DISOLO YA KULONGUKA 39
Pesa Bampangi-Bankento Kikesa
“Bankento yina ke samunaka nsangu ya mbote kele kimvuka ya nene ya basoda.”—NK. 68:11.
NKUNGA 137 Bankento ya Kwikama, Bampangi-Bankento
MAMBU YINA DISOLO YAI KE TUBILA *
Bampangi-bankento ya kikesa ya ke salaka mingi me vukana na balukutakanu, ke samuna, ke pesaka maboko na bisalu ya kuyidika Nzo ya Kimfumu mpi ke tudila Bakristu ya nkaka dikebi (Tala paragrafe 1)
1. Inki lusadisu bampangi-bankento ke pesaka na dibundu ya Yehowa mpi mingi na kati na bo ke kutanaka ti nki bampasi? (Tala kifwanisu ya lutiti ya zulu.)
BETO kele na kiese ya kuvanda ti bampangi mingi ya bankento yina ke salaka ngolo na dibundu ya Yehowa. Mu mbandu, bo ke kwendaka na balukutakanu mpi ke samunaka. Bankaka ke pesaka maboko na bisalu ya kuyidika Banzo ya Kimfumu mpi ke tudilaka bampangi mingi dikebi. Ya kieleka, bo ke kutanaka mpi ti mambu mingi ya mpasi. Bankaka ke sadisaka bibuti na bo yina me kumaka minunu. Bankaka diaka ke kutanaka ti mbangika ya bantu ya mabuta na bo. Bankaka ke salaka ngolo sambu na kusansa bana na bo, bo mosi.
2. Sambu na nki beto fwete pesa bampangi-bankento kikesa?
2 Sambu na nki beto fwete pesa bampangi-bankento kikesa? Sambu bantu ya nsi-ntoto yai ke pesaka ve bankento luzitu ya me fwana. Diaka, Biblia ke siamisa beto na kusadisa bo. Mu mbandu ntumwa Polo songaka bampangi ya dibundu ya Roma na kuyamba Febe mpi na ‘kupesa yandi konso lusadisu yina yandi lenda vanda na yo mfunu.’ (Bar. 16:1, 2) Ntangu Polo vandaka Mufarize, ntembe kele ve nde yandi vandaka na kati ya bantu yina vandaka kuyindula nde bankento kele ve mfunu. Kansi ntangu yandi kumaka Mukristu, yandi landaka mbandu ya Yezu mpi kumaka kuzitisa bankento mpi kusadila bo mambu na mawete.—1 Bak. 11:1.
3. Inki mutindu Yezu vandaka kusadila bankento mambu mpi nki mutindu yandi vandaka kutadila bankento yina vandaka kusala luzolo ya Nzambi?
3 Yezu vandaka kusadila bankento yonso mambu na luzitu. (Yoa. 4:27) Yandi vandaka ve kusadila bankento mambu bonso bamfumu ya mabundu ya Bayuda. Nkutu, mukanda mosi ke tuba nde: “Yezu tubaka ve ata fioti kima mosi sambu na kukonda bankento luzitu mpi kumona bo bantu-mpamba.” Kansi Yezu vandaka kuzitisa mingi kibeni bankento yina vandaka kusala luzolo ya Tata na yandi. Nkutu yandi vandaka kubakisa nde bo kele bampangi mpi yandi tangaka bazina na bo mpi ya babakala ya nkaka yina vandaka na dibuta na yandi ya kimpeve.—Mat. 12:50.
4. Inki beto ta tubila na disolo yai?
4 Yezu vandaka ntangu yonso ya kuyilama na kusadisa bampangi-bankento. Yandi vandaka kumonisa bo nde bo kele mfunu mingi sambu na yandi mpi yandi vandaka kukotila bo. Beto tubila ntangu yai mutindu beto lenda landa mbandu ya Yezu ya kumona nde bampangi-bankento kele mfunu.
BAMPANGI-BANKENTO KELE MFUNU MINGI
5. Sambu na nki yo lenda vanda mpasi sambu bampangi-bankento kuvanda ti banduku ya mbote?
5 Beto yonso ke zolaka kuvanda ti banduku ya mbote. Kansi bantangu ya nkaka, yo lenda vanda mpasi sambu bampangi-bankento kuzwa banduku ya mbote. Sambu na nki? Beto tala mambu bampangi-bankento ke tuba. Mpangi-nkento Jordan * ke tuba nde: “Sambu mono me kwelaka ve, mbala mingi mono ke yindulaka nde mono kele ve mfunu na dibundu mpi mono me fwana ve na kuvanda na dibundu.” Mpangi-nkento Kristen kele mupasudi-nzila mpi yandi me kwendaka na nsi ya nkaka sambu na kusamuna mingi. Yandi ke tuba nde: “Kana nge kele muntu ya mpa na dibundu mosi, nge lenda kudiwa nge mosi.” Bampangi ya nkaka mpi ya babakala lenda kudiwa mpi mutindu yina. Bampangi-bankento yina ke zingaka na mabuta yina kele ve Bambangi ya Yehowa lenda kudiwa bo mosi na mabuta na bo, bo lenda kudiwa diaka bo mosi na dibundu. Bampangi ya nkaka ya bankento lenda kudiwa bo mosi sambu bo ke belaka mpi bo lenda basika ve na nganda to sambu bo ke sansaka bantu ya mabuta na bo yina ke belaka. Mpangi Annette ke tuba nde: “Mono vandaka kukuka ve kulutisa ntangu ti bampangi ya nkaka sambu mono vandaka kusansa mama na mono, mono mosi.”
Bonso Yezu, beto monisa bampangi-bankento ya kwikama nde beto ke zolaka bo mpi ke tudilaka bo dikebi (Tala baparagrafe 6-9) *
6. Mutindu Luka 10:38-42 ke monisa yo, nki mutindu Yezu sadisaka Maria mpi Marta?
6 Yezu vandaka kulutisa ntangu ti bampangi-bankento mpi yandi vandaka nduku na bo ya mbote. Beto tubila kinduku na yandi ti Maria mpi Marta. Yo ke monana nde bankento yai vandaka bampumpa. (Tanga Luka 10:38-42.) Yezu vandaka kusala nde bo kudiwa mbote na mambu yina yandi vandaka kutuba mpi yina yandi vandaka kusala. Maria waka mbote na kuvanda na makulu ya Yezu bonso longoki. * Marta kudiyangisaka sambu Maria vandaka ve kusadisa yandi mpi yandi songaka Yezu kukonda mpasi mambu yina yandi vandaka kuyindula. Na dibaku yai, Yezu longaka bankento yai mambu ya mfunu. Yezu monisaka nde yandi vandaka kutudila bankento yai dikebi mpi Lazare, mpangi na bo ya bakala, ntangu yandi vandaka kutala bo mbala na mbala. (Yoa. 12:1-3) Yo yina ntangu Lazare belaka ngolo, Maria ti Marta zabaka nde bo lenda lomba Yezu lusadisu kukonda mpasi.—Yoa. 11:3, 5.
7. Inki mutindu beto lenda pesa bampangi-bankento kikesa?
7 Sambu na bampangi-bankento ya nkaka, balukutakanu kele mabaku ya mbote ya kukutana ti bampangi-Bakristu. Yo yina beto fwete sadila mabaku yai sambu na kuyamba bo, kusolula ti bo mpi kumonisa bo nde beto ke tudilaka bo dikebi. Mpangi-nkento Jordan yina beto me tubila ke tuba: “Mono ke bakaka kikesa mingi kana bampangi ya nkaka ke sikisa mono sambu na bamvutu yina mono ke pesaka na lukutakanu, kana bo ke samuna ti mono to kana bo ke monisa mono nde bo ke tudilaka mono dikebi.” Beto fwete monisa bampangi na beto ya bankento nde bo kele mfunu. Mpangi-nkento Kia ke tuba nde: “Kana mono me kwenda ve na lukutakanu, mono ke zabaka nde bampangi ta sonikila mono sambu na kuzaba kana mono kele mbote. Yo ke sadisaka mono na kuzaba nde bampangi ke tudilaka mono dikebi.”
8. Inki mutindu beto lenda landa diaka mbandu ya Yezu?
8 Bonso Yezu, beto fwete sala bikesa sambu na kulutisa ntangu ti bampangi-bankento. Beto lenda bingisa bo na nzo sambu na kudia to kulutisa ntangu ti bo. Na mabaku ya mutindu yai, beto fwete tuba mambu yina ta pesa bo kikesa. (Bar. 1:11, 12) Bankuluntu fwete vanda ti bikalulu bonso ya Yezu. Yandi zabaka nde kukonda kukwela lenda vanda mpasi sambu na bantu ya nkaka kansi yandi monisaka pwelele nde bantu ke zwaka ve kiese ya kieleka sambu bo me kwela to sambu bo kele ti bana. (Luka 11:27, 28) Bantu ke zwaka kiese ya kieleka kana bo ke tula kisalu ya Yehowa na kisika ya ntete.—Mat. 19:12.
9. Inki bankuluntu fwete sala sambu na kusadisa bampangi-bankento?
9 Mingi-mingi bankuluntu fwete sadila Bakristu ya bankento mambu bonso bampangi na bo ya bankento mpi bamama na bo ya kimpeve. (1 Tim. 5:1, 2) Bankuluntu fwete baka ntangu ya kusolula ti bampangi-bankento na ntwala to na nima ya balukutakanu. Mpangi-nkento Kristen ke tuba nde: “Ntangu nkuluntu mosi bakisaka nde mono vandaka ti bisalu mingi mpi sosaka kuzaba mutindu mono me yidikaka mambu, mono sepelaka mingi mutindu yandi tudilaka mono dikebi ya masonga.” Kana bankuluntu ke solula ti bampangi-bankento mbala na mbala, yo ta monisa nde bo ke tudilaka bo dikebi. * Mpangi Annette yina beto me tubila ke monisa mambote yina yandi bakaka sambu yandi vandaka kusolula mbala na mbala ti bankuluntu. Yandi ke tuba nde: “Mono zabaka bo mbote mpi bo zabaka mono. Yo yina, kana mono me kutana ti diambu ya mpasi, mono vandaka kusolula ti bo kukonda mpasi sambu bo sadisa mono.”
BETO MONISILA BAMPANGI-BANKENTO NTONDA
10. Inki lenda pesa bampangi-bankento kiese?
10 Beto yonso ke sepelaka ntangu bantu ya nkaka ke ndimaka makuki yina beto kele na yo mpi ke sikisaka beto sambu na kisalu yina beto ke sala. Kansi, kana ata muntu mosi ve ke sikisa beto sambu na mambu ya mbote yina beto me sala, yo ke lembisaka beto nitu. Mpangi Abigail yina kele mupasudi-nzila mpi me kwelaka ve ke monisa nde bantangu ya nkaka yandi ke yindulaka nde bantu ke zabaka yandi ve. Yandi ke tuba nde: “Bantu ke zabaka kaka bampangi na mono mpi bibuti na mono. Bantangu ya nkaka mono ke yindulaka nde bo ke monaka mono ve.” Beto tala mambu yina mpangi-nkento Pam ke tuba. Ntangu yandi vandaka mpumpa, yandi salaka bamvula mingi na kisalu ya kimisionere. Nsuka-nsuka yandi yambulaka sambu na kusansa bibuti na yandi. Bubu yai yandi kele ti bamvula 70 kansi yandi kele kaka mupasudi-nzila. Yandi ke tuba nde: “Mono vandaka kuwa kiese mingi ntangu bantu ya nkaka vandaka kusikisa mono sambu na kisalu mono.”
11. Inki mutindu Yezu monisaka nde yandi sepelaka mutindu bankento sadisaka yandi na kisalu ya kusamuna?
11 Yezu sepelaka na lusadisu yina yandi bakaka na bankento ya kwikama yina sadilaka “bima na bo” sambu na kusadisa yandi na kisalu ya kusamuna. (Luka 8:1-3) Yandi pesaka bo dibaku ya kusala ti yandi mpi yandi longaka bo bakieleka ya mudindu. Mu mbandu, yandi songaka bo nde yandi ta fwa mpi na nima yandi ta futumuka. (Luka 24:5-8) Yandi sadisaka bankento yai mutindu yandi sadisaka bantumwa sambu na bampasi yina bo zolaka kukutana ti yo. (Mar. 9:30-32; 10:32-34) Ata bantumwa tinaka ntangu bo kangaka Yezu, bankento ya nkaka sadisaka yandi mpi bo vandaka na lweka ya Yezu ntangu yandi vandaka kufwa na nti ya mpasi.—Mat. 26:56; Mar. 15:40, 41.
12. Inki kisalu Yezu pesaka bankento?
12 Yezu pesaka bankento kisalu mosi ya mfunu. Mu mbandu, bankento ya kwikama vandaka bantu ya ntete yina monaka lufutumuku ya Yezu. Yandi songaka bo na kusonga bantumwa nde yandi me futumuka. (Mat. 28:5, 9, 10) Yo ke monana nde na Pantekoti ya mvu 33 ya ntangu na beto, bankento yina vandaka pana ntangu mpeve-santu kulumukaka na balongoki. Kana yo kele mutindu yina, bampangi-bankento yai ya bo tulaka mafuta bakaka mpi dikabu ya kutuba na bandinga ya nzenza mpi ya kusonga bantu ya nkaka “mambu ya nene ya Nzambi.”—Bis. 1:14; 2:2-4, 11.
13. Inki bampangi-bankento ke sala bubu yai mpi nki mutindu beto lenda monisa ntonda sambu na kisalu yina bo ke salaka?
13 Beto fwete sikisa bampangi na beto ya bankento sambu na mambu yonso yina bo ke salaka na kisalu ya Yehowa. Mu mbandu, bo ke pesaka maboko na kisalu ya kutunga mpi ya kuyidika Banzo ya Kimfumu, bo ke pesaka maboko na bimvuka yina ke salaka balukutakanu na ndinga ya nzenza mpi bo ke salaka na Babetele. Bo ke pesaka maboko na kisalu ya kusadisa bampangi yina me bwila mpasi, bo ke balulaka mikanda, bankaka kele bapasudi-nzila mpi bankaka diaka kele bamisionere. Bonso bampangi-babakala, bampangi-bankento ke kotaka Nzo-Nkanda ya Bapasudi-Nzila, Nzo-Nkanda ya Bansamuni ya Kimfumu mpi Nzo-Nkanda ya Gileadi. Diaka, bayina me kwelaka ke sadisaka babakala na bo na kulungisa mikumba ya nene yina bo kele na yo na dibundu mpi na organizasio. Bampangi yai ya babakala ta kuka ve kusala mbote kisalu na bo ya ‘makabu ya bantu’ kana bankento na bo ke sadisa bo ve. (Baef. 4:8) Keti nge lenda yindula mutindu yina nge lenda sadisa bampangi-bankento na kisalu yina bo ke salaka?
14. Mutindu Nkunga 68:11 ke monisa yo, bankuluntu ya mayele ke salaka nki?
14 Bankuluntu ya mayele ke bakisaka nde bampangi-bankento kele “kimvuka ya nene ya basoda” yina ke salaka na luzolo yonso mpi mbala mingi bo ke longaka mbote nsangu ya mbote. (Tanga Nkunga 68:11.) Yo yina bankuluntu, beno longuka mambu mingi na bampangi-bankento. Mpangi Abigail yina beto tubilaka na luyantiku ke sepelaka ntangu bampangi ke yulaka yandi sambu na kuzaba mutindu ya mbote ya kusolula ti bantu na kisalu ya kusamuna. Yandi ke tuba nde: “Yo ke sadisaka mono na kubakisa nde mono kele mfunu na dibundu ya Yehowa.” Bankuluntu ke bakisaka diaka nde bampangi-bankento ya kwikama mpi bayina kele ya kuyela na kimpeve ke sadisaka mbote bampangi-bankento ya baleke ntangu bo ke kutanaka ti bampasi. (Tito 2:3-5) Ya kieleka, yo me fwana kibeni nde beto monisila bampangi-bankento ntonda!
KOTILA BAMPANGI-BANKENTO MPI SADISA BO
15. Inki ntangu bampangi-bankento lenda vanda na mfunu nde bampangi kukotila bo?
15 Bantangu ya nkaka bampangi-bankento lenda vanda na mfunu nde bampangi kukotila bo ntangu bo ke kutana ti diambu mosi ya mpasi. (Yez. 1:17) Mu mbandu, mpangi-nkento ya mufwidi to yina makwela me fwaka lenda vanda na mfunu nde muntu mosi kukotila yandi mpi kusadisa yandi na kusala mambu ya nkaka yina bakala na yandi vandaka kusala. Mpangi-nkento ya mununu lenda vanda na mfunu nde muntu mosi kusadisa yandi na kusolula ti minganga. To mpangi-nkento mosi ya mupasudi-nzila yina ke salaka kisalu ya nkaka na dibundu ya Yehowa lenda vanda na mfunu nde mpangi mosi kukotila yandi kana bampangi ya nkaka ke bokutila yandi sambu yandi ke samuna ve mingi bonso bapasudi-nzila ya nkaka. Inki mutindu beto lenda sadisa diaka bampangi-bankento? Beto tadila diaka mbandu ya Yezu.
16. Mutindu Marko 14:3-9 ke monisa yo, nki mutindu Yezu kotilaka Maria?
16 Yezu vandaka kukotila nswalu bampangi-bankento kana bantu me bakisa bo ve. Mu mbandu, yandi kotilaka Maria ntangu Marta bokutilaka yandi. (Luka 10:38-42) Yandi kotilaka diaka Maria ntangu bantu ya nkaka yindulaka nde yandi me sala diambu ya mbi. (Tanga Marko 14:3-9.) Yezu bakisaka bangindu ya Maria mpi sikisaka yandi nde: “Yandi me sala diambu mosi ya mbote sambu na mono. . . . Yandi me sala yina yandi lendaka kusala.” Nkutu yandi tubaka nde “na bisika yonso yina bo ta samuna nsangu ya mbote na nsi-ntoto ya mvimba,” bo ta tubila mpi diambu ya mbote yina Maria salaka. Ya kieleka, beto ke tubila yo mpi na disolo yai. Diambu ya ke benda dikebi kele nde ntangu Yezu vandaka kusikisa Maria sambu na diambu ya mbote yina yandi salaka, yandi tubaka nde bo ta longa nsangu ya mbote na ntoto ya mvimba. Mambu yina Yezu tubaka pesaka Maria kikesa kibeni sambu bo tubilaka yandi mambu ya mbi.
17. Pesa mbandu mosi yina ke monisa ntangu yina beto lenda kotila mpangi-nkento mosi.
17 Keti nge ke kotilaka mpi bampangi-bankento ntangu bo ke vandaka na mfunu nde muntu kukotila bo? Mu mbandu, beto tala diambu yai. Yindula nde bansamuni ya nkaka ke mona mpangi-nkento yina bakala na yandi kele ve Mbangi ya Yehowa ke kwisa mbala mingi na retare na balukutakanu mpi ke vutukaka nswalu na nzo kana lukutakanu me mana. Mbala mingi, yandi ke nataka ve bana na yandi na balukutakanu. Bo ke kudiyula nde sambu na nki yandi ke lombaka ve bakala na yandi nswa sambu na kunata bana na yandi na balukutakanu. Kansi bampangi yai ke zaba ve nde mpangi-nkento yina ke salaka bikesa mingi, yandi ve muntu ke yidikaka manaka mpi yandi ve muntu ke bakaka lukanu ya nsuka sambu na bana na yandi. Inki nge lenda sala? Kana nge sikisa mpangi-nkento yai mpi nge monisa bampangi ya nkaka mambu ya mbote yina yandi ke salaka, nge lenda sadisa bo na kutuba ve mambu ya mbi sambu na mpangi yai.
18. Inki mutindu beto lenda sadisa diaka bampangi na beto ya bankento?
18 Beto lenda monisa nde beto ke zolaka mingi bampangi na beto ya bankento ntangu beto ke pesa bo lusadisu yina bo kele na yo mfunu. (1 Yoa. 3:18) Mpangi Annette yina ke sansaka mama na yandi yina ke belaka ke tuba nde: “Banduku ya nkaka ke kwisaka kusadisa mama mpi yo ke sadisaka mono na kusala bisalu ya nkaka to bo ke nataka madia. Yo ke sadisaka mono na kubakisa nde bo ke zolaka mono mpi nde mono kele mfunu na dibundu.” Bampangi ke sadisaka mpi mpangi-nkento Jordan. Mpangi-bakala mosi ke sadisaka yandi na kuyidika kamio na yandi. Yandi ke tuba nde: “Mono ke waka kiese mutindu bampangi ke tudilaka mono dikebi mpi ke zolaka nde mono vanda na lutaninu ntangu mono ke pusa kamio.”
19. Inki mutindu bankuluntu lenda sadisa diaka bampangi-bankento?
19 Bankuluntu mpi ke salaka yonso sambu na kusadisa bampangi-bankento. Bo ke zabaka nde Yehowa ke zolaka nde bo sadila bampangi-bankento mambu na mutindu ya mbote. (Yak. 1:27) Yo yina bo ke landaka mbandu ya Yezu mpi ke vandaka ve makambu ngolo. Bo ke tulaka ve bansiku ntangu yo me fwana nde bo bakisa mambu mpi bo monisa ntima-mbote. (Mat. 15:22-28) Ntangu bankuluntu ke salaka bikesa sambu na kusadisa bampangi-bankento, bo ke monisaka bampangi-bankento nde Yehowa mpi organizasio na yandi ke zolaka bo mingi. Ntangu nkengi ya kimvuka ya kisalu ya kusamuna ya mpangi Kia waka nde yandi ke kwenda kukota na nzo ya nkaka, na mbala mosi nkuluntu yina yidikaka mambu sambu na kusadisa mpangi Kia. Mpangi Kia ke tuba nde: “Yo sadisaka mono mingi kibeni mpi mono vandaka diaka ve ti basusi mingi. Mambu yina bankuluntu tubaka mpi lusadisu yina bo pesaka mono, ndimisaka mono nde mono kele mfunu na dibundu ya Yehowa mpi mono kele ve mono mosi na bantangu ya mpasi.”
BETO FWETE SADISA BAMPANGI-BANKENTO YONSO NA DIBUNDU
20-21. Inki mutindu beto ta monisa nde beto ke zolaka bampangi yonso ya bankento na dibundu?
20 Bubu yai na mabundu na beto, kele ti bampangi-bankento yina ke salaka ngolo mpi yina kele ti mfunu ya lusadisu na beto. Mutindu beto me longuka yo na mbandu ya Yezu, beto lenda sadisa bo kana beto ke lutisa ntangu ti bo mpi ke zaba bo mbote. Beto lenda monisila bo ntonda sambu na mambu yonso yina bo ke salaka na kisalu ya Yehowa. Beto lenda kotila bo mpi kana mpila kele.
21 Na nsuka ya mukanda yina ntumwa Polo sonikilaka Bakristu ya Roma, yandi tubilaka mingi-mingi Bakristu ya bankento nana. (Bar. 16:1, 3, 6, 12, 13, 15) Ntembe kele ve nde Bakristu yina ya bankento bakaka kikesa ntangu bo waka mutindu Polo pesaka bo mbote mpi sikisaka bo. Beto mpi fwete pesa bampangi yonso ya bankento na dibundu kikesa. Kana beto sala mutindu yina, beto ta monisa nde beto ke zolaka bo mpi nde bo kele mfunu na dibuta na beto ya kimpeve.
NKUNGA 136 “Lufutu ya Kukuka” Yina Yehowa Ke Pesaka
^ par. 5 Bampangi-bankento ke kutanaka ti mambu mingi ya mpasi. Disolo yai ta tubila mutindu beto lenda pesa bampangi na beto ya bankento kikesa na mbandu ya Yezu. Beto ta baka malongi na mutindu Yezu vandaka kulutisa ntangu ti bankento, vandaka kumona mfunu na bo mpi kukotila bo.
^ par. 5 Beto me soba bazina ya nkaka.
^ par. 6 Mukanda mosi ke tuba nde: “Balongoki vandaka kuvanda na makulu ya balongi na bo. Bo vandaka kulonga mbote-mbote balongoki yina vandaka kudipesa sambu bo mpi kukuma balongi kansi bankento vandaka ve ti nswa yina. . . . Yo yina, Bayuda mingi ya babakala lendaka kumona mbi mutindu Maria vandaka na makulu ya Yezu mpi vandaka na mpusa ya ngolo nde Yezu kulonga yandi.”
^ par. 9 Bankuluntu fwete keba ntangu bo ke sadisa bampangi-bankento. Mu mbandu, nkuluntu mosi fwete kwenda ve kutala mpangi-nkento yandi mosi.
^ par. 65 NTENDULA YA BIFWANISU: Mpangi-bakala mosi ke landa mbandu ya Yezu ya kutudila bampangi-bankento ya kwikama dikebi. Yandi ke sadisa bampangi zole ya bankento na kusoba pine ya kamio na bo, mpangi ya nkaka me kwenda kutala mpangi-nkento yina kele ti kifu na nitu; mpangi ya nkaka diaka ti nkento na yandi me kwenda kusala lusambu ya dibuta ti mpangi-nkento mosi ti mwana na yandi ya nkento.
