1. Wetin-ɛn-wetin sista dɛn kin du fɔ sɔpɔt di ɔganayzeshɔn? Bɔt wetinnɔ kin izi fɔ bɔku pan dɛn? (Luk di pikchɔ na di frɔnt pej.)

WI RILI gladi fɔ gɛt bɔku sista dɛn we de wok tranga wan na di kɔngrigeshɔn. Fɔ ɛgzampul, dɛn kin gi tɔk ɛn kɔmɛnt na mitin, ɛn dɛn kin du di prichin wok. Sɔm ɔda wan dɛn kin ɛp fɔ mek di say dɛn we dɔn pwɛl na Kiŋdɔm Ɔl dɛn, ɛn dɛn kin sho se dɛn bisin bɔt dɛn brɔda ɛn sista dɛn. Bɔt dɛn kin gɛt tin dɛn we nɔ izi fɔ dɛn. Sɔm pan dɛn kin gɛt fɔ kia fɔ dɛn mama ɛn papa dɛn we dɔn ol. Ɔda wan dɛn gɛt fambul dɛn we nɔ de trit dɛn fayn. Ɛn sɔm ɔda wan dɛn nɔ gɛt man we de ɛp dɛn fɔ kia fɔ dɛn pikin dɛn.

2. Wetin mek wi fɔ sɔpɔt wi sista dɛn?

² Wetin mek wi fɔ sɔpɔt wi sista dɛn? Na bikɔs bɔku tɛm, pipul dɛn na di wɔl nɔ kin trit uman dɛn fayn ɛn gi dɛn di rɛspɛkt we dɛn fit fɔ gɛt. Apat frɔm dat, di Baybul de ɛnkɔrej wi fɔ sɔpɔt dɛn. Fɔ ɛgzampul, apɔsul Pɔl bin tɛl di kɔngrigeshɔn na Rom fɔ wɛlkɔm Fibi ɛn “ɛp am ɛnikayn we we i go nid [dɛn] fɔ ɛp am.” (Rom. 16:​1, 2) Di tɛm we Pɔl na bin Faresi, i go mɔs bi se na dɛn ɔl bin de trit uman dɛn lɛk se dɛn nɔ gɛt valyu. Bɔt we i bi Kristian, i bin stat fɔ falamakata Jizɔs bay we i bin de du gud to uman dɛn ɛn trit dɛn wit rɛspɛkt.—1 Kɔr. 11:​1.

3. Aw Jizɔs bin de trit uman dɛn? Aw i bin de si uman dɛn we bin de du wetin Gɔd want?

³ Jizɔs bin de trit uman dɛn wit rɛspɛkt. (Jɔn 4:​27) I nɔ bin de trit uman dɛn di we aw di bigman dɛn na di Ju rilijɔn bin de trit dɛn. Infakt, wan buk we de tɔk bɔt di Baybul bin se: “Jizɔs nɔ bin ɛva tɔk sɔntin we de sho se i nɔ rɛspɛkt uman dɛn.” I bin gɛt mɔ rɛspɛkt fɔ uman dɛn we de du wetin in Papa want. I bin de si dɛn as in sista  dɛn, ɛn i tɔk se na dɛn uman dɛn de ɛn sɔm ɔda man dɛn we dɛn ɔl de wɔship Jiova, na in famili.—Mat. 12:​50.

4. Wetin wi go tɔk bɔt insay dis atikul?

⁴ Jizɔs bin rɛdi ɔltɛm fɔ ɛp di uman dɛn we dɛn ɔl bin de sav Gɔd. I bin sho dɛn se dɛn impɔtant to am ɛn i bin de tɔk fɔ dɛn. Lɛ wi tɔk bɔt aw wi go falamakata Jizɔs fɔ sho se wi bisin bɔt wi sista dɛn.

5. Wetin mek i nɔ kin izi fɔ lɛ sɔm sista dɛn spɛnd tɛm wit dɛn brɔda ɛn sista dɛn?

⁵ Wi ɔl nid gud pipul dɛn fɔ spɛnd tɛm wit. Bɔt sɔntɛnde, i nɔ kin izi fɔ lɛ sista dɛn de arawnd dɛn kayn pipul dɛn de. Wetin mek? Lɛ wi tɔk bɔt wetin sɔm sista dɛn se. Wan sista we nem Jɔdan * bin se: “Bikɔs a nɔ mared, sɔntɛnde a kin fil se a nɔ gɛt wok na di kɔngrigeshɔn.” Wan payɔnia we nem Kristin we bin go ɔdasay fɔ mek i du mɔ na di prichin wok bin se: “We pɔsin kin go na nyu kɔngrigeshɔn, i kin fil lɛk se na in wan de.” I go bi se sɔm brɔda dɛn bak kin fil dis sem we. Di wan dɛn we de na famili we ɔlman nɔ de sav Jiova, kin fil lɛk se dɛn nɔ de nia dɛn famili, ɛn dɛn kin fil bak se dɛn nɔ gɛt bɛtɛ padi biznɛs wit di brɔda ɛn sista dɛn na di kɔngrigeshɔn. Sɔm sista dɛn kin fil lɛk se na dɛn wangren de bikɔs dɛn sik ɛn dɛn nɔ ebul kɔmɔt na os ɔ na dɛn de kia fɔ dɛn fambul dɛn we sik. Wan ɔda sista we nem Anɛt bin se: “A nɔ bin de ebul spɛnd tɛm wit mi brɔda ɛn sista dɛn bikɔs na mi na bin di men pɔsin we bin de kia fɔ mi mama.”

6. Akɔdin to Lyuk 10:​38-42, aw Jizɔs bin ɛp Meri ɛn Mata?

⁶ Jizɔs bin de spɛnd tɛm wit uman dɛn we dɛn ɔl bin de sav Gɔd, ɛn in na bin tru tru padi to dɛn. Lɛ wi tɔk bɔt in padi biznɛs wit Meri ɛn Mata we nɔ bin mared. (Rid Lyuk 10:​38-42.) Jizɔs bin de tɔk ɛn du tin dɛn we bin de mek dɛn fil fri fɔ de wit am. Fɔ ɛgzampul, Meri bin fil fri fɔ sidɔm nia Jizɔs in fut as in disaypul. * Ɛn we Mata bin vɛks we Meri nɔ bin de ɛp am, Mata bin fil fri fɔ tɛl Jizɔs wetin i tink bɔt dat. We dɛn tin ya bin apin, Jizɔs bin ɛp dɛn tu uman dɛn ya fɔ lan impɔtant lɛsin dɛn. Ɛn i bin sho se i bisin bɔt dɛn uman dɛn ya ɛn dɛn brɔda Lazarɔs, bay we i bin de go fɛn dɛn. (Jɔn 12:​1-3) Na dat mek we Lazarɔs bin sik siriɔs wan, Meri ɛn Mata bin no se Jizɔs go ɛp dɛn.—Jɔn 11:​3, 5.

7. Wetin na wan we we wi go ɛnkɔrej wi sista dɛn?

⁷ Fɔ sɔm sista dɛn, na mitin na di men say we dɛn kin gɛt chans fɔ de wit dɛn kɔmpin Kristian dɛn. So we dɛn kam mitin, wi fɔ wɛlkɔm dɛn, tɔk to dɛn, ɛn sho dɛn se wi bisin bɔt dɛn. Jɔdan we wi bin dɔn tɔk bɔt bin se: “A kin gladi we brɔda ɛn sista dɛn kin tɛl mi tɛnki fɔ mi kɔmɛnt, arenj fɔ wok wit mi na fil savis, ɛn we dɛn kin du ɔda tin dɛn fɔ sho se dɛn bisin bɔt mi.” Wi fɔ sho wi sista dɛn se dɛn impɔtant to wi. Wan sista we nem Kia bin se: “If a nɔ go mitin, a no se sɔm brɔda ɛn sista dɛn go sɛn mɛsej to mi fɔ chɛk if a wɛl. We dɛn du dat, i de mek a no se dɛn bisin bɔt mi.”

8. Us ɔda we dɛn wi go falamakata Jizɔs?

 ⁸ Lɛk Jizɔs, wi fɔ tray tranga wan fɔ spɛnd tɛm wit sista dɛn. Sɔntɛm wi kin invayt dɛn fɔ kam it wit wi ɔ fɔ jɔs kip kɔmpin. We wi invayt dɛn, wi fɔ mek shɔ se wi tɔk bɔt tin dɛn we go ɛnkɔrej wi ɔl. (Rom. 1:​11, 12) Ɛlda dɛn fɔ falamakata Jizɔs. I bin no se i nɔ go izi fɔ lɛ sɔm pipul dɛn de dɛn nɔ mared. Bɔt i bin tɔk klia wan se nɔto mared ɔ pikin na di men tin we go mek wi gladi. (Lyuk 11:​27, 28) Bifo dat, di men tin we go mek wi gladi sote go na we wi put wetin Jiova want fɔs na wi layf.—Mat. 19:​12.

9. Wetin ɛlda dɛn kin du fɔ ɛp sista dɛn?

⁹ Na di ɛlda dɛn mɔ nid fɔ trit Kristian uman dɛn as dɛn mama ɛn sista dɛn. (1 Tim. 5:​1, 2) Ɛlda dɛn nid fɔ mek tɛm fɔ tɔk to di sista dɛn bifo ɛn afta mitin. Kristin we wi bin dɔn tɔk bɔt bin se: “Wan ɛlda bin notis se a rili bizi ɛn i bin want fɔ no wetin-ɛn-wetin a kin du we mek a bizi. A bin gladi we i sho se i bisin bɔt mi.” We ɛlda dɛn kin mek tɛm fɔ tɔk to dɛn Kristian sista dɛn ɔltɛm, dat de sho se dɛn bisin bɔt dɛn. * Anɛt we wi bin dɔn tɔk bɔt,  bin tɔk bɔt wan bɛnifit we wi go gɛt we wi tɔk to di ɛlda dɛn ɔltɛm. I bin se: “A kam fɔ no dɛn mɔ ɛn dɛnsɛf bin kam fɔ no mi mɔ. Na dat mek we a kin gɛt sɔntin we de mɔna mi, a kin fil fri fɔ tɔk to dɛn fɔ ɛp mi.”

10. Wetin kin ɛp wi sista dɛn fɔ gladi?

¹⁰ Ilɛk wi na man ɔ uman, wi kin gladi we ɔda pipul dɛn kin notis wetin wi de du ɛn tɛl wi tɛnki. Bɔt wi at kin pwɛl if pipul dɛn nɔ tɛl wi tɛnki fɔ wetin wi de du. Wan payɔnia sista we nɔ mared we nem Abigɛl bin se sɔntɛnde i kin fil se pipul dɛn nɔ sabi am. I bin se: “Dɛn jɔs no mi as so-so pɔsin in sista ɔ galpikin. Sɔntɛnde, i kin tan lɛk dɛn nɔ de notis mi.” Bɔt wan ɔda sista we nɔ mared we nem Pam bin tɔk difrɛn tin. I bin sav as mishɔnari fɔ lɔng tɛm. Leta, i bin go bak na in kɔntri fɔ kia fɔ in mama ɛn papa. Naw i dɔn pas 70 ia, ɛn i stil de payɔnia. Pam bin se: “Wan tin we dɔn rili ɛp mi na we ɔda pipul dɛn de tɛl mi tɛnki fɔ wetin a de du.”

11. Aw Jizɔs bin sho se i gladi fɔ di uman dɛn we bin de ɛp am we i bin de prich?

¹¹ Jizɔs bin rili gladi fɔ we sɔm fetful uman dɛn “bin de yuz wetin dɛn gɛt” fɔ ɛp am. (Lyuk 8:​1-3) I nɔ bin jɔs alaw dɛn fɔ ɛp am, bɔt i bin tich dɛn impɔtant tin dɛn bɔt wetin Gɔd want. Fɔ ɛgzampul, i bin tɛl dɛn se i go day ɛn gɛt layf bak. (Lyuk 24:​5-8) I bin tɛl dɛn uman dɛn ya bɔt di prɔblɛm dɛn we go mit dɛn jɔs lɛk aw i bin dɔn tɛl in apɔsul dɛn. (Mak 9:​30-32; 10:​32-34) Ɛn pan ɔl we di apɔsul dɛn bin rɔnawe we dɛn bin arɛst Jizɔs, sɔm uman dɛn we bin de sɔpɔt am bin de nia am di tɛm we i bin de day na di tik.—Mat. 26:​56; Mak 15:​40, 41.

12. Us wok Jizɔs bin gi uman dɛn fɔ du?

¹² Jizɔs bin gi uman dɛn impɔtant wok fɔ du. Fɔ ɛgzampul, na sɔm fetful uman dɛn fɔs bin no se i dɔn gɛt layf bak. I bin tɛl di uman dɛn fɔ go tɛl in apɔsul dɛn se i dɔn gɛt layf bak. (Mat. 28:​5, 9, 10) I go bi se di de fɔ Pɛntikɔst insay di ia 33, sɔm uman dɛn bin de wit di ɔda disaypul dɛn we Gɔd bin anɔynt wit oli spirit. If na so i bi, dat min se dɛn anɔyntɛd sista dɛn de bin de tɔk difrɛn langwej dɛn ɛn tɛl pipul dɛn bɔt “di pawaful tin dɛn bɔt Gɔd.”—Akt 1:​14; 2:​2-4, 11.

13. Wetin wi Kristian sista dɛn de du tide? Aw yu go sho se yu gladi fɔ wetin dɛn de du?

¹³ Wi fɔ tɛl wi sista dɛn tɛnki fɔ ɔl wetin dɛn de du fɔ Jiova. Dɛn kin ɛp fɔ bil ɛn kia fɔ Kiŋdɔm Ɔl ɛn ɔda say dɛn we wi kin yuz fɔ wɔship Jiova, dɛn kin ɛp fɔ prich wit kɔngrigeshɔn grup dɛn we de tɔk ɔda langwej, ɛn dɛn kin ɛp fɔ wok na Bɛtɛl. Dɛn kin ɛp dɛn wan dɛn we de sɔfa bikɔs atkwek ɔ ebi ebi ren dɔn ambɔg dɛn, dɛn kin ɛp fɔ translet wi buk, magazin, ɛn ɔda tin dɛn, ɛn dɛn kin sav as payɔnia ɛn mishɔnari dɛn. Sista dɛn kin atɛnd payɔnia skul, Skul fɔ Pipul dɛn We De Prich bɔt Gɔd in Kiŋdɔm, ɛn Giliad Skul jɔs lɛk brɔda dɛn. Apat frɔm dat, sista dɛn kin ɛp dɛn man dɛn fɔ du dɛn wok fayn na di kɔngrigeshɔn ɛn di ɔganayzeshɔn. Dɛn man dɛn ya we na “gift” nɔ go ebul du dɛn wok fayn if dɛn wɛf dɛn nɔ de sɔpɔt dɛn. (Ɛfi. 4:​8) Yu tink bɔt ɛnitin we yu go du fɔ sɔpɔt dɛn sista dɛn ya?

14. Bikɔs ɔf wetin de na Sam 68:​11, wetin i go fayn fɔ mek ɛlda dɛn du?

 ¹⁴ Ɛlda dɛn no se sista dɛn na “bɔku amiman dɛn” we rɛdi fɔ wok, ɛn bɔku pan dɛn rili sabi du di prichin wok. (Rid Sam 68:​11.) So ɛlda dɛn kin tray fɔ lan frɔm dɛn sista dɛn ya. Abigɛl we wi bin dɔn tɔk bɔt kin gladi we brɔda dɛn kin aks am wetin na di bɛst we fɔ stat fɔ tɔk to pipul dɛn na di tɛritri. I se: “Dat kin mek a no se Jiova gɛt impɔtant wok fɔ mi na in ɔganayzeshɔn.” Apat frɔm dat, ɛlda dɛn no se fetful machɔ sista dɛn sabi ɛp yɔŋ sista dɛn we dɛn gɛt sɔntin we de mɔna dɛn. (Taytɔs 2:​3-5) Wi rili nid fɔ sho se wi lɛk wi sista dɛn.

15. Ustɛm sista dɛn go nid pɔsin fɔ tɔk fɔ dɛn?

¹⁵ Sɔntɛnde, sista dɛn kin nid pɔsin fɔ tɔk fɔ dɛn we dɛn gɛt sɔm patikyula tin we de mɔna dɛn. (Ayz. 1:​17) Fɔ ɛgzampul, sɔm sista dɛn we dɛn man dɔn day ɔ ɔda wan dɛn we dɔn dayvɔs, kin nid pɔsin fɔ tɔk fɔ dɛn ɛn ɛp dɛn fɔ du sɔm tin dɛn we dɛn man bin de du. I go bi se wan ol sista go nid pɔsin fɔ tɔk to dɔktɔ fɔ am. Ɔ wan payɔnia sista we de du ɔda wok fɔ Jiova in ɔganayzeshɔn go nid pɔsin fɔ tɔk fɔ am if ɔda brɔda ɛn sista dɛn de tɔk bɔt am se i nɔ kin go fil savis ɔltɛm lɛk ɔda payɔnia dɛn. Us ɔda tin wi go du fɔ ɛp wi sista dɛn? Lɛ wi tɔk bak bɔt Jizɔs in ɛgzampul.

16. Akɔdin to Mak 14:​3-9, wetin Jizɔs bin du fɔ Meri?

¹⁶ We pipul dɛn bin de tɔk tin we nɔ kɔrɛkt bɔt di uman dɛn we bin de sav Gɔd, Jizɔs nɔ bin de westɛm fɔ tɔk fɔ dɛn. Fɔ ɛgzampul, i bin tɔk fɔ Meri we Mata bin tɔk se i nɔ de ɛp am. (Lyuk 10:​38-42) I bin tɔk fɔ Meri wan ɔda tɛm we pipul dɛn bin tɔk pan am bikɔs dɛn tink se i du bad tin. (Rid Mak 14:​3-9.) Jizɔs bin ɔndastand wetin mek Meri bin tɔn ɔyl na in ed, ɛn i prez am bay we i bin se: “Na fayn tin i du fɔ mi. . . . I dɔn du wetin i ebul.” I bin ivin tɔk se dɛn go tɔk bɔt di gud tin we Meri du “ɛnisay we dɛn de prich di gud nyuz na di wan ol wɔl,” ɛn na dat dis atikul de du rayt naw. I fayn fɔ no se Jizɔs bin tɔk se dɛn go prich di gud nyuz ɔlsay na di wɔl we i bin de tɔk bɔt wetin Meri du. Dɛn wɔd dɛn de we Jizɔs tɔk go mɔs dɔn mek Meri fil gud afta we pipul dɛn bin dɔn tɔk bad bɔt am.

17. Gi wan ɛgzampul bɔt ustɛm wi go nid fɔ tɔk fɔ wi Kristian sista?

¹⁷ Yu kin tɔk fɔ yu Kristian sista dɛn we dɛn nid pɔsin fɔ tɔk fɔ dɛn? Tink bɔt dis ɛgzampul. Sɔm pɔblisha dɛn notis se wan sista we in man nɔto Jiova Witnɛs kin let fɔ kam mitin, ɛn as mitin dɔn i de rɔn fɔ go na os. Dɛn notis bak se nɔto ɔltɛm i kin kam wit in pikin dɛn. So dɛn bin de tɔk bad bɔt am bikɔs dɛn tink se i fɔ tawa pan in man fɔ lɛ i alaw am fɔ kam wit di pikin dɛn na mitin. Bɔt di tru na dat dis sista rili de du in bɛst. Nɔto in de disayd wetin de apin na di os ɛn nɔto in de disayd wetin in pikin dɛn fɔ du. If yu yɛri ɔda pɔblisha dɛn de tɔk dis kayn tin bɔt di sista, wetin yu go du? If yu prez di sista ɛn tɛl di ɔda pɔblisha dɛn bɔt di fayn tin dɛn we i de du, sɔntɛm dat go mek dɛn lɛf fɔ tɔk bad bɔt am.

18. Us ɔda we dɛn wi go ɛp wi Kristian sista dɛn?

¹⁸ Wi kin sho wi sista dɛn se wi rili bisin bɔt dɛn bay we wi de du sɔntin fɔ ɛp dɛn. (1 Jɔn 3:​18) Anɛt we de kia fɔ in mama we nɔ wɛl bin se: “Sɔm brɔda ɛn sista  dɛn kin kam ɛp mi fɔ kia fɔ mi mama so dat a go ebul du ɔda tin, ɔ dɛn kin kam wit it. Dis kin mek a no se dɛn lɛk mi ɛn dɛn gladi fɔ we a de wit dɛn na di kɔngrigeshɔn.” Di brɔda ɛn sista dɛn bin ɛp Jɔdan bak. Wan brɔda bin sho am aw fɔ kia fɔ in motoka fɔ mek di motoka nɔ gɛt siriɔs prɔblɛm. I bin se: “A gladi fɔ no se mi brɔda ɛn sista dɛn bisin bɔt mi ɛn dɛn nɔ want mek a gɛt prɔblɛm we a de drayv.”

19. Us ɔda we dɛn ɛlda dɛn kin ɛp sista dɛn?

¹⁹ Ɛlda dɛnsɛf kin tray fɔ kia fɔ di sista dɛn. Dɛn no se Jiova rili bisin bɔt aw dɛn de trit sista dɛn. (Jems 1:​27) Na dat mek dɛn de falamakata Jizɔs ɛn nɔ de pin pan sɔntin. So dɛn nɔ de mek lɔ fɔ ɔltin, bifo dat dɛn de du gud to di sista dɛn ɛn tray fɔ ɔndastand wetin de apin to dɛn. (Mat. 15:​22-28) We ɛlda dɛn de tray tranga wan fɔ ɛp sista dɛn, dat de mek di sista dɛn no se Jiova ɛn in ɔganayzeshɔn lɛk dɛn. We Kia in grup ovasia kam fɔ no se Kia de muf go ɔdasay, i bin arenj fɔ ɛp am wantɛm wantɛm. Kia bin se: “Dat bin mek a nɔ yagba tumɔs. Ɛn we di ɛlda dɛn bin ɛp ɛn ɛnkɔrej mi, dɛn mek a no se a impɔtant na di kɔngrigeshɔn, ɛn dɛn go de wit mi ɛnitɛm we tin nɔ izi fɔ mi.”

20-21. Aw wi go sho se wi lɛk wi Kristian sista dɛn?

²⁰ We wi luk insay ɔl wi kɔngrigeshɔn dɛn, wi gɛt bɔku Kristian sista dɛn we de wok tranga wan ɛn dɛn rili fit fɔ mek wi sɔpɔt dɛn. As wi dɔn lan frɔm Jizɔs in ɛgzampul, wi kin ɛp wi sista dɛn bay we wi de spɛnd tɛm wit dɛn ɛn tray fɔ no dɛn. Wi kin sho se wi gladi fɔ wetin dɛn de du fɔ Jiova. Ɛn wi kin tɔk fɔ dɛn we dɛn nid wi fɔ du dat.

²¹ Di tɛm we apɔsul Pɔl bin de dɔn fɔ rayt in lɛta to di brɔda ɛn sista dɛn na Rom, i bin tɔk bɔt nayn Kristian sista dɛn. (Rom. 16:​1, 3, 6, 12, 13, 15) Dɛn sista dɛn de go mɔs dɔn gladi we dɛn yɛri Pɔl in gritin ɛn we i prez dɛn. Wisɛf fɔ sɔpɔt ɔl di sista dɛn na wi kɔngrigeshɔn. We wi du dat, wi de sho se dɛn na wi fambul dɛn we wi lɛk.