တၢ်မၤလိ ၃၉
ဆီၣ်ထွဲမၤစၢၤ ပဒီပုၢ်ဝဲၢ်မုၣ်တဖၣ်
“ပိာ်မုၣ်လၢ အကတိၤသြီတၢ်ကစီၣ်န့ၣ် အိၣ်ဂီၢ်မုၢ်ဖးဒိၣ်လီၤ.”—စံးထီၣ်ပတြၢၤ ၆၈:၁၁.
တၢ်သးဝံၣ် ၁၃၇ ပိာ်မုၣ်လၢပျၢၤလၢအိၣ်ဒီးတၢ်သးတီ ဒီးခရံာ်ဖိဒီပုၢ်ဝဲၢ်မုၣ်တဖၣ်
တၢ်မၤလိအံၤ အတၢ်တိာ်ပာ် *
ပဒီပုၢ်ဝဲၢ်မုၣ်တဖၣ် အိၣ်ဒီးတၢ်သူၣ်ဆူၣ်သးဆူၣ် ဒီးတၢ်မၤအါမးလီၤ. အဝဲသ့ၣ်ထီၣ်တၢ်အိၣ်ဖှိၣ်ဒီး စံၣ်တဲၤတဲလီၤတၢ်, မၤစၢၤတၢ်လၢ တၢ်ကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်အလီၢ် ဒီးအဝဲသ့ၣ်ပာ်ဖျါထီၣ် တၢ်သးအိၣ် ဒီပုၢ်ဝဲၢ်မုၣ်ခွါတဖၣ်လီၤ. (ကွၢ်လံာ်အဆၢ ၁)
၁. ဒီပုၢ်ဝဲၢ်မုၣ်တဖၣ် ဆီၣ်ထွဲမၤစၢၤဝဲ တၢ်ကရၢကရိဒ်လဲၣ် ဘၣ်ဆၣ်အဝဲသ့ၣ်အါဂၤ ထံၣ်ဘၣ်ဒီး တၢ်ကီတၢ်ခဲ မနုၤတဖၣ်လဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)
ပထံၣ်ဘၣ်လၢ ပဒီပုၢ်ဝဲၢ်မုၣ်အါဂၤ ဟ့ၣ်လီၤအသးနီၢ်နီၢ်လၢ တၢ်အိၣ်ဖှိၣ်အပူၤအဃိ ပသးခုဒိၣ်မးလီၤ. အဒိ အဝဲသ့ၣ်ထီၣ် တၢ်အိၣ်ဖှိၣ်ထီဘိ ဒီးစံၣ်တဲၤတဲလီၤ တၢ်သးခုကစီၣ်လီၤ. အဝဲသ့ၣ်တနီၤ မၤစၢၤတၢ်လၢ တၢ်ကွၢ်ထွဲ ဘှီဂ့ၤထီၣ်က့ၤ ဘီမုၢ်ဘျီၣ်ဒိၣ် ဒီးအဝဲသ့ၣ်ပာ်ဖျါထီၣ် တၢ်သးအိၣ် ဒီပုၢ်ဝဲၢ်မုၣ်ခွါအဂၤတဖၣ်လီၤ. ဘၣ်ဆၣ် အဝဲသ့ၣ်ထံၣ်ဘၣ်ဒီး တၢ်ကီတၢ်ခဲတဖၣ် စ့ၢ်ကီးလီၤ. အဝဲသ့ၣ်တနီၤ ဘၣ်ကွၢ်ထွဲဝဲ အမိၢ်အပၢ်လၢ အသးပှၢ်တဖၣ် ဒီးအဂၤတနီၤန့ၣ် ထံၣ်ဘၣ်ဒီး ဟံၣ်ဖီဃီဖိ အတၢ်ထီဒုၣ်ထီဒါလီၤ. မ့မ့ၢ်လၢ အဂၤတနီၤန့ၣ် မ့ၢ်မိၢ်လၢ အဘၣ်ကွၢ်ဒိၣ်ထီၣ်အဖိ ထဲတဂၤဧိၤ ဒီးဘၣ်မၤတၢ်ဆူၣ်ဆူၣ်လၢ ကလုၢ်အီၣ်လုၢ်အီအဖိတဖၣ် အဂီၢ်လီၤ.
၂. ဘၣ်မနုၤအဃိ ပကဘၣ်ဂုာ်ကျဲးစၢး ဆီၣ်ထွဲမၤစၢၤ ပဒီပုၢ်ဝဲၢ်မုၣ်တဖၣ်လဲၣ်.
၂ ဘၣ်မနုၤအဃိ ပကဘၣ်ဆီၣ်ထွဲမၤစၢၤ ပဒီပုၢ်ဝဲၢ်မုၣ်တဖၣ်လဲၣ်. မ့ၢ်လၢ ပှၤဟီၣ်ခိၣ်ဖိတဖၣ် တပာ်လုၢ်ပာ်ပှ့ၤဝဲ ပိာ်မုၣ်တဖၣ်ဘၣ်အဃိလီၤ. ဘၣ်ဆၣ် လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကဘၣ်ဆီၣ်ထွဲမၤစၢၤ ဒီပုၢ်ဝဲၢ်မုၣ်တဖၣ်လီၤ. အဒိ တၢ်မၢဖိပီလူး တဲဘၣ်တၢ်အိၣ်ဖှိၣ် လၢရိမ့ၤအပူၤ လၢကတူၢ်လိာ်မုာ်ဝဲ နီၢ်ဖံဘ့ၤဒီး “ဟ့ၣ်အီၤတၢ်မၤစၢၤ တမံၤဂ့ၤတမံၤဂ့ၤလၢ အဝဲလိၣ်ဘၣ်ဝဲ လၢသုအိၣ်န့ၣ်တက့ၢ်.” (ရိမ့ၤ ၁၆:၁, ၂, ခ့ခါစှီၤကျိာ်) ဖဲစီၤပီလူးမ့ၢ်တ့ၢ် ပှၤဖၤရံၤၡဲအခါ အဝဲပာ်ဆံးဝဲ ပိာ်မုၣ်တဖၣ် ဒီးရ့ဒီးအဝဲသ့ၣ် ဒ်ပှၤပတီၢ်ဖုၣ်အသိးလီၤ. ဘၣ်ဆၣ် အဝဲကဲထီၣ်ခရံာ်ဖိ ဝံၤအလီၢ်ခံ အဝဲကွၢ်လိမၤဒိးယ့ၣ်ၡူး ဒီးရ့ဒီးပိာ်မုၣ်တဖၣ်လၢ တၢ်အဲၣ်တၢ်ကွံဒီး တၢ်ပာ်ကဲအပူၤလီၤ.—၁ ကရံၣ်သူး ၁၁:၁.
၃. ယ့ၣ်ၡူးရ့ဒီး ပိာ်မုၣ်ဒ်လဲၣ် ဒီးပိာ်မုၣ်လၢ အမၤကစၢ်ယွၤ တၢ်ဘၣ်သးတဖၣ်န့ၣ် ယ့ၣ်ၡူးထံၣ် အဝဲသ့ၣ်ဒ်လဲၣ်.
၃ ယ့ၣ်ၡူးရ့ဒီး ပိာ်မုၣ်တဖၣ် လၢတၢ်ပာ်ကဲအပူၤလီၤ. (ယိၤဟၣ် ၄:၂၇) ယ့ၣ်ၡူးတရ့ဒီး ပှၤပိာ်မုၣ်တဖၣ် ဒ်ပှၤယူဒၤဖိ တၢ်ဘူၣ်တၢ်ဘါခိၣ်နၢ် လၢအစိၤတဖၣ် ရ့ဝဲအသိးဘၣ်. လံာ်ပီညါဂံၢ်ထံးတဘ့ၣ်လၢ ဘၣ်ဃးဒီး လံာ်စီဆှံန့ၣ် တဲဝဲလၢ “ယ့ၣ်ၡူးတကတိၤ စံးအၢစံးသီပိာ်မုၣ် နီတဘျီဘၣ်.” လီၤဆီဒၣ်တၢ် ပိာ်မုၣ်လၢအမၤ ကစၢ်ယွၤ အတၢ်ဘၣ်သးတဖၣ်န့ၣ် ယ့ၣ်ၡူးပာ်လုၢ်ပာ်ပှ့ၤ အဝဲသ့ၣ်ဒိၣ်မးလီၤ. ယ့ၣ်ၡူးထံၣ်အဝဲသ့ၣ် ဒ်အဒီပုၢ်ဝဲၢ်မုၣ်အသိး တကးဒံးဘၣ် ယၢၤထီၣ်အဝဲသ့ၣ်လၢ ပိာ်ခွါတဖၣ်အကျါ ဒ်အဟံၣ်ဖိဃီဖိ လၢနီၣ်သးတခီ အသိးလီၤ.—မးသဲ ၁၂:၅၀.
၄. လၢတၢ်မၤလိအံၤအပူၤ ပကတဲသကိး တၢ်မနုၤလဲၣ်.
၄ ပိာ်မုၣ်လၢ အမၤကစၢ်ယွၤ အတၢ်မၤတဖၣ်န့ၣ် ယ့ၣ်ၡူးသးအိၣ် မၤစၢၤအဝဲသ့ၣ်လီၤ. ယ့ၣ်ၡူးပာ်လုၢ်ပာ်ပှ့ၤဒီး ဒီသဒၢအဝဲသ့ၣ်လီၤ. ခဲအံၤ ပကတဲသကိး ပကွၢ်လိမၤဒိး ယ့ၣ်ၡူးအဒိအတဲာ် လၢပကပာ်ဖျါထီၣ် တၢ်ဒိသူၣ်ဒိသးလၢ ပဒီပုၢ်ဝဲၢ်မုၣ်တဖၣ်အဖီခိၣ် ကသ့ဒ်လဲၣ်န့ၣ်လီၤ.
ဆိကမိၣ်န့ၢ်တၢ်လၢ ပဒီပုၢ်ဝဲၢ်မုၣ်တဖၣ်အဂီၢ်
၅. ဘၣ်မနုၤအဃိ ဒီပုၢ်ဝဲၢ်မုၣ်တနီၤ ကရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်အဂီၢ် တညီဝဲလဲၣ်.
၅ ပဝဲဒီပုၢ်ဝဲၢ်မုၣ်ခွါခဲလၢာ် လိၣ်ဘၣ် တၢ်ရ့လိာ်မုာ်လိာ် လၢအဂ့ၤလီၤ. တဘျီတခီၣ် ဒီပုၢ်ဝဲၢ်မုၣ်တဖၣ် ကမၤဝဲဒ်န့ၣ်အဂီၢ် တညီဝဲဘၣ်. ဘၣ်မနုၤအဃိလဲၣ်. ပကကွၢ်သကိး တၢ်လဲၤခီဖျိတဖၣ်အံၤလီၤ. ဒီပုၢ်ဝဲၢ်မုၣ် ကၠီဒၢၤ * တဲဝဲလၢ “ခီဖျိလၢ ယမ့ၢ်ပှၤသဘျ့အဃိ ယတူၢ်ဘၣ်လၢ တၢ်အိၣ်ဖှိၣ်အပူၤန့ၣ် ယမူဒါတအိၣ်ဘၣ် အဃိ လီၤဂာ်လၢ ယတဘၣ်ထွဲဒီး တၢ်အိၣ်ဖှိၣ်အံၤဘၣ်.” ဒီပုၢ်ဝဲၢ်မုၣ် ခရံာ်စတံ စ့ၢ်ကီး မ့ၢ်ပှၤလဲၤလၢညါ ဒီးအဝဲလဲၤသုးအလီၢ်လၢ ကမၤအါထီၣ် တၢ်စံၣ်တဲၤတဲလီၤတၢ်မၤအဂီၢ်န့ၣ် အတဲဝဲလၢ “ဖဲနလဲၤပၠီ လၢတၢ်အိၣ်ဖှိၣ် အသီတဖျၢၣ်အခါ နကတူၢ်ဘၣ်လၢ နအိၣ်သယုၢ်သညိလီၤ.” ဘၣ်သ့ၣ်သ့ၣ် ဒီပုၢ်ဝဲၢ်တနီၤ ကတူၢ်ဘၣ်ဝဲဒ်န့ၣ်လီၤ. ဘၣ်ဆၣ် ပှၤလၢအဟံၣ်ဖိဃီဖိ တမ့ၢ်ယဟိဝၤ ပှၤအုၣ်အသးဘၣ်န့ၣ် ကီလၢအကရ့လိာ်သး ဒီးအဟံၣ်ဖိဃီဖိ ဒီးတကတီၢ်ဃီန့ၣ် အဝဲသ့ၣ်ကတူၢ်ဘၣ်လၢ အအိၣ်ယံၤဒီး အဟံၣ်ဖိဃီဖိလၢ နီၢ်သးတခီလီၤ. ဒီပုၢ်ဝဲၢ်မုၣ်တနီၤန့ၣ် အဝဲသ့ၣ်တူၢ်ဘၣ်လၢ အအိၣ်ထဲတဂၤဧိၤ မ့ၢ်လၢ အဝဲသ့ၣ်ဘၣ်ကွၢ်ထွဲ အဟံၣ်ဖိဃီဖိလၢ အအိၣ်တဆူၣ်ဘၣ်အဃိလီၤ. ဒီပုၢ်ဝဲၢ်မုၣ် အနဲ(ထ်) တဲဝဲလၢ “မ့ၢ်လၢ ယဘၣ်ကွၢ်ထွဲ ယမိအဃိ ယတရ့လိာ်ဘၣ်ယသး ဒီးဒီပုၢ်ဝဲၢ်မုၣ်ခွါတဖၣ်ဘၣ်.”
ဒ်ယ့ၣ်ၡူးအသိး ပပာ်ဖျါထီၣ် တၢ်အဲၣ်ဒီး တၢ်သူၣ်အိၣ်သးအိၣ် ပဒီပုၢ်ဝဲၢ်မုၣ်တဖၣ် သ့ဝဲလီၤ (ကွၢ်လံာ်အဆၢ ၆-၉) *
၆. ဒ် လူၤကၣ် ၁၀:၃၈-၄၂ ပာ်ဖျါထီၣ်ဝဲအသိး ယ့ၣ်ၡူးမၤစၢၤဝဲ နီၢ်မၤရံဒီး နီၢ်မၢ်သၤဒ်လဲၣ်.
၆ ယ့ၣ်ၡူးရ့ဒီး ဒီပုၢ်ဝဲၢ်မုၣ်လၢ အမၤယွၤအတၢ်မၤတဖၣ် ဒ်အတံၤသကိး တံၢ်နီၢ်အသိးလီၤ. ပကကွၢ်သကိး ယ့ၣ်ၡူးရ့ဒီး အတံၤသကိး နီၢ်မၤရံ ဒီးနီၢ်မၢ်သၤဒ်လဲၣ်န့ၣ်လီၤ. ဒီးအဝဲသ့ၣ်ခံဂၤလၢာ်န့ၣ် မ့ၢ်ဝဲပှၤသဘျ့လီၤ. (ဖး လူၤကၣ် ၁၀:၃၈-၄၂ တက့ၢ်.) ခီဖျိလၢ ယ့ၣ်ၡူး အတၢ်စံးတၢ်ကတိၤဒီး အတၢ်မၤအဃိ ပှၤရ့အီၤ ညီဒိၣ်မးလီၤ. အဒိ နီၢ်မၤရံ လဲၤဆ့ၣ်နီၤဝဲလၢ ယ့ၣ်ၡူးအခီၣ်ထံး ဒ်ယ့ၣ်ၡူးအပျဲၢ်အဘီၣ်တဂၤ * အသိးလီၤ. ဒီးနီၢ်မၢ်သၤ သးထီၣ်ဝဲနီၢ်မၤရံ မ့ၢ်လၢနီၢ်မၤရံ တမၤစၢၤအီၤဘၣ်အဃိ အဝဲလဲၤတဲပၠးဝဲ ယ့ၣ်ၡူးလၢ အတၢ်တူၢ်ဘၣ်တဖၣ် ပျီပျီလီၤ. ဖဲတၢ်ကဲထီၣ်သးဒ်အံၤအခါ ယ့ၣ်ၡူးမၤစၢၤဝဲ အဝဲသ့ၣ်ခံဂၤလၢာ်လၢ ကပာ်လုၢ်ပာ်ပှ့ၤ တၢ်လၢနီၢ်သးတခီလီၤ. ဒီးယ့ၣ်ၡူး သူၣ်အိၣ်သးအိၣ်အဝဲသ့ၣ် ဒီးအဒီပုၢ်ဝဲၢ်ခွါ စီၤလါစရူး ခီဖျိလဲၤဟးအိၣ်သကိး အဝဲသ့ၣ်လၢ တၢ်ဆၢကတီၢ်အဂၤစ့ၢ်ကီးလီၤ. (ယိၤဟၣ် ၁၂:၁-၃) ဖဲစီၤလါစရူး အိၣ်တဆူၣ်ဘၣ် နးနးကလဲာ်အခါ နီၢ်မၤရံဒီးနီၢ်မၢ်သၤ သ့ၣ်ညါဝဲဒၣ်လၢ ယ့ၣ်ၡူးမၤစၢၤအဝဲသ့ၣ်သ့လီၤ.—ယိၤဟၣ် ၁၁:၃, ၅.
၇. ပဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်တဖၣ် ကသ့ဒ်လဲၣ်.
၇ ဒီပုၢ်ဝဲၢ်မုၣ်တနီၤ တူၢ်ဘၣ်ဝဲလၢ အဝဲသ့ၣ်မ့ၢ်လဲၤထီၣ် တၢ်အိၣ်ဖှိၣ်န့ၣ် မ့ၢ်ဝဲတၢ်ခွဲးတၢ်ယာ်တခါလၢ ကရ့လိာ်ဘၣ်အသး ဒီးဒီပုၢ်ဝဲၢ်မုၣ်ခွါတဖၣ်လီၤ. အဃိ ပအဲၣ်ဒိးတူၢ်လိာ်မုာ်အဝဲသ့ၣ်, တဲတၢ်ဒီးအီၤ ဒီးဒုးသ့ၣ်ညါအီၤလၢ ပသးအိၣ်အဝဲသ့ၣ်လီၤ. ဒီပုၢ်ဝဲၢ်မုၣ် ကၠီဒၢၤ တဲဝဲလၢ “ဖဲယဟ့ၣ်ထီၣ် တၢ်စံးဆၢလၢ တၢ်အိၣ်ဖှိၣ်အပူၤအခါ ပှၤဂၤစံးပတြၢၤယၤ, ရဲၣ်ကျဲၤဝဲလၢ ကလဲၤစံၣ်တဲၤတဲလီၤတၢ်ဒီးယၤ ဒီးမၤစၢၤယၤလၢ ကျဲတဘိဂ့ၤတဘိဂ့ၤန့ၣ် ကဲထီၣ်တၢ်ဂံၢ်တၢ်ဘါလၢ ယဂီၢ်ဒိၣ်မး.” ပကဘၣ်ဒုးသ့ၣ်ညါ ပဒီပုၢ်ဝဲၢ်မုၣ်တဖၣ်လၢ ပအဲၣ်အဝဲသ့ၣ်လီၤ. ဒီပုၢ်ဝဲၢ်မုၣ် ခံယါ တဲဝဲလၢ “ယမ့ၢ်တလဲၤထီၣ် တၢ်အိၣ်ဖှိၣ်ဘၣ်န့ၣ် ဒီပုၢ်ဝဲၢ်မုၣ်ခွါတဖၣ် ဆှၢန့ၢ်ယၤ မဲးစ့း ဒီးသံကွၢ်ယၤလၢ မ့ၢ်ယဘၣ်တၢ်တမံၤမံၤဧါ အဃိ ယသ့ၣ်ညါလၢ ဒီပုၢ်ဝဲၢ်တဖၣ်အံၤ သးအိၣ်ယၤနီၢ်နီၢ်” လီၤ.
၈. ကျဲအဂၤလၢ ပကွၢ်လိမၤဒိး ယ့ၣ်ၡူးအဒိအတဲာ်သ့န့ၣ် မ့ၢ်မနုၤလဲၣ်.
၈ ဒ်ယ့ၣ်ၡူးအသိး ပကဘၣ်ဂုာ်ကျဲးစၢး ဟ့ၣ်တၢ်ဆၢကတီၢ်လၢ ပဒီပုၢ်ဝဲၢ်မုၣ်တဖၣ်အဂီၢ်လီၤ. ဘၣ်သ့ၣ်သ့ၣ် ပကွဲမုာ်အဝဲသ့ၣ်လၢပဟံၣ် ဒ်သိးပကအီၣ်သကိးတၢ် ဒီးပကရ့လိာ်သးအဂီၢ်လီၤ. ဖဲပမၤဒ်န့ၣ်အခါ ပအဲၣ်ဒိးလၢ ပတၢ်ရ့လိာ်သးန့ၣ် ကကဲထီၣ်ဝဲ တၢ်ဂံၢ်တၢ်ဘါလီၤ. (ရိမ့ၤ ၁:၁၁, ၁၂) တၢ်အိၣ်ဖှိၣ်သးပှၢ်တဖၣ် ကဘၣ်အိၣ်ဒီး တၢ်ပာ်သူၣ်ပာ်သး ဒ်ယ့ၣ်ၡူးအသိးလီၤ. ယ့ၣ်ၡူးသ့ၣ်ညါဝဲလၢ ပှၤတနီၤကအိၣ်သဘျ့အဂီၢ် တညီဝဲဘၣ်. ဘၣ်ဆၣ် အဝဲတဲဝဲဒၣ်ပျီပျီလၢ တၢ်သးခုနီၢ်နီၢ်န့ၣ် တဒိးသန့ၤထီၣ်အသးလၢ တၢ်ဆီဟံၣ်ဆီဃီ ဒီးတၢ်ဟံးဖိဟံးလံၤန့ၣ်ဘၣ်. (လူၤကၣ် ၁၁:၂၇, ၂၈) လၢတၢ်န့ၣ်အလီၢ် ပမ့ၢ်ပာ်ဆိ ယဟိဝၤယွၤအတၢ်မၤလၢ နီၣ်ဂံၢ်တၢန့ၣ် ပကအိၣ်ဒီး တၢ်သးခုနီၢ်နီၢ်လီၤ.—မးသဲ ၁၉:၁၂.
၉. တၢ်အိၣ်ဖှိၣ်သးပှၢ်တဖၣ် မၤစၢၤဝဲ ဒီပုၢ်ဝဲၢ်မုၣ်တဖၣ် ကသ့ဒ်လဲၣ်.
၉ လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ် ကဘၣ်ရ့ဒီး ခရံာ်ဖိဒီပုၢ်ဝဲၢ်မုၣ်တဖၣ် ဒ်အဒီပုၢ်ဝဲၢ်မုၣ် ဒီးအမိၢ်လၢ နီၢ်သးတခီအသိးလီၤ. (၁ တံၤမသ့း ၅:၁, ၂) ဖဲတၢ်အိၣ်ဖှိၣ်တချုးထီၣ် ဒီးတၢ်အိၣ်ဖှိၣ်ဝံၤအလီၢ်ခံန့ၣ် တၢ်အိၣ်ဖှိၣ်သးပှၢ်တဖၣ် ကဟံးန့ၢ်တၢ်ဆၢကတီၢ်လၢ ကဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်တဖၣ်လီၤ. ဒီပုၢ်ဝဲၢ်မုၣ် ခရံာ်စတံ တဲဝဲလၢ “တၢ်အိၣ်ဖှိၣ်သးပှၢ်တဂၤ ပာ်သူၣ်ပာ်သးဘၣ်ဝဲလၢ ယတၢ်မၤအါအဃိ အဝဲသံကွၢ်ယၤလၢ တနံၤဘၣ်တနံၤန့ၣ် ယတၢ်ရဲၣ်တၢ်ကျဲၤအိၣ်ဒ်လဲၣ်. ယသ့ၣ်ညါလၢ အဝဲဘၣ်ယိၣ်တၢ်လၢ ယဂီၢ်အဃိ ယသးခုဒိၣ်မး.” ဖဲတၢ်အိၣ်ဖှိၣ်သးပှၢ်တဖၣ် ဟံးန့ၢ်တၢ်ဆၢကတီၢ်လၢ ကတဲတၢ်ဒီး ဒီပုၢ်ဝဲၢ်မုၣ်တဖၣ်အခါ အဝဲသ့ၣ်ပာ်ဖျါထီၣ်လၢ အသူၣ်အိၣ်သးအိၣ်ဝဲ ဒီပုၢ်ဝဲၢ်မုၣ်တဖၣ်နီၢ်နီၢ်လီၤ. * အနဲ(ထ်) ပာ်ဖျါထီၣ်ဝဲလၢ ပမ့ၢ်တဲတၢ်ဒီး တၢ်အိၣ်ဖှိၣ်သးပှၢ် ခဲအံၤခဲအံၤန့ၣ် ကဲဘျုးဝဲဒိၣ်မးလီၤ. အဝဲတဲဝဲလၢ “ယသ့ၣ်ညါအါထီၣ် အဝဲသ့ၣ်ဒီး အဝဲသ့ၣ်စ့ၢ်ကီး သ့ၣ်ညါယၤဂ့ၤဂ့ၤလီၤ. ဖဲယထံၣ်ဘၣ် တၢ်ကီတၢ်ခဲအခါ ယလဲၤဃ့တၢ်မၤစၢၤလၢ အဝဲသ့ၣ်အအိၣ်ညီဝဲလီၤ.”
ပာ်လုၢ်ပာ်ပှ့ၤ ပဒီပုၢ်ဝဲၢ်မုၣ်တဖၣ်
၁၀. ဒ်သိးပဒီပုၢ်ဝဲၢ်မုၣ်တဖၣ် ကအိၣ်ဒီးတၢ်သးခုအဂီၢ် တၢ်မနုၤမၤစၢၤအဝဲသ့ၣ်လဲၣ်.
၁၀ ပဝဲခဲလၢာ် ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ ဖဲပှၤဂၤပာ်သူၣ်ပာ်သးဘၣ်ဝဲ ပတၢ်သ့တၢ်ဘၣ် ဒီးတဲပှၤလၢ အပာ်လုၢ်ပာ်ပှ့ၤ တၢ်လၢပမၤတဖၣ်အခါ ပသးခုဒိၣ်မးလီၤ. ဘၣ်ဆၣ် ပှၤမ့ၢ်တပာ်လုၢ်ပာ်ပှ့ၤ ပတၢ်သ့တၢ်ဘၣ် ဒီးတၢ်လၢပမၤအီၤတဖၣ်ဘၣ်န့ၣ် ပသးကလီၤစၢ်ဝဲလီၤ. ဒီပုၢ်ဝဲၢ်မုၣ် အဘံၤကဲ(လ်) လၢအမၤ ပှၤလဲၤလၢညါန့ၣ် တူၢ်ဘၣ်ဝဲလၢ ပှၤကွၢ်ကပာ်အီၤလီၤ. အဝဲတဲဝဲလၢ “ပှၤတသ့ၣ်ညါယၤဂ့ၤဂ့ၤဘၣ်, ပှၤသ့ၣ်ညါယၤ ခီဖျိလၢ ယမ့ၢ်ပှၤတဂၤန့ၣ် အဒီပုၢ်ဝဲၢ်မုၣ် ဒီးပှၤတဂၤန့ၣ် အဖိမုၣ်အဃိလီၤ.” မ့မ့ၢ်လၢ ဒီပုၢ်ဝဲၢ်မုၣ် ဖဲၤ(မ်) န့ၣ် ဖဲအသးစၢ်အခါ အမၤဝဲ မံးၡ့ၣ်နရ့ၣ်တၢ်မၤ တဘျုးနံၣ်ညါ ဒီးအမ့ၢ် ပှၤသဘျ့တဂၤစ့ၢ်ကီးလီၤ. လၢခံ အဝဲဘၣ်က့ၤကွၢ်ထွဲက့ၤ အမိၢ်အပၢ်လၢဟံၣ်လီၤ. ခဲအံၤ အသးနံၣ်အိၣ် ၇၀ လံ သနာ်က့ အဝဲဆဲးမၤဒံး ပှၤလဲၤလၢညါလီၤ. ဖဲၤ(မ်) တဲဝဲလၢ “တၢ်လၢအကဲထီၣ် တၢ်ဂံၢ်တၢ်ဘါ လၢယဂီၢ် အဒိၣ်ကတၢၢ်န့ၣ် မ့ၢ်ဝဲပှၤဂၤတဖၣ် တဲယၤလၢ တၢ်လၢယမၤတဖၣ်န့ၣ် အဝဲသ့ၣ် ပာ်လုၢ်ပာ်ပှ့ၤဝဲ ဒိၣ်မးလီၤ.”
၁၁. ယ့ၣ်ၡူးပာ်ဖျါထီၣ်ဝဲလၢ အပာ်လုၢ်ပာ်ပှ့ၤ ပိာ်မုၣ်တဖၣ်လၢ အမၤစၢၤအီၤန့ၣ်ဒ်လဲၣ်.
၁၁ ပိာ်မုၣ်လၢအအိၣ်ဒီး တၢ်သးတီတဖၣ် လၢအမၤစၢၤယ့ၣ်ၡူး ခီဖျိဟ့ၣ်လီၤ “အစုလီၢ်ခီၣ်ခိၣ်” န့ၣ် ယ့ၣ်ၡူးပာ်လုၢ်ပာ်ပှ့ၤအဝဲသ့ၣ် ဒီးတူၢ်လိာ်အဝဲသ့ၣ် အတၢ်မၤစၢၤလီၤ. (လူၤကၣ် ၈:၁-၃) အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကမၤစၢၤဘၣ်ယ့ၣ်ၡူး တကးဒံးဘၣ် ယ့ၣ်ၡူးသိၣ်လိအဝဲသ့ၣ် တၢ်မ့ၢ်တၢ်တီဘၣ်ဃးဒီး ကစၢ်ယွၤအတၢ်ဘၣ်သး အဂ့ၢ်လီၤ. အဒိ ယ့ၣ်ၡူး ဒုးသ့ၣ်ညါအဝဲသ့ၣ်လၢ အကဘၣ်သံ ဒီးအကဂဲၤဆၢထၢၣ် သမူထီၣ်က့ၤလီၤ. (လူၤကၣ် ၂၄:၅-၈) ဒ်ယ့ၣ်ၡူးမၤစၢၤဝဲ တၢ်မၢဖိတဖၣ်အသိး အမၤစၢၤဝဲ ပိာ်မုၣ်တဖၣ်အံၤ ဒ်သိးအဝဲသ့ၣ် လဲၤခီဖျိတၢ်ကီတၢ်ခဲတဖၣ် ကန့ၢ်အဂီၢ်လီၤ. (မၢ်ကူး ၉:၃၀-၃၂; ၁၀:၃၂-၃၄) ဖဲပှၤဖီၣ်ဝဲ ယ့ၣ်ၡူးအခါ အတၢ်မၢဖိတဖၣ် ဃ့ၢ်ကွံာ်ဝဲခဲလၢာ်လီၤ. ဘၣ်ဆၣ် ဖဲယ့ၣ်ၡူး ဘၣ်တၢ်မၤသံအီၤလၢ သ့ၣ်တၢၣ်လိၤအခါ ပိာ်မုၣ်လၢအဆီၣ်ထွဲ မၤစၢၤအီၤတဖၣ်အံၤ ဆဲးအိၣ်ဝဲလၢ အခီၣ်ထံးလီၤ.—မးသဲ ၂၆:၅၆; မၢ်ကူး ၁၅:၄၀, ၄၁.
၁၂. ယ့ၣ်ၡူးဟ့ၣ်လီၤ ပိာ်မုၣ်တဖၣ်လၢ မူဒါမနုၤလဲၣ်.
၁၂ ယ့ၣ်ၡူးဟ့ၣ်လီၤ မူဒါအရ့ဒိၣ်တဖၣ်လၢ ပိာ်မုၣ်အအိၣ် စ့ၢ်ကီးလီၤ. အဒိ ပိာ်မုၣ်လၢအအိၣ်ဒီး တၢ်သးတီတဖၣ်အံၤ အဝဲသ့ၣ်မ့ၢ်ပှၤ အဆိကတၢၢ်လၢ ထံၣ်ဘၣ်ဝဲ ယ့ၣ်ၡူးအတၢ်ဂဲၤဆၢထၢၣ် သမူထီၣ်က့ၤလီၤ. အဝဲမၢပိာ်မုၣ်တဖၣ်အံၤလၢ ကလဲၤတဲဘၣ် အတၢ်မၢဖိတဖၣ်လၢ အဝဲဂဲၤဆၢထၢၣ် သမူထီၣ်က့ၤလံန့ၣ်လီၤ. (မးသဲ ၂၈:၅, ၉, ၁၀) ဒီးဖဲ ခ.န ၃၃ ဘူၣ်ယဲၢ်ဆံအနံၤန့ၣ် သးစီဆှံဟဲလီၤလၢ ယ့ၣ်ၡူးအပျဲၢ်အဘီၣ်တဖၣ် အလိၤအခါ ပိာ်မုၣ်တဖၣ် ကအိၣ်ဝဲဖဲန့ၣ်စ့ၢ်ကီးလီၤ. မ့မ့ၢ်ဒ်န့ၣ်န့ၣ် ပိာ်မုၣ်တဖၣ်အံၤ ကဒိးန့ၢ်ဘၣ် တၢ်သ့တၢ်ဘၣ်လၢ ကတဲတၢ်လၢ ကျိာ်အဂၤတဖၣ် ဒီးကတဲဘၣ်ပှၤဂၤ ဘၣ်ဃးဒီး “ယွၤအတၢ်လီၤလိၢ်လီၤလး” အဂ့ၢ်န့ၣ်လီၤ.—မၤတၢ် ၁:၁၄; ၂:၂-၄, ၁၁.
၁၃. မုၢ်မဆါတနံၤအံၤ ဒီပုၢ်ဝဲၢ်မုၣ်တဖၣ် မၤဝဲတၢ်မနုၤလဲၣ် ဒီးပပာ်ဖျါထီၣ်လၢ ပပာ်လုၢ်ပာ်ပှ့ၤ အဝဲသ့ၣ်အတၢ်မၤ ကသ့ဒ်လဲၣ်.
၁၃ ကယဲၢ်ယဟိဝၤယွၤ အတၢ်မၤလၢ ပဒီပုၢ်ဝဲၢ်မုၣ်တဖၣ်မၤဝဲန့ၣ် ကြၢးဒိန့ၢ်ဘၣ် ပတၢ်စံးပတြၢၤလီၤ. တၢ်မၤတဖၣ်န့ၣ် ပၣ်ဃုာ်ဒီး တၢ်သူၣ်ထီၣ်ဘှီထီၣ် ဒီးတၢ်ဘှီဂ့ၤထီၣ်က့ၤ တၢ်သူၣ်ထီၣ်, လဲၤမၤစၢၤတၢ်လၢ ကျိာ်အဂၤတဖၣ် ဒီးမၤစၢၤတၢ်လၢ ဘ့ၤသ့လးလီၤ. တကးဒံးဘၣ် အဝဲသ့ၣ်မၤစၢၤစ့ၢ်ကီးတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်, တၢ်ကွဲးကျိာ်ထံတၢ်မၤ ဒီးမၤဝဲပှၤလဲၤလၢညါ ဒီးမံးၡ့ၣ်နရ့ၣ်လီၤ. ဒ်ဒီပုၢ်ဝဲၢ်ခွါတဖၣ်အသိး ပဒီပုၢ်ဝဲၢ်မုၣ်တဖၣ်အံၤ လဲၤထီၣ်ဘၣ်ဝဲ ပှၤလဲၤလၢညါကၠိ, ပှၤစိာ်ဘီမုၢ်တၢ်သးခုကစီၣ်ဖိကၠိ ဒီးကံးလဧးကၠိလီၤ. တကးဒံးဘၣ် မါတဖၣ် ဆီၣ်ထွဲမၤစၢၤဝဲ အဝၤဒ်သိး အဝဲသ့ၣ်မၤလၢပှဲၤ အမူဒါတဖၣ် လၢတၢ်အိၣ်ဖှိၣ်ဒီး တၢ်ကရၢကရိအပူၤ ကန့ၢ်အဂီၢ်လီၤ. ဒီပုၢ်ဝဲၢ်ခွါတဖၣ်အံၤ မ့ၢ်ဝဲ “တၢ်ဘျုးတၢ်ဖှိၣ် လၢပှၤကညီ” ဒီးမၤတၢ်အါမးလၢ ဒီပုၢ်ဝဲၢ်မုၣ်ခွါတဖၣ် အဂီၢ်လီၤ. ဘၣ်ဆၣ် အမါမ့ၢ်တဆီၣ်ထွဲမၤစၢၤ အဝဲသ့ၣ်ဘၣ်န့ၣ် အဝဲသ့ၣ်မၤလၢပှဲၤဝဲ အမူဒါတဖၣ် တတုၤထီၣ်ထီၣ်ဘးဘၣ်. (အ့းဖ့းစူး ၄:၈) တၢ်မၤလၢ ပဒီပုၢ်ဝဲၢ်မုၣ်တဖၣ် မၤဝဲန့ၣ် ပဆီၣ်ထွဲမၤစၢၤအဝဲသ့ၣ် လၢကျဲအဂၤကသ့ဧါ.
၁၄. ဒ် စံးထီၣ်ပတြၢၤ ၆၈:၁၁ ပာ်ဖျါထီၣ်ဝဲအသိး တၢ်အိၣ်ဖှိၣ်သးပှၢ်တဖၣ် မၤဝဲတၢ်မနုၤလဲၣ်.
၁၄ တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ ဒီပုၢ်ဝဲၢ်မုၣ်တဖၣ်န့ၣ် “အိၣ်ဂီၢ်မုၢ်ဖးဒိၣ်” လီၤ. အဝဲသ့ၣ် သးအိၣ်ဟ့ၣ်လီၤသးဒီး စံၣ်တဲၤတဲလီၤတၢ်သးခုကစီၣ် သပှၢ်ပှၢ်လီၤ. (ဖး စံးထီၣ်ပတြၢၤ ၆၈:၁၁ တက့ၢ်.) အဃိ တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်အါမးလၢ ဒီပုၢ်ဝဲၢ်မုၣ်တဖၣ်အံၤ အအိၣ်လီၤ. ဖဲဒီပုၢ်ဝဲၢ်ခွါတဖၣ် သံကွၢ် အဘံၤကဲ(လ်) လၢ နတဲသကိးတၢ်ဒီး ပှၤလၢနလီၢ်ကဝီၤအပူၤ သ့ဂ့ၤဂ့ၤဒ်လဲၣ်အခါ ကဲထီၣ်တၢ်ဂံၢ်တၢ်ဘါ လၢအဂီၢ်ဒိၣ်မးလီၤ. အဃိ အတဲဝဲလၢ “ယသ့ၣ်ညါထီၣ်လၢ ယဟိဝၤယွၤသူယၤ လၢအတၢ်ကရၢကရိအပူၤသ့.” တကးဒံးဘၣ် တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ ဒီပုၢ်ဝဲၢ်မုၣ်လၢ အဒိၣ်တုၤခိၣ်ပှဲၤတဖၣ်န့ၣ် မၤစၢၤဝဲ ဒီပုၢ်ဝဲၢ်မုၣ်သးစၢ်တဖၣ် ဒ်သိးလဲၤခီဖျိဝဲ တၢ်ကီတၢ်ခဲတဖၣ် ကန့ၢ်အဂီၢ်လီၤ. (တံတူး ၂:၃-၅) ပဒီပုၢ်ဝဲၢ်မုၣ်တဖၣ်န့ၣ် ကြၢးဒိးန့ၢ်ဘၣ်ဝဲ ပတၢ်အဲၣ်ဒီး ပတၢ်စံးဘျုးစံးဖှိၣ်လီၤ.
ဒီသဒၢဒီးမၤစၢၤ ပဒီပုၢ်ဝဲၢ်မုၣ်တဖၣ်
၁၅. ဒီပုၢ်ဝဲၢ်မုၣ်တဖၣ် လိၣ်ဘၣ်လၢ ပှၤဂၤကတဲန့ၢ်တၢ်လၢအဂီၢ် အခါဖဲလဲၣ်.
၁၅ တဘျီတခီၣ် ဖဲပဒီပုၢ်ဝဲၢ်မုၣ်တဖၣ် ထံၣ်ဘၣ်ဒီး တၢ်ကီတၢ်ခဲအခါ ပကဘၣ်မၤစၢၤ အဝဲသ့ၣ်လီၤ. (ယၡါယၤ ၁:၁၇) အဒိ ဒီပုၢ်ဝဲၢ်မုၣ်လၢ အမ့ၢ်မုၣ်ကမဲ မ့တမ့ၢ် ဒီပုၢ်ဝဲၢ်မုၣ်လၢ အလီၤဖးဒီးအဝၤန့ၣ် ကလိၣ်ဘၣ်ပှၤတဲန့ၢ်တၢ် လၢအဝဲသ့ၣ်အဂီၢ် ဒီးတၢ်မၤလၢအဝၤမၤတ့ၢ်ဝဲတဖၣ်န့ၣ် အဝဲသ့ၣ်လိၣ်ဘၣ်လၢ ပှၤဂၤကမၤစၢၤအီၤလီၤ. ဒီပုၢ်ဝဲၢ်မုၣ်သးပှၢ်တဂၤ လိၣ်ဘၣ်တၢ်မၤစၢၤလၢ ပှၤဂၤကတဲစၢၤန့ၢ်အီၤတၢ်လၢ ကသံၣ်သရၣ်န့ၣ်လီၤ. ဒီပုၢ်ဝဲၢ်မုၣ်လၢ အမၤပှၤလဲၤလၢညါတဂၤန့ၣ် အလဲၤမၤစၢၤတၢ်လၢ တၢ်ကရၢကရိ အတၢ်ဖံးတၢ်မၤအဃိ အဝဲလဲၤစံၣ်တဲၤတဲလီၤတၢ် တချုးအါအါလၢၤဘၣ်. ဒီးဒီပုၢ်ဝဲၢ်တဖၣ် မ့ၢ်တဲအီၤလၢ အကဲပှၤလဲၤလၢညါ ဘၣ်ဆၣ် အဝဲတဟးစံၣ်တဲၤတဲလီၤတၢ်ဘၣ်န့ၣ် ပကဘၣ်တဲန့ၢ်တၢ်လၢ အဂီၢ်လီၤ. ပမၤစၢၤဒံး ပဒီပုၢ်ဝဲၢ်မုၣ်တဖၣ် ကသ့ဒ်လဲၣ်. ခဲအံၤ ပကကွၢ်သကိး ယ့ၣ်ၡူးအဒိအတဲာ်လီၤ.
၁၆. ဒ် မၢ်ကူး ၁၄:၃-၉ ပာ်ဖျါထီၣ်အသိး ယ့ၣ်ၡူးဒီသဒၢဝဲ နီၢ်မၤရံဒ်လဲၣ်.
၁၆ ဖဲပှၤဆိကမိၣ်ကမၣ်ဝဲ ယ့ၣ်ၡူးအနီၢ်သး ဒီပုၢ်ဝဲၢ်မုၣ်တဖၣ်အခါ ယ့ၣ်ၡူးဒီသဒၢအဝဲသ့ၣ် တဘျီဃီလီၤ. အဒိ ဖဲနီၢ်မၢ်သၤ ကဒူးကဒ့ၣ်ဝဲ နီၢ်မၤရံအခါ ယ့ၣ်ၡူးဒီသဒၢ နီၢ်မၤရံလီၤ. (လူၤကၣ် ၁၀:၃၈-၄၂) ဖဲပှၤဂၤထံၣ်ကမၣ်ဝဲလၢ နီၢ်မၤရံမၤတၢ် တကြၢးတဘၣ်ဘၣ်အခါ ယ့ၣ်ၡူးဒီသဒၢကဒီးအီၤလီၤ. (ဖး မၢ်ကူး ၁၄:၃-၉) ယ့ၣ်ၡူးနၢ်ပၢၢ်စၢၤ နီၢ်မၤရံ ဒီးစံးပတြၢၤအီၤလီၤ. ယ့ၣ်ၡူးတဲဝဲလၢ နီၢ်မၤရံ “မၤလံယၤလၢ တၢ်မၤအဂ့ၤလံ. . . . ပိာ်မုၣ်အံၤ ဖဲအမၤသ့ဒီး မၤလံဝဲလံ.” တကးဒံးဘၣ် ဒ် “တၢ်သးခုအကစီၣ်အံၤ ဘၣ်တၢ်စံၣ်တဲၤတဲလီၤ လၢဟီၣ်ခိၣ်ဒီဘ့ၣ်ညါ” အသိးန့ၣ် ယ့ၣ်ၡူးတဲဆိပာ်ဝဲလၢ နီၢ်မၤရံအတၢ်ဖံးတၢ်မၤစ့ၢ်ကီး ကဘၣ်တၢ်သ့ၣ်ညါအီၤလီၤ. အဃိ လၢတၢ်မၤလိအံၤအပူၤ ပထံၣ်ဘၣ်လၢ တၢ်ဂ့ၢ်အံၤ ဟဲလၢထီၣ်ပှဲၤထီၣ်ဝဲန့ၣ်လီၤ. လီၤသူၣ်အိၣ်သးအိၣ်ဒိၣ်မးလၢ တၢ်သးခုကစီၣ်အံၤ ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါန့ၣ် ယ့ၣ်ၡူးထိၣ်သတြီၤဝဲဒီး တၢ်လၢနီၢ်မၤရံမၤဝဲ တဖၣ်န့ၣ်လီၤ. ဖဲပှၤရ့ဒီးနီၢ်မၤရံ တတီတလိၤဘၣ်အခါ ယ့ၣ်ၡူးအတၢ်ကတိၤန့ၣ် မၤမုာ်ထီၣ်ဝဲ နီၢ်မၤရံအသး ဒိၣ်မးလီၤ.
၁၇. ပကဘၣ်တဲစၢၤန့ၢ်တၢ်လၢ ပဒီပုၢ်ဝဲၢ်မုၣ်အဂီၢ် အခါဖဲလဲၣ်န့ၣ် ဟ့ၣ်တၢ်အဒိတက့ၢ်.
၁၇ ဖဲပှၤဆိကမိၣ်ကမၣ်ဘၣ် ပဒီပုၢ်ဝဲၢ်မုၣ်တဖၣ်အခါ မ့ၢ်ပတဲစၢၤန့ၢ်တၢ်လၢ အဝဲသ့ၣ်အဂီၢ်ဧါ. အဒိ ပကကွၢ်သကိး တၢ်အိၣ်သးတခါလီၤ. ဒီပုၢ်ဝဲၢ်မုၣ်တဂၤ အဝၤတမ့ၢ်ယဟိဝၤပှၤအုၣ်အသးဘၣ်. အဃိ ဒီပုၢ်ဝဲၢ်တနီၤန့ၣ် ထံၣ်ဝဲလၢ ဒီပုၢ်ဝဲၢ်မုၣ်တဂၤအံၤ ညီနုၢ်ဟဲထီၣ်တၢ်အိၣ်ဖှိၣ်စဲၤခံ ဒီးတၢ်အိၣ်ဖှိၣ်မ့ၢ်ဝံၤဒီး က့ၤဝဲတဘျီဃီလီၤ. ဒီးအဝဲတဟဲကိးစ့ၢ်ကီး အဖိလၢတၢ်အိၣ်ဖှိၣ်အပူၤ ကြီကြီဘၣ်. အဃိ ပှၤတဲအီၣ်အဂ့ၢ်လၢ ဘၣ်မနုၤအဃိ အတဟဲကိးဃုာ်အဖိလၢ တၢ်အိၣ်ဖှိၣ်အလီၢ်ဘၣ်လဲၣ်. အဝဲကြၢး ဃ့ဆူၣ်အဝၤဒ်သိး အဝၤကဟ့ၣ်အီၤအခွဲးလၢ ကဟဲကိးဃုာ်အဖိလၢ တၢ်အိၣ်ဖှိၣ်အလီၢ်န့ၣ်လီၤ. ဘၣ်ဆၣ် အနီၢ်နီၢ်န့ၣ် ဒီပုၢ်ဝဲၢ်မုၣ်တဂၤအံၤ ဂုာ်ကျဲးစၢးဝဲလၢ အဂ့ၤကတၢၢ်လံ. ခီဖျိလၢ အတအိၣ်ဒီး တၢ်ခွဲးတၢ်ယာ်ခဲလၢာ်ဘၣ်အဃိ အဝဲဆၢတဲာ်တၢ်လၢ အဖိအဂီၢ်ခဲလၢာ်န့ၣ် တသ့ဘၣ်. နမ့ၢ်နၢ်ဟူလၢ ပှၤမ့ၢ်တဲအဂ့ၢ်ဒ်န့ၣ်န့ၣ် နမၤစၢၤအီၤကသ့ဒ်လဲၣ်. နမ့ၢ်စံးပတြၢၤအဂ့ၢ်လၢ ဒီပုၢ်ဝဲၢ်တဖၣ်အမဲာ်ညါလၢ အဝဲမၤတၢ်ဆူၣ် ဒီးဂုာ်ကျဲးစၢး ဟ့ၣ်လီၤအသးလၢ အဟံၣ်ဖိဃီဖိအဂီၢ်န့ၣ် ဘၣ်သ့ၣ်သ့ၣ် ပှၤဂၤတဖၣ် ကအိၣ်ဒီး တၢ်ထံၣ်အဂ့ၤလၢ အဖီခိၣ်လီၤ.
၁၈. ပမၤစၢၤ ပဒီပုၢ်ဝဲၢ်မုၣ်တဖၣ် ကသ့လၢကျဲဒ်လဲၣ်.
၁၈ ပပာ်ဖျါထီၣ်လၢ ပသူၣ်အိၣ်သးအိၣ် ပဒီပုၢ်ဝဲၢ်မုၣ်တဖၣ် ခီဖျိလၢ ပမၤစၢၤအဝဲသ့ၣ် တၢ်လၢအဝဲသ့ၣ်လိၣ်ဘၣ်ဝဲတဖၣ်လီၤ. (၁ ယိၤဟၣ် ၃:၁၈) ဒီပုၢ်ဝဲၢ်မုၣ် အနဲ(ထ်) လၢအဘၣ်ကွၢ်ထွဲ အမိၢ်လၢအအိၣ်တဆူၣ်ဘၣ်န့ၣ် အတဲဝဲလၢ “ဒီပုၢ်ဝဲၢ်မုၣ်ခွါတနီၤ ဟဲစိာ်န့ၢ်ယၤတၢ်အီၣ် ဒီးဟဲကွၢ်ထွဲစၢၤယမိ အဃိယတူၢ်ဘၣ်လၢ ယဒိးန့ၢ်ဘၣ် တၢ်အဲၣ်လၢအဝဲသ့ၣ်တဖၣ် အအိၣ်န့ၣ်လီၤ.” ဒီပုၢ်ဝဲၢ်မုၣ် ကၠီဒၢၤ ဒိးန့ၢ်ဘၣ် တၢ်မၤစၢၤစ့ၢ်ကီးလီၤ. ဒီပုၢ်ဝဲၢ်ခွါတဂၤ မၤစၢၤအီၤဒ်သိး အဝဲကသ့ၣ်ညါ ကွၢ်ထွဲအကါကသ့ ဂ့ၤဂ့ၤအဂီၢ်လီၤ. ဒီပုၢ်ဝဲၢ်မုၣ်အံၤ တဲဝဲလၢ “ယသးခုဒိၣ်မးလၢ ဒီပုၢ်ဝဲၢ်မုၣ်ခွါတဖၣ် သးအိၣ်ယၤ ဒီးဘၣ်ယိၣ်န့ၢ်တၢ်လၢ ယဂီၢ်န့ၣ်လီၤ.”
၁၉. ပမၤစၢၤ ဒီပုၢ်ဝဲၢ်မုၣ်တဖၣ် ကသ့လၢကျဲဒ်လဲၣ်.
၁၉ တၢ်အိၣ်ဖှိၣ်သးပှၢ်တဖၣ်စ့ၢ်ကီး သူၣ်အိၣ်သးအိၣ်ဝဲ ဒီပုၢ်ဝဲၢ်မုၣ်တဖၣ် အတၢ်လိၣ်ဘၣ်န့ၣ်လီၤ. အဝဲသ့ၣ်သ့ၣ်ညါဝဲလၢ ယဟိဝၤယွၤအဲၣ်ဒိးလၢ ပှၤကရ့ဒီး ဒီပုၢ်ဝဲၢ်မုၣ်တဖၣ်လၢ တၢ်အဲၣ်တၢ်ကွံအပူၤလီၤ. (ယၤကိာ် ၁:၂၇) တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိးဝဲ ယ့ၣ်ၡူးဒီးနၢ်ပၢၢ်စၢၤ ပှၤဂၤလီၤ. အဃိ အဝဲသ့ၣ် တပာ်လီၤတၢ်ဘျၢလၢ ကကဲထီၣ်တၢ်ကီတၢ်ခဲလၢ ပှၤဂၤအဂီၢ်ဘၣ်. လၢတၢ်န့ၣ်အလီၢ် အဝဲသ့ၣ်သးအိၣ် မၤစၢၤပှၤဂၤလီၤ. (မးသဲ ၁၅:၂၂-၂၈) ဖဲတၢ်အိၣ်ဖှိၣ်သးပှၢ်တဖၣ် မၤစၢၤဝဲ ဒီပုၢ်ဝဲၢ်မုၣ်တဖၣ်အခါန့ၣ် အဒုးသ့ၣ်ညါ ဒီပုၢ်ဝဲၢ်မုၣ်တဖၣ်လၢ ယဟိဝၤယွၤဒီး အတၢ်ကရၢကရိန့ၣ် အဲၣ်အဝဲသ့ၣ်ဒိၣ်မးလီၤ. ဒီပုၢ်ဝဲၢ်မုၣ် ခံယါ အကရူၢ်အပှၤကွၢ်တၢ် သ့ၣ်ညါဝဲလၢ အကသုးဟံၣ်အခါ ဒီပုၢ်ဝဲၢ်ခွါအံၤ ရဲၣ်ကျဲၤလီၤဝဲ တဘျီဃီလၢ ပှၤကလဲၤမၤစၢၤ ဒီပုၢ်ဝဲၢ်မုၣ်အံၤလီၤ. ဒီပုၢ်ဝဲၢ်မုၣ် ခံယါ တဲဝဲလၢ “အဝဲသ့ၣ် မၤစၢၤယၤအဃိ ယတၢ်ကိၢ်တၢ်ဂီၤ လီၤစှၤဝဲလီၤ. ခီဖျိလၢ အဝဲသ့ၣ်ဟ့ၣ်ဂံၢ်ဟ့ၣ်ဘါယၤ ဒီးမၤစၢၤယၤ အဃိ တၢ်အိၣ်ဖှိၣ်သးပှၢ်တဖၣ်အံၤ ပာ်ဖျါထီၣ်ဝဲလၢ ယမ့ၢ်ပှၤလုၢ်ဒိၣ်ပှ့ၤဒိၣ်လၢ တၢ်အိၣ်ဖှိၣ်အပူၤ ဒီးဖဲယထံၣ်ဘၣ် တၢ်ကီတၢ်ခဲအခါ ယတအိၣ် ထဲတဂၤဧိၤဘၣ်.”
ပဒီပုၢ်ဝဲၢ်မုၣ်ခဲလၢာ်လၢ တၢ်အိၣ်ဖှိၣ်အပူၤန့ၣ် လိၣ်ဘၣ်ပှၤလီၤ
၂၀-၂၁. ပအဲၣ်ပဒီပုၢ်ဝဲၢ်မုၣ်တဖၣ်န့ၣ် ပပာ်ဖျါထီၣ်အီၤ ကသ့ဒ်လဲၣ်.
၂၀ မုၢ်မဆါတနံၤအံၤ ပထံၣ်ဘၣ် ပဒီပုၢ်ဝဲၢ်မုၣ်အါဂၤ လၢအမၤတၢ်ဆူၣ်ဆူၣ်န့ၣ် လိၣ်ဘၣ်ပတၢ်မၤစၢၤလီၤ. ဒ်ပမၤလိန့ၢ်ဘၣ်တၢ်လၢ ယ့ၣ်ၡူးအဒိအတဲာ်အသိး ပမၤစၢၤအဝဲသ့ၣ်သ့ ခီဖျိပဟ့ၣ် အဝဲသ့ၣ်တၢ်ဆၢကတီၢ် ဒီးရ့ဒီးအဝဲသ့ၣ်လီၤ. ခီဖျိလၢ အဝဲသ့ၣ်မၤ ကစၢ်ယွၤတၢ်မၤအဃိ ပပာ်ဖျါထီၣ် တၢ်စံးဘျုးစံးဖှိၣ် အဝဲသ့ၣ်သ့လီၤ. ဒီးအလီၢ်မ့ၢ်အိၣ်လၢ ပကဘၣ်တဲစၢၤန့ၢ်တၢ်လၢ အဝဲသ့ၣ်အဂီၢ်န့ၣ် ပကမၤအီၤလီၤ.
၂၁ တၢ်မၢဖိပီလူး ကွဲးန့ၢ်ဝဲ လံာ်ပရၢလၢ ဒီပုၢ်ဝဲၢ်တဖၣ်လၢ အအိၣ်လၢ ရိမ့ၤအပူၤလီၤ. ဖဲအလံာ်ပရၢ အကတၢၢ်န့ၣ် အဝဲယၢၤထီၣ်ဝဲ ဒီပုၢ်ဝဲၢ်မုၣ် ခွံဂၤအဂ့ၢ်လီၤ. (ရိမ့ၤ ၁၆:၁, ၃, ၆, ၁၂, ၁၃, ၁၅) ဖဲဒီပုၢ်ဝဲၢ်မုၣ်တဖၣ်အံၤ နၢ်ဟူဘၣ်ဝဲစီၤပီလူး အတၢ်ဆၢဂ့ၤဆၢဝါဒီး အတၢ်စံးပတြၢၤအခါ အဝဲသ့ၣ်ကသးခုဝဲ သပှၢ်ကတၢၢ်လီၤ. လၢတၢ်အိၣ်ဖှိၣ်အပူၤ ပဝဲစ့ၢ်ကီး ပမၤဒ်န့ၣ်သ့လီၤ. ပမၤဒ်န့ၣ်န့ၣ် မ့ၢ်ဝဲပပာ်ဖျါထီၣ်လၢ ပအဲၣ်ဒီပုၢ်ဝဲၢ်မုၣ်တဖၣ် ဒ်ပဟံၣ်ဖိဃီဖိအသိးလီၤ.
တၢ်သးဝံၣ် ၁၃၆ ယဟိဝၤယွၤဟ့ၣ်လီၤ “တၢ်အဘူးအလဲ”
^ လံာ်အဆၢ. 5 ခရံာ်ဖိဒီပုၢ်ဝဲၢ်မုၣ်တဖၣ် ထံၣ်ဘၣ်ဒီး တၢ်ကီတၢ်ခဲအါမးလီၤ. တၢ်မၤလိအံၤ ပကတဲသကိး ပဆီၣ်ထွဲမၤစၢၤ ပဒီပုၢ်ဝဲၢ်မုၣ်တဖၣ် ခီဖျိပကွၢ်လိမၤဒိး ယ့ၣ်ၡူးအဒိအတဲာ် ကသ့ဒ်လဲၣ်. ယ့ၣ်ၡူးဟ့ၣ်လီၤ အတၢ်ဆၢကတီၢ်လၢ ကရ့ဒီးပိာ်မုၣ်တဖၣ်, ယ့ၣ်ၡူးပာ်လုၢ်ပာ်ပှ့ၤဒီး ဒီသဒၢအဝဲသ့ၣ်န့ၣ် ပကမၤလိဘၣ်စ့ၢ်ကီးလီၤ.
^ လံာ်အဆၢ. 5 ပှၤမံၤတနီၤ ဘၣ်တၢ်ဆီတလဲအီၤလီၤ.
^ လံာ်အဆၢ. 6 လံာ်ပီညါဂံၢ်ထံးတဘ့ၣ်လၢ ဘၣ်ဃးဒီး လံာ်စီဆှံန့ၣ် တဲဝဲလၢ “တၢ်လၢသရၣ်န့ၣ် အပျဲၢ်အဘီၣ်တဖၣ် ဘၣ်ဆ့ၣ်နီၤဝဲလၢ အခီၣ်ထံးလီၤ. အပျဲၢ်အဘီၣ်တဖၣ်န့ၣ် မၤလိသ့အသး ဒ်သိးကကဲထီၣ်ဝဲ သရၣ်အဂီၢ်လီၤ. ဘၣ်ဆၣ် မ့မ့ၢ်လၢ ပှၤပိာ်မုၣ်န့ၣ် တၢ်ခွဲးတၢ်ယာ်တအိၣ်လၢ ကကဲထီၣ်ဘၣ် သရၣ်အဂီၢ်ဘၣ်. အဃိ ဖဲနီၢ်မၤရံဆ့ၣ်နီၤလၢ ယ့ၣ်ၡူးအခီၣ်ထံးဒီး အဲၣ်ဒိးမၤလိတၢ်လၢ ယ့ၣ်ၡူးအအိၣ်အခါ ပှၤယူဒၤဖိတဖၣ် ကကမၢကမၣ်ဝဲဒၣ်လီၤ.”
^ လံာ်အဆၢ. 9 တၢ်အိၣ်ဖှိၣ်သးပှၢ်တဖၣ် ဖဲအမၤစၢၤဝဲ ဒီပုၢ်ဝဲၢ်မုၣ်တဖၣ်ခါ အဝဲသ့ၣ် အိၣ်ဒီးတၢ်ပလီၢ်သူၣ် ပလီၢ်သးလီၤ. အဒိ ဖဲအဝဲသ့ၣ် မ့ၢ်လဲၤအိၣ်သကိးဝဲ ဒီပုၢ်ဝဲၢ်မုၣ် တဂၤဂ့ၤ တဂၤဂ့ၤအခါ အဝဲသ့ၣ်တလဲၤ ထဲတဂၤဧိၤဘၣ်.
^ လံာ်အဆၢ. 65 တၢ်တဲဖျါထီၣ်တၢ်ဂီၤ အခီပညီ– ကွၢ်လိမၤဒိး ယ့ၣ်ၡူး အတၢ်သူၣ်အိၣ်သးအိၣ် ဒီပုၢ်ဝဲၢ်မုၣ်တဖၣ်, ဒီပုၢ်ဝဲၢ်ခွါတဂၤ မၤစၢၤဒီပုၢ်ဝဲၢ်မုၣ်ခံဂၤလၢ ကဆီတလဲဝဲ အကါပ့လီၤ. လၢအဂၤတဂၤန့ၣ် လဲၤဟးအိၣ်သကိးဝဲ ဒီပုၢ်ဝဲၢ်မုၣ်လၢ အအိၣ်တဆူၣ်ဘၣ်လီၤ. ဒီးသၢခါတခါ ဒီပုၢ်ဝဲၢ်ခွါဒီးအမါ လဲၤမၤဝဲ ဟံၣ်ဖိဃီဖိ တၢ်မၤလိလံာ်စီဆှံ လၢဒီပုၢ်ဝဲၢ်မုၣ် ဒီးအဖိမုၣ်လီၤ.
