1. Anni ira i meyuffun na sister ira ta organisasion, ngem anni ira nga problema i keparubangadda? (Innan i letratu ta vungun.)

MAPPABALO ittam ta aru i malappo nga sister ta kongregasion. Angngariganna, makipartisipa ira ta study anna mallayyagayya. Manguffun gapa i karuan ta pammentena ta Kingdom Hall anna mangipasingan gapa i karuan tu personal nga interes ta kapangngurugda. Ngem egga gapa ira i problemada. Tattangngallan na karuan i bako onu lakay ngana nga maganada. Attattamman gapa na karuan i pangokkontra na familiada. Tapus egga gapa i solo nga yena onu magana nga mawagda i mappursigi tapenu iyawa i pakawagan na ánada.

2. Ngatta suportattam nakuan i sister ira?

² Ngatta suportattam nakuan i sister ira? Megafu ta maruddu nga ari nga irespeto na totolay i babbay. Tadday paga, ipagaram na Biblia nga kuattam yatun. Angngariganna, kinagi ni apostol Pablo ta kongregasion ta Roma nga alawatadda si Febe anna ‘uffunadda yayya ta anni laman nga pakawaganna.’ (Roma 16:1, 2) Megafu ta dati nga Fariseo si Pablo, neyugalianna nga tagibadditan i babbay ira. Ngem turi ta nabbalin ngana yayya nga Cristiano, pinariganna ngana si Jesus yatutta marespeto anna masippo ngana i pattratuna ta babbay.​—1 Cor. 11:1.

3. Kunnasi nga tinratu ni Jesus i babbay ira, anna kunnasina nga minammatan i babbay ira nga nangngua ta uray na Dios?

³ Nirespeto ni Jesus i ngamin nga babbay. (Juan 4:27) Arianna nga pinarigan i pagimamma na relihioso ira nga lider nga Judio ta babbay. Kakuruganna, kagian na tadday nga referensia ta Biblia: “Awan vuluvuga tu kinagi ni Jesus nga nanginsulto onu nangiyalinno ta babbay ira.” Dakal gapa i pangikakua ni Jesus ta babbay ira nga nangngua ta uray na Yamana. Kakuruganna, minammatanna ira bilang wawwaragina nga babbay  anna parte ira na espiritual nga familiana gittana pangibilanna ta lallaki ira.​—Mat. 12:50.

4. Anni i ammuattam taw nga artikulo?

⁴ Sigga-paran si Jesus nga uffunan i babbay ira nga nasserbi ta Dios. Inappresiana ira anna nidefensana ira. Ammuattam nu kunnasi tam maparigan si Jesus ta pangikavurung ta sister tam ira.

5. Ngatta marigatan i karuan nga sister nga makaleg tu makasta nga kakavvulu?

⁵ Lallaki onu babbay, kawagattam ngamin i makasta nga pakkaravulu. Ngem nu mittan, marigatan i sister ira nga pannuan yatun nga pakawagan. Ngatta? Yaw i kagian na karuan nga sister. Kunni Jordan, * “Megafu ta single ngà, matageno ku nga awan tu papel ku ta kongregasion anna gittana ari ngà talaga parte natun.” Kagian gapa ni Kristen, tadday nga payunir nga nagali tapenu palawan i ministeriona, “Nu bagu ka ta tadday nga kongregasion, gittana magitetadday ka.” Kunnatun gapa i matageno na karuan nga wawwaragi. Marigatan i karuan nga makiddukko ta kafamiliada nga ari tu Saksi ni Jehova anna gittana nesisina ira ta wawwaragi ta kongregasion. Ari gapa tu magayayya i karuan nga sister megafu ta taki anna ariadda makapanaw ta baleda onu megafu ta ira i manangngal ta mataki nga kafamiliada. Kagian gapa ni Annette, “Ariakku makangay ta salu-salo ira megafu ta sakan i manangngal ta yenà.”

6. Segun ta Lucas 10:38-42, kunnasi nga inuffunan ni Jesus da Marta anni Maria?

⁶ Egga i tiempo ni Jesus nga makikavulu ta kapangngurugna nga babbay anna kurug yayya nga kofun nira. Nonopan i pakikkofunna kadi Maria anna Marta nga posible nga parehu nga awan tu atawada. (Bibbigan i Lucas 10:38-42) Megafu ta kakkagian anna kukukuan ni Jesus, ari nga nappasiran si Maria nga magitubang ta arubanna bilang tadday nga disipulo. * Inarannian gapa yayya ni Marta anna kinagina i nononopanna turi ta magaburidu yayya megafu ta ari yayya nga dudduffunan ni Maria. Tatun nga situasion, noffunan ni Jesus yatun nga dua nga babbay tapenu makagigiammu tu importante ira nga leksion. Nipasinganna gapa nga ikavurunganna danaw nga babbay kunne na gapa i wagida nga si Lazaro gukaban na pabbisita tannira ta tanakuan nga tiempo. (Juan 12:1-3) Yatutta turi ta grabe i taki ni Lazaro, komfiansa da Maria anni Marta nga awayyada i mappoffun kani Jesus.​—Juan 11:3, 5.

7. Anni i kuattam tapenu mapagaram i sister ira?

⁷ Maruddu nga makavulu na sister ira i kapangngurugda ta study ira yatutta approbetsattam nakuan danatun nga tiempo tapenu alawatan ira, kiyuvovugan ira, anna mepasingan nga mekavurungan ira. Kunnaw i kagian ni Jordan nga nakagi ta gafu: “Kuruga mapagaram ngà nu komendannà na tanakuan megafu ta komentò ira ta study, nu makitratu ira nga mallayyagayya kavulu ku, anna nu egga ira i kuadda tapenu mepasingan nga ikavurungaddà.” Ipatageno tam nakuan ta sister ira nga importante ira nittam. Kagian ni Kia, “Nu ariakku nga naka-study, ammù nga magga egga i mattext niakan tapenu kumustannà. Gafu tatun, ammù nga ikavurangannà na wawwaragi ira.”

8. Kunnasi tam paga nga maparigan si Jesus?

⁸ Maparigattam gapa si Jesus nu egga i tiempo tam nga makikavulu ta sister ira. Baka puede tam ira nga imbitan ta baletam para ta  pakkakan onu paddibersion. Nu kuattam yatun, siguraduattam nakuan nga makapagaram i paggiristoriattam. (Roma 1:11, 12) Parigan nakuan na elder ira i appana-panono ni Jesus. Ammu ni Jesus nga awayyana nga marigatan i karuan megafu ta pabbalidda tu single, ngem manawag tu kinagina nga ari tu nakadepende i kurug nga pagayayya ta pakitawa onu ta kapeggan tu ána. (Luc. 11:27, 28) Kinagina lallagu nga nakadepende i mannanayun nga pagayayya ta pangipoppollu ta passerbi kani Jehova.​—Mat. 19:12.

9. Anni i makua na elder ira tapenu moffunan i sister ira?

⁹ Netallugaring nga mawag tu tratuan na elder ira i Cristiano nga babbay nga gittana wagi onu yenada ta espiritual. (1 Tim. 5:1, 2) Makasta nu egga i tiempo na elder ira nga kiyuvovugan i sister ira nige anna kabalin na study. “Napansin na tadday nga elder nga bi-busy ngà anna kayàna nga matindian nu kunnasi kari i iskediul ku,” kinagi ni Kristen. “Talaga appresiakku i pangikavurunna nio.” Nu kanayun nga makiyuvovug i elder ira ta kapangngurugda nga babbay, mepasingadda nga ikavurungadda ira. * Inistoria gapa ni Annette nga nakagi ta gafu, i benefisio na kanayun nga pakibbida ta elder ira. Kunna: “Mas makilalà ira anna mas makilaladà gapa. Tapus nu egga problemà, ari ngà mappasiran nga mappoffun nira.”

10. Kunnasi nga mabbalin tu magayayya i sister tam ira?

¹⁰ Lallaki onu babbay, ngamin ittam ay magayayya nu masingan na tanakuan i abilidad tam ira anna ikagida nittam nga appresiadda i kukukuattam. Ngem nu awan vuluvuga tu mappabalo ta pinangiyusa tam ta abilidad tam ira onu ta trabahu nga kingngua tam, makkafi i nono tam. Aminan na tadday nga sister nga payunir nga si Abigail nga nu mittan, awan talaga tu makasingan ta kukukuanna. Kunna: “Kilaladà laman gafu ta yamà onu wagì si kunnaw. Gittana awan talaga tu makapansin nio.” Ngem sifutan gapa i komento na tadday nga single nga sister nga si Pam. Aru nga dagun nga nammisionero yayya tapus kabalin natun, milubbe yayya ta baleda tapenu tangngawan i maganana. Ma-70 ngana sangawe i edadna anna payunir lagapa yayya. Kunni Pam: “I pinakanakoffun nio ay nu ikagi na tanakuan nio nga appresiadda i kukukuakku.”

11. Kunnasi nga nipasingan ni Jesus nga appresianna i babbay nga nanguffun nisa ta ministeriona?

¹¹ Inappresia ni Jesus i makadios ira nga babbay nga “naggafu laggapa nira i ginasto da nga nanguffun” tannisa. (Luc. 8:1-3) Ari laman tu yatun nga pribilehio nga masserbi nisa i niyawana, nu ari, sinudduanna paga ira tu monag ira nga kinakurug. Angngariganna, tannirana nga nipakannammu nga matay yayya tapus maginnolay. (Luc. 24:5-8) Nipreparana danaw nga babbay ta kapurueba ira nga maekspiriensada nga kunna kingnguana ta apostolesna ira. (Mar. 9:30-32; 10:32-34) Turi ta naaresto si Jesus, nakkapanaw i apostolesna ngem turi ta magimmamatay yayya ta pakaziga-rigatan nga estaka, ari yayya vuluvuga pinanawan na karuan nga babbay nga nangungnguffun nisa.​—Mat. 26:56; Mar. 15:40, 41.

12. Anni nga trabahu i nitalo ni Jesus ta babbay?

¹² Nitalo ni Jesus i importante nga trabahu ta babbay. Angngariganna, yari ira i makadios nga babbay i ollu nga nakasingan ta paginnolena. Nikiddona tatun nga babbay nga ipakolida ta apostoles nga naginnolay ngana yayya. (Mat. 28:5, 9, 10) Turi ta Pentecostes 33 C.E., presente i babbay turi ta neyaluvu i masanto nga espiritu. Nu kunnatun, nakalawa gapa gafu danaw nga bagu nga nazelugan nga sister ira tu abilidad nga maguvovug tu tanakuan nga lengguahe anna ilammuyag ta tanakuan i “makapabbaw ira nga kingngua na Dios.”​—King. 1:14; 2:2-4, 11.

13. Anni i kukukuan na Cristiano ira nga babbay ta maddaggun, anna kunnasi tam mepasingan nga appresiattam i kukukuadda?

¹³ Mepangngo nga komendattam i sister tam ira ta ngamin nga kukukuadda ta passerbi kani Jehova. Nelagum tatun i pamataddag anna pammentena ta building ira, passuporta ta grupo ira na foreign language anna passerbi ta Bethel. Mangungnguffun gapa ira nu egga ira i kalamidad, mattransleyt ira tu publikasiottam, anna massesserbi ira bilang payunir onu misionero. Kagitta na brother ira, maggigiammu i sister ira ta Pioneer Service School, ta School for Kingdom Evangelizers, anna ta Gilead. Fuera paga tatun, uuffunan na babbay i gi-attawadda tapenu metuppalda i madammo ira nga responsibilidadda ta kongregasion anna ta organisasion. Ari nga makapasserbi tu mapia danaw nga ‘regalu ta totolay’ nu awan tu suporta na gi-attawadda. (Efe. 4:8) Egga kari paga i manono mu nga makuam tapenu suportan danaw nga sister ta kukukuadda?

14. Mekunnay ta Salmo 68:11, anni i kuan na masirib ira nga elder?

¹⁴ “Aru nga babbay” i sigga-paran nga mattrabahu anna maruddu nga ira i pinakamalalaki nga mallayyagayya ta mapia nga dumug.  Ammu yatun na masirib ira nga elder. (Bibbigan i Salmo 68:11.) Yatutta magaleg i elder ira tu oportunidad tapenu makagigiammu ta ekspiriensada ira. Appresian ni Abigail nga nakagi ta gafu nu iyavu na brother ira nisa nu anni i nasinganna ira nga efektibo nga pangigafu tu pakiyuvovug ta totolay ta teritoria. Kunna, “Megafu tatun, nepatageno niakan ni Jehova nga egga i papel ku ta organisasionna.” Fuera paga tatun, rekunnisian paga na elder ira nga efektibo danaw nga matalo anna manakam ira nga sister ta panguffun ta mabbing ira nga sister tapenu arubangan i kapuruebada ira. (Tito 2:3-5) Manawag gafu nga mepangngo laman nga appresiattam i sister tam ira!

15. Kanni nga mawag na sister ira i mangidefensa nira?

¹⁵ Nu karuan, kawagan na sister ira i mangidefensa nira nu egga i espesipiko nga problemada. (Isa. 1:17) Angngariganna, baka kawagan na tadday nga sister nga balu onu diborsiada i mangidefensa nisa anna manguffun nisa ta trabahu ira nga dati nga kukukuan na atawana. Awayyana nga kawagan na tadday nga manakam nga sister i uffun tapenu kiyuvovugan i doktor ira. Kunnasi gapa nu kawagan na payunir nga sister i mangidefensa nisa? Baka egga danuri makkritika nisa ta arianna kuruga mallawa-lawan kumpara ta karuan nga papayunir namegafu turi ta nabboluntariu yayya ta teokratiko ira nga proyekto. Kunnasi tam nga moffunan i sister tam ira? Gigiammuattam mangana i ehemplo ni Jesus.

16. Kunnasi nga nidefensa ni Jesus si Maria segun ta Marcos 14:3-9?

¹⁶ Alistu si Jesus nga mangidefensa ta kapangngurugna ira nga babbay nu egga danuri makkritika nira. Angngariganna, nidefensana si Maria turi ta kinritika yayya ni Marta. (Luc. 10:38-42) Tapus, nidefensana mangana si Maria turi ta nikalussaw yayya na tanakuan megafu ta abboda nga mali i kingnguana. (Bibbigan i Marcos 14:3-9.) Nalippawa ni Jesus i motibo ni Maria yatutta kinomendanna yayya. Kunna nisa: “Kuruga mapia i kingngua na niakan. . . . Kingngua na i adde na awayya na.” Niprofesiya paga lagu ni Jesus nga mepaka-pakoli noka yaw nga mapia nga kingnguana ta maski ‘sitaw ta tangaravvunan nga kelammuyagan na evanghelio.’ Kunnatun mismu i kingngua naw nga artikulo. Makapa-interes nga kinagi ni Jesus nga melayyagayya noka i mapia nga dumug ta interu mundo turi ta zinayona si Maria ta ari nga makasarili nga kingnguana. Maski nu kinritika na tanakuan si Maria, siguradu nga nabanna-bannayan yayya ta kinagi ira ni Jesus!

17. Anni nga situasion nga mawag tu idefensa tam i tadday nga sister?

¹⁷ Idefensam kari i sister ira nu kawagadda yatun? Nonopan yaw nga situasion. Masingan na karuan nga publisher nga kanayun nga ma-late ta study i tadday nga sister nga ari tu Saksi i atawana tapus manaw yayya insigida kabalin na study. Mapansidda gapa nga arianna kuruga ivulu-vulu i ánana ta study yatutta kritikadda yayya nu ngatta arianna metaddaggan i pangurugna ta ari tu Saksi nga atawana. Ngem ta kakuruganna, kukukuan gapa na sister i adde na mawayyana. Arianna laman gare nga kontroladu i iskediulna, ni tu yayya i maddesision para ta ánada. Anni gafu i kuammu? Nu komendammu yatun nga sister anna ikagim ta tanakuan i makasta ira nga kukukuanna, mapagimmammu i negatibo nga istoria.

18. Kunnasi tam paga nga moffunan i sister ira?

¹⁸ Mapakurug tam nga ikavurungattam i sister ira gukaban na praktikal ira nga panguffuttam nira. (1 Juan 3:18) Kunnaw i kagian ni Sister Annette nga manangngal ta mataki nga yenana: “Umay ta balemi i karuan nga  wawwaragi tapenu ira labbi i manangngaw ta yenà onu mangiyangay ira tu makan. Megafu tatun, natageno ku nga iddukaddà anna partenà na kongregasion.” Noffunan gapa si Sister Jordan na tadday nga brother nga magigiammu nu kunnasi nga pakappian i takena. Kunna: “Makasta ta panageno nga mammuan nga ikavurungannà na wawwaragi anna kayàda nga ari ngà nga maaksidente nu imanehò i takè.”

19. Kunnasi paga nga moffunan na elder i sister ira?

¹⁹ Ikavurungan gapa na elder ira i pakawagan na sister ira. Ammuda nga importante kani Jehova nga makasta i katratu na sister ira. (Sant. 1:27) Paparigadda gafu si Jesus yatutta rasonable ira. Ammuda nga mas importante i pabbalin tu masippo anna minangngalippawa anne ta pabbalin tu istrikto. (Mat. 15:22-28) Nu mabboluntariu i elder ira nga uffunan i sister ira, matagenoda nga iddukan ira ni Jehova anna ikavurungan ira na organisasionna. Turi ta nakannammuan na manangngal ta grupo ni Kia nga magali yayya tu balay, insigida nga niyunnug na brother i panguffudda. “Napakarianan i stress ku,” kunni Kia. “Megafu ta pinasikadda i nono ku, anna ta praktikal nga uffudda, nipasingan na elder ira niakan nga importante ngà ta kongregasion anna ari ngà magitetadday nu egga i mariga nga situasion.”

20-21. Kunnasi tam mepasingan nga iddukattam i ngamin nga sister tam?

²⁰ Ta kongregasion ira, napakaru i sister nga makasta i ehemploda megafu ta malallappo ira yatutta mepangngo ira ta suporta tam. Nagigiammu tam ta ehemplo ni Jesus nga moffunattam ira nu egga i tiempo tam nga makikavulu nira anna nu ammuattam ira tu mapia. Ipasingattam gapa nga appresiattam ira megafu ta kukukuadda ta passerbi ta Dios anna idefensa tam gapa ira nu kawagan.

²¹ Ta ultimu na tura ni apostol Pablo ta taga-Roma ira, espesipiko nga tinukoyna i siam nga Cristiano nga babbay. (Roma 16:1, 3, 6, 12, 13, 15) Siguradu nga napagaram danatun nga babbay turi ta kinumusta anna kinomendanna ira. Suportattam nakuan gafu gapa i ngamin nga sister ta kongregasion. Nu kuattam yatun, mepasingattam nga iddukattam ira bilang parte na familia tam ta espiritual.