kuk ti apsetse 6-9.) *
6. Tëm noo Lucas 10:38-42, wii hot Yeesus Maria un Marta keholef?
6 Yeesus hot tsayt fertraypt mit sayn xwestere im klaape un eyer waar een woere froynt tsu tëne. Tsum payxpiil, tenk aan te froyntxaft woo eyer mit Maria un Marta kehat woo, siit es aus, leetich waare. (Lees Lucas 10:38-42.) * Weeche Yeesus sayn wërter un aktsyoone, tii hon sich imer kuut kefun wën se mit tëm waare. Maria hot sich net kexeemt aan Yeesus sayn fiis sich setse, wii es keweent fer een tisipel waar. * Un Marta, unruych wayl Maria net tëne am helfe waar, hot sich net ferxeemt fer Yeesus saan was in sayn khop waar. In tiise pesuuch, Yeesus hot wichtiche lisyoone fer tiise fraae kelërnt. Un tee hot ketsaycht tas eyer hot sich mit tëne un sayn pruuter, Lasaro, kekhimert wën eyer in anere xtune tat maaye khom is. (João 12:1-3) Un wii Lasaro xroo krank kep is, Maria un Marta waare sich sicher tas se khonte Yeesus sayn hilef ferlange. (João 11:3, 5)
7. Wii khene mer ti xwestere uf muute?
7 Fer welche xwestere, ti fersamlunge sin ti haupste keleechenheete fer mit te priiter un xwestere fon te kemaynt sin. Tes weeche, sole mer tiise keleechenheete penutse fer tëne hërtslich wilkhome, mit tëne fertseele un tëne saan wii fiil tuun mer uns mit tëne khimere. Joana, iwer weem mer kraat kexprooch hon, saat: “Ich tuun mich aarich kuut fine wën ti anere mayn komentaare mërke, ap xpreche mit mich in te preetich aarwayt xafe orer wën se tsayche tas se sich mit mich khimere in anere aate.” Meyer mise fer unsere xwestere taytlich tsayche tas se aarich wichtich fer uns sin. Ana saat: “Wën ich in te fersamlung feele, ich wees tas yemant tuut mich kontaktiire fer se siin wii sin ich traan. Tas lost mich sicher tas ti priiter un ti xwestere tuun sich mit mich khimere.”
8. In was fer anere aate khene mer Yeesus noo mache?
8 Soo wii Yeesus, khene mer tsayt hoole fer mit unsere xwestere plaype. Fiilaycht khene mer tëne in laate fer etwas ese orer fer een pisye xpas hon. Un wën mer es mache, meyer wole uns sicher sin tas was mer saan uftmuutich is. (Rom. 1:11, 12) Ti elteste sole ti selwich aanxtelung wii Yeesus hon. Yeesus wust tas, fer etliche, weyer es xweyer leetich plaype. Awer eyer hot taytlich kelos tas, sich hayrate orer khiner hon, is net te xliisel fer ti frooheet hon woo fer imer tauert. (Luc. 11:27, 28) Xtats tas, meyer tuun wërklich froo sin wën Yeehoowa tiine tas haupste in unser leepe is. (Mat. 19:12)
9. Wii khene ti elteste ti xwestere helfe?
9 Hauptseechlich ti elteste prayche ti fraae fon te kemaynt wii sayn xwestere un muter pehantele. (1 Tim. 5:1, 2) Ti elteste sole tsayt hoole, foer un noo ti fersamlunge, fer mit tëne xpreche. Kristen saat: “Een elteste hot kemërekt tas ich imer fiil se tuun hat un wolt ferxteen wii mayn rutiin waar. Ich waar aarich petanklich weeche sayn sorich iwer mich.” Wën ti elteste imer tsayt hoole fer mit te xwestere xpreche, tas pewayst tas tii tuun sich mit tëne khimere. * Anette, iwer weem mer kraat kexprooch hon, leet aus warom is es kuut ofts mit te elteste fertseele. Tii saat: “Ich tuun tëne peser khëne lërne, un tii tuun mich peser khëne lërne. Tan, wën ich een propleem mit mache, tuun ich mich net xeeme hilef tëne ferlange.”
SAY PETANKLICH FER WAS TI XWESTERE MACHE
10. Was khan unsere xwestere helfe froo wëre?
10 Meyer al, mëner un fraae, wëre froo wën ti anere unser apiliteete erkhëne un weyert fer unser aarwayt kepe. Uf aner sayt, wën nimant petanklichkheet tsaycht fer unser aarwayt orer ti aat wii mer unsere apiliteete penutse, tuun mer ti muut ferliire. Een leetich pyoneerin, woo Abigail heest, erkhënt tas, als mool, tii fint sich uf sayt kelos. Tii saat: “Fer ti anere, ich sich ploos kesiin wii ‘tëm sayn xwester’ orer wii ‘tëm sayn meetche’. Als mool, ich xpiire wii wën nimant khent mich siin.” Awer, kuk ti xwester Pam sayn speryens. Wii se leetich waar, hot se fiile yoere wii misyoneerin ketiint. Xpeeter, is se hëm tsus tsurik khom fer sayn eltere uf phase. Yets, mee wii 70 yoere alt, tii is noch pyoneerin. Tii saat: “Was wërklich mich helfe tuut, is wën ti anere petanklich sin fer ti aarwayt woo ich mache.”
11. Wii hot Yeesus ketsaycht tas eyer fiil weyert kep hot fer ti fraae woo tëm kextitst hon?
11 Welche troye fraae hon Yeesus keholef “mit sayn aychne tinge”, un eyer hot fiil weyert fer tas kep. (Luc. 8:1-3) Tee hot net ploos tiise priwilëj tëne kep, awer hot aach tëne tiife kaystliche woerheete in kelërnt. Tsum payxpiil, eyer hot tëne kesaat tas eyer xtërpe teet un uf keruuft weyer. (Luc. 24:5-8) Eyer hot tiise fraae, soo wii ti aphostele, fërtich kelos fer ti proope woo noch khome teete. (Mar. 9:30-32; 10:32-34) Es is interesant se mërke tas, opwool ti aphostele sin aus keris wii Yeesus in kexpërt waar, welche fon te fraae woo hon Yeesus kextitst, waare ticht pay tëm wii eyer in tëm kweeleray phool am xtërpe waar. (Mat. 26:56; Mar. 15:40, 41)
12. Was fer aarwayt hot Yeesus fer ti fraae kep?
12 Yeesus hot wichtiche aarwayte fer ti fraae kep. Tsum payxpiil, troye fraae waare ti eyerste tsayer fon Yeesus sayn ufxtaye. Yeesus hot tëne ferlangt tas tii solte fer ti aphostele saan tas eyer is fom toot uf kextii. (Mat. 28:5, 9, 10) Un tsiimlich sicher, in tëm Pingste Taach fom yoer 33, es waare fraae kewees wën te hayliche kayst aus kexiit waar. Wën es soo waar, fiilaycht hon se aach ti wunerlich apiliteet kriit fer uf frëmte xprooche xpreche un fer mit te anere iwer ‘Kot sayn wunerliche tinge’ fertseele. (Atos 1:14; 2:2-4, 11)
13. Was fer tinge tuun unsere xwestere hayt in Kot sayn tiinst mache? Un wii khene mer tsayche tas mer petanklich sin fer was se mache?
13 Unsere xwestere tuun loop fertiine weeche ales was se in Yeehoowa sayn tiinst mache. Too tepay, sin kepaye paue un uf phase, frëmte xprooche krupe helfe un fraywilich in Petël xafe. Tii tuun aach in tëm Umaniteer Hilef xafe, in te iwersetsunge fon unser puplikatsyoone helfe, un tiine wii pyoneerin un misyoneerin. Soo wii ti priiter, ti xwestere tuun aach mache ti Xuul fer Pyoneere, ti Xuul fer Preeticher fom Raych un ti Xileat Xuul. Un noch, ti xwestere woo ferhayrat sin, tuun sayn mëner helfe tas tii khene sayn flichte in te kemaynt un in te orkanisatsyoon uf phase. Tiise mëner khene ploos wii “kexenke” in te kemaynt tiine wayl se hon ti xtitsung fon sayn fraae. (Efé. 4:8) Khanst tuu in etliche aate tenke woos tuu khanst tiise xwestere xtitse in te aarwayt woo se mache?
14. Tëm noo was in Salmo 68:11 kexrip is, was tuun kluuche elteste mache?
14 Ti xwestere sin een “kroos militeer” fon wiliche aarwayter. Un in te meyerst tsayt, sin se seer kexik in te preetich aarwayt. (Lees Salmo 68:11.) * Kluuche elteste tuun tas erkhëne un fersuuche nutse fon tëne sayn speryens kriin. Abigail, iwer weem mer kraat kexprooch hon, xpiirt sich uf kemuut wën ti priiter tëne frooe was mënt se weyere kuute aate fer kexpreeche aan fange im teritoryum. Tii saat: “Tas heleft mich siin tas Yeehoowa eene plats fer mich in sayn orkanisatsyoon hot.” Un aach, ti elteste erkhëne tas ti troye xwestere woo alt sin, sin aarich kuut in te yunge xwestere helfe wën se propleeme mit mache. (Tito 2:3-5) Oone tswayfel, unsere xwestere fertiine unser liip un petanklichkheet!
TUU TAYN XWESTERE XITSE UN HELFE
15. Wanee prayche ti xwestere fiilaycht tas yemant tëne xitst?
15 Als mool, ti xwestere prayche tas yemant tëne xitst wën se spesiifixe kefoere mit mache. (Isa. 1:17) Tsum payxpiil, fiilaycht een witfraa orer een tiworsiirt xwester praycht tas yemant tëne sayn rechte xitst un tëne heleft etliche flichte erfiile woo sayn man foer kemacht hot; orer khan sin tas een alt xwesterche praucht hilef fer mit toktere xpreche; orer fiilaycht een pyoneerin woo anere aarwayte fer ti orkanisatsyoon macht, praucht tas yemant se xitst wën se kritikiirt is wayl se net soo fiil in te preetich is, soo wii ti anere pyoneere. In was fer anere aate khene mer unsere xwestere helfe? Wole mer noch mool Yeesus sayn payxpiil noo kuke.
16. Tëm noo Marcos 14:3-9, wii hot Yeesus Maria kexitst?
16 Yeesus waar xnel fer sayn xwestere im klaape xitse wën ti anere hon se net kuut ferxtan. Tsum payxpiil, tee hot Maria kexitst wii Marta keeche tii kexprooch hot. (Luc. 10:38-42) Un tee hot Maria noch mool kexitst wën anere hon ketenkt tas tii hat een xlecht ëntxlus kemacht un hon keeche tii kexprooch. (Lees Marcos 14:3-9.) Yeesus hot ferxtan weeche was hot Maria tas kemacht un hot tii keloopt mit te wërter: “Tii hot mich etwas aarich kuut kemacht. . . . Tii hot kemacht was se khont.” Tee hot soo kaar foer raus kesaat tas was Maria kemacht hot weyer noo un noo fertseelt, ‘uf te kans welt, in yeete plats woo ti kuute oter kepreeticht weyere’ — kraat soo wii tiise artikel am mache is. Es is interesant se mërke tas Yeesus hot kesaat tas ti kuute oter teete uf te kans welt kepreeticht wëre, wën eyer Maria keloopt hot weeche sayn krooshërtslich aktsyoon. Sicher, tiise wërter hon Maria ketreest noo tas se unkerecht pehantelt waar. *
17. Kep een payxpiil woo tsaycht wii khanst tuu een xwester xitse.
17 Tuust tuu tayn xwestere im klaape xitse wën se prauche? Tsum payxpiil, kuk ti neekst situatsyoon. In tayn kemaynt is een xwester woos man is net Yeehoowa sayn Tsayer. Welche puplikatoore tuun mërke tas tii tuut sich eftas fer ti fersamlung ferxpeete un keet hëm kraat wii ti fersamlung aans ën keet. Tii mërke tas tii tuut tan un wan sayn khiner fer ti fersamlunge nëme. Ti puplikatoore tuun aan fange se kritikiire un saan: ‘Warom tuut se sich net fest xtele un tan sayn khiner pringe?’ Awer was se wise net, is tas ti xwester is am mache tas pestes woo se khan. Tii hot net ti kanse kontrol iwer ti rutiin; tii hot aach net tas letste wort iwer sayn khiner. Was khanst tuu mache fer ti xwester xitse? Tuu khanst ti xwester loope un fer ti anere saan iwer ti kuut aarwayt woo se am mache is. Wëns tuu tas machst, fiilaycht tuun ti anere noo lose keeche tii xpreche.
18. In was fer anere aate khene mer unsere xwestere helfe?
18 Meyer khene fer unsere xwestere tsayche wii fiil mer uns mit tëne khimere wën mer praktix hilef tëne aan piite. (1 João 3:18) Annette, ti xwester woo hot sayn krank muter uf kephast, saat: “Welche priiter un xwestere sin tsu mayn haus khom fer een pisye mayn muter uf phase, tas ich khent etwas aneres mache; orer hon se ese mit keprung. Ich hon mich teel fon te kemaynt un mich keliipt kefun.” Joana hot aach hilef kriit. Eene pruuter hot tii in kelërnt wii sayn khare uf phase. Tii saat: “Es is kuut se wise tas mayn priiter un xwestere tuun sich khimere mit mayn sicherheet wën ich faare.”
19. Wii noch khene ti elteste ti xwestere helfe?
19 Ti elteste tuun aach fersuuche ti neetichkheete fon te xwestere uf phase. Tii wise tas Yeehoowa wil hon tas ti xwestere kuut pehantelt wëre. (Tia. 1:27) Tan, ti elteste tuun terek Yeesus noo mache un aanmeesich sin. Tii khene es mache wën se net reekle mache wën es peser weyer kuutheet un mitlayt tsayche. (Mat. 15:22-28) Wën ti elteste tuun te eyerste xrit kepe fer se helfe, ti xwestere xpiire sich unerkextitst. Wën te superintentent fon Ana sayn krup hot kewis kriit tas tii teet sich fer een aner haus wanere, tee hot klaych hilef keruuft. Ana saat: “Tas hot mayn stress fiil ferlaycht. Wayl ti elteste hon mich uf kemuut un ti neetich hilef kep, hon se taytlich ketsaycht tas ich een wichtich teel fon te kemaynt sin un tas ich sin net aleen wën ich een xweyer situatsyoon hon.”
TI KANSE XWESTERE IN TE KEMAYNT PRAYCHE UNSER UNERXTITSUNG
20-21. Wii khene mer tsayche tas mer weyert xetse fer al unsere xwestere?
20 Wën mer hayt fer unsere kemaynte kuke, tuun mer fiile payxpiile fine fon xwestere woo xtram xafe un woo unser unerxtitsung fertiine. Wii mer fon Yeesus sayn payxpiil kelërnt hon, meyer khene tëne helfe wën mer tsayt mit tëne fertraype un wën mer tëne peser khëne lërne. Meyer khene aach petanklichkheet tsayche weeche ales woo se in Kot sayn tiinst mache. Un meyer khene tëne xitse wëns neetich is.
21 In te letste wërter fon sayn priif fer ti romaaner, te aphostel Phaul hot acht kep fer noyn spesiifixe xwestere. (Rom. 16:1, 3, 6, 12, 13, 15) Oone tswayfel, tiise fraae waare uf kemuut wën se Phaul sayn kriise un loope keheert hon. Meyer sole aach al unsere xwestere in te kemaynt xtitse. Wën mer soo mache, tuun mer tsayche tas mer weyert tëne xetse wii teel fon unser familye.
LIIT 136 Jeová o recompensará
^ parágrafo 5 Ti xwestere in te kemaynt tuun fiile kefoere mit mache. Tiise artikel tuut tsayche wii khene mer Yeesus sayn payxpiil noo mache un soo, unsere xwestere im klaape xtitse. Meyer khene fiil lërne mit te aat wii Yeesus hot tsayt mit te fraae fertraypt, weyert tëne kep un tëne kexitst.
^ parágrafo 5 Etliche naame waare keënert.
^ parágrafo 6 (Lucas 10:38-42) Wii se wayter kang sin, is eyer in een kleen xtat rin kang. Tat, een fraa woo Marta keheest hot, hot tëm in sayn haus aan kenom. 39 Tii hat aach een xwester woo Maria keheest hot, woo hot sich aan tëm Hër sayn fiis kesetst un hot wayter kehoricht was tee am saan waar. 40 Marta, im keeche teel, waar mit sayn khop aan etwas aneres, wayl tii hat fiil aarwayt se tuun. Soo, is se pay tëm khom, un hot tëm kesaat: “Hër, machst tuu tich niks traus tas mayn xwester mich aleen kelos hot fer ales in richte? Saa tas tii sol mich helfe khome.” 41 Te Hër hot tëne keantwort: “Marta, Marta, tuu pist unruych un machst tich sorich weeche fiile tinge, 42 awer weeniche tinge sin neetich — orer ploos eens. Im keeche teel, Maria hot te peste teel raus kesuucht, un tas wërt fon tëne net wech kehool.”
^ parágrafo 6 Een piiplix ensiklopëtya saat: ‘Ti tisipele hon sich aan te fiis fon sayn leerer kesetst. Tii hon tas kemacht wën se sich in kericht hon fer leerer wëre — etwas woo net fer ti fraae erlaupt waar . . . Ti meyerste yiitixe mëner teete sich ferxroke wën se tas siin teete: Maria aan Yeesus sayn fiis kesetst, fërtich fer se lërne, xtats ti flichte erfiile woo fer ti meyerste fraae keweent waare.’
^ parágrafo 9 Ti elteste tuun uf phase wën se ti xwestere helfe. Tsum payxpiil, tii thërfe nii een xwester aleen pesuuche keen.
^ parágrafo 14 (Salmo 68:11) Yeehoowa xikt es; Ti fraae woo ti kuute oter preetiche sin een kroos militeer.
^ parágrafo 16 (Marcos 14:3-9) Un, wii eyer in Petanya waar, am ese in tëm haus fon Simon, woo lëpra hat, is een fraa khom mit een kleene alapaster kruuch woo een eel mit kuute keroch trin hat, phuer nartus, kans tayer. Tii hot tas kruuch uf keproch un aan kefang tas eel ufm Yeesus sayn khop xite. 4 Weeche tas, welche sin pees kep, un hon sich naner kesaat: “Fer was waar tiise eel mit kuute keroch wech kexmis? 5 Tiise eel mit kuute keroch khent fer 300 tenaarye ferkhaaft wëre, un tas kelt khent fer ti aarme kep wëre!” Un tii sin aarich pees mit tëne kep. 6 Awer Yeesus hot kesaat: “Lost tii im ruu. Warom wolt teyer tëne sayn leepe xweyer lose? Tii hot mich etwas aarich kuut kemacht. 7 Wayl teyer tuut imer ti aarme pay aych hon, un teyer khan tëne helfe wanee teyer wolt; awer teyer tuut mich net imer hon. 8 Tii hot kemacht was se khont. Xon foer heyer, hot se eel mit kuute keroch iwer mayn khërper kexut, weeche mayn pekreepnis. 9 Ich tuun fer aych wërklich saan: uf te kans welt, in yeete plats woo ti kuute oter kepreeticht wëre, was tiise fraa kemacht hot wërt aach fertseelt, un soo wërt se erinert.”
^ parágrafo 68 PILTER AUSLEYUNGE Sayt 22: Tray priiter tuun Yeesus noo mache un tsayche tas se mit te xwestere sich khimere. Te eyerste pruuter heleft tswaay xwestere een raat fon sayn khare um truke. Een aner pruuter pesuucht een krank xwester. Eene trite pruuter keet mit sayn fraa aans haus fon een xwester un sayn metche maaye fer ti familye aanpetung mache.
