1. Ania a suporta ti ipapaay dagiti kakabsat a babbai iti organisasion, ngem ania dagiti problema a pakaipaspasanguan ti adu kadakuada? (Kitaen ti ladawan iti akkub.)

ANIAN a yamantayo ta nagadu ti nagagaget a kakabsat a babbai iti kongregasion! Kas pagarigan, makiramramanda kadagiti gimong ken iti ministerio. Dadduma ti tumultulong a mangmantener iti Kingdom Hall, ken ipakpakitada a maseknanda kadagiti kapammatianda. Siempre, adda met dagiti problema a pakaipaspasanguanda. Dadduma ti mangay-aywan kadagiti nataenganen a nagannakda. Adda met dagidiay agib-ibtur iti panangbusor dagiti kapamiliada. Ken adda met dagiti agsolsolo a nagannak a mangikagkagumaan a mangipaay iti kasapulan dagiti annakda.

2. Apay a masapul nga ikagumaantayo a suportaran dagiti kakabsattayo a babbai?

² Apay a masapul a suportarantayo dagiti kakabsat a babbai? Gapu ta saan a kanayon a nadayaw ti panangtrato ti lubong kadakuada. Kasta met, iparparegta ti Biblia a suportarantayo ida. Kas pagarigan, kiniddaw ni apostol Pablo iti kongregasion ti Roma nga awatenda ni Febe ken ‘itedda ti aniaman a tulong a kasapulanna.’ (Roma 16:1, 2) Dati a Fariseo ni Pablo isu a nairuam iti kultura a mangtagtagibassit kadagiti babbai. Ngem idi nagbalinen a Kristiano, tinuladna ni Jesus isu a nadayaw ken nasayaaten ti panangtratona kadagiti babbai.—1 Cor. 11:1.

3. Kasano ti panangtrato ni Jesus kadagiti babbai, ken ania ti panangmatmatna kadagiti babbai a nangaramid iti pagayatan ti Dios?

³ Nadayaw ti panangtrato ni Jesus iti amin a babbai. (Juan 4:27) Saan a kas kadagiti lider ti relihion dagiti Judio idi kaaldawanna ti panangmatmatna kadagiti babbai. Kinapudnona, kuna ti maysa a reperensia ti Biblia: “Awan a pulos ti imbaga ni Jesus a nangtagibassit wenno nanglais kadagiti babbai.” Naisangsangayan ti panangrespeto ni Jesus kadagiti babbai a nangaramid iti  pagayatan ni Amana nga uray la imbilangna ida a kakabsatna. Dinakamatna ida a kadua dagiti lallaki kas paset ti naespirituan a pamiliana.—Mat. 12:50.

4. Ania ti pagsasaritaantayo iti daytoy nga artikulo?

⁴ Kanayon a nakasagana ni Jesus a tumulong kadagiti naespirituan a kakabsatna a babbai. Inapresiar ken indepensana ida. Pagsasaritaantayo no kasanotayo a matulad ni Jesus iti panangipakita iti konsiderasion kadagiti kakabsat a babbai.

5. Apay a saan a mapadpadasan ti dadduma a kakabsat a babbai ti makapabileg a panaglalangen?

⁵ Amintayo nga agkakabsat, lallaki ken babbai, ket agkasapulan iti nasayaat a panaglalangen. Ngem no dadduma, mabalin a saan a mapadasan dayta dagiti kakabsat a babbai. Apay? Kitaentayo dagitoy a komentoda. Kinuna ti maysa a kabsat a babai a ni Jordan: * “Gapu ta balasangak, masansan a mariknak a kasla awan ti napateg a papelko iti kongregasion, ken mariknak a saanak a paset ti kongregasion.” Kinuna ti payunir a ni Kristen nga immakar iti sabali a lugar tapno palawaenna ti ministeriona: “No kabbaroka iti maysa a kongregasion, mabalin a mariknam nga agmaymaysaka.” Mabalin a kasta met la ti rikna ti dadduma a kakabsat a lallaki. Ti maysa a saan a Saksi dagiti kapamiliana a kabbalayna mabalin a saan a nasinged kadakuada ken mabalin a kailiwna ti naespirituan a pamiliana. Mabalin a malidliday ti dadduma a kakabsat a babbai gapu ta saanda a makapanaw iti balayda ta masakitda wenno ay-aywananda dagiti masakit a kapamiliada. Kinuna ni Annette: “Uray aw-awisendak dagiti kakabsat kadagiti panaglalangen, diak makapan ta siak ti kangrunaan a mangay-aywan ken nanangko.”

6. Kas mabasa iti Lucas 10:38-42, kasano a tinulongan ni Jesus da Marta ken Maria?

⁶ Nakilangen ni Jesus kadagiti naespirituan a kakabsatna a babbai, ket nagbalin a pudno a gayyemda. Kitaentayo ti pannakigayyemna kada Maria ken Marta, nga agparang nga awanan assawa. (Basaen ti Lucas 10:38-42.) Gapu iti sao ken aramid ni Jesus, nalag-an ti riknada nga umasideg kenkuana. Kasta ti rikna ni Maria idi nagtugaw iti sakaanan ni Jesus kas adalanna. * Ket idi masikoran ni Marta ta saan a tumultulong ni Maria, saan a mabain a nangibaga ken Jesus iti pampanunotenna. Iti dayta a gundaway, adda dagiti napateg nga insuro kadakuada ni Jesus. Impakitana met ti dungngona kadakuada ken iti kabsatda a ni Lazaro babaen ti namin-adu a panangbisitana kadakuada. (Juan 12:1-3) Di ngarud pakasdaawan nga idi nagsakit iti grabe ni Lazaro, ammo da Maria ken Marta a mabalinda ti agpatulong ken Jesus.—Juan 11:3, 5.

7. Ania ti maysa a pamay-an a maparegtatayo dagiti kakabsat a babbai?

⁷ Para iti dadduma a kakabsat a babbai, dagiti gimong ti kangrunaan a gundawayda a makikadua kadagiti kapammatianda. Isu nga usarentayo koma dagita nga okasion a mangabrasa ken makisarita kadakuada, ken ipakitatayo a maseknantayo kadakuada. Kinuna ni Jordan a nadakamat itay: “Maparegtaak unay no adda mangapresiar kadagiti komentok, mangawis kaniak a makikadua iti ministerio, wenno mangipakita a maseknan kaniak iti sabali pay a pamay-an.” Masapul nga ipakitatayo kadagiti kakabsattayo a babbai a napategda kadatayo. “No diak makagimong,” kinuna ni Kia, “ammok nga adda  agteks tapno komustaennak. Dayta ti mangiparikna kaniak nga ipatpategdak dagiti kakabsat.”

8. Kadagiti ania pay a pamay-an a matuladtayo ni Jesus?

⁸ Kas ken Jesus, mabalintayo nga iwayaan ti makilangen kadagiti kakabsat a babbai. Nalabit imbitarantayo ida iti simple a pannangan wenno panagrelaks. No aramidentayo dayta, ikagumaantayo koma a pagbalinen a makapabileg ti saritaan. (Roma 1:11, 12) Nasayaat no laglagipen dagiti panglakayen ti kababalin ni Jesus. Ammona a mabalin a narigat ti kinaawan asawa para iti dadduma, ngem pinaglawagna a ti panagasawa wenno kaadda ti annak ket saan nga isu ti tulbek ti manayon a kinaragsak. (Luc. 11:27, 28) Imbes ketdi, ti permanente a kinaragsak ket resulta ti panangyun-una iti panagserbi ken Jehova.—Mat. 19:12.

9. Kasano a matulongan dagiti panglakayen dagiti kakabsat a babbai?

⁹ Dagiti panglakayen ti nangnangruna a masapul a mangtrato kadagiti Kristiano a babbai kas naespirituan a kakabsat ken inna. (1 Tim. 5:1, 2) Nasayaat no iwayaan dagiti panglakayen ti makisarita kadagiti kakabsat a babbai sakbay wenno kalpasan dagiti gimong. “Nadlaw ti maysa a panglakayen a kanayonak a busy ket inammona no ania ti eskediulko,” kinuna ni Kristen. “Agyamyamanak iti pannakaseknanna kaniak.” No regular nga iwayaan dagiti panglakayen ti makisarita kadagiti naespirituan a kakabsatda  a babbai, ipakpakitada a maseknanda kadakuada. * Imbaga ni Annette a nadakamat itay ti pagsayaatan ti regular a pannakisarita kadagiti panglakayen. Kinunana: “Maam-ammok ida a naimbag, ket maam-ammodak met. Ket no adda nadagsen a problemak, nalaglag-an ti riknak nga agpatulong kadakuada.”

10. Ania ti makatulong tapno sumayaat ti rikna dagiti kakabsattayo a babbai?

¹⁰ Lalakitayo man wenno babai, sumayaat ti riknatayo no adda mangkomendar kadatayo gapu kadagiti abilidadtayo ken ibagada nga apresiarenda ti ar-aramidentayo. Ngem maupaytayo no awan ti mangapresiar kadagiti talentotayo wenno maar-aramidantayo. Inamin ti maysa a balasang a payunir a ni Abigail a no dadduma, mariknana nga awan ti mangap-apresiar kenkuana: “Ibilangdak laeng a kabsat ni kua wenno anak ni kua. No dadduma, mariknak a kasla didak makitkita.” Ngem kitaentayo ti imbaga ti awanan asawa a kabsat a ni Pam. Adu a tawen a nagserbi kas misionera. Idi agangay, nagawid tapno aywananna dagiti nagannakna. Payunir pay laeng ita uray nasuroken a 70 ti tawenna. Kinuna ni Pam: “Ti nakatulong unay kaniak ket ti panangibaga ti sabsabali nga ap-apresiarendak.”

11. Kasano nga impakita ni Jesus nga ipatpategna dagiti babbai a nakikadua kenkuana iti ministeriona?

¹¹ Impateg ni Jesus dagiti matalek a babbai a ‘nangusar kadagiti sanikuada’ a nagserbi kenkuana. (Luc. 8:1-3) Saanna laeng nga inikkan ida iti kasta a pribilehio no di ket impakaammona pay kadakuada dagiti nauneg a naespirituan a kinapudno. Kas pagarigan, impakaammona kadakuada nga isu ket matay ken mapagungar. (Luc. 24:5-8) Kas kadagiti apostol, insaganana dagitoy a babbai kadagiti suot a pakaipasanguanda. (Mar. 9:30-32; 10:32-34) Nupay nagtalaw dagiti apostol idi naaresto ni Jesus, dadduma a babbai a timmulong idi kenkuana ti adda iti sibayna idi matmatayen iti kayo a pagtutuokan.—Mat. 26:56; Mar. 15:40, 41.

12. Ania a trabaho ti intalek ni Jesus kadagiti babbai?

¹² Adda napateg a trabaho nga intalek ni Jesus kadagiti babbai. Kas pagarigan, dagiti matalek a babbai ti immuna a nakasaksi iti panagungarna. Kiniddawna nga ibagada kadagiti apostol nga isu ket napagungaren. (Mat. 28:5, 9, 10) Ken idi Pentecostes 33 C.E., mabalin nga adda dagiti babbai idi naibukbok ti nasantuan nga espiritu. No kasta, mabalin nga inawat dagitoy a napulotan a kakabsat a babbai ti namilagruan nga abilidad a panagsao kadagiti sabali a lengguahe ken mangipakaammo iti “nakaskasdaaw nga aramid ti Dios.”—Ara. 1:14; 2:2-4, 11.

13. Ania ti ar-aramiden ita dagiti Kristiano a babbai, ken kasanotayo a maipakita nga ap-apresiarentayo ti maar-aramidanda?

¹³ Maikari a makomendaran dagiti kakabsattayo a babbai gapu iti amin nga ar-aramidenda iti panagserbi ken Jehova. Karaman iti dayta ti panagibangon ken panangmantener kadagiti pasdek, panangsuporta kadagiti grupo nga agsasao iti sabali a lengguahe, ken panagboluntario kadagiti pasilidad ti Bethel. Tumultulongda a mangsaranay kadagiti nadidigra, agipatarus kadagiti publikasiontayo, ken agserbi kas payunir ken misionera. Kas kadagiti kakabsat a lallaki, umat-atender met dagiti kakabsat a babbai iti Pioneer Service School, School for Kingdom Evangelizers, ken Gilead School. Tumultulong met dagiti assawa a babbai tapno maibaklay ti assawada dagiti nadagsen a responsabilidadda iti kongregasion ken iti organisasion. Gapu iti suporta ti asawa a babai, ti responsable a kabsat a lalaki ket naan-anay a makapagserbi kas maysa kadagiti “lallaki a kas sagut.” (Efe. 4:8) Adda kadi dagiti mapanunotmo a pamay-an a mangsuporta iti kakabsat a babbai kadagiti trabahoda?

14. Gapu iti kuna ti Salmo 68:11, ania ti aramiden dagiti masirib a panglakayen?

 ¹⁴ Maawatan dagiti masirib a panglakayen a ti kakabsat a babbai ket “dakkel nga armada” dagiti boluntario a trabahador ken masansan nga isuda ti nalaing a mangikasaba iti naimbag a damag. (Basaen ti Salmo 68:11.) Isu nga ikagumaan dagiti panglakayen a kitaen dagiti masursuroda kadagiti kakabsat a babbai. Apresiaren ni Abigail a nadakamat itay no saludsoden ti kakabsat a lallaki no ania dagiti epektibo a pamay-anna a makisarita kadagiti kasabaanna. Kinunana: “Dayta ti tumulong kaniak a makakita nga inikkannak ni Jehova iti lugar iti organisasionna.” Bigbigen met dagiti panglakayen a dagiti matalek ken nataengan iti naespirituan a kakabsat a babbai ket epektibo a tumulong kadagiti ub-ubing a kakabsat a babbai a mangsango kadagiti problema. (Tito 2:3-5) Talaga a maikari a maapresiar dagiti kakabsattayo a babbai!

15. Kadagiti ania a situasion a kasapulan dagiti kakabsat a babbai ti mangidepensa kadakuada?

¹⁵ No dadduma, mabalin a kasapulan dagiti kakabsat a babbai ti mangidepensa ken tumulong kadakuada no maipasangoda iti problema. (Isa. 1:17) Kas pagarigan, baka kasapulan ti maysa a balo wenno diborsiada a kabsat ti tumulong kenkuana a mangasikaso iti bambanag a dati nga as-asikasuen ni lakayna. Mabalin a kasapulan ti maysa a baket a kabsat ti mangilawlawag kadagiti doktor iti kasasaadna. Wenno mabalin a kasapulan ti maysa a payunir a kabsat a babai, a boluntario kadagiti proyekto ti organisasion, ti mangidepensa kenkuana no makritikar gapu ta manmano a makipaset iti ministerio no ikompara iti dadduma a payunir. Kasano pay a matulongantayo dagiti kakabsat a babbai? Usigentayo manen ti ulidan ni Jesus.

16. Kasano nga indepensa ni Jesus ni Maria, kas mabasa iti Marcos 14:3-9?

¹⁶ Alisto ni Jesus a mangidepensa kadagiti naespirituan a kakabsatna a babbai no sabali ti panangipapan ti dadduma iti ar-aramidenda. Kas pagarigan, indepensana ni Maria idi krinitikar ni Marta. (Luc. 10:38-42) Indepensana manen ni Maria idi adda dagiti nangbabalaw kenkuana gapu ta impagarupda a kamali ti inaramidna. (Basaen ti Marcos 14:3-9.) Naawatanna ti motibo ni Maria ket kinomendaranna: “Nagsayaat ti inaramidna kaniak. . . . Inaramidna ti kabaelanna.” Impadtona pay ketdi a maipadamagto ti naimbag nga inaramid ni Maria “sadinoman a pakaikasabaan ti naimbag a damag iti intero a lubong,” kas iti ar-aramiden ita daytoy nga artikulo. Makapainteres ta dinakamatna ti sangalubongan a panangasaba idi kinomendaranna ti kinaparabur ni Maria! Naragsakan la ketdi ni Maria iti imbaga ni Jesus idi nababalaw ti inaramidna!

17. Mangted iti pagarigan no kaano a masapul nga idepensatayo ti maysa a kabsat a babai.

¹⁷ Idepdepensam kadi dagiti kakabsat a babbai no kasapulanda dayta? Kitaentayo daytoy a pagarigan. Makitkita ti dadduma nga agibumbunannag a ti maysa a kabsat a saan a Saksi ni lakayna ket masansan a maladaw iti gimong sa agawid a dagus no malpas. Madmadlawda a manmano nga itugotna dagiti annakna. Isu a kritkritikarenda gapu ta pampanunotenda nga ipilitna koma ken lakayna nga itugotna dagiti annakda iti gimong. Ngem kinaagpaysuanna, ar-aramidenna ti amin a kabaelanna. Dina kontrolado ti eskediulna, ken saan met nga isu ti agdesision para iti annakna. Ania ti mabalinmo nga aramiden? No komendaram isuna ken dakamatem iti sabsabali ti nasayaat nga ar-aramidenna, mabalin a mapasardengmo ti panangkritikarda kenkuana.

18. Kadagiti ania pay a pamay-an a matulongantayo dagiti kakabsat a babbai?

¹⁸ Maipakitatayo ti panangipategtayo iti kakabsat a babbai no agboluntariotayo a mangipaay iti praktikal a tulong. (1 Juan 3:18) Kinuna  ni Annette a nadakamat itay a mangay-aywan iti masakit a nanangna: “Adda dagiti kakabsat nga umay iti balay tapno sublatandak nga agbantay, wenno mangitugotda iti makan. Gapu iti dayta, mariknak nga ipatpategdak ken pasetak ti kongregasion.” Adda met dagiti tumultulong ken Jordan. Adda kabsat a nangisuro kenkuana no kasano a mantenerenna ti luganna. Imbaga ni Jordan: “Makaparagsak a maammuan a maseknan kaniak dagiti kakabsat ket kayatda a natalgedak no agmanehoak.”

19. Ania pay a pamay-an a matulongan dagiti panglakayen dagiti kakabsat a babbai?

¹⁹ Ikagkagumaan met dagiti panglakayen nga ipaay ti kasapulan dagiti kakabsat a babbai. Ammoda a napateg ken Jehova no kasano ti pannakatrato dagita a kakabsat. (Sant. 1:27) Tultuladenda ngarud ti kinanainkalintegan ni Jesus. Ammoda a nasaysayaat ti agbalin a naimbag ken mannakaawat imbes a mangaramidda kadagiti paglintegan. (Mat. 15:22-28) No ikagumaan dagiti panglakayen ti tumulong, iparpariknada kadagita a kakabsat ti dungngo ni Jehova ken ti organisasionna. Idi umakar ni Kia iti sabali a balay, naammuan dayta ti manangaywan iti grupoda. Dagus nga inyurnosna a matulongan ni Kia. “Naksayan unay ti stress-ko,” imbaga ni Kia. “Gapu iti pammaregta ken praktikal a tulong dagiti panglakayen, nalawag nga impakitada a napategak a paset ti kongregasion ken saanak nga agmaymaysa no adda problemak.”

20-21. Kasanotayo a maipakita nga ipatpategtayo ti amin a Kristiano a babbai?

²⁰ No kitaentayo dagiti kongregasion ita, adu ti nagsasayaat nga ulidan dagiti nagagaget a Kristiano a babbai a maikari iti suportatayo. Kas inyulidan ni Jesus, matulongantayo ida no kalangen ken am-ammuentayo ida. Mabalintayo nga ipakita nga ap-apresiarentayo ti maar-aramidanda iti panagserbida iti Dios ken idepensatayo ida no kasapulan.

²¹ Iti ngudo ti surat ni apostol Pablo kadagiti taga-Roma, espesipiko a dinakamatna ti siam a Kristiano a babbai. (Roma 16:1, 3, 6, 12, 13, 15) Naparegtada la ketdi idi nangngegda ti pakomusta ken komendasionna. Suportarantayo met koma ti amin a kakabsat a babbai iti kongregasiontayo. Iti kasta, ipakpakitatayo nga ipatpategtayo ida kas paset ti naespirituan a pamiliatayo.