1. Yirugana musinke ava rugana vanavazinyetukadi, nye maudigu musinke ava ligwanekere nago vamwe? (Tara efano lyopontunda.)

OSE kuhafa pokumona vanavazinyetukadi wovanzi kuna kurugana unene mombungakriste. Pasihonena, awo kulihameka momapongo nomokuzuvhisa. Vamwe kupakera mbili Sinyanga ntani kulikida elituromo movanavazinyetu. Nye nampili ngoso, vanavazinyetu owo nawo kuligwanekera nomaudigu. Vamwe kupakera mbili vakurona vawo wovakurupe. Ano vamwe kulididimikira marwaneso govanekoro. Ano vadike vamwe kurugana unene va pakere mbili vana vawo.

2. Morwasinke natu litulira mo unene mokukorangeda vanavazinyetukadi?

² Morwasinke natu litulira mo mokukorangeda vanavazinyetukadi? Morwa mouzuni ou, vakadi kapi ava va tekura nefumadeko. Nye Bibeli kutukorangeda tu tekure vakadi nefumadeko. Pasihonena, mupositoli Paurusa kwa tanterere mbungakriste zomoRoma zi tambure Foibe ntani nokumupa evatero eli ga hepere. (Rom. 16:1, 2) Apa Paurusa ga kere mufalisayi, age kwa kere mombunga ezi ngazi tara vakadi asi kwato mulyo ntani nokuvatekura momudona. Ano apa ga ya kere Mukriste, age kwa honenene Jesus pokutekura vakadi nefumadeko ntani nombili.—1 Kol. 11:1.

3. Ngapi omu Jesus nga tekura vakadi ntani nava ngava rugana mpango zaKarunga?

³ Jesus nga tekura vakadi nefumadeko. (Joh. 4:27) Ntani age kapi ngava tara ngwendi omu ngava va tara vampitisili womaukarelikarunga goVajuda. Buke zimwe kwa tanta asi: “Jesus kapi ga uyungire yininke eyi ya likidire asi kapi ga fumadekere vakadi.” Nye age kwa fumadekere unene vakadi ava ngava rugana mpango zoGuhwe. Ntani age nga tara vakadi owo ngwendi vambya vendi novampanza vendi. Apa Jesus ga tumbwire vakaume vendi, age kwa tumbwire vagara novakadi.—Mat. 12:50.

4. Yisinke natu ka zogera mosirongwa esi?

 ⁴ Jesus nga vatere nkenye apa vakadi ava ngava karere Karunga. Age nga yi likida asi awo mulyo ntani ngava popere pokuvauyungira po. Tu zeni tuka zogere omu natu honena Jesus pokugazadara ko vanavazinyetukadi.

5. Morwasinke ayi digoperere vanavazinyetukadi vamwe kugwana vakaume?

⁵ Natuvenye twa hepa vakaume meparu lyetu. Nye poyiruwo yimwe, vanavazinyetu wovakadi kuvadigopera kugwana vakaume. Morwasinke? Tu tareni eyi va uyunga ko vanavazinyetukadi vamwe. Munazinyetu Jordan * kwa tanta asi: “Morwa ame nimudike, ame kulizuvha asi kwato mulyo mombungakriste ntani kulizuvha hena asi kapi na hamena mombungakriste.” Muzuvhisi gokukarerera Kristen ogu ga dirukira oku kuna hepa vazuvhisi kwa tanta asi: “Nsene ove o mu pe mombungakriste, kulizuvha ngwendi nyovelike ono kara.” Vanavazinyetu vamwe nampo yimo ava lizuvhu ngoso. Vanavazinyetu ava va tunga nekoro lyawo lya hana asi Nombangi, kuvhura kuvadigopera kutulisa po ukaume wounene kumwe nawo ntani vanavazinyetu owo kulizuvha asi velike vana kara mombungakriste. Vanavazinyetu vamwe wovakadi kuvhura valizuvhe asi velike vana kara morwa awo kupakera mbili vekoro lyawo ava ava vere momambo. Annette kwa tanta asi: “Apa vanavazinyetu ngava zigida nge tuka hafere po, ayo kapi ngayi tompoka nge morwa ame ngani pakere mbili oyina membo.”

6. Ngapi omu Jesus ga vaterere Mariya naMalita, kuliza nomu va yi tumbura mwaRukasa 10:38-42?

⁶ Jesus nga kara kumwe novakadi ava va kulire pampepo ntani age kwa kere kaume gomuwa. Gazadara ko ukaume ou ga tulisire po kumwe naMariya naMalita ava va kere asi nampo vadike. (Resa Rukasa 10:38-42.) Kupitira mononkango dendi ntani moyirugana, Jesus ga vaterere vakadi owo valizuvhe asi awo mulyo. Mariya kwa hefe apa ga hingilire konompadi daJesus. * Ano Malita apa ga yi mwene asi Mariya kapi ana ku mu vatera va tereke nondya, makura yipo ga tanterere Jesus omu ga lizuvhire. Ano Jesus kwa vaterere vakadi owo vavali yipo va lironge yirongwa yomulyo. Jesus kwa yi likidire asi ga hara vakadi owo nampanzawo Rasarusa pokuvadingura poyiruwo noyiruwo. (Joh. 12:1-3) Yipo nye, apa Rasarusa ga verere unene, Mariya naMalita kwa pulire evatero kwaJesus morwa age kwa kere kaume kawo.—Joh. 11:3, 5.

7. Nkedi musinke zimwe natu vhura kukorangeda vanavazinyetukadi?

⁷ Vanavazinyetukadi vamwe, mapongo kuna kara mpito zonene ezi ava vhuru kukara novapuli vakwawo. Yipo nye, twa hepa kuvatambura nokuzogera kumwe nawo ntani nokuyilikida asi twa va hara. Jordan ogu tuna tumbura nare kwa tanta asi: “Ayo kuhengagwida nge apa vanavazinyetu ava pandadeke nge komalimbururo gange ntani apa ava pitura nge mokuzuvhisa ndi apa ava hengangwidange mononkedi dimwe hena.” Twa hepa kuyilikida kovanavazinyetu wovakadi asi awo mulyo kwetu. Munazinyetu gomukadi Kia kwa tanta asi: “Apa ani dili kuza komapongo, vanavazinyetu kutjangera nge, yipo va dive omu nina karere. Eyi kulikida asi awo kwa hara nge.”

8. Mononkedi musinke dimwe natu honena Jesus?

⁸ Ngwendi Jesus, nose twa hepa kulitulira po siruwo sokukara kumwe novanavazinyetu wovakadi. Pasihonena, kuvhura tu va zigide komambo getu tu ya lye kumwe nawo ndi tu ya hafere  po yimwe. Yipo nye, twa hepa kudivilisa asi nonzogera detu kuna kara dekorangedo. (Rom. 1:11, 12) Vakuronambunga nawo va hepa kukara nonkareso ngwendi zezi ga kere nazo Jesus. Age kwa uyungire asi ayo kapisi ureru kwa vamwe mokukara vadike. Nye age kwa tente hena asi kukwara ndi kukara novanona kapisi yiyo ayi reta ruhafo rokukarerera meparu. (Ruk. 11:27, 28) Nye ose kuvhura tu hafe nsene tu tura muhowo sirugana saJehova meparu lyetu.—Mat. 19:12.

9. Ngapi omu vakuronambunga nava vatera vanavazinyetu wovakadi?

⁹ Vakuronambunga va hepa kutekura vanavazinyetukadi ngwendi vampanza vawo novazinya vawo. (1 Tim. 5:1, 2) Vakuronambunga va hepa kulitulira po siruwo sokuuyunga kumwe novanavazinyetukadi komeho ndi konyima zepongo. Munazinyetukadi Kristen ogu katu tumbura kwa tanta asi: “Mukuronambunga gumwe ga yi dimbwilire asi ame kwa kere noyirugana yoyinzi, makura yipo ga pulire nge. Eyi kwa hafesere nge mokumona asi ga kere nosinka sosinene kwange.” Apa vakuronambunga ava litulire po siruwo sokuuyunga kumwe novanavazinyetukadi, awo kuyilikida asi va kara nosinka kwawo. * Munazinyetu Annette ogu ka tu tumbura kwa uyungire konda zimwe zomulyo zokuuyunga kumwe novakuronambunga. Age kwa tanta  asi: “Ame kuyadiva unene vakuronambunga ntani nawo kuya diva nge nawa. Ano apa ani kara nomaudigu, ayo kukarera nge ureru kuvapura evatero.”

10. Yisinke nayi vatera vanavazinyetukadi va hafe?

¹⁰ Natuvenye kuhafa apa wopeke ava tu pandura kweyi atu rugana. Nye ayo kutudompesa apa vantu ava dili kutupandura. Munazinyetukadi Abigail muzuvhisi gokukarerera gomudike kwa uyunga asi poyiruwo yimwe age kulizuvha asi vanavazinyetu kapi va kara nosinka kwendi. Age kwa tanta asi: “Vantu kapi va diva nge, awo kwa diva tupu vakondi vange novakuru vange ntani novambya vange.” Tu tareni eyi ga uyunga munazinyetu gomukadi Pam. Apa ga kere mudike, age kwa kere mutumwa nomvhura dononzi. Ano konyima yipo ga tengwire kosirongo sawo mokukapakera mbili vakondi vendi. Nomvhura dendi 70 ntani simpe kuna kutwikira uzuvhisi wokukarerera. Pam kwa tanta asi: “Apa wopeke ava pandura nge kosirugana sange, ayo kuvatera nge sili unene.”

11. Ngapi omu Jesus ga yi likidire asi ga haferere yirugana yovakadi ava ngazi nawo mokuzuvhisa?

¹¹ Jesus ga haferere evatero eli ga gwene kovakadi ava ngava mu kwafa “nemona lyawo.” (Ruk. 8:1-3) Nampili ngomu ngava mu kwafa, nye Jesus kwava rongere usili womoBibeli. Pasihonena, ga va tanterere asi age ngava mu dipaga ntani ngava mu vhumbura. (Ruk. 24:5-8) Age kwa wapaikilire vakadi komaudigu aga gava ndindilire komeho ngwendi moomu ga yi rugene kovapositoli. (Mar. 9:30-32; 10:32-34) Nampili ngomu vapositoli va dukire apa Jesus va mu kwete, vakadi vamwe kwa mu kwatesere ko nokukara pepi nendi apa va mu dipagere kositji sokukoresa.—Mat. 26:56; Mar. 15:40, 41.

12. Yirugana musinke ga pere Jesus vakadi?

¹² Jesus kwa pere vakadi yirugana yomulyo. Pasihonena, vakadi yiwo va hovere kuyidiva asi Jesus vana mu vhumbura. Age kwa pulire vakadi owo va ka tantere vapositoli asi vana mu vhumbura koufe. (Mat. 28:5, 9, 10) Vakadi nampo nawo yipo va kere poPentekoste momvhura 33, apa varongwa vava poomwenene mpepo zokupongoka. Nsene yimo ngoso, vakadi owo vagwavekere nawo va tamekere kuuyunga momaraka nokutantera ko wopeke “yirugana yoyinene yaKarunga.”—Yirug. 1:14; 2:2-4, 11.

13. Yisinke vana kurugana vakadi woVakriste naina ntani ngapi natu va pandura koyirugana yawo?

¹³ Vanavazinyetukadi va hepa epandadeko kwanayinye eyi vana kurugana mosirugana saJehova. Eyi kuna kwatere mo kutunga, nokuwapukurura matungo, kuzuvhisira momaraka gapeke ntani kuvatera koBeteli. Awo kuvatera moyimpagwa ntani kutoroka yimbapiratjangwa yetu, ano vamwe vazuvhisi wokukarerera ntani vatumwa. Awo hena kuza kosikora zovazuvhisi wokukarerera ntani zovazuvhisi woUhompa ntani koSikora zaGiliyata. Awo kuvatera hena vagara vawo yipo va sikise mo yitumbukira yawo yomombungakriste, nayimwe yomombunga zaJehova. Vanavazinyetu wovagara kurugana yirugana yoyinzi, yipo va vatere wovanzi. Nye pwa hana evatero lyovakadi vawo, yirugana eyi ngano ku va digopera unene. (Efe. 4:8) Gazadara ko nonkedi dimwe omu novatera vanavazinyetu ava wovakadi.

14. Kuliza nononkango da kara mEpisarome 68:11, yisinke ava rugana vakuronambunga ava va kara nonondunge?

¹⁴ Vakuronambunga wonondunge va yi dimburura asi vanavazinyetukadi kwa kara neharo lyokurugana ntani va diva nawa kuzuvhisa mbudi zongwa. (Resa Episarome 68:11.) Yipo nye, vakuronambunga kuhetekera ko kulirongera ko kovanavazinyetukadi owo. Abigail ogu tuna tumbura kwa tanta asi age kuyihafera apa vapuli vakwawo ava mu pura omu ayi mu tompoka kuzuvhisira vantu womomukunda. Age kwa tanta asi: “Eyi kuvatera nge ni dimburure asi  Jehova kwa pange sirugana somulyo mombunga zendi.” Vakuronambunga vayi dimburura asi vanavazinyetukadi wovakondi wovalimburukwi, va diva nawa kuvatera vanavazinyetukadi wovadinkatu apa ava piti momaudigu. (Tit. 2:3-5) Yosili, twa hepa kuhara vanavazinyetukadi nokuvapandura.

15. Siruwo musinke ava hepa evatero vanavazinyetukadi?

¹⁵ Poyiruwo yimwe, vanavazinyetukadi kuhepa gumwe ogu nava uyungira po ndi nava vatera momaudigu. (Jes. 1:17) Pasihonena, munazinyetu ogu ga fisa mugara gwendi ndi ogu va zumba, kuvhura a hepe gumwe ogu na vhura ku mu uyungira po ndi ogu na mu vatera noyihepwa yendi yimwe eyi nga rugana mugara gwendi. Munazinyetukadi gomukurupe kuvhura a hepe gumwe ogu na vhura ku ka mu uyungira po kwa ndokotora. Ndi munazinyetukadi gomuzuvhisi gokukarerera ogu ga kara noyitumbukira yapeke mombunga zaJehova, kuvhura a hepe evatero lyoku mu uyungira po kwava ava mu ninki asi kapi a zuvhisa unene ngwendi vazuvhisi vakwawo wokukarerera. Monkedi musinke hena natu vatera vanavazinyetukadi? Tu zeni tu kona-kone hena sihonena saJesus.

16. Kuliza naMarukusa 14:3-9, ngapi omu Jesus ga uyungilire po Mariya?

¹⁶ Jesus kwa uyungilire po usimbu Mariya apa vamwe va dilire kukwata egano konda zeyi ga ruganene yininke yongandi. Pasihonena, Jesus kwa uyungilire po Mariya apa Malita ga sivanene kuhamena Mariya. (Ruk. 10:38-42) Ntani age kwa uyungilire po Mariya sikando sauvali apa vamwe va gazarere asi eyi ga rugene kwa kere epuko. (Resa Marukusa 14:3-9.) Jesus ga divire konda zeyi Mariya ga yi ruganene ntani age kwa uyungire asi: “Age kuna ruganene nge sirugana sosiwa. . . . Age kuna rugana paapa ga hulira.” Ntani Jesus kwa pumbire hena asi sihonena saMariya sosiwa ngava si diva “nkenye oku ngava udisira Mbudi zoNgwa ezi mouzuni mudima.” Ayo kuhafesa mokumona asi Jesus kwa uyungire asi mbudi zongwa ngava zi divisa mouzuni mudima apa ga pandadekere Mariya kweyi ga rugene. Nonkango edi nampo da hengagwidire Mariya nampili ngomu va mu kuyaukire pomuhowo.

17. Posiruwo musinke natu uyungira po vanavazinyetukadi? Gava sihonena.

¹⁷ Ove kuuyungira po vanavazinyetukadi nsene vana hepa hepa evatero ndi? Pasihonena, tu tareni sihonena esi sina kukwama ko. Vanavazinyetu womombungakriste kunomena munazinyetukadi ogu a hulilire nkenye apa komapongo nokuza usimbu kembo konyima zokupwa epongo. Ntani awo va dimburura asi age kapi a wiza novana vendi komapongo. Vanavazinyetu owo kumupuragera asi morwasinke a dilire kuninka mugara gwendi yipo a mu pulisire kuwiza novanona nkenye apa komapongo. Nye eyi ava dili kudimburura yeyi asi munazinyetu ogo kukondja paapa ga hulira a wize komapongo nagenye ntani age kapisi yige gelike ga kara nononkondo dokutokora nayinye yokuhamena vana vendi. Yisinke norugana nsene o dimburura asi vamwe kuna kuuyunga yininke yokudira kuwapera kuhamena munazinyetu gongandi? Nsene o pandadeka munazinyetukadi ogo koyirugana yendi nayinye yoyiwa nokutantera wopeke eyi a rugana, eyi nayi ninkisa vanavazinyetu va hageke kumuuyunga momudona.

18. Mononkedi musinke hena dimwe natu vatera vanavazinyetukadi?

¹⁸ Nsene tu vatera vanavazinyetukadi pokuvavatera neyi vana hepa, ayo nga yi likida asi ose twa va hara. (1 Joh. 3:18) Munazinyetukadi Annette ogu nga pakere mbili ozina ava ngava vere kwa uyunga asi: “Vanavazinyetu vamwe kuwiza va ya vatere nge pokukara kumwe nonane, yi po ni vhure kugwana siruwo sokurugana nayopeke ano pamwe awo kureta nondya. Ano eyi  kwa ninkisire nge ni lizuvhe asi awo kwa hara nge ntani ame mulyo mombungakriste.” Munazinyetukadi Jordan nage kwa gwene evatero. Munazinyetugara gumwe kwa vaterere Jordan a dive omu na pakera nawa mbili etuwa lyendi. Jordan kwa tanta asi: “Ayo kuhafesa nge pokudiva asi vanavazinyetu va kara nosinka kwange.”

19. Mononkedi musinke hena dimwe vakuronambunga nava vatera vanavazinyetukadi?

¹⁹ Mokulifana, vakuronambunga va hepa kupakera mbili vanavazinyetukadi. Awo va yi diva asi Jehova kuna hara va tekure vanavazinyetukadi monkedi zongwa. (Jak. 1:27) Vakuronambunga va hepa kuhonena Jesus yipo va kare vana liwapaikire mokuvatera vakwawo. Eyi kutanta asi kapisi va ture po noveta asi siruwo musinke ngano sokupurakena kovakwawo nokuvavatera, nye va hepa kumanguruka kuyirugana nkenye apa. (Mat. 15:22-28) Apa vakuronambunga ava vatere vanavazinyetukadi, ayo kuvavatera va lizuvhe asi Jehova kwava hara. Apa mukuronambunga ogu nga pitisire kambunga koyirugana yokuzuvhisa omu ga kere Kia ga dimbwilire asi Kia kuna kudirukira kembo lya peke, age kwa mu vaterere pangenderera. Kia kwa tanta asi: “Ame kapi na kere nosinka unene morwa vanavazinyetu kwa pere nge makorangedo aga na hepere posiruwo sina. Ntani vakuronambunga kwa yi likidire asi ame mulyo unene mombunga zaJehova ntani kapi ngava sigilira nge nsene momaudigu.”

20-21. Ngapi natu yi likida asi ose twa hara vanavazinyetukadi navenye womomgungakriste?

²⁰ Nsene tu tara mombungakriste, tatu dimburura asi mwa kara vanavazinyetukadi wovanzi wokurugana unene ntani vana hepa evatero lyetu. Kosihonena saJesus tuna lirongere ko asi ose kuvhura tu vatere vanavazinyetukadi owo pokukara kumwe nawo ntani nokuvadiva nawa. Twa hepa kuvapandura koyirugana yawo yoyiwa. Ntani twa hepa kuvauyungira po nsene hepero.

²¹ Apa Paurusa ga tjangerere mbilive Varoma, kouhura wombilive zendi age kwa tumbwire madina 9 goVakriste wovakadi ava ga kundisilire po. (Rom. 16:1, 3, 6, 12, 13, 15) Yosili, vakadi owo nampo kwa hefe apa va zuvhire makundo ogo nepandadeko. Mokulifana, ya kara nomulyo nose tu pandadeka vanavazinyetukadi womombungakriste zetu. Apa atu yi rugana ngoso, ose kuvalikida asi twa va hara morwa ose epata limwe.