1. Nama sukung ke diberi menyadi indu ngagai gerempung Jehovah, tang nama penanggul ke ditapi sida? (Peda gambar ba kulit majalah.)

KITAI amat beterima kasihka menyadi indu ti ransing gawa ke eklisia. Ambika chunto, sida bisi begian ba gempuru sereta ba pengawa nginjil. Sekeda nulung nyeruri Palan Gempuru sereta ibuhka bala menyadi Kristian. Endang amat, sida mega bisi napi penanggul. Sekeda patut nyaga apai indai ke udah tuai, napi sakal ari diri sebilik, lalu bisi mega nya indai tunggal ke bebendar gawa nyediaka utai ti diguna bala anak.

2. Nama kebuah kitai enggau naka ulih nyukung menyadi Kristian ke indu?

² Nama kebuah kitai patut nyukung menyadi Kristian ke indu? Laban orang ba dunya enda ngayanka basa ngagai orang indu. Bup Kudus meransang kitai nyukung sida ke indu. Ambika chunto, rasul Paul ngasuh bala menyadi ba Rome nyambut penatai Poebe lalu “nulung iya enggau sebarang utai ti dipeguna iya.” (Rom. 16:1, 2) Lebuh Paul agi nyadi orang Parisi suba, sida suah ngemaruhka orang indu. Tang pengudah nyadi orang Kristian, Paul neladan Jesus lalu ngayanka basa sereta nelap enggau orang indu.—1 Kor. 11:1.

3. Baka ni Jesus begulai enggau sida ke indu, lalu nama runding iya ngagai sida ti ngereja peneka Petara?

³ Jesus bebasaka sida ke indu. (Jhn. 4:27) Jesus enda baka tuai pengarap maya jeman iya. Seiku pemansik Bup Kudus madahka, “Nadai siti pan jaku Jesus ti ngemaruhka orang indu.” Taja pia, Jesus bebasaka agi orang indu ti ngereja peneka Apai iya. Iya ngumbai sida menyadi indu, baka diri sebilik iya.—Mat. 12:50.

4. Nama deka dikerandauka kitai ba artikel tu?

 ⁴ Jesus seruran besedia deka nulung sida ke indu ti nyembah Petara. Iya nunjukka sida berega ba iya sereta sedia deka nyaga sida. Aram kitai berandauka baka ni kitai ulih neladan chara Jesus berundingka menyadi indu.

5. Nama kebuah sekeda menyadi indu tusah deka begulai enggau menyadi bukai?

⁵ Semua kitai begunaka kaul ti manah. Tang tu ukai seruran senang ke menyadi indu. Nama kebuah? Peratika utai ku menyadi indu kitai. Menyadi Jenny * madahka, “Ketegal aku bedau kawin, aku suah enda nemu deka begulai enggau menyadi ba eklisia. Aku mega ngasaika diri enda entu ulih nulung bala menyadi.” Kristen, seiku pengerintis ke mindah ngagai endur bukai kena ngereja mayuh agi pengawa nginjil madah, “Lebuh baru pindah ngagai eklisia ti baru, nuan berasai kediri.” Sekeda menyadi lelaki engka ngasaika utai ti sama. Menyadi indu ke diau enggau diri sebilik ti ukai Saksi, engka tusah deka semak enggau sida sebilik, lalu ba maya ti sama ngasaika diri jauh ari bala menyadi Kristian. Sekeda menyadi indu ke enda ulih ninggalka rumah ketegal sakit, tauka ngintu diri sebilik ke sakit engka berasai sunyi. Ku Annette madahka, “Lebuh bisi menyadi mai aku makai begulai, aku patut nulak laban nadai orang bukai ulih nulung nyaga indai aku.”

6. Nama ulih dipelajarka kitai ari Luke 10:38-42 pasal chara Jesus nulung Maria enggau Marta?

⁶ Jesus meri awak begulai enggau menyadi indu, lalu iya seiku kaban ti manah. Perundingka kaul Jesus enggau Maria sereta Marta ke bedau kawin. (Bacha Luke 10:38-42.) Nengah jaku sereta ulah iya, Jesus tentu ngasuh seduai iya berasai nyamai begulai enggau iya. Ambika chunto, Maria berasai nyamai duduk semak kaki Jesus. * Pia mega, lebuh Maria nadai nulung nyediaka pemakai, Marta enda nangi madahka asai ati iya ngagai Jesus. Ba maya nya, Jesus nulung Marta enggau Maria nemu utai ke beguna agi. Iya mega nunjukka pengibuh ngagai seduai iya sereta menyadi sida, Lasarus, enggau ngelawa sida ba maya bukai. (Jhn. 12:1-3) Nya alai, lebuh Lasarus balat sakit, Maria enggau Marta nemu seduai iya ulih minta tulung ari Jesus.—Jhn. 11:3, 5.

7. Nama chara ulih meransang menyadi indu?

⁷ Ba sekeda menyadi indu, datai begempuru nya peluang ulih begulai enggau bala menyadi. Nya alai, kitai deka ngena peluang nya nyambut penatai sida, bejaku enggau sida, sereta ibuhka sida. Menyadi Jenny ke disebut tadi, madahka, “Aku berasai amat diperansang lebuh bisi menyadi muji saut ke diberi aku ba gempuru, ngaga atur deka nginjil begulai, tauka ngena chara bukai ngayanka pengibuh sida ke aku.” Kitai patut ngasuh bala menyadi indu nemu, sida amat berega ba kitai. Ku Menyadi Kia madahka, “Enti aku enda datai begempuru, aku nemu tentu bisi menyadi deka SMS nanya rita aku. Tu ngasuh aku nemu, sida ibuhka aku.”

8. Nama chara bukai kitai ulih neladan Jesus?

⁸ Baka Jesus, kitai ulih ngiga awak begulai enggau bala menyadi indu. Engka kitai ulih mai sida makai tauka main begulai. Lebuh  ngereja nya, kitai deka nentuka randau kitai meransang sida. (Rom. 1:11, 12) Bala tuai gempuru patut ngembuan runding Jesus. Iya nemu pengidup bujang dara enda senang ba sekeda orang. Taja pia, iya enggau terang madahka, pengaga ati ti meruan ukai bepanggai ba pengawa jadi melaki-bini tauka bisi anak. (Luk. 11:27, 28) Tang, pengaga ati datai ari ngenuluka pengawa ke Jehovah.—Mat. 19:12.

9. Baka ni tuai gempuru ulih nulung menyadi indu?

⁹ Bala tuai gempuru enda tau enda ngumbai bala menyadi Kristian ke indu nya baka menyadi indu tauka indai sida. (1 Tim. 5:1, 2) Tuai gempuru ngiga awak bejaku enggau menyadi indu sebedau tauka pengudah gempuru. Ku Kristen, “Seiku tuai gempuru nemu aku amat kisuk, lalu iya deka meretika jadual aku. Aku amat beterima kasihka pengibuh iya.” Lebuh tuai gempuru seruran nyediaka awak berandau enggau menyadi indu, nya nunjukka sida amat ibuhka bala menyadi indu. * Annette, ke disebut ba pun tadi, nerangka kebuah manah ulih seruran berandau enggau tuai gempuru. Ku iya, “Aku ulih ngelala sida enggau manah lalu sida pan baka nya. Lebuh bisi penanggul, aku senang agi minta tulung ari sida.”

10. Nama ulih nulung menyadi indu kitai gaga ati?

¹⁰ Semua kitai berasai gaga ati lebuh orang beterima kasihka utai ti udah digaga kitai. Taja pia, kitai berasai asa enti nadai orang beterima kasihka pengawa kitai. Abigail, seiku pengerintis madahka iya berasai enda dikeibuhka. Ku iya: “Orang semina nemu aku menyadi sanu tauka anak sanu, tang sida enda entu ngelala aku.” Tang, peratika utai ku Pam, ke agi bedau kawin. Lebuh agi biak, iya nyadi pengerintis seberai tasik betaun-taun. Pengudah nya, iya pulai nyaga apai indai iya. Diatu, iya udah lebih 70 taun sereta agi ngerintis. Ku Pam madahka: “Utai ke amat nulung aku iya nya, lebuh orang beterima kasihka pengawa ti udah digaga aku.”

11. Baka ni Jesus ngayanka terima kasih ngagai sida ke indu ti nyukung iya ba pengawa nginjil?

¹¹ Jesus beterima kasih ngagai menyadi indu “ke ngena duit sida empu” nulung iya ba pengawa nginjil. (Luk. 8:1-3) Jesus ukai semina meri peluang ngagai sida gawa ke iya, tang mega ngajar sida pemendar ti beguna bekaul enggau peneka Petara. Ambika chunto, iya madahka sida iya deka dibunuh sereta diangkat idup baru. (Luk. 24:5-8) Jesus mega nyikap sida ke indu ngambika ulih napi penguji ti deka datai. (Mrk. 9:30-32; 10:32-34) Lalu lebuh Jesus ditangkap sereta ditinggalka semua rasul, sekeda indu ke nyukung iya bisi semak iya lebuh iya dipantang ba tiang perinsa.—Mat. 26:56; Mrk. 15:40, 41.

12. Nama pengawa ke diberi Jesus ngagai menyadi indu?

¹² Jesus meri sida ke indu pengawa ti beguna. Ambika chunto, sida orang keterubah meda Jesus diangkatka idup baru. Iya ngasuh sida madah ngagai bala rasul pasal pengangkat iya ari mati. (Mat. 28:5, 9, 10) Lalu kena Pentikos 33 Masihi, sida ke indu engka bisi lebuh bala murid Jesus diberi roh kudus. Enti pia, sida mega engka nerima penau bejaku ngena jaku bansa bukai sereta madah ngagai orang pasal ‘pemesai pengawa Petara.’—SKR. 1:14; 2:2-4, 11.

13. Nama pengawa ke digaga menyadi Kristian ke indu kemayaharitu, lalu baka ni kitai ulih ngayanka terima kasih ngagai sida?

¹³ Menyadi Kristian ke indu patut dipuji ketegal pengawa sida ke Jehovah. Pengawa sida nya nyengkaum nirika sereta nyeruri bengunan, nyukung raban ke ngena bansa jaku bukai, nyadi sukarela ba Betel, nulung ba pengawa meri bantu maya penusah ngenyit, nyalin litaricha, sereta nyadi pengerintis tauka pengerintis seberai tasik. Baka menyadi Kristian ke lelaki, menyadi indu mega ulih enggau sekula pengerintis, Sekula Penginjil Perintah Petara, sereta Sekula Gilead. Kelimpah ari nya, bala bini nyukung laki sida ngambika ulih bejalaika tanggung pengawa ba eklisia sereta gerempung. Semua menyadi lelaki tu engka tusah deka bejalaika pengawa sida nyadi “pemeri ngagai mensia” enti nadai sukung ari bini sida. (Eps. 4:8) Ulih nuan berundingka chara kena nyukung menyadi indu ba pengawa ke digaga sida?

14. Ketegal utai ke disebut ba Masmur 68:11, nama patut digaga tuai gempuru ti bepenemu-dalam?

¹⁴ Tuai gempuru ti bepenemu-dalam nemu menyadi indu nya “raban soldadu ti besai” ke sanggup gawa sereta landik nginjil. (Bacha Masmur 68:11 ari nota kaki.) * Nya alai tuai gempuru nguji belajar ari peneleba  bala menyadi indu. Abigail, ke dipadah ba pun tadi, berasai diperansang lebuh bala menyadi lelaki nanya iya chara ti manah kena ngepunka randau enggau orang lebuh nginjil. Ku iya, “Tu nulung aku nemu Jehovah bisi pengawa ti beguna ke aku.” Kelimpah ari nya, tuai gempuru nemu menyadi indu ti tuai sereta tetap ati nemu chara ti manah nulung menyadi indu ke biak lebuh sida napi penanggul. (Tit. 2:3-5) Endang terang, menyadi indu layak nerima pengerindu sereta terima kasih ari kitai!

15. Ni maya menyadi indu begunaka orang bejaku ngarika sida?

¹⁵ Kekadang, menyadi indu begunaka orang bejaku ngarika sida lebuh napi penanggul. (Isa. 1:17) Ambika chunto, menyadi indu ke balu tauka udah sarak engka begunaka seiku orang nyadi pengari iya sereta nulung iya ba sekeda utai ke suah digaga laki iya. Seiku menyadi indu ke tuai engka begunaka orang ngarika iya bejaku enggau bala lutur. Tauka seiku menyadi indu ke ngerintis tang nulung ba pengawa teokratik bukai, engka begunaka orang ngetanka iya enti bisi orang bukai bejakuka iya suah enda pansut nginjil baka pengerintis bukai. Nama chara bukai kitai ulih nulung menyadi indu? Sekali agi, aram meh kitai belematika chunto Jesus.

16. Baka ke dipadah ba Mark 14:3-9, baka ni Jesus ngetanka Maria?

¹⁶ Jesus enggau lengkas ngetanka menyadi indu lebuh bisi orang salah runding enggau sida. Ambika chunto, iya ngetanka Maria lebuh Marta enda nyamai ati enggau menyadi iya. (Luk. 10:38-42) Lalu iya mega ngetanka Maria kedua kali, lebuh orang bukai nganu Maria lalu ngumbai iya ngaga pemutus ti salah. (Bacha Mark 14:3-9) Jesus meretika tuju Maria lalu muji iya: ‘Iya udah ngereja utai ti manah ke aku. . . . Iya udah ngereja utai ti ulih dikereja iya.’ Jesus indah madahka pemanah ke digaga Maria deka dipadah “di sebarang endur Berita Manah tu ditusui di serata dunya,” lalu nya meh benung digaga artikel tu diatu. Jaku Jesus tentu ngasuh Maria nyamai ati pengudah iya dipetenah! Lalu endaka nya ngalitka ati maya Jesus muji ulah Maria ke enda berundingka diri empu, iya ngaitka enggau pengawa madahka berita manah ti deka ditusui di serata dunya.

17. Ni maya kitai patut ngetanka menyadi indu kitai? Beri chunto.

¹⁷ Kati nuan bisi ngetanka menyadi indu lebuh sida begunaka bantu? Peratika chunto tu. Seiku menyadi indu ke diau enggau laki iya ke ukai Saksi suah datai laun ke gempuru, lalu jampat pulai pengudah gempuru. Sekeda menyadi beratika tu lalu sida mega nemu menyadi nya jarang mai anak iya ke gempuru. Sida engka berengkah berunding, “Nama kebuah iya enda bebendar minta ari laki iya ngambika ulih mai anak datai begempuru?” Sida lalu bejakuka iya. Tang kebendar iya, sida enda nemu menyadi indu nya udah ngereja utai ke ulih iya. Kekadang, laki iya ngasuh iya ngereja utai ke enda dijangka iya. Iya mega patut bebasaka pemutus laki iya bekaul enggau anak. Nama ulih digaga nuan? Enti nuan muji menyadi nya ke pengawa iya lalu madahka orang bukai pasal pemanah iya, nuan ulih nagang orang bukai ari bejakuka iya.

18. Nama agi chara kitai ulih nulung menyadi indu?

¹⁸ Baka ni kitai nunjukka diri amat ibuhka menyadi indu? Siti chara nya meri tulung  ke beguna ba sida. (1 Jhn. 3:18) Annette, menyadi indu ke nyaga indai iya madahka: “Sekeda menyadi datai ke rumah lalu nulung nyaga indai aku ngambika aku ulih ngereja utai bukai. Sida mega mai pemakai. Tu ngasuh aku ngasaika diri dikerinduka sereta sebagi ari eklisia.” Menyadi Jenny mega nerima tulung ari seiku menyadi lelaki ke ngajar iya chara nyaga kerita. Ku iya: “Bala menyadi ibuhka pengelikun aku, lalu tu ngasuh aku gaga ati.”

19. Nama agi chara bukai tuai gempuru ulih nulung menyadi indu?

¹⁹ Tuai gempuru mega bebendar nulung bala menyadi indu. Sida nemu Jehovah deka menyadi indu dijaga enggau manah. (Jas. 1:27) Nya alai sida nunda Jesus sereta enda terit. Sida nyeliah ari ngaga atur ti terit, tang nguji ngayanka penelap sereta meretika menyadi indu. (Mat. 15:22-28) Lebuh tuai gempuru dulu agi meri bantu, tu nulung menyadi indu ngasaika pengibuh Jehovah enggau gerempung Iya. Lebuh tuai raban nemu Menyadi Kia deka mindah ngagai rumah bukai, tuai raban nya ngaga atur enggau lengkas. Ku Kia madah: “Tu ngasuh aku enda kelalu stress. Laban tuai gempuru meransang sereta meri bantu ke diguna aku, sida nunjukka aku amat berega ba eklisia lalu aku enda kediri lebuh napi penanggul.”

20-21. Baka ni kitai ulih nunjukka pengerindu ngagai bala menyadi indu?

²⁰ Lebuh kitai beratika bala menyadi ba eklisia, bisi mayuh menyadi indu ti bagas gawa ke begunaka sukung ari kitai. Baka ke udah dipelajarka kitai ari chunto Jesus, kitai ulih nulung sida enggau (1) nyediaka awak begulai sereta ngelala sida enggau manah, (2) ngayanka diri beterima kasihka pengawa sida, lalu (3) bejaku ngarika sida lebuh sida begunaka nya.

²¹ Ba pengujung surat ngagai menyadi Kristian di Rome, rasul Paul nyebut semilan iku menyadi indu. (Rom. 16:1, 3, 6, 12, 13, 15) Sida tentu berasai diperansang lebuh ninga nama sida disebut sereta jaku puji Paul ba surat nya. Nya alai, aram meh kitai enggau naka ulih nyukung bala menyadi indu ba eklisia. Enggau nya, kitai nunjukka kitai rinduka sida, ke sebagi ari diri sebilik kitai.