39-زەرتتەۋ ماقالاسى
ٴماسىحشى ايەلدەرگە قولداۋ كورسەتىڭىز
«ىزگى حاباردى جاريالايتىن قىز-كەلىنشەكتەر قالىڭ قولدى قۇرايدى» (ٴزاب. 68:11).
137-ٵن ەحوباعا ادال ايەلدەر
اڭداتپا *
ٴبىزدىڭ قۇلشىنىستى ايەل باۋىرلاستارىمىز قولدارىنا تىنىم بەرمەي، قاۋىم كەزدەسۋىنە بارادى، قىزمەتكە شىعادى، پاتشالىق سارايىن كۇتىپ-ۇستاۋعا اتسالىسادى، وزگە باۋىرلاستارعا كوڭىل بولەدى (1-ابزاستى قاراڭىز)
1. ايەل باۋىرلاستار ۇيىمعا قانداي قولداۋ كورسەتىپ ٴجۇر جانە ولار قانداي قيىندىقتارعا كەزىگەدى؟ (مۇقاباداعى سۋرەتتى قاراڭىز.)
ٴبىز قاۋىمدا كوپتەگەن ەڭبەكقور ايەل باۋىرلاستارىمىزدىڭ بارىنا قۋانامىز! مىسالى، ولار قاۋىم كەزدەسۋلەرىنە قاتىسادى، ۋاعىز ىسىنە اتسالىسادى، كەيبىرى پاتشالىق سارايىن كۇتىپ ۇستاۋعا ۇلەس قوسسا، وزگەلەرى باۋىرلاستارعا كوڭىل بولەدى. ارينە، ولاردىڭ قيىندىقتارى جوق ەمەس. مىسالى، ولاردىڭ كەيبىرى قارت اتا-اناسىنا قارايدى، وزگەلەرى وتباسىنان قۋعىن كورىپ ٴجۇر. ال تاعى بىرەۋلەرى جالعىزباستى انا، ولار بالالارىن اسىراۋ ٷشىن اۋىر ەڭبەك ەتەدى.
2. نەگە ٴبىز ايەلدەرگە قولداۋ كورسەتۋىمىز كەرەك؟
2 نەگە ٴبىز ايەل باۋىرلاستارعا قولداۋ كورسەتۋىمىز كەرەك؟ ويتكەنى بۇل دۇنيەدە ايەلدەرگە وزدەرىنە تيەسىلى قۇرمەت كورسەتىلمەيدى. سونداي-اق كيەلى كىتاپ تا ٴبىزدى ولارعا قولداۋ كورسەتۋگە تالپىندىرادى. مىسالى، ەلشى پاۋىل ريمدەگى باۋىرلاستاردى فوبەنى جىلى قارسى الىپ، «قانداي كومەك قاجەت بولسا دا، جاردەمدەسۋگە» تالپىندىرعان (ريم. 16:1، 2). كەزىندە پاۋىل پارىزشىلداردىڭ ٴبىرى بولعان. ال پارىزشىلدار ايەلدەردى تومەن سانايتىن. ٴبىراق پاۋىل ٴماسىحشى بولعاننان كەيىن، يسا سياقتى، ايەلدەرگە قۇرمەتپەن جانە مەيىرىممەن قارايتىن بولدى (قور. 1-ح. 11:1).
3. يسانىڭ ايەلدەرگە دەگەن كوزقاراسى قانداي بولدى جانە ول قۇدايدىڭ ەركىن ورىندايتىن ايەلدەرگە قالاي قارادى؟
3 يسا بارلىق ايەلدەرگە قۇرمەت تانىتقان (جوح. 4:27). ول ايەلدەرگە ٶز زامانىنداعى ٴدىني جەتەكشىلەر سياقتى قاراماعان. كيەلى كىتاپ تۋرالى ٴبىر ەڭبەكتە بىلاي دەلىنگەن: «يسا ايەلدەردىڭ قادىرىن تۇسىرەتىن بىردە-ٴبىر ٴسوز ايتپاعان». يسا اسىرەسە اكەسىنىڭ ەركىن ورىندايتىن ايەلدەرگە ەرەكشە قۇرمەت تانىتقان. ول سول ايەلدەردى اپكە-قارىنداستارىم دەپ اتادى، وسىلاي ول ەرلەرمەن قوسا، ايەلدەردى دە رۋحاني وتباسىنىڭ مۇشەسى دەپ قاراستىراتىنىن كورسەتتى (مات. 12:50).
4. بۇل ماقالادا ٴبىز نە قاراستىرامىز؟
4 يسا ٵردايىم رۋحاني اپكە-قارىنداستارىنا كومەكتەسۋگە دايىن بولعان. يسا ولارعا ۋاقىت بولگەن، ولاردى باعالاعان، قورعاعان. قازىر يساعا قالاي ەلىكتەي الاتىنىمىزدى كورەيىك.
باعالى ايەل باۋىرلاستارىمىزعا ۋاقىت ٴبولىڭىز
5. نەگە كەيبىر ايەل باۋىرلاستارعا وزگە باۋىرلاستارمەن ارالاسۋ قيىنعا سوعادى؟
5 ايەل نە ەر بولايىق — بارلىعىمىز وزگەلەرمەن ارالاسۋعا مۇقتاجبىز. ٴبىراق كەيدە كەيبىر ايەل باۋىرلاستارىمىز بۇل مۇقتاجدىقتارىن قاناعاتتاندىرا الماي جاتادى. نەلىكتەن؟ كەيبىر باۋىرلاستاردىڭ ايتقان سوزدەرىنە دەن قويايىق. دجوردان * ەسىمدى قىز باۋىرلاس بىلاي دەيدى: «سالتباستى بولعاندىقتان، قاۋىمدا كىممەن ارالاساتىنىمدى بىلمەي قالامىن. كەيدە قاۋىمعا تۇك پايدام جوق سياقتى كورىنەدى». قىزمەت اياسىن كەڭەيتىپ، باسقا جەرگە كوشىپ بارعان كريستەن ەسىمدى ٸزاشار بولسا: «قاۋىمعا جاڭادان كەلگەن كەزدە، كەيدە ٶزىڭدى جالعىز سەزىنەسىڭ»،— دەيدى. وتباسى كۋاگەر ەمەس باۋىرلاستارعا ۇيىندەگىلەرمەن جاقىن ارالاسۋ قيىن بولۋى مۇمكىن، قاۋىمدا دا ولار وزدەرىن شەت قالعانداي سەزىنىپ جاتادى. كەيبىر باۋىرلاستار وزدەرى اۋىراتىندىقتان نەمەسە ناۋقاس تۋىسىنا قارايتىندىقتان، ۇيلەرىنەن شىعا المايدى، سوندىقتان ولار وزدەرىن جالعىز سەزىنۋى مۇمكىن. اننەت بىلاي دەيدى: «كوبىنەسە اناما مەن قارايتىندىقتان، باۋىرلاستار وتىرىستارعا شاقىرعاندا بارا المايتىنمىن».
يساعا ەلىكتەپ، ايەل باۋىرلاستاردىڭ قامىن ويلايىق (6—9 ابزاستاردى قاراڭىز) *
6. لۇقا 10:38—42 تارماقتاردان كورىنەتىندەي، يسا مارتا مەن ٴماريامعا قالاي كومەكتەستى؟
6 يسا ٶزىنىڭ رۋحاني اپكە-قارىنداستارىمەن ۋاقىت وتكىزدى. ول ولار ٷشىن ناعىز دوس بولا ٴبىلدى. قازىر ونىڭ مارياممەن جانە مارتامەن قالاي دوس بولعانىن كورەيىك. بۇل ەكى ايەل دە سالتباستى بولعان بولسا كەرەك (لۇقا 10:38—42 وقىڭىز). يسا سوزىمەن دە، ىسىمەن دە ولار وزدەرىن ەركىن سەزىنەتىندەي جاعداي جاسادى. مىسالى، ٴماريام يسانىڭ شاكىرتى سياقتى ونىڭ اياق جاعىندا وتىرۋعا قىسىلماعان *. ٴماريامنىڭ وزىنە كومەكتەسپەگەنىنە نارازى بولعان مارتا دا يساعا ٶز ويىن اشىق ايتا العان. وسىنداي جايلى جاعداي جاساعانىنىڭ ارقاسىندا يسا ولارعا كومەكتەسە الدى. سونداي-اق يسا ٴماريام مەن مارتانى جانە ولاردىڭ باۋىرى ەلازاردى كورۋگە بارىپ تۇراتىن، وسىلايشا ولار ٷشىن قام جەيتىنىن كورسەتەتىن (جوح. 12:1—3). ەلازار قاتتى سىرقاتتانىپ قالعاندا، ٴماريام مەن مارتانىڭ يسادان ەركىن كومەك سۇراعانى ەش تاڭعالدىرمايدى (جوح. 11:3، 5).
7. ايەل باۋىرلاستارىمىزدى جىگەرلەندىرۋدىڭ ٴبىر جولى قانداي؟
7 كەيبىر ايەل باۋىرلاستارىمىز وزگە باۋىرلاستارمەن كوبىنەسە تەك قاۋىمدا ارالاسا الادى. سوندىقتان وسى مۇمكىندىكتى پايدالانىپ، ولاردى قۇشاق جايا قارسى الايىق. ولارمەن سويلەسىپ، ولار ٷشىن قام جەيتىنىمىزدى كورسەتەيىك. جوعارىدا ايتىلعان دجوردان بىلاي دەيدى: «باۋىرلاستار تۇسىنىكتەمەلەرىم ٷشىن مەنى ماقتاعاندا، مەنىمەن قىزمەتكە جازىلعاندا نە باسقالاي كوڭىل بولۋگە تىرىسقاندا، قاتتى جىگەرلەنىپ قالامىن». ٴبىز ايەل باۋىرلاستاردى باعالايتىنىمىزدى كورسەتۋىمىز كەرەك. كيا بىلاي دەيدى: «جينالىسقا بارا الماي قالعانىمدا، باۋىرلاستار جاعدايىمدى سۇراپ حابارلاساتىنىن بىلەمىن. سونداي كەزدە باۋىرلاستار مەن ٷشىن ۋايىمدايتىنىن كورەمىن».
8. ٴبىز تاعى قانداي جولدارمەن يساعا ەلىكتەي الامىز؟
8 يسا سياقتى، ٴبىز دە ايەل باۋىرلاستارمەن ارالاسۋعا ۋاقىت ٴبولۋىمىز قاجەت. مىسالى، ولاردى قاراپايىم اسقا نەمەسە دەمالىسقا شاقىرساق بولادى. وسىلاي باس قوسقان كەزدەرى اڭگىمەمىز سەرگىتەرلىكتەي بولۋ كەرەك (ريم. 1:11، 12). يسا سالتباستى بولۋدىڭ كەيبىرەۋلەر ٷشىن قيىن ەكەنىن بىلگەن، ٴبىراق ول ۇيلەنۋ مەن بالالى بولۋ باقىتتى بولۋدىڭ كىلتى ەمەس ەكەنىن انىق ايتقان (لۇقا 11:27، 28). ەحوباعا قىزمەت ەتۋدى ەڭ باستى ورىنعا قويۋ ادامدى ناعىز باقىتقا جەتكىزەدى (مات. 19:12). اقساقالداردىڭ دا يسانىكىندەي كوزقاراس تانىتقاندارى دۇرىس.
9. اقساقالدار ايەل باۋىرلاستارعا قالاي كومەكتەسسە بولادى؟
9 اسىرەسە اقساقالدار ٴماسىحشى ايەلدەرگە اپكە-قارىنداستارىنا نە انالارىنا قاراعانداي قاراۋلارى كەرەك (ٴتىم. 1-ح. 5:1، 2). ولار قاۋىم كەزدەسۋىنە دەيىنگى نە كەيىنگى ۋاقىتتى پايدالانىپ، ايەل باۋىرلاستارعا كوڭىل بولسە بولادى. «جۇمىسىم مەن ىزاشارلىق قىزمەتىمدى بىرگە الىپ جۇرگەنىمدى بايقاعان ٴبىر اقساقال ماعان كەلىپ، كۇن ٴتارتىبىم جايلى سۇرادى. ونىڭ مەنى ويلاپ جاتقانىنا ريزا بولىپ قالدىم»،— دەيدى كريستەن. اقساقالدار رۋحاني اپكە-قارىنداستارىمەن سويلەسۋگە جۇيەلى تۇردە ۋاقىت بولۋىمەن ولاردىڭ قامىن ويلايتىنىن كورسەتەدى *. اننەت باۋىرلاس اقساقالدارمەن جۇيەلى تۇردە سويلەسىپ تۇرۋدىڭ پايداسىن ايتىپ، بىلاي دەدى: «مەن ولاردى، ولار مەنى جاقسى تانيدى. سونىڭ ارقاسىندا قانداي دا ٴبىر قيىندىققا كەزىككەندە، ولاردان تارتىنباي كومەك سۇراي الامىن».
ايەل باۋىرلاستاردى باعالاڭىز
10. ايەل باۋىرلاستار جايناپ-جادىراپ ٴجۇرۋ ٷشىن نە ىستەي الامىز؟
10 ەر بولايىق، ايەل بولايىق — ٴبارىمىز دە وزگەلەر قابىلەتتەرىمىزدى بايقاپ، ىستەگەن ىستەرىمىزدى باعالايتىندارىن ايتقاندا، جايناپ سالا بەرەمىز. ال، كەرىسىنشە، قابىلەتىمىز بەن ىستەگەن ىستەرىمىزدى باعالاماي جاتسا، كوڭىلىمىز تۇسەدى. ابيگەيل ەسىمدى سالتباستى تۇراقتى ٸزاشار كەيدە ٶزىن شەت قالعانداي سەزىنەتىنىن ايتىپ، بىلاي دەدى: «وزگەلەر مەنى «پالەنشەنىڭ اپكەسى»، «تۇگەنشەنىڭ قىزى» دەپ اتايدى. كەيدە مەنى ەشكىم كوزگە ىلمەيتىندەي كورىنەدى». ال ەندى پام ەسىمدى سالتباستى ايەل باۋىرلاستىڭ جاعدايىن الايىق. ول ۇزاق جىلدار بويى ميسسيونەر بولىپ قىزمەت ەتكەن. ٴبىراق كەيىن اتا-اناسىنا قاراۋ ٷشىن ۇيىنە ورالدى. ول جەتپىستە بولسا دا، ٵلى ٸزاشار بولىپ قىزمەت ەتىپ ٴجۇر. پام باۋىرلاس: «ماعان بارىنەن بۇرىن باسقالاردىڭ مەنى باعالايتىندارىن ايتىپ تۇرعانى كۇش بەردى»،— دەيدى.
11. يسا قىزمەتىنە قولعابىس بولعان ايەلدەردى باعالايتىنىن قالاي كورسەتتى؟
11 يسا «قولدا بارلارىمەن» وزىنە قىزمەت ەتىپ جۇرگەن ادال ايەلدەردى قاتتى باعالاعان (لۇقا 8:1—3). يسا وزىنە قىزمەت كورسەتۋگە مۇمكىندىك بەرىپ، بۇل ايەلدەردى زور قۇرمەتكە بولەدى. ٴبىراق ول مۇنىمەن قوسا، ولارعا تەرەڭ شىندىقتاردى اشتى. مىسالى، يسا ولارعا ٶزىنىڭ ٶلىپ، قايتا تىرىلەتىنى جايلى ايتتى (لۇقا 24:5—8). وسىلايشا ول ەلشىلەرىن الداعى قيىندىقتارعا دايىنداعانىنداي، بۇل ايەلدەردى دە دايىندادى (مار. 9:30—32؛ 10:32—34). يسا تۇتقىنعا الىنعاندا، ٴتىپتى ەلشىلەردىڭ وزدەرى ونى تاستاپ كەتكەن ەدى. ال كەيبىر ايەلدەر بولسا يسا ازاپ باعاناسىندا ٸلىنىپ تۇرعان كەزدە ونىڭ قاسىندا بولدى (مات. 26:56؛ مار. 15:40، 41).
12. يسا ايەلدەرگە قانداي ٸس سەنىپ تاپسىردى؟
12 يسا ايەلدەرگە ماڭىزدى ٸس سەنىپ تاپسىرعان. مىسالى، ونىڭ قايتا تىرىلگەنىن ٴبىرىنشى بولىپ ايەلدەر كورگەن. ول ٶزىنىڭ قايتا تىرىلگەنى جايلى ەلشىلەرگە ايتۋدى وسى ادال ايەلدەرگە تاپسىرعان (مات. 28:5، 9، 10). ب.ز. 33-جىلى ەلۋىنشى كۇن مەيرامىندا شاكىرتتەرگە كيەلى رۋح توگىلگەن كەزدە، ولاردىڭ اراسىندا ايەلدەر دە بولعان بولۋى مۇمكىن. ەگەر سولاي بولسا، سول ايەلدەر دە كەرەمەت تۇردە وزگە تىلدە سويلەۋ قابىلەتىنە يە بولىپ، وزگەلەرگە «قۇدايدىڭ عاجايىپ ىستەرى» جايلى ايتقان دەي الامىز (ەل. ٸس. 1:14؛ 2:2—4، 11).
13. بۇگىندە ٴماسىحشى ايەلدەر قانداي ىستەر اتقارىپ ٴجۇر جانە ولاردىڭ ەڭبەكتەرىن باعالايتىنىمىزدى قالاي كورسەتە الامىز؟
13 اياۋلى ايەل باۋىرلاستارىمىزدىڭ ەحوباعا قىزمەت ەتۋ ٷشىن اتقارعان ٵربىر ەڭبەگى ماقتاۋعا لايىق. بۇل باۋىرلاستار عيماراتتاردى سوعۋ مەن كۇتىپ-ۇستاۋعا قولعابىس ەتەدى، شەتتىلدى توپتاردا قىزمەت ەتەدى، بەتەلدە ەرىكتى قىزمەت اتقارادى، تابيعي اپاتتان زارداپ شەككەندەرگە كومەكتەسۋ شارالارىنا قاتىسادى، ادەبيەتتەرىمىزدى اۋدارۋعا كومەكتەسەدى جانە ٸزاشار، ميسسيونەر بولىپ قىزمەت ەتەدى. ەر باۋىرلاستار سياقتى، ولار دا ٸزاشارلارعا جانە پاتشالىقتى جاريالاۋشىلارعا ارنالعان مەكتەپتە، سونداي-اق عالاقات مەكتەبىندە ٴتالىم الادى. كوپتەگەن ايەلدەر قاۋىمدا جانە ۇيىمدا اۋىر ەڭبەك ەتىپ جۇرگەن كۇيەۋلەرىنە قولداۋ كورسەتەدى. بۇل «سي رەتىندەگى» ەر ادامدار وزگەلەرگە كومەكتەسۋ ٷشىن كوپ ٸس اتقارادى. الايدا ايەلدەرىنىڭ قولداۋىنسىز ولار بۇل ىستەردى مۇنشالىقتى تولىق اتقارا الماس ەدى (ەفەس. 4:8). وسىلاي ەڭبەكتەنىپ جۇرگەن ايەل باۋىرلاستاردى قالاي قولداي الاتىنىڭىز جايلى ويلانىپ كورىڭىز.
14. ٴزابۇر 68:11 دەگى سوزدەردى ەسكەرەتىن دانا اقساقالدار نەنى تۇسىنەدى؟
14 دانا اقساقالدار ايەل باۋىرلاستاردىڭ ەڭبەكتەنۋگە دايىن «قالىڭ قولدى» قۇرايتىنىن جانە ىزگى حاباردى شەبەر ۋاعىزدايتىنىن تۇسىنەدى (ٴزابۇر 68:11 وقىڭىز). سوندىقتان ولار ايەل باۋىرلاستاردىڭ تاجىريبەسىنەن ۇيرەنۋگە تىرىسادى. جوعارىدا ايتىلعان ابيگەيل ەر باۋىرلاستار ودان ادامدارمەن قالاي اڭگىمە باستاۋعا بولاتىنى جايلى سۇراعاندا، ٴماز بولىپ قالادى ەكەن. «سونداي كەزدەرى مەن ەحوبا ٶز ۇيىمىندا ماعان ماڭىزدى ٸس سەنىپ تاپسىرعانىن كورەمىن»،— دەيدى ول. سونداي-اق اقساقالدار ادال رۋحاني تولىسقان ايەل باۋىرلاستاردىڭ قيىندىقتارعا كەزىگىپ جۇرگەن جاس قىز باۋىرلاستارعا ٴتيىمدى كومەك كورسەتە الاتىندارىن بىلەدى (تيت. 2:3—5). داۋ جوق، ايەل باۋىرلاستار ٴبىزدىڭ سۇيىسپەنشىلىگىمىزگە جانە ريزاشىلىق بىلدىرۋىمىزگە ابدەن لايىق!
ايەل باۋىرلاستار ٷشىن اراشا ٴتۇسىڭىز
15. ايەل باۋىرلاستار قاي كەزدەرى وزگەلەردىڭ قورعانىشىنا مۇقتاج بولۋى مۇمكىن؟
15 كەيدە ايەل باۋىرلاستارىمىز باستارىنا اۋىر جاعداي تۇسكەندە، وزگەلەردىڭ قورعانىشىنا مۇقتاج بولۋى مۇمكىن (يشايا 1:17). مىسالى، جەسىر نە اجىراسقان باۋىرلاس بۇرىن كۇيەۋى ىستەپ جۇرگەن ىستەردى اتقارۋعا كومەكتەسەتىن ادامدى قاجەت ەتۋى مۇمكىن. ال قارت ايەل باۋىرلاسىمىز دارىگەرلەرمەن سويلەسۋ ٷشىن بىرەۋدىڭ كومەگىن قاجەت ەتەتىن شىعار. ەحوبانىڭ ۇيىمىندا باسقا دا تەوكراتيالىق جوبالارعا قاتىسىپ جۇرگەن ٸزاشار ايەل باۋىرلاس كەيدە ٶزىن جاقتاپ سويلەيتىن بىرەۋگە مۇقتاج بولادى، ويتكەنى ونى كەيبىرەۋلەر «ول باسقا ٸزاشارلار سياقتى ۋاعىزدامايدى» دەپ سىناۋى مۇمكىن. بۇنداي باۋىرلاستارعا قالاي كومەكتەسسەك بولادى؟ قايتادان يسانىڭ ۇلگىسىنە ورالايىق.
16. مارقا 14:3—9 تارماقتاردان كورىنەتىندەي، يسا ٴماريامدى قالاي قورعادى؟
16 ٶزىنىڭ رۋحاني اپكە-قارىنداستارىن وزگەلەر دۇرىس تۇسىنبەي قالعاندا، يسا ولاردى بىردەن قورعاعان. مىسالى، مارتا نارازى بولعان كەزدە، يسا ٴماريامدى جاقتاپ سويلەگەن (لۇقا 10:38—42). تاعى بىردە وزگەلەر ٴماريامدى دۇرىس ەمەس ارەكەت ەتتى دەپ ايىپتاعاندا، يسا ٴماريامدى قايتادان قورعادى (مارقا 14:3—9 وقىڭىز). ٴماريامنىڭ يگى نيەتىن تۇسىنگەن يسا ونى ماقتاپ: «ول ماعان جاقسىلىق جاسادى... ول قولىنان كەلگەنىن ىستەدى»،— دەدى. ول ٴتىپتى «ىزگى حابار دۇنيەنىڭ قاي جەرىندە ۋاعىزدالماسىن»، ونىڭ بۇل جاقسىلىعى ەسكە الىناتىنىن پايعامبارلىق ەتتى. بۇل ماقالا — وسى پايعامبارلىقتىڭ ورىندالىپ جاتقانىنىڭ دالەلى. يسانىڭ ىزگى حاباردىڭ دۇنيەجۇزىنە تارالاتىنىن وسى ايەلدىڭ رياسىز ارەكەتىمەن بايلانىستىرىپ ايتقانى — ەرەكشە جايت! يسانىڭ بۇل سوزدەرى وزگەلەردىڭ سىنىنا تۇسكەن ٴماريامدى قالايشا جىگەرلەندىردى دەسەڭىزشى!
17. ايەل باۋىرلاستاردى قانداي جاعدايدا قورعاۋعا بولاتىنىنا قاتىستى مىسال كەلتىرىڭىز.
17 ٴسىز ايەل باۋىرلاستار مۇقتاج بولعان كەزدەرى ولار ٷشىن اراشا تۇسەسىز بە؟ مىسالى، مىناداي جاعدايدى ەلەستەتىپ كورەيىك. كەيبىر جاريالاۋشىلار كۇيەۋى كۋاگەر ەمەس ٴبىر ايەل باۋىرلاستىڭ ٴجيى قاۋىمعا كەشىگىپ كەلەتىنىن جانە قاۋىمنان كەيىن بىردەن كەتىپ قالاتىنىن بايقايدى. ولار ونىڭ قاۋىمعا بالالارىن ٴجيى اكەلمەيتىنىن دە كورىپ جۇرەدى. سوندا ولار: «نەگە ول كۇيەۋىنەن بالالارىن قاۋىمعا جىبەرۋدى تالاپ ەتپەيدى ەكەن؟»— دەپ، ونى سىناپ-مىنەيدى. ٴبىراق شىندىعىندا بۇل ايەل باۋىرلاس قولىنان كەلگەننىڭ ٴبارىن جاساپ جۇرەدى. ونىڭ بار ۋاقىتى ٶز قۇزىرىندا ەمەس، بالالارىنا قاتىستى شەشىمدى دە ول قابىلدامايدى. مۇنداي جاعدايدا ٴسىز نە ىستەي الاسىز؟ ەگەر ٴسىز وسىنداي باۋىرلاستى ماقتاساڭىز جانە وزگەلەرگە ونىڭ جاقسى ىستەرى جايلى ايتساڭىز، ول جايلى جاعىمسىز اڭگىمەلەر توقتاۋى مۇمكىن.
18. ايەل باۋىرلاستارعا كومەكتەسۋدىڭ تاعى قانداي جولدارى بار؟
18 ايەل باۋىرلاستارعا ٸس جۇزىندە كومەك ۇسىنۋ ارقىلى دا ولاردىڭ قامىن ويلايتىنىمىزدى كورسەتەمىز (جوح. 1-ح. 3:18). ناۋقاس اناسىنا قارايتىن اننەت بىلاي دەيدى: «كەيبىر باۋىرلاستار اناما قارايلاسىپ تۇرادى. سول كەزدەرى مەن باسقا شارۋالارىمدى تىندىرىپ الامىن. كەيدە ولار بىزگە تاماق الىپ كەلەدى. سوندا مەن باۋىرلاستاردىڭ مەنى جاقسى كورەتىنىن جانە قاۋىمنىڭ ٴبىر بولىگى دەپ قاراستىراتىنىن كورەمىن». دجوردانعا دا ٴبىر باۋىرلاس كومەكتەسىپ، كولىك ۇزاق قىزمەت ەتۋ ٷشىن نە ىستەۋ كەرەكتىگىن ۇيرەتىپتى. «باۋىرلاستاردىڭ مەنىڭ قاۋىپسىزدىگىمدى ويلايتىنىن كورىپ، ٴماز بولىپ قالدىم»،— دەيدى ول.
19. اقساقالدار ايەل باۋىرلاستارعا تاعى قانداي جولدارمەن جاردەم بەرە الادى؟
19 اقساقالدار دا ايەل باۋىرلاستاردىڭ نە نارسەگە مۇقتاج ەكەنىن بايقاۋعا تىرىسادى. ايەلدەرگە باسقالاردىڭ قالاي قارايتىنى ەحوبا ٷشىن ماڭىزدى ەكەنىن ولار بىلەدى (جاق. 1:27). اقساقالدار يسا سياقتى بەيىمدەلگىش بولىپ، كەيبىر جاعدايلاردا ەرەجەلەر ورناتپاي، تۇسىنىكپەن قاراي الادى (مات. 15:22—28). ولار ٴبىرىنشى بولىپ كومەك كورسەتەتىن بولسا، ايەل باۋىرلاستار ەحوبانىڭ جانە ۇيىمنىڭ قامقورلىعىن سەزىنەدى. كيانىڭ باسقا جەرگە كوشەتىنىن بىلگەندە، ونىڭ توپ باقىلاۋشىسى بىردەن كومەكتەسۋدىڭ قامىن جاسادى. كيا بىلاي دەيدى: «وسىنىڭ ارقاسىندا مەن كوپ سترەسكە تۇسپەدىم. اقساقالدار مەنى جىگەرلەندىرىپ، كومەك كورسەتكەندە، قاۋىمدا مەنىڭ دە ورنىم بار ەكەنىن ٵرى قيىن شاقتا جالعىز ەمەس ەكەنىمدى ٴتۇسىندىم».
ايەل باۋىرلاستارىمىزدىڭ ٴبارى قولداۋعا مۇقتاج
20، 21. ٴماسىحشى ايەلدەردىڭ ٴبارىن جاقسى كورەتىنىمىزدى قالاي كورسەتە الامىز؟
20 اينالامىزعا كوز تاستاساق، اۋىر ەڭبەك ەتىپ جۇرگەن ٴماسىحشى ايەلدەردىڭ كوپ ەكەنىن كورەمىز. ولاردىڭ ٴبارى ٴبىزدىڭ قولداۋ كورسەتۋىمىزگە لايىق. يساعا ەلىكتەپ، ٴبىز دە ايەل باۋىرلاستارعا كومەكتەسۋ ٷشىن، ۋاقىت ٴبولىپ، ولارمەن جاقىن تانىسايىق، ولاردىڭ ەحوباعا قىزمەت ەتۋ ٷشىن اتقارىپ جۇرگەن ىستەرىن باعالايتىنىمىزدى كورسەتەيىك جانە قاجەت كەزدە ولارعا اراشا ٴتۇسىپ، قورعاۋعا دايىن بولايىق.
21 ريمدىكتەرگە جازعان حاتىنىڭ اياعىندا پاۋىل توعىز ٴماسىحشى ايەلدىڭ اتىن اتاعان (ريم. 16:1، 3، 6، 12، 13، 15). پاۋىلدىڭ سالەم جولداپ، ماقتاعانىن ەستىگەندە، بۇل ايەلدەردىڭ ٴبىر مارقايىپ قالعانىندا ٴسوز جوق. ٴبىز دە قاۋىمداعى ايەل باۋىرلاستاردىڭ بارلىعىنا قولداۋ كورسەتەيىك. وسىلاي ٴبىز ايەل باۋىرلاستار رۋحاني وتباسىمىزدىڭ باعا جەتپەس بولىگى ەكەنىن كورسەتەمىز.
136-ٵن ەحوبا «قارىمتاڭدى تولىعىمەن» قايتارادى
^ 5-ابزاس ٴماسىحشى ايەلدەر كوپتەگەن قيىندىقتارعا كەزىگەدى. بۇل ماقالادا ٴبىز يساعا ەلىكتەپ، ايەل باۋىرلاستارعا قالاي قولداۋ كورسەتە الاتىنىمىزدى بىلەمىز. يسا ايەلدەرگە كوڭىل بولگەن، ولاردى باعالاعان، قورعاپ سويلەگەن. ٴبىز ودان كوپ نارسەگە ۇيرەنە الامىز.
^ 5-ابزاس كەيبىر ەسىمدەر وزگەرتىلگەن.
^ 6-ابزاس ٴبىر ەڭبەكتە بىلاي دەلىنگەن: «شاكىرتتەر ۇستاز بولۋعا دايىندالعان كەزدە، ۇستازدارىنىڭ اياق جاعىندا وتىراتىن بولعان. الايدا ايەلدەرگە ۇستاز بولۋعا رۇقسات ەتىلمەيتىن. ياھۋدي ەر ادامداردىڭ كوبىسى ٴتالىم الۋعا قۇشتار ٴماريامنىڭ يسانىڭ اياق جاعىندا وتىرعانىن كورگەندە، توبە شاشتارى تىك تۇرار ەدى».
^ 9-ابزاس اقساقالدار ايەل باۋىرلاستارعا كومەكتەسكەن كەزدە، اباي بولۋلارى قاجەت. مىسالى، اقساقال ايەل باۋىرلاسقا جالعىز بارماۋ كەرەك.
^ 65-ابزاس سۋرەتتەر سيپاتتاماسى: ادال ايەلدەرگە كوڭىل بولگەن يساعا ەلىكتەپ، ٴبىر ەر باۋىرلاس ەكى ايەل باۋىرلاسقا كولىگىنىڭ دوڭگەلەگىن اۋىستىرۋعا كومەكتەسىپ جاتىر. تاعى ٴبىر ەر باۋىرلاس ناۋقاس ايەل باۋىرلاستىڭ جاعدايىن سۇراپ جاتىر. ال ٷشىنشى ەر باۋىرلاس جۇبايىمەن بىرگە قىزى بار ايەل باۋىرلاستىڭ وتباسىلىق عيباداتىنا قاتىسىپ جاتىر.
